Nɔɔn˗ ˗së ˈsëëdhɛ ˈö Zan ˗ya ˗bɛnzë 18:1-40
-
Zuda ˗bha Yesu ˈˈdhoodɔ ˗sü (1-9)
-
Piɛɛ ˗yö mɛn ˗zë ˗dhaa ˈka (10, 11)
-
˗Wo ˗dho Yesu ˈka Anö ˈˈpiʋ̈ (12-14)
-
˗A pö ˗blɛɛsü ˈö Piɛɛ ˗ya wo ˈyaa Yesu dɔ (15-18)
-
Yesu ˗bha ˗dɔ Anö ˗kuu ˈˈdhiʋ̈ ˗sü (19-24)
-
˗A pö ꞊plɛ ˗naan waa ˗yaaga ˗naan ˈö Piɛɛ ˗ya wo ꞊dhɛ ˈyaa Yesu dɔ (25-27)
-
Yesu ˗bha ˗dɔ Pidhatö ˗kuu ˈˈdhiʋ̈ ˗sü (28-40)
-
«N ˗man ˗Gblüdëdhɛ ˈyaa ˈˈkpɔnŋ ꞊taa yö» (36)
-
18 ˈDhɛ ˈö Yesu ˗yö ö bo ˗wo ˗nu ˈwo bhë ˗an pö ˗sü ˈka, ˈyö waa ö ˗bha gwëëˈˈ ˗nu ˈwo yö ˈˈkpɛnŋ, ˈö ˈwo Sedrɔn ˈˈyigoogüdhɛ ˗zinŋ ˗kan ˈwo dho ˗a ꞊taabha. ˗Dhɛ ˈö bhë ˗a ˈgü ˈˈdhüdhɛɛdhɛ do ˈbhaa ˗yö ˗kë mü, ˈyö waa ö ˗bha gwëëˈˈ ˗nu ˈwo dho mü.
2 ˗Dhɛ ˈwo dho ˗a ˗bha ˈˈdhʋ̈ bhë, Zuda ˈö Yesu ˈˈdhoodɔ bhë ˗ya ˗dɔ, ˈyö sü ꞊dhɛ Yesu waa ö ˗bha gwëëˈˈ ˗nu ˗wa wo ˗bha ˗yakwëë ˗nu kë mü ˗gɛnɲaan ˈka ꞊va.
3 ˈDhɛ ˈö ˗kë ˈˈdhʋ̈, ˈyö Zuda ˗yö ˈˈdhiʋ̈sü ˈˈsɔdha ˗nu waa ˗Zlan ˗dhɔkë ˗a ˈgü ˗kɔ ˗maankëmɛn ˗nu, ˈö ˈˈsaabhomɛn ˗nu ˗gɔmɛn ˗nu waa Fadhiziɛn ˗nu ˗wo ˗an bɔ bhë ˗an ˈka, ˈö dho ˗an ˈka mü. ˈˈGbia ˗nu, ꞊laŋba ˗nu waa ˈko ˗zë ˗a ˈka ˗piö ˗nu ˗wo ˗kun ˗an ˗gɔ.
4 ˈDhɛ ˈö ˗kë ꞊dhɛ ˈwɔn ˈˈpɛpɛ ˈö ˈwo ˗dho kë Yesu ˈka bhë ˗a ˈwɔn ˗kun yö ꞊dede ˗a ˈˈɲaan, ˈyö dɔ ˗an ˈwëëdhö ˈö˗ pö ˗an ˗dhɛ: «De ˈö ˈka˗ ꞊mɛɛn?»
5 ˈYö ˈwo˗ ˗yɔ bɔ ˗a ˗gɔ ˈwo˗ pö: «Yesu ˈö go Nazadhɛtö bhë yö ˗mü.» ˈYö˗ pö ˗an ˗dhɛ: «Man ˗mü.» ˈÖ ˗kë ˈˈdhʋ̈ kö Zuda ˈö˗ ˈˈdhoodɔ bhë ˗yö ˈduaannu ˗sü ˈka mɛn ˗nu ˈwo bhë ˗an ˈˈpiʋ̈ mü.
