Nɔɔn˗ ˗së ˈsëëdhɛ ˈö Zan ˗ya ˗bɛnzë 10:1-42
10 «A˗ ˗pö ka ˗dhɛ gagade ˈka ꞊dhɛ mɛn ˈö yö ˈti bɔ ˈˈbhlaa ˗nu ˗bha ˗glɛŋ ˈˈkwee ˈˈdhi ˈka kö ˈö ˗da ˈkɔɔ, ˈˈkɛɛ ˈö bɔ ˗dhɛ ˈˈwɛɛ ˈgü ˈö ˗da ˗glɛŋ ˗bha, kö mɛn ˈö bhë ꞊kwaanmɛn ˗mü, ɛɛnˈˈ kö ˗sɔ mɛn ˗ta ˗mɛn ˗mü.
2 Mɛn ˈö bɔ ˗a ˈˈkwee ˈˈdhi ˈka ˈö ˗da ˈkɔɔ, yö ˈnën ˈö ˗tɔ ˗tuëë ˗maankëmɛn.
3 ˈˈKwee ˗maankëmɛn ˗yö ˈˈkwee ˗pʋ ˗a ˗gɔ, ˈö ˈˈbhlaa ˗nu ˗wo wo ˈˈtʋ to ˗a ˗wo ˗bha. ˗Yö ö ˗bha ˈˈbhlaa ˗nu ˗dhɛ ˗an ˈtɔ ˈka, ˈö yö ˗an ˈka ˈˈkpɛnŋ.
4 ꞊Ya ö ˗bha ˈˈbhlaa ˗nu yö ˈˈkpɛnŋ, ˈyö yö ˗an ˗dhɛ ˈˈdhiʋ̈, ˈyö ˈwo ˗ʒiö ˗a ꞊kee˗, ˗a ˗gɛn ˗mü ꞊dhɛ ˗wa ˗wo ˗dɔ.
5 Mɛn ˈö ˈˈbhlaa ˗nu ˈwaa˗ dɔ, ˈwaa ʒiö ˗a ˈˈpiʋ̈ toŋtoŋdhö, ꞊duëë ˈnën ˈwo˗ wo ˗a ˗gɔ, ˗a ˗gɛn ˗mü ꞊dhɛ ˈwaa˗ ˗wo dɔ.»
6 Yesu ˗yö ˈwɔnzuan ˈö bhë ˗a ˗zɔn ˗an ˗dhɛ, ˈˈkɛɛ ˈwaa kun ˗a ˈklɔɔ˗ dɔ ˗ni ˈgü.
7 ˈYö Yesu ˗ya pö ˗an ˗dhɛ ˈzü: «A˗ ˗pö ka ˗dhɛ gagade ˈka ꞊dhɛ, man ˈnën ˈa ˗tɔ ˈˈkwee ˈˈdhi ˈö ˈˈbhlaa ˗nu ˗wo bɔ ˗a ˈka.
8 Mɛn ˈˈpɛpɛ ˈwo nu kö ˈwo n ˗duɛɛ ˈsü bhë, ꞊kwaanmɛn ˗nu waa ˗sɔ mɛn ˗ta ˗mɛn ˗nu ˗mü ˗an ˈka. ˈˈKɛɛ n ˗man ˈˈbhlaa ˗nu wo ˈti wo ˈˈtʋ ˈto ˗an ˗wo ˗bha.
9 Man ˈnën ˈa ˗tɔ ˈˈkwee ˈˈdhi. Mɛn ˈö bɔ n ˈka ˈö ˗da ˈkɔɔ, ˗yö ˗dho dha. ˗Yö ˗dho ˗da ˈkɔɔ, ˈö yö ˈˈkpɛnŋ, ˈö ˗bhöpë ꞊slɔɔ.
10 ꞊Kwaanmɛn ˗yö ˗nu kö ˗yö ˈˈbhlaa ˗nu ꞊kwaan, kö ˗yö ˗an zë, kö ˗yö ˗an ˈgüshiʋ̈. ˈˈKɛɛ man ˗zë a ˗nu kö ˈa ˗tosɛta ꞊dede nu ˈˈbhlaa ˗nu ˗dhɛ, kö ˗wa kë ˗toëpö ˈka.
