Nɔɔn˗ ˗së ˈsëëdhɛ ˈö Zan ˗ya ˗bɛnzë 13:1-38
13 Pakö ˈwlaan˗ yi ˗yö ˗to ˈˈdhiʋ̈, ˈö Yesu ˗ya ˈwɔn dɔ ꞊dhɛ ˗a ˈˈtʋ̈ŋ ˗ya ˗lo kö ˈö ˈgo ˈˈkpɔnŋ ꞊taa yö ˈö ˈdho ö Dë ˈˈpiʋ̈. ˗A ˗wɔn ˈgü, ˗a ˗bha mɛn ˗nu ˈö ˗an ˗dhɔ ˗ya ˗kë ˈö ˈwo kun ˈˈkpɔnŋ ꞊taa yö bhë, ˗an ˗dhɔ ˗yö ˗a ˗kë ˈö to ˗a ˈka ˈˈdhʋ̈ ˈö yö ˗a ˈka ˗a ˈˈdhiʋ̈toyi ˗bha.
2 ˈDhɛ ˈwo kun ˈˈdooka ˗bhöpë ˗bhö ˗ni ˈgü, kö Dügɔmɛn ˗ya Yesu ˈˈdhoodɔ ˗sü ˗da Zuda Isikadhiɔtö ˈö ˗kë Simɔn gbö ˈka bhë ˗a zuʋ̈ˈˈ ˈgü.
3 ˈDhɛ ˈö ˗kë ˈˈdhʋ̈, ˈyö Yesu ˈö˗ ˈwɔn dɔ ꞊dhɛ ö Dë ˗ya pë ꞊gban ˈˈpɛpɛ ˗lo ö ꞊kwɛɛ˗, ˈö˗ ˈwɔn dɔ ˈpö ꞊dhɛ ö ˗go ˗Zlan ˈˈpiʋ̈ ˈö ˗dho ö ꞊yɛɛ kë ˈzü ˗Zlan ˈˈpiʋ̈ bhë,
4 ˗yö ꞊luu ˗bhöpë ˈˈdhiʋ̈, ˈyö ö ˗bha ˈˈbhee ˈö sɔ ˗ta bhë ˗a bho ö ˗bha ˈö˗ ˈɲaannu. ˈYö ˈˈzu ˗sɔ do sü ˈö˗ ˗klu ö vɛɛdhö.
5 ˈDhɛ ˈö ö bo, ˈyö ˈˈyi yö ˈtia˗ ˈˈgbɛɛ do ˈgü ˈö ˗ya ö ˗bha gwëëˈˈ ˗nu ˗gɛn ˈˈzu ˗sü ˗bha. ꞊Yaa ˗an ˗gɛn ˈˈzu, ˈyö ˈˈzu ˗sɔ ˈö kun ˗a vɛɛdhö bhë ˗a ˗ta ˗a ˗bha.
6 ˈDhɛ ˈö yö Simɔn Piɛɛ ˗bha, ˈyö Simɔn Piɛɛ ˗ya pö ˗a ˗dhɛ: «N Dëmɛn, bhi ˈnën ˈü ˗dho n ˗gɛn ˈˈzu ˗ee?»
7 ˈYö Yesu ˗ya pö ˗a ˗dhɛ: «Pë ˈa˗ kë ˗ni ˈgü bhë ˈbhaa˗ ˈgüman ˈˈtʋ̈ŋ ˈö yö ˗a ˈgü, ˈˈkɛɛ ü ˗dho ˗a ˈgüman ꞊taabha.»
8 ˈYö Piɛɛ ˗ya pö Yesu ˗dhɛ: «N ˈti ˗dho ˈˈwɩ ˗a ˗bha toŋtoŋdhö kö ˈü n ˗gɛn ˈˈzu.» ˈYö Yesu ˗ya pö ˗a ˗dhɛ: «Ü ˈti ˈˈwɩ ˗a ˗bha kö ˈa ü ˗gɛn ˈˈzu, kö ko ˗bha pë ˈˈwɛɛ ˈbhaa ˈyaa ö ˈkwëë˗ ˈzüdho.»
