ˈö Matiö ˗ya ˗bɛnzë 5:1-48
-
DHIAŊ ˈÖ YESU ˗YA ZË ˗TƆN ꞊TROO (1-48)
-
Yesu ˗yö ˗ya mɛn ˗nu ꞊klaŋkësü ˗bha ˗tɔn ꞊troo (1, 2)
-
Pë ˈˈseishiö ˈö ˈwo zuʋ̈gblüdhi nu mɛn ˗dhɛ (3-12)
-
ˈˈKpɔnŋtaadhɛ ˗bha ꞊wee waa˗ ˗bha ˗dhɛpuudhɛ (13-16)
-
Yesu ˗yö ˗nu kö ˈTɔŋ˗ ˗yö yökodhiʋ̈ (17-20)
-
Zuʋ̈dhiʋ̈dhɛ (21-26), gɔɔn˗ ɛɛnˈˈ ö ˗bha dhe ˈto ˗sü ˈö ˈwo ꞊niënŋ (27-30), dhe ˗bho ˈˈblü ˗sü (31, 32), ö ˗wo ˗bhö ˗sü (33-37), bhlɔ ˗bho ö ˗de ˈgü ˗sü (38-42), mɛn ˈyɔɔ˗ ˗dhɔ ˗bha mɛn kë ˗sü (43-48)
-
5 ˈDhɛ ˈö Yesu ˗yö ˗kpan mɛn ꞊va ˗bha, ˈyö ˗da ˗tɔntadhɛ do ˈgü ˈö ˈɲaannu, ˈyö˗ ˗bha gwëëˈˈ ˗nu ˗wo ꞊ɲɔɔn ˗a ˈˈsuee.
2 ˈDhɛ ˈö ˗kë ˈˈdhʋ̈, ˈyö ˗ya ˗an ꞊klaŋ kë ˗sü ˗bha, ˈö˗ pö:
3 «Mɛn ˗nu ˈö ˈwo˗ ˈwɔn dɔ ꞊dhɛ wo ˗bhawɔn ˗yö ˗Zlan ˗bha* ˗an ˗bha ˗yö ˗së, ˈyö sü ꞊dhɛ ˗Gblüdëdhɛ ˈö dhaŋ˗ ˈgü* ˗yö ˗an ˗bha ˈka.
4 «Mɛn ˗nu ˈö ˗wëë ˗ya ˈkpɔ ˗an zuʋ̈ˈˈ ˗ta ˗an ˗bha ˗yö ˗së, ˈyö sü ꞊dhɛ ˗wo ˗dho ˗zogbandhe ꞊slɔɔ.
5 «Mɛn ˗nu ˈö ˈwo dhɔŋsü* ˗an ˗bha ˗yö ˗së, ˈyö sü ꞊dhɛ ˈˈsɛ ˗dho kë ˗an ˗bha ˈkɛnŋpë ˈka.
6 «Mɛn ˗nu ˈö ˈwɔn ˈö kpɛnŋdhö ˗Zlan ˈˈɲandhiʋ̈ ˗a ˗dhɔ ˗yö ˗an ˗kë ꞊dedewo ˗an ˗bha ˗yö ˗së, ˈyö sü ꞊dhɛ ˈwɔn ˈö kpɛnŋdhö ˗yö ˗dho kë, ˈö ˗an ˗zokun.
7 «Mɛn ˗nu ˈö mɛn ˗wëë ˗yö ˗an ˗kë ˗an ˗bha ˗yö ˗së, ˈyö sü ꞊dhɛ ˗an ˗wëë ˗dho mɛn ˈˈwɛɛ ˗nu* kë ˈpö.
8 «Mɛn ˗nu ˈö˗ ˗an zuʋ̈piʋ̈dhɛ ˈdhö ˈˈpuu ˗an ˗bha ˗yö ˗së, ˈyö sü ꞊dhɛ ˗wo ˗dho ˗kpan ˗Zlan ˗bha.
