Nɔɔn˗ ˗së ˈsëëdhɛ ˈö Zan ˗ya ˗bɛnzë 14:1-31
14 «Ka zuʋ̈ˈˈ ˈyaa ˗dho kaanˈˈ ˈˈkwöö. ˗Ka ka ˗zo yö ˗Zlan ˗dhɛ, ˈka ka ˗zo yö n ˗dhɛ ˈpö.
2 ˗Yadhɛ* ˈö n Dë ˗gɔ ˈkɔɔ ˗yö ꞊va. ꞊Ya kë ꞊dhɛ ˈyaa ˈˈdhʋ̈ ˗be a ˗dho ˗a blɛɛˈˈ ka ˗dhɛ. ˈˈKɛɛ a ˈdho ˗ni ˈgü kö ˈa ka ˗yadhɛ baaˈˈ.
3 ˈMan ˈdho ˈman ka ˗yadhɛ baaˈˈ, a ˗dho n ꞊yɛɛ kë ˈzü ˈa nu ˈö ˈa n ˗kɔ ˗ya ka ˗gɔ n ˗gɔ ˈkɔɔ, ˗yö kë ˈˈdhʋ̈ kö ˗dhɛ ˈa˗ ˗bha ka ˗de ˈpö ˈka kë mü.
4 ˗Dhɛ ˈa ˈdho ˗ni ˈgü ˗a ˗bha bhë, ka ˗a ˗ʒian ˗dɔ ˈpö.»
5 ˈDhɛ ˈö˗ pö ˈˈdhʋ̈, ˈyö Toma ˗ya pö ˗a ˗dhɛ: «N Dëmɛn, ˗dhɛ ˈü ˈdho ˗ni ˈgü ˗a ˗bha bhë, ˈyaa˗ ˗dhɛ dɔ. Yi ˗dho ꞊mɔɔn˗ ˗bha kö ˈyi˗ ˗ʒian dɔ ˗kɔ ˗kë ꞊dhɛ?»
6 ˈYö Yesu ˗ya pö ˗a ˗dhɛ: «Man ˈnën ˈa ˗tɔ ʒiaan, gagade waa ˗këdhösü. Mɛn ˈö yö ˈti bɔ n ˗ta ˈyaa ꞊mɔɔn˗ ˗bha kö ˗yö nu n Dë ˈˈpiʋ̈.
7 ˗Ya kë ꞊dhɛ ka n ˗dɔ, kö ka n Dë ˗dɔ ˈpö. ˈÖ sü ˈˈtʋ̈ŋ ˈö yö ˗a ˗bha ˈka˗ dɔ, ˈka ˗kpan ˗a ˗bha.»
8 ˈYö Filipö ˗ya pö ˗a ˗dhɛ: «N Dëmɛn, ˗bhö ü Dë ˗zɔn yi ˗dhɛ. ˈBha˗ ˗zɔn yi ˗dhɛ kö yi zuʋ̈ˈˈ ˗ya ˈwaannu.»
9 ˈYö Yesu ˗ya pö ˗a ˗dhɛ: «Filipö, ˈˈtʋ̈ŋ ꞊va ꞊suu ˈö ˈman˗ kë ka ˈˈpiʋ̈ bhë ü ˈti n dɔ ꞊köŋ ˗ee? Mɛn ˈö ˗ya ˗kpan n ˗bha kö ˗ya ˗kpan n Dë ˗bha. ˗Yö ˗kë ꞊dhɛ ˈsa ˈyö ˈü˗ pö: ‹˗Bhö ü Dë ˗zɔn yi ˗dhɛ›?
10 ˈBhaa˗ ˈsü gagade ˈka ꞊dhɛ yaa n Dë yi ˗kɔ ˗yö ö ˈkoo ˗ee? Pë ˗nu ˈa ˗an pö ˗ni ˈgü ka ˗dhɛ bhë, n ˈti ˗an ˈsü n ˗de ˈgü, ˈˈkɛɛ n Dë ˈö yaŋ yi ˗kɔ ˈdhö ö ˈkoo ˗kplawo bhë yö ˈnën ˈö ˈwɔn ˗nu ˈwo bhë ˗an ˗kë.
11 ˈMan˗ pö yaa n Dë yi ˗kɔ ˗yö ö ˈkoo, ˗kaa ˈsü gagade ˈka. ˈKö ˈyii ga ka ˈgü ˈˈdhʋ̈, ˗kaa ˈsü gagade ˈka ˈwɔn ˗nu ˈa ˗an ˗kë bhë ˗an ˗wɔn ˈgü.
12 A˗ ˗pö ka ˗dhɛ gagade ˈka ꞊dhɛ mɛn ˈˈoo ˗mɛn ˈö ö ˗zo yö n ˗dhɛ, ˗yö ˗dho ˈwɔn ˗nu ˈa ˗an kë ˗ni ˈgü bhë ˗an kë ˈpö. ˗Yö ˗dho ˈwɔn ˗nu ˈwo ˗ʒiö ˗a ˗dhɛ ˗nu ˈwo bhë ˗an ˗ta ˗an kë, ˗a ˗gɛn ˗mü ꞊dhɛ man ˗zë a ˈdho ˗ni ˈgü n Dë ˈˈpiʋ̈.
