Nɔɔn˗ ˗së ˈsëëdhɛ ˈö Zan ˗ya ˗bɛnzë 6:1-71
6 ˈDhɛ ˈö ö bo kë ˗sü ˈka ˈˈdhʋ̈, ˈyö Yesu ˗yö Galile ꞊weeyi ˈö ˈwo˗ ˗dhɛ ˈpö Tibedhiadö ꞊weeyi bhë ˗a ˗kan ˈö dho ˗a ꞊zlöö.
2 ˈˈKɛɛ ˈyö mɛn ꞊va ꞊dede ˗wo ˗ʒiö ˗a ꞊kee˗, ˗dhidha ˗nu ˈö kun ˗an kë ˗ni ˈgü ˈö mɛn ˗nu ˗dhɛ bo ˈwo˗ yö bhë ˗a ˗wɔn ˈgü.
3 ˈDhɛ ˈö ˗kë ˈˈdhʋ̈, ˈyö Yesu ˗yö ˗da ˗tɔn do ˈbhaa ˗ta, ˈyö waa ö ˗bha gwëëˈˈ ˗nu ˈwo ˈɲaannu.
4 ˈÖ ˗kë ˈˈdhʋ̈ kö Pakö ˈö ˗kë Zuifö ˗nu ˗bha ˈwlaan˗ ˈka bhë ˗a yi ˗ya yö ꞊klöö˗.
5 ˈDhɛ ˈö Yesu ˗yö ö ˈˈɲan ˈˈdhiʋ̈ ꞊luu ˈö ˗kpan mɛn ꞊va ꞊dede ˈwo kun nu ˗ni ˈgü ˗a ˈˈpiʋ̈ bhë ˗an ˗bha, ˈyö˗ pö Filipö ˗dhɛ: «Kwa ˗dho ˈbluu˗ ˈdhɔ ˈˈmɛn kö mɛn ˗nu ˈwo yö ˗wa ˗bhö?»
6 ˈˈKɛɛ Yesu ˗ya dhɛɛˈˈ ˗kpɔ ˈˈdhʋ̈ kö ˈö˗ ˈgüdan, ˈyö sü ꞊dhɛ pë ˈö ˗dho ˗a kë yö ꞊dede ˗ya ˗dɔ.
7 ˈYö Filipö ˗ya ˗yɔ bɔ ˗a ˗gɔ ˈö˗ pö: «ˈKö ˗kë ꞊dhɛ kwa ˈwëë˗ denie këŋ ꞊plɛ ˈbluu˗ ˗dhɔ, yö ˈti ˗dho ˗mɔn kö mɛn ˈö ˈdhö ˗ya ˈˈklunën ˈdɛdɛ ꞊slɔɔ.»
8 ˈYö˗ ˗bha gwëëˈˈ do ˈwo˗ ˗dhɛ Andre ˈö ˗kë Simɔn Piɛɛ ꞊dhegblü ˈka bhë ˈö˗ pö ˗a ˗dhɛ:
9 «ˈNëngɔnnën ˈˈtɩtɩ do ˈbhaa ˗yö ˈyö ˈö ˈbluu˗* bhɛ ˈˈsoodhu waa ˈyuöga ˈsɛɛn˗ ꞊plɛ ˈdhö ˗a ˗gɔ. ˈˈKɛɛ ˗yö ˗dho yö mɛn ꞊va ˈwo bhë ˗an ˗gɔ ˈˈmɛn?»
10 ˈYö Yesu ˗ya pö ˗an ˗dhɛ: «˗Kaa pö mɛn ˗nu ˗dhɛ ˗wo ˈɲaannu.» ˈDhɛ ˗kë ꞊dhɛ ˈkpaa˗ ˗yö ˗kun ꞊va ˗dhɛ ˈö bhë ˗a ˈgü bhë, ˈyö mɛn ˗nu ˗wo ˈɲaannu ˈˈshia˗. Gɔɔn˗ ˗nu ˈwo kun mü, ˗wo ˗mɔn ˈˈgblü ˈˈsoodhu (5.000) ˗bha.