9 «Mɛn ˗nu ˈö ˈwo ˗dhikodhɛ mɛɛnˈˈ ˗mɛn ˗nu ˈka ˗an ˗bha ˗yö ˗së, ˈyö sü ꞊dhɛ ˗wo ˗dho ˗an ˗dhɛ ˗Zlan gbö ˗nu.
10 «Mɛn ˗nu ˈö ˈwo ˗an ˈˈklʋʋbhɔ ˈwɔn ˈö kpɛnŋdhö ˗a kë ˗sü ˗wɔn ˈgü* ˗an ˗bha ˗yö ˗së, ˈyö sü ꞊dhɛ ˗Gblüdëdhɛ ˈö dhaŋ˗ ˈgü ˗yö ˗an ˗bha ˈka.
11 «Mɛn ˗nu ˗wa ˈsi bho ka ˗gɔ, ˗wa ka ˈˈklʋʋbhɔ, ˗wa ˈwɔn yaa yaa ˗nu blɛɛˈˈ ka ˗bha n ˗wɔn ˈgü, kö ka ˗bha ˗yö ˗së.
12 Ka zuʋ̈ˈˈ ˈˈgblü ˗yö dhi, ka ꞊nii ˗yö ˗da ꞊dedewo, ˈyö sü ꞊dhɛ ka ꞊saa ˈö dhaŋ˗ ˈgü ˗yö ꞊va. ˗Kɔ ˈö ˈwo ˗Zlan ˗wodhiʋ̈lomɛn ˗nu ˈwo kun ˈkpa ˗an ˈˈklʋʋbhɔ ˗a ˈka, ˈyö bhë.
13 «Ka ˈnën ˈka ˗tɔ ˈˈkpɔnŋtaadhɛ ˗bha ꞊wee. ˈˈKɛɛ kö ꞊wee ˗zë ˗a din ˗yö ˈgo ˗a ˗bha, ˗mën ˈö ꞊mɔɔn˗ ˗bha ˗ya kë kö ˗a din ˗yö kë ˗a ˗bha ˈzü ˗dɛɛwo? ˗Ya kë ˈˈdhʋ̈ kö ˈwaa ꞊mɔɔn˗ ˗bha ˗wo pë ˈbhaa kë ˗a ˈka ˈzü, kö ˗a ˗wɛnŋ ˈˈkpɛnŋ ˗sü ˈnën˗ ˗wɔn ˗ya ˈto kö mɛn ˗nu ˗wo taaˈˈ ˗a ˗ta.
14 «Ka ˈnën ˈka ˗tɔ ˈˈkpɔnŋtaadhɛ ˗bha ˗dhɛpuudhɛ. ˈPödhɛ ˈö ˗ya ˗sü ˈka ˗tɔn ꞊troo ˈwaa ꞊mɔɔn˗ ˗bha kö ˗wa ˗bin.
15 Mɛn ˈyaa ꞊laŋba dɔ kö ˗yö ꞊töö ˈˈgblü ˗a ˗ta, pë ˈö˗ ˗kë ꞊ʒiaan ˈyö ˗tɔ ˗a dɔ ˈnën ˈö˗ wo ꞊laŋba ˗dɔ ˗a ˗ta ˗pë ˗ta ˈyö ˗dhɛ ˗pʋ mɛn ˈˈpɛpɛ ˈö ˈwo ˈkɔɔ ˗an ˗ta.
16 ˗Kɔ do ˈö bhë ˗a ˈka, ka ˈbhü ˗yö ˈˈflʋ̈ mɛnbhɩɩdhe ˗nu ˈˈɲandhiʋ̈, kö ˗wa ˗kpan ka këyö ˗së ˗nu ˗bha, ˗wo ka Dë ˈö ˗ya ˗sü ˈka dhaŋ˗ ˈgü ˗a ˈtɔ bhɔ.
