Nɔɔn˗ ˗së ˈsëëdhɛ ˈö Zan ˗ya ˗bɛnzë 4:1-54
4 ˈDhɛ ˈö Dëmɛn ˗ya yö ꞊dhɛ Fadhiziɛn ˗nu ꞊waa˗ man ꞊dhɛ mɛn ˗nu ˈö ˗an bɔ ˗ni ˈgü ˈˈyi ꞊bhaa ˈö ˈwo kë ˗ni ˈgü ˗a ˗bha gwëëˈˈ ˈka ˗wa kë ꞊va ˗wa ʒiö ˗a ˈka Zan ˗bha ˗ta,
2 (ˈkö ˗kë ꞊dhɛ Yesu ˗bha gwëëˈˈ ˗nu ˈnën ˈwo kun mɛn ˗nu bɔ ˗ni ˈgü ˈˈyi ꞊bhaa, yö ꞊dede ˈyaa ˗mü)
3 ˈyö go Zude ˗sɛ ˈö bhë ˗a ˈgü ˈö ö ꞊yɛɛ ˗kë ˈzü ˈö dho Galile.
4 ˗A ˗dhɛ ˗yö ˗kun ˗a ˗bha kö ˗yö bɔ Samadhi ˗sɛ ˈgü.
5 ˈYö dho ˈö ˗lo Samadhi ˗pö do ˈwo˗ ˗dhɛ Sishaa ˗a ˈgü. ˗A ˈpödhɛ ˈö ˈˈdhʋ̈ ˗yö ˗dhɛ ˈö Zakɔbö ˗ya nu ö gbö Zozɛfö ˗dhɛ bhë ˗a ˈˈsuee.
6 ˗Dhɛ ˈö bhë yö ˈnën Zakɔbö ˗bha ˗klɔŋ ˗yö ˗kë ˗a ˗bha. ˈˈTa ˈwo˗ sü ˗dhɛkpaɔyi ˈö bhë ˗a ˈka bhë ˗a ˗wɔn ˈgü, Yesu ˈgü ˗yö ˗kun ga ˗sü ˈka, ˈyö ˈɲaannu ˗klɔŋ ˈö bhë ˗a ˈˈsuee. ˈDhɛ ˈö ˗kë ˈˈdhʋ̈ kö ˈɲaan˗ ˗ya ˗ya mɛn ˗gɔ ꞊zinŋgü.*
7 ˈDhɛ ˈö Samadhi dhebɔ do ˗yö nu ˈˈyi ˈtɔ, ˈyö Yesu ˗ya pö ˗a ˗dhɛ: «˗Bhö ˈˈyi nu n ˗dhɛ ˈa˗ mü.»
8 (˗A ˈˈtʋ̈ŋ ˈö bhë ˗a ˈka, kö ˗a ˗bha gwëëˈˈ ˗nu ˗wa ˈdho ˗bhöpë ˈdhɔ ˈplöö.)
9 ˈYö Samadhi dhebɔ ˈö bhë ˈö˗ pö ˗a ˗dhɛ: «˗Yö ˗kë ꞊dhɛ ˈyö bhi ˈü ˗kë Zuifö ˈka ˈü˗ pö n ˗dhɛ ˈa ˈˈyi nu ü ˗dhɛ kö ˈü˗ mü, ˈˈkɛɛ kö Samadhi dhebɔ ˗mü n ˈka?» (˗A pö ˈö˗ wo ˈˈdhʋ̈ bhë ˗a ˗gɛn ˗mü ꞊dhɛ Zuifö ˗nu ˈwaa kun ˈˈwɩ ˗ni ˈgü Samadhi ˗mɛn ˗nu ˈˈpiʋ̈.)
10 ˈYö Yesu ˗ya pö ˗a ˗dhɛ: «˗Ya kë ꞊dhɛ ˗Zlan ˗bha gbɔɔdhe ˈö˗ ˗kë ˈˈwɛɛwɛ bhë ü˗ ˗dɔ, ˈö mɛn ˈö˗ pö ü ˗dhɛ ‹˗Bhö ˈˈyi nu n ˗dhɛ ˈa˗ mü› bhë ˈü˗ dɔ ˗be, kö bhi ˈnën ˈü ˗dho ˈˈyi ˗gbadhɛ ˗a ˗gɔ, ˈö ˈˈyi ˈö ˗këdhösü nu mɛn ˗dhɛ bhë ˈö˗ nu ü ˗dhɛ.»
