Nɔɔn˗ ˗së ˈsëëdhɛ ˈö Zan ˗ya ˗bɛnzë 8:12-59
8 12 Yesu ˗yö ˈwɔn ˗blɛɛ ˗an ˗dhɛ ˈzü ˈö˗ pö: «Man ˈnën ˈa ˗tɔ ˈˈkpɔnŋtaadhɛ ˗bha ˗dhɛpuudhɛ. Mɛn ˈö ˗ʒiö n ꞊kee˗ yö ˈti ˗dho ˈˈta ˈsü ˗dhɛtiidhɛ ˈgü toŋtoŋdhö. ˗Yö ˗dho kë ˗dhɛpuudhɛ ˈö ˗tosɛta nu mɛn ˗dhɛ bhë ˗a ˈgü.»
13 ˈDhɛ ˈö˗ pö ˈˈdhʋ̈, ˈyö Fadhiziɛn ˗nu ˗wa pö ˗a ˗dhɛ: «Bhi ꞊dede ˈnën ˈü ü ˗de ˗wɔn ꞊blɛɛ mɛn ˗nu ˗dhɛ. Pë ˗nu ˈü ˗an pö ˗ni bhë ˈwaa gagade ˈka.»
14 ˈYö Yesu ˗ya pö ˗an ˗dhɛ: «ˈKö kë ꞊dhɛ man ꞊dede ˈnën ˈa n ˗de ˗wɔn ꞊blɛɛ, pë ˈa˗ pö gagade ˗mü, ˗a ˗gɛn ˗mü ꞊dhɛ ˗dhɛ ˈa go ˗a ˗bha waa ˗dhɛ ˈa ˈdho ˗ni ˈgü ˗a ˗bha a˗ ˗dɔ. ˈˈKɛɛ ka ˗zë ˗dhɛ ˗a go ˗a ˗bha waa ˗dhɛ ˈa ˈdho ˗ni ˈgü ˗a ˗bha, ˈkaa˗ dɔ.
15 Mɛnbhɩɩdhe ˗nu ˗bha ˈwɔn yö ˗kɔ ˈnën ˈka za dɔ ˗a ˈka mɛn ˗nu ˗bha. ˈˈKɛɛ man ˗zë ˈmaan za dɔ mɛn ˈˈoo ˗mɛn ˗bha.
16 ˈKö ˗de ˈö ˗kë ꞊dhɛ a za ˗dɔ mɛn ˗bha, a n ˗man za ˗dɔ gagade ˈgü, ˗a ˗gɛn ˗mü ꞊dhɛ ˈmaan n do ˈka, n Dë ˈö n bɔ bhë ˗yö n ˈˈpiʋ̈.
17 ˗Ya ˈgo mü ˈzü, ka ˗de ˗bha ˈTɔŋ˗ ˗ya ˗pö: ‹Mɛn ꞊plɛ ˗wo ˗ya kë do ˈwɔn ˈwo˗ yö ˈwo˗ ꞊blɛɛ ˗a ˈgü kö gagade ˗mü.›
18 Man ꞊dede ˈnën ˈa n ˗de ˗wɔn ꞊blɛɛ,ˈˈkɛɛ ˗ya ˈgo mü ˈpö n Dë ˈö n bɔ bhë, ˗yö n ˗wɔn ˗blɛɛ.»
19 ˈYö ˈwo˗ dhɛɛˈˈ kpɔ ˈwo˗ pö: «Ü Dë ˗yö ˈˈmɛn?» ˈYö Yesu ˗ya ˗yɔ bɔ ˗an ˗gɔ ˈö˗ pö: «ˈKaa n dɔ ɛɛnˈˈ ˈkaa n Dë dɔ. ˗Ya kë ꞊dhɛ ka n dɔ ˗be, ka ˗dho n Dë dɔ ˈpö.»
20 ˗Wo ˗nu ˈwo bhë ˗yö ˗an ˗pö kö ˗yö mɛn ˗nu ꞊klaŋ kë ˗ni ˈgü ˗Zlan ˗dhɔkë ˗a ˈgü ˗kɔ ˈgü, ˈˈpian ˈö gbɔɔdhe ˗da ˗a ˈgü ˗pë ˗nu ˈdhö mü bhë ˗a ˈka. ˈˈKɛɛ mɛn ˈˈwɛɛ ˈbhaa yö ˈti ꞊mɔɔn˗ ˗bha kö ˗ya ˈkun, ˗a ˗gɛn ˗mü ꞊dhɛ kö ˗a ˗bha ˈˈtʋ̈ŋ yö ˈti ˗wo ꞊köŋ.
