Nɔɔn˗ ˗së ˈsëëdhɛ ˈö Zan ˗ya ˗bɛnzë 11:1-57
11 Gɔndënën do ˈwo˗ ˗dhɛ Lazaa ˈyaa kun ö ˈflëëgü. ˗Yö ˗go Betani, ˈpödhɛ ˈö ˗kë Madhi waa ö ꞊dhegblü Matö ˗an ˗bha ˈpödhɛ ˈka bhë ˗a ˈgü.
2 ˗A Madhi ˈö bhë, yö ˈnën ˈö yi do ˈka ˈö ˈˈɲɔn ꞊fii ˗së ˗sü ꞊wɛnŋ Dëmɛn ˗ta, ˈö ö ˗bha wundhɛ ˗nu ˗ta ˗a ˗gɛn ˗nu ˗bha. ˗A ꞊dhegblü ˈnën ˈö ˗tɔ Lazaa ˈö ˈyaa kun ö ˈflëëgü bhë.
3 ˈDhɛ ˈö ˗kë ˈˈdhʋ̈, ˈyö Lazaa ꞊dhegblü dhoo ˗nu bhë ˈwo mɛn bɔ Yesu ˈˈpiʋ̈ ˈwo˗ pö ˗a ˗dhɛ: «Yi Dëmɛn, ü ˈˈtɔŋdë ˈö˗ ˗wɔn ˈdhö ü ˗gɔ ˈˈgbɩɩ˗ bhë, ˈyaa ö ˈflëëgü.»
4 ˈDhɛ ˈö Yesu ˗ya man ˈˈdhʋ̈, ˈyö˗ pö: «ˈˈYua ˈö bhë yö ˈti nu ˗a zë ˗wɔn ˈgü. ˗Yö ˗nu ˈˈdhʋ̈ kö ˗Zlan ˈtɔ ˗yö bhɔ, kö ˗Zlan Gbö ˗yö bɔ ˗a ˗ta ˈpö ˗a ˈtɔ ˗yö bhɔ.»
5 Matö waa Madhi waa Lazaa ˈwo bhë, ˗an ˗dhɔ ˗yö ˗kun Yesu kë ˗ni ˈgü ꞊dedewo.
6 ˈˈKɛɛ ˈdhɛ ˈö˗ man ꞊dhɛ Lazaa ˈyaa ö ˈflëëgü, yö ti ˈdho mü, ˗yö ˗to ˗dhɛ ˈö kun ˗a ˗bha bhë ˗a ˈgü ˈö ˗dhɛkpaɔyi ꞊plɛ ˗kë mü ˈzü.
7 ˈDhɛ ˈö ˗dhɛkpaɔyi ꞊plɛ bhë ˈwo ˗ʒiö, ˈyö˗ pö ö ˗bha gwëëˈˈ ˗nu ˗dhɛ: «˗Kwa kwa ꞊yɛɛ kë ˈzü ˈkwa ˈdho Zude.»
8 ˈYö˗ ˗bha gwëëˈˈ ˗nu ˗wa pö ˗a ˗dhɛ: «Gɔmɛn, ˈdhɛ ˈö Zude ˗mɛn ˗nu ˗wa ˈˈslö ꞊mɛɛn kö ˈwo ü ˗zuö ˗gwö ˈka bhë, ˗a ˗dhɛkpaɔyi ˗ya kë ꞊dhɛ ˈyö ˈü˗ pö ˈü ˈdho mü ˈzü?»
9 ˈYö Yesu ˗ya pö ˗an ˗dhɛ: «˗Dhɛ ˗ya ꞊kpɔɔ, ˗dhɛ ˗yö ˗to ˈˈpʋ ˗sü ˈka ˈˈlɛlɛ ˗kɔŋ do ö ga ꞊plɛ (12) ˈˈpiʋ̈, ˈyaa ˈˈdhʋ̈ ˗ee? Mɛn ˈö ˈˈta ˈsü ˗ni ˈgü ˈɲënŋ˗ ˈgü ˗a ˗gɛn ˈˈdhiʋ̈ ˈyaa ˗zuö pë ˈˈwɛɛ ˈbhaa ˗bha, ˗a ˗gɛn ˗mü ꞊dhɛ ˗yö ˗kpan ˗dhɛpuudhɛ ˈö ˈˈkpɔnŋ ꞊taa yö ˗a ˗bha.
