Nɔɔn˗ ˗së ˈsëëdhɛ ˈö Zan ˗ya ˗bɛnzë 12:1-50
-
Madhi ˗yö ˈˈɲɔn ˗wɛnŋ Yesu ˗gɛn ˗nu ˗ta (1-11)
-
Yesu ˗bha ˗da ˈplöö ˗sü ˈö ˈwo wo ˗kɔ ˗ya ˗a ˗gɔ ˈˈtan ˈka (12-19)
-
Yesu ˗yö ö ˗bha ga ˗sü ˗to ˈˈdhiʋ̈ ˈö˗ ˗wɔn ꞊blɛɛ (20-37)
-
˗Zoyödhe ˈö ˈyaa kun Zuifö ˗nu ˗gɔ bhë, ˗yö pë ˈö ˗Zlan ˗Wo ˗ya to ˈˈdhiʋ̈ ˈö˗ pö ˗a ˗yökodhiʋ̈ (38-43)
-
Yesu ˗yö ˗nu kö ˗yö ˈˈkpɔnŋtaamɛn ˗nu dha (44-50)
12 ˈDhɛ ˈö ˗dhɛkpaɔyi ˗yö to ˈˈsɔɔdo kö Pakö yi ˗yö ˗wo, ˈyö Yesu ˗yö dho ˈö ˗lo Betani, ˈpödhɛ ˈö Lazaa ˈö˗ bho ga ˈgü ˈö kun ˗a ˗bha bhë ˗a ˈgü.
2 ˈYö ˈwo ˗bhöpë ˗kpa ˗a ˗dhɛ mü. Matö ˈnën ˈö kun ˗bhöpë ˗gblü ˗ni ˈgü, ˈyö Lazaa ˗yö ˗kë mɛn ˗nu ˈwo kun pë ˗bhö ˗ni ˈgü Yesu ˈˈpiʋ̈ bhë ˗an kpö ˈgü.
3 ˈYö Madhi ˗yö ˈˈɲɔn* ꞊fii ˗së ˗sü ˈö˗ ꞊sɔnŋ ˈdhö ˈˈgbɩɩ˗ ꞊dedewo bhë, ˗a ˈlitrö ˈgbu sü ˈö nu ˗a ˈka mü, ˈyö˗ ꞊wɛnŋ Yesu ˗gɛn ˗nu ˗ta ˈö ö ˗bha wundhɛ ˗nu ˗ta ˗a ˗bha. ˈYö˗ ˈˈɲɔn ꞊fii ˗yö ˈkɔɔdhɛ ꞊gban sü.
4 ˈDhɛ ˈö ˗kë ˈˈdhʋ̈, ˈyö Zuda Isikadhiɔtö ˈö ˗kë Yesu ˗bha gwëëˈˈ do ˈka, ˈö yö ˈnën ˈö ˗dho Yesu ˈˈdhoodɔ bhë, ˈö˗ pö:
5 «ˈMën ˗kë ˈö ˈˈɲɔn ꞊fii ˗së ˗sü ˈö yö kwa ˈti˗ ˈˈdhoodɔ ꞊ʒiaan ˈwëë˗ denie këŋ ˗yaaga (300) ˗bha kö ˈkwa˗ ˈwëëga ˗gblü ˈˈfleemɛn ˗nu ˗ta?»
6 ˗A pö ˈö˗ wo ˈˈdhʋ̈ bhë, yö ˈti kë ꞊dhɛ ö ˗zo ˈnën ˈö˗ ˗ta ˈˈfleemɛn ˗nu ˗wɔn ˈgü, kë ˈö˗ wo ꞊kwaanmɛn ˈka bhë yö ˗mü. ˗A ˗gɛn ˗mü ꞊dhɛ yö ˈnën ˈö ˗an ˗bha ˈwëëga ˗da ˗a ˈgü ˗pë ˗yö kun ˗a ˗ta, ˈö ˗ya kë ˗nu wo ˈö ˈwëëga ˗nu ˈwo˗ ˗da ˗a ˈgü ˗an ꞊kwaan.
7 ˈDhɛ ˈö˗ pö ˈˈdhʋ̈, ˈyö Yesu ˗ya pö: «Ü ꞊kwaa˗ ˗zü ˈˈsɛnŋdhö kö ˗yö n bun baaˈˈ n ˗wɛɛ bho ˗sü ˗bha ˈka ꞊dhɛ ˗kɔ ˈwo˗ ˗kë ˗a ˈka ˗a ˈdhö.
