Nɔɔn˗ ˗së ˈsëëdhɛ ˈö Zan ˗ya ˗bɛnzë 20:1-31
20 ˈDhɛ ˈö ꞊Glooyi ˗yö ˗ʒiö, ˗a ˗dhɛkpaɔyi ˈö dɔ ˗a ˈˈpiʋ̈ bhë ˗a ˈka, ˈyö Madhi ˈö gö Madala bhë ˈö ˗soo dhiapiʋ̈ ˗kpo tii ˈgü ˈö dho blɔɔndhɛ ˈö ˈwo Yesu ˗wɔ ˗a ˗bha bhë ˗a ˈgü. ˈDhɛ ˈö ˗lo mü, ˈyö˗ yö ꞊dhɛ ˗gwö kpö ˈkpikpi˗ ˈö kun Yesu blɔɔn˗ ˈˈdhiʋ̈ bhë ꞊waa˗ bho mü.
2 ˈYö nu ˗bia ˈka Simɔn Piɛɛ waa gwëëˈˈ do ˗sü ˈö˗ ˗dhɔ kun Yesu kë ˗ni ˈgü bhë ˗an ˈˈpiʋ̈, ˈyö˗ pö ˗an ˗dhɛ: «˗Wa kwa Dëmɛn ꞊glöö ˈsü blɔɔn˗ ˈwo˗ ˗wɔ ˗a ˗bha bhë ˗a ˈgü. ˗Dhɛ ˈö ˈwo dho ˈwo˗ ˗wɔ ˗a ˗bha ˈyaa˗ ˗dhɛ dɔ.»
3 ˈDhɛ ˗kë ˈˈdhʋ̈, ˈyö Piɛɛ waa gwëëˈˈ do ˗sü ˈö bhë ˈwo ˗ʒiö ˈwo dho blɔɔndhɛ ˈö bhë ˗a ˈgü.
4 ˗An ꞊plɛ ꞊gban ˗kun ˗bialö ˗ni ˈgü wo ˈˈkwöö, ˈˈkɛɛ ˈyö gwëëˈˈ do ˗sü ˈö bhë ˗a ˗gɛn ˗yö ˗kë ˈˈgbɩɩ˗ ˈö ˗ʒiö ˗a ˈka Piɛɛ ˗ta, ˈyö dho ˈö ˗lo mü ˗a ˈˈdhiʋ̈.
5 ˈDhɛ ˈö ö ꞊klʋŋ ˈö ˗dhɛ ˗ga ˈdhɛ ˈwo Yesu ˗wɔ ˗a ˗bha bhë ˗a ˈgü, ˗yö ˗kpan yɩɩga sɔ ˗nu ˗bha kö ˗wo ˗lo ˗sü ˈka mü, ˈˈkɛɛ yö ˈti ˗da mü.
6 ˈDhɛ ˈö ˗kë ˈˈdhʋ̈, ˈyö Simɔn Piɛɛ ˈö to ꞊taabha bhë ˈö nu ˈpö, ˈyö ˗da blɔɔn˗ ˈö bhë ˗a ˈgü, ˈö ˗kpan yɩɩga sɔ ˗nu ˈwo bhë ˗an ˗bha mü.
7 Sɔ ˈdhɛ ˈö kun Yesu ˗gɔ ˗bha bhë, yö ˗zë ˈyaa kun sɔ ˗nu ˈwo to ˗an ˈˈpiʋ̈, ˗a kpö ˗kun kë ˗sü ˈka, ˈö kun ˗ya ˗sü ˈka ö ˗de ˗ta.
8 ˈYö gwëëˈˈ ˈdhɛ ˈö ˗lo Yesu blɔɔndhɛ bhë ˗a ˈgü ˗blɛɛsü bhë, yö ˗de ˈpö ˈö ˗da mü. Pë ˈö˗ ˈˈɲan ˗yö ˗da ˗a ˈgü bhë, ˗ya ˗kë ˈö ö ˗zo yö pë ˈwo˗ pö ˗an ˗dhɛ bhë ˗a ˗dhɛ.