13 ˗Ya ˈgo ˗a ˈgü, pë ˈˈpɛpɛ ˈö ˈka˗ ˗dhɛ n ˈtɔ ˈgü a ˗dho ˗a kë, ˗yö kë ˈˈdhʋ̈ kö n Dë ˈtɔ ˗yö bhɔ man ˈa ˗kë ˗a Gbö ˈka bhë n ˈsaa˗ ˈgü.
14 Pë ˈˈoo ˗pë ˈö ˈka dho ˗a ˗dhɛ n ˈtɔ ˈgü, a ˗dho ˗a kë.
15 «˗Ya kë ꞊dhɛ n ˗dhɔ ˗yö ka ˗kë, ka ˗dho n ˗man ˈtɔŋ˗ ˗nu ˗ya ꞊bhlëë ˈgü.
16 ˗Ya ˈgo mü ˈzü a ˗dho bhɛɛˈˈ n Dë ˗dhɛ, ˈö ka ˗takunmɛn* ˈˈwɛɛ ˈbhaa ˈö ˗dho kë ka ˈˈpiʋ̈ ˈˈtʋ̈ŋ ꞊gban ˈka ˗a nu ka ˗dhɛ.
17 ˗Zuu ˈˈslʋ̈ʋ̈slʋ̈ ˈö ˈˈdhɛ bho gagade ˗ta, ˈö ˗dho ˗a nu ka ˗dhɛ bhë, ˈˈkpɔnŋtaamɛn ˗nu ˈwaa ꞊mɔɔn˗ ˗bha kö ˗wa ꞊slɔɔ, ˗a ˗gɛn ˗mü ꞊dhɛ ˈwaa˗ yö ɛɛnˈˈ ˈwaa˗ dɔ. ˈˈKɛɛ ka ˗zë ka˗ dɔ, ˗a ˗gɛn ˗mü ꞊dhɛ ˗yö ka ˈˈpiʋ̈ ˗kplawo ˈö ka ˈgü.
18 N ˈti ˗dho ˈˈkan ka ˗bha.* A ˗dho n ꞊yɛɛ kë ˈzü ˈa nu ka ˈˈpiʋ̈.
19 ˗A ˈˈtʋ̈ŋ ˗ya ˈto ˈˈtɩtɩ kö ˈˈkpɔnŋtaamɛn ˗nu ˈˈɲan ˗yö ö bo ˗kpan n ˗bha ˗sü ˈka. ˈˈKɛɛ ka ˗zë ka ˗dho ˗kpan n ˗bha, ˗a ˗gɛn ˗mü ꞊dhɛ a ˈˈbhɩɩ˗, ˈö ka ˗de ˈpö ˈka ˗dho kë ˈˈbhɩɩ˗.
20 ˗A yi ˈö bhë ˗a ˈka, ka ˗dho ˗a yö ꞊dhɛ yaa n Dë yi ˗kɔ ˗yö ö ˈkoo, ˈö ka ˗de ˈpö kwa ˗kɔ ˈdhö ö ˈkoo.
21 Mɛn ˈö ˗we n ˗bha ˈtɔŋ˗ ˗nu ˗bha ˈö ˗an ˗ya ꞊bhlëë ˈgü, kö mɛn ˈö bhë n ˗dhɔ ˗ya ˗kë. ˈYö mɛn ˈö n ˗dhɔ ˗ya ˗kë, ˗a ˗dhɔ ˗dho n Dë kë, ˈö˗ ˗dhɔ ˗yö n ˗kë ˈpö, ˈö ˈa n ˗de ˗zɔn ˗a ˗dhɛ ˈˈpuu ˈka.»
22 ˈDhɛ ˈö˗ pö ˈˈdhʋ̈, ˈyö Zuda (˗a mɛn ˈdhɛ ˈwo˗ ˗dhɛ Isikadhiɔtö bhë ˈyaa ˗mü) ˗ya pö ˗a ˗dhɛ: «N Dëmɛn, ˗yö ˗kë mü ꞊dhɛ ˈyö ˈü ˈˈkpɔnŋtaamɛn ˗nu to ˈö ˈü˗ ˈˈpiʋ̈ kö ˈü ü ˗de ˗zɔn ˈˈpuu ˈka yi ˗zë yi ˗dhɛ?»
23 ˈYö Yesu ˗ya ˗yɔ bɔ ˗a ˗gɔ ˈö˗ pö: «Mɛn ˈö n ˗dhɔ ˗ya ˗kë, ˗yö ˗dho n ˗wo ˗ya ꞊bhlëë ˈgü. Mɛn ꞊suu ˈö ˈˈdhʋ̈ ˗a ˗dhɔ ˗dho n Dë kë, ˈö yaa n Dë ˈyi nu ˗a ˈˈpiʋ̈ ˈö ˈyi ˗ya ˗a ˗gɔ ˈkɔɔ.
