Nɔɔn˗ ˗së ˈsëëdhɛ ˈö Zan ˗ya ˗bɛnzë 5:1-47
5 ˈDhɛ ˈö ö bo ˗kë ˈˈdhʋ̈ ˗sü ˈka, ˈyö Zuifö ˗nu ˗bha ˈwlaan˗ do ˈbhaa yi ˗yö ˗lo, ˈyö Yesu ˗yö dho Zedhizadhɛmö.
2 Zedhizadhɛmö mü, ˈˈkwee ˈˈdhi ˈwo˗ ˗dhɛ ˈˈbhlaa ˗nu bɔdhɛ bhë ˗a ˈˈsuee, ˈˈyi ˗gblü do ˈbhaa ˗yö mü ˈö ˈwo˗ ˗dhɛ Eblö ˗wo ˈgü Bɛtüzata. ˈˈYi ˗gblü ˈö bhë, bɔdhɛ ˈˈsoodhu ˈwo ꞊gban ˈˈdhü ˗nu ꞊zinŋgü ˈö ˗an ꞊gba ˈdhö ˗an ˗ta, ˗wo ˗kun ꞊klënŋ ˗sü ˈka ˗a ˗züzü.
3 ˈˈYuamɛn ꞊va ꞊dede ˗nu, ˈˈɲɛɛntiimɛn ˗nu, ꞊niɔɔnmɛn ˗nu waa mɛn ˗nu ˈö ˗an dɔɔ˗ ˗nu ˗wa ga ˗an ˗bha, ˗wo ˗kun ˈwaannu ˗sü ˈka bɔdhɛ ˗nu ˈwo bhë ˗an ˈgü.
4 ——
5 Gɔndënën do ˈö ˈˈyua ˗ya ˗kwɛ ˗kɔŋ ˗yaaga ö ga ˈˈsaaga (38) kë ˗a ˗bha, ˗yö ˗kun ˗dhɛ ˈö bhë ˗a ˈgü.
6 ˈDhɛ ˈö Yesu ˗yö ˗kpan ˗a ˗bha kö ˗yö ˈwaannu ˗sü ˈka, ˈö˗ yö ꞊dhɛ ˈˈyua ˗ya ꞊gwëë ˗a ˗bha ꞊dedewo, ˈyö˗ pö ˗a ˗dhɛ: «Ü˗ ˈˈpiʋ̈ kö ü ˗bha ˈˈyua ˗yö bo ˗ee?»
7 ˈYö ˈˈyuamɛn ˈö bhë ˈö˗ ˗yɔ bɔ ˗a ˗gɔ ˈö˗ pö: «N Dëmɛn, mɛn ˈbhaa ˈyaa n ˗gɔ kö ˈˈyi ˗yö ˗bhaŋbhaŋˈˈ ˗ni ˈgü kö ˗yö n ˈsü ˗yö n yö ˗a ꞊bhaa. A ˗dɔɔdɔɔˈˈ ˗ni ˈgü n ˗de ˗gɔ kö ˈa yɔɔˈˈ ˗a ꞊bhaa, ˈyö mɛn ˈˈwɛɛ ˗yö bɔ n ˈˈdhiʋ̈ ˈö ꞊yɔɔ mü.»
8 ˈYö Yesu ˗ya pö ˗a ˗dhɛ: «˗Bhö luuˈˈ! Ü ˗wɔ ˗a ˗ta ˗pë ˈsü kö ˈü ˈˈta ˈsü.»
9 Gɔndënën ˈö bhë ˗yö ˗to ˈˈshia˗ mü ˈö˗ ˗dhɛ ˗yö bo, ˈö ö ˗wɔ ˗a ˗ta ˗pë sü ˈö ˗ya ˈˈta ˈsü ˗sü ˗bha.
ˈWɔn ˈö bhë ˗yö ˗kë ˈˈdhʋ̈ ꞊Glooyi ˈka.
10 ˈYö Zuifö ˗nu ˗wo ˗ya ˗a pö ˗sü ˗bha gɔndënën ˈö˗ ˗dhɛ ˗yö bo bhë ˗a ˗dhɛ: «꞊Glooyi ˈnën ꞊dɛɛ, ˗a ˗dhɛ ˈyaa˗ ˗bha kö ˗wɔ ˗a ˗ta ˗pë ˈö bhë ˈü˗ ˈsü.»