10 ˈˈKɛɛ mɛn ˈö ˈˈta sü gbeŋ ˗a ˗gɛn ˈˈdhiʋ̈ ˗yö ˗zuö, ˗a ˗gɛn ˗mü ꞊dhɛ ˈyaa ˗dhɛpuudhɛ ˈgü.»
11 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö˗ pö: «Kwa ˈˈtɔŋdë Lazaa ˗ya yi zë, ˈˈkɛɛ a ˈdho ˗ni ˈgü mü kö ˈa ˈpa ˗a ˗bha.»
12 ˈDhɛ ˈö˗ pö ˈˈdhʋ̈, ˈyö˗ ˗bha gwëëˈˈ ˗nu ˗wa pö ˗a ˗dhɛ: «Yi Dëmɛn, ˗ya kë ꞊dhɛ ˗yö yi zë ˗ni ˈgü kö ˗yö ˗dho ö ˗de ꞊slɔɔ˗.»
13 Yesu ˗yö ˗kun ˈˈwɩ ˗ni ˈgü ˗a ˗bha ga ˗sü ˈka. ˈˈKɛɛ wo ˗zë ˗wa ˗ga ꞊dhɛ yi ˈˈwɛɛwɛ ˈö Lazaa ˗ya zë kö ˗yö ö ˈˈtɛɛpa ˈyö ˗we ˗a ˈka.
14 ˈDhɛ ˈö ˗kë ˈˈdhʋ̈, ˈyö Yesu ˗ya pö ˗an ˗dhɛ ˈˈpuu ˈka ꞊dhɛ: «Lazaa ˗ya ga,
15 ˈˈkɛɛ n zuʋ̈ˈˈ ˈˈgblü ˗yö dhi ˗sü ˈka ka ˗bha ˈka kë ˈö n ˈti˗ wo ˈmü bhë ˗a ˗wɔn ˈgü, ˈyö sü ꞊dhɛ ˗yö ˗kë ˈˈdhʋ̈ kö ˈka ka ˗zo yö n ˗dhɛ. ˈDhɛ ˈö ˈˈdhʋ̈ ˗kwa ˈdho ˈkwa ˗lo mü.»
16 ˈDhɛ ˈö˗ pö ˈˈdhʋ̈, ˈyö Toma ˈwo˗ ˗dhɛ ˈpö ˗Flɛɛn* bhë ˈö˗ pö gwëëˈˈ ˈˈwɛɛ ˗nu ˈwo to ˗an ˗dhɛ: «Kwa ˗de ˈpö ˗kwa ˈdho kö ˗wo kwa kpa ˗a ˗bha ˗wo kwa zë.»
17 ˈDhɛ ˈö Yesu ˗yö ˗lo mü, kö ˗wa Lazaa ˗wɛɛ bho ˈsaadhö ˗a ˗dhɛkpaɔyi ˗ya kë ˗yiishiö.
18 Betani ˗dhɛ ˈö ˈˈdhʋ̈ ˈyaa Zedhizadhɛmö ˗dhɛ ˈka ꞊gblɛɛn. ˗Go mü ˗sü ˈwo dho Zedhizadhɛmö ˗yö ˗mɔn ˈˈkɩdhʋŋ ˗yaaga ˗bha.
19 ˈÖ ˗kë ˈˈdhʋ̈ kö Zuifö ˗nu ꞊va ˗wa nu ˗wo Matö waa Madhi ˗an ˗dhɛ kö ˗wo ˗an zuʋ̈ˈˈ dhuaaˈˈ ˗an ꞊dhegblü ˈö ga bhë ˗a ˗wɔn ˈgü.
20 ˈDhɛ ˈö Matö ˗ya man ꞊dhɛ Yesu ˗yö nu ˗ni ˈgü, ˈyö ꞊luu ˈö dho ˗a ˗gɔ ʒiaan˗. ˈˈKɛɛ Madhi ˗zë ˗yö ˗to ˈɲaannu ˗sü ˈka ˈkɔɔ.
