Nɔɔn˗ ˗së ˈsëëdhɛ ˈö Zan ˗ya ˗bɛnzë 7:1-52
7 ˈDhɛ ˗ya ö bo kë ˗sü ˈka ˈˈdhʋ̈, ˈyö Yesu ˗yö dho ö ˗bha ˈˈta ˈka ˈˈdhiʋ̈ ˗glü Galile ˗sɛ ˈgü ˗sü ˈka. ˈYaa kun ˗a ˈˈpiʋ̈ ꞊dhɛ ˈö ˗da Zude ˗pö ˗nu ˈgü, ˗a ˗gɛn ˗mü ꞊dhɛ Zuifö ˗nu ˗wo ˗kun ˗a ˈˈslö mɛɛnˈˈ ˗ni ˈgü kö ˈwo˗ zë.
2 ˈˈKɛɛ ˈö kun ˈˈdhʋ̈ kö Zuifö ˗nu ˗bha ˈwlaan˗ ˈwo˗ ˗kë ˈgbakɔ ˗nu ꞊löö bhë ˗a ˈˈtʋ̈ŋ ˗ya yö ꞊klöö˗.
3 ˈYö˗ ꞊dhegblü gɔɔn˗ ˗nu ˗wa pö ˗a ˗dhɛ: «˗Bhö ˈgo ˗dhɛ ˈö yö ˗a ˈgü ˈü ˈdho Zude, kö ˈwɔn ˗nu ˈü ˗an kë ˗ni ˈgü bhë ü ˗bha gwëëˈˈ ˗nu ˈwo ˈmü ˗wa yö ˈpö.
4 ˗A ˗gɛn ˗mü ꞊dhɛ mɛn ˈö˗ ˈˈpiʋ̈ kö mɛn ꞊gban ˗wo ö dɔ, ˈyaa ö ˗bha ˈwɔn ˗nu kë ˗bindhe ˈgü. ˈWɔn ˗nu ˈwo bhë ü ˗an kë ˗ni ˈgü, ü ˗de ˗zɔn ˈˈkpɔnŋtaamɛn ˗nu ˈˈpɛpɛ ˗dhɛ.»
5 ˗A ꞊dhegblü ˗nu ˈwo ˈˈdhʋ̈ bhë, ˈwaa kun wo ˗zo yö ˗ni ˈgü ˗a ˗dhɛ.
6 ˈDhɛ ˈwo˗ pö ˈˈdhʋ̈, ˈyö Yesu ˗ya pö ˗an ˗dhɛ: «N ˗man ˈˈtʋ̈ŋ yö ˈti ˗lo ꞊köŋ, ˈˈkɛɛ ka ˗zë ˈˈtʋ̈ŋ ˈsaadhö ˗yö ˗së ka ˗bha ˈka.
7 Ka ˗san ˗bha ˈˈkpɔnŋtaamɛn ˗nu kë ˗sü ˗gɛn ˈˈwɛɛ ˈbhaa ˈyaa ˗dhö, ˈˈkɛɛ man ˗zë n ˗san ˗yö ˗an ˗kë, ˈyö sü ꞊dhɛ a˗ ˗zɔn ˈˈpuu ˈka ꞊dhɛ ˗an këwɔn ˗nu ˗wo ˈya˗.
8 ˗Ka ˈdho ˈwlaan˗ ˈö bhë ˗a ˗ta. ˈˈKɛɛ man ˗zë n ˈti ˗dho ˈdho ˗a ˗ta ꞊köŋ, ˗a ˗gɛn ˗mü ꞊dhɛ n ˗man ˈˈtʋ̈ŋ yö ˈti ˗lo ˗së ˈka.»
9 ˈDhɛ ˈö ö bo ˗a pö ˗sü ˈka ˗an ˗dhɛ ˈˈdhʋ̈, ˈyö to Galile.
10 ˈDhɛ ˈö˗ ꞊dhegblü ˗nu ˗wo dho ˈwlaan˗ ˈö bhë ˗a ˗ta, ˈyö yö ˗de ˈpö ˈö dho mü, ˈˈkɛɛ ˗yö ˗dho ˗bindhe ˈgü, yö ˈti ö ˗de ˗zɔn mɛn ˗nu ˗dhɛ.