11 ˈˈKɛɛ ˈyö˗ ˗yɔ bɔ ˗an ˗gɔ ˈö˗ pö: «Mɛn ˈö n ˗dhɛ bo bhë yö ˈnën ˈö˗ pö n ˗dhɛ: ‹˗Bhö ü ˗wɔ ˗a ˗ta ˗pë ˈsü kö ˈü ˈˈta ˈsü.›»
12 ˈYö ˈwo˗ dhɛɛˈˈ kpɔ ˈwo˗ pö: «Gɔndënën ˈö˗ pö ü ˗dhɛ: ‹ˈÜ˗ ˈsü kö ˈü ˈˈta ˈsü bhë de ˗mü›?»
13 ˈˈKɛɛ mɛn ˈö˗ ˗bha ˈˈyua ˗yö bo bhë, ˈmɛn ˈö˗ ˗dhɛ bo ˈyaa kun ˗a dɔ ˗ni ˈgü, ˗a ˗gɛn ˗mü ꞊dhɛ ˈö ˗kë ˈˈdhʋ̈ kö Yesu ˗ya ꞊dhiɔŋ mɛn ꞊va ˈwo kun ˈmü bhë ˗an ꞊zinŋgü.
14 Yesu ˗yö ˗kpan ˗a ˗bha ˈzü ꞊taabha kö ˗yö ˗Zlan ˗dhɔkë ˗a ˈgü ˗kɔ ˈgü, ˈyö˗ pö ˗a ˗dhɛ: «꞊Dɛɛ ˈbha kë ü ˈflëëgü. ˈDhɛ ˈö ˈˈdhʋ̈ ˈbha ˗dho ˈwɔn yaa kë ˈzüdho, kë ˈˈdhʋ̈ kö pë ˈˈdhiʋ̈˗ ˈö ˗ʒiö ˗a ˈdhɛ ˈö bhë ˗a ˗ta ˈyaa ˗dho kë ü ˈka.»
15 ˈDhɛ ˈö ˗kë ˈˈdhʋ̈, ˈyö gɔndënën ˈö bhë ˈö dho ˈö˗ pö Zuifö ˗nu ˗dhɛ ꞊dhɛ mɛn ˈö ö ˗dhɛ bo bhë, Yesu ˗mü.
16 ˗A ˗wɔn ˈgü Zuifö ˗nu ˗wo ˗ya Yesu ˗gɛn mɛɛnˈˈ ˗sü ˗bha, ˈyö ˗tɔ ꞊dhɛ ˗yö ˈwɔn ˗nu ˈwo bhë ˗an ˗kë ꞊Glooyi ˈka.
17 ˈˈKɛɛ ˈyö Yesu ˗ya pö ˗an ˗dhɛ: «N Dë ˗yö yö ˗kë ˈö dho ˈö yö ˗a ˈka ˈˈtʋ̈ŋ ˈö yö ˗a ˗bha, man ˗de ˈpö a yö kë ˗ni ˈgü ˗kplawo.»
18 ˗A pö ˈö˗ wo ˈˈdhʋ̈ bhë ˗a ˗wɔn ˈgü, Zuifö ˗nu ˗ya ˗a ˈˈslö mɛɛnˈˈ ˗sü ˗bha ˈzü ꞊dedewo kö ˈwo˗ zë. ˗A ˗gɛn ˗mü ꞊dhɛ ˈtɔŋ˗ ˈö ˗gban ꞊Glooyi ˗bha yö ˈti˗ ꞊bhlëë ˗ya, ˈö go mü ˈzü ˈö ˗Zlan ˗dhɛ ö ˗de Dë, ˈö ö ˗de ˗zɔn ˗Zlan ˈka.
19 ˈYö Yesu ˗ya ˗yɔ bɔ ˗an ˗gɔ ˈö˗ pö: «A˗ ˗pö ka ˗dhɛ gagade ˈka ꞊dhɛ, ˗Zlan Gbö ˈyaa ꞊mɔɔn˗ ˗bha kö ˗yö ˈwɔn ˈˈwɛɛ ˈbhaa ˈsü ö ˗de ˈgü kö ˗ya kë, kö yö ˈti kë ˈwɔn ˗nu ˈö ˗kpan ö Dë ˗bha kö ˗yö ˗an kë ˗ni ˈgü ˗an ˈka. Pë ˈˈpɛpɛ ˈö˗ Dë ˗ya ˗kë, ˈyö yö ˗de ˈpö ˈö˗ ˗kë ꞊dhɛ ˗kɔ do ˈö˗ Dë ˗ya ˗kë ˗a ˈka bhë ˗a ˈdhö.