21 ˈDhɛ Matö ˗yö ˗kpan Yesu ˗bha, ˈyö˗ pö ˗a ˗dhɛ: «N Dëmɛn, ü ˗kë yö ˗be n ꞊dhegblü yö ˈti ˗dho ga.
22 ˈˈKɛɛ a˗ ˈwɔn ˗dɔ ꞊dhɛ dɔ ˈö ˈkwa˗ wo yö ˗ʒianwo pë ˈˈoo ˗pë ˈü˗ ˗dhɛ ˗Zlan ˗gɔ ˗yö ˗dho ˗a nu ü ˗dhɛ.»
23 ˈYö Yesu ˗ya pö ˗a ˗dhɛ: «Ü ꞊dhegblü ˗dho ˈgo ga ˈgü.»
24 ˈYö Matö ˗ya pö ˗a ˗dhɛ: «A˗ ˈwɔn ˗dɔ ꞊dhɛ ˗yö ˗dho ˈgo ga ˈgü ˗dhɛkpaɔyi ˗totaabhasü ˈgü, ˗go ga ˈgü ˈˈtʋ̈ŋ ˈka.»
25 ˈYö Yesu ˗ya pö ˗a ˗dhɛ: «Man ˈnën ˈa ˗tɔ ˗go ga ˈgü ˗sü waa ˗këdhösü. Mɛn ˈö ö ˗zo yö n ˗dhɛ, ˈkö ˗kë ꞊dhɛ ˗yö ˗ga, ˗yö ˗dho ˈgo ga ˈgü.
26 ˈYö mɛn ˈˈoo ˗mɛn ˈö ˈˈbhɩɩ˗ ˈö˗ ˗zɔn ꞊dhɛ ö ö ˗zo ˗yö n ˗dhɛ, yö ˈti ˗dho ga toŋtoŋdhö. Ü ü ˗zo ˗yö ˈˈdhʋ̈ ˗ee?»
27 ˈYö˗ pö ˗a ˗dhɛ: «꞊Ii, n Dëmɛn a n ˗zo ˗yö ꞊dhɛ bhi ˈnën ˈü ˗tɔ Klito, ˗Zlan Gbö ˈö˗ nu ˗wɔn ˈdhö ˗dhö ˈˈkpɔnŋ ꞊taa.»
28 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö dho ˈö ö ꞊dhegblü Madhi ˗dhɛ ˈö˗ pö ˗a ˗dhɛ ˈlëëlë ˈka ꞊dhɛ: «˗Gɔmɛn ˗ya nu, ˗ya ˗pö ˈü nu.»
29 ˈDhɛ ˈö Madhi ˗ya man ˈˈdhʋ̈, ˈyö to mü ˈö ꞊luu ˈö dho Yesu ˈˈpiʋ̈.
30 ˈDhɛ ˈö ˗kë ˈˈdhʋ̈ kö Yesu yö ˈti ˗da ˈplöö ꞊köŋ, kö ˗yö ꞊kun ˗dhɛ ˈö waa Matö ˈwo ˗kpan wo ˈkwëë˗ ˗a ˗bha bhë ˗a ˈgü.
31 ˈDhɛ ˈö Zuifö ˗nu ˈwo kun Madhi ꞊kee˗ ˈkɔɔ ˈö ˈwo kun ˗a zuʋ̈ˈˈ dhuaaˈˈ ˗ni ˈgü bhë ˈwo˗ yö ꞊dhɛ ˗ya luuˈˈ ˗bia ˈka ˗ya yö ˈˈkpɛnŋ, ˈyö ˈwo ˗ʒiö ˗a ꞊kee˗, ˗a ˗gɛn ˗mü ꞊dhɛ ˗an ˗bha ˈgü ˗yö ˗dho Lazaa blɔɔndhö kö ˈö ˈˈgbʋ bɔ mü.
