ˈö Matiö ˗ya ˗bɛnzë 8:1-34
8 ˈDhɛ ˈö go ˗tɔn ˗ta ˈö ꞊yɔɔ, ˈyö mɛn ꞊va ˗wo ˗ya ʒiö ˗sü ˗bha ˗a ꞊kee˗.
2 ˈWo ˗dho ˗dhɛ ˗ga kö ꞊weeyuamɛn do ˗ya nu ˗ya ˈˈgblü Yesu ˗dhɛ ˈˈshia˗, kö ˗ya pö ˗ni ˈgü: «N Dëmɛn, ˗ya kë ꞊dhɛ ü ˗we ˗a ˗bha, dɔ ˈˈgbɩɩ˗ ˈü n kë ˈˈklʋ̈ʋ̈klʋ̈.»
3 ˈDhɛ ˈö ˗kë ˈˈdhʋ̈ ˈyö Yesu ˗yö ö ˗kɔ pa ˗a ˈka, ˈyö˗ pö ˗a ˗dhɛ: «ˈMan ˈˈwɩ ˗a ˗bha! ˗Bhö kë ˈˈklʋ̈ʋ̈klʋ̈.» ˗Yö ˗to ˈˈshia˗ mü ˈö˗ ˗bha ꞊wee ˗yua ˗yö bo ˈpapadhö.
4 ˈYö Yesu ˗ya pö ˗a ˗dhɛ ˈzü: «ˈBha ˗dho ˗a blɛɛˈˈ mɛn ˈbhaa ˗dhɛ. ˈˈKɛɛ ˗bhö ˈdho ˈü ü ˗de ˗zɔn ˈˈsaabhomɛn ˗nu ˗dhɛ kö ˈü gbɔɔdhe kë ꞊dhɛ ˗kɔ ˈö Moizö ˗ya pö ˗a ˈka bhë ˗a ˈdhö. ˗Ya kë ˈˈdhʋ̈, ˗yö ˗dho ˗a ˗zɔn ˈˈsaabhomɛn ˗nu ˗dhɛ ꞊dedewo ꞊dhɛ ˈbha kë ˈˈklʋ̈ʋ̈klʋ̈.»
5 ˈDhɛ ˈö ˗da Kapɛɛnaɔmö ˗pö ˈgü, ˈyö ˈˈsɔdha ˗gɔmɛn do ˗yö nu ˗a ˈˈpiʋ̈ ˈö ꞊bhɛɛ ˗a ˗dhɛ.
6 ˈYö˗ pö: «N Dëmɛn, n ˗man yökëmɛn ˗yö wɔ ˗sü ˈka ˈˈshia˗ ˈkɔɔ, ˈˈtrüünŋ ˗yua ˗ya kë ˗ni ˈgü, ˗yö saanˈˈ ˈsü ˗ni ˈgü ꞊dedewo.»
7 ˈYö Yesu ˗ya pö ˗a ˗dhɛ: «A ˗dho ˗lo ü ˗gɔ ˈkɔɔ kö ˈa˗ ˗dhɛ bo.»
8 ˈDhɛ ˈö ˗kë ˈˈdhʋ̈ ˈyö˗ ˈˈsɔdha ˗gɔmɛn ˗ya pö ˗a ˗dhɛ: «N Dëmɛn, ˗mën ˗mü n ˈka ˈyö ˈü ˗dho nu n ˗gɔ ˈkɔɔ. ˈBha ˈto yö ˈbha ˗wo dosɛnŋ pö, n ˗man yökëmɛn ˗dho dha.
9 ˈYö ˗tɔ ꞊dhɛ man ˗de ˈpö n ˗gɔmɛn ˗nu ˗wo ˗dhö ˈö ˈa ˈwɔn man ˗an ˗ta. ˈˈSɔdha ˗nu ˗wo n ˗kɔ ꞊löö ˈpö, ˈö ˈman˗ pö ˗a mɛn do ˗dhɛ: ‹˗Bhö ˈdho ˗de!› ˈö dho. ˈMan˗ pö ˗a mɛn ˈbhaa ˗dhɛ: ‹˗Bhö nu!› ˗yö ˗nu. ꞊Dhuëŋ ˗yö n ˗gɔ ˈpö, ˈö ˈman˗ pö ˗a ˗dhɛ: ‹Pë ˈö ꞊nɛn ˗a kë!› ˈö˗ ˗kë.»