17 «ˈYa ˗dho kë ka ˈgü ꞊dhɛ a ˗nu kö ˈa ˈTɔŋ˗* waa pë ˈö ˗Zlan ˗wodhiʋ̈lomɛn ˗nu ˗wa pö ˗an bho ˈˈshia˗. N ˈti nu ˗an ˗bho ˈˈshia˗ ˗sü ˗wɔn ˈgü, a ˗nu ˈˈdhʋ̈ ꞊ʒiaan kö ˗wo yökodhiʋ̈.
18 A˗ ˗pö ka ˗dhɛ gagade ˈka ꞊dhɛ dhaŋ˗ waa ˈˈsɛ ˗wo ˗dho ʒiö, kö ˈTɔŋ˗ ˈö ˈwo˗ ˗bɛnzë bhë, ˗a ˈsëëdhɛ ˈˈɲaanga dosɛnŋ yö ˈti ˈgo ˗a ˗ta ꞊köŋ ɛɛnˈˈ kö ˗a bɛɛnˈˈ ˗pin dosɛnŋ ˗de yö ˈti ˈgo ˈˈgblʋʋ ꞊köŋ. ˗An ꞊gban ˈˈpɛpɛ ˗dho yö ˈko ˈˈdhiʋ̈.
19 ˗Dhɛ ˈö ˈˈdhʋ̈, mɛn ˈˈoo ˗mɛn ˈö dho ˈtɔŋ˗ ˗nu ˈwo bhë ˗a ˈˈtɩtɩ dosɛnŋ ˗ʒiaan ˗lögü, ˈö mɛn ˈˈwɛɛ ˗nu ˗blü ˗a ˗kë ˈˈdhʋ̈ ˗sü ˗bha ˈpö, ˗wo ˗dho ˗a ˗dhɛ mɛn ˈö ˈˈtɩtɩ ˈwɔn ˈö ˗gban ˗Gblüdëdhɛ ˈö dhaŋ˗ ˈgü ˗a ˗bha ˗a ˈgü.* ˈˈKɛɛ mɛn ˈö ˗an ˗ya ꞊bhlëë ˈgü, ˈö mɛn ˈˈwɛɛ ˗nu ˗blü ˗a ˗kë ˈˈdhʋ̈ ˗sü ˗bha, yö ˗zë ˗wo ˗dho ˗a ˗dhɛ mɛn ˈö ˈkpii˗ ˈwɔn ˈö ˗gban ˗Gblüdëdhɛ ˈö dhaŋ˗ ˈgü ˗a ˗bha ˗a ˈgü.
20 A˗ ˗pö ka ˗dhɛ ꞊dhɛ ka ˗bha kpɛnŋdhödhɛ ˈti ʒiö ˈtɔŋ˗ ˗gɔmɛn ˗nu waa Fadhiziɛn ˗nu ˗bha ˗ta, ka ˈti ˗dho ˗mɔn ˗a ˗bha toŋtoŋdhö kö ˈka ˗da ˗Gblüdëdhɛ ˈö dhaŋ˗ ˈgü ˗a ˈgü.
21 «Ka˗ ˗man ꞊dhɛ ˗wa ˗pö ka ˈˈbhɛman ˗nu ˈwo kun ˈkpa ˗an ˗dhɛ: ‹Ü dua ˈyaa ˗mü kö ˈü mɛn zë, mɛn ˈˈoo ˗mɛn ˈö mɛn zë ˗wo ˗dho ˈdho ˗a ˈka zakanmɛn ˗nu ˗kuu ˈˈdhiʋ̈.›
22 ˈˈKɛɛ man ˗zë a˗ ˗pö ka ˗dhɛ ꞊dhɛ mɛn ˈˈoo ˗mɛn ˈö ˈwɔn kun ˈö zuʋ̈ˈˈ ˈˈpiʋ̈ ö ꞊dhegblü ˗bha, ˗wo ˗dho ˈdho ˗a ˈka zakanmɛn ˗nu ˗kuu ˈˈdhiʋ̈. Mɛn ˈö ˈsi bho ö ꞊dhegblü ˗gɔ, ˗wo ˗dho ˈdho ˗a ˈka zakanmɛn ˈˈgblʋ̈gblʋ̈ ˗nu ˗kuu ˈˈdhiʋ̈. Mɛn ˈö˗ pö ö ꞊dhegblü ˗dhɛ: ‹Slaamɛn ˈö˗ ˈˈdhiʋ̈ ˗ya ˗da,› ˗wo ꞊mɔɔn˗ ˗bha ˈwo˗ ˗zuö Ʒeɛnö* ˈˈshiʋ̈ ˈgü.