32 ˈDhɛ ˈö Madhi ˗yö ˗lo ˗dhɛ ˈö Yesu kun ˗a ˗bha bhë ˗a ˈgü ˈö ˗kpan ˗a ˗bha, ˈyö ˗puö ˈˈshia˗ ˗a ꞊gɛnŋdhö ˈö˗ pö ˗a ˗dhɛ: «N Dëmɛn, ü ˗kë ˈyö ˗be n ꞊dhegblü yö ˈti ˗dho ga.»
33 ˈDhɛ Yesu ˗yö ˗kpan Madhi waa Zuifö ˗nu ˈwo kun ˗a ꞊kee˗ bhë ˗an ˗bha kö ˗wo ˈˈgbʋ bɔ ˗ni ˈgü, ˈyö ˗wëë ˗yö kpɔ ˗a ˗ta ꞊dedewo ˈö˗ zuʋ̈ˈˈ ˗yö ꞊kaan ˈˈkwöö.
34 ˈYö˗ pö ˗an ˗dhɛ: «Ka˗ ˗wɔ ˈˈmɛn?» ˈYö ˈwo˗ pö ˗a ˗dhɛ: «Yi Dëmɛn, ˗bhö nu kö ˈü˗ ˗dhɛ ˗ga.»
35 ˈYö Yesu ˗yö ˗ya ˈˈgbʋ bɔ ˗sü ˗bha.
36 ˈDhɛ ˈö ˗kë ˈˈdhʋ̈, ˈyö Zuifö ˗nu ˗wo ˗ya ˗a pö ˗sü ˗bha: «˗Ka ˗dhɛ ˗ga, ˗a ˗wɔn ˗yö ˗kun ˗a ˗gɔ ˈˈgbɩɩ˗ ˈdhɛ!»
37 ˈˈKɛɛ ˈyö mɛn ˈbhaa ˗nu ˈwo kun ˗an ꞊zinŋgü mü ˈwo˗ pö: «Gɔndënën ˈö ˈˈɲɛɛntiimɛn ˈˈɲan ˗pʋ bhë, ˈyaa ꞊mɔɔn˗ ˗bha ˗ya kë ˗be kö Lazaa ˈya ˗dho ga ˗ee?»
38 ˈDhɛ ˈö ˗wëë ˗yö bɔ ˈzü Yesu ˗ta ꞊dedewo, ˈyö ˗ʒiö ˈö dho Lazaa blɔɔndhö. ˗A blɔɔndhɛ ˈö ˈˈdhʋ̈, ˗yö ˗kun ˗gwö ꞊duudhɛ ˈö ˈwo ˗gwö yö ˗a ˈˈdhiʋ̈ ˗a ˈka.
39 ˈYö Yesu ˗ya pö: «˗Gwö kpö ˈö bhë ˗kaa bho mü.» ˈYö Matö ˈö ˗kë mɛn ˈö ga bhë ˗a ꞊dhegblü ˈka bhë ˈö˗ pö Yesu ˗dhɛ: «N Dëmɛn, ˗a ˈˈtëë ˗dhö ˗kë dɔ ˗ni ˈgü, ˗a ˗gɛn ˗mü ꞊dhɛ ˈdhɛ ˈö ga ˗a ˗dhɛkpaɔyi ˗ya kë ˗yiishiö.»
40 ˈDhɛ ˈö˗ pö ˈˈdhʋ̈, ˈyö Yesu ˗ya pö ˗a ˗dhɛ: «N ˈti˗ pö ü ˗dhɛ ꞊dhɛ ˗zoyödhe ˗ya kë ü ˗gɔ, ü ˗dho ˗Zlan ˗bha ˈˈpiigbɩɩdhɛ yö ˗ee?»
41 ˈDhɛ ˈö ˗kë ˈˈdhʋ̈, ˈyö ˈwo ˗gwö kpö ˈö bhë ˗a bho mü. ˈYö Yesu ˗yö ˗dhɛ ˗ga dhaŋ˗ ˈgü ˈö˗ pö: «N Dë, a ü ˈˈnuɛ ˗bho ü ˈˈtʋ ˈü˗ to n ˗wo ˗bha bhë ˗a ˗wɔn ˈgü.