8 ˈPë ˗kë ˈa˗ pö ˈˈdhʋ̈ ˈyö ˗tɔ ˈˈfleemɛn ˗nu ˗wo ka ˈˈpiʋ̈ yö ˗kplawo, ˈˈkɛɛ man ˗zë n ˈti ˗dho kë ka ˈˈpiʋ̈ yi ꞊gban ˈka.»
9 ˈDhɛ ˈö kun kë ˗ni ˈgü ˈˈdhʋ̈, kö Zuifö ˗nu ꞊va ꞊dede ꞊waa˗ man ꞊dhɛ ˗yö ˗dhɛ ˈö bhë ˗a ˈgü, ˈyö ˈwo nu mü. Wo ˈti nu Yesu yö dosɛnŋ ˗a ˗wɔn ˈgü, ˗wo ˗nu ˈpö Lazaa ˈö˗ bho ga ˈgü bhë ˗a ˗bha.
10 ˈˈSaabhomɛn ˗nu ˗gɔmɛn ˗nu ˗wo ˗kun Lazaa zë ˗sü ˗yökodhiʋ̈ kë ˗ni ˈgü ˈpö,
11 ˗a ˗gɛn ˗mü ꞊dhɛ yö ˈnën ˈö˗ ˗wɔn ˈgü ˈö Zuifö ˗nu ꞊va ˗wo kun ˈdho ˗ni ˈgü mü, ˈö ˈwo wo ˗zo yö Yesu ˗dhɛ.
12 ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö mɛn ꞊va ꞊dede ˈwo nu ˈwlaan˗ ˗ta bhë ˈö ˈwo˗ man ꞊dhɛ Yesu ˗yö nu ˗ni ˈgü Zedhizadhɛmö.
13 ˈDhɛ ˈö ˗kë ˈˈdhʋ̈, ˈyö ˈwo ꞊glaa˗ ˈˈdhɛ ˗nu sü ˈö ˈwo dho ˗a ˗gɔ ʒiaan˗, ˈö ˈwo ˗ya ˈˈgbla ˗sü ˗bha ˈwo˗ pö: «˗Zlan yi ˗bhɛɛ ü ˗dhɛ, dɔ ˈˈgbɩɩ˗ ˈü ˗a dha! ˈDhuëë˗ ˗yö ˈkpɔ mɛn ˈö nu Zoova ˈtɔ ˈgü, ˈö Izraɛdhö ˗Gblüdë ˈka bhë ˗a ˗bha!»
14 ˈDhɛ ˈö Yesu ˗yö ˗kpan ꞊soofëŋ ˈnën do ˗bha, ˈyö ˗ya ˗a ꞊taa, ꞊dhɛ ˗kɔ ˈö ˗Zlan ˗Wo ˗ya pö ˗a ˈka bhë ˗a ˈdhö. ˗Ya ˗pö:
15 «ˈˈSuʋ̈ ˈyaa ˗dho ü kë, Siɔn ˈdhu. ˗Dhɛ ˗ga, ü ˗bha ˗gblüdë ˗yö ˈɲaannu ˗sü ˈka ꞊soofëŋ ˈnën ꞊taa ˗yö nu ˗ni ˈgü.»
16 ˈˈTʋ̈ŋ ˈö bhë ˗a ˈgü, ˈwɔn ˗nu ˈwo kun kë ˗ni ˈgü bhë, Yesu ˗bha gwëëˈˈ ˗nu ˈwaa kun ˗an ˈgüman ˗ni ˈgü, ˈˈkɛɛ ˈdhɛ ˈö Yesu ˗yö ö bo ˈtɔbhɔdhe ꞊slɔɔ ˗sü ˈka, ˈyö ˗an ˗zo ˗yö ˗buö ꞊dhɛ ˈwɔn ˈˈpɛpɛ ˈö mɛn ˗nu kun ˗an kë ˗ni ˈgü bhë, ˗yö ˗kun ˗bɛnzë ˗sü ˈka ˗a ˗blü ˈgü.