21 ˈYö Yesu ˗ya pö ˗an ˗dhɛ ˈzü: «A ˈdho ˗ni ˈgü. Ka ˗dho n mɛɛnˈˈ, ˈˈkɛɛ ka ˗dho ˈto ka ˗bha ˈwɔn yaa ˈgü ˈö ˈka ga. ˗Dhɛ ˈa ˈdho ˗ni ˈgü ˗a ˗bha bhë ka ˈti ˗dho ꞊mɔɔn˗ ˗bha kö ˈka nu mü.»
22 ˈDhɛ ˈö˗ pö ˈˈdhʋ̈, ˈyö Zuifö ˗nu ˗wo ˗ya ˗a pö ˗sü ˗bha: «Ö ˗de zë ˈpö ˗dho ˗a wo bhë ˗ee? ˈYö sü ꞊dhɛ ˗ya ˗pö: ‹˗Dhɛ ˈa ˈdho ˗ni ˈgü ˗a ˗bha bhë ka ˈti ˗dho ꞊mɔɔn˗ ˗bha kö ˈka nu mü.›»
23 ˈYö˗ pö ˗an ˗dhɛ ˈzü: «Ka ˗go ˈˈsɛ ˗ta yö, ˈˈkɛɛ man ˗zë a ˗go dhaŋ˗ ˈgü. ˈˈKpɔnŋtaamɛn ˗nu ˗mü ka ˈka, ˈˈkɛɛ man ˗zë n ˈti ˈgo ˈˈkpɔnŋ ꞊taa yö.
24 Yö ˈnën ˈö˗ ˗wɔn ˈgü ˈa˗ pö ka ˗dhɛ ꞊dhɛ: Ka ˗dho ˈto ka ˗bha ˈwɔn yaa ˗nu ˈgü ˈö ˈka ga. Ka ˈti ˈdhaŋ˗ bho n ˈˈdhiʋ̈ ꞊dhɛ mɛn ˈa˗ pö ˈa˗ ˈka bhë yö ˗mü n ˈka, ka ˗dho ˈto ka ˗bha ˈwɔn yaa ˗nu ˈgü ˈö ˈka ga.»
25 ˈDhɛ ˈö˗ pö ˈˈdhʋ̈, ˈyö ˈwo ˗ya ˗a ˗pö ˗a ˗dhɛ ˗sü ˗bha: «De ˗mü ü ˈka?» ˈYö Yesu ˗ya pö ˗an ˗dhɛ: «˗Mën ˈa n ˗de ˈˈdhi ꞊sëëbho ˗ni ˈgü ˗a ˈka yö ꞊zɔɔ?
26 ˈWɔn ꞊va ˗yö n ˗gɔ kö ˈa˗ blɛɛˈˈ ka ˗bha. ˗Ya ˈgo mü ˈzü pë ꞊va ꞊dede ˗yö ˗dhö ˈö ˈa ˗dho ˗a ˗za dɔ, ˈyö sü ꞊dhɛ mɛn ˈö n bɔ bhë ˗yö gagade ˗pö. ˈYö pë ꞊dede ˈa˗ man ˗a ˈˈdhi ˈyö ˈa˗ blɛɛˈˈ ˗ni ˈgü ˈˈkpɔnŋ ꞊taa bhë.»
27 Wo ˈti˗ ˈgüman ꞊dhɛ ˗a Dë ˈö dhaŋ˗ ˈgü yö ˈnën ˈö kun ˈˈwɩ ˗ni ˈgü ˗a ˈka bhë.
28 ˈYö Yesu ˗ya pö: «ˈKa ka bo maan mɛn Gbö ˗mɛn n dɔ ˗sü ˈka ˈˈdhü ˗bha, ˈyö mɛn ˈa˗ ˈka ˈö ˈka ˗dho ˗a dɔ. Ka ˗dho ˗a yö ꞊dhɛ ˈmaan ˈwɔn ˈˈwɛɛ ˈbhaa ˈsü n ˗de ˈgü kö ˈa˗ kë. ˈˈKɛɛ ˗wo ˗nu ˈö n Dë ˗yö n ꞊klaŋ ˗kë ˗an ˈka, yö ˈnën ˈa ˗an pö.
