Nɔɔn˗ ˗së ˈsëëdhɛ ˈö Zan ˗ya ˗bɛnzë 3:1-36
3 Fadhiziɛn mi do ˈbhaa ˗yö ˗kun ˗dhö ˈö ˈwo˗ ˗dhɛ Nikodɛmö. ˗Yö ˗kun Zuifö ˗nu ˗gɔmɛn do ˈka.
2 Gɔndënën ˈö bhë ˗yö ˗dho Yesu ˈˈpiʋ̈ gbeŋ ˈö˗ pö ˗a ˗dhɛ: «˗Gɔmɛn,* yi˗ ˈwɔn ˗dɔ ꞊dhɛ ˗Zlan ˈnën ü bɔ kö ˈü mɛn ˗nu ꞊klaŋ kë, ˗a ˗gɛn ˗mü ꞊dhɛ ˗dhidha ˗nu ˈü ˗an kë ˗ni ˈgü bhë, mɛn ˈö ˗Zlan ˈyaa˗ ˈˈpiʋ̈ ˈyaa ꞊mɔɔn˗ ˗bha kö ˗yö ˗an kë.»
3 ˈYö Yesu ˗ya pö ˗a ˗dhɛ: «A˗ ˗pö ü ˗dhɛ gagade ˈka ꞊dhɛ, mɛn ˈö yö ˈti bhɔ ˈzü ˗dɛɛwo,* ˈyaa ꞊mɔɔn˗ ˗bha kö ˗yö ˗Zlan ˗bha ˗Gblüdëdhɛ yö.»
4 ˈYö Nikodɛmö ˗ya pö ˗a ˗dhɛ: «Mɛn ˈö ˗ya kë zii, ˗yö ꞊mɔɔn˗ ˗bha ˈö bhɔ ˈzü ˗kɔ ˗kë ꞊dhɛ? Ɛɛnˈˈ ˗yö ˗dho ˗da ö dhe ˈgwü ˈgü kö ˗yö bhɔ ˈzü ˗dɛɛwo ˗ee?»
5 ˈYö Yesu ˗ya ˗yɔ bɔ ˗a ˗gɔ ˈö˗ pö: «A˗ ˗pö ü ˗dhɛ gagade ˈka ꞊dhɛ, mɛn ˈö yö ˈti bhɔ ˈˈyi waa ˗zuu ˈˈslʋ̈ʋ̈slʋ̈ ˗an ꞊kɔa, ˈyaa ꞊mɔɔn˗ ˗bha kö ˗yö ˗da ˗Zlan ˗bha ˗Gblüdëdhɛ ˈgü.
6 Mɛn ˈö mɛnbhɩɩdhe ˗ya kpɔ, kö mɛnbhɩɩdhe ˗mü. ˈˈKɛɛ mɛn ˈö bhɔ ˗zuu ꞊kɔa, kö ˗zuu ˗mü.
7 ˗A pö ˈa˗ wo ꞊dhɛ: Ka dua ˗mü kö ˈka bhɔ ˈzü ˗dɛɛwo bhë, ˗a ˈwɔn ˈya ˗dho ü ˈkun.
8 ˈˈTee ˗yö ˗ʒiö ˗dhɛ ˈö ˗dhi ˗a ˗dhɛ ˗a ˈgü ˈö ˈü˗ vin man, ˈˈkɛɛ ˈdhɛ ˈö go ˗a ˗bha waa ˗dhɛ ˈö ˈdho ˗ni ˈgü ˗a ˗bha ˈbhaa˗ dɔ. ˗Kɔ do ˈö bhë ˈyö mɛn ˈˈpɛpɛ ˈö ˈwo bhɔ ˗zuu ˈˈslʋ̈ʋ̈slʋ̈ ꞊kɔa ˈwo˗ ˈka ˈpö.»
9 ˈYö Nikodɛmö ˗ya dhɛɛˈˈ kpɔ ˈzü ˈö˗ pö: «ˈWɔn ꞊suu ˈö ˈˈdhʋ̈ ˗yö ꞊mɔɔn˗ ˗bha ˈö ˗kë ˗kɔ ˗kë ꞊dhɛ?»
10 ˈYö Yesu ˗ya ˗yɔ bɔ ˗a ˗gɔ ˈö˗ pö: «Ü mɛn ꞊klaŋkëmɛn do ˈka Izraɛdhö ˈˈsɛ ˈö yö ˗a ˈgü, ˈyö ˈwɔn ˗nu ˈwo ˈˈdhʋ̈ bhë ˈbhaa ˗an dɔ ˗ee?
