Nɔɔn˗ ˗së ˈsëëdhɛ ˈö Zan ˗ya ˗bɛnzë 9:1-41
9 ˈDhɛ ˈö Yesu kun ʒiö ˗ni ˈgü, ˈyö ˗kpan ˈˈɲɛɛntiimɛn do ˗bha. ˗A gɔndënën ˈö ˈˈdhʋ̈ ˗yö ˗bhɔ ˈˈɲɛɛntiidhɛ ˈö bhë ˗a ˈka.
2 ˈYö Yesu ˗bha gwëëˈˈ ˗nu ˗wa dhɛɛˈˈ kpɔ ˈwo˗ pö: «˗Gɔmɛn,* de ˈö ˈwɔn yaa ˗kë ˈö˗ ˗wɔn ˈgü ˈö gɔndënën ˈö yö ˈö bhɔ ˈˈɲɛɛntiidhɛ ˈka? Yö ꞊dede ˗mü ˗ee, ɛɛnˈˈ ˗a ˗mɛn ˗nu ˗mü?»
3 ˈYö Yesu ˗ya ˗yɔ bɔ ˗an ˗gɔ ˈö˗ pö: «Yö ˈti kë ꞊dhɛ ˈwɔn yaa ˈnën ˈö gɔndënën ˈö yö ˈö˗ ˗kë ɛɛnˈˈ ˈö˗ ˗mɛn ˗nu ˗wa ˗kë. ˈˈKɛɛ ˗yö ˗kë ˈˈdhʋ̈ kö mɛn ˗nu ˗wo bɔ ˗a ˗ta ˗wo ˗Zlan këwɔn ˗nu yö.
4 ˈDhɛ ˈö ˈˈbin yö ˈti ˈmën ꞊köŋ kwa dua ˗mü kö Mɛn ˈö n bɔ bhë ˈkwa˗ ˗bha yö kë. ˗A ˗gɛn ˗mü ꞊dhɛ ˈˈbin ˈmën ˈˈtʋ̈ŋ ˗yö nu ˗ni ˈgü ˈö mɛn ˈˈwɛɛ ˈbhaa yö ˈti ˗dho ˗mɔn yö kë ˗sü ˗bha.
5 ˈˈTʋ̈ŋ ˈa ꞊kun ˗a ˈka ˈˈkpɔnŋ ꞊taa yö bhë kö a ˈˈkpɔnŋtaadhɛ ˗bha ˗dhɛpuudhɛ ˈka.»
6 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö ö ˈˈdhidhi bho ˈˈshia˗ ˈyö˗ ꞊kaan ˈˈsɛ ˈka, ˈyö˗ böö˗ bhë ˗a ˗kë gɔndënën ˈö bhë ˗a ˈˈɲan ˗ta.
7 ˈYö˗ pö ˗a ˗dhɛ: «˗Bhö ˈdho kö ˈü ü ˈwëëdhɛ ˈˈzu Siloe ˈˈyi ˗gblü ꞊bhaa.» (꞊Waa˗ pö Siloe ˗a ˗gɛn ˈnën ˗tɔ «ˈˈyi ˈö ˗wo.») ˈYö gɔndënën ˈö bhë ˈö dho ˈö ö ˈwëëdhɛ ˗zu. ˈDhɛ ˈö ö ꞊yɛɛ ˗kë kö ˗a ˈˈɲan ˗ya ˗dhɛ yö.
8 ˈDhɛ ˗a ˗züzümɛn ˗nu waa mɛn ˗nu ˈwo˗ dɔ ˈˈdhiʋ̈ ˗be gbadhɛmɛn ˈka bhë ˈwo ˗kpan ˗a ˗bha, ˈyö ˈwo ˗ya ˗a pö ˗sü ˗bha: «Gɔndënën ˈö kun ˈɲaannu ˗sü ˈka, ˈö kun gbadhɛ ˗ni ˈgü bhë ˈyaa ˈnën ˈö yö ˗ee?»