11 ˈDhɛ ˈö Yesu ˗yö ˈbluu˗ ˈö bhë ˗a sü ˈö ꞊bhɛɛ ˗a ˗ta ˈö ˗Zlan ˈˈnuɛ bho, ˈyö˗ ˗gblü mɛn ˗nu ˈö ˈwo kun ˈɲaannu ˗sü ˈka bhë ˗an ˗ta. Pë do ˈö bhë ˈyö˗ ˗kë ˈyuöga ˈsɛɛn˗ ˗nu bhë ˗an ˈka, ˈyö mɛn ꞊gban ˈˈpɛpɛ ˗wo pë ˗bhö ˈö ˗an ˈgwü ˗yö dɔ.
12 ˈDhɛ ˗wa pë ˗bhö ˈö ˗an ˈgwü ˗ya dɔ, ˈyö Yesu ˗ya pö ö ˗bha gwëëˈˈ ˗nu ˗dhɛ: «˗A ˈˈkluklu ˗nu ˈwo to, ˗ka ˗an ˗lo ˈkwëëdhö kö ˈya ˗dho kë pë shiʋ̈ˈˈ ˗sü ˈka.»
13 ˈYö ˈbluu˗ bhɛ ˈˈsoodhu ˈö mɛn ˗nu ˗wa ˗bhö bhë ˗a ˈˈklu ˈö to ˈö ˈwo˗ ˗lo ˈkwëëdhö ˈö ˗kë ꞊töö ˗ɲaan ˗kɔŋ do ö ga ꞊plɛ (12).
14 ˈDhɛ ˈö mɛn ˗nu ˗wo ˗dhidha ˈö˗ ˗kë bhë ˗a yö, ˈyö ˈwo ˗ya ˗a pö ˗sü ˗bha: «Mɛn ˈö yö, ˗Zlan ˗wodhiʋ̈lomɛn ˈö˗ nu ˗wɔn ˈdhö ˗dhö ˈˈkpɔnŋ ꞊taa bhë yö ˗mü ꞊dedewo.»
15 ˈDhɛ ˈö ˗kë ˈˈdhʋ̈, ˈyö Yesu ˗ya yö ꞊dhɛ ˗wo ˈdho˗ nu kö ˗wo ö ˈkun ˗wo ö kë ˗gblüdë ˈka. ˈYö go ˗dhɛ ˈö bhë ˗a ˈgü ˈzü ˈö ˗ʒiö ˈö dho ö do ˈka ˗tɔn do ˈbhaa ˗ta.
16 ˈDhɛ ˈˈbin ˈdhö ˈmën ˗ni ˈgü, ˈyö˗ ˗bha gwëëˈˈ ˗nu ˗wo ꞊yɔɔ ˈwo nu ꞊weeyi ˈˈdhiʋ̈,
17 ˈyö ˈwo ˗da ˈˈyitagɔ do ˈgü, ˈö ˈwo ˗ya ˈˈyi ˈˈkan ˗sü ˗bha kö ˈwo ˈdho Kapɛɛnaɔmö. ˈÖ ˗kë ˈˈdhʋ̈ kö ˈˈbin ˗ya ˈmën ˈsaadhö, ˈˈkɛɛ kö Yesu yö ˈti nu ˗an ˈˈpiʋ̈ ꞊köŋ.
18 ˗Ya ˈgo mü ˈzü, ꞊weeyi ˗kun ˗bhaŋbhaŋˈˈ ˗ni ˈgü ˈyö sü ꞊dhɛ ˈˈtee ˈˈgbɩɩ˗ ˗yö ˗kun ʒiö ˗ni ˈgü.
19 ˈDhɛ ˈwo ˈˈyitagɔ ˗blü ˈö ˈwo yö ˈˈkɩdhʋŋ ˈˈsoodhu ɛɛnˈˈ ˈˈsɔɔdo ˗naan ꞊taa, ˈyö ˈwo ˗kpan Yesu ˗bha kö ˗yö ˈˈta ˈsü ˗ni ˈgü ꞊weeyi ˗ta ˗yö ꞊ɲɔɔn ˗ni ˈgü ˗an ˗bha ˈˈyitagɔ ˗bha, ˈyö ˈˈsuʋ̈ ˗yö ˗da ˗an ˈgü.