6 ˈDhɛ ˈö Yesu ˗ya pö ˗an ˗dhɛ: «man ˗mü,» ˈyö ˈwo bhɔ ˗a ˗dhɛ ꞊taa ˈö ˈwo ˗puö ˈˈshia˗.
7 ˈDhɛ ˈö ˗kë ˈˈdhʋ̈, ˈyö ˗an dhɛɛˈˈ kpɔ ˈzü ˈö˗ pö: «Ka˗ ˗pö de ˈö ˈka˗ ꞊mɛɛn?» ˈYö ˈwo˗ pö ˗a ˗dhɛ: «Yesu ˈö go Nazadhɛtö bhë yö ˗mü.»
8 ˈYö Yesu ˗ya pö ˗an ˗dhɛ: «A˗ ˗pö ka ˗dhɛ man ˗mü. ˈDhɛ ˈö ˈˈdhʋ̈, ˗ya kë ꞊dhɛ man ˈnën ˈö ˈka n ꞊mɛɛn, ˗ka ka ꞊kwaa mɛn ˗nu ˈwo to ˗an ˗zü kö ˗wo ˈdho.»
9 ˗Yö ˗kë ˈˈdhʋ̈ kö ˈwɔn ˈö˗ to ˈˈdhiʋ̈ ˈö˗ pö bhë, ˗yö yökodhiʋ̈. ˗Ya ˗pö: «Mɛn ˗nu ˈü ˗an nu n ˗dhɛ bhë, ˗a mɛn dosɛnŋ yö ˈti ꞊dhiɔŋ n ˗kɔ ˗ta.»
10 ˈÖ ˗kë ˈˈdhʋ̈ kö ˗blaan ˗dhaa do ˗yö Simɔn Piɛɛ ˗gɔ. ˈYö˗ sü ˈö ˈˈsaabhomɛn ˈkpii˗ ˗bha yökëmɛn zë ˗a ˈka, ˈö˗ ˗kɔ ˗së ˈgü ˈˈtʋdhɛ ˈˈdhiʋ̈ bho. ˗A yökëmɛn ˈö ˈˈdhʋ̈ ˗wa ˗dhɛ Maakisö.
11 ˈˈKɛɛ ˈyö Yesu ˗ya pö Piɛɛ ˗dhɛ: «˗Blaan ˗dhaa ˈö bhë ˗a ˗da ö ˗kpee ˈgü. N dua ˈyaa ˗mü kö ˗kɔɔ ˈö n Dë ˗ya nu n ˗dhɛ bhë, pë ˈö˗ ˈgü ˈa˗ mü ˗ee?»
12 ˈDhɛ ˈö ˗kë ˈˈdhʋ̈, ˈyö ˈˈsɔdha ˗nu, ˈˈsɔdha ˗gɔmɛn waa ˗Zlan ˗dhɔkë ˗a ˈgü ˗kɔ ˗maankëmɛn ˗nu ˈö Zuifö ˗nu ˗wo ˗an bɔ bhë, ˈwo Yesu kun ˈö ˈwo˗ ˗lö.
13 ˗Wo ˗dho ˗a ˈka Anö ˈˈpiʋ̈ ꞊köŋ ˗blɛɛsü, ˈyö sü ꞊dhɛ ˗yö ˗kun Kaifö ˈö kun ˈˈsaabhomɛn ˈkpii˗ ˈka ˗kwɛ ˈö bhë ˗a ˈka ˗a ˗bha dhebɔ dë ˈka.
14 Kaifö ˈö ˈˈdhʋ̈ bhë, yö ˈnën ˈö˗ to ˈˈdhiʋ̈ ˈö Zuifö ˗nu ꞊kpɔɔ, ˈö˗ pö ꞊dhɛ mɛn do ˗bha ga ˗sü ˈö ˈˈsɛgümɛn ˗nu ˗wɔn ˈgü, ˗a ꞊fiëë ˗yö ˗dhö ˗an ˗bha ˈka.