17 Yi ˈö Yesu ˗yö Lazaa ˗dhɛ ˗a ˈka ˈö go ö blɔɔndhɛ ˈgü ˈö yö ˈˈkpɛnŋ ˈö ˗kë ˗a ˗bha ˗go ga ˈgü ˗sü ˈka bhë, mɛn ˗nu ˈwo ˗kë mü ˗wo ˗kun ˗a ˗wɔn blɛɛˈˈ ˗ni ˈgü mɛn ˈˈwɛɛ ˗nu ˗dhɛ ˗kplawo.
18 ˈDhɛ ˈö mɛn ˗nu ˗wa man ꞊dhɛ ˗ya ˗dhidha ꞊suu ˈö ˈˈdhʋ̈ ˗a kë, ˈyö mɛn ꞊va ꞊dede ˗wo dho ˗a ˗gɔ ʒiaan˗.
19 ˈYö Fadhiziɛn ˗nu ˗wo ˗ya ˗a pö ˗sü ˗bha wo ˈko ˗nu ˗dhɛ: «Ka˗ ˗yö ˈbhë ˗ee! Kwa ˗kɔ ˈyaa ˗mɔn ˗ni ˈgü pë ˈˈwɛɛ ˈbhaa kë ˗sü ˗bha. Mɛn ˈˈpɛpɛ ˈwo ˈˈkpɔnŋ ꞊taa ˗wo ʒiö ˗ni ˈgü ˗a ꞊kee˗.»
20 Mɛn ˗nu ˈwo nu ˗Zlan ˗dhɔkë ˈwlaan˗ ˈö bhë ˗a ˗ta bhë, Glɛkö ˈbhaa ˗nu ˗wo ˗kun ˗an ꞊zinŋgü.
21 ˈYö Glɛkö ˗nu bhë, ˈwo ꞊ɲɔɔn Filipö ˈö go Bɛtüsaidö, Galile ˗sɛ ˈgü bhë ˗a ˗bha ˈö ˈwo˗ pö ˗a ˗dhɛ: «N dë, ˗yö yi ˈˈpiʋ̈ ꞊dhɛ ˈyi ˗kpan Yesu ˗bha.»
22 ˈYö Filipö ˗yö dho ˈö˗ ꞊blɛɛ Andre ˗dhɛ. ˈYö waa Andre ˈwo dho ˈwo˗ pö ˈˈdhʋ̈ Yesu ˗dhɛ.
23 ˈˈKɛɛ ˈyö Yesu ˗ya pö ˗an ˗dhɛ: «˗A ˈˈtʋ̈ŋ ˗ya ˗lo kö mɛn Gbö ˈtɔ ˗yö bhɔ.
24 A˗ ˗pö ka ˗dhɛ gagade ˈka ꞊dhɛ, ˈble˗ ga yö ˈti ˗puö ˈˈshia˗ kö ˗yö ˈˈbu,* ˗yö ˗to ö do ˈka ˈˈdhʋ̈. ˈˈKɛɛ ˗ya ˈˈbu, ˈyö˗ ga ˗yö ˗kë ˈzü ꞊va.
25 Mɛn ˈö ˗klu ö ˗bha ˗tosɛta* ˗bha, ˗a ˗bha ˗tosɛta ˗dho dha ˗a ˗gɔ.* ˈˈKɛɛ mɛn ˈö˗ ˗bha ˗tosɛta ˈö ˈˈkpɔnŋ ꞊taa yö ˗a ˗san ˗ya ˗kë, ˗yö ˗dho ˈto ˗a ˗gɔ ˈö ˗këdhösü ˈö ˈyaa ɲën ˗a ꞊slɔɔ.
26 Mɛn ˈö˗ ˈˈpiʋ̈ ˈö kë n ˗man yökëmɛn ˈka, ˗yö ʒiö n ꞊kee˗. ˗Dhɛ ˈa˗ ˗bha ˈyö n ˗man yökëmɛn dho kë mü ˈpö. Mɛn ˈö˗ ˈˈpiʋ̈ ˈö yö kë n ˗dhɛ, n Dë ˗dho ꞊bhlëë ˗ya ˗a ˗mɛn ˗bha.