20 ˈˈKɛɛ ˈyö˗ pö ˗an ˗dhɛ: «ˈˈSuʋ̈ ˈya ˗dho ka kë, man ˗mü!»
21 ˗Yö ˗kun ˗an ˈˈpiʋ̈ ꞊dhɛ ˈwo Yesu ˗da ˈˈyitagɔ ˈgü, ˈˈkɛɛ ˈyö to mü ˈö ˗an ˗bha ˈˈyitagɔ ˗yö yö ˈˈkpɔnŋ ˗bha ˗dhɛ ˈwo kun ˈdho ˗ni ˈgü ˗a ˗bha bhë ˗a ˈgü.
22 ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö mɛn ꞊va ˈö ˈwo to ˈˈyi ꞊zlöö bhë, ˈwo˗ yö ꞊dhɛ ˈˈyitagɔ ˈˈwɛɛ ˈbhaa ˈyaa ˗dhɛ ˈö bhë ˗a ˈgü. ˈˈYitagɔnën ˈˈtɩtɩ do ˗yö ˗kun mü ˗be, ˈˈkɛɛ Yesu yö ˈti ˗da ˗a ˈgü ö ˗bha gwëëˈˈ ˗nu ˈˈpiʋ̈, ˈyö sü ꞊dhɛ ˗dhɛ ˈö˗ ˗bha gwëëˈˈ ˗nu ˗wo kun ˈdho ˗ni ˈgü kö ˈyaa ˗an ꞊kee˗.
23 ˈˈYitagɔ ˗nu ˈwo go Tibedhiadö ˗wo ˗nu ˈö ˈwo ˗lo ˗dhɛ ˈö Dëmɛn ˗yö ꞊bhɛɛ ˈbluu˗ ˗ta ˗a ˗bha ˈö ˗Zlan ˈˈnuɛ bho ˈö mɛn ˗nu ˗wa ˗bhö bhë, ˗a ˈˈsuee.
24 ˈDhɛ mɛn ˗gbaa ꞊va ˈwo bhë ˈwo˗ yö ꞊dhɛ Yesu waa ö ˗bha gwëëˈˈ ˗nu ˈwaa ˗dhɛ ˈö bhë ˗a ˈgü, ˈyö ˈwo ˗ya ˈˈyitagɔ ˗nu ˈwo ˈˈdhʋ̈ ˗an ˈgü ˈö ˈwo dho Kapɛɛnaɔmö kö ˈwo Yesu mɛɛnˈˈ.
25 ˈDhɛ ˈwo ˈˈyi ˗kan ˈwo ˗kpan Yesu ˗bha, ˈyö ˈwo˗ pö ˗a ˗dhɛ: «˗Gɔmɛn, ü ˗lo ˗dhɛ ˈö yö ˗a ˈgü ˈˈtʋ̈ŋ ˗mɛɛn ˈka?»
26 ˈYö Yesu ˗ya ˗yɔ bɔ ˗an ˗gɔ ˈö˗ pö: «A˗ ˗pö ka ˗dhɛ gagade ˈka ꞊dhɛ ˗dhidha ˗nu ˈö ˈka ˗an yö bhë ˈyaa ˈnën ˈka n ꞊mɛɛn ˗a ˗wɔn ˈgü. ˈBluu˗ ˈö ˈka˗ ˗bhö ˈö ka ˈgwü ˗yö dɔ bhë, yö ˈnën ˈö ˗wɔn ˈgü ˈka n ꞊mɛɛn.
27 ˗Ka yö kë, ˈˈkɛɛ ˈka ˗dho ˗a kë ˗bhöpë ˈdhɛ ˈö ꞊shiʋ̈ bhë ˗a ˗wɔn ˈgü. ˗Kaa kë ꞊ʒiaan ˗bhöpë ˈdhɛ ˈö ˈyaa shiʋ̈ˈˈ, ˈö ˗tosɛta ˈö ˈyaa ɲën ˗a nu mɛn ˗dhɛ, ˈö mɛn Gbö dho ˗a nu ka ˗dhɛ bhë ˗a ˗wɔn ˈgü. ˗A ˗gɛn ˗mü ꞊dhɛ, mɛn ˈö bhë yö ˈnën ˈö˗ Dë ˗Zlan yö ꞊dede ˗ya ˗zɔn ꞊dhɛ ˗a ˈˈdhiaa ˗yö ö ˈgü, ˈö˗ ꞊duaakëpë ˗ya ˗a ˗bha.»