11 Man ˈnën ˈa ˗tɔ ˗tuëë ˗maankëmɛn ˗tiaandhö. ˗Tuëë ˗maankëmɛn ˗tiaandhö ˗yö ö ˗bha ˗tosɛta* ˗nu ˈˈbhlaa ˗nu ˗wɔn ˈgü.
12 Mɛn ˈwo˗ ꞊saabho kö ˗yö ö ˈˈɲan ˈto ˈˈbhlaa ˗nu ˈˈdhiʋ̈, ˈö ˈyaa ˗tuëë ˗maankëmɛn ˈka ɛɛnˈˈ ˈö ˈyaa ˈˈbhlaa ˗nu dëmɛn ˈka, ˗ya ˗kpan ˈˈblü ˗gbɛn ˗bha kö ˗yö nu ˗ni ˈgü, ˗yö ˈˈbhlaa ˗nu ˗to ˈˈshia˗ ˈö ꞊duëë, ˈö ˈˈblü ˗gbɛn ˗yö nu ˈö ˈˈbhlaa ˗nu kun, ˈö ˈwo ˗pɛn.
13 ˗A ˗gɛn ˗mü ꞊dhɛ ˗yö ö ˈˈɲan ˗to ˈˈbhlaa ˗nu ˈˈdhiʋ̈ ˈwëë˗ ˗wɔn ˈgü, ˗a ˈˈtʋ ˈyaa ˈˈbhlaa ˗nu ˗bha.
14 Man ˈnën ˈa ˗tɔ ˗tuëë ˗maankëmɛn ˗tiaandhö. A n ˗man ˈˈbhlaa ˗nu ˗dɔ, ˈö n ˗man ˈˈbhlaa ˗nu ˗de ˈpö ˈwo n dɔ
15 ꞊dhɛ ˗kɔ ˈö n Dë ˗yö n dɔ ˗a ˗bha, ˈö man ˗de ˈpö ˈa n Dë dɔ ˗a ˈka bhë ˗a ˈdhö. A n ˗man ˗tosɛta ˗nu n ˗man ˈˈbhlaa ˗nu ˗wɔn ˈgü.
16 «ˈˈBhlaa ˈˈwɛɛ ˈbhaa ˗nu ˗wo n ˗gɔ ˈpö ˈö ˈwaa ˗glɛŋ ˈö yö ˗a ˈgü. Wo ˗de ˈpö n dua ˗mü kö ˈa nu ˗an ˈka. ˗Wo ˗dho wo ˈˈtʋ ˈto n ˗wo ˗bha, ˈö n ˗man ˈˈbhlaa ˗nu kpö ˗yö ˗kë do, ˈö ˗an ˗maankëmɛn ˗yö ˗kë do.
17 N ˗dhɔ ˗yö n Dë ˗kë, ˗a ˗gɛn ˗mü ꞊dhɛ a n ˗man ˗tosɛta ˗nu, ˗yö kë ˈˈdhʋ̈ kö ˈa˗ ꞊slɔɔ ˈzü ˗dɛɛwo.
18 Mɛn ˈbhaa yö ˈti n ˗man ˗këdhösü bhë ˗a ˈkun n ˗gɔ, ˈˈkɛɛ a˗ ˗sü n ˗de ˈgü ˈa˗ nu. ˗A ˈˈse ˗yö n ˗dhɛ kö ˈa˗ nu, ˗a ˈˈse ˗yö n ˗dhɛ ˈpö kö ˈa˗ ꞊slɔɔ ˈzü. ˈWɔn ˈö n Dë ˗ya pö ˈa˗ kë, yö ˈnën ˈö bhë.»
19 ˗Wo ˈö˗ pö bhë ˗a ˗wɔn ˈgü, Zuifö ˗nu ˗wo ˗ya ˈzü zɔɔdhe ˗man ˗sü ˗bha wo ˈˈkwöö.
20 ˗An ꞊vadhɛ ˗kun ˗a pö ˗ni ˈgü: «˗Zuu yaa ˗ya ˈgü, slaamɛn ˗mü ˗a ˈka. Ka ka ˈˈtʋ ˗to ˗a ˗bha ˗mën ˗wɔn ˈgü?»
21 ˈYö˗ mɛn ˈˈwɛɛ ˈbhaa ˗nu ˗wa pö: «˗Wo ˗nu ˈö ˗an pö ˗ni ˈgü bhë, mɛn ˈö ˗zuu yaa ˈdhö˗ ˈgü ˈyaa ꞊mɔɔn˗ ˗bha kö ˗ya pö. ˗Zuu yaa ˈyaa ꞊mɔɔn˗ ˗bha ˈpö kö ˗yö ˈˈɲɛɛntiimɛn ˗nu ˈˈɲan ˈˈpʋ.»
