Nɔɔn˗ ˗së ˈsëëdhɛ ˈö Zan ˗ya ˗bɛnzë 1:1-51
1 ˗A züdɔdhɛ ˈgü, kö ˗Zlan yö ˈti pë ˈˈwɛɛ ˈbhaa -da ꞊köŋ, ˗Wo* ˗yö ˗kë ˗dhö, ˈö ˗kë ˗Zlan ˈˈpiʋ̈. ˗Wo ˗yö ˗kun ˈpö ˗zlan do ˈka.
2 Yö ˈnën ˈö kun ˗Zlan ˈˈpiʋ̈ ˗a züdɔdhɛ ˈgü.
3 ˗Zlan ˗yö ˗bɔ ˗a ˗ta ˈö pë ꞊gban ˈˈpɛpɛ ˗da. Pë ˈˈwɛɛ ˈbhaa ˈö ˗Zlan dho ˗a ˗da kö yö ˈti bɔ ˗Wo ˈö bhë ˗a ˗ta, ˈyaa ˈdhö.
4 Yö ˈnën ˈö ˗tosɛta ˗yö bɔ ˗a ˗ta ˈö ˗kë ˗dhö. ˈYö ˗tosɛta ˗yö kun mɛnbhɩɩdhe ˗nu ˗bha ˗dhɛpuudhɛ ˈka.
5 ˗Dhɛpuudhɛ ˗yö ˈbhü ˗ni ˈgü ˗dhɛtiidhɛ ˈgü, ˈˈkɛɛ ˗dhɛtiidhɛ ˗kɔ ˈyaa ˗mɔn ˗ni ˈgü ˗a ˗bha kö ˗yö ˈsɔ ˗a ˗ta.
6 ˗Zlan ˗yö mɛn do ˈbhaa ˗bɔ ˈö nu. ˗A mɛn ˈö bhë ˗wa ˗dhɛ Zan.
7 Gɔndënën ˈö bhë ˗yö ˗nu ˈˈdhʋ̈ kö ˗yö ꞊gbɛkiödhɛ kë, kö ˈwɔn ˈö ˗gban ˗dhɛpuudhɛ ˗bha ˗ya blɛɛˈˈ mɛn ˗nu ˗dhɛ, ˗yö kë ˈˈdhʋ̈ kö mɛn ꞊suu ꞊gban ˈˈpɛpɛ ˗wo bɔ ˗a* ˗ta ˗wo wo ˗zo yö ˗a ˗dhɛ.
8 ˈYaa ˈnën ˈö kun ˗dhɛpuudhɛ ˈö bhë ˗a ˈka, ˈˈkɛɛ ˗yö ˗nu ˈˈdhʋ̈ kö ˈwɔn ˈö ˗gban ˗dhɛpuudhɛ ˗bha ˗ya ˈgü ˈˈpʋ.
9 ˗A ˈˈtʋ̈ŋ ˈö bhë ˗a ˈgü, kö ˗dhɛpuudhɛ ꞊dede ˈö ˗dhɛ ˗pʋ mɛn ꞊suu ꞊gban ˗ta bhë ˗a nu ˗wɔn ˗yö ˗dhö ˈˈkpɔnŋ ꞊taa.
10 ˗Yö ˗kun ˈˈkpɔnŋ ꞊taa. Yö ˈnën ˈö ˗Zlan ˗yö bɔ ˗a ˗ta ˈö ˈˈkpɔnŋtaadhɛ ˗kë, ˈˈkɛɛ ˈˈkpɔnŋtaamɛn ˗nu ˈti˗ dɔ.
11 ˗Yö ˗nu ˈö ˗de ꞊plöö, ˈˈkɛɛ ˗a ˗de ˗gɔ ˈˈsɛgümɛn ˗nu ˈti ˈˈwɩ ˗a ˗wɔn ˗bha.