11 ˈYö˗ dhebɔnën ˗ya pö ˗a ˗dhɛ: «N dëmɛn, ˈˈyi ˗tɔ ˗a ˈka ˗pë ˈyaa ü ˗gɔ, ˗ya ˈgo mü ˈzü ˗klɔŋ ˈö yö ˗yö ꞊gblɛɛn. ˈDhɛ ˈö ˈˈdhʋ̈ ˗a ˈˈyi ˈö bhë ü ˗dho ˈgo ˗a ˈka ˈˈmɛn?
12 Yi ˈˈbhɛman Zakɔbö ˈö ˗klɔŋ ˈö yö ˗a to yi ˗gɔ, ˈö ˈˈyi ˈö go ˗a ˈgü ˈö yö ꞊dede waa ö ˗bha ˈnën ˗nu, ö ˗bha ˗tuëë ˗nu ˈwo˗ mü bhë, ü ꞊bhlëë ˗yö ˈkpii˗ ˈö ˗ʒiö ˗a ˈka ˗a ˗ta ˗ee?»
13 ˈYö Yesu ˗ya ˗yɔ bɔ ˗a ˗gɔ ˈö˗ pö: «Mɛn ˈˈpɛpɛ ˈö ˈwo ˈˈyi ˈö yö ˗a mü, ˈˈyi mü ˗dhɔ ˗dho ˗an kë ˈzü.
14 ˈˈKɛɛ mɛn ˈö ˗dho ˈˈyi ˈa ˗dho ˗a nu ˗a ˗dhɛ bhë ˗a mü, ˈˈyi mü ˗dhɔ yö ˈti ˗dho ˗a kë ˈzü toŋtoŋdhö. ˈˈYi ˈa ˗dho ˗a nu ˗a ˗dhɛ ˈˈdhʋ̈ bhë ˗yö ˗dho kë ˈˈyi ˗gɔgodhɛ ˈka ˈö bhɔ ˗a ˗mɛn ˈgü, ˈö ˗tosɛta ˈö ˈyaa ɲën ˗a nu ˗a ˗dhɛ.»
15 ˈYö˗ dhebɔnën ˗ya pö ˗a ˗dhɛ: «N dëmɛn, ˈˈyi ˈö ˈˈdhʋ̈ ˗a nu n ˗dhɛ kö ˈˈyi mü ˗dhɔ ˈyaa ˗dho n kë ˈzü toŋtoŋdhö, ɛɛnˈˈ kö ˈman ˗dho nu ˗kplawo ˈˈyi ˈtɔ ˗dhɛ ˈö yö ˗a ˈgü.»
16 ˈYö Yesu ˗ya pö ˗a ˗dhɛ: «˗Bhö ˈdho kö ˈü ü ꞊gɔn ˗dhɛ kö ˈka nu ˗dhɛ ˈö yö ˗a ˈgü.»
17 ˈYö dhebɔnën ˗ya pö ˗a ˗dhɛ: «Gɔn ˈyaa n ˗gɔ.» ˈYö Yesu ˗ya pö: «˗A pö ˈü˗ wo ‹gɔn ˈyaa ü ˗gɔ› bhë, ˗a ˗pö ˈˈdhʋ̈ ˗dhɛ ˗mü.
18 ˗A ˗gɛn ˗mü ꞊dhɛ ˈbha gwan ˈkpɔ ˗gɛnɲaan ˈka ˈˈsoodhu, ˈyö ˗a mɛn ˈdhɛ ˈü˗ ˈˈpiʋ̈ ˈˈtʋ̈ŋ ˈö yö ˗a ˈgü bhë ü ꞊gɔn ˈyaa ˗mü. ˗A pö ˈü˗ wo gɔn ˈyaa ü ˗gɔ bhë ü ˈti ꞊sua kë.»