11 A˗ ˗pö ü ˗dhɛ gagade ˈka ꞊dhɛ, ˈwɔn ˈö ˈyi˗ dɔ, ˈyö ˈyi˗ ꞊blɛɛ. Pë ˗nu ˈö yi ˈˈɲan ˗yö ˗kpan ˗an ˗bha ˈyö ˈyi˗ ꞊gbɛkiödhɛ ˗kë, ˈˈkɛɛ ˈkaa ˈˈwɩ pë ˗nu ˈyi ˗an pö ˗an ˗bha.
12 ˈWɔn ˗nu ˈwo ˗gban ˈˈkpɔnŋtaadhɛ ˗bha a ˗an ˗blɛɛ ka ˗dhɛ, ˈˈkɛɛ ˈö nu ˈö yö ˗a ˈka ꞊dɛɛ ˗bha ka ˈti ˈdhaŋ˗ bho ˗a ˈˈdhiʋ̈. ˈDhɛ ˈö ˈˈdhʋ̈, ˈwɔn ˗nu ˈwo ˗gban dhaŋgüdhɛ ˗bha ˈman ˗an blɛɛˈˈ, ka ˗dho ˈdhaŋ˗ bho ˗a ˈˈdhiʋ̈ ˗kɔ ˗kë ꞊dhɛ?
13 ˗Ya ˈgo mü ˈzü, mɛn ˈˈwɛɛ ˈbhaa ˈyii ˈgo ˈˈkpɔnŋ ꞊taa yö kö ˗yö ˈdho dhaŋ˗ ˈgü, ˈˈkɛɛ mɛn ˈö go dhaŋ˗ ˈgü ˈö nu ˈˈkpɔnŋ ꞊taa, ˈyö ˗tɔ maan mɛn Gbö ˗mɛn.
14 ˗Kɔ do ˈö Moizö ˗yö ꞊mlɛɛn dɔ ˗a ˈka ˈˈdhü ˗bha ˈˈyɛta bhë, ˗wo ˗dho mɛn Gbö dɔ ˈˈdhü ˗bha ˈˈdhʋ̈ ˈpö,
15 kö mɛn ˈˈpɛpɛ ˈwo ˗dho ˈdhaŋ˗ bho ˗a ˈˈdhiʋ̈, ˗wo ˗tosɛta ˈö ˈyaa ɲën ˗a ꞊slɔɔ.
16 «˗A ˗gɛn ˗mü ꞊dhɛ, ˈˈkpɔnŋtaamɛn ˗nu* ˗dhɔ ˈö ˗Zlan ˗kë ˗a blɛɛˈˈ ˗dhɛ ˈyaa ˈdhö. ˗A ˗wɔn ˈgü ˈyö ö Gbö ˈnën ga dosɛnŋ ˈö˗ ˗gɔ ˗a nu kö mɛn ˈˈpɛpɛ ˈö ˈwo ˗dho wo ˗zo yö ˗a ˗dhɛ* ˗an ˈgü ˈyaa ˗dho shiʋ̈ˈˈ, ˈˈkɛɛ kö ˗wo ˗tosɛta ˈö ˈyaa ɲën ˗a ꞊slɔɔ.
17 ˗Zlan yö ˈti ö Gbö bɔ ˈˈkpɔnŋ ꞊taa kö ˗yö za dɔ ˈˈkpɔnŋtaamɛn ˗nu ˗bha, ˈˈkɛɛ ˗ya ˗bɔ ˈˈdhʋ̈ kö ˈˈkpɔnŋtaamɛn ˗nu ˗wo bɔ ˗a ˗ta ˗wo dha.
18 Mɛn ˈö ö ˗zo yö ˗a ˗dhɛ za yö ˈti ˗dho dɔ ˗a ˗bha. Mɛn ˈö ˈyii ö ˗zo yö ˗a ˗dhɛ kö za ˗ya dɔ ˗a ˗bha ˈsaadhö ˈnën bhë, ˗a ˗gɛn ˗mü ꞊dhɛ ˈyii ö ˗zo yö ˗Zlan Gbö ˈnën ga dosɛnŋ ˈö bhë ˗a ˗dhɛ.