15 Simɔn Piɛɛ waa Yesu ˗bha gwëëˈˈ ˈˈwɛɛ do ˗wo ˗ʒiö Yesu ꞊kee˗. ˗A gwëëˈˈ ˈö ˈˈdhʋ̈ ˈˈsaabhomɛn ˈkpii˗ ˗ya ˗dɔ. ˗Yö ˗to Yesu ꞊kee˗ ˈö ˈwo dho ˈwo ˗da ˗a ˈka ˈˈsaabhomɛn ˈkpii˗ ˗gɔ ˈˈkwɛnŋdhö.
16 ˈˈKɛɛ Piɛɛ ˗zë yö ˈti ˗da ˈˈkwɛnŋdhö, ˗yö ˗kun dɔ ˗sü ˈka ˈˈkpan ˈˈdhiʋ̈ mü. ˈDhɛ ˈö ˗kë ˈˈdhʋ̈, ˈyö ˗a gwëëˈˈ do ˗sü ˈö ˈˈsaabhomɛn ˈkpii˗ ˗ya dɔ bhë, ˈö yö ˈˈkpɛnŋ ˈö dho ˈö ˈwɔn ꞊blɛɛ ˈˈkwee ˗maankëmɛn ˗dhɛ, ˈyö waa Piɛɛ ˈwo ˗da ˈkɔɔ.
17 ˈYö ˈnëndhiëŋnën ˈö kun ˈˈkwee ˗maankëmɛn ˈka bhë, ˈö˗ pö Piɛɛ ˗dhɛ: «Bhi ˗de ˈpö gɔndënën ˈö bhë ˗a ˗bha gwëëˈˈ do ˗mü ü ˈka, ˈyaa ˈˈdhʋ̈ ˗ee?» ˈYö Piɛɛ ˗ya pö: «˗Abin, ˈmaan˗ ˗bha gwëëˈˈ ˈka.»
18 ˗A ˈˈtʋ̈ŋ ˈö bhë ˗a ˈgü, kö mɛn ˗nu ˈwo yö ˗kë ˈˈkwɛnŋdhö mü waa ˗Zlan ˗dhɔkë ˗a ˈgü ˗kɔ ˗maankëmɛn ˗nu ˗wo ˈduannu sü ˈka ˈshiaan˗ ˈwo ˈˈshiʋ̈ ˗ya ˗a ˈgü ˗a ˈˈsuee kö ˈˈnɛnnɛn ˗yö ˈgo wo kwi ˈgü, ˗a ˈgɛn ˗mü ꞊dhɛ ˈˈnɛnnɛn ˗kun ʒiö ˗ni ˈgü. Piɛɛ ˗de ˈpö ˗yö ˗kun dɔ ˗sü ˈka ˗an ˈˈpiʋ̈ mü kö ˈˈnɛnnɛn ˗yö ˈgo ö kwi ˈgü.
19 ˈYö ˈˈsaabhomɛn ˗nu ˗gɔmɛn ˗yö ˈwɔn ˈö ˗gban Yesu ˗bha gwëëˈˈ ˗nu waa˗ ˗bha ꞊klaŋwo ˗nu ˗bha ˗a dhɛɛˈˈ kpɔ ˗a ˗gɔ.