27 ˈˈTʋ̈ŋ ˈö yö ˗a ˈgü n zuʋ̈ˈˈ ˗ya kaanˈˈ ˈˈkwöö, ˈˈkɛɛ a ˗dho ˗a pö ꞊dhɛ? N Dë ˗bhö n dha ˈwɔn ˈˈgbɩɩ˗* ˈö nu ˗ni ˈgü bhë ˗a ˗gɔ. ˈˈKɛɛ ˗yö ˗kë ˗kɔ ꞊gban ˈgü, pë ˈö˗ ˗wɔn ˈgü ˈa nu ˈö dho ˈö yö ˗a ˈka ˈˈlɛlɛ ˈö yö ˗a ˗bha ˈyö bhë.
28 N Dë, ˗bhö ü ˈtɔ bhɔ.» ˈDhɛ ˈö˗ pö ˈˈdhʋ̈, ˈyö ˗wo do ˈbhaa ˗yö bɔ dhaŋ˗ ˈgü ˈö˗ pö: «ˈMan n ˈtɔ bhɔ, ˈˈkɛɛ a ˗dho ˗a bhɔ ˈzü ˗dɛɛwo.»
29 Mɛn ꞊va ˈwo kun mü bhë ˗wo ˗wo ˈö bhë ˗a ˗man, ˈyö ˈwo ˗ya ˗a pö ˗sü ˗bha wo ˈko ˗nu ˗dhɛ: «Dha ˈnën ˈö ˗we bhë.» ˈYö˗ mɛn ˈˈwɛɛ ˈbhaa ˗nu ˗wa pö: «˗Zlan ˗bha ˈˈkiö do ˈnën ˈwɔn ꞊blɛɛ ˗a ˗dhɛ bhë.»
30 ˈYö Yesu ˗ya pö ˗an ˗dhɛ: «˗Wo ˈö bhë yö ˈti ˈˈwɩ n ˗bha ˈka, ˈˈkɛɛ ˗yö ˗we ka ˗bha ˈka.
31 Za ˗yö dɔ ˗ni ˈgü ˈˈkpɔnŋtaadhɛ ˗bha ˈˈtʋ̈ŋ ˈö yö ˗a ˈgü. ˗A ˈˈtʋ̈ŋ ˗ya ˗wo kö ˗wo ˈˈkpɔnŋtaadhɛ ˈö yö ˗a ꞊kɔɔnmɛn ˗zuö ˈˈkpɛnŋ.
32 ˈˈKɛɛ man ˗zë ˗wa wo bo n ˈˈdhiʋ̈ ˗luu* ˈˈshia˗ ˗sü ˈka, a ˗dho mɛn ꞊suu ꞊gban ˈˈpɛpɛ ˈˈgan n ˗bha.»
33 ˈWɔn ˗nu ˈwo bhë ˗yö ˗an ˗blɛɛ ˈˈdhʋ̈ kö ga ˗kɔ ꞊suu ˈö ˗dho ˗a wo bhë, ˈö˗ ˗zɔn.
34 ˈDhɛ ˈö ˗kë ˈˈdhʋ̈, ˈyö mɛn ˗gbaa ꞊va ˈwo kun ˈmü bhë ˈwo˗ pö ˗a ˗dhɛ: «Yi˗ ˗man ˗Zlan ˗bha ˈtɔŋ˗ ˈsëëdhɛ ˈgü ꞊dhɛ Klito ˗yö ˗dho ˗tosɛta kë ˗toëpö ˈka. ˗Yö ˗kë ꞊dhɛ ˈsa ˈö ˈü˗ pö ˗wo ˗dho mɛn Gbö ˈˈdhiʋ̈ luuˈˈ? ˗A mɛn Gbö ˈö ˈˈdhʋ̈ de ˗mü?»
35 ˈYö Yesu ˗ya pö ˗an ˗dhɛ: «˗Dhɛpuudhɛ ˗yö ꞊kun ka ꞊zinŋgü ꞊köŋ ˈˈtʋ̈ŋ kpö ˈnën ˈbhaa ˈˈpiʋ̈. ˈˈTʋ̈ŋ ˈö ꞊kun ˗a ˈka ka ˈˈpiʋ̈ ꞊köŋ bhë, ˗ka ˈˈta ˈsü ˗a ˗bha kö ˗dhɛtiidhɛ ˈyaa ˗dho nu ˈö sɔ ka ˗ta. Mɛn ˈö ˈˈta ˈsü ˗ni ˈgü ˗dhɛtiidhɛ ˈgü, ˗dhɛ ˈö ˈdho ˗ni ˈgü ˗a ˗bha ˈyaa˗ dɔ.
