ˈö Matiö ˗ya ˗bɛnzë 6:1-34
-
DHIAŊ ˈÖ YESU ˗YA ZË ˗TƆN ꞊TROO (1-34)
6 «˗Kaa kë ˗së kö ka ˗bha ˈwɔn ˗së kë ˗sü ˗gɛn ˈya ˗dho kë mɛn ˗nu ˈˈɲan ˗bha ˗bɔ ka ˗ta ˗sü ˈka. ˈYaa ˈˈdhʋ̈ ka Dë ˈö dhaŋ˗ ˈgü yö ˈti ˗dho ˗a ˈgüwɔn ˗së kë ka ˗dhɛ.
2 ˈBha˗ pö ˈü gbɔɔdhe kë ˗wëëmɛn ˗dhɛ, ˈbha ˗dho ˗a pö ˈü˗ ˈˈtruu ˗piö ꞊dhɛ ˗kɔ ˈö mɛn ˈˈɲan ˗ta ˗pë këmɛn ˗nu ˈdhö ˗a kë ˗ni ˈgü ˗a ˈka ˗yakwëë ˗kë ˗a ˈgü ˗kɔ ˗nu waa ˗kpinŋ ˈˈpiʋ̈ ˗dhɛ ˗nu ˈgü bhë ˗a ˈdhö. ˗Wa ˗kë ˈˈdhʋ̈ kö mɛn ˗nu ˗wo wo ˈtɔ bhɔ. A˗ ˗pö ka ꞊dhɛ gagade ˈka ꞊dhɛ ˗a ꞊trɔɔn ˈö ˈwo dho ˗a ꞊slɔɔ ˗a ꞊gban ˈnën bhë.
3 ˈˈKɛɛ bhi ˗zë, ü gbɔɔdhe kë ˗ni ˈgü ˗wëëmɛn ˗dhɛ, pë ˈü˗ kë ˗ni ˈgü ü ˗kɔ ˗së ˈka bhë, ü ꞊kwaa˗ ˈgü ˗kɔ ˈya ˗dho ˗a ˈwɔn dɔ.
4 ˈBha gbɔɔdhe kë ˗wëëmɛn ˗dhɛ, ˗yö ˈto ˗bindhe ˈgü. ˗Ya kë ˈˈdhʋ̈ ˈyö ü Dë ˈö˗ ˈˈɲan ˈdhö ü ˗bha ˗bin ˈgü bhë, ˈö ˗dho ˗a ˈgüwɔn ˗së kë ü ˗dhɛ.
5 «˗Ya ˈgo mü ka bhɛɛˈˈ ˗ni ˈgü, ˈka ˗dho ˗a kë ꞊dhɛ mɛn ˈˈɲan ˗ta ˗pë këmɛn ˗nu ˈdhö. ˗A ˗gɛn ˗mü ꞊dhɛ ˗dɔ ö ˗gɛn ˗ta ˗sü ˈö ˗yakwëë ˗kë ˗a ˈgü ˗kɔ ˗nu ɛɛnˈˈ ʒiaan ˗gböŋ ꞊taa ˗dhɛ ˗nu ˈgü ˈö ˈwo ꞊bhɛɛ kö mɛn ˗nu ˈˈɲan ˗yö bɔ wo ˗ta bhë, ˗a ˗dhɔ ˗yö ˗an ˗kë. A˗ ˗pö ka ꞊dhɛ gagade ˈka ꞊dhɛ ˗a ꞊trɔɔn ˈö ˈwo ˗dho ˗a ꞊slɔɔ ˗a ꞊gban ˈnën bhë.
6 ˈˈKɛɛ bhi ˗zë ˈbha˗ pö ˈü bhɛɛˈˈ, ˗bhö ˗da ü ˗gɔ ˈkɔ ꞊duudhö ˈü ˈˈkwee ta ü ˈˈdhiʋ̈, kö ˈü bhɛɛˈˈ ü Dë ˈö ˗bin ˈgü bhë ˗a ˗dhɛ. ˗Ya kë ˈˈdhʋ̈, ˈyö ü Dë ˈö˗ ˈˈɲan ˈdhö ü ˗bha ˗bin ˈgü bhë, ˈö dho ˗a ˈgüwɔn ˗së kë ü ˗dhɛ.
7 Ka bhɛɛˈˈ ˗ni ˈgü, ˈka ˗dho ʒiö ˗wo do ˈgü ˗kplawo ꞊dhɛ ˗kɔ ˈö mɛn ˗nu ˈö ˈwaa ˗Zlan dɔ ˈwo˗ kë ˗ni ˈgü ˗a ˈka bhë ˗a ˈdhö, ˈyö ˗tɔ ꞊dhɛ ˗an ˗bha ˈgü ˈwa ˈwɔn blɛɛˈˈ ꞊va ˈyö dho ˈö ˈˈtʋ ˈto wo ˗wo ˗bha.
