Nɔɔn˗ ˗së ˈsëëdhɛ ˈö Zan ˗ya ˗bɛnzë 17:1-26
17 ˈDhɛ ˈö Yesu ˗yö ö bo ˗wo ˗nu ˈwo bhë ˗an pö ˗sü ˈka, ˈyö ˗dhɛ ˗ga dhaŋ˗ ˈgü ˈö˗ pö: «N Dë, ˗a ˈˈtʋ̈ŋ ˗ya ˗wo. ˗Bhö ˈtɔbhɔdhe nu ü gbö ˗dhɛ kö yö ˗de ˈpö ˗yö ü ˈtɔ bhɔ.
2 ˗Bhö ˈtɔbhɔdhe nu ˗a ˗dhɛ ꞊dhɛ ˗kɔ do ˈü˗ ˗ya ˗a ˈka mɛn ꞊gban ˈˈpɛpɛ ˗gɔ ˗ta bhë ˗a ˈdhö, ˗yö kë ˈˈdhʋ̈ kö ˗tosɛta ˈö ˈyaa ɲën ˗ya nu mɛn ˈˈpɛpɛ ˈü ˗an nu ˗a ˗dhɛ bhë ˗an ˗dhɛ.
3 ˈˈKɛɛ ˗tosɛta ˈö ˈyaa ɲën ˈˈdhʋ̈ bhë ꞊waa˗ pö ˈwo˗ ꞊slɔɔ, ˗an dua ˗mü kö ˗wo bhi ˈü ˗kë ˗Zlan ꞊dede dosɛnŋ ˈö ˈdhö ˗a ˈka bhë ü dɔ, ˈgo mü kö mɛn ˈü˗ bɔ ˈö ˗kë Yesu Klito ˈka bhë ˗wa dɔ ˈpö.
4 ˈMan ü ˈtɔ bhɔ ˈˈkpɔnŋ ꞊taa, yö ˈü˗ nu n ˗dhɛ kö ˈa˗ kë bhë ˈman ɲën ˗a ˗bha.
5 ˈDhɛ ˈö ˈˈdhʋ̈ n Dë, ˗bhö ˈˈwɩ ˗a ˗bha kö ˈa kë ü ˈˈsuee, kö ˈtɔbhɔdhe ˈö kun n ˗gɔ ˈˈdhiʋ̈ ˗be ü ˈˈpiʋ̈ kö ˈˈkpɔnŋtaadhɛ ˈyaa ˈdhö ꞊köŋ bhë, ˈü˗ nu n ˗dhɛ ˈzü.
6 «Mɛn ˗nu ˈü ˗an bho ˈˈkpɔnŋtaamɛn ˗nu ˈˈpiʋ̈ ˈü ˗an nu n ˗dhɛ bhë, ˈman ü ˈtɔ ˗zɔn ˗an ˗dhɛ. ˗Wo ˗kun ü ˗bha ˈka ˈyö ˈü ˗an nu n ˗dhɛ, ˈö ˈwo ü ˗wo ˗ya ꞊bhlëë ˈgü.*
7 ꞊Waa˗ ˈwɔn dɔ ˈˈtʋ̈ŋ ˈö yö ˗a ˈgü ꞊dhɛ pë ˈˈpɛpɛ ˈü ˗an nu n ˗dhɛ bhë ˗wo ˗go ü ˈˈpiʋ̈.
8 ˗A ˗gɛn ˗mü ꞊dhɛ ˗wo ˗nu ˈü ˗an ˗lo n ꞊kwɛɛ˗ bhë, ˈman˗ ˈˈdhiʋ̈ ˗lo ˗an ˗bha, ˈö ˗wa ˈˈwɩ ˗a ˗bha. ꞊Waa˗ ˈwɔn dɔ ꞊dedewo ꞊dhɛ a ˗nu ü ˈtɔ ˈgü, ˈyö ˗wa wo ˗zo yö ꞊dhɛ bhi ˈnën ˈü n bɔ.
9 A ˗bhɛɛ ü ˗dhɛ ˗an ˗wɔn ˈgü. ˈˈKpɔnŋtaamɛn ˗nu* ˈyaa ˈnën ˈa ꞊bhɛɛ ˗an ˗wɔn ˈgü, mɛn ˗nu ˈü ˗an nu n ˗dhɛ bhë wo ˈnën ˈa ꞊bhɛɛ ˗an ˗wɔn ˈgü, ˈyö sü ꞊dhɛ ˗wo ü ˗bha ˈka.
