Nɔɔn˗ ˗së ˈsëëdhɛ ˈö Zan ˗ya ˗bɛnzë 21:1-25
21 ˈDhɛ ˈö ˈwɔn ˗nu ˗wo wo bo kë ˗sü ˈka ˈˈdhʋ̈, ˈyö Yesu ˗yö ö ˗de ˗zɔn ˈzü ö ˗bha gwëëˈˈ ˗nu ˗dhɛ Tibedhiadö ꞊weeyi ˈˈsuee. ˗Kɔ ˈö ö ˗de ˗zɔn ˗a ˈka ˗an ˗dhɛ ˈyö ꞊nɛn:
2 Simɔn Piɛɛ, Toma (ˈö ˈwo˗ ˗dhɛ ˈpö ˗Flɛɛn), Natanaɛdhö ˈö go Kana Galile ˗sɛ ˈgü, Zebede gbö ˗nu waa Yesu ˗bha gwëëˈˈ ꞊plɛ ˈˈwɛɛ ˈbhaa ˗nu ˗wo ˗kun wo ˈko ꞊bhaa.
3 ˈYö Simɔn Piɛɛ ˗ya pö ˗an ˗dhɛ: «A ˈdho ˗ni ˈgü ˈˈkplʋ̈ ˗zuö.» ˈYö ˈwo˗ pö ˗a ˗dhɛ: «Yi ˗dho ʒiö ü ꞊kee˗.» ˈYö ˈwo dho ˈwo ˗da ˈˈyitagɔ ˈgü, ˈˈkɛɛ gbeŋ ˈö bhë ˗a ˈka wo ˈti pë ˈbhaa ˈkun.
4 ˈDhɛ ˈö ˗dhɛ ˈdhö ꞊kpɔɔ ˗ni ˈgü, ˈyö Yesu ˗yö nu ˈö dɔ ˈˈyi ˈˈkpɔnŋ ˈˈdhiʋ̈ mü, ˈˈkɛɛ ˗a ˗bha gwëëˈˈ ˗nu ˈwaa kun ˗a ˈwɔn dɔ ˗ni ˈgü ꞊dhɛ yö ˗mü.
5 ˈYö Yesu ˗ya pö ˗an ˗dhɛ: «N ˗man ˈnën ˗nu, pë ˈbhaa* ˈyaa ka ˗gɔ kö ˈka˗ ˗bhö, ˈyaa ˈˈdhʋ̈ ˗ee?» ˈYö ˈwo˗ ˗yɔ bɔ ˈwo˗ pö: «˗Yö ˈˈdhʋ̈!»
6 ˈYö˗ pö ˗an ˗dhɛ: «˗Ka ˈˈkplʋ̈ ˗zuö ka ˗kɔ ˗së ˈgü ꞊ʒiaan, ka ˗dho ˗a ˈbhaa ˈkun.» ˈDhɛ ˈö ˗kë ˈˈdhʋ̈, ˈyö ˈwo˗ ˗zuö mü, ˈˈkɛɛ wo ˈti ꞊mɔɔn˗ ˗bha kö ˗wa ˈˈgan ˗wa bho ˈˈyi ꞊bhaa, ˈyö sü ꞊dhɛ ˈyuö˗ ꞊va ꞊dede ˗kun ˗a ˈgü.
7 ˈYö gwëëˈˈ ˈdhɛ ˈö˗ ˗dhɔ ˗yö Yesu ˗kë bhë ˈö˗ pö Piɛɛ ˗dhɛ: «Dëmɛn ˗mü!» ˈDhɛ ˈö Simɔn Piɛɛ ˗ya man ꞊dhɛ Dëmɛn ˗mü, ˈyö ö ˗bha sɔ ˈö˗ ˗da sɔ ˗ta bhë ˗a ˗da ˈyö sü ꞊dhɛ sɔ ˈyaa kun ˗a ˗bha, ˈyö ˗puö ꞊weeyi ꞊bhaa.
