Nɔɔn˗ ˗së ˈsëëdhɛ ˈö Zan ˗ya ˗bɛnzë 2:1-25
2 ˗Dhɛkpaɔyi ˗yaaga ˗bha ˗naan ˈö dɔ ˗a ˈˈpiʋ̈, dhe ˈsü ˈwlaan˗ do ˗yö ˗kë Galile ˗pö ˈö ˈwo˗ ˗dhɛ Kana bhë ˗a ˈgü. Yesu dhe ˗yö ˗kë ˗a ˗ta.
2 ˗Wo Yesu waa ö ˗bha gwëëˈˈ ˗nu ˗an ˗dhɛ dhe ˈsü ˈwlaan˗ ˈö bhë ˗a ˗ta ˈpö.
3 ˈDhɛ ˈö we ˗yö ɲën, ˈyö Yesu dhe ˗ya pö ˗a ˗dhɛ: «˗An ˗bha we ˗ya ɲën.»
4 ˈˈKɛɛ ˈyö Yesu ˗ya pö ˗a ˗dhɛ: «Dhebɔnën, ko ˗bha ˗mën ˗wɔn ˈö˗ ˈgü?* N ˗man ˈˈtʋ̈ŋ yö ˈti ˗lo ꞊köŋ.»
5 ˈDhɛ ˈö ˗kë ˈˈdhʋ̈, ˈyö˗ dhe ˗ya pö mɛn ˗nu ˈwo kun we ˗gblü ˗ni ˈgü bhë ˗an ˗dhɛ: «Pë ˈˈpɛpɛ ˈö ˗dho ˗a pö ka ˗dhɛ, ˗kaa kë.»
6 Gbɔ ˈwo˗ ˗yö ˗kë ˗gwö ˈka* ˗a ˈˈsɔɔdo ˗kun dɔ ˗sü ˈka mü kö mɛn ˗nu ˗wo ˈˈyi ˈsü ˗an ˈgü ˗wo wo ˗kɔ ˈˈzu kö ˗wo ꞊kun pë ˗bhö, ꞊dhɛ ˗kɔ ˈö Zuifö ˗nu ˗wa ˗kë ˗a ˈka ˗an ˗bha wɔkɔ ˈgü ˗a ˈdhö. ˗A gbɔ ˗nu ˈwo ˈˈdhʋ̈, ˈˈgboŋgbo ˈˈgblʋ̈gblʋ̈* ˗ɲaan ꞊plɛ ɛɛnˈˈ ˗yaaga ꞊mɔɔn˗ ˗bha ˈö dho ˗a do ˈgü.
7 ˈYö Yesu ˗ya pö ˗an ˗dhɛ: «˗Ka ˈˈyi yö gbɔ ˗nu ˈwo yö ˗an ˈgü ˗yö ˗an pa.» ˈYö ˈwo ˈˈyi yö ˗an ˈgü ˈö ˈwo pa ˗trëntrëndhö.
8 ˈDhɛ ˈö ˗kë ˈˈdhʋ̈, ˈyö˗ pö ˗an ˗dhɛ: «˗Kaa ˈdɛdɛ ˈsü ˈka ˈdho ˗a ˈka ˈwlaan˗ ˈö yö ˗a ˈwɔnyëë˗ ꞊dhiaa.» ˈYö ˈwo˗ sü ˈwo dho ˗a ˈka ˗a ꞊dhiaa.
9 ˈYö˗ ˈwlaan˗ ˈwɔnyëë˗ ˗yö ˈˈyi ˈwo˗ ˗gla we ˈgü bhë ˗a din ˗ga. ˈDhɛ ˈö we ˈö bhë ˈö go ˗a ˗bha ˈyaa kun ˗a dɔ ˗ni ˈgü, ˈˈkɛɛ we ˗gblümɛn ˗nu ˈwo nu ˗a ˈka ˗a ꞊dhiaa bhë ˗wa ˗dɔ. ˈDhɛ ˈö ˗kë ˈˈdhʋ̈, ˈyö ˈwlaan˗ ˈwɔnyëë˗ ˈö bhë ˈö dhesügɔn ˗dhɛ
10 ˈyö˗ pö ˗a ˗dhɛ: «Mɛn ˗nu ˗wa ˈwlaan˗ ˗ya, we din ˗së ˗sü ˈnën ˈwo˗ nu ˗dhɛŋ ˗nu ˗dhɛ ˗blɛɛsü, ˈyö ꞊yaa ˗an ˈkun, ˈyö ˈwo nu ˗a ˗dhɛ ˈö˗ din ˈyaa ˗së ˗a ˈka ꞊taabha. ˈˈKɛɛ ˈyö bhi ˗zë ˈü we din ˗së ˗sü to ü ˗gɔ ˈö dho ˈö yö ˗a ˈka ˈˈtʋ̈ŋ ˈö yö ˗a ˗bha ˗ee?»