12 ˈKö ˗kë ˈˈdhʋ̈, mɛn ˈˈpɛpɛ ˈö ˈwo wo ˗kɔ ˗ya ˗a ˗gɔ, ˗ya ˗kë ˈö ˈwo ˗mɔn ˗kë ˗Zlan ˗bha ˈnën ˗nu ˈka ˗sü ˗bha, ˈyö ˗tɔ ˗wa ˗zɔn ꞊dhɛ wo wo ˗zo ˗yö ˗a ˗dhɛ.
13 Bhɔ ˈö ˈwo˗ wo bhë, ˈyii kë ꞊ɲɔɔn ɛɛnˈˈ mɛnbhɩɩdhe ˈgüwɔn ˈka. Yö ˈti kë ˈpö pë ˈö go ˗an dë ˗nu ˈgü ˗a ˈka, ˗wo ˗bhɔ ˗Zlan ˈsaa˗ ˈgü.
14 ˗Wo ˗yö ˗kë mɛnbhɩɩdhe ˈka ˈö ˗tosɛta ˗kë kwa ˈˈpiʋ̈, ˈö ˈkwa ˗kpan ˗a ˗bha ˈtɔbhɔdhe ˗bha. ˈTɔbhɔdhe ˈö ˈˈdhʋ̈, ˗yö ꞊dhɛ ˈtɔbhɔdhe ˈö ˈnëndë ˗ya nu ö gbö ˈnën ga dosɛnŋ ˈö˗ ˗gɔ ˗a ˗dhɛ ˗a ˈdhö. ˗A ˈˈdhiaa ˗yö ˗kun ˗Zlan ˈgü* yi ꞊gban ˈˈpɛpɛ ˈka, ˈö˗ ˗bha ˈwɔn ˈˈpɛpɛ ˗yö ˗gban gagade ˗ta.
15 (ˈWɔn ˈö ˗gban ˗a ˗bha Zan ˗ya ˗blɛɛ, ꞊ii, ˗yö ˗gbla ˈö˗ pö: «Yö ˈnën ˈö ˈa˗ ˗wɔn ꞊blɛɛ ˈa˗ pö: ‹Mɛn ˈö ˗dho nu n ꞊taabha bhë ˗ya bɔ n ˈˈdhiʋ̈, ˗a ˗gɛn ˗mü ꞊dhɛ ˗yö ˗kun ˗dhö ˈˈdhiʋ̈ ˗be kö n ˈti bhɔ ꞊köŋ.›»)
16 Kë ˈö˗ wo ꞊dhɛ ˗a ˈˈdhiaa ˗yö ˗Zlan ˈgü ˈö˗ ˗bha ˈwɔn ˈˈpɛpɛ ˗yö ˗gban gagade ˗ta bhë, ˗Zlan ˗yö ˗zë ˗a ˗wɔn ˗dhɛ ˈö ö ˗bha ˗gasitɛ ꞊suu ˈö ˈˈdhʋ̈ ˗a ˗kë mɛn ꞊gban ˈˈpɛpɛ kwa ˗dhɛ ˗kplawo.
17 ˗Zlan ˗yö ˗bɔ Moizö ˗ta ˈkpa ˈö ö ˗bha ˈtɔŋ˗ ˗nu dɔ, ˈˈkɛɛ Yesu Klito ˈnën ˈö bɔ ˗a ˗ta ˈö ö ˗bha ˗gasitɛ waa gagade ˗an ˗zɔn kwa ˗dhɛ.
18 Mɛn ˈbhaa yö ˈti ˗kpan ˗Zlan ˗bha do, kö yö ˈti kë ˗zlan ˈö ˈnën ga do ˈka ˈö ˗ya ˗sü ˈka ö Dë ˈˈsuee* ˗a ˈka. Yö ˈnën ˈö Mɛn ˈö˗ ˈka ˗a ˗zɔn kwa ˗dhɛ.
19 ˈDhɛ ˈö Zuifö ˗nu ˗wo ˈˈsaabhomɛn ˗nu waa Levi ˗bha ˈkɔɔmɛn ˈbhaa ˗nu bɔ Zedhizadhɛmö, ˈö ˈwo Zan dhɛɛˈˈ kpɔ ˈwo˗ pö: «De ˗mü ü ˈka?»,
20 ˗yö ˗to ˈˈshia˗ mü ˈö˗ pö ˗an ˗dhɛ ˈˈpuu ˈka ꞊dhɛ: «Klito ˈyaa ˗mü n ˈka.»