10 Pë ˈˈpɛpɛ ˈwo n ˗gɔ ˗wo ü ˗bha ˈka, ˈö pë ˗nu ˈwo ü ˗gɔ ˈwo n ˗bha ˈka ˈpö, ˈö n ˈtɔ ˗ya bhɔ ˗an ꞊zinŋgü.
11 «Nu ˈnën ˈa˗ wo ˗ni ˈgü ü ˈˈpiʋ̈ bhë. ˈMaan ˈˈkpɔnŋ ꞊taa yö ˈzü, ˈˈkɛɛ wo ˗zë ˗wo ˈˈkpɔnŋ ꞊taa. ˈDhɛ ˈö ˈˈdhʋ̈ n Dë ˈü ˈˈslʋ̈ʋ̈slʋ̈, ˗bhö zë ü ˈtɔ ˈü˗ ˗ya n ˗bha bhë ˗a ˗wɔn ˗dhɛ ˈü ü ˗zokë ˗an ˈˈpiʋ̈, kë ˈˈdhʋ̈ kö ˗wo kë mɛn do ˈka* ꞊dhɛ ˗kɔ ˈö ˈko˗ ˗bha mɛn do ˈka* bhë ˗a ˈdhö.
12 ˈˈTʋ̈ŋ ˈa kun ˗a ˈka ˗an ˈˈpiʋ̈ bhë, a ˗zë ü ˈtɔ ˈü˗ ˗ya n ˗bha bhë ˗a ˗wɔn ˗dhɛ ˈa n ˗zo ˗kë ˗an ˈˈpiʋ̈ ˗kplawo, ˈö ˈa n ˗kɔ kpa ˗an ˗ta, ˈö˗ mɛn ˈˈwɛɛ ˈbhaa ˈgü yö ˈti shiʋ̈ˈˈ kö yö ˈti kë ˗a mɛn ˗dhɛ ˈö˗ ˈgü dho shiʋ̈ˈˈ kö pë ˈö ˗bɛnzë ˗sü ˈka ü ˈˈdhiwo ˈgü ˗yö yökodhiʋ̈ bhë ˗a ˈka.
13 ˈˈKɛɛ a nu ˗ni ˈgü ü ˈˈpiʋ̈. Yö ˈnën ˈö˗ ˗wɔn ˈgü ˈa ˗wo ˗nu ˈwo yö ˗an pö ˗ni ˈgü kö a ꞊kun ˈˈkpɔnŋ ꞊taa yö bhë, ˗yö kë ˈˈdhʋ̈ kö zuʋ̈gblüdhi ˈö n ˗gɔ bhë ˗yö kë ˗an ˗gɔ ˈpö, kö ˗an zuʋ̈ˈˈ ꞊nii ˗yö ˗da ꞊dedewo.
14 A ü ˗wo ˗nu ˈˈdhiʋ̈ ˗lo ˗an ˗bha, ˈˈkɛɛ ˗an ˗san ˗yö ˈˈkpɔnŋtaamɛn ˗nu ˗kë, ˗a ˗gɛn ˗mü ꞊dhɛ ˈwaa ˈˈkpɔnŋtaadhɛ ˗bha ˈka ꞊dhɛ ˗kɔ ˈö man ˗de ˈpö ˈmaan ˈˈkpɔnŋtaadhɛ ˗bha ˈka bhë ˗a ˈdhö.
15 «N ˈti bhɛɛˈˈ ü ˗dhɛ ˈˈdhʋ̈ kö ˈü ˗an bho ˈˈkpɔnŋ ꞊taa, a˗ ˗kë ˈˈdhʋ̈ ꞊ʒiaan kö ˈü ü ˗zo kë ˗an ˈˈpiʋ̈ pëyaakëmɛn* ˈö bhë ˗a ˗gɔ.
16 ˈWaa ˈˈkpɔnŋtaadhɛ ˗bha ˈka ˈzü ꞊dhɛ ˗kɔ ˈö man ˗de ˈpö ˈmaan ˈˈkpɔnŋtaadhɛ ˗bha ˈka bhë ˗a ˈdhö.
17 ˗Bhö bɔ gagade -ta ˈü ˗an kë ˈˈslʋ̈ʋ̈slʋ̈. Ü ˗wo ˗yö gagade ˈka.
18 ˈMan ˗an bɔ ˈˈkpɔnŋ ꞊taa ꞊dhɛ ˗kɔ ˈü n bɔ ˗a ˈka ˈˈkpɔnŋ ꞊taa bhë ˗a ˈdhö.
19 ˗An ˗wɔn ˈgü a pë ꞊gban kë ˗ni ˈgü kö ˈa ˈto ˈˈslʋ̈ʋ̈slʋ̈, ˗yö kë ˈˈdhʋ̈ kö wo ˗de ˈpö ˗wo bɔ gagade ˗ta ˗wo kë ˈˈslʋ̈ʋ̈slʋ̈.
