Nɔɔn˗ ˗së ˈsëëdhɛ ˈö Zan ˗ya ˗bɛnzë 16:1-33
16 «˗Wo ˗nu ˈwo bhë a ˗an ˗pö ka ˗dhɛ ˈˈdhʋ̈ kö ka ˗bha ˗zoyödhe ˗gɔ ˈyaa ˗dho ga.*
2 ˗Wo ˗dho ka kë ˗yakwëë ˗kë ˗a ˈgü ˗kɔ ˗nu ˈgü. ˗A ˈˈtʋ̈ŋ ˗dho ˗wo ˈö mɛn ˈˈoo ˗mɛn ˈö ˗dho ka zë, ˈö ˗dho kë ˗a ˈgü ꞊dhɛ ö ˗Zlan ˗bha yö kë ˗ni ˈgü.
3 ˗Wo ˗dho ˈwɔn ˗nu ˈwo bhë ˗an kë, ˈyö sü ꞊dhɛ wo ˈti ꞊mɔɔn˗ ˗bha kö ˗wo n Dë dɔ ɛɛnˈˈ kö ˗wo n dɔ.
4 ˈˈKɛɛ ˈwɔn ˗nu ˈwo bhë a ˗an ˗blɛɛ ka ˗dhɛ ˈˈdhʋ̈ kö ˈˈtʋ̈ŋ ˈö ˈwo ˗dho kë ˗a ˈka, ka ˗zo ˗yö ˗buö ꞊dhɛ a ka ˗kpɔɔ.
«N ˈti ˈwɔn ˗nu ˈwo bhë ˗an blɛɛˈˈ ka ˗dhɛ ˈˈdhʋ̈ ˗a züdɔdhɛ ˈgü, ˈyö sü ꞊dhɛ a ˗kun ka ˈˈpiʋ̈.
5 ˈˈKɛɛ ˗a ˈˈtʋ̈ŋ ˗ya ˗lo kö ˈa ˈdho Mɛn ˈö n bɔ bhë ˗a ˈˈpiʋ̈. ˈYö ka kpö ˈgü mɛn ˈbhaa ˈyaa ˈdhö kö ˗yö n dhɛɛˈˈ ˈkpɔ ꞊dhɛ: ‹Ü ˗dho ˈˈmɛn?› bhë.
6 Ka zuʋ̈ˈˈ ˗ya kaanˈˈ ˈˈkwöö ꞊ʒiaan ˈwɔn ˗nu ˈa ˗an ꞊blɛɛ ka ˗dhɛ bhë ˗an ˗wɔn ˈgü.
7 ˈˈKɛɛ gagade ˈnën ˈa˗ blɛɛˈˈ ˗ni ˈgü ka ˗dhɛ yö. N ˗man ˈdho ˗sü ˗yö ka ˗bha ˈwɔn ˗së ˈka. ˗A ˗gɛn ˗mü ꞊dhɛ n ˈti ˈdho, ka ˗takunmɛn ˈyii ˗dho nu. ˈˈKɛɛ ˗ya kë ꞊dhɛ ˈman ˈdho, ˈyö ˈa ˗dho ˗a bɔ ka ˗dhɛ.
8 Ka ˗takunmɛn ˈö ˈˈdhʋ̈ ˗ya nu, ˗yö ˗dho pë ˈö ˗gban ˈwɔn yaa, ˗kë kpɛnŋdhö ˗sü waa ˗Zlan ˗bha za ˗an ˗bha, ˗an ˗zɔn ˈˈpuu ˈka ˈö ˈˈkpɔnŋtaamɛn ˗nu ˗wa yö.
9 ˗A ˗blɛɛsü ˗yö ˗gban ˈwɔn yaa ˗bha, ˈyö sü ꞊dhɛ wo ˈti wo ˗zo yö n ˗dhɛ.
10 ˗A ˈdhɛ ˈö dɔ ˗a ˈˈpiʋ̈ ˗yö ˗gban ˗kë kpɛnŋdhö ˗sü ˗bha, ˗a ˗gɛn ˗mü ꞊dhɛ a ˈdho ˗ni ˈgü n Dë ˈˈpiʋ̈ ˈö ka ˈti ˗dho ˗kpan n ˗bha ˈzü.