19 ˈYö dhebɔnën ˗ya pö ˗a ˗dhɛ: «N dëmɛn, ˈman˗ ˈwɔn dɔ ꞊dhɛ ˗Zlan ˗wodhiʋ̈lomɛn ˗mü ü ˈka.
20 Yi ˈˈbhɛman ˗nu ˗wo ˗Zlan ˗dhɔkë ˗tɔn ˈö yö ˗a ˗ta, ˈˈkɛɛ ka ˗zë ka˗ ˗pö ˗dhɛ ˈö Zedhizadhɛmö ˈyö kwa dua ˈdhö ˗mü kö ˈkwa ˗Zlan ˗dhɔkë ˗a ˗bha.»
21 ˈYö Yesu ˗ya pö ˗a ˗dhɛ: «A˗ ˗pö ü ˗dhɛ dhebɔnën, ˈˈtʋ̈ŋ ˈbhaa ˗dho ˗wo ˈö mɛn ˗nu ˈti ˗dho ˗Zlan ˗dhɔkë ˗tɔn ˈö yö ˗a ˗ta ɛɛnˈˈ Zedhizadhɛmö.
22 Pë ˈö ˈka˗ ˗dhɔkë ˈkaa˗ dɔ. ˈˈKɛɛ yi ˗zë pë ˈyi˗ ˗dhɔkë yi˗ ˗dɔ, ˗a ˗gɛn ˗mü ꞊dhɛ dhasü zü ˗yö ˗dɔ Zuifö ˗nu ˗ta.*
23 ˈˈKɛɛ ˈˈtʋ̈ŋ ˈbhaa ˗dho ˗wo, ˈö ˈˈtʋ̈ŋ ˈö ˈˈdhʋ̈ ˗ya ˗wo ˈsaadhö, ˈö ˗Zlan ˗dhɔkëmɛn ˗nu ꞊dede dho ˗Zlan* ˗dhɔkë ˗Zlan ˗bha ˗zuu waa gagade ˗an ˈka. Mɛn ꞊suu ˗nu ˈwo ˈˈdhʋ̈, wo ˈnën ˈö ˗Zlan ˈdhö ˗an mɛɛnˈˈ ˗ni ˈgü kö ˗wo ö ˗dhɔkë.
24 ˗Zuu ˗mü ˗Zlan ˈka, ˗a ˗dhɔkëmɛn ˗nu dua ˗mü ˈpö kö ˗wa ˗dhɔkë ˗a ˗bha ˗zuu waa gagade ˗an ˈka.»
25 ˈYö dhebɔnën ˗ya pö ˗a ˗dhɛ: «A˗ ˈwɔn ˗dɔ ꞊dhɛ Mesi ˈö ˈwo˗ ˗dhɛ Klito bhë, ˗yö ˗dho nu. ˗Ya nu, ˗yö ˗dho ˈwɔn ˗nu ˈwo bhë ˗an ꞊gban ˈgü ˈˈpʋ kwa ˗dhɛ ˈkpakpadhö.»
26 ˈYö Yesu ˗ya pö ˗a ˗dhɛ: «Man ˈa ˈwɔn blɛɛˈˈ ˗ni ü ˗dhɛ yö, man ˈnën ˈa ˗tɔ mɛn ˈü ˈˈwɩ ˗ni ˈgü ˗a ˈka bhë.»
27 ˗A ˈˈtʋ̈ŋ ꞊dede ˈö bhë ˗a ˈgü, ˈyö˗ ˗bha gwëëˈˈ ˗nu ˗wo wo ꞊yɛɛ ˗kë ˈwo nu. ˈDhɛ ˈwo ˗kpan ˗a ˗bha kö ˗yö ˈwɔn blɛɛˈˈ ˗ni ˈgü dhebɔnën ˈö bhë ˗a ˈˈpiʋ̈, ˈyö˗ ˈwɔn ˗yö ˗an kun. ˈˈKɛɛ ˗a mɛn ˈˈwɛɛ ˈbhaa ˗kɔ yö ˈti ꞊mɔɔn˗ ˗bha kö ˗ya dhɛɛˈˈ ˈkpɔ ˗ya pö: «ˈMën ˈü˗ ꞊mɛɛn?» ɛɛnˈˈ «ˈMën ˗kë ˈü ˈwɔn ꞊blɛɛ dhebɔnën ˈö bhë ˗a ˈˈpiʋ̈?»
