Nɔɔn˗ ˗së ˈsëëdhɛ ˈö Zan ˗ya ˗bɛnzë 15:1-27
15 «Man ˈnën ˈa ˗tɔ ˗drɔɔn ˗dhü ꞊dede, ˈyö n Dë ˗yö ˗kë ˗a tamɛn ˈka.
2 N kwɛɛˈˈ ˗nu ˈˈpɛpɛ ˈö ˈwaa bha, n Dë ˗yö ˗an ˗kan, ˈyö ˗a ˗dhɛ ˗nu ˈwo bha ˈö ˗dhii bho ˗an ꞊gban ˗bha, ˗yö ˗kë ˈˈdhʋ̈ kö ˗wo bha ˈzü ˈgbɛ.
3 ˈˈKɛɛ ka ˗zë ˗dhii ˗ya ˈgo ka ˗bha ˈsaadhö ˗wo ˈa˗ pö ka ˗dhɛ bhë ˗a ˈsaa˗ ˈgü.
4 ˗Ka ˈto ˗klu ˗sü ˈka n ˗bha ˗kplawo kö man ˗de ˈpö ˈa ˈto ˗klu ˗sü ˈka ka ˗bha.* ˗Drɔɔn ˗dhü kwɛɛˈˈ ˗nu ˈwii ˈto ˗a ˗bha, ˈwaa ꞊mɔɔn˗ ˗bha kö ˗wo bha. ˗Kɔ do ˈö bhë ˗a ˈka, ka ˈti ˈto ˗klu ˗sü ˈka n ˗bha, ka ˈti ˗dho ꞊mɔɔn˗ ˗bha kö ˈka bha.*
5 Man ˈnën ˈa ˗tɔ ˗drɔɔn ˗dhü, ˈyö ka ˗zë ˈka ˗kë n kwɛɛˈˈ ˗nu ˈka. Mɛn ˈö to ˗klu ˗sü ˈka n ˗bha, ˈö man ˗de ˈpö ˈa ˗klu ˗a ˗bha, ˗a ˗mɛn ˗dho bha ˈgbɛ. ˗A ˗gɛn ˗mü ꞊dhɛ kö ˈka ˈˈkan n ˗bha, ka ˈti ˗dho ꞊mɔɔn˗ ˗bha toŋtoŋdhö kö ˈka pë ˈbhaa kë ka ˗de ˗ta.
6 Mɛn ˈö yö ˈti ˈto ˗klu ˗sü ˈka n ˗bha, ˗yö ˗dho kë ꞊dhɛ ˈˈdhü kwɛɛˈˈ ˈö ˗kan ˗a ˈdhö, ˈö ˈˈkpɛɛ kun. ˈˈDhü kwɛɛˈˈ ˗nu ˈwo ˈˈdhʋ̈, mɛn ˗nu ˗wo ˗an ˗lö ˈö ˈwo ˗an ˗zuö ˈˈshiʋ̈ ˈgü, ˈö ˈwo ˗an ˗gʋ̈.
7 ˈˈKɛɛ kö ˈka ˈto ˗klu ˗sü ˈka n ˗bha ˗kplawo, kö n ˗wo ˗nu ˗wo wo ˗yɛɛ ˈsü ka zuʋ̈ˈˈ ˈgü, pë ˈˈpɛpɛ ˈö ˈka˗ ˈˈpiʋ̈, ˈka˗ ˗dhɛ, ˗yö ˗dho kë ka ˗dhɛ.
8 Pë ˈö n Dë ˈtɔ bhɔ ˈyö ˗tɔ ka ˗bha bha ˗sü ˈö ˈgbɛ ˈˈtʋ̈ŋ ꞊gban ˈka waa˗ ˗zɔn ˗sü ˈö ꞊dhɛ n ˗bha gwëëˈˈ ˗nu ˗mü ka ˈka.
9 Ka ˗dhɔ ˗yö n ˗kë ꞊dhɛ ˗kɔ do ˈö n ˗dhɔ ˗yö n Dë ˗kë ˗a ˈka bhë ˗a ˈdhö. ˗Ka ˈto ˗klu ˗sü ˈka n ˗man ˗dhɔ ˈö bhë ˗a ˗bha.