20 «Mɛn ˗nu ˈwo bhë wo dosɛnŋ ˈyaa ˈnën ˈa ꞊bhɛɛ ˗an ˗wɔn ˈgü, a ˗bhɛɛ ˈpö mɛn ˈˈpɛpɛ ˈö ˈwo ˗dho wo ˈˈtʋ ˈto ˗an ˗wo ˗bha kö ˗wo bɔ ˗a ˗ta ˗wo wo ˗zo yö n ˗dhɛ bhë ˗an ˗wɔn ˈgü.
21 ˗Yö kë ˈˈdhʋ̈ kö ˗an ꞊gban ˈˈpɛpɛ ˗wo kë mɛn do ˈka ꞊dhɛ ˗kɔ ˈö bhi ˈü ˗kë n Dë ˈka, ko˗ ˗nu ko ˗kɔ ˈdhö˗ ˈka ˈkoo bhë ˗a ˈdhö. Wo ˗de ˈpö kwaa˗ ˗nu kwa ˗kɔ ˗yö kë ˈkoo, ˗yö kë ˈˈdhʋ̈ kö ˗yö ga ˈˈkpɔnŋtaamɛn ˗nu ˈgü ꞊dhɛ bhi ˈnën ˈü n bɔ.
22 ˈTɔbhɔdhe ˈü˗ nu n ˗dhɛ bhë ˈman˗ nu ˗an ˗dhɛ ˈpö, ˗yö kë ˈˈdhʋ̈ kö ˗wo kë mɛn do ˈka ꞊dhɛ ˗kɔ ˈö ˈko˗ ˗bha mɛn do ˈka bhë ˗a ˈdhö.
23 Yaa˗ ˗nu yi ˗kɔ ˗yö ö ˈkoo, ˈö ko ˗kɔ ˈdhö ˈkoo ˈpö. ˗Yö kë ˈˈdhʋ̈ kö ˗an ˗bha ˗kë mɛn do ˈka ˗sü ˈö bhë ˗yö kë ˈˈgbɩɩ˗ ꞊dedewo.* ˗Ya kë ˈˈdhʋ̈ ˈyö ˈˈkpɔnŋtaamɛn ˗nu dho ˗a ˈwɔn dɔ ꞊dhɛ bhi ˈnën ˈü n bɔ, ˈö ˈwo˗ yö ˈzü ꞊dhɛ ˗an ˗dhɔ ˗yö ü ˗kë ꞊dhɛ ˗kɔ ˈö n ˗dhɔ ˗yö ü ˗kë ˗a ˈka bhë ˗a ˈdhö.
24 N Dë, ˈa˗ ˈˈpiʋ̈ ꞊dhɛ mɛn ˗nu ˈü ˗an nu n ˗dhɛ bhë ˗wo kë n ˈˈpiʋ̈ ˗dhɛ ˗a ˗bha ˗a ˈgü, ˗yö kë ˈˈdhʋ̈ kö ˗an ˈˈɲan ˗yö ˗kpan ˈtɔbhɔdhe ˈü˗ nu n ˗dhɛ bhë ˗a ˗bha. ˗A ˗gɛn ˗mü ꞊dhɛ n ˗dhɔ ˗yö ü ˗kë kö ˈˈkpɔnŋtaadhɛ ˈyaa ˗dhö ꞊köŋ.
25 N Dë bhi ˈü kpɛnŋdhö bhë, ˈˈkpɔnŋtaamɛn ˗nu ˗kɔ yö ˈti ꞊mɔɔn˗ ˗bha kö ˗wo ü dɔ. ˈˈKɛɛ man ˗zë a ü ˗dɔ, ˈö mɛn ˗nu ˈwo yö ꞊waa˗ ˈgüman ꞊dhɛ bhi ˈnën ˈü n bɔ.
26 ˈMan ü ˈtɔ ˗zɔn ˗an ˗dhɛ, ˈö ˈa ˗dho ˗a ˗zɔn ˗an ˗dhɛ ˈzü, ˗yö kë ˈˈdhʋ̈ kö ˗dhɔ ꞊suu ˈü˗ ˗kë n ˈka bhë ˗yö kë ˗an ˈgü ˈpö kö yaa˗ ˗nu yi ˗kɔ ˗yö kë ö ˈkoo.»
-Zoto -a ˈˈpiʋ̈ -wɔn -nu
^ Ɛɛnˈˈ «ˈwo ˈwɔn man ü ˗ta.»
^ Ɛɛnˈˈ «ˈˈkpɔnŋtaadhɛ.»
^ Ɛɛnˈˈ «˗an ˗kɔ ˗yö kë ˈwɔn do ˗bha.»
^ Ɛɛnˈˈ «ko ˗kɔ ˈdhö ˈwɔn do ˗bha.»
^ ˗Wo ˗we «Sɔtraan» ˈka.
^ Ɛɛnˈˈ «kö ˗an ˗kɔ ˗yö kë ˈwɔn do ˗bha kpɛnkpɛndhö.»