20 ˗Zlan Gbö ˗dhɔ ˗ya Dë ˗kë, ˈyö pë ˈˈpɛpɛ ˈö˗ Dë yö ꞊dede ˗ya ˗kë ˈö˗ ˗zɔn ˗a ꞊dhɛ. Pë ˗nu ˈwo ˗ʒiö ˗a ˗dhɛ ˗nu ˈwo bhë ˗an ˗ta, ˗yö ˗dho ˗an ˗zɔn ˗a ˗dhɛ ˈzü kë ˈˈdhʋ̈ kö ˗a ˈwɔn ˗yö ka ˈkun.
21 ˗Kɔ do ˈö ˗Zlan ˗yö mɛn ˗nu bho ˗a ˈka ga ˈgü ˈö ˗këdhösü nu ˗an ˗dhɛ bhë, ˈyö˗ Gbö ˗de ˈpö mɛn ˈö ˗dhi ˗a ˗dhɛ ˈö ˗këdhösü nu ˗a ˗dhɛ.
22 ˗A ˗gɛn ˗mü ꞊dhɛ ˗Zlan ˈyaa za dɔ mɛn ˈˈoo ˗mɛn ˗bha. ˗Ya za ꞊gban ˈˈklɔɔnbho ꞊ʒiaan ö Gbö ˗bha.
23 ˗Yö kë ˈˈdhʋ̈ kö mɛn ꞊gban ˗wa Gbö ꞊bhlëë ˗ya ꞊dhɛ ˗kɔ ˈö ˈwo yö ꞊dede ˗a ꞊bhlëë ˗ya ˗a ˈka bhë ˗a ˈdhö. ˈMɛn ˈö yö ˈti ˗Zlan Gbö ꞊bhlëë ˗ya kö ˗a Dë ˈö˗ bɔ bhë yö ˈti˗ ꞊bhlëë ˗ya ˈpö.
24 A˗ ˗pö ka ˗dhɛ gagade ˈka ꞊dhɛ mɛn ˈö n ˗wo man, ˈö ˈdhaŋ˗ bho Mɛn ˈö n bɔ bhë ˗a ˈˈdhiʋ̈, kö ˗tosɛta ˈö ˈyaa ɲën bhë ꞊yaa˗ ꞊slɔɔ. Za yö ˈti ˗dho dɔ ˗a ˗mɛn ˗bha. ˗A ˗mɛn ˗yö ꞊dhɛ mɛn ˈö ˗ya ga ˗be ˈˈkɛɛ ˈö go ga ˈgü ˗a ˈdhö.
25 «A˗ ˗pö ka ˗dhɛ gagade ˈka ꞊dhɛ ˗a ˈˈtʋ̈ŋ ˗yö nu ˗ni ˈgü, ˈö ˈˈtʋ̈ŋ ˈö ˈˈdhʋ̈ ˗ya nu ˈsaadhö, ˈö mɛn ˗nu ˈö ˗wa ga ˈwo ˗dho ˗Zlan Gbö ˗wo man, ˈö˗ mɛn ˗nu ˈwo wo ˈˈtʋ to ˗a ˗bha ˈwo ˗tosɛta ˗kë.
26 ˗A ˗gɛn ˗mü ꞊dhɛ, ˗kɔ do ˈö ˗tosɛta ˈdhö ˗Zlan yö ꞊dede ˗a ˈgü* ˗a ˈka bhë, ˗yö ˗we ˗a ˗bha ˈpö kö ˗tosɛta ˗yö kë ˗a Gbö ˈgü.*
27 ˗Ya ˗wogbinŋdhɛ nu ˗a ˗dhɛ ˈpö kö ˗yö za dɔ, ˗a ˗gɛn ˗mü ꞊dhɛ yö ˈnën ˈö ˗tɔ mɛn Gbö.
28 ˗A ˈwɔn ˈya ˗dho ka ˈkun, ˗a ˗gɛn ˗mü ꞊dhɛ ˗a ˈˈtʋ̈ŋ ˗yö nu ˗ni ˈgü ˈö mɛn ˗nu ˈö ˗wa ga ˈö ˈwo ga ˗gblü* ˗nu ˈgü ˈwo ˗dho ˗a ˗wo man
29 ˈö ˈwo go ga ˈgü ˈwo yö ˈˈkpɛnŋ. Mɛn ˗nu ˈwo ˈwɔn ˗së ˗kë ˗wo ˗dho ˈgo ga ˈgü kö ˗wo ˗tosɛta kë, ˈö mɛn ˗nu ˈö ˈwo ˈwɔn yaa ˗kë ˈwo go ga ˈgü kö za ˗yö dɔ ˗an ˗bha.