21 ˈYö ˈwo˗ dhɛɛˈˈ kpɔ ˈwo˗ pö: «ˈDhɛ ˈö ˈˈdhʋ̈ de ˗mü ü ˈka ˈsa? Edhi ˗mü ü ˈka ˗ee?» ˈYö˗ pö ˗an ˗dhɛ: «˗Abin, Edhi ˈyaa ˗mü n ˈka.» ˈYö ˈwo˗ pö: «˗Zlan ˗wodhiʋ̈lomɛn ˈö˗ nu ˗wɔn ˈdhö ˗dhö bhë yö ˗mü ü ˈka ˗ee?» ˈYö˗ pö: «˗Abin!»
22 ˈYö ˈwo˗ pö ˗a ˗dhɛ: «Mɛn ˈü˗ ˈka ˗bhö ˗a pö yi ˗dhɛ, kö pë ˈyi ˗dho ˗a pö mɛn ˗nu ˈwo yi bɔ bhë ˗an ˗dhɛ ˈyi˗ dɔ. Ü˗ ˗pö de ˗mü ü ˈka?»
23 ˈYö˗ pö ˗an ˗dhɛ: «Man ˈnën ˈa ˗tɔ mɛn ˈö ˈˈgbla ˗ni ˈgü ˈˈyɛta ˈö˗ pö ˗ni ˈgü: ‹˗Ka Zoova ˗bha ʒiaan dɔ ꞊zinŋgü› ꞊dhɛ ˗kɔ ˈö ˗Zlan ˗wodhiʋ̈lomɛn Izai ˗ya pö ˗a ˈka bhë ˗a ˈdhö.»
24 Mɛn ˗nu ˈö ˈwo kun dhɛɛˈˈ ˈkpɔ ˗ni ˈgü ˈˈdhʋ̈ bhë Fadhiziɛn ˗nu ˈnën ˈwo ˗an bɔ.
25 ˗A ˗wɔn ˈgü, ˗wo Zan dhɛɛˈˈ ˗kpɔ ˈö ˈwo˗ pö: «˗Ya kë ꞊dhɛ Klito ˈyaa ˗mü ü ˈka, Edhi ˈyaa ˗mü ü ˈka ɛɛnˈˈ ˗Zlan ˗wodhiʋ̈lomɛn ˈyaa ˗mü ü ˈka, ˈmën ˗kë ˈsa ˈü mɛn ˗nu bɔ ˈˈyi ꞊bhaa?»
26 ˈYö Zan ˗ya ˗yɔ bɔ ˗an ˗gɔ ˈö˗ pö: «Man ˗zë ˈˈyi ˈnën ˈa mɛn ˗nu bɔ ˗a ꞊bhaa. ˈˈKɛɛ mɛn do ˈbhaa ˗yö ka kpö ˈgü ˈö ˈkaa˗ dɔ.
27 Yö ˈnën ˈö ˗tɔ mɛn ˈö ˗dho nu n ꞊taabha, ˈö˗ ˗bha ˗sabha ˗de ˈö˗ ˗gɛn ˗bha, ˗a ˈˈse ˈyaa n ˗dhɛ kö ˈa˗ gën ˈˈpʋ.»
28 ˈWɔn ˗nu bhë ˗wo ˗kë ˈˈdhʋ̈ Betani, Zuudɛn ga ꞊zlöö, ˗dhɛ ˈö Zan ˗yö kun mɛn ˗nu bɔ ˗ni ˈgü ˗a ˗bha ˈˈyi ꞊bhaa bhë ˗a ˈgü.