11 ˈYö Zuifö ˗nu ˗wo ˗ya ˗a mɛɛnˈˈ ˗sü ˗bha ˈwlaan˗ ˈö bhë ˗a ˗ta, kö ˗wa pö ˗ni ˈgü: «Gɔndënën ˈö bhë ˗yö ˈˈmɛn?»
12 Mɛn ꞊vadhɛ ˗kun ˗a ˗wɔn blɛɛˈˈ ˗ni ˈgü ˈgbɛ ꞊dedewo wo ˗wo ꞊löö mɛn ˗nu ꞊zinŋgü mü. Mɛn ˈbhaa ˗nu ˗kun ˗a pö ˗ni ˈgü: «ˈWɔnsëkëmɛn ˗mü.» Kö mɛn ˈˈwɛɛ ˈbhaa ˗nu ˗wa pö ˗ni ˈgü: «˗Abin! ˈˈKpënŋ˗ ˗kë mɛn ˗gɔ ˗mɛn ˗mü.»
13 ˈˈKɛɛ mɛn ˈbhaa ˈyaa kun ˗mɔn ˗ni ˈgü ˗a ˗bha kö ˗yö dɔ mɛn ˈˈpɛpɛ ˈˈɲandhiʋ̈ ˗ya ˗wɔn blɛɛˈˈ, ˗a ˗gɛn ˗mü ꞊dhɛ ˗wo ˗kun ˈˈsuʋ̈ ˗ni ˈgü Zuifö ˗nu ˗gɔ.
14 ˈDhɛ ˈwo ˈwlaan˗ ˗kë ˈö ˈwo ˗ʒiö ˗a ꞊zinŋgü ˈdɛdɛ, ˈyö Yesu ˗yö dho ˗Zlan ˗dhɔkë ˗a ˈgü ˗kɔ ˈgü ˈö ˗ya mɛn ˗nu ꞊klaŋ kë ˗sü ˗bha mü.
15 ˈYö˗ ˗bha mɛn ꞊klaŋ kë ˗kɔ ˈwɔn ˗yö Zuifö ˗nu kun, ˈyö ˈwo˗ pö: «˗Yö ˗kë ꞊dhɛ ˈö gɔndënën ˈö yö ˈö ˗Zlan ˗Wo* dɔ ˗së ˈka ˈˈdhʋ̈ ˈˈkɛɛ kö yö ˈti ꞊klaŋ kë?»*
16 ˈYö Yesu ˗ya ˗yɔ bɔ ˗an ˗gɔ ˈö˗ pö: «˗Wo ˗nu ˈa ka ꞊klaŋ kë ˗ni ˈgü ˗a ˈka bhë, n ˈti˗ ˈsü n ˗de ˈgü, ˗wo ˗go mɛn ˈö n bɔ bhë ˗a ˈˈpiʋ̈.
17 Mɛn ˈö˗ ˈˈpiʋ̈ ˈö ˗Zlan dhɔɔbhaawɔn kë, ˗ya kë ꞊dhɛ ˈwɔn ˗nu ˈa mɛn ˗nu ꞊klaŋ kë ˗ni ˈgü ˗a ˈka bhë ˗wo ˗go ˗Zlan ˈˈpiʋ̈ ɛɛnˈˈ a ˗an ˗sü n ˗de ˈgü ˈa ˗an ꞊blɛɛ, ˗a ˗mɛn ˗dho ˗a ˈwɔn dɔ.
18 Mɛn ˈö ˈwɔn ˗nu sü ˈö ˗de ˈgü ˈö˗ ꞊blɛɛ, kö ö ˗de ˈtɔ bhɔ ˗sü ˈnën ˈö˗ ˗ʒian ꞊mɛɛn. ˈˈKɛɛ mɛn ˈdhɛ ˈö mɛn ˈö˗ bɔ bhë ˗a ˈtɔ bhɔ ˗ʒian ꞊mɛɛn, kö gagade pömɛn ˗mü ˗a ˈka, ˈwɔn ˈö ˈyaa kpɛnŋdhö ˈyaa˗ zuʋ̈ˈˈ ˈgü.