28 ˈDhɛ ˈö˗ pö ˈˈdhʋ̈, ˈyö ˈwo˗ pö ˗a ˗dhɛ: «Yö ˗mɛɛn ˈö ˗Zlan ˈdhö˗ ˈˈpiʋ̈ kö ˈyi˗ kë?»
29 ˈYö Yesu ˗ya ˗yɔ bɔ ˗an ˗gɔ ˈö˗ pö: «Yö ˈö ˗Zlan ˈdhö˗ ˈˈpiʋ̈ ˈka˗ kë ˈyö ꞊nɛn: ˗Ka ka ˗zo yö mɛn ˈö˗ bɔ bhë ˗a ˗dhɛ.»
30 ˈYö ˈwo˗ pö Yesu ˗dhɛ: «˗Dhidha ˗mɛɛn ˈü ˗dho ˗a kë kö ˈyi˗ yö, kö ˈyi ˈdhaŋ˗ bho ü ˈˈdhiʋ̈? ˗Mën ˗wɔn ˈˈmlünmlünsü ˈü ˗dho ˗a kë?
31 Yi ˈˈbhɛman ˗nu ˗wo ˈmanö ˗bhö ˈˈyɛta. ˗Yö ˗bɛnzë ˗sü ˈka ˈˈdhʋ̈ ˗Zlan ˗Wo ˈgü ꞊dhɛ: ‹˗Yö ˈbluu˗ ˈö go dhaŋ˗ ˈgü ˗a ˗nu ˗an ˗dhɛ kö ˗wa ˗bhö.›»
32 ˈYö Yesu ˗ya pö ˗an ˗dhɛ: «A˗ ˗pö ka ˗dhɛ gagade ˈka ꞊dhɛ, Moizö yö ˈti ˈbluu˗ ˈö go dhaŋ˗ ˈgü ˗a nu ka ˗dhɛ, ˈˈkɛɛ n Dë ˗zë ˗yö ˈbluu˗ ꞊dede ˈö go dhaŋ˗ ˈgü ˗a nu ˗ni ˈgü ka ˗dhɛ.
33 ˗A ˗gɛn ˗mü ꞊dhɛ ˗Zlan ˗bha ˈbluu˗ ˈnën ˈö ˗tɔ ˗a ˈdhɛ ˈö go dhaŋ˗ ˈgü ˈö ˗këdhösü nu ˈˈkpɔnŋtaamɛn ˗nu* ˗dhɛ.»
34 ˈDhɛ ˈö˗ pö ˈˈdhʋ̈, ˈyö ˈwo˗ pö ˗a ˗dhɛ: «Dëmɛn, ˗bhö ˈbluu˗ ˈdhɛ ˈö bhë ˗a nu yi ˗dhɛ ˗kplawo.»
35 ˈYö Yesu ˗ya pö ˗an ˗dhɛ: «Man ˈnën ˗a ˗tɔ ˈbluu˗ ˈö ˗këdhösü nu mɛn ˗dhɛ. Mɛn ˈö nu n ˈˈpiʋ̈, din˗ yö ˈti ˗dho ˗a kë toŋtoŋdhö. Mɛn ˈö ˗dho ˗a ˗zɔn ꞊dhɛ ö ö ˗zo ˗yö n ˗dhɛ, ˈˈyi mü ˗dhɔ yö ˈti ˗dho ˗a kë ˈpö toŋtoŋdhö.
36 ˈˈKɛɛ ꞊dhɛ ˗kɔ ˈa˗ pö ˗a ˈka ka ˗dhɛ bhë ˗a ˈdhö, ka ˗kpan n ˗bha ˈˈkɛɛ ka ˈti ka ˗zo yö n ˗dhɛ.