30 ˈMaan ꞊mɔɔn˗ ˗bha ˈa ˈwɔn ˈˈwɛɛ ˈbhaa ˈsü n ˗de ˈgü kö ˈa˗ kë. ˈPë n Dë ˗ya pö ˈa˗ man, ˈyö ˈa ˗gban ˗a ˗ta ˈa za dɔ. A n ˗man za ˗dɔ kpɛnŋdhödhɛ ˈgü, ˗a ˗gɛn ˗mü ꞊dhɛ n ˗de ˗dhidhɛwɔn kë ˗sü ˈyaa ˈnën ˈa˗ ꞊mɛɛn, ˈˈkɛɛ mɛn ˈö n bɔ bhë yö ˈnën ˈa˗ ˗dhidhɛwɔn ˗kë.
31 «˗Ya kë ꞊dhɛ ˈwɔn ˈö ˗gban n ˗bha, man dosɛnŋ ˈnën ˈa˗ ꞊blɛɛ ˗be, kö pë ˈa˗ pö ˈyaa gagade ˈka.
32 ˈˈKɛɛ mɛn ˈˈwɛɛ ˈbhaa ˗yö ˈwɔn ˈö ˗gban n ˗bha ˗a ˗blɛɛ, ˈö ˈa˗ ˈwɔn dɔ ꞊dhɛ pë ˈö˗ pö n ˗bha bhë gagade ˗mü.
33 Ka mɛn ˗nu ˗bɔ Zan ˈˈpiʋ̈, ˈyö gagade ˈö ˗gban n ˗bha ˈö˗ ꞊blɛɛ.
34 Pë ˈö mɛnbhɩɩdhe ˗ya pö ˈyaa ˈnën n ˗bhawɔn ˈdhö˗ ˗bha, ˈˈkɛɛ ˈwɔn ˗nu ˈwo bhë a ˗an ˗blɛɛ ka ˗dhɛ ˈˈdhʋ̈ kö ˈka dha.
35 Gɔndënën ˈö bhë ˗yö ꞊dhɛ ꞊laŋba ˈö dɔ ˗sü ˈka ˈö ˈbhü ˗ni ˈgü ˗a ˈdhö. ˈˈTʋ̈ŋ ˈdɛdɛ ˈˈpiʋ̈ ka zuʋ̈ˈˈ ˗yö ˗kun ˈˈwɩ ˗sü ˈka ˗a ˗bha kö ka ꞊nii ˗yö ˗da ꞊dedewo ˗a ˈbhü ˗dhɛ.
36 ˈˈKɛɛ man ˗zë, pë ˈbhaa ˈö ˈkpii˗ ˈö ˗ʒiö ˗a ˈka ˗a ˈdhɛ ˈö Zan ˗ya ꞊blɛɛ ˗a ˗ta ˗yö n ˗gɔ. ˗A ˗gɛn ˗mü ꞊dhɛ, yö ˗nu ˈö n Dë ˗ya nu n ˗dhɛ kö ˈa ˗an kë, ˈö ˈa ˗an kë ˗ni ˈgü bhë, ˈyö ˈwo˗ ˗zɔn ꞊dhɛ n Dë ˈnën n bɔ.
37 N Dë ˈö n bɔ ˈˈdhʋ̈ bhë, yö ꞊dede ˗yö ˈwɔn ˈö ˗gban n ˗bha ˗a ˗blɛɛ. Ka ˈti˗ ˗wo man do toŋtoŋdhö ɛɛnˈˈ ˗kɔ ˈö˗ ˈka ka ˈti ˗kpan ˗a ˗bha do.
38 ˗Ya ˈgo mü ˈzü ˗a ˗wo ˈyaa ö ˗yɛɛ ˈkun ˗sü ˈka ka ˈgü, ˗a ˗gɛn ˗mü ꞊dhɛ ˗a ˗bha mɛn ˈö˗ bɔ bhë ˈkaa ˈdhaŋ˗ bho ˗a ˈˈdhiʋ̈.