24 Mɛn ˈö n ˗dhɔ ˈyaa˗ kë, ˈyaa n ˗wo ˗nu ˗ya ꞊bhlëë ˈgü. ˗Wo ˗nu ˈka ˗an man ˗ni ˈgü bhë, n ˈti ˗an ˈsü n ˗de ˈgü kö ˈa ˗an pö, ˗wo ˗go n Dë ˈö n bɔ bhë ˗a ˈˈpiʋ̈.
25 «˗Wo ˗nu ˈwo bhë a ˗an ˗pö ka ˗dhɛ kö a ꞊kun ka ˈˈpiʋ̈ ˈˈtʋ̈ŋ ˈö yö ˗a ˈgü.
26 ˈˈKɛɛ ka ˗takunmɛn ˈö ˗kë ˗zuu ˈˈslʋ̈ʋ̈slʋ̈ ˈka, ˈö n Dë dho ˗a bɔ n ˈtɔ ˈgü bhë, ˗yö ˗dho ka ꞊klaŋ kë ˈwɔn ꞊gban ˈka, ˈö ka ˗zo ˗buö pë ˈˈpɛpɛ ˈa ˗an pö ka ˗dhɛ bhë ˗an ˈka.
27 Zuʋ̈waannusü ˈö ka ˗gɔ bhë ˈman˗ ˈto ka ˗gɔ, n ˗man zuʋ̈waannusü bhë ˈman˗ nu ka ˗dhɛ. ˗Kɔ ˈa˗ nu ˗a ˈka ka ˗dhɛ bhë, ˈyaa ꞊dhɛ ˗kɔ ˈö ˈˈkpɔnŋtaamɛn ˗nu ˗wa nu ˗a ˈka ˗a ˈdhö. ˈDhɛ ˈö ˈˈdhʋ̈, ka zuʋ̈ˈˈ ˈyaa ˗dho kaanˈˈ ˈˈkwöö ɛɛnˈˈ ˈˈshiʋ̈ ˈyaa ˗dho ˈˈkan ka ˈˈgblü.
28 ˗A pö ˈa˗ wo ka ˗dhɛ ꞊dhɛ ‹A ˈdho ˗ni ˈgü, ˈˈkɛɛ a ˗dho n ꞊yɛɛ kë ˈzü ˈa nu ka ˈˈpiʋ̈› bhë ka˗ ˗man. ˗Ya kë ꞊dhɛ n ˗dhɔ ˗yö ka ˗kë, ka dua ˗mü kö ka zuʋ̈ˈˈ ˈˈgblü ˗yö dhi n ˗man ˈdho ˗sü ˈö n Dë ˈˈpiʋ̈ bhë ˗a ˗wɔn ˈgü. ˗A ˗gɛn ˗mü ꞊dhɛ n Dë ˗yö ˈkpii˗ ˈö ˗ʒiö ˗a ˈka n ˗ta.
29 A ˈwɔn ˗nu ˈwo bhë ˗an ˗to ˈˈdhiʋ̈ ˈa ˗an ꞊blɛɛ ka ˗dhɛ, ˗yö kë ˈˈdhʋ̈ kö yi ˈwo ˗dho kë ˗a ˈka, ˈka ka ˗zo yö pë ˈa˗ pö ˗a ˗dhɛ.
30 N ˈti ˗dho ˈwɔn blɛɛˈˈ ka ˗dhɛ ꞊va ˈzü, ˗a ˗gɛn ˗mü ꞊dhɛ ˈˈkpɔnŋtaadhɛ ꞊kɔɔnmɛn ˗yö nu ˗ni ˈgü, ˈˈkɛɛ ˗a ˗kɔ ˈyaa ˗mɔn n ˗bha.*
31 ˈˈKɛɛ pë ˈö n Dë ˗ya pö n ˗dhɛ, a˗ ˗kë ˗a kë ˗kɔ ˈka ˈkpakpadhö, ˗yö kë ˈˈdhʋ̈ kö ˈˈkpɔnŋtaamɛn ˗nu ˗wa ˈwɔn dɔ ꞊dhɛ n Dë ˗dhɔ ˗yö n ˗kë. ˗Kwa luuˈˈ ˈkwa ˈdho ˈkwa ˈgo ˗dhɛ ˈö yö ˗a ˈgü.
-Zoto -a ˈˈpiʋ̈ -wɔn -nu
^ Ɛɛnˈˈ «˗wɛɛ.» ˗Wo ˗we «˗dhɛ ˈö mɛn ꞊mɔɔn˗ ˗bha ˈö ˗tosɛta ˗kë mü» ˗a ˈka.
^ Ɛɛnˈˈ «zuʋ̈ˈˈ dhuaamɛn.»
^ Ɛɛnˈˈ «ka ˈto ˗tenën ˈka.»
^ Ɛɛnˈˈ «˗a ˗bha ˈˈgbɩɩdhɛ ˈyaa n ˗ta.»