37 Mɛn ˈˈpɛpɛ ˈö n Dë ˗yö ˗an nu n ˗dhɛ, ˗wo ˗dho nu n ˈˈpiʋ̈, ˈyö mɛn ˈö nu n ˈˈpiʋ̈ n ˈti ˗dho ˗a kë toŋtoŋdhö.
38 ˗A ˗gɛn ˗mü ꞊dhɛ ˈgo ˈa˗ wo dhaŋ˗ ˈgü ˈa ꞊yɔɔ bhë, n ˈti nu kö ˈa n ˗de dhɔɔbhaawɔn kë, a ˗nu ꞊ʒiaan kö mɛn ˈö n bɔ bhë ˈa˗ dhɔɔbhaawɔn kë.
39 Mɛn ˈö n bɔ ˈˈdhʋ̈ bhë, ˈpë ˈö˗ dhɔɔbhaawɔn ˈka ˈyö ˗tɔ kö mɛn ˗nu ˈö ˗an nu n ˗dhɛ bhë, ˗a mɛn dosɛnŋ ˗ʒiaan ˈya ˗dho ꞊dhiɔŋ˗ n ˗kɔ ˗ta. ˗Ya ˈˈpiʋ̈ ꞊ʒiaan kö ˈa ˗an bho ga ˈgü ˈˈtʋ̈ŋ ˗totaabhasü ˈgü.
40 ˗A ˗gɛn ˗mü ꞊dhɛ, pë ˈö n Dë dhɔɔbhaawɔn ˈka ˈyö ˗tɔ kö mɛn ˈö ˗we ˗a Gbö ˗wɔn ˗bha, ˈö ö ˗bha ˗zo ˗yö ˗a ˗dhɛ ˗sü ˗zɔn, ˗yö ˗tosɛta ˈö ˈyaa ɲën ˗a ꞊slɔɔ. ˗A mɛn ˈö ˈˈdhʋ̈, a ˗dho ˗a bho ga ˈgü ˈˈtʋ̈ŋ ˗totaabhasü ˈgü.»
41 ˈDhɛ ˈö ˗kë ˈˈdhʋ̈, ˈyö Zuifö ˗nu ˗wo ˗ya ˗a ˗wɔn blɛɛˈˈ ˗sü ˗bha wo ˗wo ꞊löö ˗a pö ˈö˗ wo: «Man ˈnën ˈa ˗tɔ ˈbluu˗ ˈö go dhaŋ˗ ˈgü» bhë ˗a ˗wɔn ˈgü.
42 ˈYö ˈwo ˗ya ˗a pö ˗sü ˗bha: «Yesu ˈö ˗kë Zozɛfö gbö ˈka, ˈö ˈkwa˗ dë waa˗ dhe ˗an dɔ bhë, ˈyaa ˈnën ˈö yö ˗ee? ˗Yö ˗kë mü ꞊dhɛ ˈsa ˈö˗ pö: ‹A ˗go dhaŋ˗ ˈgü›?»
43 ˈYö Yesu ˗ya pö ˗an ˗dhɛ: «˗Ka ka ꞊kwaa n ˗wɔn blɛɛˈˈ ˗sü ˗zü ka ˈko ꞊zinŋgü.
44 Mɛn ˈyaa ꞊mɔɔn˗ ˗bha ˗yö nu n ˈˈpiʋ̈ kö n Dë ˈö n bɔ bhë yö ˈti˗ ˗mɛn ˈˈgan n ˗bha. A ˗dho ˗a ˗mɛn bho ga ˈgü ˈˈtʋ̈ŋ ˗totaabhasü ˈka.
45 Pë ˈö ˗bɛnzë ˗sü ˈka ˗Zlan ˗wodhiʋ̈lomɛn ˗nu ˗bha ˈsëëdhɛ ˈgü ˗ya ˗pö: ‹Zoova ˗dho ˗an ꞊gban ˈˈpɛpɛ ꞊klaŋ kë.› Mɛn ˈˈpɛpɛ ˈö ˈwo wo ˈˈtʋ to n Dë ˗bha ꞊klaŋwo ˗nu ˗bha, ˈö ˈwo ˗we ˗a ˗bha, ˗wo ˗nu n ˈˈpiʋ̈.