20 ˈYö Yesu ˗ya ˗yɔ bɔ ˈö˗ pö: «A ˗dɔ mɛn ꞊gban ˈˈɲandhiʋ̈ ˈa n ˗man ˈwɔn ˗nu ꞊blɛɛ. ˈˈTʋ̈ŋ ꞊gban ˈˈpɛpɛ ˈka a mɛn ˗nu ꞊klaŋ ˗kë ˗yakwëë ˗kë ˗a ˈgü ˗kɔ ˗nu waa ˗Zlan ˗dhɔkë ˗a ˈgü ˗kɔ ˈö ˗ya kë ꞊shiöŋ ˈö Zuifö ˗nu ˗wo dho wo ˈkwëëdhö ˗a ˗bha bhë ˗an ˈgü. ˈWɔn ˈbhaa ˈkö ˈa ˗dho ˗a blɛɛˈˈ ˗bindhe ˈgü ˈyaa ˗dhö.
21 ˈMën ˗kë ˈü dhɛɛˈˈ kpɔ man ˗zë n ˗gɔ? ˗Bhö dhɛɛˈˈ ˈkpɔ ꞊ʒiaan mɛn ˗nu ˈö pë ˗nu ˈa˗ pö ˗an ˗dhɛ ˈwo˗ man bhë ˗an ˗gɔ. Wo ˗zë, pë ˈa˗ pö ˗wa ˗dɔ.»
22 ˈDhɛ ˈö˗ pö ˈˈdhʋ̈, ˈyö ˗Zlan ˗dhɔkë ˗a ˈgü ˗kɔ ˗maankëmɛn ˗nu bhë ˗a mɛn do ˈö kun dɔ ˗sü ˈka mü ˈö Yesu ˗gɔ ˗man,* ˈö˗ pö ˗a ˗dhɛ: «Ü ˈwɔn ˗daa kë ˗kɔ ˈnën ˈö bhë ˈˈsaabhomɛn ˗nu ˗gɔmɛn ˗gɔ ˗ee?»
23 ˈYö Yesu ˗ya pö ˗a ˗dhɛ: «˗Ya kë ꞊dhɛ ˈman ˈwɔn yaa ˈbhaa blɛɛˈˈ, pë ˈa˗ pö ˈö ˈwɔn yaa ˈka mü bhë ˗a ˗zɔn n ˗dhɛ. ˈˈKɛɛ ˗ya kë ꞊dhɛ pë ˈa˗ pö bhë gagade ˗mü, kö ü n ˗man ˗mën ˗wɔn ˈgü ˈsa?»
24 ˈDhɛ ˈö ˗kë ˈˈdhʋ̈, ˈyö Anö ˗ya ˗lö ˈö˗ bɔ ˈˈsaabhomɛn ˈkpii˗ Kaifö ˗dhɛ.
25 ˈÖ ˗kë ˈˈdhʋ̈ kö Simɔn Piɛɛ ˗yö ˈduaannu ˗sü ˈka ˈˈwo ˈˈsuee mü, kö ˈˈnɛnnɛn ˗yö ˈgo ö kwi ˈgü. ˈYö ˈwo˗ pö ˗a ˗dhɛ: «Bhi ˗de ˈpö gɔndënën ˈö bhë ˗a ˗bha gwëëˈˈ do ˗mü ü ˈka, ˈyaa ˈˈdhʋ̈ ˗ee?» ˈYö Piɛɛ ˗yö zɔɔ ˈö˗ pö: «˗Abin, ˈmaan˗ ˗bha gwëëˈˈ ˈka.»
26 ˈYö ˈˈsaabhomɛn ˈkpii˗ ˗bha yökëmɛn do ˈö kun gɔndënën ˈö Piɛɛ ˗ya ˈˈtʋdhɛ ˈˈdhiʋ̈ bho bhë ˗a ˗bha mɛn ˈka, ˈö˗ pö: «Bhi ˈyaa ˈnën ˈa ˗kpan ü ˗bha ˈˈdhüdhɛɛdhö bhë ˗ee?»
27 ˈˈKɛɛ ˈyö Piɛɛ ˗yö zɔɔ ˈzü, ˈyö to mü ˈö ˗tɔ gɔn ˗yö ˗we.