9 ˈYö Simɔn Piɛɛ ˗ya pö ˗a ˗dhɛ: «Dëmɛn, ˗ya kë ꞊dhɛ ˗yö ˈˈdhʋ̈, kö ü ˈˈdhiʋ̈ ˈyaa ˗dho ˈto n ˗gɛn ˗nu ˗bha dosɛnŋ, ˗bhö n ˗kɔ ˗nu waa n ˗gɔ ˗an ˈˈzu ˈpö.»
10 ˈDhɛ ˈö˗ pö ˈˈdhʋ̈, ˈyö Yesu ˗ya pö ˗a ˗dhɛ: «Mɛn ˈö ˗ya ö ˈˈzu, ˗a ˗bhawɔn ˈyaa ö ˗dhɛ ˈˈwɛɛ ˈbhaa ˈˈzu ˗sü ˗bha ˈzü kö yö ˈti kë ˗a ˗gɛn ˗nu ˈka, ˈyö sü ꞊dhɛ ˗dhii ˈˈwɛɛ ˈbhaa ˈyaa˗ kwi ˗bha. Mɛn ˈö ˈka ˗lo bhë ˗dhii ˈyaa ka ˗bha, ˈˈkɛɛ mɛn ꞊gban ˈkaa ˗mü.»
11 ˈDhɛ ˈö ˗kë ꞊dhɛ mɛn ˈö ˗dho ˗a ˈˈdhoodɔ bhë ˗ya ˗dɔ bhë, yö ˈnën ˈö˗ ˗wɔn ˈgü ˈö˗ pö: «Mɛn ꞊gban ˈyaa ˈnën ˗dhii ˈyaa ka ˗bha.»
12 ˈDhɛ ˈö ö bo ˗an ˗gɛn ˗nu ˈˈzu ˗sü ˈka, ˈyö ö ˗bha ˈˈbhee ˈö sɔ ˗ta bhë ˗a sü ˈö˗ ˗da ö ˗bha, ˈö ˈɲaannu ˈzü ˈtaablö ˈˈdhiʋ̈ ˈö˗ pö ˗an ˗dhɛ: «ˈWɔn ˈa˗ ˗kë bhë, ka˗ ˗gɛn ˗dɔ ˗ee?
13 Ka n ˗dhɛ ‹˗Gɔmɛn› ɛɛnˈˈ ‹Dëmɛn.› ˗A ˗pö ˈˈdhʋ̈ ˗dhɛ ˗mü ˈyö sü ꞊dhɛ a˗ ˈka ˈˈdhʋ̈ ꞊dedewo.
14 ˈDhɛ ˈö ˈˈdhʋ̈, man ˈa ˗kë ka Dëmɛn ɛɛnˈˈ ka ˗Gɔmɛn ka bhë, ˈman ka ˗gɛn ˈˈzu ꞊dhɛ ˗kɔ ˈö bhë ˗a ˈdhö, kö ka dua ˗mü* ˈpö ˈka ka ˈko ˗nu ˗gɛn ˈˈzu.
15 ˈWɔnzuan ˗mü ˈa˗ to ka ˗gɔ, ˗yö kë ˈˈdhʋ̈ kö ˗kɔ do ˈa˗ ˗kë ˗a ˈka ka ˗dhɛ bhë, ˈka˗ kë ˈˈdhʋ̈ ˈpö.
16 A˗ ˗pö ka ˗dhɛ gagade ˈka ꞊dhɛ, ꞊dhuëŋ ˈyaa ˈkpii˗ ˈyaa ʒiö ˗a ˈka ö dëmɛn ˗ta, ɛɛnˈˈ mɛn ˈwo˗ bɔ ˈyaa ˈkpii˗ ˈyaa ʒiö ˗a ˈka mɛn ˈö˗ bɔ ˗a ˗ta.