9 Mɛn ˈbhaa ˗nu ˗wo ˗kun ˗a pö ˗ni ˈgü: «Yö ˗mü.» Kö ˗a mɛn ˈˈwɛɛ ˈbhaa ˗nu ˗wa pö ˗ni ˈgü: «ˈYaa ˗mü, mɛn ˈö bhɔ ˗a ˗bha yö ˗mü.» ˈˈKɛɛ gɔndënën ˈö bhë ˗yö ˗kun ˗a pö ˗ni ˈgü ˗kplawo: «Man ˗mü.»
10 ˈDhɛ ˈö ˗kë ˈˈdhʋ̈, ˈyö ˈwo˗ dhɛɛˈˈ kpɔ ˈwo˗ pö: «˗Yö ˗kë ꞊dhɛ ˈsa ˈyö ü ˈˈɲan ˗yö ˗pʋ?»
11 ˈYö˗ ˗yɔ bɔ ˗an ˗gɔ ˈö˗ pö: «Gɔndënën ˈwo˗ ˗dhɛ Yesu bhë, yö ˈnën ˈö böö˗ ˗kë n ˈˈɲan ˗bha, ˈyö˗ pö n ˗dhɛ: ‹˗Bhö ˈdho Siloe ˈˈyi ˗gblü ꞊bhaa kö ˈü ü ˈwëëdhɛ ˈˈzu.› ˈDhɛ ˈa dho ˈa n ˈwëëdhɛ ˗zu, ˈyö n ˈˈɲan ˗yö ˗dhɛ yö.»
12 ˈDhɛ ˈö˗ pö ˈˈdhʋ̈, ˈyö ˈwo˗ dhɛɛˈˈ kpɔ ˈwo˗ pö: «˗A gɔndënën ˈö ˈˈdhʋ̈ ˗yö ˈˈmɛn?» ˈYö˗ pö ˗an ˗dhɛ: «˗Dhɛ ˈö˗ ˗bha ˈmaan˗ dɔ.»
13 ˈYö gɔndënën ˈö kun ˈˈɲɛɛntiimɛn ˈka bhë, ˈwo dho ˗a ˈka Fadhiziɛn ˗nu ꞊dhiaa.
14 ˗Dhɛkpaɔyi ˈö Yesu ˗yö böö˗ ˗kë ˗a ˈka ˗a ˈˈɲan ˗bha ˈö˗ ˈˈɲan ˗yö ˗pʋ bhë, ˗yö ˗kun ꞊Glooyi ˈka.
15 ˗A ˗wɔn ˈgü Fadhiziɛn ˗nu ˗wo ˗ya dhɛɛˈˈ ˈkpɔ ˗sü ˗bha ˗a ˗gɔ kö ˗kɔ ˈö ˗kë ˗a ˈka ˈö ˗dhɛ yö, ˗ya pö wo ˗dhɛ. ˈYö˗ pö ˗an ˗dhɛ: «Böö˗ ˈnën ˈö˗ sü ˈö˗ ˗kë n ˈˈɲan ˗bha, ˈyö ˈa n ˈwëëdhɛ ˗zu, ˈyö ˈa ˗dhɛ yö.»
16 ˈYö Fadhiziɛn ˈbhaa ˗nu ˗wo ˗ya ˗a pö ˗sü ˗bha: «Mɛn ˈö ˗Zlan ˗ya bɔ ˈyaa kë ˈˈdhʋ̈, ˗a ˗gɛn ˗mü ꞊dhɛ ˈyaa ꞊Glooyi ꞊bhlëë ˗ya.» ˈYö˗ mɛn ˈbhaa ˗nu ˗wa pö: «Mɛn ˈö ˈwɔnyaakëmɛn ˈka ˗yö ꞊mɔɔn˗ ˗bha ˈpö kö ˗yö ˗dhidha ꞊suu ˈö bhë ˗a kë ˗ee?» ˗A ˗wɔn ˈgü ˗an ˗wo ˈyaa kun do.