28 ˈDhɛ ˈwo go mü, ˈyö ˈwo Yesu sü Kaifö ˗gɔ ˈˈkwɛnŋdhö ˈö ˈwo dho ˗a ˈka ˈˈsɛ ꞊kɔɔnmɛn ˗gɔ ˈˈkwɛnŋdhö. ˗Yö ˗kë ˈˈdhʋ̈ ˗dhɛ ˗kpɔɔ ˗ta. ˈˈKɛɛ Zuifö ˗nu ꞊dede ˈwo bhë, wo ˈti ˗da ˈˈsɛ ꞊kɔɔnmɛn ˗gɔ ˈkɔɔ, ˗yö kë ˈˈdhʋ̈ kö ˗dhii ˈyaa ˗dho ˗ya wo ˗bha, kö ˈwo ˗mɔn Pakö ˗bhöpë ˗bhö ˗sü ˗bha.
29 ˈDhɛ ˈö ˗kë ˈˈdhʋ̈, ˈyö Pidhatö ˗yö yö ˈˈkpɛnŋ ˈö˗ pö ˗an ˗dhɛ: «Ka˗ ˗pö ˗mën ˗wɔn yaa ˈö gɔndënën ˈö yö ˈö˗ ˗kë?»
30 ˈYö ˈwo˗ ˗yɔ bɔ ˗a ˗gɔ ˈwo˗ pö: «˗Ya kë ꞊dhɛ gɔndënën ˈö yö, yö ˈti ˈwɔn yaa kë* ˗be, yi ˈti ˗dho ˗a ˈkun kö ˈyi nu ˗a ˈka ü ˗kuu ˈˈdhiʋ̈.»
31 ˈYö Pidhatö ˗ya pö ˗an ˗dhɛ: «ˈDhɛ ˈö ˈˈdhʋ̈ ˈsa, kö ˗ka ˈdho ˗a ˈka kö ˈka ˗gban ka ˗bha ˈtɔŋ˗ ˗nu ˗ta ˈka za dɔ ˗a ˗bha.» ˈYö Zuifö ˗nu ˗wa pö ˗a ˗dhɛ: «˗A ˗dhɛ ˈyaa˗ ˗bha kö ˈyi˗ ˈsü yi ˗de ˈgü kö ˈyi mɛn zë.»
32 ˗Yö ˗kë ˈˈdhʋ̈ kö ˗wo ˈö Yesu ˗ya pö ˈö ˗gban ga ˗kɔ ꞊suu ˈö ˗dho ˗a wo ˗a ˗bha bhë ˗yö yökodhiʋ̈.
33 ˈDhɛ ˈö ˗kë ˈˈdhʋ̈, ˈyö Pidhatö ˗yö ˗da ˈkɔɔ* ˈzü, ˈyö Yesu ˗dhɛ ˈö˗ pö ˗a ˗dhɛ: «Bhi ˈnën ˈü ˗tɔ Zuifö ˗nu ˗bha ˗Gblüdë ˗ee?»
34 ˈYö Yesu ˗ya ˗yɔ bɔ ˈö˗ pö: «Dhɛɛˈˈ ˈü˗ sü ü ˗de ˈgü ˈü˗ kpɔ yö ˗mü ˗ee ɛɛnˈˈ pë ˈö mɛn ˈˈwɛɛ ˗nu ˗wa ꞊blɛɛ ü ˗dhɛ n ˗bha yö ˗mü?»
35 ˈYö Pidhatö ˗ya pö ˗a ˗dhɛ: «˗A ˗ga ˈü˗ wo bhë, Zuifö ˗mü n ˈka ˗ee? Ü ˗de ˗bha ˈˈsɛgümɛn ˗nu waa ˈˈsaabhomɛn ˗nu ˗gɔmɛn ˗nu ˗wa ü ˈkun ˗wa nu ü ˈka n ˗kuu ˈˈdhiʋ̈. ˈMën ˈü˗ ˗kë?»