10 Kö ˈka n ˗man ˈtɔŋ˗ ˗nu ˈkun, ka ˗dho ˈto ˗klu ˗sü ˈka n ˗man ˗dhɔ ˗bha ꞊dhɛ ˗kɔ do ˈa n Dë ˗bha ˈtɔŋ˗ ˗nu ˈkun ˗a ˈka ˈö ˈa to ˗klu ˗sü ˈka ˗a ˗bha ˗dhɔ ˗bha bhë ˗a ˈdhö.
11 «˗Wo ˗nu ˈwo bhë a ˗an ˗pö ka ˗dhɛ ˈˈdhʋ̈ kö zuʋ̈gblüdhi ˈö n ˗gɔ bhë, ˗yö kë ka ˗gɔ ˈpö kö ˈka zuʋ̈ˈˈ ꞊nii ˗yö ˗da ˈgbɛ ꞊dedewo.
12 N ˗man ˈtɔŋ˗ ˈa˗ dɔ ka ˗ta ˈyö ꞊nɛn: Ka ˗dhɔ ˗yö ka ˈko ˗nu kë ꞊dhɛ ˗kɔ ˈö ka ˗dhɔ ˗yö n ˗kë ˗a ˈka bhë ˗a ˈdhö.
13 Mɛn ˗dhɔ ˗bha mɛn kë ˗kɔ ˈˈwɛɛ ˈbhaa ˈkö ˗dho kë ˈkpii˗ kö ˗yö ʒiö ˗a ˈka ö ˗bha ˗tosɛta* ˗nu ö ˈˈtɔŋdë ˗nu ˗wɔn ˈgü ˗sü ˗ta ˈyaa ˈdhö.
14 Pë ˈa˗ pö ka ˗dhɛ ˈka˗ kë, kö n ˈˈtɔŋdë ˗nu ˗mü ka ˈka.
15 ˈMaan ka ˗dhɛ ˈzü n ˗man ꞊dhuëŋ ˗nu, ˗a ˗gɛn ˗mü ꞊dhɛ ꞊dhuëŋ ˈyaa pë ˈö˗ dëmɛn ˈdhö˗ kë ˗ni ˈgü ˗a dɔ. ˈˈKɛɛ man ˗zë a ka ˗dhɛ n ˈˈtɔŋdë ˗nu, ˗a ˗gɛn ˗mü ꞊dhɛ pë ˈˈpɛpɛ ˈa˗ man n Dë ˈˈdhi, a ˗an ꞊gban ˗pö ka ˗dhɛ.
16 ˈKaa ˈnën ˈö ˈka ka ˗kɔ ˗yɛ n ˗bha, man ˈnën ˈa n ˗kɔ ˗yɛ ka ˗bha ˈö ˈa ka ˗ya kö ˈka ˈdho ˈka bha ˗kplawo ˈwɔn ˗së ˗nu kë ˗sü ˈka* ˈˈtʋ̈ŋ ꞊gban ˈgü, ˗yö kë ˈˈdhʋ̈ kö pë ˈˈpɛpɛ ˈö ˈka ˗dho ˗a ˗dhɛ n Dë ˗gɔ n ˈtɔ ˈgü, ˗ya nu ka ˗dhɛ.
17 «ˈWɔn ˗nu ˈwo bhë a ˗an ˗blɛɛ ka ˗dhɛ ˈˈdhʋ̈ kö ka ˗dhɔ ˗yö ka ˈko ˗nu kë.
18 Ka ˗san ˗ya ˈˈkpɔnŋtaamɛn ˗nu kë, ˗a ˈwɔn ˗yö kë ˈka ˈˈɲaan ꞊dhɛ man ˈnën n ˗san ˗yö ˗an ˗kë ꞊köŋ ˗blɛɛsü ˈyö ˈwo ꞊kun ka ˗san kë.
19 Ka ˗kë ˈˈkpɔnŋtaadhɛ ˗bha ˈka ˗be, ˈˈkpɔnŋtaamɛn ˗nu ˗dho ˗klu ka ˗bha, ˈyö sü ꞊dhɛ ka ˗an ˈˈpiʋ̈. ˈˈKɛɛ ˈdhɛ ˈö ˗kë ꞊dhɛ ˈman n ˗kɔ ˈˈyɛ ka ˗bha ˈˈkpɔnŋtaamɛn ˗nu ꞊zinŋgü ˈö ˈkaa ˈˈkpɔnŋtaadhɛ ˗bha ˈka ˈzü bhë, yö ˈnën ˈö˗ ˗wɔn ˈgü ˈö ka ˗san ˗yö ˈˈkpɔnŋtaamɛn ˗nu ˗kë.