8 ˈˈKɛɛ gwëëˈˈ ˗nu ˈwo to bhë, ˗wo ˗nu ˈˈyitagɔ ˈˈtɩtɩ ˈö bhë ˗a ˈgü, kö ˈˈkplʋ̈ ˈö ˈyuö˗ ˗ya pa bhë ˗wa gblʋʋˈˈ ˗ni ˈgü, ˗a ˗gɛn ˗mü ꞊dhɛ ˈwaa kun ˈˈyi ˈˈkpɔnŋ ˈka ꞊gblɛɛn, ˗wo ˗kun ˈmɛntrö ˈö ˗mɔn ˗kɔŋ ˈˈseishiö (90) ˗bha ˗a -naan ꞊taa.
9 ˈDhɛ ˈwo go ˈˈyitagɔ ˈgü ˈwo ꞊yɔɔ, ˈyö ˈwo ˗kpan ˈˈshiʋ̈ ˈwo˗ ˗ya ˈshiaan˗ ˈka ˗a ˗bha kö ˈyuö˗ ˗ya ˗ta, kö ˈblu˗ ˗ya ˈˈsuee ˈpö.
10 ˈYö Yesu ˗ya pö ˗an ˗dhɛ: «ˈYuö˗ ˗nu ˈka ˈgo ˗ni ˈgü ˗an ˈkun bhë, ˗ka nu ˗a ˈbhaa ˈka yö.»
11 ˈDhɛ ˈö˗ pö ˈˈdhʋ̈, ˈyö Simɔn Piɛɛ ˗yö ˗da ˈˈyitagɔ ˈgü ˈö ˈˈkplʋ̈ ˈö bhë ˗a ˗gan ˈö˗ ˗ya ˈˈshia˗, kö ˗yö pa ˗sü ˈka ˈyuö˗ ˈˈgblʋ̈ʋ̈gblʋ̈ ˗nu ˈka. ˈYuö˗ këŋ do ö ˗kɔ ˈˈsoodhu waa˗ ˗yaaga (153) ˈnën ˈwo kun ˗a ˈgü. ˈKö ˗kë ꞊dhɛ ˗wo ˗kun ꞊va ꞊dedewo, ˗an ˗bha ˈˈkplʋ̈ yö ˈti ˈˈblë.
12 ˈYö Yesu ˗ya pö ˗an ˗dhɛ: «˗Ka nu kö ˈka pë ˗bhö.» ˗A ˗bha gwëëˈˈ ˗nu bhë, ˗a mɛn ˈˈwɛɛ ˈbhaa ˈyaa kun ˗mɔn ˗ni ˈgü ˗a ˗bha kö ˗ya dhɛɛˈˈ ˈkpɔ ˗ya pö: «De ˗mü ü ˈka?» ˈyö ˗tɔ ˗wa ˈwɔn ˗dɔ ꞊dhɛ Dëmɛn ˗mü.
13 ˈYö Yesu ˗yö nu ˈö ˈblu˗ sü ˈö˗ nu ˗an ˗dhɛ, ˈyö pë do ˈö bhë ˗a ˗kë ˈyuö˗ ˈka ˈpö.
14 ˈDhɛ ˈö Yesu ˗yö go ga ˈgü, ˗a ˗bha ö ˗de ˗zɔn ö ˗bha gwëëˈˈ ˗nu ˗dhɛ ˗sü ˗gɛnɲaan ˗yaaga ˗bha ˗naan ˈnën ˈö bhë.
15 ˈDhɛ ˈwo wo bo pë ˗bhö ˗sü ˈka, ˈyö Yesu ˗ya pö Simɔn Piɛɛ ˗dhɛ: «Simɔn Zan gbö, n ˗dhɔ ˗yö ü ˗kë ˈö ˗ʒiö ˗a ˈka pë ˗nu ˈwo yö ˗an ˗ta ˗ee?» ˈYö˗ ˗yɔ bɔ ˗a ˗gɔ ˈö˗ pö: «꞊Ii, n Dëmɛn, bhi ꞊dede ˈü˗ ˈwɔn ˗dɔ ꞊dhɛ ü ˗wɔn ˗yö n ˗gɔ ˈˈgbɩɩ˗.» ˈYö Yesu ˗ya pö ˗a ˗dhɛ: «˗Bhö ˗bhöpë nu n ˗man ˈˈbhlaanën ˗nu ˗dhɛ.»