9 ˈÖ ˗kë ˈˈdhʋ̈ kö ˗Zlan ˗Wo ˈˈpian ˈö˗ pö ꞊dhɛ ˗a dua ˗mü kö ˗yö ˈgo ga ˈgü bhë, wo ˈti˗ ˈgüman ꞊köŋ.
10 ˈYö gwëëˈˈ ˗nu bhë ˈwo wo ꞊yɛɛ ˗kë ˈwo dho wo ˗gɔ ˈˈkwɛnŋdhö.
11 Madhi ˗zë ˗yö ˗to ˈduaannu ˗sü ˈka blɔɔndhɛ ˈö bhë ˗a ˈˈsuee mü, kö ˗yö ˈˈgbʋ bɔ ˗ni ˈgü. ˈDhɛ ˈö kun ˈˈgbʋ bɔ ˗ni ˈgü, ˈyö ö ꞊klʋŋ ˈö ˗dhɛ ˗ga blɔɔn˗ ˈö bhë ˗a ˈgü,
12 ˈyö ˗kpan ˈˈkiö ꞊plɛ ˗bha kö ˗wo ˈɲaannu ˗sü ˈka ˗dhɛ ˈö Yesu ꞊glöö ˗yö kun wɔ ˗sü ˈka ˗a ˗bha bhë ˗a ˈgü, kö sɔ ˈˈpuu ˗yö ˗an ˗bha. ˗A mɛn do ˗kun ˗dhɛ ˈö˗ ˗gɔ ˗yö kun ˗a ˗bha bhë ˗a ˈgü, ˈyö˗ mɛn do ˗yö kun ˗dhɛ ˈö˗ ˗gɛn ˗nu kun ˗a ˗bha ˗a ˈgü.
13 ˈYö ˈwo˗ pö ˗a ˗dhɛ: «Dhebɔnën, ˈmën ˈü˗ ˈˈgbʋ bɔ?» ˈYö˗ pö ˗an ˗dhɛ: «˗Wa n Dëmɛn ꞊glöö ˈsü ˗dhɛ ˈö yö ˗a ˈgü, ˈdhɛ ˈwo˗ ˗wɔ ˗a ˗bha ˈmaan˗ dɔ.»
14 ˈDhɛ ˈö ö bo ˗a ˗pö ˈˈdhʋ̈ ˗sü ˈka ˈö ꞊slëë ö ˗zü, ˈyö ˗kpan Yesu ˗bha kö ˗yö ˈduaannu ˗sü ˈka mü, ˈˈkɛɛ ˈyaa kun ˗a ˈwɔn dɔ ˗ni ˈgü ꞊dhɛ Yesu ˗mü.
15 ˈYö Yesu ˗ya pö ˗a ˗dhɛ: «Dhebɔnën, ˈmën ˈü˗ ˈˈgbʋ bɔ? ˈDe ˈü˗ mɛɛnˈˈ ˗ni ˈgü bhë?» ˗Ya ˗ga ˗be ꞊dhɛ ˈˈdhüdhɛɛdhɛ ˈö bhë ˗a ˗yökëmɛn ˗mü. ˈYö˗ pö ˗a ˗dhɛ: «N dë, ˗ya kë ꞊dhɛ bhi ˈnën ˈü˗ ꞊glöö sü, ˈdhɛ ˈü˗ ˗wɔ ˗a ˗bha ˗a pö n ˗dhɛ, a ˗dho ˈdho mü ˈa˗ sü.»
16 ˈYö Yesu ˗ya pö ˗a ˗dhɛ: «Madhi!» ˈDhɛ ˈö ꞊slëë ö ˗zü, ˈyö˗ pö ˗a ˗dhɛ Eblö ˗wo ˈgü: «Labuni!» (˗a ˗gɛn ˈnën ˈö ˗tɔ «˗Gɔmɛn!»)