29 Mɛn ˈö n bɔ bhë ˗yö n ˈˈpiʋ̈. Yö ˈti ö ˗kɔ ˈˈkan n ˈgü kö ˈa ˈto n do ˈka, ˗a ˗gɛn ˗mü ꞊dhɛ ˈwɔn ˗nu ˈwo˗ ˗dhɛ ˗së wo ˈnën ˈa ˗an ˗kë ˗kplawo.»
30 ˈWɔn ˈö kun ˗a blɛɛˈˈ ˗ni ˈgü bhë ˗ya ˗kë ˈö mɛn ꞊va ꞊dede ˗wo wo ˗zo yö ˗a ˗dhɛ.
31 ˈYö Yesu ˗ya pö ˈzü Zuifö ˗nu ˈwo wo ˗zo yö ˗a ˗dhɛ bhë ˗an ˗dhɛ: «ˈKa ˈto ˗klu ˗sü ˈka n ˗wo ˗bha, kö n ˗man gwëëˈˈ ˗nu ˗mü ka ˈka ꞊dedewo.
32 ˗Ya ˈgo mü ˈzü, ka ˗dho gagade dɔ ˈö gagade ˗yö ka bho ˈˈgan ˈgü.»
33 ˈYö ˈwo˗ pö ˗a ˗dhɛ: «Ablaamö ꞊suugünën ˗nu ˗mü yi ˈka, yi ˈti kë mɛn ˈbhaa ˗bha ꞊dhuëŋ ˈka do toŋtoŋdhö. ˗Yö ˗kë ꞊dhɛ ˈsa ˈyö ˈü˗ pö yi ˗dhɛ: ‹Ka ˗dho ˈgo ˈˈgan ˈgü›?»
34 ˈYö Yesu ˗ya ˗yɔ bɔ ˗an ˗gɔ ˈö˗ pö: «A˗ ˗pö ka ˗dhɛ gagade ˈka ꞊dhɛ, mɛn ˈˈoo ˗mɛn ˈö ˈwɔn yaa ˗kë, kö ˗yö ˈwɔn yaa ˗gɔ ꞊dhuëŋdhɛ ˈgü.
35 ꞊Dhuëŋ ˈyaa ˈto ö dëmɛn ˗bha ˈkɔdhi ˈgü ˈˈtʋ̈ŋ ꞊gban ˗tʋ̈ŋ ꞊gban ˈka. ˈˈKɛɛ ˗a dëmɛn gbö ˗zë ˈkɔdhigünën ˗mü ˗a ˈka, ˈö ˗dho ˈto ˗a ˈka ˈˈdhʋ̈.
36 ˈDhɛ ˈö ˈˈdhʋ̈, ˗ya kë ꞊dhɛ ˗Zlan Gbö ˗ya ka bho ˈˈgan ˈgü, ka ˗dho ˈgo ˈˈgan ˈgü ꞊dedewo.
37 A˗ ˈwɔn ˗dɔ ꞊dhɛ Ablaamö ꞊suugünën ˗nu ˗mü ka ˈka. ˈˈKɛɛ ka˗ ˈˈslö mɛɛnˈˈ ˗ni ˈgü kö ˈka n zë, ˗a ˗gɛn ˗mü ꞊dhɛ ˈkaa ˈˈwɩ pë ˗nu ˈa ka ꞊draan ˗a ˈka ˗an ˗bha.
38 Pë ˗nu ˈa ˗an yö kö a n Dë ꞊kee˗ bhë ˈyö ˈa ˗an ꞊blɛɛ. ˈˈKɛɛ ka ˗zë, pë ˗nu ˈö ˈka ˗an man ka dë ˈˈdhi, ˈyö ˈka ˗an ˗kë.»
39 ˈYö ˈwo˗ pö ˗a ˗dhɛ: «Ablaamö ˈnën ˈö ˗tɔ yi dë.» ˈYö Yesu ˗ya pö ˗an ˗dhɛ: «Ka ˗kë Ablaamö ˗bha ˈnën ˗nu ˈka ˗be, kö pë ˗nu ˈö Ablaamö ˗yö ˗an ˗kë, ka ˗an kë ˗ni ˈgü.
40 ˈˈKɛɛ ka˗ ˈˈslö mɛɛnˈˈ ˗ni ˈgü ˈˈtʋ̈ŋ ˈö yö ˗a ˈgü kö man ˈö gagade ˈa˗ man ˗Zlan ˈˈdhi ˈa˗ ꞊blɛɛ ka ˗dhɛ bhë, ˈka n zë. Ablaamö yö ˈti˗ kë ˈˈdhʋ̈.