46 ˗A ˗gɛn ˈyaa ˈnën ˗tɔ ꞊dhɛ mɛn ˈbhaa ˗ya ˗kpan n Dë ˗bha do. ˗Ya ˈˈkan man ˈa go ˗Zlan ˈˈpiʋ̈ bhë n ˗bha, mɛn ˈˈwɛɛ ˈbhaa ˈyii ˗kpan n Dë ˗bha do.
47 A˗ ˗pö ka ˗dhɛ gagade ˈka ꞊dhɛ, mɛn ˈö ˗zoyödhe ˈdhö˗ ˗gɔ, kö ˗tosɛta ˈö ˈyaa ɲën ꞊yaa˗ ꞊slɔɔ.
48 «Man ˈnën ˈa ˗tɔ ˈbluu˗ ˈö ˗këdhösü nu mɛn ˗dhɛ.
49 ˈKö ˗kë ꞊dhɛ ka ˈˈbhɛman ˗nu ˗wo ˈmanö ˗bhö ˈˈyɛta, ˗wo ˗dho ˈwo ga.
50 ˈˈKɛɛ mɛn ˈö ˈbluu˗ ꞊dede ˈdhɛ ˈö go dhaŋ˗ ˈgü bhë ˗a ˗bhö, yö ˈti ˗dho ga.
51 Man ˈnën ˈa ˗tɔ ˈbluu˗ ˈˈbhɩɩ˗ ˈö go dhaŋ˗ ˈgü. Mɛn ˈö ˈbluu˗ bhë ˈö˗ ˗bhö, ˗yö ˗dho ˗tosɛta kë yi ꞊gban ˈka. ˈBluu˗ ˈa ˗dho ˗a nu ˈˈdhʋ̈ bhë yö ˈnën ˈö ˗tɔ n ꞊nënŋ, kö ˈˈkpɔnŋtaamɛn ˗nu* ˗wo bɔ ˗a ˗ta ˗wo ˗këdhösü ꞊slɔɔ.»
52 ˈDhɛ ˈö˗ pö ˈˈdhʋ̈, ˈyö ˗zuödhe ˗yö ˗da Zuifö ˗nu ꞊zinŋgü, ˈyö ˈwo ˗ya ˗a pö ˗sü ˗bha wo ˈko ˗nu ˗dhɛ: «Mɛn ˈö yö ˗ya ˗pö ö ˗dho ö ꞊nënŋ nu kwa ˗dhɛ ˗kɔ ˗kë ꞊dhɛ kö ˈkwa˗ ˗bhö?»
53 ˈYö Yesu ˗ya pö ˗an ˗dhɛ: «A˗ ˗pö ka ˗dhɛ gagade ˈka ꞊dhɛ, ka ˈti maan mɛn Gbö ˗mɛn n ꞊nënŋ ˗bhö, ka ˈti n ꞊ɲɔɔn mü, kö ˗këdhösü ˈyaa ka ˗gɔ.*
54 Mɛn ˈö n ꞊nënŋ ˗bhö, ˈö n ꞊ɲɔɔn mü, kö ˗tosɛta ˈö ˈyaa ɲën ˗ya ˗mɛn ˗gɔ. A ˗dho ˗a ˗mɛn ˗buö ˈˈtʋ̈ŋ ˗totaabhasü ˈka.
55 ˗A ˗gɛn ˗mü ꞊dhɛ, n ꞊nënŋ ˗yö ˗bhöpë ꞊dede ˈka, ˈö n ꞊ɲɔɔn ˈdhö müpë ꞊dede ˈka.
56 Mɛn ˈö n ꞊nënŋ ˗bhö, ˈö n ꞊ɲɔɔn mü, kö yaa˗ ˗mɛn yi ˗kɔ ˗yö ö ˈkoo ˗kplawo.
57 ˗Kɔ do ˈö n Dë ˈö ˈˈbhɩɩ˗ ˈö n bɔ ˗a ˈka, ˈa ˗tosɛta ˗kë ˗a ˈsaa˗ ˈgü bhë, mɛn ˈö n ꞊nënŋ ˗bhö ˗yö ˗dho ˗tosɛta kë ˈpö n ˈsaa˗ ˈgü.
