-Bhö ˈü -zota kö ˈü Gadhidhe -sɛ ˈgü Yesu -bha ˈˈtʋ̈ŋ ˈgü. ˈBha ˈdho Zedhizadhɛmö ˈgbakɔ -nu ˈwlaan- -wɔn ˈgü. Zedhizadhɛmö -dhɛ -ya pa -Zlan -dhɔkëmɛn -nu ꞊va ˈö ˈwo ʒiö -ni ˈgü -dhɛ ꞊gban ˈgü, -an ˈka. -Yö ü ˈˈpiʋ̈ kö ˈü ˈˈsaa- ˈbha bho -Zlan ˈˈdhiʋ̈. ˈBha -bho do ˈdhɔ. -A -bho ˈö ˈˈdhʋ̈ -yö ü ꞊kwɛɛ-. Ü bɔ -dhɛ mɛɛnˈˈ -ni ˈgü mɛn -nu ꞊zinŋ ˈgü kö ˈü wo -Zlan -dhɔkëdhɛ ˈgü. ˈBha wo -a -dhɛ ˈgü, ˈˈkɛɛ -a -dhɛ -ya pa mɛn -nu ˈwo nu ˈˈsaa- bho ˈpö -Zlan ˈˈdhiʋ̈, -an ˈka. -An ꞊vadhɛ -wa wo -bhaa -bho nu. -Ya yö ü -bha. Ü -bha -bho -nu ˈˈsaabhomɛn -nu -dhɛ ˈˈtʋ̈ŋ ꞊ya wo. -Dhɛ ˈü- pö bhii- nu, ˈyö ü -zo -yö -bo ꞊dhɛ ˈwɔn ˈbha -yö ü ꞊dhegblü ˈbha -zo ˈˈpiʋ̈ ü -bha. ˈˈKɛɛ ü ꞊dhegblü ˈö ˈˈdhʋ̈, -a ˈbha ꞊ya -kë ˈyaa ˈpö bhë- ˈgü. -Mën ˈü -dho -a kë? Pë ˈü -dho -a kë Yesu ꞊yaa- pö. (Matiö 5:24 -wo pö.) Kaa ü ꞊dhegblü ˈö ˈwɔn ˈbha ˈdhö- -zo ˈˈpiʋ̈ ü -bha bhë, ka -dho -a kë ꞊dhɛ kö ˈka -dhi ka ˈko -dhɛ? Pë ˈö ˈka -dho -a kë, -bhö ü -kɔ ˈˈyɛ -a -së -bha ˈkɔnën -nu ˈwo ˈˈshia bhë, -an ˈgü.

Ü DUA -MÜ KÖ...

• ˈü ˈdho bhɛɛˈˈ ü ꞊dhegblü -dhɛ ꞊ya kë ꞊dhɛ gagade -ya ˈˈpiʋ̈.

• ˈü ü ꞊dhegblü -bha ˈwɔn yö -kɔ dɔ ꞊zinŋ ˈgü, ˈyö -tɔ ꞊dhɛ ü -bhaa ˈgü ˈwɔn -shiö -a -dhɛ ˈˈvaandhö, ɛɛnˈˈ ˈwɔn ˈö -kë bhë -yö -sü -a -bha ˈpö.

• ˈü ü ˈˈtʋ ˈto ü ꞊dhegblü -bha -së ˈka ˈkö kë ꞊dhɛ ˈwɔn ˈö- blɛɛˈˈ -ni ˈgü, ˈbhaa- ꞊gban ˈgüman. ˈKö kë ꞊dhɛ ˈbhii- kë ü -de ɲaan, -bhö -gën ꞊dede nu -a -dhɛ ˈwɔn ˈö -shiö -a -dhɛ bhë, -a -wɔn ˈgü.

Ü ꞊DHEGBLÜ DUA -MÜ KÖ...

• -yö ˈdho -a pö mɛn ˈˈwɛɛ -nu -dhɛ ꞊dhɛ ˈbha ˈwɔn yaa kë -a ˈka, kë ˈˈdhʋ̈ kö -wo bɔ -a ˈˈpiʋ̈.

• -yö ˈwɔn -da ü ˈka, kö ˈwɔn ˈü- -kë -a ˈka bhë -yö ʒiö -a ꞊gban ˈgü kë ˈˈdhʋ̈ kö ˈü ˈˈwɩ -a -bha.

• ꞊faan ˈwaa zuʋ̈saadhɛ ˈü -an sü kö ˈü ˈdho -kpan -a -bha bhë, -an yö, kö -yö ü -bhawɔn ˈto -a zuʋ̈ˈˈ ꞊gban ˈka.

ˈKö kë ꞊dhɛ ꞊dɛɛ kwa -bha -Zlan -dhɔkësü ˈgü ˈkwaa wü ˈˈsaa- -nu bho ˈzü, -gleŋ -mɛɛn ˈö Yesu -ya -da kwa -bha ˈö -gban -dhikodhɛ mɛɛnˈˈ kwa ꞊dhegblü -nu ˈˈpiʋ̈ -sü waa -Zlan -dhɔkë -kɔ -së -bha?