11 Yesu ˗yö ˈwɔn ˗nu ˈwo bhë ˗an ˗kë Kana Galile ˗sɛ ˈgü, ˈyö ˗kë ˗a ˗bha ˗dhidha ˗blɛɛsü ˈö˗ ˗kë ˈö ö ˗bha ˈˈpiigbɩɩdhɛ ˗zɔn ˗a ˈka, ˈyö˗ ˗bha gwëëˈˈ ˗nu ˗wo wo ˗zo yö ˗a ˗dhɛ.
12 ˈDhɛ ˗ya ö bo kë ˗sü ˈka ˈˈdhʋ̈, ˈyö Yesu waa ö dhe, ö ꞊dhegblü ˗nu waa ö ˗bha gwëëˈˈ ˗nu ˈwo ꞊yɔɔ ˈwo dho Kapɛɛnaɔmö, ˈˈkɛɛ wo ˈti ˗dhɛkpaɔyi ꞊va kë mü.
13 ˗A ˈˈtʋ̈ŋ ˈö ˈˈdhʋ̈ ˗a ˈgü kö Zuifö ˗nu ˗bha Pakö yi ˗ya yö ꞊klöö˗, ˈyö Yesu ˗yö dho Zedhizadhɛmö.
14 ˈDhɛ ˈö dho ˗Zlan ˗dhɔkë ˗a ˈgü ˗kɔ ˈgü, ˈyö ˗kpan ˈˈdhoodɔmɛn ˗nu ˈö ˈwo kun ˗du ˗nu, ˈˈbhlaa ˗nu, ˗toŋ ˗nu ˗an ˈˈdhoodɔ ˗ni ˈgü mü ˗an -bha. ˗Yö ˗kpan ˈpö ˈwëëga ˗tabɔmɛn ˗nu ˗bha kö ˗wo ˈɲaannu ˗sü ˈka wo ˗bha ˈtaablö ˗nu ˈˈdhiʋ̈.
15 ˈDhɛ ˈö bhuʋ̈ga ˗nu sü ˈö ˗klaaga do ˗yö ˗kë ˗an ˈka, ˈyö mɛn ˈˈpɛpɛ ˈwo kun ˈˈdhoodɔ ˗ni ˈgü bhë waa wo ˗bha ˈˈbhlaa ˗nu, ˗du ˗nu ˗an ˗kë, ˈö wo yö ˈˈkpɛnŋ. ˈYö mɛn ˗nu ˈwo kun ˈwëë˗ ˗ta ˗bɔ ˗ni ˈgü bhë ˗an ˗bha ˈwëë˗ ˗piö ˈˈkpaan ga ˗nu ꞊wɛnŋ ˈˈshia˗, ˈö ˗an ˗bha ˈtaablö ˗nu ˈˈgblëënnu.
16 ˈYö˗ pö mɛn ˗nu ˈwo kun ˗toŋ ˗nu ˈˈdhoodɔ ˗ni ˈgü bhë ˗an ˗dhɛ: «Pë ˗nu ˈwo yö ˗ka ˗an bho ˈyö! ˈKaa ˗dho n Dë ˗bha ˈkɔ kë ˈˈdhoodɔdhɛ ˈka.»
17 ˈDhɛ ˈö ˗kë ˈˈdhʋ̈, ˈyö˗ ˗bha gwëëˈˈ ˗nu ˗zo ˗yö ˗buö pë ˈö ˗bɛnzë ˗sü ˈka ˗Zlan ˗Wo ˈgü ˗a ˈka. ˗Yö ˗bɛnzë ˗sü ˈka mü ꞊dhɛ: «Ü ˗bha ˈkɔ ˗dhɔ* ˈö n ˈgü ˗yö ˗dho kë ꞊dhɛ ˈˈshiʋ̈ ˈö n ˈgü ˗a ˈdhö.»
18 ˈYö Zuifö ˗nu ˗wa pö ˗a ˗dhɛ: «˗Bhö ˗dhidha do kë kö ˗ya ˗zɔn yi ˗dhɛ ꞊dhɛ ü dua ˗mü kö pë ˗nu ˈü ˗an kë ˗ni bhë, ˈü ˗an kë.»