17 ˈYö ˈwo gɔndënën ˈö kun ˈˈɲɛɛntiimɛn ˈka bhë ˗a dhɛɛˈˈ kpɔ ˈzü ˈwo˗ pö: «Bhi ˈö ü ˈˈɲan ˗pʋ bhë, ü ˗bha ˈgü de ˗mü?» ˈYö˗ pö ˗an ˗dhɛ: «˗Zlan ˗wodhiʋ̈lomɛn ˗mü ˗a ˈka.»
18 ˈˈKɛɛ Zuifö ˗nu ˈwaa kun ˗a ˈsü ˗ni ˈgü gagade ˈka ꞊dhɛ gɔndënën ˈö bhë ˗yö ˗kun ˈˈɲɛɛntiimɛn ˈka ˗be ˈyö˗ ˈˈɲan ˗yö ˗pʋ. ˗A ˗wɔn ˈgü ˗wa ˗mɛn ˗nu ˗dhɛ.
19 ˈYö ˈwo ˗an dhɛɛˈˈ kpɔ ˈwo˗ pö: «Ka gbö ˈö ˈka˗ pö ˗yö ˗bhɔ kö ˗a ˈˈɲɛɛn ˗yö tii bhë, yö ˈnën ˈö yö ˗ee? ˗Yö ˗kë ꞊dhɛ ˈö ˗dhɛ yö?»
20 ˈYö˗ ˗mɛn ˗nu ˗wa ˗yɔ bɔ ˈwo˗ pö: «꞊Ii, yi˗ ˈwɔn ˗dɔ ꞊dhɛ yi gbö ˗mü. Yi˗ ˈwɔn ˗dɔ ˈpö ꞊dhɛ ˈdhɛ ˈö bhɔ kö ˗a ˈˈɲɛɛn ˗yö tii.
21 ˈˈKɛɛ ˗kɔ ˈö ˗kë ˗a ˈka ˈö ˗dhɛ yö ɛɛnˈˈ mɛn ˈö˗ ˈˈɲan ˗pʋ, yi ˗zë ˈyaa˗ dɔ. ˗Kaa dhɛɛˈˈ ˈkpɔ kö yö ꞊dede ˗ya ˗gɛn bho. ˈNën ˈˈtɩtɩ ˈyaa ˗mü ˗a ˈka.»
22 ˈPë ˗kë ˈö˗ ˗mɛn ˗nu ˗wo ˈwɔn ꞊blɛɛ ˈˈdhʋ̈ ˈyö ˗tɔ ˗wo ˗kun ˈˈsuʋ̈ ˗ni ˈgü Zuifö ˗nu ˗gɔ. ˗A ˗gɛn ˗mü ꞊dhɛ ˈö ˗kë ˈˈdhʋ̈ kö Zuifö ˗nu ˗wo ˗ya ˗mɔn ˈsaadhö ꞊dhɛ ˗an dua ˗mü kö mɛn ˈˈoo ˗mɛn ˈö ˗dho ˗a pö Yesu ˈnën ˈö ˗tɔ Klito, ˗wa ˗mɛn ꞊kɛɛ ˈˈkan ˗yakwëë ˗kë ˗a ˈgü ˗kɔ ˈgü.
23 Yö ˈnën ˈö˗ ˗wɔn ˈgü ˈö˗ ˗mɛn ˗nu ˗wa pö: «˗Kaa dhɛɛˈˈ ˈkpɔ. ˈNën ˈˈtɩtɩ ˈyaa ˗mü ˗a ˈka.»
24 ˈDhɛ ˈö ˗kë ˈˈdhʋ̈, ˈyö mɛn ˈö kun ˈˈɲɛɛntiimɛn ˈka bhë ˈwo˗ ˗dhɛ ꞊plɛ ˗naan wo ˈö ˈwo˗ pö ˗a ˗dhɛ: «˗Bhö ˗Zlan ˈtɔ bhɔ.* Yi˗ ˈwɔn ˗dɔ ꞊dhɛ gɔndënën ˈö bhë ˈwɔnyaakëmɛn ˗mü.»