58 ˗Kɔ ˈö ˈbluu˗ ˈö go dhaŋ˗ ˈgü ˈö˗ ˈka ˈyö bhë. ˈYaa ꞊dhɛ ˈbluu˗ ˈö ka ˈˈbhɛman ˗nu ˗wa ˗bhö ˈˈkɛɛ ˈö ˈwo ga ꞊taabha bhë ˗a ˈdhö. ˈMɛn ˈö ˈbluu˗ ˈdhɛ ˈö bhë ˗a ˗bhö, ˗yö ˗dho ˗tosɛta kë ˗kplawo.»
59 ˗Yö ˈwɔn ˗nu ˈwo bhë ˗an ˗blɛɛ ˈˈdhʋ̈ kö ˗yö mɛn ˗nu ꞊klaŋ kë ˗ni ˈgü ˗yakwëë ˗kë ˗a ˈgü ˗kɔ do ˈgü* Kapɛɛnaɔmö.
60 ˈDhɛ ˈö˗ ˗bha gwëëˈˈ ˗nu ˗wo ˗wo ˈö bhë ˗a man, ˈyö˗ mɛn ꞊vadhɛ ˗wa pö: «ˈMën ˈö ˗we ˈˈdhʋ̈? De ˈö ꞊mɔɔn˗ ˗bha ˗yö ˈˈwɩ ˈwɔn ꞊suu ˈö ˈˈdhʋ̈ ˗a ˗bha?»
61 ˈˈKɛɛ ˈdhɛ ˈö Yesu ˗ya ˈwɔn dɔ ꞊dhɛ pë ˈö˗ pö bhë ˈyö ö ˗bha gwëëˈˈ ˗nu ˈdhö˗ ˗wɔn blɛɛˈˈ ˗ni ˈgü wo ˈko ꞊zinŋgü bhë, ˈyö˗ pö ˗an ˗dhɛ: «Pë ˈa˗ pö bhë ˗ya kë ka ˗puö ˗gɛn ˈka ˗ee?
62 ˗Ya kë ꞊dhɛ ˗kpan ˈnën ˈka˗ wo mɛn Gbö ˗bha ˗be kö ˗yö ˈdho ˗ni ˈgü ˈˈdhuŋ ˗dhɛ ˈö kun ˗a ˗bha ˗be bhë ˗a ˈgü, ˈka ˗dho ˗a kë ꞊dhɛ ˈsa?
63 ˗Zlan ˗bha ˗zuu ˈnën ˗këdhösü nu mɛn ˗dhɛ, ˈˈkɛɛ mɛn ꞊nënŋ ˗zë ˈyaa pë ˈbhaa ˈka. ˈWɔn ˗nu ˈa ˗an ꞊blɛɛ ka ˗dhɛ bhë, ˗Zlan ˗bha ˗zuu ˗kɔ ˈgü ˗wɔn ˗mü. ˗Yö ˗këdhösü ˗nu mɛn ˗dhɛ.
64 ˈˈKɛɛ mɛn ˈbhaa ˗nu ˗wo ka kpö ˈgü ˈö ˗zoyödhe ˈyaa ˗an ˗gɔ.» ˗A pö ˈö Yesu ˗ya wo ˈˈdhʋ̈ bhë ˗a ˈklɔɔ˗ ˗mü ꞊dhɛ, ˈö go ˗a zübhodhɛ ˗bha ˈö yö ˗a ˈka ˈˈtʋ̈ŋ ˈö bhë ˗a ˗bha, mɛn ˗nu ˈö ˈwaa kun wo ˗zo yö ˗ni ˈgü ˗a ˗dhɛ waa mɛn ˈö ˗dho ˗a ˈˈdhoodɔ ꞊taabha bhë, ˗yö ˗an ˗dɔ.