41 Ka dë këyö ˗nu ˈnën ˈö ˈka ˗an kë ˗ni ˈgü bhë.» ˈYö ˈwo˗ pö ˗a ˗dhɛ: «ˈNën ˗nu ˈö ˈwo ˗an kpɔ ˈˈkpɛnŋdhö ˈyaa ˗mü yi ˈka. Yi dë ˗yö dosɛnŋ, yö ˈnën ˈö ˗tɔ ˗Zlan.»
42 ˈYö Yesu ˗ya pö ˗an ˗dhɛ: «˗Zlan ˗yö ˗kë ka Dë ˈka ˗be, n ˗dhɔ ˗dhö ka kë, ˗a ˗gɛn ˗mü ꞊dhɛ a ˗go ˗Zlan ˈˈpiʋ̈ ˈa nu, ˈyö ˈa ka ˈˈpiʋ̈ yö. N ˈti˗ ˈsü n ˗de ˈgü kö ˈa nu, yö ˈnën ˈö n bɔ.
43 ˈMën ˗kë ˈö pë ˗nu ˈa ˗an pö ˗ni ˈgü bhë ˈkaa ˗an ˈgüman? ˗A ˗gɛn ˈö ˈdhö ˈyö ˗tɔ ˈkaa ˈˈwɩ ˗a ˗bha kö ˈka ka ˈˈtʋ ˈto n ˗wo ˗bha.
44 Ka dë ˈnën ˈö ˗tɔ Dügɔmɛn, ˈyö ˈka˗ ˈˈpiʋ̈ kö ˈka ka dë ˈö bhë ˗a ˗dhidhɛwɔn kë. ˈÖ go yi ˈö˗ zübho ˗a ˈka bhë ˗a ˗bha, ˈö dho ˈö yö ˗a ˈka ꞊dɛɛ ˗bha, mɛnzëmɛn ˗mü ˗a ˈka ˗kplawo. Yö ˈti ꞊mɔɔn˗ ˗bha kö ˗yö ˈto gagade ˈgü, ˗a ˗gɛn ˗mü ꞊dhɛ gagade ˈyaa˗ zuʋ̈ˈˈ ˈgü. ˗Yö ꞊sua ˗kë, ˈyö sü ꞊dhɛ ˗kɔ ˈö˗ ˈka ˈyö bhë. ꞊Suakëmɛn ˗mü ˗a ˈka, yö ˈnën ˈö ˗tɔ ꞊sua dë.
45 ˈˈKɛɛ man ˗zë, ˈdhɛ ˈö ˗kë ꞊dhɛ gagade ˈnën ˈa˗ pö ka ˗dhɛ bhë, ˈkaa ka ˗zo yö n ˗dhɛ.
46 De ˈö ka kpö ˈgü ˈö ꞊mɔɔn˗ ˗bha kö ˗ya ˗zɔn ꞊dhɛ ˈwɔnyaakëmɛn ˗mü n ˈka? ˗Ya kë ꞊dhɛ pë ˈa˗ pö ka ˗dhɛ bhë gagade ˗mü, ˈmën ˗kë ˈö ˈkaa ˈdhaŋ˗ bho n ˈˈdhiʋ̈?
47 Mɛn ˈö ˗Zlan ˈdhö ˗a Dë ˈka, ˗yö ö ˈˈtʋ ˗to pë ˈö ˗Zlan ˗ya pö ˗a ˗bha. Kë ˈö˗ wo ꞊dhɛ ka dë ˈyaa ˗mü ˗Zlan ˈka bhë, yö ˈnën ˈö˗ ˗wɔn ˈgü ˈö ˈkaa ka ˈˈtʋ ˈto n ˗wo ˗bha.»
48 ˈYö Zuifö ˗nu ˗wa pö ˗a ˗dhɛ: «‹˗A pö ˈyi˗ wo ꞊dhɛ Samadhi mi ˗mü ü ˈka, ˗zuu yaa ˗yö ü ˈgü› bhë, ˗a ˗pö ˈˈdhʋ̈ ˗dhɛ ˈyaa ˗mü ˗ee?»
49 ˈYö Yesu ˗ya ˗yɔ bɔ ˗an ˗gɔ ˈö˗ pö: «˗Zuu yaa ˈyaa n ˈgü, n Dë ˈtɔ ˈnën ˈa˗ bhɔ ꞊ʒiaan, ˈˈkɛɛ ˈyö ka ˗zë ˈö ˈka n ꞊bhlëë ˗shiö.