10 ˈDhɛ ˈö Yesu ˗yö ˗wo ˈö bhë ˗a man ˗a ˈwɔn ˗ya ˗kun, ˈyö˗ pö mɛn ˗nu ˈwo kun ʒiö ˗ni ˈgü ˗a ꞊kee˗ bhë ˗an ˗dhɛ: «A˗ ˗pö ka ˗dhɛ gagade ˈka ꞊dhɛ, Izraɛdhö ˗sɛ ˈö yö ˗a ˈgü, mɛn ˈbhaa ˈö˗ ˗bha ˗zoyödhe dho kë ˈkpii˗ ꞊dhɛ gɔndënën ˈö yö ˗a ˗bha ˈdhö, n ˈti ˗kpan ˗a ˗bha ꞊köŋ.
11 A˗ ˗pö ka ˗dhɛ ˈzü ꞊dhɛ, mɛn ꞊va ˗dho ˈgo ˈɲaan˗ ˗wo ˗ʒian waa ˈɲaan˗ ˗puö ˗ʒian ˈka ˈwo nu, ˈö waa Ablaamö, Izaakö, Zakɔbö ˗nu ˈwo ˗ya tablö do ˈˈdhiʋ̈ ˗Gblüdëdhɛ ˈö ˗dho kë dhaŋ˗ ˈgü bhë ˗a ˈgü, ˈö ˈwo pë ˗bhö wo ˈkwëë˗.
12 ˈˈKɛɛ mɛn ˗nu ˈwo ˗Gblüdëdhɛ ˈgünën ˗nu ˈka, wo ˗zë ˗wo ˗dho ˗an ˗zuö ˈˈkpɛnŋ ˗dhɛtiidhɛ ˈgü. ˈDhɛ ˈö bhë ˈyö ˈwo ˗dho ˈˈgbʋ bɔ ˗a ˗bha ˈö ˈwo wo ˈˈsɔn ˗bhö mü.»*
13 ˈDhɛ ˗kë ˈˈdhʋ̈, ˈyö Yesu ˗ya pö ˈˈsɔdha ˗gɔmɛn ˈö bhë ˗a ˗dhɛ: «˗Bhö ˈdho ˈˈkwɛnŋdhö. Pë ˈü˗ ˗dhɛ ˗zoyödhe ˈka bhë ˗yö ˗dho kë ü ˗dhɛ.» ˈˈLɛlɛ ꞊dede ˈö bhë ˗a ˈgü, ˈyö˗ ˗bha yökëmɛn ˗yö dha.
14 ˈDhɛ Yesu ˗yö go mü, ˈyö dho Piɛɛ ˗gɔ ˈˈkwɛnŋdhö. ˈYö ˗kpan Piɛɛ ˗bha dhebɔ dhö ˗bha kö ˗yö ˈwaannu ˗sü ˈka, kö ˈˈnɛnnɛn ˗ya nu ˗a ˗ta.
15 ˈDhɛ ˈö ˗kë ˈˈdhʋ̈, ˈyö Yesu ˗yö pa ˗a ˗kɔ ˈka, ˈyö ˈˈnɛnnɛn ˗yö go ˗a dhebɔnën ˗ta, ˈö ˗ya ˗bhöpë ˗kpa ˗an ˗dhɛ ˗sü ˗bha.
16 ˈˈKɛɛ ˈdhɛ ˈö ˈˈbin ˗yö mën, ˈyö mɛn ˗nu ˗wo nu mɛn ꞊va ꞊dede ˈö ˗zuu yaa ˗nu kun ˗an ˈgü ˗an ˈka ˗a ˈˈpiʋ̈. ˗Wo dosɛnŋ ˈˈkpaan ˈö˗ pö, ˈyö ˗zuu yaa ˗nu ˗wo go mɛn ˗nu bhë ˗an ˈgü. ˈYö mɛn ˈˈpɛpɛ ˈwo kun saanˈˈ ˈsü ˗ni ˈgü ˈö ˗an ˗dhɛ bo.