8 ˈKa ˗dho kë ꞊dhɛ ˗an ˈdhö, ˗a ˗gɛn ˗mü ꞊dhɛ ˈˈsanni ˈka gbadhɛ ˗a ˗gɔ, pë ˈö ka ˗bhawɔn ˈdhö˗ ˗bha ka Dë ˗ya ˗dɔ.
9 «Ka dua ˗mü ˈka bhɛɛˈˈ ꞊dhɛ ˗kɔ ˈö yö ˗a ˈdhö:
«‹Yi Dë ˈü dhaŋ˗ ˈgü, ü ˈtɔ ˗yö kë ˈˈslʋ̈ʋ̈slʋ̈.
10 Ü ˗bha ˗Gblüdëdhɛ ˗yö nu. Ü dhɔɔbhaawɔn ˗yö kë ˈˈsɛ ˗ta ꞊dhɛ ˗kɔ ˈö˗ ˈka dhaŋ˗ ˈgü bhë, ˗a ˈdhö.
11 Dɔ ˈˈgbɩɩ˗ ˈü ˗bhöpë ˈö yi ˗bhawɔn ˈdhö˗ ˗bha ꞊dɛɛ ˗a nu yi ˗dhɛ.
12 ˗Bhö yi ˗bha ˈwɔn yaa ˗nu ˗bhawɔn ˈto, ꞊dhɛ ˗kɔ ˈö mɛn ˗nu ˈwo ˈwɔn yaa ˗kë yi ˈka ˈyi ˗an ˗bhawɔn to ˗a ˈka ˗a ˈdhö.
13 ˗Bhö yi ˗takun kö ˈya ˗dho ˗puö ˈgüdandhe ˈgü. ˈˈKɛɛ ˗bhö yi dha ˈwɔnyaakëmɛn* ˗gɔ.›
14 «˗Ya kë ꞊dhɛ mɛn ˗nu ˗wa ˈwɔn yaa kë ka ˈka, ˈka ˗an ˗bhawɔn ˈto, ˈyö ka Dë ˈö dhaŋ˗ ˈgü ˈö dho ka ˗bhawɔn ˈto ˈpö.
15 ˈˈKɛɛ ka ˈti mɛn ˗nu ˗bha ˈwɔn yaa ˗nu ˗bhawɔn ˈto, ka Dë ˈö dhaŋ˗ ˈgü yö ˈti ˗dho ka ˗bha ˈwɔn yaa ˗nu ˗bhawɔn ˈto ˈpö.
16 «ˈKa ˈsunŋ˗ ˈmën, ˈka ˗dho ka ˈwëë ˗shiö ꞊dhɛ mɛn ˈˈɲan ˗ta ˗pë këmɛn ˗nu ˈdhö, ˗a ˗gɛn ˗mü ꞊dhɛ ˗wo wo ˈwëëdhɛ ˗kë ˗wëësü* ˈˈdhʋ̈ kö mɛn ˗nu ˗wa ˈwɔn dɔ ꞊dhɛ wo ˈsunŋ˗ ˈgü. A˗ ˗pö ka ˗dhɛ gagade ˈka ꞊dhɛ ˗a ꞊trɔɔn ˈö ˈwo ˗dho ˗a ꞊slɔɔ ˗a ꞊gban ˈnën bhë.
17 ˈˈKɛɛ bhi ˗zë ˈbha ˈsunŋ˗ ˈmën, ˗bhö ü ˈwëëdhɛ ˈˈzu ü ˈˈɲɔn ˗nu kë ü ˗gɔ ˗bha,
18 kë ˈˈdhʋ̈ kö mɛn ˗nu ˈwa ˗dho ˗a ˈwɔn dɔ ꞊dhɛ ü ˈsunŋ˗ ˈgü, kö ˗yö ˈto kaa ü Dë ˈö ˗dhɛ yö ˗bin ˈgü bhë ka ꞊zinŋgü. ˗Ya kë ˈˈdhʋ̈, ˈyö ü Dë ˈö˗ ˈˈɲan ˈdhö ü ˗bha ˗bin ˈgü bhë, ˈö dho ˗a ˈgüwɔn ˗së kë ü ˗dhɛ.
19 «˗Ka ka ꞊kwaa ka ˗bha ꞊nɔɔnpë ˗nu ˗gɔ ˈkpɔ ˗sü ˈö ˈˈkpɔnŋ ꞊taa yö ˗a ˗zü. ˗A ˗gɛn ˗mü ꞊dhɛ ˈˈkpɔnŋ ꞊taa yö, ꞊zɛ waa ˈˈkɔɔ ˗nu ˗wo pë ˗shiʋ̈ mü, ˈö ꞊kwaanmɛn ˗nu ˗wo ˈˈkwee ˗nu wü ˈwo pë ꞊kwaan.