22 ˗A ˈˈtʋ̈ŋ ˈö bhë ˗a ˈgü, ˗wo ˗kun ˗Zlan ˗dhɔkë ˗a ˈgü ˗kɔ ˈˈdhi ˈˈpʋ ˗kwɛ ˗yö ˈko ˈˈdhiʋ̈ ˈwlaan˗ kë ˗ni ˈgü Zedhizadhɛmö. ˗Yö ˗kë ˈˈdhʋ̈ ˈˈnɛnnɛn ˈˈtʋ̈ŋ ˈka,
23 ˈö Yesu ˗yö kun ˈˈta ˈsü ˗ni ˈgü ˗Zlan ˗dhɔkë ˗a ˈgü ˗kɔ ˈgü, ˗a ˈˈpian ˈwo˗ ˗dhɛ Sadhomɔn ˗bha ʒiaan* bhë ˗a ˈka.
24 ˈYö Zuifö ˗nu ˗wo ꞊klënŋ ˗a ˗zü ˈö ˈwo˗ pö ˗a ˗dhɛ: «Mɛn ˈü˗ ˈka, ü ˗dho ˗a pö yi ˗dhɛ ˈkpakpadhö ˗mën yi ˈka ꞊dha? ˗Ya kë ꞊dhɛ Klito ˗mü ü ˈka, ˗a pö yi ˗dhɛ ˈˈpuu ˈka ˗kɛɛ.»
25 ˈYö Yesu ˗ya ˗yɔ bɔ ˗an ˗gɔ ˈö˗ pö: «ˈMan˗ pö ka ˗dhɛ ˈsaadhö, ˈˈkɛɛ ˈkaa ka ˗zo yö n ˗dhɛ. ˈWɔn ˗nu ˈa ˗an kë ˗ni ˈgü n Dë ˈtɔ ˈgü bhë, wo ˈnën ˈö mɛn ˈa˗ ˈka ˈwo˗ ˗zɔn.
26 ˈKaa ka ˗zo yö n ˗dhɛ ˈyö sü ꞊dhɛ ˈkaa n ˗man ˈˈbhlaa ˗nu ˈka.
27 N ˗man ˈˈbhlaa ˗nu ˗wo wo ˈˈtʋ ˗to n ˗wo ˗bha. A ˗an ˗dɔ, ˈö ˈwo ˗ʒiö n ꞊kee˗.
28 A ˗dho ˗tosɛta ˈö ˈyaa ɲën ˗a nu ˗an ˗dhɛ, ˈö ˗an ˈgü yö ˈti ˗dho shiʋ̈ˈˈ toŋtoŋdhö, ˈö mɛn ˈbhaa yö ˈti ˗dho ˗an ˈkun n ˗gɔ.
29 ˈPë n Dë ˗ya nu n ˗dhɛ ˗a ꞊bhlëë ˗yö ˈkpii˗ ˈö ˗ʒiö ˗a ˈka pë ˈˈwɛɛ ˈˈpɛpɛ ˈwo to ˗an ˗ta. Mɛn ˈbhaa yö ˈti ˗dho ꞊mɔɔn˗ ˗bha kö ˗yö ˗an ˈkun n Dë ˗gɔ.
30 Yaa n Dë, mɛn do ˗mü yi ˈka.»
31 ˈYö Zuifö ˗nu ˗wo ˗gwö ˗nu sü ˈzü kö ˈwo˗ ˗zuö ˗a ˈka.
32 ˈYö Yesu ˗ya pö ˗an ˗dhɛ: «A ˈwɔn ˗së ꞊va ˈwo go n Dë ˈˈpiʋ̈ ˗an ˗kë ˈö ˈka ˗an yö. ˈWɔn ˗nu ˈwo ˈˈdhʋ̈, ˗a ˗mɛɛn ˈö˗ ˗wɔn ˈgü ˈö ˈka n ˗zuö ˗gwö ˈka?»
33 ˈYö Zuifö ˗nu ˗wa ˗yɔ bɔ ˗a ˗gɔ ˈwo˗ pö: «ˈYii kë ꞊dhɛ ˈwɔn ˗së ˈbhaa ˈnën ˈü˗ ˗kë ˈyö ˈyi ü ˗zuö ˗gwö ˈka, ˈˈkɛɛ ˗Zlan ˗bhlëë ˗shiö ˈnën ˈü˗ wo. ˗A ˗gɛn ˗mü ꞊dhɛ, bhi ˈö ˈü ˗kë mɛnbhɩɩdhe ˈka bhë, ˈbha ü ˗de kë ˗zlan ˈka.»