39 «Pë ˗nu ˈwo ˗bɛnzë ˗sü ˈka ˗Zlan ˗Wo ˈsëëdhɛ ˈgü ka ˗an ˈˈpiʋ̈ ˗pɔn, ˈyö sü ꞊dhɛ ka ka ˗zota ꞊dhɛ wo ˈnën ˈka ˗dho bɔ ˗an ˗ta kö ˈka ˗tosɛta ˈö ˈyaa ɲën ˗a ꞊slɔɔ. Pë ˗nu ˈwo ˗bɛnzë ˗sü ˈka ˈˈdhʋ̈ bhë, wo ꞊dede ˈnën ˈwo ˈwɔn ˈö ˗gban n ˗bha ˗a ꞊gbɛkiödhɛ ˗kë.
40 ˈˈKɛɛ ˈsa ˈkaa ˈˈwɩ ˗a ˗bha kö ˈka nu n ˈˈpiʋ̈ kö ˈka ˗këdhösü ꞊slɔɔ.
41 ˈTɔbhɔdhe ˈö go mɛnbhɩɩdhe ˗nu ˈˈpiʋ̈ ˈyaa ˈnën n ˗bhawɔn ˈdhö˗ ˗bha.
42 ˈˈKɛɛ a˗ ˈwɔn ˗dɔ ˈkpakpadhö ꞊dhɛ ˗Zlan ˗dhɔ ˈyaa ka ˈgü.
43 A ˗nu n Dë ˈtɔ ˈgü, ˈˈkɛɛ ˈkaa ˈˈwɩ ˗a ˗bha kö ˈka ka ˗kɔ ˗ya n ˗gɔ. ˗Ya kë ꞊dhɛ mɛn ˈbhaa ˈnën ˈö nu ö ˗de ˈtɔ ˈgü ˗be, ka ˗dho ka ˗kɔ ˗ya ˗a ˗gɔ.
44 Ka ˗dho ˈdhaŋ˗ bho n ˈˈdhiʋ̈ ˗kɔ ˗kë ꞊dhɛ ˈˈkɛɛ kö pë ˈö ka ˗dhɛ ˗së ˈyö ˗tɔ ˈka ka ˈko ˗nu ˈtɔ bhɔ. ˈTɔbhɔdhe ˈdhɛ ˈö go ˗Zlan dosɛnŋ ˈö ˈdhö ˗a ˈˈpiʋ̈, ˈkaa yö ˗zë ˗a mɛɛnˈˈ.
45 ˈYa ˗dho kë ka ˈgü ꞊dhɛ a ˗dho ka zë za ˈka n Dë ˗kuu ˈˈdhiʋ̈. ˈMɛn ˈö ka zë za ˈka ˈyö ˗tɔ Moizö ˈö ˈka ka ˗zo yö ˗a ˗dhɛ.
46 ˈPë ˗kë ˈa˗ pö ˈˈdhʋ̈ ˈyö ˗tɔ ˗ya kë ꞊dhɛ ka ˈdhaŋ˗ ˗bho Moizö ˈˈdhiʋ̈ ˗be ˈˈdhʋ̈ ꞊dedewo, ka ˗dho ˈdhaŋ˗ bho n ˈˈdhiʋ̈. ˗A ˗gɛn ˗mü ꞊dhɛ ˈwɔn ˗nu ˈwo ˗gban n ˗bha ˗yö ˗an ˗bɛnzë.
47 ˈˈKɛɛ ˗ya kë ꞊dhɛ ˈkaa ˈdhaŋ˗ bho pë ˗nu ˈö ˗an ˗bɛnzë ˗an ˈˈdhiʋ̈, ka ˗dho ˈdhaŋ˗ bho n ˈˈdhiʋ̈ ˗kɔ ˗kë ꞊dhɛ?»
-Zoto -a ˈˈpiʋ̈ -wɔn -nu
^ Ɛɛnˈˈ «˗tosɛta ˗nu mɛn ˗nu ˗dhɛ ˗sü ˈˈse ˈdhö ˗Zlan ˗dhɛ.»
^ Ɛɛnˈˈ «˗tosɛta ˗nu mɛn ˗nu ˗dhɛ ˗sü ˈˈse ˗yö kë ˗a Gbö ˗dhɛ.»
^ ˗Wo ˗we «mɛn ˗nu ˈwo ga ˈö ˈwo ˗Zlan zuʋ̈ˈˈ ˈˈpiʋ̈ ˗an ˈka.»