20 ˗Ka ka ˗bha ꞊nɔɔnpë ˗nu ˗gɔ ˈkpɔ ꞊ʒiaan dhaŋgüdhɛ ˈö ꞊zɛ ˗nu waa ˈˈkɔɔ ˗nu ˈwaa mü, ɛɛnˈˈ ˈö ꞊kwaanmɛn ˗nu ˈwaa ꞊mɔɔn˗ ˗bha kö ˗wo ˗da mü kö ˗wo pë ꞊kwaan bhë ˗a ˈgü.
21 ˗A ˗gɛn ˗mü ꞊dhɛ ˈdhɛ ü ˗bha ꞊nɔɔnpë ˈdhö˗ ˗bha, ˈyö ü zuʋ̈ga ˗yö ˗kë mü ˈpö.
22 «Mɛn ˈˈɲanga ˈnën ˗tɔ mɛn kwi ˗bha ꞊laŋba. Ü ˈˈɲanga ˗ya ˗klu pë do bha,* ü ˗dhü ˗todhʋ̈sü ˗dho kë ˗dhɛpuudhɛ ˈgü.
23 ˈˈKɛɛ ˗ya kë ꞊dhɛ ü ˈˈɲanga ˗ya kë ˈya˗,* ü ˗dhü ˗todhʋ̈sü ˗dho kë ˗dhɛtiidhɛ ˈgü. ˗Ya kë ꞊dhɛ ˈˈwo ˈbhü ˈö ü ˈgü ꞊ya kë ˗dhɛtiidhɛ ˈka, kö ˗a ˗bha tiidhɛ ˗dho kë ˗zizisü.
24 «Mɛn dosɛnŋ ˈyaa ꞊mɔɔn˗ ˗bha kö ˗yö ꞊dhuëŋdhɛ kë ˗gɔmɛn ꞊plɛ ˈˈpiʋ̈. ˗A mɛn do ˗san ˗dho ˗a kë, ˈö˗ mɛn do ˗dhɔ ˗ya ˗kë. Ɛɛnˈˈ ˈzü ˗yö ˗dho ˗klu ˗a mɛn do ˗bha, ˈö yö ˈti ˗dho ˗a mɛn do ˈö to ˗a ꞊bhlëë ˗ya. ˗Kɔ do ˈö bhë ˗a ˈka, ˈkaa ꞊mɔɔn˗ ˗bha ˈka yökë ˗Zlan ˗dhɛ kö ˈka ˗klu ˈwëëga ˗bha ˈpö.
25 «˗A ˗wɔn ˈgü, a˗ ˗pö ka ˗dhɛ: ˈKa ˗dho ˗ya ka ˗bha ˗tosɛta* ˗wɔn ꞊zɔnŋ ˗ta, ˈö ˈka˗ pö: ‹ˈMën ˈyi ˗dho ˗a ˗bhö?› ɛɛnˈˈ ‹ˈmën ˈyi ˗dho ˗a mü?› Ɛɛnˈˈ ˈka ˗dho ˗ya ka bunbhadhɛ ˗wɔn ꞊zɔnŋ ˗ta ˈö ˈka˗ pö: ‹Sɔ ˗mɛɛn ˈyi ˗dho ˗a ˗da?› ˗Tosɛta ˗wɔn ˈyaa ˈˈgbɩɩ˗ ˈyaa ʒiö ˗a ˈka ˗bhöpë ˗ta ˗ee? Ɛɛnˈˈ mɛn bun ˗wɔn ˈyaa ˈˈgbɩɩ˗ ˈyaa ʒiö ˗a ˈka sɔ ˗ta ˗ee?
26 ˗Ka ˗man ˗nu ˈwo dhaŋ˗ ˈgü ˗an ˗ga. ˈWaa pë ta kö ˗wa pö ꞊dhɛ ˗wo ˗dho ˗a ˈˈkan, ɛɛnˈˈ ˗an ˗bha ˗bhöpë ˗lo ˗a ˈgü ˗kɔ ˈyaa ˈdhö. ˈˈKɛɛ ka Dë ˈö dhaŋ˗ ˈgü ˗yö ˗bhöpë ˗nu ˗an ˗dhɛ. Ka ꞊bhlëë ˈyaa ˈkpii˗ ˈyaa ʒiö ˗a ˈka wo ˗zë ˗an ˗ta ˗ee?
27 ˈMɛn ˈka ˗lo yö, de ˈö ˗ya ˗ya ö de ˗wɔn ꞊zɔnŋ ˗ta, ˈö ˗dho ꞊mɔɔn˗ ˗bha kö ˗yö ˈˈtʋ̈ŋ ˈnën ˈdɔɔni ˈbhaa ˗da ö ˗bha ˗tosɛta kë ˗yi ˗ta?