28 ˈDhɛ ˈö ˗kë ˈˈdhʋ̈, ˈyö dhebɔnën ˗yö ö ˗bha ˈˈyi ˗gbɔ to ˈˈshia˗ mü ˈö dho ˈplöö ˈö˗ pö ˈpömɛn ˗nu ˗dhɛ:
29 «˗Ka nu kö gɔndënën do ˈö ˈwɔn ˗nu ˈa ˗an ˗kë ˈö ˗an ꞊gban pö n ˗dhɛ bhë ˈka˗ yö. Klito ˈyaa ˗mü ˈˈdhʋ̈ ˗ee?»
30 ˈYö mɛn ˗nu ˗wo ˗ya ˈgo ˗sü ˗bha ˈplöö ˈö ˈwo dho ˗a ˈˈpiʋ̈.
31 ˗A ˈˈtʋ̈ŋ ˈö bhë ˗a ˈgü kö Yesu ˗bha gwëëˈˈ ˗nu ˗wo ˗gban ˗ni ˈgü ˗a ˗bha ˈö ˈwo˗ pö: «˗Gɔmɛn,* ˗bhö pë ˗bhö.»
32 ˈˈKɛɛ ˈyö˗ pö ˗an ˗dhɛ: «˗Bhöpë ˈö n ˗gɔ kö ˈa˗ ˗bhö ˈkaa˗ dɔ.»
33 ˈYö˗ ˗bha gwëëˈˈ ˗nu ˗wo ˗ya ˗a pö ˗sü ˗bha wo ˈko ˗nu ˗dhɛ: «De ˈö nu ˗bhöpë ˈka ˗a ꞊dhiaa?»
34 ˈYö Yesu ˗ya pö ˗an ˗dhɛ: «N ˗man ˗bhöpë ˈnën ˗tɔ mɛn ˈö n bɔ bhë ˗a dhɔɔbhaawɔn kë ˗sü waa yö ˈö˗ ˈˈklɔɔn bho n ˗bha ˗a kë ˗sü kö ˈa˗ ˈˈdhiʋ̈ta.
35 Ka˗ ˗pö ˈˈsu ˗ya ˈto ˗yiishiö kö pë ˈö ˈbhlaa ˗a ˈˈkan ˈˈtʋ̈ŋ ˗yö ˗wo, ˈyaa ˈˈdhʋ̈ ˗ee? ˈˈKɛɛ a˗ ˗pö: ˗Ka ka ˈˈɲan ˈˈdhiʋ̈ luuˈˈ ˈka ˈbhladhɛ ˗nu ˗ta ˗ga! ˗An ˗ta ˗ya ˈˈflʋ̈, pë ˈˈkan ˈˈtʋ̈ŋ ˗ya ˗wo. ˈˈTʋ̈ŋ ˈö yö ˗a ˈgü,
36 pëkanmɛn ˗yö ö ꞊saa ꞊slɔɔ ˗ni ˈgü. ˗Yö pë ˗nu ˈö ˗an ˗kan ˗an ˗lo ˗ni ˈgü ˈkwëëdhö kö ˗wo ˗tosɛta ˈö ˈyaa ɲën ˗a kë, ˗yö kë ˈˈdhʋ̈ kö mɛn ˈö pë ta waa mɛn ˈö pëkanmɛn ˈka ˗an ꞊plɛ ꞊gban zuʋ̈ˈˈ ˈˈgblü ˗yö dhi wo ˈkwëë˗.
37 ˗Ya ˗zɔn ꞊dhɛ ˈˈgɔɔn ˈö˗ pö mɛn do ˈbhaa ˈnën ˈö pë ta ˈyö mɛn ˈˈwɛɛ ˈbhaa ˗yö ˗kë ˗a ˈˈkanmɛn ˈka bhë ˈyaa ꞊sua ˈka.