19 Moizö ˗yö ˈtɔŋ˗ ˗nu ka ˗dhɛ, ˈyaa ˈˈdhʋ̈ ˗ee? ˈˈKɛɛ ka kpö ˈgü mɛn ˈˈwɛɛ ˈbhaa yö ˈti ˈtɔŋ˗ ˈö bhë ˗a ˗ya ꞊bhlëë ˈgü. ˈMën ˗kë ˈö ˈka˗ ˈˈpiʋ̈ kö ˈka n zë?»
20 ˈYö mɛn ꞊va ˈwo kun ˈmü bhë ˈwo˗ pö ˗a ˗dhɛ: «˗Zuu yaa ˗yö ü ˈgü. De ˈö˗ ˈˈpiʋ̈ kö ˈö ü zë?»
21 ˈYö Yesu ˗ya ˗yɔ bɔ ˗an ˗gɔ ˈö˗ pö: «Pë dosɛnŋ ˈˈkpaan ˈa˗ ˗kë bhë, yö ˗ga ˈö˗ ˈwɔn ˗ya ka ˈkun bhë.
22 Yö ˈnën ˈö˗ ˗wɔn ˈgü ˈö Moizö ˗yö ˈtɔŋ˗ ˈö ˗gban ˗dho ˈgbannën ˈgü ˗sü ˗bha ˗a dɔ ka ˗ta. Yö ˈti kë ꞊dhɛ ˗a zü ˗yö ˗dɔ Moizö ˗bha ˈˈtʋ̈ŋ ˈgü, ˗a zü ˗yö ˗dɔ ka ˈˈbhɛman ˗nu ˗bha ˈˈtʋ̈ŋ ˈgü. ˈYö ˈka gɔɔn˗ ˗nu ˗kë ˈgbannën ˈka ꞊Glooyi ˈka.
23 Ka gɔɔn˗ ˗nu ˗kë ˈgbannën ˈka ꞊Glooyi ˈka, kë ˈˈdhʋ̈ kö ˈka Moizö ˗bha ˈtɔŋ˗ ˗nu ˗ya ꞊bhlëë ˈgü. ˈMën ˗kë ˈsa ˈö ˈwɔn ˗yö ˗shiö ka ˗dhɛ n ˗bha mɛn ˗dhɛ bo ˈa˗ wo ˈpapadhö ꞊Glooyi ˈka bhë ˗a ˗wɔn ˈgü?
24 ˗Gban pë ˗nu ˈö ˈka ˗an yö ˗an ˗ta ˗sü ˈö ˈka za dɔ bhë, ˗ka ˈˈkan ˗a ˗bha. Ka ˗bha za ˗dɔ mɛn ˗bha ˗sü ˗yö kë ꞊ʒiaan kpɛnŋdhödhɛ ˈgü.»
25 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö Zedhizadhɛmö ˗mɛn ˈbhaa ˗nu ˗wo ˗ya ˗a pö ˗sü ˗bha: «Gɔndënën ˈö ˈwo kun ˗a mɛɛnˈˈ ˗ni ˈgü kö ˈwo˗ zë bhë, ˈyaa ˈnën ˈö yö ˗ee?
26 Yö ˗ga ˈö dɔ mɛn ˗nu ꞊zinŋgü ˈö ˈwɔn blɛɛˈˈ ˗ni ˈgü ˈö ˈwaa pë ˈbhaa pö ˗ni ˈgü ˗a ˗dhɛ bhë. Ɛɛnˈˈ kwa ˗gɔmɛn ˗nu ꞊waa˗ ˈwɔn dɔ ꞊taabha ꞊dhɛ yö ˈnën ˈö ˗tɔ Klito ꞊dedewo ˗ee?
27 Klito ˗ya nu, mɛn ˈbhaa yö ˈti ˗dho ˗a ˈgodhɛ dɔ. ˈˈKɛɛ gɔndënën ˈö yö, yö ˗zë kwa˗ ˈgodhɛ ˗dɔ.»
28 ˈÖ ˗kë ˈˈdhʋ̈ kö Yesu ˗yö mɛn ˗nu ꞊klaŋ kë ˗ni ˈgü ˗Zlan ˗dhɔkë ˗a ˈgü ˗kɔ ˈgü. ˈYö ö ˗wo ˈˈdhiʋ̈ ꞊luu ˈö˗ pö: «Ka n ˗dɔ, ˈö ˈka n ˈgodhɛ dɔ. N ˈti˗ ˈsü n ˗de ˈgü kö ˈa nu, Mɛn ˈö n bɔ bhë ˗yö ˗dhö ꞊dedewo, ˗a Mɛn ˈö ˈˈdhʋ̈ ˈkaa˗ dɔ.