17 ˈKa ˈwɔn ˗nu ˈwo bhë ˗an dɔ, ˈka ˗an ˗ya ꞊bhlëë ˈgü kö ka ˗bha ˗yö ˗së.
18 ˈWɔn ˈa˗ ꞊blɛɛ bhë, n ˈti ˈˈwɩ mɛn ꞊gban ka ˈka. Mɛn ˗nu ˈa n ˗kɔ ˗yɛ ˗an ˗bha a ˗an ˗dɔ. ˈˈKɛɛ ˗yö ˗kë ˈˈdhʋ̈ kö pë ˈö ˗Zlan ˗Wo ˗ya pö ˗yö yökodhiʋ̈. ˗Ya ˗pö: ‹Mɛn ˈö kun n ˗man ˗bhöpë* ˗bhö ˗ni ˈgü ˗be bhë, ˗ya ö ˗de kë ˗nu n ˗gɔ ˗mɛn* ˈka.›
19 ˈWɔn ˈö bhë a˗ ˗to ˈˈdhiʋ̈ ˈa˗ ꞊blɛɛ ka ˗dhɛ ˈˈtʋ̈ŋ ˈö yö ˗a ˈgü, ˗yö kë ˈˈdhʋ̈ kö ˈˈtʋ̈ŋ ˈö ˗dho kë ˗a ˈka ˈka˗ ˈwɔn dɔ ꞊dedewo ꞊dhɛ mɛn ˈö ˈˈdhʋ̈ bhë, yö ˈnën ˈö ˗tɔ man.
20 A˗ ˗pö ka ˗dhɛ gagade ˈka ꞊dhɛ, mɛn ˈö ö ˗kɔ ˗ya mɛn ˈa˗ bɔ ˗a ˗gɔ, kö ˗ya ö ˗kɔ ˗ya n ˗gɔ ˈpö. ˈYö mɛn ˈö ö ˗kɔ ˗ya n ˗gɔ, kö ˗ya ö ˗kɔ ˗ya ˈpö Mɛn ˈö n bɔ bhë ˗a ˗gɔ.»
21 ˈDhɛ ˈö Yesu ˗yö ö bo ˗a ˗pö ˈˈdhʋ̈ ˗sü ˈka, ˈyö ˗wëë ˗yö kpɔ ˗a ˗ta ꞊dedewo. ˈYö ö ˈˈdhi bho ˗a ˗ta ˈˈpuu ˈka ˈö˗ pö ˗an ˗dhɛ: «A˗ ˗pö ka ˗dhɛ gagade ˈka ꞊dhɛ, ka kpö ˈgü mɛn do ˗dho n ˈˈdhiʋ̈ dɔ n ˈyɔɔ˗ ˗nu ˗gɔ.»
22 ˈDhɛ ˈö˗ pö ˈˈdhʋ̈, ˈyö˗ ˗bha gwëëˈˈ ˗nu ˗wo ˗ya wo ˈko ˗nu ˗ga ˗sü ˗bha, kö ˗a ˈwɔn ꞊yaa˗ ˗an ˈkun, ˗wa pö ˗ni ˈgü wo zuʋ̈ˈˈ ˈˈpiʋ̈: ‹De ˗mü?›
23 ˈÖ ˗kë ˈˈdhʋ̈ kö Yesu ˗bha gwëëˈˈ ˗nu ˈwo bhë, ˗a mɛn ˗dhɛ ˈö˗ ˗dhɔ ˗yö Yesu ˗kë ꞊dedewo bhë ˗yö wɔ ˗sü ˈka ˗a ˈˈsuee.*
24 ˈYö Simɔn Piɛɛ ˗yö ö ˈˈɲan kun mɛn ˈö bhë ˗a ˗dhɛ, ˈö˗ pö ˗a ˗dhɛ: «De ˈö ˈˈwɩ ˗ni ˈgü ˗a ˈka bhë?»