20 Ka ˗zo ˈyaa ˗dho bhɔ ˗wo ˈa˗ pö ka ˗dhɛ bhë ˗a ˈka: ꞊Dhuëŋ ˈyaa ˈkpii˗ ˈyaa ʒiö ˗a ˈka ö dëmɛn ˗ta. ꞊Ya kë ꞊dhɛ ˗wa n ˗wëëdhɛ bho, kö ka ˗de ˈpö ˗wo ˗dho ka ˗wëëdhɛ bho. ꞊Ya kë ꞊dhɛ ˗wa n ˗wo ˗nu ˗ya ꞊bhlëë ˈgü, kö ˗wo ˗dho ka ˗wo ˗nu ˗ya ꞊bhlëë ˈgü ˈpö.
21 ˈWɔn ˈˈpɛpɛ ˈwo bhë ˗wo ˗dho ˗a kë ka ˈka n ˈtɔ ˗wɔn ˈgü, ˗a ˗gɛn ˗mü ꞊dhɛ Mɛn ˈö n bɔ bhë ˈwaa˗ dɔ.
22 ˗Ya kë ˗be ꞊dhɛ n ˈti nu kö ˈa ˈwɔn blɛɛˈˈ ˗an ˗dhɛ, pö yö ˈti ˗dho kë ˗an ˗bha. ˈˈKɛɛ dɔ ˈö ˈkwa˗ wo yö, ˗an ˗bha ˈwɔn yaa ˗bhawɔn ˈto ˗gɛn ˈyaa ˈdhö ˈzü.
23 Mɛn ˈˈoo ˗mɛn ˈö n ˗san ˗ya ˗kë, kö n Dë ˗san ˗ya ˗kë ˈpö.
24 ˗Ya kë ꞊dhɛ ˗dhidha ˗nu ˈö mɛn ˈbhaa yö ˈti ˗an kë do bhë n ˈti ˗an kë ˗an ˈˈɲan ˈˈdhiʋ̈ ˗be, pö yö ˈti ˗dho kë ˗an ˗bha. ˈˈKɛɛ dɔ ˈö ˈkwa˗ wo yö, ˗wa ˗kpan n ˗bha, ˈö yaa n Dë yi ˗san ˗ya ˗da ˗an ˈgü.
25 ˈˈKɛɛ ˗yö ˗kë ˈˈdhʋ̈ kö ˗wo ˈö ˗bɛnzë ˗sü ˈka ˗an ˗bha ˈtɔŋ˗ ˈsëëdhɛ ˈgü bhë ˗yö yökodhiʋ̈. ˗Ya ˗pö: ‹N ˗san ˗yö ˗an ˗kë ˈˈwɛɛwɛ.›
26 A ˗dho ka ˗takunmɛn do ˈö n Dë dho ˗a nu ˗a bɔ. ˗Zuu ˈö ˈˈdhɛ bho gagade ˗ta ˈö ˗dho ˈgo n Dë ˈˈpiʋ̈ ˈˈdhʋ̈ bhë ˗ya nu, ˗yö ˗dho ˈwɔn ˈö ˗gban n ˗bha ˗a ꞊gbɛkiödhɛ kë.
27 Ka ˗de ˈpö ka dua ˗mü kö ˈwɔn ˈö ˗gban n ˗bha ˈka˗ ꞊gbɛkiödhɛ kë, ˗a ˗gɛn ˗mü ꞊dhɛ ˈö go ˗a züdɔdhɛ ˗bha ˈö yö ˗a ˈka ꞊dɛɛ ˗bha, ka ˗kë n ˈˈpiʋ̈.
-Zoto -a ˈˈpiʋ̈ -wɔn -nu
^ Ɛɛnˈˈ «kwa ˗kɔ ˗yö ˈto ö ˈkoo ˗kplawo.»
^ ˗Wo ˗we «ˈwɔn ˗së kë ˗sü ˈka.»
^ Ɛɛnˈˈ «ˈniin˗.»
^ Glɛkö ˗wo ˈgü ˈyö ˗tɔ «kö ka bhɛ ˗yö kë ˈˈtʋ̈ŋ ꞊gban ˈgü.»