23 «Kö ˈü nu ü ˗bha gbɔɔdhe ˈka ˈˈsaabhodhɛ ˈgü, kö ü ˗zo ˗yö ˗buö ꞊dhɛ ˈwɔn ˈbhaa ˗yö ü ꞊dhegblü zuʋ̈ˈˈ ˈˈpiʋ̈ ü bha,
24 ü ˗bha gbɔɔdhe bhë ˗a ˈto ˈˈsaabhodhɛ ˈgü mü ˈü ˈdho ꞊köŋ kö kaa ü ꞊dhegblü ˈka dhi ka ˈko ˗dhɛ. ˈBha ˈgo mü, kö ˈü nu ˈü ü ˗bha gbɔɔdhe kë.
25 «ˈWɔn ˈbhaa ˗ya kë kaa mɛn ˈbhaa ka ꞊zinŋgü, ˈö ˈdho ˗ni ˈgü ü ˈka zakanmɛn ˗nu ˗kuu ˈˈdhiʋ̈, ˗bhö pë ˈˈpɛpɛ kë kö ˈwɔn ˈö bhë ˈka˗ baaˈˈ ka ˈko ꞊zinŋgü ʒiaan ˗ta, kö ˈya ˗dho ˈdho ˈö ü ˗wɔn ˗da zakanmɛn ˗nu ˗dhɛ, ˈö zakanmɛn ˗nu ˗wo ü nu ˈˈsɔdha ˗nu ˗dhɛ ˈö ˈwo ü ˗da ˗kaso ˈgü.
26 A˗ ˗pö ü ˗dhɛ ꞊dhɛ ü ˗dho ˈto ˗kaso ˈö bhë ˗a ˈgü ˈö to˗ ˈka ˈˈdhʋ̈ ˈü ˗an ˗man ˈwëëga* ꞊gban bho ˈpapadhö.
27 «Ka˗ ˗man ˈˈdhiʋ̈ ˗be ꞊dhɛ: ‹Ü dua ˈyaa ˗mü kö ˈü ü ˗bha dhebɔ ɛɛnˈˈ ü ꞊gɔn ˈto kö ˈü niënŋˈˈ.›
28 ˈˈKɛɛ man ˗zë a˗ ˗pö ka ˗dhɛ mɛn ˈˈoo ˗mɛn ˈö dhebɔ ˈö ˈyaa˗ ˗bha dhebɔ ˈka ˗a ˗ga ˈö˗ zuʋ̈ˈˈ ˗yö bhɔ ˗a ˗bha, kö ˗ya wɔ ˗a ˈˈpiʋ̈ ˈsaadhö ö zuʋ̈ˈˈ ˈgü.
29 ˗Ya kë ꞊dhɛ ü ˗kɔ ˗së ˈgü ˗ɲan ˗ya kë ü ˗da ˈwɔn yaa ˈgü ˗pë ˈka, ˗bhö ˗a bho mü ˈü˗ ˗zuö ü ˈka ꞊gblɛɛn. ˈYö ˗tɔ ꞊dhɛ ü dɔɔ˗ do ˗bha ˗go ü ˗bha ˗sü ꞊fië ˗yö ˗dhö ˈö ˗ʒiö ˗a ˈka ü ˗dhü ˗todhʋ̈sü ˗bha ˗dho Ʒeɛnö ˈgü ˗sü ˗ta.