25 ˈYö gwëëˈˈ ˈö bhë ˈö ꞊slëë ö ˗zü ˈö ö ˗gɔ ꞊ɲɔɔn Yesu ˈˈsuee* ˈö˗ dhɛɛˈˈ kpɔ ˈö˗ pö: «N Dëmɛn, de ˗mü?»
26 ˈYö Yesu ˗ya pö ˗a ˗dhɛ: «Mɛn ˈö ˈa ˗dho ˈbluu˗ ˈˈklu ꞊tɔɔ ˈa˗ nu ˗a ˗dhɛ bhë yö ˗mü.» ˈDhɛ ˈö ˗kë ˈˈdhʋ̈, ˈyö ˈbluu˗ ˈˈklu bhë ˗a ꞊tɔɔ ˈö˗ sü ˈö˗ nu Zuda ˈö ˗kë Simɔn Isikadhiɔtö gbö ˈka bhë ˗a ˗dhɛ.
27 ˈDhɛ ˈö Zuda ˗yö ö bo ˈbluu˗ ˈˈklu ˈö bhë ˗a ˈsü sü ˈka, ˈyö Sɔtraan ˗yö ˗da ˗a ˈgü. ˈDhɛ ˈö ˗kë ˈˈdhʋ̈, ˈyö Yesu ˗ya pö ˗a ˗dhɛ: «ˈWɔn ˈü˗ ˈˈpiʋ̈ ˈü˗ kë bhë, ˗bhö ˗a kë ˈˈvaandhö.»
28 ˈˈKɛɛ ˈpë ˗kë ˈö Yesu ˗ya pö ˗a ˗dhɛ ˈˈdhʋ̈, mɛn ˗nu ˈwo kun ˈtaablö ˈˈdhiʋ̈ bhë ˈwaa kun ˗a dɔ ˗ni ˈgü.
29 ˈDhɛ ˈö ˗kë ꞊dhɛ Zuda ˈnën kun ˗an ˗bha ˈwëëga ˈwaannu ˗ni ˈgü bhë, ˗a mɛn ˈbhaa ˗nu ˗wo wo ˗zo ˗ta ꞊dhɛ Yesu ˗kun ˗a pö ˗ni ˈgü ˗a ˗dhɛ ˗yö ˈwlaan˗ ˗kwɛɛ ˈbhaa ˗nu ˈdhɔ ɛɛnˈˈ ˗yö pë ˈbhaa nu ˈˈfleemɛn ˗nu ˗dhɛ.
30 ˈDhɛ ˈwo ˈbluu˗ ˈˈklu ˈö bhë ˗a ˗da ˗a ꞊kwɛɛ˗, ˈyö to mü ˈö yö ˈˈkpɛnŋ. ˈÖ ˗kë ˈˈdhʋ̈ kö ˈˈbin ˗ya ˈmën.
31 ˈDhɛ ˈö yö ˈˈkpɛnŋ, ˈyö Yesu ˗ya pö: «ˈˈTʋ̈ŋ ˈö yö ˗a ˈgü, mɛn Gbö ˈtɔ ˗ya bhɔ, ˈö ˗Zlan ˗de ˈpö ˗a ˈtɔ ˗ya bhɔ ˗a ˈsaa˗ ˈgü.
32 ˗Zlan yö ꞊dede ˗yö ˗dho ˗a ˈtɔ bhɔ, yö ˈti ˗dho ˗dhɛ ˈˈdhiʋ̈ ˈˈgan kö ˗ya ˈtɔ bhɔ.