36 ˈˈTʋ̈ŋ ˈö ˗dhɛpuudhɛ ˈdhö ꞊kun ˗a ˈka ka ˈˈpiʋ̈ ꞊köŋ bhë, ˗ka ka ˗bha ˗zo ˗yö ˗a ˗dhɛ ˗sü ˗zɔn kö ˈka kë ˗dhɛpuudhɛ ˗bha ˈnën ˗nu ˈka.»
ˈDhɛ ˈö Yesu ˗ya pö ˈˈdhʋ̈, ˈyö go ˗dhɛ ˈö bhë ˗a ˈgü ˈö ö ˗bin ˗an ˗gɔ.
37 ˈKö ˗kë ꞊dhɛ ˗yö ˗dhidha ꞊vadhɛ ˗kë ˗an ˈˈɲandhiʋ̈ ˈö ˈwo˗ yö, wo ˈti wo ˗zo yö ˗a ˗dhɛ.
38 ˗Yö ˗kë ˈˈdhʋ̈ kö pë ˈö ˗Zlan ˗wodhiʋ̈lomɛn Izai ˗ya pö ˗yö yökodhiʋ̈. ˗Ya ˗pö: «Zoova, de ˈö ö ˗zo yö ˈwɔn ˗nu ˈö ˗an man yi ˈˈdhi ˗an ˗dhɛ? ˗Ya ˈgo mü ˈzü, de ˈö Zoova ˗yö ˈˈdhɛ bho ö ˗bha ˈˈpiigbɩɩdhɛ* ˗ta ˗a ˗dhɛ?»
39 Pë ˈö˗ ˗wɔn ˈgü ˈwaa kun ˗mɔn ˗ni ˈgü ˗a ˗bha kö ˗wo wo ˗zo yö ˗a ˗dhɛ bhë, Izai ˗ya ˗blɛɛ ˈzü ˈö˗ pö:
40 «꞊Yaa˗ ˗an ˈˈɲɛɛn tröö, ꞊yaa˗ ˗an zuʋ̈ˈˈ ꞊gɔɔ kë ˈˈgbɩɩ˗, ˗yö kë ˈˈdhʋ̈ kö ˈwaa ˗dho ˗dhɛ yö, kö ˗an zuʋ̈ga ˈyaa ˗dho ˈwɔn ˗nu ˈgüman, kö ˈwaa ˗dho wo ꞊yɛɛ kë n ˈˈpiʋ̈, kö ˈa ˗an ˗dhɛ bo.»
41 Izai ˗yö ˗wo ˗nu ˈwo bhë ˗an ˗pö, ˈyö sü ꞊dhɛ ˗yö ˗kpan ˗a ˗bha ˈtɔbhɔdhe ˗bha, ˈö˗ ˗wɔn ꞊blɛɛ.
42 Zuifö ˗nu ˗gɔmɛn ˗nu ˈwo kun mü, ˗an ꞊va ꞊dede ˗wo ˗kun wo ˗zo yö ˗ni ˈgü Yesu ˗dhɛ, ˈˈkɛɛ ˈwaa kun ˗a ˗zɔn ˗ni ˈgü ꞊dhɛ wo wo ˗zo ˗yö ˗a ˗dhɛ, ˈyö sü ꞊dhɛ ˗wo ˗kun ˈˈsuʋ̈ ˗ni ˈgü Fadhiziɛn ˗nu ˗gɔ. ˈYaa kun ˗an ˈˈpiʋ̈ ꞊dhɛ ˗wo wo ꞊kɛɛ ˈˈkan ˗yakwëë ˗kë ˗a ˈgü ˗kɔ ˈgü.
43 ˗A ˗gɛn ˗mü ꞊dhɛ, ˗kë mɛnbhɩɩdhe ˗nu ˗dhɛ ˗së ˗sü ˗dhɔ ˗yö ˗an ˗kë ˈö ˗ʒiö ˗a ˈka ˗kë ˗Zlan ˗dhɛ ˗së ˗sü* ˗ta.
