Pakö ˗totaabhasü ˈö Yesu ˗dho ˗a kë bhë, ˗yö ꞊bhlëësü. ˗Dhɛ ˈö ˗kë ꞊dhɛ ˗a ga ˈˈtʋ̈ŋ ˈyaa ꞊gblɛɛn ˈzü bhë, ˗ya ˈˈpiʋ̈ kö waa˗ ˗bha bɔmɛn ˗nu ˗wo Pakö ˗bhöpë ˈö bhë ˗a ˗bhö wo ˈkwëë˗, kö ˗yö ˈwlaan˗ ˗dɛɛ ˈö ˗dho kë ˗kwɛ ꞊gban ˈˈpɛpɛ ˈka ˗a ˗ya. ˗A ˈwlaan˗ ˈö ˈˈdhʋ̈ ˈö ˈtɔ˗ Dëmɛn ˗bha ˈˈdooka ˗bhöpë. ˗A ˈwɔn ˈgü ˗yö Piɛdhö waa Zan ˗an ˗bɔ kö ˗wo ˈdho ˗a kë ˗dhɛ mɛɛnˈˈ kö ˗wa ˗dhɛ baaˈˈ. (Dk 22:7-13; Pë ˈˈbin ˈö˗ kwi ˗ta bhë ˗a ˗ga.) ˗A kë ˈö˗ ˗wo ˈˈdhʋ̈ bhë ˗ya ˗zɔn ꞊dhɛ kwa dua ˗mü kö ˈkwa kwa ˗de baaˈˈ ˗zo ˗bo ˈwlaan˗ ˈö dho kë Masö 27 ˈka bhë, ˗a ˗bha. ˗A ˈbha ꞊ya kë kö mɛn zii ˗nu ˈwa ˈwɔn ˈö ˗gban ˈˈdhɛɛtadhiaŋzëmɛn, we waa ˈbluu˗ waa pë ˈˈwɛɛ ˈbha ˗nu ˗bha ˗an ˈˈɲan bhɔ ˈsaadhö. ˈˈKɛɛ mɛn ˈö ˈdhö, kwa ˗dho kwa ˗de baaˈˈ ˗kɔ ˗kë ꞊dhɛ ˗zo ˗bo ˈwlaan˗ ˗bha?

˗Kwa kwa zuʋ̈ˈˈ baaˈˈ. ˗Kwa ˗zo ˗bo ˈwlaan˗ Biblö ˈˈɲan ˗nu ˗wo pö kö ˈkwa kwa ˗zota ˗an ˈgü. Kwa ꞊mɔɔn˗ ˗bha ˈkwa ˗kpan ˗dhɛkpaɔyi ˗dhɛ ˈö ˈdhö˗ ˗bhaa ˗bha Examinons les Écritures chaque jour ˈgü. A ploglamö ˗së ˗yö Appendice B12 ˈö La Bible. Traduction du monde nouveau ˗be ˗dɛɛ ˈgü, ˗a ˈgü. (Kpɔɔˈˈ ˈpö ˗kwɛ 2020 Avlidhö ˗Kë Kletiɛn ka ˗sü waa ˗zlanwopö ˗yö ˗bhɔkwëë ˗kë ˗a ˈka ˈsëëdhɛ ˗bha.) ˈWɔn ˈbha ˗nu ˈwo ˗gban ˗gɔtadhɔpë ˗bha ˗kë ꞊bhlëësü ˗sü ˗bha, ˈö ˈkɔdhigümɛn ˗nu ˈwo dho ˗a draanˈˈ wo ˗bha ˗Zlan ˗dhɔkë ˈkɔɔsü ˗ta, ˗wo ꞊mɔɔn˗ ˗bha ˈwo ˗kpan ˗an ˗bha Index des publications des Témoins de Jéhovah ɛɛnˈˈ Guide de recherche pour les Témoins de Jéhovah ˈgü.

˗Kwa mɛn ˈˈwɛɛ ˗nu ˗dhɛ ˗a ˗ta. ˗Kwa kwa ˗kɔ ˗da ꞊dedewo mɛn ˗dhɛsü ˈö bhë, ˗a ˈgü. ˗Kwa kwa ˗zota mɛn ˗nu ˈkwa ꞊mɔɔn˗ ˗bha ˈkwa ˗an ˗dhɛ, ˗an ˈgü. ˗Wo ꞊mɔɔn˗ ˗bha kö ˗wo kë kwa ˗bha ˗womɛndhɛsü ˗nu, kwa ˗bha Biblö ꞊klaŋ zii ˗nu, kwa ˈˈtɛɛbɔ ˗nu waa kwa ˗mɛn ˗nu ˈka. Mɛn zii ˗nu dua ˗mü kö ˗wo mɛn ˗nu ˈö ˗an ˗kɔ ˗ya ꞊zɔɔ ˗an ˗dhɛ ˈpö. Kwa ˗zo ˈya ˈdho bhɔ ˈpö ꞊dhɛ ꞊ya kë ꞊dhɛ mɛn ˈbha ˈyaa kwa ˈˈpian ˈˈpiʋ̈, kwa ꞊mɔɔn˗ ˗bha ˈkwa ˗dhɛ ˈö˗ ˗bha, ˈˈlɛlɛ waa ˗dhɛ ˈö ˗zo ˗bo ˈwlaan˗ ˗dho kë ˗a ˈka mü ˗a ꞊mɛɛn kwa ˗bha ɛntɛnɛtö ˈˈnimlɔn ˗ta, ˈö ˈkwa˗ pö ˗a ˗dhɛ. ˗Kwa kwa ˗kɔ ꞊nënŋ ˈWƆN ˗NU ˈWO ˗GBAN YI ˗BHA ˗a ˗ta, jw.org ˈkɔɔ ˈˈpian ˗ta ˈˈdhʋŋ kö ˈkwa kwa ˗kɔ ꞊nënŋ ˈzü «˗Zo ˗bo ˈwlaan˗ ˗ta.»

˗Mën ˈˈwɛɛ ˈbha ˈkwa ꞊mɔɔn˗ ˗bha ˈkwa˗ ˗kë kö ˈkwa kwa ˗de baaˈˈ?