33 ˈNën ˈsɛɛn˗ ˗nu, a ꞊kun ka ˈˈpiʋ̈ ˈˈtʋ̈ŋ ˈdɛdɛ ˈˈpiʋ̈. ˗A ˈˈtʋ̈ŋ ˈö ˈˈdhʋ̈ ˗ya ʒiö, ka ˗dho n mɛɛnˈˈ. ˈˈKɛɛ ꞊dhɛ ˗kɔ ˈa˗ pö ˗a ˈka Zuifö ˗nu ˗dhɛ bhë ˗a ˈdhö, a˗ ˗pö ka ˗de ˈpö ka ˗dhɛ ꞊dhɛ: ‹˗Dhɛ ˈa ˈdho ˗ni ˈgü ˗a ˗bha bhë, ˈkaa ꞊mɔɔn˗ ˗bha ˈka nu mü.›
34 ˈTɔŋ˗ ˗dɛɛ ˈa˗ dɔ ka ˗ta ˈyö ꞊nɛn: Ka ˗dhɔ ˗yö ka ˈko kë. ˗Kɔ ˈö ka ˗dhɔ ˗yö n ˗kë ˗a ˈka bhë, ka ˗dhɔ ˗yö ka ˈko kë ˈˈdhʋ̈ ˈpö.
35 ˗Dhɔ ˗ya kë ka ꞊zinŋgü, ˈyö mɛn ꞊gban dho ˗a ˈwɔn dɔ ꞊dhɛ n ˗man gwëëˈˈ ˗nu ˗mü ka ˈka.»
36 ˈDhɛ ˈö˗ pö ˈˈdhʋ̈, ˈyö Simɔn Piɛɛ ˗ya pö ˗a ˗dhɛ: «N Dëmɛn, ü ˗dho ˈˈmɛn?» ˈYö Yesu ˗ya ˗yɔ bɔ ˗a ˗gɔ ˈö˗ pö: «˗Dhɛ ˈa ˈdho ˗ni ˈgü ˗a ˗bha bhë ˈbhaa ꞊mɔɔn˗ ˗bha kö ˈü ʒiö n ꞊kee˗ kö ˈko ˈdho mü ˈˈtʋ̈ŋ ˈö yö ˗a ˈgü, ˈˈkɛɛ ü ˗dho nu mü ꞊taabha.»
37 ˈYö Piɛɛ ˗ya pö ˗a ˗dhɛ: «N Dëmɛn, ˈmën ˗kë ˈö ˈmaan ꞊mɔɔn˗ ˗bha ˈa ʒiö ü ꞊kee˗ ˈˈtʋ̈ŋ ˈö yö ˗a ˈgü? A ˗dho n ˗man ˗tosɛta nu ü ˗wɔn ˈgü.»
38 ˈYö Yesu ˗ya pö ˗a ˗dhɛ: «Ü ꞊mɔɔn˗ ˗bha ꞊dedewo ˈü ü ˗bha ˗tosɛta nu n ˗wɔn ˈgü ˗ee? A˗ ˗pö ü ˗dhɛ gagade ˈka ꞊dhɛ, ˈˈsanni ˗tɔ gɔn ˗yö ˈˈwɩ kö ˈbha˗ pö ˗gɛnɲaan ˈka ˗yaaga ꞊dhɛ ˈbhaa n dɔ.»
-Zoto -a ˈˈpiʋ̈ -wɔn -nu
^ Ɛɛnˈˈ «kö ˈˈgbɩɩ˗ ˗dhɛ ˗mü.»
^ Glɛkö ˗wo ˈgü ˈyö ˗tɔ «ˈbluu˗.»
^ Glɛkö ˗wo ˈgü ˈyö ˗tɔ «˗ya ö ˗gɛn zü kpö luuˈˈ n ˗bha.»
^ Glɛkö ˗wo ˈgü ˈyö ˗tɔ «˗a ˗kuu ˈgü.»
^ Glɛkö ˗wo ˈgü ˈyö ˗tɔ «ˈö ö ˗gɔ ꞊ɲɔɔn Yesu ˗kënŋ ˈgü.»