65 ˈYö Yesu ˗ya pö ˗an ˗dhɛ ˈzü: «Yö ˈnën ˈö˗ ˗wɔn ˈgü ˈa˗ pö ka ˗dhɛ, mɛn ˈbhaa ˈyaa ꞊mɔɔn˗ ˗bha ˗yö nu n ˈˈpiʋ̈ kö n Dë yö ˈti ˈˈwɩ ˗a ˗bha ˗a ˗gɔ.»
66 ˗A pö ˈö˗ wo ˈˈdhʋ̈ bhë ˗a ˗wɔn ˈgü, ˗a ˗bha gwëëˈˈ ꞊vadhɛ ˗wo ˗go ˗a ꞊kee˗ ˈö ˈwo wo ꞊yɛɛ ˗kë wo ˗bha pë ˗nu ˈwo ˗an to wo ꞊zlöö ˗an ˈˈpiʋ̈.
67 ˈDhɛ ˈö ˗kë ˈˈdhʋ̈, ˈyö Yesu ˗ya pö ö ˗bha bɔmɛn ˗nu ˗kɔŋ do ö ga ꞊plɛ ˈwo bhë ˗an ˗dhɛ: «Ka ˗de ˈpö ꞊wɛ, ˈkaa˗ ˈˈpiʋ̈ ˈka ˈdho ˗ee?»
68 ˈYö Simɔn Piɛɛ ˗ya ˗yɔ bɔ ˗a ˗gɔ ˈö˗ pö: «N Dëmɛn, yi ˗dho ü ˈto kö ˈyi ˈdho de ˈˈpiʋ̈? ˗Wo ˗nu ˈü ˗an pö ˗ni ˈgü bhë ˗wo ˗tosɛta ˈö ˈyaa ɲën ˗a ˗nu mɛn ˗dhɛ.
69 Yi ˈdhaŋ˗ ˗bho ü ˈˈdhiʋ̈, ˈö ˈyi˗ ˈwɔn dɔ ꞊dhɛ bhi ˈnën ˈü ˗tɔ mɛn ˈö ˈˈslʋ̈ʋ̈slʋ̈ ˈö ˗Zlan ˗ya bɔ.»
70 ˈYö Yesu ˗ya pö ˗an ˗dhɛ: «Mɛn ˗kɔŋ do ö ga ꞊plɛ ˈö ˈka bhë, ˈmaan ˈnën ˈa n ˗kɔ ˗yɛ ka ˗bha ˗ee? ˈˈKɛɛ mɛn do ˗yö ka ꞊zinŋgü ˈö ꞊dhɛ dügɔmɛn* ˈdhö.»
71 Zuda ˈö ˗kë Simɔn Isikadhiɔtö gbö ˈka bhë yö ˈnën ˈö kun ˈˈwɩ ˗ni ˈgü ˗a ˈka. ˗A ˗gɛn ˗mü ꞊dhɛ Zuda ˈö ˈˈdhʋ̈ yö ˈnën ˈö ˗dho ˗a ˈˈdhoodɔ ꞊taabha ˈˈkɛɛ kö ˗a ˗bha bɔmɛn ˗nu ˗kɔŋ do ö ga ꞊plɛ ˈwo bhë ˗a mɛn do ˗mü ˗a ˈka.
-Zoto -a ˈˈpiʋ̈ -wɔn -nu
^ ˗A ˈbluu˗ ˈö ˈˈdhʋ̈ ˗wa ˗yö ˗kë ˈˈklëën ˗bi ˈka.
^ Glɛkö ˗wo ˈgü ˈyö ˗tɔ «ˈˈkpɔnŋtaadhɛ.»
^ Glɛkö ˗wo ˈgü ˈyö ˗tɔ «ˈˈkpɔnŋtaadhɛ.»
^ Glɛkö ˗wo ˈgü ˈyö ˗tɔ «ˈyaa ka ˈgü.»
^ ˗Yö ꞊mɔɔn˗ ˗bha ˈö ˗kë «mɛn ˗nu ꞊zinŋgü» ˈka.
^ Glɛkö ˗wo kpö ˈö ˗kë dügɔmɛn ˈka bhë, «˗yö ˗gban mɛn ˈö mɛn ˈˈwɛɛ ˈtɔ ꞊shiʋ̈ ˗a ˗bha.»