29 Man ˗zë a˗ ˗dɔ, ˗a ˗gɛn ˗mü ꞊dhɛ yö ˈnën ˈö n bɔ, a ˗nu ˗a ˈtɔ ˈgü.»
30 ˈDhɛ ˈö˗ pö ˈˈdhʋ̈, ˈyö ˈwo ˗ya ˗a ˈˈslö mɛɛnˈˈ ˗sü ˗bha kö ˈwo˗ ˈkun. ˈˈKɛɛ mɛn ˈbhaa yö ˈti ö ˗kɔ ˈpa ˗a ˈka, ˗a ˗gɛn ˗mü ꞊dhɛ ˈö ˗kë ˈˈdhʋ̈ kö ˗a ˗bha ˈˈtʋ̈ŋ yö ˈti ˗lo ꞊köŋ.
31 ˈKö ˗kë ˈˈdhʋ̈, mɛn ˗nu ˈwo kun mü, ˗a mɛn ꞊vadhɛ ˗wo wo ˗zo ˗yö ˗a ˗dhɛ, ˈö ˈwo kun ˗a pö ˗ni ˈgü: «Klito ˗ya nu, ˗yö ˗dho ˗dhidha ꞊va kë kö ˗yö ʒiö ˗a ˈka mɛn ˈö yö ˗a ˗bha ˗ta ˈˈdhʋ̈ ˗ee?»
32 ˈDhɛ ˈö Fadhiziɛn ˗nu ˗wo mɛn ꞊va ˈwo kun mü bhë ˗an ˗wo man kö ˗wo Yesu ˗wɔn blɛɛˈˈ ˗ni ˈgü wo ˗wo ꞊löö ꞊dhɛ ˗kɔ ˈö bhë ˗a ˈdhö, ˈyö ˈˈsaabhomɛn ˗nu ˗gɔmɛn ˗nu waa Fadhiziɛn ˗nu ˗wo ˗Zlan ˗dhɔkë ˗a ˈgü ˗kɔ ˗maankëmɛn ˗nu bɔ kö ˗wo Yesu ˈkun.
33 ˈDhɛ ˈö ˗kë ˈˈdhʋ̈, ˈyö Yesu ˗ya pö: «A ˗dho ˈˈtʋ̈ŋ ˈnën ˈbhaa kë ka ˈˈpiʋ̈ kö ˈa ꞊kun ˈdho mɛn ˈö n bɔ bhë ˗a ˈˈpiʋ̈.
34 Ka ˗dho n mɛɛnˈˈ, ˈˈkɛɛ ka ˈti ˗dho ˗kpan n ˗bha, ˈö ˗dhɛ ˈa ˗dho ˈdho ˗a ˗bha bhë ka ˈti ˗dho ꞊mɔɔn˗ ˗bha ˈka nu mü.»
35 ˈYö Zuifö ˗nu ˗wo ˗ya ˗a pö ˗sü ˗bha wo ˈko ˗nu ˗dhɛ: «˗Dhɛ ˗mɛɛn ˈö gɔndënën ˈö yö ˈö˗ ˈˈpiʋ̈ ˈö ˈdho ˗a ˗bha kö ˈkwa ˗dho ˗kpan ö ˗bha yö? Ɛɛnˈˈ ˗ya ˈˈpiʋ̈ ˈö ˈdho Zuifö ˗nu ˈö ˈwo ˗pɛn ˗sü ˈka Glɛkö ˗nu kpö ˈgü bhë ˗an ˈˈpiʋ̈ kö ˈö Glɛkö ˗nu ꞊klaŋ kë ˗ee?
36 ˗A pö ˈö˗ wo: ‹Ka ˗dho n mɛɛnˈˈ ˈˈkɛɛ ka ˈti ˗dho ˗kpan n ˗bha, ˈö ˗dhɛ ˈa ˗dho ˈdho ˗a ˗bha ka ˈti ˗dho ꞊mɔɔn˗ ˗bha ˈka nu mü› bhë, ˗a ˗gɛn ˈnën ˗tɔ ˗mën?»