38 A ka ˗bɔ kö pë ˈö ka ˈti saanˈˈ ˈsü ˗a ˈˈpiʋ̈ bhë ˈka˗ ˈˈkan. Mɛn ˈˈwɛɛ ˗nu ˈnën ˈwo yö ˈˈgbɩɩ˗ ꞊dede ˗kë, ˈyö ˗an ˗bha yö ˈö bhë ˈö ˈka˗ ꞊trɔɔn ꞊slɔɔ ˈpö.»
39 ˗A pö ˈö dhebɔnën ˗ya wo: «ˈWɔn ˗nu ˈa ˗an ˗kë ˗ya ꞊gban ˗pö n ˗dhɛ» bhë, ˗ya ˗kë ˈö Samadhi ˗mɛn ˗nu ꞊va ꞊dede ˈö ˈwo go ˈpödhɛ ˈö bhë ˗a ˈgü ˈwo wo ˗zo yö Yesu ˗dhɛ.
40 ˈDhɛ ˈö Samadhi ˗mɛn ˗nu ˗wo nu Yesu ˈˈpiʋ̈, ˗wa ˗pö ˗a ˗dhɛ ˗yö ˈto wo ˈˈpiʋ̈ mü. ˈYö to ˗an ˈˈpiʋ̈ mü ˈö ˗dhɛkpaɔyi ꞊plɛ ˗kë.
41 ˈDhɛ ˈö ˗kë ˈˈdhʋ̈, mɛn ꞊va ˈbhaa ˗wo wo ˗zo ˗yö ˗a ˗dhɛ ˈwɔn ˈö˗ ꞊blɛɛ ˗a ˗wɔn ˈgü.
42 ˈYö ˈwo˗ pö dhebɔnën ˈö bhë ˗a ˗dhɛ: «Gɔndënën ˈö yö yi ˗bha ˗zo ˗yö ˗a ˗dhɛ ˗sü ˈyaa ˗gban pë ˈü˗ pö yi ˗dhɛ bhë ˗a ˗bha ˈzüdho. Yi ꞊dede ˈya yi ˈˈtʋ ˈto ˗a ˗wo ˗bha, ˈya˗ yö ꞊dhɛ yö ˈnën ˈö ˗tɔ mɛn ꞊dede ˈö ˗dho ˈˈkpɔnŋtaamɛn ˗nu dha.»
43 ˈDhɛ ˗dhɛkpaɔyi ꞊plɛ ˈwo bhë ˈwo ˗ʒiö, ˈyö go ˗dhɛ ˈö bhë ˗a ˈgü ˈö dho Galile.
44 ˈˈKɛɛ Yesu yö ꞊dede ꞊yaa˗ pö ˈsaadhö ˗be ꞊dhɛ ˈwaa ˗Zlan ˗wodhiʋ̈lomɛn ꞊bhlëë ˗ya ˗a ˗de ˗gɔ ˈˈsɛ ˈgü.
45 ˈDhɛ ˈö ˗lo Galile, Galile ˗mɛn ˗nu ˗wo wo ˗kɔ ˗ya ˗a ˗gɔ ˗së ˈka ˈwɔn ˗nu ˈö ˗an ˗kë Zedhizadhɛmö ˈwlaan˗ ˗ta bhë ˗a ˗wɔn ˈgü, ˗a ˗gɛn ˗mü ꞊dhɛ wo ˗de ˈpö ˗wo ˗kë ˈwlaan˗ ˈö bhë ˗a ˗ta.
46 ˗Yö ˗dho ˈzü Kana, Galile ˗pö ˈö ˈˈyi ˗gla we ˈgü ˗a ˗bha bhë ˗a ˈgü. ˗A ˈˈtʋ̈ŋ ˈö bhë ˗a ˈgü, ˗gblüdë ˗bha yökëmɛn do ˈbhaa ˗yö ˗kun Kapɛɛnaɔmö ˈö˗ gbö ˈyaa kun ö ˈflëëgü.