28 -Ya ˈgo mü ˈzü, ˈmën ˗kë ˈö ˈka ˗ya sɔ ˗wɔn ꞊zɔnŋ ˗ta? ˗Ka ˗gleŋ ˈsü ꞊blëë ˈˈbin ˗nu ˈwo ˈˈblüblü ˗an ˗bha. ˈWaa yö ˈˈgbɩɩ˗ ˈˈwɛɛ ˈbhaa kë kö ˗wo ꞊kun bhɔ ɛɛnˈˈ ˈwaa sɔ bɔ.
29 ˈˈKɛɛ a˗ ˗pö ka ˗dhɛ, ˈkö ˗kë ꞊dhɛ pë ꞊va ˗kun Sadhomɔn ˗gɔ ˈö˗ ˈtɔ ˗yö bhɔ, yö ˈti sɔ ˈö ˗dho kë ˗së ꞊dhɛ ꞊blëë ˈˈbin ˗nu ˗bha ˈdhö ˗a ˗da do.
30 ˗Ya kë ꞊dhɛ ꞊blëë ˗nu ˈö ˗wa kë ˈyö ꞊dɛɛ, ˈö dhiʋ̈ˈˈ ˈwo dho ˗an ˗zuö ˈˈshiʋ̈ ˈgü bhë, ˗Zlan ˗ya sɔ ˗da ˗an ˗bha ꞊dhɛ ˗kɔ ˈö bhë ˗a ˈdhö, ˈyö ka ˗zë ꞊wɛ? Yö ˈti ˗dho sɔ ˗da ka ˗bha ˈpö ˗ee? Ka ˗bha ˗zoyödhe ˈö ˗kë ˈˈtɩtɩ ˈyaa ˗mü ˗ee?
31 Ka zuʋ̈ˈˈ ˈˈdhiʋ̈ ˈya ˗dho ˈˈtɛ toŋtoŋdhö ˈö ˈka˗ pö: ‹ˈMën ˈyi ˗dho ˗a ˗bhö?› ɛɛnˈˈ ‹ˈmën ˈyi ˗dho ˗a mü?› ɛɛnˈˈ ˈzü ‹ˈmën ˈyi ˗dho ˗a ˗da yi ˗bha?›
32 Mɛn ˗nu ˈö ˈwaa ˗Zlan dɔ, pë ˗nu ˈwo ˗ya ˗an ˗wɔn ꞊zɔnŋ ˗ta ꞊gbɔɔnsü ˈyö ˈwo bhë. Ka Dë ˈö dhaŋ˗ ˈgü ˗ya ˈwɔn ˗dɔ ꞊dhɛ ka ˗bhawɔn ˗yö pë ˗nu ˈwo bhë ˗an ꞊gban ˗bha.
33 «ˈDhɛ ˈö ˈˈdhʋ̈, ˗ka ˗Zlan ˗bha ˗Gblüdëdhɛ waa ˈwɔn ˈö kpɛnŋdhö ˗a ˈˈɲandhiʋ̈ ˗a kë ˗sü mɛɛnˈˈ ꞊köŋ ˗blɛɛsü, kö pë ˈˈpɛpɛ ˈwo to bhë ˗yö ˗an nu ka ˗dhɛ ˗a ꞊tɔɔ ˈka.
34 ˈKa ˗dho ˗ya ˗dhɛ ˈö ˗dho ꞊kpɔɔ dhiʋ̈ˈˈ ˗a ˗wɔn ꞊zɔnŋ ˗ta, ˈyö ˗tɔ ꞊dhɛ ˗dhɛkpaɔyi ˗dhɛ ˈö bhë ˗a ˗bha mɛn zuʋ̈dhiʋ̈tɛ ˗wɔn ˗nu ˗dho kë ˗dhö. ˗Dhɛkpaɔyi ˈdhɛ ˈö ˈdhö ˗a ˗bha ˈwɔn ˈˈgbɩɩ˗ ˗nu ˗wo ˗dhö.
-Zoto -a ˈˈpiʋ̈ -wɔn -nu
^ ˗Wo ˗we «Sɔtraan» ˈka.
^ Ɛɛnˈˈ «˗wo wo ˗kwaa wo ˗de ˗zü ˈwo ˗kë ˈˈluulu.»
^ Ɛɛnˈˈ «˗dhɛ yö ˗së ˈka.»
^ Ɛɛnˈˈ «ˈyaa ˗klu pë do ˗bha.»
^ Glɛkö ˗wo ˈgü ˈyö ˗tɔ «ka ˈniin˗.»
