1, 2. Dhɛɛˈˈ ˗nu ˗mɛɛn ˈö mɛn ꞊vadhɛ ˗wa kpɔ wo ˗de ˗gɔ?

ˈWƆN ˈˈgbɩɩ˗ ˈbhaa ˗nu ˈwo ˗kë, ˈyö ˈwo ꞊nɛn: ˈˈTɛɛ ˈˈgbɩɩ˗ do ˈbha ˗ʒiö ˈö ˈpö˗ do wü. Mɛn do ˈö bu ˈdhö˗ ˗gɔ, ˗yö ˗da ˗zlanwo ˈkɔ do ˈbha ˈgü, ˈö bu ˗da, ˈö mɛn ꞊va zë, ˈö ˗an mɛn ˈbhaa ˗gi. Bhüöö ˗yua ˗yö dhebɔ do ˈö ˈnën ˈˈsoodhu ˈdhö˗ ˗gɔ ˗a ˗zë, ˈö˗ ˗bha ˈnën ˗nu to ˗tenën ˈka.

² ˈWɔn ˈˈgbɩɩ˗ ˗nu ˈö ˗an suu ˈdhö bhë ꞊wa kë, mɛn ꞊vadhɛ ˗wo wo ˗de dhɛɛˈˈ ˗kpɔ ꞊dhɛ: “˗Mën ˈö ˗kë, ˈö ˗kë ˈˈdhʋ̈?” Mɛn ꞊vadhɛ ˗wo wo ˗de dhɛɛˈˈ ˗kpɔ ˈzü ꞊dhɛ: ˗Mën ˈö ˗kë ˈö ˈko ˗san waa saanˈˈ ꞊wa ˈˈkpɔnŋtaadhɛ bho ꞊dɛɛ ꞊ni? Dhɛɛˈˈ ˗nu ˈwo bhë, ˈbha ˗an ˈkpɔ ü ˗de ˗gɔ do ˗ee?

3, 4. (a) Dhɛɛˈˈ ˗nu ˗mɛɛn ˈö Abakukö ˗yö ˗an kpɔ? (b) Zoova ˗yö ˗an ˗yɔ ˗bɔ ˗a ˗gɔ ˗kɔ ˗kë ꞊dhɛ?

³ Biblö ˗ya ˗zɔn kwa ˗dhɛ ꞊dhɛ mɛn ꞊vadhɛ ˈö ˗zo ˗yö ˗Zlan ˗dhɛ ˗sü ꞊dede kun ˗an ˗gɔ, ˗wo dhɛɛˈˈ ˗nu ˈwo bhë, ˗an ˗kpɔ wo ˗de ˗gɔ ˈpö. ˗A ˈwɔnzuan ˈnën ˗tɔ, ˗Zlan ˗wodhiʋ̈lomɛn Abakukö ˗yö Zoova dhɛɛˈˈ ˗kpɔ ˈö˗ pö: “˗Mën ˈö ˗kë ˈü˗ ˗kë ˈö n ˈˈɲan ˗da ˈwɔn yaa ˈgü? ˗Mën ˈö ˗kë ˈü mɛn ˗nu ˗ga ˈö ˈwo mɛn ˈˈwɛɛ ˗nu ˈˈklʋʋbhɔ? ˗Mën ˈö ˗kë ˈö n ˈˈɲan ˗da pë shiʋ̈ˈˈ ˗sü waa ˈˈvaanvandhɛ ˗nu ˈgü? ˗Mën ˈö ˗kë ˈö ˈˈdhinaan waa ˗gblü gɔn ˗sü ˗nu ˗wo sɔ?”​—Habaqouq 1:3.

⁴ Abakukö ˗bha dhɛɛˈˈ ˗nu ˈö ˗Zlan ˗ya ˗daa ˗kë waa˗ ˗wo ˈö ˗kë ꞊dhɛ ˈö ˗dho ˈwɔn ˗nu ˈwo bhë ˗an ˈˈɲan bhɔ ˈka bhë, ˗wo ˗ya ˗sü ˈka Habaqouq 2:2, 3 ˈgü. Mɛnbhɩɩdhe ˗nu ˗dhɔ Zoova ˗kë ꞊dedewo. Biblö ˗ya ˗pö: “˗A ˈˈtʋ̈ng ˗yö ka ˈgü.” (1 Piɛdhö 5:7) ˈKwa ˗kpan mɛn ˗nu ˗bha kö ˗wo saanˈˈ ˈsü ˗ni ˈgü ˗yö ˗kë kwa ˗dhɛ ˈyaa˗. ˈˈKɛɛ ˗yö ˗kë ˗Zlan ˗dhɛ ˈyaa˗ ˈö ˗ʒiö ˗a ˈka kwa ˗ta. (Isaïe 55:8, 9) ˈDhɛ ˈö ˈˈdhʋ̈, ˗mën ˈö ˗kë ˈsa ˈö saanˈˈ ˗yö ˗kë ꞊va ˈˈkpɔnŋ ꞊taa ꞊ni dhö? Dhɛɛˈˈ ˈö bhë ˗kwaa ˗yɔ mɛɛnˈˈ!