47 ˈDhɛ ˈö gɔndënën ˈö bhë ˈö˗ man ꞊dhɛ Yesu ˗ya nu Zude, Galile ˗sɛ ˈgü, ˈyö nu ˈö yö ˗a ˗bha ˈö˗ pö ˗a ˗dhɛ ˗yö nu kö ö gbö ˈö ˈyaa ö ˈflëëgü bhë ˗ya ˗dhɛ bo. ˗A ˈˈtʋ̈ŋ ˈö bhë ˗a ˈgü kö ˗a gbö ˗ya wɔ ˈya˗.
48 ˈYö Yesu ˗ya pö ˗a ˗dhɛ: «Ka ˈˈɲan yö ˈti ˗da ˗dhidha ˗nu waa ˈwɔn ˈˈmlünmlünsü ˗nu ˈa ˗an ˗kë ˗an ˈgü, ka ˈti ˗dho ˈdhaŋ˗ bho n ˈˈdhiʋ̈.»
49 ˈYö ˗gblüdë ˗bha yökëmɛn ˈö bhë ˈö˗ pö ˗a ˗dhɛ: «N Dëmɛn, ˈdhɛ ˈö n ˗man ˈnën ˈö bhë yö ˈti ga ꞊köŋ, ˗bhö dɔ ˈˈgbɩɩ˗ ˈko ˈdho.»
50 ˈYö Yesu ˗ya pö ˗a ˗dhɛ: «˗Bhö ˈdho ü ꞊plöö, ü gbö ˗ya kë ö ˈflëëgü.» ˈYö gɔndënën ˈö bhë ˈö ˈdhaŋ˗ bho pë ˈö Yesu ˗ya pö bhë ˗a ˈˈdhiʋ̈, ˈyö dho.
51 ˈDhɛ ˈö kun ˈdho ˗ni ˈgü, ˈyö ˗a ˗bha yökëmɛn ˗nu ˗wo nu ˗a ˗gɔ ʒiaan˗, ˈyö ˈwo˗ pö ˗a ˗dhɛ ˗a gbö ˗ya ö ˗de ꞊slɔɔ.*
52 ˈYö ˗an dhɛɛˈˈ kpɔ kö ˈˈlɛlɛ ˈö ö ˗de ꞊slɔɔ ˗a ˈka ˗wa pö ö ˗dhɛ. ˈYö ˈwo˗ pö ˗a ˗dhɛ: «ˈˈNɛnnɛn ˗yö ˗go ˗a ˗ta ɲaandhiʋ̈ kö ˈɲaan˗ ˗ya kplaaˈˈ mɛn ˗gɔ ˈka ˈdɛdɛ.»*
53 ˈDhɛ ˈö ˗kë ˈˈdhʋ̈ ˈyö ˈnën ˈö bhë ˗a dë ˗ya yö ꞊dhɛ ˈˈlɛlɛ ꞊dede ˈö Yesu ˗ya pö ö ˗dhɛ ˗a ˈka: «Ü gbö ˗ya kë ö ˈflëëgü» bhë, ˈyö bhë. ˈYö waa ö ˗bha ˈkɔɔmɛn ˗nu ꞊gban ˈˈpɛpɛ ˈwo wo ˗zo yö Yesu ˗dhɛ.
54 Yesu ˗bha ˗dhidha ꞊plɛ ˗naan ˈö˗ ˗kë kö ˗ya nu Zude, Galile ˗sɛ ˈgü, ˈyö bhë.
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «ˈˈlɛlɛ ˈˈsɔɔdo ˗naan.»
^ Ɛɛnˈˈ «˗yö ˗go Zuifö ˗nu ˈˈpiʋ̈.»
^ Glɛkö ˗wo ˈgü ˈyö ˗tɔ «Dë.»
^ Glɛkö ˗wo ˈgü ˈyö ˗tɔ «Labi.»
^ Glɛkö ˗wo ˈgü ˈyö ˗tɔ «˗yö ˈˈbhɩɩ˗.»
^ Glɛkö ˗wo ˈgü ˈyö ˗tɔ «ˈˈlɛlɛ ˈˈsɔɔplɛ ˗naan.»