17 ˗Yö ˗kë ˈˈdhʋ̈ kö ˗wo ˈö ˗Zlan ˗yö bɔ ö ˗wodhiʋ̈lomɛn Izai ˗ta ˈö˗ pö bhë ˗yö yökodhiʋ̈. ˗Ya ˗pö: «Yö ꞊dede ˗yö ˈˈyua ˗nu waa pë ˈˈdhiʋ̈˗ ˗nu ˈwo kwa ˗bha ˗an ꞊gban ˗bun.»
18 ˈDhɛ Yesu ˗ya yö ꞊dhɛ mɛn ˗nu ˗wa kë ö ˗züzü ꞊va, ˈyö˗ pö ö ˗bha gwëëˈˈ ˗nu ˗dhɛ ˈwo ˈˈyi ˈˈkan.
19 ˈDhɛ ˈö ˗kë ˈˈdhʋ̈, ˈyö ˈtɔŋ˗ ˗gɔmɛn do ˈbhaa ˗yö ꞊ɲɔɔn Yesu ˈˈsuee ˈö˗ pö ˗a ˗dhɛ: «N ˗Gɔmɛn, ˗dhɛ ˈˈoo ˗dhɛ ˈü dho ˗a ˗bha, a ˗dho ʒiö ü ꞊kee˗.»
20 ˈˈKɛɛ ˈyö Yesu ˗ya pö ˗a ˗dhɛ: «Diɔŋ ˗nu* ˗du ˗yö ˗dhö. ˗Mannën ˗nu ˈwo dhaŋ˗ ˈgü ˗an ˈkɔ ˗yö ˗dhö ˈpö. ˈˈKɛɛ maan mɛn Gbö ˗mɛn ˗zë, n ˗de ˗bha ˈkɔ ˈa dho wɔ ˗a ˈgü* ˈyaa ˈdhö.»
21 ˈYö˗ ˗bha gwëëˈˈ do ˈbhaa ˗yö bɔ mü ˈzü ˈö˗ pö ˗a ˗dhɛ: «N Dëmɛn, ˗bhö ˈˈwɩ ˗a ˗bha kö ˈa ˈdho ꞊köŋ ˈa n dë ˗wɛɛ bho.»
22 ˈYö Yesu ˗ya pö ˗a ˗dhɛ: «˗Bhö ʒiö n ꞊kee˗ ˗kplawo ˈkwa ˈdho. Ü ꞊kwaa gamɛn ˗nu ˗zü kö ˗wo wo ˈko ˗nu ˗wɛɛ bho.»
23 ˈDhɛ ˈö Yesu ˗yö dho ˈö ˗da ˈˈyitagɔ ˈgü, ˈyö˗ ˗bha gwëëˈˈ ˗nu ˗wo ˗ʒiö ˗a ꞊kee˗.
24 ˈWo dho ˈˈkan wo ˗ta kö ˈˈtee ˈˈgbɩɩ˗ ˗ya ˗ya ʒiö ˗sü ˗bha ꞊weeyi ˗ta, kö ˈˈyi kpö kpö ˗nu ˗wo ꞊wɛnŋ ˗ni ˈgü ˗an ˗bha ˈˈyitagɔ ˈgü. ˗A ˈˈtʋ̈ŋ ˈö bhë ˗a ˈgü kö Yesu ˗zë ˗yö yi zë ˗ni ˈgü.
25 ˈYö ˗a ˗bha gwëëˈˈ ˗nu ˗wo nu ˈwo pa ˗a ˗bha ˈö ˈwo˗ pö: «Yi Dëmɛn, ˗bhö kwa dha, ga ˗ya yö kwa ˗bha!»
26 ˈˈKɛɛ ˈyö Yesu ˗ya pö ˗an ˗dhɛ: «ˈMën ˗kë ˈö ˈˈsuʋ̈ ˗yö ˈka ˗kë ˈˈdhʋ̈? Ka ˗bha ˗zoyödhe ˗yö ˈˈmɛn?» ˈYö ꞊luu ˈö ˗gbla ˈˈtee waa ꞊weeyi ˗an ˗ta, ˈyö ˗dhɛ ˗ta ˗yö dɔ dinŋdhö.