37 ˗Dhɛkpaɔyi ˗totaabhasü ˈö ˗kë ˈwlaan˗ ˈö bhë ˗a ˗dhɛkpaɔyi ˈkpii˗ ˈka bhë ˗a ˈka, ˈyö Yesu ˗yö ꞊luu ˈö dɔ ö ˗gɛn ˗ta, ˈö ö ˗wo ˈˈdhiʋ̈ ꞊luu ˈö˗ pö: «˗Ya kë ꞊dhɛ ˈˈyi mü ˗dhɔ ˗yö mɛn ˈbhaa ˗bha, ˗yö nu n ˈˈpiʋ̈ kö ˗yö ˈˈyi mü.
38 Mɛn ˈˈoo ˗mɛn ˈö ö ˗zo yö n ˗dhɛ, ‹ˈˈYiga ˈö ˗këdhösü nu mɛn ˗dhɛ bhë ˗yö ˗dho bhɔ ˗a ˗mɛn ˈgü› ꞊dhɛ ˗kɔ ˈö ˗Zlan ˗Wo ˗ya pö ˗a ˈka bhë ˗a ˈdhö.»
39 ˈˈKɛɛ ˗yö ˗kun ˈˈwɩ ˗ni ˈgü ˗Zlan ˗bha ˗zuu ˈö mɛn ˗nu ˈö ˈwo wo ˗zo yö ˗a ˗dhɛ ˈwo ˗dho ˗a ꞊slɔɔ bhë ˗a ˈka. ˗A ˈˈtʋ̈ŋ ˈö bhë ˗a ˈgü, kö ˗zuu ˈö ˈˈdhʋ̈ wo ˈti˗ ꞊slɔɔ ꞊köŋ, ˈyö sü ꞊dhɛ kö Yesu yö ˈti ö ˗bha ˈtɔbhɔdhe ꞊slɔɔ ꞊köŋ.
40 ˈDhɛ mɛn ˈbhaa ˗nu ˈwo kun mɛn kpö ˈgü mü ˈwo ˗wo ˗nu ˈwo bhë ˗an man, ˈyö ˈwo ˗ya ˗a pö ˗sü ˗bha: «Mɛn ˈö yö, ˗Zlan ˗wodhiʋ̈lomɛn ˈö˗ nu ˗wɔn ˈdhö ˈdhö bhë ˗yö ˗mü ˗a ˈka ꞊dedewo.»
41 Mɛn ˈbhaa ˗nu ˗kun ˗a pö ˗ni ˈgü: «Klito ˗mü ˗a ˈka.» ˈˈKɛɛ mɛn ˈˈwɛɛ ˈbhaa ˗nu ˗wo ˗kun ˗a pö ˗ni ˈgü: «˗Dhɛ ˈö Klito dho ˈgo ˗a ˗bha ˈyö ˗tɔ Galile ˗ee?
42 ˗Zlan ˗Wo yö ˈti˗ pö ꞊dhɛ Klito ˗dho kë Davi ꞊suugünën ˈka, ˈö go Betedhɛmö, Davi ˗go ˗a ˈgü ˗pö ˈgü ˗ee?»
43 ˈDhɛ ˈö ˗kë ˈˈdhʋ̈, ˈyö ˈwɔn ˈö ˗gban Yesu ˗bha ˗a zɔɔdhe ˗yö ˗da mɛn kpö ˈwo bhë ˗an ꞊zinŋgü.
44 Mɛn ˈbhaa ˗nu ˗zë ˗wo ˗kun ˗a ˈˈpiʋ̈ kö ˈwo˗ ˈkun, ˈˈkɛɛ mɛn ˈbhaa yö ˈti ꞊mɔɔn˗ ˗bha kö ˗yö ö ˗kɔ ˈpa ˗a ˈka.
45 ˈDhɛ ˈö ˗kë ˈˈdhʋ̈, ˈyö ˗Zlan ˗dhɔkë ˗a ˈgü ˗kɔ ˗maankëmɛn ˗nu ˗wo wo ꞊yɛɛ ˗kë ˈwo dho ˈˈsaabhomɛn ˗nu ˗gɔmɛn ˗nu waa Fadhiziɛn ˗nu ˗an ˈˈpiʋ̈. ˈYö ˈwo ˗Zlan ˗dhɔkë ˗a ˈgü ˗kɔ ˗maankëmɛn ˗nu bhë ˗an dhɛɛˈˈ kpɔ ˈwo˗ pö: «ˈMën ˗kë ˈö ka ˈti nu ˗a ˈka?»
