KWA -BHA -KË KLETIƐN ˈKA -SÜ
-Kwa kë -zlanwopömɛn -nu -tiaandhö ˈka: Biblö ꞊klaŋ -nu ˈö -an -gɛn ˈyaa ˈdho ˈˈdhiʋ̈, -an ˈduannu -sü ˈka
-MËN ˈÖ -KË ˈÖ- -WƆN ˈDHÖ ˈˈGBƖƖ-? Mɛn -nu dua -mü kö -wo Zoova ˈtɔ bhɔ kö -wo dha. (Wlɔ 10:13, 14) ˈˈKɛɛ mɛn -nu ˈwo Biblö ꞊draan kwa ˈˈpiʋ̈, -an ꞊gban ˈwaa ˈˈwɩ- -bha kö -wo Zoova -bha ˈtɔŋ- -nu ˈkun. Mɛn -nu ˈwo- ˈˈpiʋ̈ ꞊dedewo kö -wo wo -bha -tosɛta kë -kɔ bho ˈˈgblʋʋ kö -wo kë Zoova -dhɛ -së bhë, ˈkwa -an -takun, kwa- -zɔn ꞊dhɛ kwa ˈwɔn -së -kë kwa -bha ˈˈtʋ̈ŋ ˈka. ꞊Ya kë ꞊dhɛ mɛn ˈbha -yö Biblö ꞊draan kwa ˈˈpiʋ̈ -a yi ꞊ya ꞊gwë, ˈˈkɛɛ -a -gɛn ˈyaa ˈdho -ni ˈgü ˈˈdhiʋ̈, -yö -së kö ˈkwa- -bha Biblö ꞊klaŋ ˈduannu, kö ˈkwa kwa -bha ˈˈtʋ̈ŋ ˈsü ˈkwa mɛn -nu ˈö ˈwo ꞊ɲɔɔn -ni ˈgü Zoova waa ö -bha -kɔlokota -bha, -an -takun -a ˈka. (Zn 6:44) ˈˈKɛɛ ꞊ya kë ꞊dhɛ -a mɛn -ya -zɔn ꞊taabha ꞊dhɛ «-Zlan -ya [...] -da [kö -yö kë] -tosɛa ˈö ˈyaa yën -a këmɛ ˈka», kwa ꞊mɔɔn- -bha ˈkwa Biblö ꞊draan- ˈˈpiʋ̈ -sü ˈzü dɔ -dɛɛwo.—Kë 13:48.
KWA -DHO -A KË -KƆ -KË ꞊DHƐ?
-
-Kwaa ꞊klaŋdhiʋ̈nën ˈˈnuɛ bho ˈö sü ꞊dhɛ -ya ˈˈpiʋ̈ ˈö gagade dɔ.—1Ti 2:4
-
-Kwaa -zɔn -a -dhɛ ꞊dhɛ pë ˈö- ꞊draan bhë, -a -ya ꞊bhlëë ˈgü -sü -wɔn -yö ˈˈgbɩɩ-.—Dk 6:46-49
-
Yesu -bha ˈwɔnzuan ˈö -gban pëtamɛn -bha bhë, -kwaa ˈˈdoo dɔ- ˈˈpiʋ̈ ˈˈnɛɛnnɛn ˈka. ˈKwa kwa bo, -kwaa pö -a -dhɛ -yö ö -zota pë ˈö- -gɛn ꞊nënŋ, -a ˈgü.—Mt 13:18-23
-
ˈPë -kë ˈkwa- ˈˈpiʋ̈ ˈkwa- -bha Biblö ꞊klaŋ ˈduannu, -kwaa pö -a -dhɛ -wo dhɔŋsü ˈka.
-
-Kwaa pö -a -dhɛ ꞊dhɛ kwa dho -wo -a -dhɛ ꞊shiöŋ kö ˈkwa- ꞊faan ˈmën. -Kwaa pö -a ꞊dhɛ ꞊dhɛ -a -gɛn -ya ˈdho ˈˈdhiʋ̈, kwa dho -a -bha Biblö ꞊klaŋ züdɔ ˈzü -dɛɛwo.
-BHÖ VIDEO BHË- -GA. ꞊YA ƝËN -BHÖ DHƐƐˈˈ -NU ˈWO YÖ -AN -YƆ BƆ:
-
-Mën ˈö- -zɔn -an -bha ˈˈdoo bhë- ˈgü ꞊dhɛ Biblö ꞊klaŋ bhë -a -gɛn ˈyaa ˈdho -ni ˈgü ˈˈdhiʋ̈?
-
Kwa ꞊dhegblü -ya ꞊klaŋdhiʋ̈nën -takun -kɔ -kë ꞊dhɛ kö -ya ˈwɔn dɔ ꞊dhɛ -a dua -mü kö -yö ö -bha -tosɛta kë -kɔ ˈbha -nu bho ˈˈgblʋʋ?
-
Kwa ꞊dhegblü -ya -zɔn Biblö ꞊klaŋnën -dhɛ -kɔ -kë ꞊dhɛ ꞊dhɛ -ya baaˈˈ ö -de -bha, ˈö -dho -a -bha Biblö ꞊klaŋ züdɔ -dɛɛwo?