36 ˈYö Yesu ˗ya ˗yɔ bɔ ˈö˗ pö: «N ˗man ˗Gblüdëdhɛ ˈyaa ˈˈkpɔnŋ ꞊taa yö. N ˗man ˗Gblüdëdhɛ ˗yö ˗kë ˈˈkpɔnŋ ꞊taa yö ˗be, n ˗man mɛn ˗nu ˗dho ˈkozë kö ˈwaa ˗dho n ˗da Zuifö ˗nu ꞊kwɛɛ˗. ˈˈKɛɛ ꞊dhɛ ˗kɔ ˈa˗ pö ˗a ˈka bhë ˗a ˈdhö, n ˗man ˗Gblüdëdhɛ yö ˈti ˈgo ˈˈkpɔnŋtaadhɛ ˈö yö ˗a ˈgü.»
37 ˈDhɛ ˈö˗ pö ˈˈdhʋ̈, ˈyö Pidhatö ˗ya pö ˗a ˗dhɛ: «ˈBha˗ pö ˈˈdhʋ̈ kö ü˗ ˗pö ˗gblüdë ˗mü ü ˈka ˗ee?» ˈYö Yesu ˗ya pö: «Yö ˈnën ˈö bhi ꞊dede ˈü˗ pö ˗ni ˈgü ꞊dhɛ ˗gblüdë ˗mü n ˈka bhë. Pë ˈö˗ ˗wɔn ˈgü ˈö ˈa nu ˈˈkpɔnŋ ꞊taa ˈyö ˗tɔ kö ˈa ˈˈdhɛ bho gagade ˗ta. Pë ˈö˗ ˗wɔn ˈgü ˈa bhɔ ˈyö bhë. Mɛn ˈˈpɛpɛ ˈwo gagade ˗bha ˈka, ˗wo wo ˈˈtʋ ˗to n ˗wo ˗bha.»
38 ˈYö Pidhatö ˗ya pö ˗a ˗dhɛ: «˗Mën ˈö ˗tɔ gagade?»
ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈö yö ˈˈkpɛnŋ ˈzü ˈö dho Zuifö ˗nu ˈˈpiʋ̈ ˈyö˗ pö ˗an ˗dhɛ: «Za ˗dɔ ˗a ˗bha ˗gɛn ˈö ˈa ˗dho ˗a yö ˗a ˗bha ˈyaa ˗dhö.
39 ˈˈKɛɛ ˗ya kë ꞊shiöŋ Pakö ˈwlaan˗ yi ˗ya ˗lo, ˗kasogümɛn ˈö ˈka ka ˗kɔ ˗yɛ ˗a ˗bha, a˗ ˗bho ka ˗dhɛ ˗kaso ˈgü, ˈö ˗ya kë ka ˗bha wɔkɔ ˈka. ˈDhɛ ˈö ˈˈdhʋ̈, ka˗ ˈˈpiʋ̈ kö ˈa n ꞊kwaa Zuifö ˗nu ˗bha ˗gblüdë ˗zü ka ˗dhɛ ˗ee?»
40 ˈYö ˈwo ˗gbla ˈzü ˈwo˗ pö: «˗Abin, ˈbha ˗dho ü ꞊kwaa mɛn ˈö bhë ˗a ˗zü, ˗bhö ü ꞊kwaa Badhabasö ˗zü ꞊ʒiaan!» ˈˈKɛɛ kö Badhabasö ˈö ˈˈdhʋ̈, ˗yö ˗kun ꞊kwaanmɛn ˈka.
-Zoto -a ˈˈpiʋ̈ -wɔn -nu
^ Ɛɛnˈˈ «ˈö˗ ˗gɔ ˗man ˗a ˈwëëdhö.»
^ Ɛɛnˈˈ«pëyaakëmɛn ˈyaa ˗mü ˗a ˈka.»
^ Glɛkö ˗wo ˈgü ˈyö ˗tɔ «ˈˈsɛ ꞊kɔɔnmɛn ˗gɔ ˈˈkwɛnŋdhö.»