11 ˈYö ˗a ˈdhɛ ˈö dɔ ˗a ˈˈpiʋ̈ ˈzü ˈö ˗gban ˗Zlan ˗bha za ˗bha, ˈyö sü ꞊dhɛ ˗Zlan ˗ya za dɔ ˈˈkpɔnŋtaadhɛ ˈö yö ˗a ꞊kɔɔnmɛn ˗bha.
12 «ˈWɔn ꞊va ˈbhaa ˗yö n ˗gɔ ˈzü kö ˈa˗ blɛɛˈˈ ka ˗dhɛ, ˈˈkɛɛ ˈkaa ꞊mɔɔn˗ ˗bha kö ˈka ˗an ꞊gban ˈgüman ˈˈtʋ̈ŋ ˈö yö ˗a ˈgü.
13 Ka ˗takunmɛn ˈö ˗kë ˗zuu ˈö ˈˈdhɛ bho gagade ˗ta ˗a ˈka ˈˈdhʋ̈ bhë ˗ya nu, ˗yö ˗dho ˈˈdhiʋ̈sü ka ˈka, ˈö ka ˗takun ˈö ˈka gagade ˈgüman ˗së ˈka. ˗A ˗gɛn ˗mü ꞊dhɛ pë ˈö˗ man, ˈyö ˗dho ˗a blɛɛˈˈ. Yö ˈti ˗dho ˈwɔn ˗nu ˈsü ö ˗de ˈgü kö ˗ya blɛɛˈˈ. ˗Ya ˈgo mü ˈzü ˗yö ˗dho ˈwɔn ˗nu ˈö ˗an dua ˈdhö ˗mü kö ˗wo kë ˗an blɛɛˈˈ ka ˗dhɛ.
14 ˗Yö ˗dho n ˈtɔ bhɔ, ˗a ˗gɛn ˗mü ꞊dhɛ pë ˈdhɛ ˈö n ˗gɔ a ˗dho ˗a ˗lo ˗a ꞊kwɛɛ˗ ˈö˗ ꞊blɛɛ ka ˗dhɛ.
15 Pë ˈˈpɛpɛ ˈö n Dë ˗gɔ, ˗yö n ˗bha ˈka ˈpö. Yö ˈnën ˈö˗ ˗wɔn ˈgü ˈa˗ pö ka ˗dhɛ ꞊dhɛ ka ˗takunmɛn ˈö bhë pë ˈdhɛ ˈö n ˗gɔ a ˗dho ˗a ˗lo ˗a ꞊kwɛɛ˗ ˈö˗ ꞊blɛɛ ka ˗dhɛ.
16 ˗A ˈˈtʋ̈ŋ ˗ya ˈto ˈˈtɩtɩ ˈö ka ˈti ˗dho ˗kpan n ˗bha ˈzü. ˗Ya ˈgo mü ˈˈtʋ̈ŋ pë ˈˈtɩtɩ ˗ya ʒiö, ka ˗dho ˗kpan n ˗bha.»
17 ˈDhɛ ˈö˗ pö ˈˈdhʋ̈, ˈyö˗ ˗bha gwëëˈˈ ˗nu ˗wo ˗ya ˗a pö ˗sü ˗bha wo ˈko ˗nu ˗dhɛ: «˗A pö ˈö˗ wo ꞊dhɛ ‹˗A ˈˈtʋ̈ŋ ˗ya ˈto ˈˈtɩtɩ ˈö ka ˈti ˗dho ˗kpan n ˗bha ˈzü. ˗Ya ˈgo mü ˈˈtʋ̈ŋ pë ˈˈtɩtɩ ˗ya ʒiö, ka ˗dho ˗kpan n ˗bha,› ˈö go mü ˈzü ˈö˗ pö: ‹˗A ˗gɛn ˗mü ꞊dhɛ a ˈdho ˗ni ˈgü n Dë ˈˈpiʋ̈› bhë, ˈmën ˈö˗ ˈˈpiʋ̈ ˈö˗ pö kwa ˗dhɛ?»
18 ˗Wo ˗kun ˗a pö ˗ni ˈgü ˈzü: «˗A pö ˈö˗ wo ‹˗a ˈˈtʋ̈ŋ ˗ya ˈto ˈˈtɩtɩ› bhë, ˗a ˗gɛn ˈnën ˗tɔ ˗mën? Pë ˈö˗ ˗wɔn blɛɛˈˈ ˗ni ˈgü bhë ˈkwaa˗ dɔ.»