42 A˗ ˈwɔn ˗dɔ ꞊dedewo ꞊dhɛ ü ü ˈˈtʋ ˗to n ˗wo ˗bha yi ꞊gban ˈka. ˈˈKɛɛ a˗ ˗blɛɛ ˈˈdhʋ̈ mɛn ꞊va ˈwo ꞊klëën yö ˗an ˗wɔn ˈgü, ˗yö ˗kë ˈˈdhʋ̈ kö ˗wo wo ˗zo yö ꞊dhɛ bhi ˈnën ˈü n bɔ.»
43 ˈDhɛ ˈö ö bo ˗wo ˗nu ˈwo bhë ˗an pö ˗sü ˈka, ˈyö ˗gbla ˈˈgbɩɩ˗ ˈö˗ pö: «Lazaa, ˗bhö yö ˈˈkpɛnŋ!»
44 ˈYö mɛn ˈö ˗ya ga ˗be bhë ˈö yö ˈˈkpɛnŋ kö sɔ ˈˈpɛn ˗nu ˗wo plʋʋˈˈ ˗sü ˈka ˗a ˗gɛn ˗nu waa˗ ˗kɔ ˗nu ˈka, kö sɔ ˈˈklu do ˗yö plʋʋˈˈ ˗sü ˈka ˗a ˗gɔ ˈka. ˈYö Yesu ˗ya pö ˗an ˗dhɛ: «˗Kaa ˈˈpʋ ˈka ka ꞊kwaa˗ ˗zü ˗yö ˈdho.»
45 ˈDhɛ ˈö ˗kë ˈˈdhʋ̈, ˈyö Zuifö ˗nu ˈwo nu Madhi ˈˈpiʋ̈ ˈö ˗an ˈˈɲan ˗yö ˗da ˈwɔn ˈö Yesu ˗ya ˗kë bhë ˗a ˈgü, ˗an ꞊vadhɛ ˗wo wo ˗zo yö ˗a ˗dhɛ.
46 ˈˈKɛɛ ˗a mɛn ˈbhaa ˗nu ˗wo ˗ʒiö ˈwo dho Fadhiziɛn ˗nu ˈˈpiʋ̈, ˈö ˈwɔn ˈö Yesu ˗ya ˗kë bhë ˈwo˗ ꞊gban ꞊blɛɛ ˗an ˗dhɛ.
47 ˈDhɛ ˈö ˗kë ˈˈdhʋ̈, ˈyö ˈˈsaabhomɛn ˗nu ˗gɔmɛn ˗nu waa Fadhiziɛn ˗nu ˗wo zakanmɛn ˗nu ˗dhɛ wo ˈkwëëdhö ˈö ˈwo˗ pö: «Gɔndënën ˈö bhë, ˗yö ˗dhidha ꞊va kë ˗ni ˈgü. ˈKwa˗ kë ꞊dhɛ?
48 Kö ˈkwa˗ ˗ga ˗a ˈka ˈˈdhʋ̈, mɛn ꞊gban ˈˈpɛpɛ ˗dho wo ˗zo yö ˗a ˗dhɛ ˈö Wlɔmö ˗mɛn ˗nu ˗wo nu ˈö ˈwo kwa ˗bha ˗dhɛ* waa kwa ˗bha ˈˈsɛ ˈö yö ˗a sü.»
49 ˈˈKɛɛ ˈyö ˗a mɛn do ˈö ˈwo˗ ˗dhɛ Kaifö ˈö kun ˈˈsaabhomɛn ˈkpii˗ ˈka ˗kwɛ ˈö bhë ˗a ˈgü ˈö˗ pö ˗an ˗dhɛ: «ˈWɔn ˈö mü ˈkaa˗ dɔ.
50 Ka ˈti˗ ˈgüman ꞊dhɛ mɛn do ˗bha ga ˗sü ˈö ˈˈsɛgümɛn ˗nu ˗wɔn ˈgü ˗a ꞊fiëë ˗yö ˗dhö ka ˗bha ˈka ˈö ˗ʒiö ˗a ˈka ˈˈsɛgɔ ˗todhʋ̈sü ˈgü shiʋ̈ˈˈ ˗sü ˗ta ˗ee?»