30 ˗Ya kë ˈzü ꞊dhɛ ü ˗kɔ ˗së ˈnën ˗ya kë ü ˗da ˈwɔn yaa ˈgü ˗pë ˈka, ˗a ˈˈklu bho ˈü˗ ˗zuö ü ˈka ꞊gblɛɛn. ˈYö ˗tɔ ꞊dhɛ ü dɔɔ˗ do ˗bha ˗go ü ˗bha ˗sü ꞊fië ˗yö ˗dhö ˈö ˗ʒiö ˗a ˈka ü ˗dhü ˗todhʋ̈sü ˗bha ˗dho Ʒeɛnö ˈgü ˗sü ˗ta.
31 «˗Wa ˗pö ˈzü ˈˈdhiʋ̈ ˗be ꞊dhɛ: ‹Mɛn ˈö ö ˗bha dhebɔ bho ˈˈblü, ˗ya ˗bho ˈˈblü ˈsëëdhɛ kë ˗ya nu ˗a ˗dhɛ.›
32 ˈˈKɛɛ man ˗zë a˗ ˗pö ka ˗dhɛ mɛn ˈˈoo ˗mɛn ˈö˗ ˗bha dhebɔ yö ˈti ˈˈɲangüyaa kë ˈö˗ bho ˈˈblü, ˗yö ꞊mɔɔn˗ ˗bha ˈö˗ dhebɔ ˗gɛn ˗da niënŋˈˈ ˗sü ˈgü. ˈYö mɛn ˈˈoo ˗mɛn ˈö dhebɔ ˈö ˈwo˗ bho ˈˈblü ꞊dhɛ ˗kɔ ˈö bhë ˗a ˈdhö ˗a sü, kö ˗ya ˗da mɛn ˗nu ˗bha dhe ˈˈpiʋ̈.
33 «Ka˗ ˗man ˈzü ꞊dhɛ ˗wa ˗pö ka ˈˈbhɛman ˗nu ˈwo kun ˈkpa ˗an ˗dhɛ: ‹Ü dua ˈyaa ˗mü kö ˈü ü ˗wo ˗bhö, kö ˈü ˈkun pë ˈü˗ pö ˗a kë ˗sü ˈka. Ü ˗wo ˈü˗ ˗bhö Zoova ˗dhɛ, ü dua ˗mü kö ˈü˗ ˈgüwɔn kë.›
34 ˈˈKɛɛ man ˗zë a˗ ˗pö ka ˗dhɛ ˈka ˗dho ka ˗wo ˗bhö toŋtoŋdhö ˈö ˈka˗ zë dhaŋ˗ ˗dhɛ, ˗a ˗gɛn ˗mü ꞊dhɛ ˈdhɛ ˈö ˗Zlan ˗bha ˗Gblüdëdhɛ ˗gbloo ˈdhö˗ ˗bha ˈyö bhë.
35 ˈKa ˗dho ˗a zë ˈˈsɛ ˗dhɛ, ˗a ˗gɛn ˗mü ꞊dhɛ yö ˈnën ˗tɔ ˗Zlan ˗gɛn ˗dɔ ˗a ˗ta ˗pë. Ɛɛnˈˈ ˈka ˗dho ˗a zë ˈpö Zedhizadhɛmö ˗pö ˗dhɛ, ˗a ˗gɛn ˗mü ꞊dhɛ ˗yö ˈnën ˗tɔ ˗Gblüdë ˈkpii˗ ˗bha ˈpö˗.
36 ˈKa ˗dho ˗a zë ka ˗de ˗gɔ ˗dhɛ, ˗a ˗gɛn ˗mü ꞊dhɛ ˈkaa ꞊mɔɔn˗ ˗bha kö ˈka ka ˗bha wun ˈˈdhɛ dosɛnŋ ˈˈgla kö ˗yö kë ˈˈpuu ɛɛnˈˈ kö ˗yö kë tii.