46 ˈYö ˈwo˗ ˗yɔ bɔ ˈwo˗ pö: «Mɛn ˈö ˗dho ˈwɔn blɛɛˈˈ ꞊dhɛ gɔndënën ˈö bhë ˗a ˈdhö, yi ˈti˗ yö do toŋtoŋdhö.»
47 ˈYö Fadhiziɛn ˗nu ˗wa pö ˗an ˗dhɛ: «Ka ˗de ˈpö ˈka ˗puö ˗a ˗bha ˈˈkpënŋ˗ ˈgü ˗ee?
48 ˗Gɔmɛn ɛɛnˈˈ Fadhiziɛn dosɛnŋ ˈti ö ˗zo yö ˗a ˗dhɛ, ˈyaa ˈˈdhʋ̈ ˗ee?
49 Mɛn ˗gbaa ꞊va ˈö pë ˈö ˈTɔŋ˗ ˗ya pö ˈwaa˗ dɔ, ˈö ˈwo wo ˈˈtʋ ˈto ˗ni ˈgü Yesu ˗wo ˗bha bhë, ˈˈdhaŋmɛn ˗nu ˗mü.»
50 Nikodɛmö ˈö ˗kë Fadhiziɛn mi do ˈka ˈö ˗ya ˈdho Yesu ˈˈpiʋ̈ ˗be do bhë, ˗yö ˗kë mü, ˈyö˗ pö ˗an ˗dhɛ:
51 «Kwa ˗bha ˈTɔŋ˗ ˗ya ˗pö ꞊dhɛ, ˈkwa˗ pö ˈkwa za dɔ mɛn ˈbhaa ˗bha, kwa dua ˗mü ꞊köŋ ˗blɛɛsü kö ˈkwa kwa ˈˈtʋ ˈto ˗a ˗bha, kö pë ˈö˗ ˗kë ˈkwa˗ dɔ, ˈyaa ˈˈdhʋ̈ ˗ee?»
52 ˈDhɛ ˈö˗ pö ˈˈdhʋ̈, ˈyö ˈwo˗ ˗yɔ bɔ ˗a ˗gɔ ˈwo˗ pö: «Galile mi ˗mü ü ˈka ˈpö ˈyö ˈü ˈwɔn ꞊blɛɛ ˈˈdhʋ̈ ˗ee? ˗Bhö ˗dhɛ ˗ga ˗Zlan ˈˈDhiwo ˈsëëdhɛ ˈgü, ü ˗dho ˗a yö ꞊dhɛ ˗Zlan ˗wodhiʋ̈lomɛn ˈbhaa ˈyaa ꞊mɔɔn˗ ˗bha kö ˗yö ˈgo Galile ˗sɛ ˈgü toŋtoŋdhö.»*
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «pë ˈö ˗bɛnzë ˗sü ˈka.»
^ ˗Wo ˗we «˗Zlan ˗Wo ꞊klaŋ ˈka.»
^ Zan ˈˈɲan ˈˈgblʋ̈gblʋ̈ ˈˈsɔɔplɛ (7), ˗a ˈsɛɛn˗ ˗kɔŋ ˈˈsoodhu ö ga ˗yaaga (53) ˈö dho ˈö yö ˗a ˈka ˗a ˈˈɲan ˈˈgblʋ̈gblʋ̈ ˈˈsaaga (8), ˗a ˈsɛɛn˗ ˗kɔŋ do ö ga do (11) ˗bha, ˈwaa ˗Zlan ˈˈDhiwo ˈsëëdhɛ ˗be zii ˗nu ˈö mɛn ˗nu ˗wo ˈdhaŋ˗ bho ˗an ˈˈdhiʋ̈ ˗an ˈgü.