25 ˈYö˗ pö ˗an ˗dhɛ: «ˈWɔnyaakëmɛn ˗mü ˗a ˈka oo ɛɛnˈˈ ˈyaa˗ ˈka oo, ˗a ˈdhɛ ˈö bhë ˈmaan˗ ˈwɔn dɔ. Pë dosɛnŋ ˈa˗ dɔ ˈyö ˗tɔ a ˗kun ˈˈɲɛɛntiimɛn ˈka ˗be, ˈˈkɛɛ ˈman ˗dhɛ yö.»
26 ˈDhɛ ˈö˗ pö ˈˈdhʋ̈, ˈyö ˈwo˗ pö ˗a ˗dhɛ: «˗Kɔ ˗mɛɛn ˈö˗ ˗kë ˗a ˈka? ˗Yö ü ˈˈɲan ˗pʋ ˗kɔ ˗kë ꞊dhɛ?»
27 ˈYö˗ pö ˗an ˗dhɛ: «˗Kɔ ˈö ˗kë ˗a ˈka ˈman˗ blɛɛˈˈ ka ˗dhɛ ˈsaadhö, ˈˈkɛɛ ka ˈti ka ˈˈtʋ ˈto n ˗wo ˗bha. Ka n dhɛɛˈˈ ˗kpɔ ˗a ˈka ˈzü ˗mën ˗wɔn ˈgü? Ɛɛnˈˈ ka˗ ˈˈpiʋ̈ ˈka kë ˗a ˗bha gwëëˈˈ ˗nu ˈka ˈpö ˗ee?»
28 ˈDhɛ ˈö˗ pö ˈˈdhʋ̈, ˈyö ˈwo ˗ya ˗we ˗a ˗dhɛ ˗sü ˗bha ˈö ˈwo˗ pö: «Bhi ˈnën ˈü mɛn ˈö bhë ˗a ˗bha gwëëˈˈ do ˈka, ˈˈkɛɛ yi ˗zë, Moizö ˗bha gwëëˈˈ ˗nu ˗mü yi ˈka.
29 Yi˗ ˈwɔn ˗dɔ ꞊dhɛ ˗Zlan ˗yö ˈwɔn ˗blɛɛ Moizö ˗dhɛ, ˈˈkɛɛ gɔndënën ˈkö bhë, ˈyaa˗ ˈgodhɛ dɔ.»
30 ˈYö mɛn ˈö bhë ˈö˗ ˗yɔ bɔ ˗an ˗gɔ ˈö˗ pö: «˗A kë ˗sü kö ˗dhɛ ˈö go ˗a ˗bha ˈkaa˗ dɔ bhë ˗a ˈwɔn ˗yö n ˗kun, ˈˈkɛɛ ˈsa kö yö ˈnën n ˈˈɲan ˗pʋ.
31 Kwa˗ ˈwɔn ˗dɔ ꞊dhɛ ˗Zlan ˈyaa ö ˈˈtʋ ˈto ˈwɔnyaakëmɛn ˗nu ˗wo ˗bha, ˈˈkɛɛ mɛn ˈö ˗suʋ̈ ˗Zlan ˗gɔ ˈö˗ ˗dhidhɛwɔn ˗kë, ˗a ˗mɛn ˈö bhë ˗Zlan ˗yö ö ˈˈtʋ ˗to ˗a ˗wo ˗bha.
32 ˗Ya ˈgo mü ˈzü, ˈö˗ ˗bhɔ ˈˈdhʋ̈ ꞊kwɛŋzü, kwa ˈti˗ man do ꞊dhɛ mɛn ˈö bhɔ kö ˗a ˈˈɲɛɛn ˗yö tii, mɛn ˈbhaa ꞊yaa˗ ˈˈɲan ˈˈpʋ.