27 ˈYö˗ ˈwɔn ˗yö ˗a ˗bha gwëëˈˈ ˗nu kun ꞊dedewo, ˈö ˈwo˗ pö: «Mɛn suu mɛn ˈö ˗kë ꞊ni? ˈˈTee waa ꞊weeyi ˗nu ˗dee ˗ʒiaan ˗wo ˈwɔn ˗man ˗a ˗ta.»
28 ˈDhɛ ˈö ˗ya ˈˈyi ˈˈkan, ˈö ˗ya ˗lo Gadadha ˗dhɛ ˈˈpian ˗ta, ˈyö gɔndënën ꞊plɛ ˈö ˗zuu yaa ˗nu ˈdhö ˗an ˈgü, ˈwo go blɔɔndhɛ do ˈbhaa ˈgü ˈwo nu ˗a ˈˈpiʋ̈. ˗Wo ˗kun mɛn ˈˈdhiʋ̈dhiʋ̈sü, ˈˈvaanvan ˗nu ˈka. ˗A ˗wɔn ˈgü, ˗a ˈˈse ˈyaa kun mɛn ˈbhaa ˗dhɛ kö ˗yö bɔ ʒiaan ˈö bhë ˗a ˈka.
29 ˈYö ˈwo ˗ya ˈˈgbla ˗sü ˗bha ˈö ˈwo˗ pö: «˗Zlan Gbö, ˗mën ˈö kwaa˗ ˗nu kwa ꞊zinŋgü? Ü ˗nu ˗dhɛ ˈö yö ˗a ˈgü kö ˈü yi ˈˈklʋʋbhɔ, ˈˈkɛɛ kö ˗a ˈˈtʋ̈ŋ yö ˈti ˗wo ꞊köŋ ˗ee?»
30 ˈÖ ˗kë ˈˈdhʋ̈ kö ˗bhɔ ꞊kpluu ˗yö pë ˗bhö ˗ni ˈgü ˗dhɛ ˈbhaa ˈgü mü.
31 ˈYö ˗zuu yaa ˗nu ˗wo ˗ya bhɛɛˈˈ ˗sü ˗bha Yesu ˗dhɛ, ˈwo˗ pö: «Ü ˗bha ˈgën ˗yö ˗së, ˈbha yi kë mɛn ˗nu ˈwo yö ˗an ˈgü, dɔ ˈˈgbɩɩ˗ ˈü yi ˗da ˗bhɔ ꞊kpluu ˈö yö ˗a ˈgü.»
32 ˈYö Yesu ˗ya pö ˗an ˗dhɛ: «˗Ka ʒiö!» ˈYö ˈwo dho ˈwo ˗da ˗bhɔ ˗nu ˈwo bhë ˗an ˈgü. ˈDhɛ ˈö ˗kë ˈˈdhʋ̈, ˈyö ˗bhɔ ꞊kpluu ˈwo bhë, ˈwo ꞊yɔɔ goo ˗bha ˈwo ꞊wɛnŋ ꞊weeyi ꞊bhaa, ˈö ˈwo ga mü.
33 ˈYö mɛn ˗nu ˈwo kun ˗bhɔ ˗nu bhë ˗an ˗maankë ˗ni ˈgü ˈwo ꞊duëë ˈwo dho ˈplöö. ˈYö ˗kɔ ˈö Yesu ˗yö ˗zuu yaa bho ˗a ˈka mɛn ˗nu ˈgü waa ˈwɔn ˈˈpɛpɛ ˈö˗ ˗kë mü, ˈwo˗ ˗gɛn dɔ ˈpömɛn ˗nu ˗dhɛ.
34 ˈYö ˈpömɛn ˗nu ꞊gban ˈˈpɛpɛ ˗wo nu Yesu ˗gɔ ʒiaan˗. ˈDhɛ ˈwo ˗kpan ˗a ˗bha, ˈyö ˈwo ꞊bhɛɛ ˗a ˗dhɛ kö ˗yö ˈgo wo ˗bha ˈˈsɛ ˈgü.
-Zoto -a ˈˈpiʋ̈ -wɔn -nu
^ ˗A ˗gɛn ˈnën ˗tɔ «ˈö ˗an ˈgü ˗yö ga, ˈö ˗naanzuëdhe ˗yö ˗an pa.»
^ Ɛɛnˈˈ «ˈˈSakpadë ˗nu.»
^ Ɛɛnˈˈ «n ˗gɔ wɔdhɛ.»