29 ˗A ˗dhɛkpaɔyi ˈö dɔ ˗a ˈˈpiʋ̈ bhë ˗a ˈka, ˗yö ˗kpan Yesu ˗bha kö ˗yö nu ˗ni ˈgü ˗a ˈˈpiʋ̈, ˈyö˗ pö: «˗Ka ˗dhɛ ˗ga, ˗Zlan ˗bha ˈˈbhlaanën ˈö ˗dho ˈwɔn yaa kë ˗dhii bho ˈˈkpɔnŋtaamɛn ˗nu ˗bha, yö ˗ga ˈö ꞊nɛn.
30 Yö ˈnën ˈa˗ ˗wɔn ꞊blɛɛ ˈa˗ pö: ‹Mɛn ˈö kun nu ˗ni ˈgü n ꞊taabha bhë ˗ya bɔ n ˈˈdhiʋ̈, ˗a ˗gɛn ˗mü ꞊dhɛ ˗yö ˗kun ˗dhö ˈˈdhiʋ̈ ˗be kö n ˈti bhɔ ꞊köŋ.›
31 Man ꞊dede ˈmaan kun ˗a dɔ ˗ni ˈgü ˗be, ˈˈkɛɛ pë ˈö˗ ˗wɔn ˈgü ˈa nu mɛn ˗nu bɔ ˈˈyi ꞊bhaa ˈyö ˗tɔ kö Izraɛdhömɛn ˗nu ˗wa dɔ.»
32 Zan ˗ya ꞊gbɛkiödhɛ ˗kë ˈzü ˈö˗ pö: «A ˗kpan ˗zuu ˈˈslʋ̈ʋ̈slʋ̈ ˗bha kö ˗yö ˈgo ˗ni ˈgü dhaŋ˗ ˈgü ˗yö yɔɔˈˈ ˗ni ˈgü ˗a ˗ta ꞊dhɛ ˗toŋ ˈdhö. ˗Zuu ˈˈslʋ̈ʋ̈slʋ̈ ˈö ˈˈdhʋ̈ ˗yö ˗to ˗a ˗ta.
33 Man ꞊dede ˈmaan kun ˗a dɔ ˗ni ˈgü ˗be, ˈˈkɛɛ mɛn ꞊dede ˈö n bɔ kö ˈa mɛn ˗nu bɔ ˈˈyi ꞊bhaa bhë ˗ya ˗pö n ˗dhɛ: ‹Mɛn ˈö ˈü ˗dho ˗kpan ˗zuu ˈˈslʋ̈ʋ̈slʋ̈ ˗bha kö ˗yö yɔɔˈˈ ˗ni ˈgü ˗a ˗ta kö yö ˈto ˗a ˗ta bhë, kö mɛn ˈö bhë yö ˈnën ˈö ˗dho mɛn ˗nu bɔ ˈˈyi ꞊bhaa ˗zuu ˈˈslʋ̈ʋ̈slʋ̈ ˈka.›
34 N ˈˈɲan ˗yö ˗da ˈwɔn ˗nu ˈwo bhë ˗an ˈgü, ˗a ˗wɔn ˈgü a˗ ꞊gbɛkiödhɛ ˗kë ˈˈpuu ˈka ꞊dhɛ mɛn ˈö bhë ˗Zlan Gbö ˗mü.»
35 ˈDhɛ ˈö˗ ˗ta ˗dhɛ ˗yö ꞊kpɔɔ ˈzü, Zan waa ö ˗bha gwëëˈˈ ˗nu ꞊plɛ ˗wo ˗kun ˈduaannu ˗sü ˈka ˗dhɛ ˈö bhë ˗a ˈgü.
36 ˈDhɛ ˈö ˗kpan Yesu ˗bha kö ˗yö ʒiö ˗ni ˈgü, ˈyö˗ pö: «˗Ka ˗dhɛ ˗ga, ˗Zlan ˗bha ˈˈbhlaanën ˈnën ˈdho ˗ni ˈgü bhë!»
37 ˈDhɛ gwëëˈˈ ˗nu ꞊plɛ ˈwo bhë ˈwo˗ man ˈˈdhʋ̈, ˈyö ˈwo ˗ya ʒiö ˗sü ˗bha Yesu ꞊kee˗.