19 ˗A ˈwɔn ˗kun Yesu ˈˈɲaan ꞊dhɛ ˗wa ˈˈpiʋ̈ ˈwo dhɛɛˈˈ ˈkpɔ ö ˗gɔ, ˗a ˗wɔn ˈgü ˗ya ˗pö ˗an ˗dhɛ: «˗A pö ˈa˗ wo ‹˗a ˈˈtʋ̈ŋ ˗ya ˈto ˈˈtɩtɩ ˈö ka ˈti ˗dho ˗kpan n ˗bha ˈzü, ˗ya ˈgo mü ˈˈtʋ̈ŋ pë ˈˈtɩtɩ ˗ya ʒiö, ka ˗dho ˗kpan n ˗bha› bhë, yö ˈnën ˈö ˈka ka ˈko ˗nu dhɛɛˈˈ ˈkpɔ ˗ni ˈgü ˗a ˗gɛn ˈka bhë ˗ee?
20 A˗ ˗pö ka ˗dhɛ gagade ˈka ꞊dhɛ, ka ˗dho ˈˈgbʋ bɔ ˈö ˈka ka ˗de ˗maanmaan, ˈˈkɛɛ ˈˈkpɔnŋtaamɛn ˗nu ˗zë ˗an zuʋ̈ˈˈ ꞊nii ˗dho ˗da. ˗Wëë ˗dho ˈkpɔ ka ˗ta, ˈˈkɛɛ ka ˗bha ˗wëë ˈö ˈˈdhʋ̈ ˗yö ˗dho ˈˈgla ka ˗gɔ zuʋ̈gblüdhi ˈgü.
21 Dhebɔ ˗yö ˈˈbɔ bho ˗ni ˈgü, ˗yö ˗kë ˗wëësü ꞊dedewo, ˈyö sü ꞊dhɛ ˗a ˗bha saanˈˈ ˈsü ˈˈtʋ̈ŋ ˗mü. ˈˈKɛɛ ˗ya ö bo ˈnën ˈö ˈˈdhʋ̈ ˗a ˈkpɔ ˗sü ˈka, ˗a ˗zo ˗yö ˗bhɔ ˈpapadhö ˈˈklʋʋbhɔdhe ˈö bɔ ˗a ˈgü bhë ˗a ˈka, mɛnbhɩɩdhe ˈö˗ ˗da ˈˈkpɔnŋ ꞊taa bhë ˗a ˗wɔn ˈgü.
22 Ka ˗de ˈpö, ˈˈtʋ̈ŋ ˈö yö ˗a ˈgü, ˗wëë ˗yö ˈkpɔ ˗sü ˈka ka ˗ta ꞊dedewo. ˈˈKɛɛ ka ˗dho ˗kpan n ˗bha ˈzü, ka zuʋ̈ˈˈ ꞊nii ˗dho ˗da, ˈö ˗a zuʋ̈niidadhe ˈö ˈˈdhʋ̈ mɛn ˈbhaa ˈti ˗dho ˗a ˈkun ka ˗gɔ.
23 Yi ˈö bhë ˗a ˈka, ka ˈti ˗dho dhɛɛˈˈ ˈkpɔ n ˗gɔ ˈzü toŋtoŋdhö. A˗ ˗pö ka ˗dhɛ gagade ˈka ꞊dhɛ pë ˈˈoo ˗pë ˈö ˈka˗ ˗dhɛ n Dë ˗gɔ, ˗yö ˗dho ˗a nu ka ˗dhɛ n ˈtɔ ˈgü.
24 ˈÖ go yi ˈö bhë ˗a ˗bha ˈö yö ˗a ˈka ꞊dɛɛ ˗bha, ka ˈti pë ˈˈwɛɛ ˈbhaa ˗dhɛ n Dë ˗gɔ n ˈtɔ ˈgü do. ˗Ka pë ˗gbadhɛ n ˈtɔ ˈgü, ka ˗dho ˗a ꞊slɔɔ˗, ˗yö kë ˈˈdhʋ̈ kö ka zuʋ̈ˈˈ ˈˈgblü ˗yö dhi ꞊dedewo.