33 ˗Ya kë ꞊dhɛ gɔndënën ˈö bhë, ˗Zlan ˈyaa ˈnën ˈö˗ bɔ ˗be, yö ˈti ˗dho ˗mɔn ˗a ˗bha toŋtoŋdhö kö ˗yö ˈwɔn ˗nu ˈwo bhë ˗an kë.»
34 ˈYö ˈwo˗ pö ˗a ˗dhɛ: «Bhi ˈö ü ˗dhü ˗todhʋ̈sü ˗yö bhɔ ˈwɔn yaa ˈgü bhë, ˈyö ˈü˗ pö ˈü yi ꞊klaŋ kë ˗ee?» ˈYö ˈwo˗ ˗zuö ˈˈkpɛnŋ.
35 Yesu ˗ya ˗man ꞊dhɛ ꞊waa˗ ˗zuö ˈˈkpɛnŋ, ˈyö ˈdhɛ ˈö ˗kpan ˗a ˗bha ˈö˗ pö ˗a ˗dhɛ: «Ü ü ˗zo ˗yö mɛn Gbö ˗dhɛ ˗ee?»
36 ˈYö gɔndënën ˈö bhë ˈö˗ ˗yɔ bɔ ˗a ˗gɔ ˈö˗ pö: «Mɛn ˈö ˈdhö ˗mü ˗bhö ˗a pö n ˗dhɛ n dëmɛn, ˗yö kë ˈˈdhʋ̈ kö ˈa n ˗zo yö ˗a ˗dhɛ.»
37 ˈYö Yesu ˗ya pö ˗a ˗dhɛ: «Mɛn ˈö ˈdhö ˗mü ˈbha ˗kpan ˗a ˗bha, ˗a ˗gɛn ˗mü ꞊dhɛ yö ˈnën ˈö ˈwɔn blɛɛˈˈ ˗ni ˈgü ü ˗dhɛ bhë.»
38 ˈYö˗ pö: «A n ˗zo ˗yö ˗a ˗dhɛ n Dëmɛn.» ˈYö ˈˈgblëënnu Yesu ˈˈdhiʋ̈.
39 ˈDhɛ ˈö˗ pö ˈˈdhʋ̈, ˈyö Yesu ˗ya pö: «A ˗nu ˈˈkpɔnŋ ꞊taa kö pë ˗nu ˈa ˗dho ˗an kë bhë ˗yö mɛn ˗nu ˈö ˗an ˈˈɲɛɛn ˈdhö tii ˗an ˈˈɲan ˈˈpʋ, kö mɛn ˗nu ˈö ˗an ˈˈɲan ˗yö ˗dhɛ yö ˗wo kë ˈˈɲɛɛntiimɛn ˗nu ˈka.»
40 ˈDhɛ ˈö Fadhiziɛn ˗nu ˈwo kun ˗a ˈˈpiʋ̈ mü bhë ˈwo˗ man ˈˈdhʋ̈, ˈyö ˈwo˗ pö: «Yi ˗de ˈpö ˈyaa ˈˈɲɛɛntiimɛn ˗nu ˈka, ˈyaa ˈˈdhʋ̈ ˗ee?»
41 ˈYö Yesu ˗ya pö ˗an ˗dhɛ: «˗Ya kë ꞊dhɛ ka ˈˈɲɛɛn ˗yö tii ˗be, kö za* ˈyii ˗dho kë ka ˗bha. ˈˈKɛɛ ka˗ ˗pö: ‹Yi ˗dhɛ ˗yö.› ˗A ˗wɔn ˈgü ka ˗bha ˈwɔn yaa ˗bhawɔn yö ˈti ˗dho ˈto.»
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «Labi.»
^ ꞊Waa˗ pö ˈˈdhʋ̈ ˗a ˗gɛn ˈnën ˗tɔ «˗bhö dɔ ˗Zlan ˈˈɲandhiʋ̈ ˈü gagade pö.»
^ Ɛɛnˈˈ «pö.»