38 ˈDhɛ ˈö Yesu ˗yö ꞊slëë ö ˗zü ˈö ˗kpan ˗an ˗bha kö ˗wo ʒiö ˗ni ˈgü ˗a ˈˈpiʋ̈, ˈyö˗ pö ˗an ˗dhɛ: «ˈKwa˗ man ˈmü?» ˈYö ˈwo˗ pö ˗a ˗dhɛ: «Labi (꞊waa˗ pö ˈˈdhʋ̈ ˗a ˗gɛn ˈnën ˗tɔ: «˗Gɔmɛn»), ˈˈkwɛnŋdhɛ ˗mɛɛn ˈü˗ ˗bha?»
39 ˈYö˗ pö ˗an ˗dhɛ: «˗Ka nu ˈkwa ˈdho kö ˈka˗ ˗dhɛ dɔ.» ˈYö ˈwo dho ˈwo ˗kpan ˈˈkwɛnŋdhɛ ˈö Yesu ˗wɔ ˗a ˗bha bhë ˗a ˗bha, ˈö ˈwo to ˗a ˈˈpiʋ̈ mü ˗dhɛkpaɔyi ˈö bhë ˗a ˈka. ˗Yö ˗kë ˈˈdhʋ̈ ˈˈdooka ˗ɲaan ˈka, ˈˈlɛlɛ ˗kɔŋ do ö ga ˈˈsɔɔdo* ꞊tɛɛ˗ ˗bha.
40 Mɛn ꞊plɛ ˈö pë ˈö Zan ˗ya pö ˈwo˗ man ˈö ˈwo ˗ʒiö Yesu ꞊kee˗ bhë, ˗a mɛn do ˈnën ˈö ˗tɔ Andre ˈö ˗kë Simɔn Piɛɛ ꞊dhegblü ˈka.
41 ˗Yö ˗dho ꞊köŋ ˗blɛɛsü ö ꞊dhegblü Simɔn ˈˈpiʋ̈, ˈyö˗ pö ˗a ˗dhɛ: «ˈYa ˗kpan Mesi ˗bha.» (꞊Waa˗ pö ˈˈdhʋ̈ ˗a ˗gɛn ˈnën ˗tɔ «Klito.»)
42 ˈYö dho Simɔn ˈka Yesu ˈˈpiʋ̈. ˈDhɛ ˈö Yesu ˗yö ˗kpan ˗a ˗bha, ˈyö˗ pö: «˗Wo ü ˗dhɛ Simɔn, ˈö ü dë ˗yö ˗kë Zan ˈka. ˈˈKɛɛ ˈö sü ꞊dɛɛ ˗bha, ˗wo ˗dho ü ˗dhɛ Sefasö» (꞊waa˗ pö ˈˈdhʋ̈ ˗a ˗gɛn ˈnën ˗tɔ «Piɛɛ»).
43 ˗A ˗dhɛkpaɔyi ˈö dɔ ˗a ˈˈpiʋ̈ kö Yesu ˗ya ˈˈpiʋ̈ ˈö ˈdho Galile, ˈyö ˗kpan Filipö ˗bha ˈö˗ pö ˗a ˗dhɛ: «˗Bhö ʒiö n ꞊kee˗.»
44 ˗A Filipö ˈö ˈˈdhʋ̈ ˗yö ˗go Bɛtüsaidö, ˈpödhɛ ˈö Andre waa Piɛɛ ˈwo bhɔ ˗a ˗bha bhë ˗a ˈgü.
45 Filipö ˗yö ˗kpan Natanaɛdhö ˗bha, ˈyö dho ˗a ˈˈpiʋ̈ ˈö˗ pö ˗a ˗dhɛ: «Mɛn ˈö Moizö ˗ya ˗wɔn ꞊blɛɛ ˈTɔŋ˗ ˈsëëdhɛ ˈgü, ˈö ˗Zlan ˗wodhiʋ̈lomɛn ˗nu ˗wa ˗wɔn ꞊blɛɛ ˈpö bhë, ˈya ˗kpan ˗a ˗bha. Yö ˈnën ˈö ˗tɔ Zozɛfö gbö Yesu ˈö go Nazadhɛtö.»