17 ˈYö Yesu ˗ya pö ˗a ˗dhɛ: «˗Yö ˈto ˈˈdhʋ̈ ˈü ü ꞊kwaa n ˗zü, ˈyö sü ꞊dhɛ n ˈti ˈdho n Dë ˈˈpiʋ̈ ꞊köŋ. ˗Bhö ˈdho ꞊ʒiaan n ꞊dhegblü ˗nu ˈˈpiʋ̈ kö ˈü˗ pö ˗an ˗dhɛ: ‹A ˈdho ˗ni ˈgü n Dë ˈö ka Dë ˈka ˈpö, n ˗man ˗Zlan ˈö ka ˗bha ˗Zlan ˈka ˈpö bhë ˗a ˈˈpiʋ̈.›»
18 ˈYö Madhi Madelɛnö ˗yö dho ˈö ˈwɔn ˈö bhë ˗a ꞊blɛɛ Yesu ˗bha gwëëˈˈ ˗nu ˗dhɛ ˈö˗ pö: «ˈMan ˗kpan kwa Dëmɛn ˗bha!» ˈYö ˈwɔn ˈö Yesu ˗ya ꞊blɛɛ ˗a ˗dhɛ bhë ˈö˗ ꞊blɛɛ ˗an ˗dhɛ.
19 ˗Dhɛkpaɔyi ꞊dede ˈö ˗kë ˗dhɛkpaɔyi ˈö dɔ ꞊Glooyi ˈˈpiʋ̈ bhë ˗a ˈka, kö ˈˈbin ˗ya ˈmën, Yesu ˗bha gwëëˈˈ ˗nu ˗wo ˗kun wo ˈkwëëdhö ˈkɔ do ˈbhaa ˈgü. ˗A ˈkɔ ˈˈkwee ˗nu ˗kun ta ˗sü ˈka ˈyö sü ꞊dhɛ ˗wo ˗kun ˈˈsuʋ̈ ˗ni ˈgü Zuifö ˗nu ˗gɔ. ˈYö Yesu ˗yö nu ˈö dɔ ˗an ꞊zinŋgü mü ˈö˗ pö ˗an ˗dhɛ: «Zuʋ̈waannusü ˗yö kë ka ˗gɔ.»
20 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö ö ˗kɔ ˗nu waa ö ˈˈsɛn ˈˈpiʋ̈dhɛ ˗nu ˗zɔn ˗an ˗dhɛ. ˈDhɛ ˈö ˗kë ˈˈdhʋ̈, ˈyö˗ ˗bha gwëëˈˈ ˗nu zuʋ̈ˈˈ ˈˈgblü ˗yö ˗dhi ˗kpan ˈwo wo Dëmɛn ˗bha bhë ˗a ˗wɔn ˈgü.
21 ˈYö Yesu ˗ya pö ˗an ˗dhɛ ˈzü: «Zuʋ̈waannusü ˗yö kë ka ˗gɔ. ˗Kɔ do ˈö n Dë ˗yö n bɔ ˗a ˈka bhë, man ˗de ˈpö ˈman ˈka bɔ ˈˈdhʋ̈.»
22 ˈDhɛ ˈö˗ pö ˈˈdhʋ̈, ˈyö ö ˈˈtee ˗blü ˗an ˗bha ˈö˗ pö ˗an ˗dhɛ: «˗Zuu ˈˈslʋ̈ʋ̈slʋ̈ ˗yö kë ka ˗ta.
23 Mɛn ˈˈoo ˗mɛn ˈö ˈka˗ ˗bha ˈwɔn yaa ˗bhawɔn ˈto, kö ˗a ˗bha ˈwɔn yaa ˗bhawɔn ˗ya ˈto. ˈYö mɛn ˈˈoo ˗mɛn ˈö ka ˈti˗ ˗bha ˈwɔn yaa ˗bhawɔn ˈto, kö ˗a ˗bha ˈwɔn yaa ˗bhawɔn ˈyii ˈto.»