19 Za ˗dɔ mɛnbhɩɩdhe ˗nu ˗bha ˗sü ˗gɛn ˈö ˈdhö ˈyö ꞊nɛn: ˗dhɛpuudhɛ ˗yö ˗nu ˈˈkpɔnŋ ꞊taa, ˈˈkɛɛ ˗dhɛtiidhɛ ˈnën ˈö˗ ˗dhɔ ˗yö mɛnbhɩɩdhe ˗nu ˗kë ˈö ˗ʒiö ˗a ˈka ˗dhɛpuudhɛ ˗ta. ˗A ˗gɛn ˗mü ꞊dhɛ, ˗an këwɔn ˗nu ˗wo ˗kun ˈya˗.
20 Mɛn ˈö ˈwɔn yaa ˗nu ˗kë, ˗dhɛpuudhɛ ˗san ˗ya ˗kë ˈö ˈyaa nu ˗dhɛpuudhɛ ˈgü, ˗yö ˗kë ˈˈdhʋ̈ kö ˈˈdhɛ ˈyaa ˗dho ˈgo ö këwɔn ˗nu ˗ta.
21 ˈˈKɛɛ mɛn ˈö ˈwɔn ˈö kpɛnŋdhö ˗a ˗kë, ˗yö ˗nu ˗dhɛpuudhɛ ˈgü kö mɛn ꞊gban ˗wa yö ꞊dhɛ ˗a këwɔn ˗nu ˗wo ˗bɛ ˗Zlan dhɔɔbhaawɔn ˗bha.»
22 ˈDhɛ ˈö ö bo ˗kë ˈˈdhʋ̈ ˗sü ˈka, ˈyö Yesu waa ö ˗bha gwëëˈˈ ˗nu ˈwo dho Zude ˗pö ˗nu ˈgü, ˈö ˈwo ˈˈtʋ̈ŋ ˈnën ˈbhaa ˗kë mü, ˈö ˈwo mɛn ˗nu bɔ ˈˈyi ꞊bhaa.
23 Zan ˗de ˈpö, ˗yö ˗kun mɛn ˗nu bɔ ˗ni ˈgü ˈˈyi ꞊bhaa Enɔnö, ˗dhɛ ˈö Salimö ˗dhɛ ˈˈsuee bhë ˗a ˈgü. ˗A ˗gɛn ˗mü ꞊dhɛ ˗dhɛ ˈö bhë ˈˈyi ˗kun mü ꞊va ꞊dedewo. Mɛn ˗nu ˗kun ˈdho ˗ni ˈgü ˗a ˈˈpiʋ̈ mü ˗kplawo ˈö ˗an bɔ ˈˈyi ꞊bhaa.
24 ˗A ˈˈtʋ̈ŋ ˈö bhë ˗a ˈka, kö wo ˈti Zan ˗da ˗kaso ˈgü ꞊köŋ.
25 Zan ˗bha gwëëˈˈ ˗nu waa Zuifö mi do ˗wo zɔɔdhe ˗man wo ˈˈkwöö ˈwɔn ˈö ˗gban ˗kë ˈˈslʋ̈ʋ̈slʋ̈ ˗sü ˗bha ˗a ˈgü.
26 ˈYö ˈwo nu Zan ˈˈpiʋ̈ ˈö ˈwo˗ pö ˗a ˗dhɛ: «Yi ˗gɔmɛn,* ˗dhɛ ˗ga, gɔndënën ˈö nu ü ꞊kee˗ Zuudɛn ga ꞊taabha ˗de ˈö ˈwɔn ˈö ˗gban ˗a ˗bha ˈü˗ ꞊blɛɛ bhë, ˗yö mɛn ˗nu bɔ ˗ni ˈgü ˈˈyi ꞊bhaa, ˈö mɛn ˈˈpɛpɛ ˈdhö ˈdho ˗ni ˈgü ˗a ˈˈpiʋ̈.»
27 ˈYö Zan ˗ya pö ˗an ˗dhɛ: «Mɛn ˈbhaa ˈyaa ꞊mɔɔn˗ ˗bha kö ˗yö pë ˈbhaa ꞊slɔɔ kö ˗Zlan ˈö dhaŋ˗ ˈgü yö ˈti˗ nu ˗a ˗dhɛ.