19 ˈYö Yesu ˗ya pö ˗an ˗dhɛ: «˗Zlan ˗dhɔkë ˗a ˈgü ˗kɔ ˈö yö ˗kaa ˈwü, a ˗dho ˗a dɔ ˈzü ˗dhɛkpaɔyi ˗yaaga ˈˈkpaan ˈka.»
20 ˈDhɛ ˈö˗ pö ˈˈdhʋ̈, ˈyö Zuifö ˗nu ˗wa pö ˗a ˗dhɛ: «ˈKɔ ˈö yö ˗wa ˗dɔ ˗kwɛ ˗kɔŋ ˗yiishiö ö ga ˈˈsɔɔdo (46) ˈˈpiʋ̈, ˈyö ˈü˗ pö ü ˗dho ˗a dɔ ˈzü ˗dhɛkpaɔyi ˗yaaga ˈˈpiʋ̈ ˗ee?»
21 ˈˈKɛɛ ˗Zlan ˗dhɔkë ˗a ˈgü ˗kɔ ˈö kun ˈˈwɩ ˗ni ˈgü ˗a ˈka bhë yö ˈnën ˗tɔ yö ꞊dede.*
22 ˈDhɛ Yesu ˗yö go ga ˈgü ꞊taabha, ˈyö˗ ˗bha gwëëˈˈ ˗nu ˗zo ˗yö ˗buö ꞊dhɛ ˗yö ˗kun ˗a pö ˗ni ˈgü ˈˈdhʋ̈, ˈyö ˈwo ˈdhaŋ˗ bho pë ˈö ˗bɛnzë ˗sü ˈka ˗Zlan ˗Wo ˈgü waa pë ˈö Yesu ˗ya pö ˗an ˈˈdhiʋ̈.
23 ˈDhɛ ˈö kun Pakö ˈwlaan˗ ˗ta Zedhizadhɛmö, mɛn ꞊va ꞊dede ˗wo wo ˗zo ˗yö ˗a ˗dhɛ ˗dhidha ˗nu ˈö ˗an ˗kë ˈö ˗an ˈˈɲan ˗yö ˗da ˗an ˈgü bhë ˗an ˗wɔn ˈgü.
24 ˈˈKɛɛ Yesu ˈyaa kun ˈdhaŋ˗ bho ˗ni ˈgü ˗an ˈˈdhiʋ̈, ˗a ˗gɛn ˗mü ꞊dhɛ ˗yö ˗an ꞊gban ˈˈpɛpɛ ˗dɔ ˗së ˈka.
25 ˗A ˗bhawɔn ˈyaa kun mɛn ˈˈwɛɛ ˈbhaa ˗bha kö ˗kɔ ˈö mɛnbhɩɩdhe ˈdhö˗ ˈka ˗ya ˈgü ˈˈpʋ ˗a ˗dhɛ, ˈyö ˗tɔ pë ˈö mɛn zuʋ̈ˈˈ ˈˈpiʋ̈ ˗ya ˗dɔ.
-Zoto -a ˈˈpiʋ̈ -wɔn -nu
^ Ɛɛnˈˈ «˗a ˗dhɛ ˗mɛɛn ˈö ˗gban ko ˗bha?» Dhɛɛˈˈ ˈkpɔ ˗kɔ ˈö Yesu ˗ya kpɔ ˗a ˈka bhë, ˗an ˗bha ˈwɔn blɛɛˈˈ ˗kɔ ˈbhaa ˗mü. ˗Ya ˗kë ˈˈdhʋ̈ kö ˈö˗ ˗zɔn ꞊dhɛ ö ˈti ˈˈwɩ pë ˈö ö dhe ˗ya pö bhë ˗a ˗bha. ˗A pö ˈö˗ wo «dhebɔnën» bhë, yö ˈti ö dhe ꞊bhlëë ˗shiö.
^ Ɛɛnˈˈ «kuun gbɔ.»
^ ˗A ˈˈgboŋgbo ˈö ˈˈdhʋ̈, ˗yö ˗kë ꞊dhɛ ˗a ˗ɲaan do ˈnën ˗tɔ ˈlitrö ˗kɔŋ ꞊plɛ ö ga ꞊plɛ (22).
^ Ɛɛnˈˈ «˗a ˗wɔn ˗faan.»
^ Ɛɛnˈˈ «˗a ˗de bun.»