51 ˈˈKɛɛ ˈwɔn ˗nu ˈö kun ˗an blɛɛˈˈ ˗ni ˈgü bhë, ˗a ˗de ꞊kwɛɛ˗ ˗wɔn ˈyaa ˗mü. Kë ˈö˗ wo ꞊dhɛ yö ˈnën ˈö kun ˈˈsaabhomɛn ˈkpii˗ ka ˗kwɛ ˈö bhë ˗a ˈgü bhë, yö ˈnën˗ ˗wɔn ˈgü ˈö ˗Zlan ˗yö bɔ ˗a ˗ta ˈö˗ to ˈˈdhiʋ̈ ˈö˗ pö ꞊dhɛ Yesu dua ˗mü kö ˗yö ga Zuifö ˗nu ˗wɔn ˈgü.
52 Ga ˈö ˗dho ˗a wo ˈˈdhʋ̈ bhë, yö ˈti ˗dho ˗a wo Zuifö ˗nu dosɛnŋ ˗bha ˈka. ˗Yö ˗dho ˗a wo ˈpö ˗Zlan ˗bha ˈnën ˗nu ˈö ˈwo kun ˗pɛn ˗sü ˈka bhë ˗an ˗bha ˈka, ˗yö kë ˈˈdhʋ̈ kö ˗yö ˗an ˗lo ˈkwëëdhö kö ˗wo kë mɛn do ˈka.
53 ˈÖ sü yi ˈö bhë ˗a ˗bha, ˗wo ˗ya Yesu zë ˗wɔn ˗yökodhiʋ̈ kë ˗sü ˗bha.
54 Yö ˈnën ˈö˗ ˗wɔn ˈgü ˈö Yesu yö ˈti ʒiö ˈzü Zuifö ˗nu ꞊zinŋgü kö mɛn ꞊gban ˗wo ˗kpan ö ˗bha. ˈYö go ˗dhɛ ˈö bhë ˗a ˈgü ˈö dho ˈˈsɛ ˈö ˈˈyɛtadhɛ ˈˈsuee bhë ˗a ˈgü, ˈyö waa ö ˗bha gwëëˈˈ ˗nu ˈwo to ˗a ˈpödhɛ ˈwo˗ ˗dhɛ Eflaimö bhë ˗a ˈgü.
55 ˗A ˈˈtʋ̈ŋ ˈö bhë ˗a ˈgü kö Zuifö ˗nu ˗bha Pakö ˈwlaan˗ yi ˗ya yö ꞊klöö˗, kö mɛn ꞊va ꞊dede ˗wo ˈgo ˗ni ˈgü ꞊gbɛɛtadhɛ ˗nu ˈgü ˗wo ˈdho ˗ni ˈgü Zedhizadhɛmö Pakö ˈwlaan˗ ˈö bhë ˗a ˈˈdhiʋ̈, kö ˈwo wo kë ˈˈslʋ̈ʋ̈slʋ̈ ꞊dhɛ ˗kɔ ˈö Moizö ˗bha ˈtɔŋ˗ ˗ya pö ˗a ˈka ˗a ˈdhö.
56 ˗Wo ˗kun Yesu mɛɛnˈˈ ˗ni ˈgü ˗Zlan ˗dhɔkë ˗a ˈgü ˗kɔ ˈgü mü kö ˗wa pö ˗ni ˈgü wo ˈko ˗nu ˗dhɛ: «˗A ˗ga ˈö ˈka˗ wo bhë ˗yö ˗dho nu ˈwlaan˗ ˈö yö ˗a ˗ta ˈˈdhʋ̈ ˗ee?»
57 ˈˈKɛɛ ˈˈsaabhomɛn ˗nu ˗gɔmɛn ˗nu waa Fadhiziɛn ˗nu ˗wo ˈtɔŋ˗ ˗dɔ ˈö ˈwo˗ pö ꞊dhɛ mɛn ˈö˗ man ꞊dhɛ Yesu ˗yö ˈpödhɛ ˈbhaa ˈgü ˗yö nu ˗ya pö wo ˗dhɛ, ˗yö kë ˈˈdhʋ̈ kö ˈwo ˈdho ˈwo˗ ˈkun.