50 N ˗de ˈtɔ bhɔ ˗sü ˈyaa ˈnën ˈa˗ ꞊mɛɛn. Mɛn ˈö ˈtɔbhɔdhe mɛɛnˈˈ ˗ni ˈgü n ˗bha ˈka ˗yö ˗dhö, yö ˈnën ˈö zakanmɛn ˈka.
51 A˗ ˗pö ka ˗dhɛ gagade ˈka ꞊dhɛ, mɛn ˈö n ˗wo ˗ya ꞊bhlëë ˈgü, yö ˈti ˗dho ga toŋtoŋdhö.»
52 ˈYö Zuifö ˗nu ˗wa pö ˗a ˗dhɛ: «ˈYa˗ ˈwɔn dɔ ˈzlee ꞊dhɛ ˗zuu yaa ˗yö ü ˈgü ꞊dedewo. Ablaamö ˗ya ga, ˗Zlan ˗wodhiʋ̈lomɛn ˗nu ˗de ˈpö ˗wa ga, ˈˈkɛɛ bhi ˗zë ˈü˗ ˗pö: ‹Mɛn ˈö n ˗wo ˗ya ꞊bhlëë ˈgü, yö ˈti ˗dho ga toŋtoŋdhö.›
53 Ü ˗bha ˈgü ü ˈkpii˗ ˈü ˗ʒiö ˗a ˈka yi dë Ablaamö ˈö ga bhë ˗a ˗ta ˗ee? ˗Zlan ˗wodhiʋ̈lomɛn ˗nu ˗de ˈpö ˗wa ga. Bhi ˗zë ü˗ ˗pö de ˗mü ü ˈka?»
54 ˈYö Yesu ˗ya ˗yɔ bɔ ˗an ˗gɔ ˈö˗ pö: «Man ꞊dede ˈman n ˗de ˈtɔ bhɔ, kö ˗a ˈtɔbhɔdhe ˈö ˈˈdhʋ̈ ˗a ꞊bhlëë ˈyaa ˈdhö. ˈˈKɛɛ n Dë ˈö ka˗ pö yö ˈnën ˈö ˗tɔ ka ˗bha ˗Zlan bhë, yö ˈnën ˈö n ˈtɔ bhɔ.
55 N Dë ˈö ˈˈdhʋ̈ ˈkaa˗ dɔ, ˈˈkɛɛ man ˗zë a˗ ˗dɔ. Kö ˈa˗ pö ꞊dhɛ ˈmaan˗ dɔ kö ˈman kë ꞊suakëmɛn ˈka ꞊dhɛ ka ˈdhö. ˈˈKɛɛ a˗ ˗dɔ, ˈö pë ˈö˗ pö ˈa˗ kë ˗ni ˈgü.
56 ˗Kpan ˗dhɛkpaɔyi ˈa dho nu ˗a ˈka bhë ˗a ˗bha ˗sü ˗lele ˗yö ˗kun ka dë Ablaamö ˗ta ꞊dedewo. ˈYö ˈdhɛ ˈö ˗kpan ˗a ˗bha, ˗a zuʋ̈ˈˈ ˈˈgblü ˗yö ˗dhi.»
57 ˈDhɛ ˈö˗ pö ˈˈdhʋ̈, ˈyö Zuifö ˗nu ˗wa pö ˗a ˗dhɛ: «Bhi ˈö ü ˗kwɛ yö ˈti yö ˗kɔŋ ˈˈsoodhu (50) ˗bha ꞊köŋ bhë, ˈyö ˈü˗ pö ü ˗kpan Ablaamö ˗bha ˗ee?»
58 ˈYö Yesu ˗ya pö ˗an ˗dhɛ: «A˗ ˗pö ka ˗dhɛ gagade ˈka ꞊dhɛ, ˈˈsanni Ablaamö ˗yö bhɔ, a ˗kun ˗dhö.»
59 ˈDhɛ ˈö˗ pö ˈˈdhʋ̈, ˈyö ˈwo ˗ya ˗gwö kpö ˗nu ˗lö ˗sü ˗bha kö ˈwo˗ ˗zuö ˗a ˈka, ˈˈkɛɛ ˈyö Yesu ˗yö ö ˗bin ˈö go ˗Zlan ˗dhɔkë ˗a ˈgü ˗kɔ ˈgü ˈö yö ˈˈkpɛnŋ.