37 ˗Kaa kë ꞊ʒiaan kö ka ˗bha ‹꞊ii› ˗yö kë ꞊ii ˈka, kö ka ˗bha ‹˗abin› ˗yö kë ˗abin ˈka. ˈYö sü ꞊dhɛ ˗a ˈˈpɛpɛ ˈö dho nu ˗a ꞊taabha bhë, dügɔmɛn ˗kɔ ˈgü ˗wɔn ˗mü.
38 «Ka˗ ˗man ꞊dhɛ: ‹Mɛn ˈö mɛn ˈˈɲan wü, ˗wa ˈˈɲan ˈwü ˈpö. Mɛn ˈö mɛn ˈˈsɔn ˗yɛ ˗wa ˈˈsɔn ˈˈyɛ.›
39 ˈˈKɛɛ man ˗zë a˗ ˗pö ka ˗dhɛ: Mɛn ˈbhaa ˗ya ˈwɔn yaa kë ka ˈka, ˈka ˗dho ˗a pö ˈka ˗gban ˗a ˗gɔ. ˗Wa ü ˗kɔ ˗së ˈgü ˈˈkpɛnŋ ˗man, ˗bhö ü ˈˈkpɛnŋ ˈˈpian do ˈö to ˗a ˗zɔn ˗an ˗dhɛ ˈpö.
40 Mɛn ˈbhaa ꞊yaa˗ pö ˈö ˈdho ü ˈka zakanmɛn ˗nu ˗kuu ˈˈdhiʋ̈ kö ˈö ü ˗bha ˈˈbheenën ˈö sɔ ꞊löö ˗a ˈsü, ˗bhö ü ꞊kwaa˗ ˗zü kö ˗yö sɔ ˗de ˈü˗ ˗da ˗a ˗ta ˗a ꞊gban ˈsü.
41 Mɛn ˈbhaa ˈö ˗wogbinŋdhɛ ˈdhö˗ ˗gɔ ˗ya ˈˈgbɩɩdhɛ wɔ ü ˗ta kö ˈü ꞊kwɛɛ˗ ˈgbinŋ˗ bun ˈü ˈdho ˗a ˈka ˈˈkidhʋŋ do ˗naan ꞊taa, ˗a ˈsü ˈü ˈdho ˗a ˈka ˈˈkidhʋŋ ꞊plɛ ˗naan ꞊taa.
42 Mɛn ˈö pë ˗gbadhɛ ü ˗gɔ, ˗a nu ˗a ˗dhɛ. Mɛn ˈbhaa ˗ya ˈˈpɔ* ˗dhɛ ü ˗gɔ, ˈbha ˗dho ˗kɔ ˗a ˗dhɛ.
43 «Ka˗ ˗man ˈˈdhiʋ̈ ˗be ꞊dhɛ: ‹Ü dua ˗mü kö ü ˗yayoo ˗dhɔ ˗yö ü kë, kö ü ˈyɔɔ˗ ˗san ˗yö ü kë.›
44 ˈˈKɛɛ man ˗zë a˗ ˗pö ka ˗dhɛ: Ka ˈyɔɔ˗ ˗nu ˗dhɔ ˗yö ka kë ˗kplawo, ˈka bhɛɛˈˈ ˈpö mɛn ˗nu ˈwo ka ˈˈklʋʋbhɔ ˗ni ˈgü ˗an ˗bha ˈka.
45 ˈKa˗ kë ˈˈdhʋ̈, kö ka˗ ˗zɔn ꞊dhɛ ka Dë ˈö ˗ya ˗sü ˈka dhaŋ˗ ˈgü bhë, ˗a ˗bha ˈnën ˗nu* ˗mü ka ˈka. ˈYö sü ꞊dhɛ ˗yö ˈɲaan˗ ˗bhü ˈwɔnyaakëmɛn ˗nu waa ˈwɔnsëkëmɛn ˗nu ˗an ꞊gban ˗ta, ˈö dha ban ˈpö mɛn kpɛnŋdhö ˗nu waa mɛn ˗nu ˈö ˈwaa kpɛnŋdhö ˗an ˗ta.