16 ˈYö˗ pö ˈzü Piɛɛ ˗dhɛ ꞊plɛ ˗naan wo: «Simɔn Zan gbö, n ˗dhɔ ˗yö ü ˗kë ˗ee?» ˈYö Piɛɛ ˗ya ˗yɔ bɔ ˈö˗ pö: «꞊Ii, n Dëmɛn, ˈü˗ ˈwɔn ˗dɔ ꞊dhɛ ü ˗wɔn ˗yö n ˗gɔ ˈˈgbɩɩ˗.» ˈYö˗ pö ˗a ˗dhɛ: «˗Bhö n ˗man ˈˈbhlaanën ˈsɛɛn˗ ˗nu ˗maan kë.»
17 ˈYö Yesu ˗ya pö Piɛɛ ˗dhɛ ˈzü ˗yaaga ˗bha ˗naan wo: «Simɔn Zan gbö, n ˗wɔn ˗yö ü ˗gɔ ˈˈgbɩɩ˗ ˗ee?» ˈYö Piɛɛ ˗ta ˗yö ˗kë ˗saa ˗a dhɛɛˈˈ ˈkpɔ ˈö Yesu ˗ya wo ˗gɛnɲaan ˗yaaga ˗naan wo ˈö˗ pö: «N ˗wɔn ˗yö ü ˗gɔ ˈˈgbɩɩ˗ ˗ee?» bhë ˗a ˗wɔn ˈgü. ˈDhɛ ˈö ˗kë ˈˈdhʋ̈, ˈyö Piɛɛ ˗ya pö Yesu ˗dhɛ: «N Dëmɛn, ˈwɔn ˈˈwɛɛ ˈbhaa ˈyaa ˗bin ˗sü ˈka ü ˗gɔ. Ü˗ ˈwɔn ˗dɔ ꞊dhɛ ü ˗wɔn ˗yö n ˗gɔ ˈˈgbɩɩ˗.» ˈYö Yesu ˗ya pö ˗a ˗dhɛ: «ˈDhɛ ˈö ˈˈdhʋ̈, ˗bhö ˗bhöpë nu n ˗man ˈˈbhlaanën ˈsɛɛn˗ ˗nu ˗dhɛ.
18 A˗ ˗pö ü ˗dhɛ gagade ˈka ꞊dhɛ, ˈdhɛ ˈü kun wlüünën ˈka, bhi ꞊dede ˈnën ˈü kun ü ˗bha sɔ ˗da ˗ni ˈgü ü ˗bha, ˈö ˈü dho ˗dhɛ ˈö ˗dhi ü ˗dhɛ ˗a ˗bha. ˈˈKɛɛ ˈbha kë zii yi ˈbhaa ˈka, ü ˗dho ü ˗gbe ˈˈpʋ ˈö mɛn ˈˈwɛɛ ˗yö sɔ ˗da ü ˗bha, ˈö dho ü ˈka ˗dhɛ ˈö ˈbhaa˗ ˈˈpiʋ̈ ˈü ˈdho ˗a ˗bha ˗a ˈgü.»
19 ˗A pö ˈö˗ wo ˈˈdhʋ̈ bhë, ˗ya ˗kë ˈˈdhʋ̈ kö ga ˗kɔ ꞊suu ˈö Piɛɛ dho ˗a wo kö ˗Zlan ˈtɔ ˗yö bhɔ bhë ˈö˗ ˗zɔn. ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö˗ pö Piɛɛ ˗dhɛ: «˗Bhö ʒiö n ꞊kee˗ ˗kplawo.»