24 ˈˈKɛɛ ˈˈtʋ̈ŋ ˈö Yesu ˗yö nu ˗a ˈka ˈˈdhʋ̈ bhë kö Toma ˈö ˗kë ˗a ˗bha bɔmɛn ˗nu ˗kɔŋ do ö ga ꞊plɛ ˈwo bhë ˗a mɛn do ˈka, ˈö ˈwo˗ ˗dhɛ ˈpö ˗Flɛɛn bhë, ˈyaa ˗an ˈˈpiʋ̈ mü.
25 ˈYö Yesu ˗bha gwëëˈˈ ˗nu ˈwo to ˈwo˗ pö ˗a ˗dhɛ: «ˈYa ˗kpan kwa Dëmɛn ˗bha!» ˈˈKɛɛ ˈyö Toma ˗ya pö ˗an ˗dhɛ: «N ˈˈɲan yö ˈti ˗kpan ˈˈpoŋtɩ pinŋ˗ ˗nu ˈwo˗ ˗kɔ ˗nu ˗bha bhë ˗an ˗bha, n ˈti n ˗kɔnënga ˗da ˗a pinŋ˗ ˗nu bhë ˗an ˈgü ɛɛnˈˈ n ˈti n ˗kɔ ˗da ˗a zua ˗pinŋ ˈö˗ ˈˈsɛn ˈˈpiʋ̈ bhë ˗a ˈgü, n ˈti ˗dho ˗a ˈsü gagade ˈka.»
26 ˈDhɛ ˈö ˗dhɛkpaɔyi ˈˈsaaga ˗yö ˗ʒiö, Yesu ˗bha gwëëˈˈ ˗nu ˗wo ˗kun wo ˈkwëëdhö ˈzü ˈkɔ do ˈbhaa ˈgü, ˈö Toma ˗yö kun ˗an ꞊kee˗. ˈKö ˗kë ꞊dhɛ ˈˈkwee ˗kun ta ˗sü ˈka, Yesu ˗yö ˗nu ˈö ˗da ˗an ꞊zinŋgü mü ˈö˗ pö: «Zuʋ̈waannusü ˗yö kë ka ˗gɔ.»
27 ˈYö go mü ˈö˗ pö Toma ˗dhɛ: «˗Bhö ü ˗kɔnënga ˗da yö, ˈü n ˗kɔdhɛ ˗nu ˗ga. ˗Bhö ü ˗kɔ ˗da ˈpö n ˈˈsɛn ˈˈpiʋ̈, kö ˈü ü bo ˗dɔ ˈdudhö ˗sü ˈka, kö ˈü˗ ˈsü gagade ˈka.»
28 ˈYö Toma ˗ya ˗yɔ bɔ ˈö˗ pö: «N Dëmɛn, n ˗man ˗Zlan!»
29 ˈYö Yesu ˗ya pö ˗a ˗dhɛ: «ˈDhɛ ˈö ˗kë ꞊dhɛ ˈbha ˗kpan n ˗bha bhë, yö ˈnɛn ˈö˗ ˗wɔn ˈgü ˈü˗ sü gagade ˈka ˗ee? Mɛn ˗nu ˈö ˗an ˈˈɲan yö ˈti ˗kpan ˗a ˗bha ˈö ˈwo˗ sü gagade ˈka bhë, ˗an ˗bha ˗yö ˗së.»
30 Gagade ˈka, Yesu ˗yö ˗dhidha ꞊va ˈbhaa ˗nu ˗kë ö ˗bha gwëëˈˈ ˗nu ˈˈɲan ˈˈdhiʋ̈ ˈö ˈwaa ˗bɛnzë ˗sü ˈka ˈsëëdhɛ ˈö yö ˗a ˈgü.
31 ˈˈKɛɛ pë ˗nu ˈwo bhë ˗wo ˗an ˗bɛnzë ˈˈdhʋ̈ kö ˈka ka ˗zo yö ꞊dhɛ Yesu ˈnën ˈö ˗tɔ Klito, ˗Zlan Gbö, kö ka ˗bha ˗zo ˗yö ˗a ˗dhɛ ˗sü ˗wɔn ˈgü ˈka ˗këdhösü ꞊slɔɔ ˗a ˈtɔ ˈgü.