25 «A ˗bɔ ˈwɔnzuan ˗nu ˗ta ˈa ˈwɔn ˗nu bhë ˗an ꞊blɛɛ ka ˗dhɛ. ˈˈKɛɛ ˗a ˈˈtʋ̈ŋ ˗yö nu ˗ni ˈgü ˈö n ˈti ˗dho bɔ ˈwɔnzuan ˗nu ˗ta ˈzü kö ˈa ˈwɔn blɛɛˈˈ ka ˗dhɛ. ˈˈTʋ̈ŋ ˈö bhë ˗a ˈgü, ˈwɔn ˈö ˗gban n Dë ˗bha a ˗dho ˗a blɛɛˈˈ ka ˗dhɛ ˈˈpuu ˈka.
26 Yi ˈö bhë ˗a ˈka, ka ˗dho pë ˗nu ˗gbadhɛ n Dë ˗gɔ n ˈtɔ ˈgü. ˈˈKɛɛ ˗a pö ˈa˗ wo ˈˈdhʋ̈ bhë ˗a ˗gɛn ˈyaa ˈnën ˗tɔ ꞊dhɛ man ˈnën ˈa ˗dho pë ˗nu ˗gbadhɛ ka ˗bha ˈka.
27 Ka ˗wɔn ˗yö n Dë yöö ꞊dede ˗a ˗gɔ ˈˈgbɩɩ˗, ˈyö sü ꞊dhɛ n ˗wɔn ˗yö ˗kë ka ˗gɔ ˈˈgbɩɩ˗ ˈpö, ˈö ˈka ˈdhaŋ˗ bho n ˈˈdhiʋ̈ ꞊dedewo ꞊dhɛ ˗Zlan ˈnën n bɔ.
28 N Dë ˗yö n ˗bɔ ˈö ˈa nu ˈˈkpɔnŋ ꞊taa. ˈGo ˈnën ˈa ˗dho ˗a wo ˈˈkpɔnŋ ꞊taa yö kö ˗a ˈdho n Dë ˈˈpiʋ̈ bhë.»
29 ˈYö˗ ˗bha gwëëˈˈ ˗nu ˗wa pö ˗a ˗dhɛ: «Ü ˈwɔn blɛɛˈˈ ˗ni ˈgü ˈˈpuu ˈka ˈzlee, ˈbhaa˗ blɛɛˈˈ ˗ni ˈgü ˈˈgɔɔn ˈgü.
30 ˈYa˗ ˈwɔn dɔ ˈzlee ꞊dhɛ ü ˈwɔn ꞊gban ˈˈpɛpɛ ˗dɔ, ü ˗bhawɔn ˈyaa˗ ˗bha ˗ʒiaanwo kö ˗wo dhɛɛˈˈ ˈkpɔ ü ˗gɔ. ˗A ˗wɔn ˈgü yi ˈdhaŋ˗ ˗bho ꞊dedewo ꞊dhɛ ˗Zlan ˈnën ü bɔ.»
31 ˈYö Yesu ˗ya pö ˗an ˗dhɛ: «Ka ka ˗zo ˗yö ˈˈdhʋ̈ ꞊dedewo ˗ee?
32 ˗Ka ˗dhɛ ˗ga! ˗A ˈˈtʋ̈ŋ ˗yö nu ˗ni ˈgü, ˈö˗ ˈˈtʋ̈ŋ ˈö ˈˈdhʋ̈ ˗ya ˗wo ˈsaadhö ˗ʒiaanwo, ˈö ka ˈˈpɛpɛ ˈka ˗dho n ˈto n do ˈka ˈö ˈka ˗pɛn, ˈö mɛn ˈö ˈdhö ˈö dho ö ˗gɔ ˈkɔɔ. ˈˈKɛɛ ˈmaan n do ˈka, ˗a ˗gɛn ˗mü ꞊dhɛ n Dë ˗yö n ˈˈpiʋ̈.
33 A ˈwɔn ˗nu ˈwo bhë ˗an ˗blɛɛ ka ˗dhɛ ˈˈdhʋ̈ kö zuʋ̈waannusü ˗yö kë ka ˗gɔ n ˈsaa˗ ˈgü. ˈWɔn ˈˈgbɩɩ˗ ˗nu ˗dho nu ka ˗ta ˈˈkpɔnŋ ꞊taa, ˈˈkɛɛ ˗ka ka ˈgü dɔ ˈˈgbɩɩ˗! N ˗kɔ ˗ya ʒiö ˈˈkpɔnŋtaadhɛ ˗gɔ.»
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «kö ˈka ˗dho ˗puö.»