34 ˈYö Yesu ˗ya pö ˗an ˗dhɛ: «˗Yö ˗bɛnzë ˗sü ˈka ka ˗bha ˈtɔŋ˗ ˗nu ˈgü ꞊dhɛ, ‹A˗ ˗pö: «˗zlan ˗nu ˗mü ka ˈka.»›* ˈYaa ˈˈdhʋ̈ ˗ee?
35 ˗Ya kë ꞊dhɛ mɛn ˗nu ˈö ˗Zlan ˗Wo ꞊yaa ˗an zë za ˈka, ꞊yaa ˗an ˗dhɛ ‹˗zlan ˗nu› (ˈˈkɛɛ kö ˗Zlan ˗Wo ˈö ˈˈdhʋ̈ ˈyaa ꞊mɔɔn˗ ˗bha kö ˗yö ˈgo ˈˈgblʋʋ toŋtoŋdhö),
36 ˈyö man ˈö n Dë ˗yö n ˗kë ˈˈslʋ̈ʋ̈slʋ̈, ˈö n bɔ ˈˈkpɔnŋ ꞊taa yö bhë, ˈka˗ pö ꞊dhɛ ˈman˗ ꞊bhlëë ˗shiö, ˗a pö ˗a wo ꞊dhɛ ‹˗Zlan Gbö ˗mü n ˈka› bhë ˗a ˗wɔn ˈgü ˗ee?
37 ˗Ya kë ꞊dhɛ ˈpë n Dë ˈdhö˗ ˈˈpiʋ̈ ˈa˗ kë, ˈyaa ˈnën ˈa˗ kë ˗ni ˈgü bhë, ˈkaa ˗dho ka ˗zo yö n ˗dhɛ.
38 ˈˈKɛɛ ˗ya kë ꞊dhɛ pë ˈö˗ ˈˈpiʋ̈ ˈyö ˈa˗ kë ˗ni ˈgü bhë, ˈkö ka ˈti ka ˗zo yö n ˗dhɛ, ˗ka ˈdhaŋ˗ bho pë ˗nu ˈa ˗an kë ˗ni ˈgü bhë ˗an ˈˈdhiʋ̈, ˗yö kë ˈˈdhʋ̈ kö ˈka˗ ˈwɔn dɔ, kö ˈka˗ ˈgüman ˈˈpuu ˈka ˗kplawo ꞊dhɛ yaa n Dë yi ˗kɔ ˗yö ö ˈkoo.»
39 ˈDhɛ ˈö ˗kë ˈˈdhʋ̈, ˈyö ˈwo˗ ˈˈslö ꞊mɛɛn ˈzü kö ˈwo˗ ˈkun, ˈˈkɛɛ ˈyö dha ˗an ˗gɔ.
40 ˗Yö ˗go ˗dhɛ ˈö bhë ˗a ˈgü ˈö dho ˈzü Zuudɛn ga ꞊taabha, ˗dhɛ ˈö Zan ˗yö kun mɛn ˗nu bɔ ˗ni ˈgü ˈˈyi ꞊bhaa ˗a ˗bha ˈˈdhiʋ̈ ˗blɛɛsü bhë ˗a ˈgü, ˈyö to mü.
41 ˈYö mɛn ꞊va ꞊dede ˗wo nu ˗a ˈˈpiʋ̈ mü, ˈö ˈwo ˗ya ˗a pö ˗sü ˗bha: «Zan yö ˈti ˗dhidha dosɛnŋ kë, ˈˈkɛɛ pë ˈˈpɛpɛ ˈö˗ ꞊blɛɛ gɔndënën ˈö yö ˗a ˗bha, ˗a ꞊gban ˗kun gagade ˈka.»
42 ˈYö mɛn ꞊va ˗wo wo ˗zo yö ˗a ˗dhɛ ˗dhɛ ˈö bhë ˗a ˈgü.
-Zoto -a ˈˈpiʋ̈ -wɔn -nu
^ Ɛɛnˈˈ «ˈniin˗.»
^ Ɛɛnˈˈ «bɔdhɛ ˈö ꞊gban ˈˈdhü ˗nu ꞊zinŋgü.»
^ Ɛɛnˈˈ «ka ꞊dhɛ ˗zlan ˗nu ˈdhö.»