46 ˈˈKɛɛ ˈyö Natanaɛdhö ˗ya pö ˗a ˗dhɛ: «Pë ˗tiaandhö ˈbhaa ꞊mɔɔn˗ ˗bha kö ˗yö ˈgo Nazadhɛtö ˗ee?» ˈYö Filipö ˗ya pö ˗a ˗dhɛ: «˗Bhö nu kö ˈü ˗kpan ˗a ˗bha.»
47 ˈDhɛ ˈö Yesu ˗yö ˗kpan Natanaɛdhö ˗bha kö ˗yö nu ˗ni ˈgü ö ˈˈpiʋ̈, ˈyö ˈwɔn ꞊blɛɛ ˗a ˗bha ˈö˗ pö: «Izraɛdhö mi ꞊dede ˈö ˈˈkpënŋ˗ ˈyaa˗ ˗kɔ ˈˈpiʋ̈, yö ˈnën ˈö nu ˗ni ˈgü bhë.»
48 ˈYö Natanaɛdhö ˗ya pö ˗a ˗dhɛ: «Ü n ˗dɔ ˗kɔ ˗kë ꞊dhɛ?» ˈYö Yesu ˗ya pö: «ˈˈSanni Filipö ˗yö ü ˗dhɛ, kö ü dɔ ˗sü ˈka figö ˗dhü ꞊löö bhë, kö ˈman ˗kpan ü ˗bha ˈsaadhö.»
49 ˈYö Natanaɛdhö ˗ya pö: «˗Gɔmɛn,* ˗Zlan Gbö ˗mü ü ˈka, bhi ˈnën ˈü ˗tɔ Izraɛdhö ˗bha ˗Gblüdë.»
50 ˈYö Yesu ˗ya pö ˗a ˗dhɛ: «˗A pö ˈa˗ wo ꞊dhɛ a ˗kpan ü ˗bha kö ü dɔ ˗sü ˈka figö ˗dhü ꞊löö bhë, yö ˈnën ˈö˗ ˗wɔn ˈgü ˈü ˈdhaŋ˗ bho n ˈˈdhiʋ̈ ˗ee? ˈWɔn ˈˈmlünmlünsü ˗nu ˈwo ˗ʒiö ˗a ˈdhɛ ˈö bhë ˗a ˗ta ü ˗dho ˗an yö.»
51 ˈYö Yesu ˗ya pö ˈzü: «A˗ ˗pö ka ˗dhɛ gagade ˈka ꞊dhɛ, ka ˗dho ˗kpan dhaŋ˗ ˗bha kö ˗a ˈˈdhi ˗ya ˈˈpʋ kö ˗Zlan ˗bha ˈˈkiö ˗nu ˗wo ˈdho ˗ni ˈgü ˈˈdhuŋ, kö ˗wo yɔɔˈˈ ˗ni ˈgü maan mɛn Gbö ˗mɛn n ˈˈpiʋ̈.»
-Zoto -a ˈˈpiʋ̈ -wɔn -nu
^ Biblö ˈˈɲan ˈö yö ˗a ˈgü ꞊waa˗ pö «˗Wo» kö ˗wo ˗we Yesu ˈka.
^ ˗Wo we «Zan» ˈka.
^ Ɛɛnˈˈ «˗Zlan ˗bha ˗gasitɛ ˗kun ˗a ˗ta.»
^ Ɛɛnˈˈ «˗kuu ˈgü.» ˗Yɛɛ ꞊bhlëësü ˈö ˈnëndë ˗yö ö ˗bha ˈnën ˗ya ˗a ˈgü kö ˗ya ˗zɔn ꞊dhɛ ˗a ˗wɔn ˗yö ö ˗gɔ ˈˈgbɩɩ˗ yö ˗mü.
^ Glɛkö ˗wo ˈgü ˈyö ˗tɔ «ˈˈlɛlɛ ˗kɔŋ do ˗naan.»
^ Glɛkö ˗wo ˈgü ˈyö ˗tɔ «Labi.»
