ˈö Matiö ˗ya ˗bɛnzë 3:1-17
3 ˈˈTʋ̈ŋ do ˈbha ˈka, Zan mɛnbɔyibhaamɛn ˗yö ˗nu ˗zlanwo pö ˈˈyɛtadhɛ ˈö Zude ˗sɛ ˈgü bhë ˗a ˈgü,
2 ˈö˗ pö: «˗Ka ka ꞊kwaa ka ˗bha ꞊sɔŋ yaa ˗nu ˗zü, ˈka ka zuʋ̈ˈˈ slëëˈˈ, ˗a ˗gɛn ˗mü ꞊dhɛ ˗Gblüdëdhɛ ˈö dhaŋ˗ ˈgü* ˗ya yö ꞊klöö˗.»
3 ˗A Zan ˈö ˈˈdhʋ̈ bhë, yö ˈnën ˗Zlan ˗wodhiʋ̈lomɛn Izai ˗ya ˗wɔn ꞊blɛɛ ˈkpa ˈö˗ pö: «Mɛn do ˈbhaa ˗yö ˈˈgbla ˗ni ˈgü ˈˈyɛta ˈö˗ pö ˗ni ˈgü: ‹˗Ka Zoova ˗bha ʒiaan baaˈˈ, ˈka˗ ˗bha ˗kpinŋga ˗nu dɔ ꞊zinŋgü!›»
4 Sɔ ˈwo˗ ˗yökë ꞊ɲɔɔnmian kaa˗ ˈka yö ˈnën kun Zan ˗bha, ˈyö wü kwi ˈˈpɛn ˗ʒiö ˗a ˗ta ö vɛɛdhö. ˗Kpaa waa ˈˈzɔ ˈˈɲɔn ˗nu ˈwo ˈˈblüblü ˈyö ˈwo kun ˗a ˗bhöpë -nu ˈka.
5 Mɛn ˗nu ˗wo ˗kun ˈgo ˗ni ˈgü Zedhizadhɛmö ˗dhɛ ˗nu, Zude ˗sɛ ˈgü ˗dhɛ ˗nu waa ˗dhɛ ˈˈpɛpɛ ˈwo Zuudɛn ga ˗züzü ˗an ˈgü ˈö ˈwo dho Zan ˈˈpiʋ̈,
6 ˈyö ˗an bɔ ˈˈyi ꞊bhaa* Zuudɛn ga ꞊bhaa, kö ˗wo wo ˈˈdhi bho ˗ni ˈgü wo ˗bha ꞊sɔŋ yaa ˗nu ˗ta zuʋ̈ˈˈ ˈˈpuu ˈka.
7 ˈDhɛ ˈö˗ yö ꞊dhɛ Fadhiziɛn ˗nu waa Sadusiɛn ˗nu ꞊va ˗wo nu ˗ni ˈgü kö ˗yö wo bɔ ˈˈyi ꞊bhaa ˈpö, ˈyö˗ pö ˗an ˗dhɛ: «꞊Bhöö ꞊suugünën ˗nu, ˈde ka ꞊kpɔɔ kö ˈka ꞊duëë ˗Zlan ˗bha ˗naanzuëdhe ˈö nu ˗ni ˈgü bhë, ˗a ˗gɔ?
8 ˈWɔn ˗nu ˈwo ˗dho ˗a ˗zɔn ꞊dhɛ ˈka ka zuʋ̈ˈˈ slëëˈˈ ˗ka ˗an kë ˈsa.
9 ˈKa ˗dho ka ˗de ˈsü ꞊va ˈö ˈka˗ pö ka ˗de ˗dhɛ: ‹Ablaamö ꞊suugünën ˗nu ˗mü yi ˈka.› A˗ ˗pö ka ˗dhɛ ꞊dhɛ ˗Zlan ꞊mɔɔn˗ ˗bha ˈö˗ ˗kë ˈö Ablaamö ꞊suugünën ˗nu ˗wo go ˗gwö ˗nu ˈwo yö ˗an ˈgü.
10 ꞊Dua ˗yö wɔ ˗sü ˈka ˈˈdhü ˗nu ꞊gɛnŋdhö ˈsaadhö. ˈˈDhü ˈˈpɛpɛ ˈö ˈwaa wo bhɛ ˗së ˗ya, ˗wo ˗dho ˗an ˈˈkan ˈö ˈwo ˗an ˗zuö ˈˈshiʋ̈ ˈgü.