46 Mɛn ˗nu ˈö ka ˗dhɔ ˗yö ˗an ˗kë woo dosɛnŋ ˗an ˗dhɔ ˗ya ka kë, ˈdhuëë˗ ˗mɛɛn ˈö ˈka ˗dho ˗a ꞊slɔɔ ˗a ˈgü? ˈNiinsɔnŋkunmɛn ˗nu ˗de ˈpö ˈwaa˗ kë ˈˈdhʋ̈ ˗ee?
47 Mɛn ˗nu ˈwo ka ꞊dhegblü ˗nu ˈka, ˈka woo dosɛnŋ ˗an ꞊tuaabho, kö ˈka ˈwɔn ˈˈmlüünsü kë ˈnën bhë ˗ee? ˈˈSɛ ˈˈwɛɛ ˈgümɛn ˗nu ˈwaa˗ kë ˈˈdhʋ̈ ˈpö ˗ee?
48 ˗Dhɛ ˈö ˈˈdhʋ̈, pö ˈya ˗dho kë ka ˗bha,* ꞊dhɛ ˗kɔ ˈö pö ˈyaa˗ ˈka ka Dë ˈö dhaŋ˗ ˈgü ˗a ˗bha bhë ˗a ˈdhö.
-Zoto -a ˈˈpiʋ̈ -wɔn -nu
^ Ɛɛnˈˈ «mɛn ˗nu ˈö ˈwɔn ˈö ˗gban ˗Zlan ˗bha ˗a ˗dhɔ ꞊dede ˗yö ˗an ˗kë.»
^ ˗Wo ˗we «˗Zlan ˗bha ˗Gblüdëdhɛ» ˈka.
^ Ɛɛnˈˈ «mɛn ˗nu ˈwo wo ˗de ˗kë ˈˈtɩtɩ.»
^ ˗Wo ˗we «˗Zlan waa mɛnbhɩɩdhe ˗nu» ˈka.
^ Ɛɛnˈˈ «˗Zlan dhɔɔbhaawɔn kë ˗sü ˗wɔn ˈgü.»
^ ˗Wo ˗we «˗Zlan ˗bha ˈtɔŋ˗ ˈö Moizö ˗ya ˗bɛnzë» bhë ˗a ˈka.
^ Ɛɛnˈˈ «mɛn ˈö ˗da ˗Zlan ˗bha ˗Gblüdëdhɛ ˈgü ˗sü ˈyaa˗ ˗man ˈkun.»
^ ˗Wo ˗we «˗dhɛ ˈö ˈwo kun ˈˈgblu ˗nu ˈˈgʋ̈ ˗ni ˈgü ˗a ˗bha Zedhizadhɛmö ˗pö ˈˈkplʋʋ ꞊taabha» bhë ˗a ˈka.
^ Glɛkö ˗wo ˈgü ˈyö ˗tɔ «Kadran.» ˗A ˈˈtaman ga do ˈnën ˗tɔ yö ˈö mɛn ˗ya ˗kë minitö ˈö ˗mɔn ˗kɔŋ do ˗bha ˗a ˈka ˗a ꞊saa.
^ ˗Wo ˗we «ˈˈpɔ ˈö˗ ˗ya ˗ta ˈyaa ˈdhö» ˗a ˈka.
^ Glɛkö ˗wo ˈgü ˈyö ˗tɔ «˗a gbö ˗nu.»
^ ˗Wo ˗we «mɛn ˗dhɔ ˗bha mɛn kë ˗sü ˈö ö zuʋ̈ˈˈ ꞊gban ˈka» ˗a ˈka.