28 Ka ꞊dede a˗ ˗pö ka ˈˈɲaan ꞊dhɛ: ‹Klito ˈyaa ˗mü n ˈka, n bɔ ˈnën ˈö ˈwo˗ wo ˗a ˗dhɛ ˈˈdhiʋ̈.›
29 Mɛn ˈö dhebɔ ˈdhö˗ ˗bha ˈka, yö ˈnën ˈö ˗tɔ dhesügɔn. ˈˈKɛɛ dhesügɔn ˈˈtɔŋdë ˈö dɔ ˗sü ˈka ˗a ˈˈsuee mü ˗ya dhesügɔn ˗wo man, ˗a zuʋ̈ˈˈ ꞊nii ˗yö ˗da ꞊dedewo ˗a ˗wo ˈö˗ man bhë ˗a ˗wɔn ˈgü. ˈDhɛ ˈö ˈˈdhʋ̈, n zuʋ̈ˈˈ ꞊nii ˗yö ˗da ˗sü ˈka ꞊dedewo.
30 Mɛn ˈö bhë ˗a ˗bha yö dua ˗mü kö ˗yö ˈdho ˈˈdhiʋ̈ ˗kplawo, kö n ˗man ˗yö ꞊zɔɔ.»
31 Mɛn ˈö go dhaŋ˗ ˈgü ˗yö ˈkpii˗ ˈö ˗ʒiö ˗a ˈka mɛn ˈˈwɛɛ ˈˈpɛpɛ ˈwo to ˗an ˗ta. Mɛn ˈö ˈˈsɛtamɛn ˈka, pë ˗nu ˈwo ˈˈsɛ ˗ta yö ˈyö ˗an ˗wɔn ꞊blɛɛ, ˗a ˗gɛn ˗mü ꞊dhɛ ˗yö ˗go ˈˈsɛ ˗ta yö. ˈˈKɛɛ mɛn ˈö go dhaŋ˗ ˈgü, ˗yö ˈkpii˗ ˈö ˗ʒiö ˗a ˈka mɛn ˈˈwɛɛ ˈˈpɛpɛ ˈwo to ˗an ˗ta.
32 Pë ˈö˗ yö waa pë ˈö˗ man ˈyö ˗an ꞊blɛɛ, ˈˈkɛɛ mɛn ˈˈwɛɛ ˈbhaa ˈyaa ˈˈwɩ pë ˈö˗ pö ˗a ˗bha.
33 Mɛn ˈö ˗we pë ˈö˗ pö ˗a ˗bha, kö ꞊yaa˗ ˗zɔn ˈˈpuu ˈka ꞊dhɛ ˗Zlan ˈyaa ꞊sua kë.
34 ˗A ˗gɛn ˗mü ꞊dhɛ, mɛn ˈö ˗Zlan ˗ya bɔ bhë, ˈpë ˈö ˗Zlan ˗ya pö ˈyö˗ ꞊blɛɛ, ˈyö ˗tɔ ꞊dhɛ ˗Zlan ˈyaa ˈˈdʋ̈ŋdʋ̈dhɛ* kë ö ˗bha ˗zuu ˈˈslʋ̈ʋ̈slʋ̈ ˗ta.
35 ˗Zlan Gbö ˗dhɔ ˗ya ˗kë, ˈö ˗ya pë ꞊gban ˈˈpɛpɛ ˗lo ˗a ꞊kwɛɛ˗.
36 Mɛn ˈö ö ˗zo yö ˗a Gbö ˗dhɛ, kö ˗tosɛta ˈö ˈyaa ɲën ꞊yaa˗ ꞊slɔɔ. Mɛn ˈö yö ˈti ˈwɔn man ˗a Gbö ˗ta, yö ˈti ˗dho ˗tosɛta ꞊slɔɔ˗, ˈwɔn ˗dho ˗shiö ˗Zlan ˗dhɛ ˗a ˗mɛn ˗bha ˗kplawo.
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «Labi.»
^ ˗Yö ꞊mɔɔn˗ ˗bha ˈö ˗kë, «bhɔ ˗sü ˈö go dhaŋ˗ ˈgü» ˗a ˈka.
^ Glɛkö ˗wo ˈgü ˈyö ˗tɔ «ˈˈkpɔnŋtaadhɛ.»
^ Ɛɛnˈˈ «ˈö ˈwo ˗dho wo ˗bha ˗zo ˗yö ˗a ˗dhɛ ˗sü ˗zɔn.»
^ Glɛkö ˗wo ˈgü ˈyö ˗tɔ «Labi.»
^ Ɛɛnˈˈ «ˈyaa ˗zuu ˈˈslʋ̈ʋ̈slʋ̈ dan kö ˗ya nu mɛn ꞊dhɛ.»