11 Man ˗zë ˈˈyi ˈnën ˈa ˗dho ka bɔ ˗a ꞊bhaa, ˗a ˗gɛn ˗mü ꞊dhɛ ˈka ka zuʋ̈ˈˈ slëëˈˈ. ˈˈKɛɛ mɛn ˈö nu ˗ni ˈgü n ꞊taabha bhë, ˗yö ˗dho ö ˗bha kë ˗zuu ˈˈslʋ̈ʋ̈slʋ̈ waa ˈˈshiʋ̈* ˗an ˈka. ˗A ꞊bhlëë ˗yö ˈkpii˗ ˈö ˗ʒiö ˗a ˈka n ˗ta. ˗Sabha ˗de ˈö˗ ˗gɛn ˗bha, ˗a ˈˈse ˈyaa n ˗dhɛ kö ˈa˗ bho mü.
12 ˗A ˗bha pë ˗piö ˗a ˈka ˗pë ˗ya ꞊kwɛɛ˗. ˗Yö ˗dho ö ˗bha ˈble˗ ˗mandhɛ ˗gwö ˈpapadhö, ˈö ˈble˗ ga ˗nu dho ˈkwëë˗ ˈö ˗an ˗lo ö ˗bha ˗bhöpë ˗lo ˗a ˈgü ˗kɔ ˈgü. ˈˈKɛɛ ˗an ˗gbo ˗nu ˗zë, ˗yö ˗dho ˗an ˈˈgʋ̈ ˈˈshiʋ̈ ˈö ˈwaa ꞊mɔɔn˗ ˗bha kö ˗wa dhuuˈˈ toŋtoŋdhö ˗a ˈgü.»
13 ꞊Taabha Yesu ˗yö ˗go Galile ˗sɛ ˈgü ˈö nu Zan ˈˈpiʋ̈ Zuudɛn ꞊bhaa kö ˗yö ö bɔ ˈˈyi ꞊bhaa.
14 ˈˈKɛɛ Zan ˈyaa kun ˈˈwɩ ˗ni ˈgü ˗a ˗bha. ˈYö˗ pö ˗a ˗dhɛ: «Man ˈnën n dua ˈdhö ˗mü kö ˈa nu ü ˈˈpiʋ̈ kö ˈü n bɔ ˈˈyi ꞊bhaa, ˈyö bhi ˗zë ˈü nu n ˈˈpiʋ̈ ˗ee?»
15 ˈYö Yesu ˗ya pö ˗a ˗dhɛ: «˗Bhö ˈˈwɩ ˗a ˗bha kö ˗yö kë ˈˈdhʋ̈ ˈˈtʋ̈ŋ ˈö yö ˗a ˈgü, ˗a ˗gɛn ˗mü ꞊dhɛ ˗kɔ ˈö ˈkwa dho ˈwɔn ˈˈpɛpɛ ˈwo kpɛnŋdhö ˗an kë ˗a ˈka, ˈyö bhë.» ˈDhɛ ˈö ˗kë ˈˈdhʋ̈, ˈyö Zan ˗yö ˗wɩ ˗a ˗bha.
16 ˈDhɛ ˈö˗ bɔ ˈˈyi ꞊bhaa, ˈyö Yesu ˗yö to mü ˈö ꞊luu. ˈWo dho ˈˈkan wo ˗ta kö dhaŋ˗ ˈˈdhi ˗ya ˈˈpʋ, ˈyö Zan ˗yö ˗kpan ˗Zlan ˗bha ˗zuu ˗bha kö ˗yö yɔɔˈˈ ˗ni ˈgü Yesu ˗ta ꞊dhɛ ˗toŋ ˈdhö.
17 ˈDhɛ ˈö ˗kë ˈˈdhʋ̈, ˈyö ˗wo ˈbha ˗yö ˗wɩ dhaŋ˗ ˈgü ˈö˗ pö: «N Gbö dhɔɔbhaasü ˈnën ˈö dɔ bhë, ˗yö n zuʋ̈ˈˈ ꞊nii ˗da ꞊dedewo.»
-Zoto -a ˈˈpiʋ̈ -wɔn -nu
^ ˗Wo ˗we «˗Zlan ˗bha ˗Gblüdëdhɛ» ˈka.
^ Ɛɛnˈˈ «ˈö ˗an ˗dhɛ ꞊gban mën ˈˈyi ꞊bhaa.»
^ ˗Wo ˗we «˗kɔ ˗yɛ mɛn ˈbhaa ˗nu ˗bha ˗sü ˈö ˗zuu ˈˈslʋ̈ʋ̈slʋ̈ ˈka waa mɛn ˈbhaa ˗nu ˈgüshiʋ̈sü ˈö ˈˈshiʋ̈ ˈka» ˗an ˈka.