44 ˈDhɛ ˈö ˗kë ˈˈdhʋ̈, ˈyö Yesu ˗yö ö ˗wo ˈˈdhiʋ̈ ꞊luu ˈö˗ pö: «Mɛn ˈˈoo ˗mɛn ˈö ö ˗zo yö n ˗dhɛ, kö man dosɛnŋ ˈyaa ˈnën ˈö ö ˗zo yö n ˗dhɛ, kö ˗yö ö ˗zo ˗yö ˈpö mɛn ˈö n bɔ bhë ˗a ˗dhɛ.
45 ˈYö mɛn ˈˈoo ˗mɛn ˈö ˗kpan n ˗bha, kö ˗ya ˗kpan ˈpö Mɛn ˈö n bɔ bhë ˗a ˗bha.
46 A ˗nu ꞊dhɛ ˗dhɛpuudhɛ ˈdhö ˈˈkpɔnŋ ꞊taa, ˗yö kë ˈˈdhʋ̈ kö mɛn ˈö ö ˗zo yö n ˗dhɛ ˈyaa ˗dho ˈto ˗dhɛtiidhɛ ˈgü.
47 ˈˈKɛɛ mɛn ˈö n ˗wo ˗nu man ˈö ˈyaa ˗an ˗ya ꞊bhlëë ˈgü, ˈmaan za dɔ ˗a ˗mɛn ˗bha. ˗A ˗gɛn ˗mü ꞊dhɛ n ˈti nu kö ˈa za dɔ ˈˈkpɔnŋtaamɛn ˗nu ˗bha, a ˗nu ꞊ʒiaan kö ˈa ˈˈkpɔnŋtaamɛn ˗nu dha.
48 Mɛn ˈö ˈyaa ˈˈwɩ n ˗wɔn ˗bha ɛɛnˈˈ ˈö ˈyaa ö ˈˈtʋ ˈto n ˗wo ˗nu ˗bha, za ˗dɔ ˗a ˗bha ˗mɛn ˗yö ˗dhö. ˗Wo ˈa˗ pö bhë yö ˈnën ˗dho ˗a ˗mɛn zë za ˈka ˈˈtʋ̈ŋ ˗totaabhasü ˈka.
49 ˗A ˗gɛn ˗mü ꞊dhɛ pë ˗nu ˈa ˗an pö bhë n ˈti ˗an ˈsü n ˗de ˈgü, ˈˈkɛɛ n Dë ˈö n bɔ bhë, yö ˈnën ˈö ˈtɔŋ˗ ˈö ˗gban pë ˈa ˗dho ˗a pö waa ˗kɔ ˈa ˗dho ˗a pö ˗a ˈka ˗a ˗bha ˗a dɔ n ˗ta.
50 A˗ ˈwɔn ˗dɔ ˈpö ꞊dhɛ, pë ˈö˗ ˗bha ˈtɔŋ˗ ˗ya pö ˗yö ˗tosɛta ˈö ˈyaa ɲën ˗a ˗nu mɛn ˗dhɛ. ˈDhɛ ˈö ˈˈdhʋ̈, pë ˈˈpɛpɛ ˈa˗ pö, a˗ ˗pö ꞊dhɛ ˗kɔ ˈö n Dë ˗ya pö ˗a ˈka n ˗dhɛ bhë ˗a ˈdhö.»
-Zoto -a ˈˈpiʋ̈ -wɔn -nu
^ ˈˈƝɔn ˈö ˈˈdhʋ̈ ˗wa ˗yö ˗kë ꞊blëëdhɛ ˈˈtöö ˗së ˗sü ˈö ˈwo˗ ˗dhɛ ˈnaadö bhë ˗a ˈka.
^ Glɛkö ˗wo ˈgü ˈyö ˗tɔ «kö ˗yö ga.»
^ Ɛɛnˈˈ «ö ˈniin˗.»
^ Glɛkö ˗wo ˈgü ˈyö ˗tɔ «˗yö ˗dho ˗a ˈgü shiʋ̈ˈˈ.»
^ Glɛkö ˗wo ˈgü ˈyö ˗tɔ «ˈˈlɛlɛ.»
^ ˗Wo ˗we «˗a ˗zë ˈˈdhü ˗bha ˗sü» ˈka.
^ Glɛkö ˗wo ˈgü ˈyö ˗tɔ « ö ˗gbe.»
^ Glɛkö ˗wo ˈgü ˈyö ˗tɔ «ˈtɔbhɔdhe ˈö go.»