20 ˈDhɛ ˈö Piɛɛ ˗yö ꞊slëë ö ˗zü ˈö ˗dhɛ ˗ga, ˈyö gwëëˈˈ ˈdhɛ ˈö˗ ˗dhɔ ˗yö Yesu ˗kë bhë ˗a yö kö ˗yö ʒiö ˗ni ˈgü ˗an ˈˈpiʋ̈. Gwëëˈˈ ˈö ˈˈdhʋ̈ bhë, yö ˈnën ˈö ˈˈtʋ̈ŋ ˈö ˈwo kun ˈˈdooka ˗bhöpë ˗bhö ˗ni ˈgü ˗a ˈka wo ˈkwëë˗ bhë, ˈö ꞊slëë ö ˗zü ˈö ö ˗gɔ ꞊ɲɔɔn Yesu ˈˈsuee* ˈö˗ pö ˗a ˗dhɛ: «N Dëmɛn, mɛn ˈö ˗dho ü ˈˈdhoodɔ bhë de ˗mü?»
21 ˈDhɛ ˈö Piɛɛ ˗yö ˗kpan ˗a ˗bha, ˈyö Yesu dhɛɛˈˈ kpɔ ˈö˗ pö: «N Dëmɛn, ˗a mɛn ˈdhɛ ˈö nu ˗ni ˈgü bhë ˈpö, ˗mën ˈö ˗dho kë ˗a ˈka?»
22 ˈYö Yesu ˗ya pö ˗a ˗dhɛ: «˗Ya kë ꞊dhɛ n zuʋ̈ˈˈ ˗ya ˈˈwɩ ˗a ˗bha kö ˗yö ˈto ö ˈˈɲaan ˈˈkpɔnŋ ꞊taa yö, ˗yö ˈdho ˗yö yö ˗a ˈka n ꞊yɛɛ kë ˗yi ˗bha, ˗a ˗mɛɛn ˈö ˗gban ü ˗bha? Bhi ˗zë ˗bhö ʒiö n ꞊kee˗ ˗kplawo.»
23 Pë ˈö Yesu ˗ya pö bhë ˗a ˗wɔn ˈgü, ˗a ˗bha gwëëˈˈ ˗nu ˗wo ˗ya ˗a pö ˗sü ˗bha wo ˈko ˗nu ꞊zinŋgü ꞊dhɛ gwëëˈˈ ˈdhɛ ˈö bhë yö ˈti ˗dho ga. ˈˈKɛɛ Yesu yö ˈti˗ pö ˗a ˗dhɛ yö ˈti ˗dho ga, pë ˈö˗ pö ꞊ʒiaan ˈyö ˗tɔ: «˗Ya kë ꞊dhɛ n zuʋ̈ˈˈ ˗ya ˈˈwɩ ˗a ˗bha kö ˗yö ˈto ö ˈˈɲaan ˈˈkpɔnŋ ꞊taa yö, ˗yö ˈdho ˗yö yö ˗a ˈka n ꞊yɛɛ kë ˗yi ˗bha, ˗a ˗mɛɛn ˈö ˗gban ü ˗bha?»
24 ˗A gwëëˈˈ ˈö ˈˈdhʋ̈, yö ˈnën ˈö ˈwɔn ˗nu ˈwo ˗kë bhë ˗an ꞊blɛɛ yö, ˈö ˗an ˗bɛnzë, ˈö ˈkwa˗ ˈwɔn dɔ ˈpö ꞊dhɛ pë ˗nu ˈö ˗an pö bhë gagade ˗mü.
25 Yesu ˗yö ˈwɔn ꞊va ˈˈwɛɛ ˈbhaa ˗nu ˗kë. Kö ˈkwa˗ pö ˈkwa ˗an ꞊gban ˈˈpɛpɛ ˗bɛnzë, n ˗bha ˈgü ˈˈkpɔnŋtaadhɛ ˗yö ˈˈtɩtɩ, ˗a ˈsëëdhɛ ˗be ˗nu ˈti ˗dho ˗mɔn ˗a ˈgü.
-Zoto -a ˈˈpiʋ̈ -wɔn -nu
^ Ɛɛnˈˈ «ˈyuö˗ ˈbhaa.»
^ Glɛkö ˗wo ˈgü ˈyö ˗tɔ «ˈö ö ˗gɔ ꞊ɲɔɔn Yesu ˗kënŋ ˈgü.»