5. ˗Mën ˈö ˗zlanwo ˗gɔdhiʋ̈mɛn ꞊vadhɛ ˗wa pö ˈö ˗gban saanˈˈ ˗bha? Biblö ˗ya ˗pö ˈpö ꞊dhɛ?

⁵ Pastëë ˗nu, ˈpɛɛ˗ ˗nu, waa ˗zlanwo ˗gɔdhiʋ̈mɛn ˈˈwɛɛ ˈbha ˗nu ˗wa ˗pö ꞊shiö ꞊dhɛ mɛnbhɩɩdhe ˗nu ˗bha saanˈˈ ˈsü ˗sü ˈö bhë, ˗Zlan dhɔɔbhaawɔn ˗mü. ˗A mɛn ˈbhaa ˗nu ˗wa ˗pö ˈwɔn ˈˈpɛpɛ ˈö ˗kë mɛn ˈka, ˈö˗ ˈbha ˗kë ˈwɔn ˈˈgbɩɩ˗ ˗nu ˈka, ˗Zlan ˗yö ˗an ˗to ˈˈdhiʋ̈ ˈö ˗an ˗bɛn zë. ˗Wa ˗pö ˈzü ꞊dhɛ mɛn ˈbha ˈyaa ꞊mɔɔn˗ ˗bha kö pë ˈö ˗kë ˈwo ˗kë, ˗yö ˗an ˗gɛn dɔ. Mɛn ˈbhaa ˗nu ꞊mɔɔn˗ ˗bha ˗ʒiaanwo ˈwo˗ pö mɛn ˗nu ˗dhɛ ꞊dhɛ, ga ˈö bhɔ ˗ni, ˈö˗ ˈbhaa ˗nu ˗kë ˈnën ˈsɛɛn˗ ˗nu ˈka bhë, ˗yö ˗bhɔ ˈˈdhʋ̈ kö ˗wo ˈdho ˗Zlan ˈˈpiʋ̈ dhaŋ˗ ˈgü. ˈˈKɛɛ gagade ˈyaa ˗mü. Zoova ˈyaa ꞊mɔɔn˗ ˗bha kö ˗yö ˈwɔn yaa kë kwa ˈka toŋtoŋdhö. Biblö ˗ya ˗pö: “Pë yaa kë ˗sü ˈyaa ˗da ˗Zlan ˗zo ˈˈpiʋ̈ toŋtoŋdhö, ˈyö ˗tɔ ꞊dhɛ ˈˈpiigbɩɩ˗ Dë ˈyaa ˈwɔn yaa kë.”—Job 34:10.

6. ˈMën ˗kë ˈö mɛn ꞊vadhɛ ˗wo saanˈˈ ˈˈpɛpɛ ˈwo ˈˈkpɔnŋ ꞊taa ˗an ˗wɔn ˗ya ˗Zlan ˗bha?

⁶ Saanˈˈ ˈˈpɛpɛ ˈwo ˈˈkpɔnŋ ꞊taa, mɛn ꞊vadhɛ ˗wa ˗wɔn ˗ya ˗Zlan ˗bha, ˈyö ˗tɔ ꞊dhɛ ˗an ˗bhaa ˈgü, ˗Zlan ˈnën ˈˈkpɔnŋtaadhɛ ꞊kɔɔn ˗ni ˈgü. ˈˈKɛɛ kwa˗ ˗yö ˈWɔn ˗gɔ 3 ˈgü ꞊dhɛ Sɔtraan Dügɔmɛn ˈnën ˈˈkpɔnŋtaadhɛ ˗gɔ ˈˈdhiʋ̈.

7, 8. ˈMën ˗kë ˈö ˈwɔn yaa ˗nu ˗kë ꞊va ˈˈkpɔnŋ ꞊taa ꞊ni?

⁷ Biblö ˗ya ˗pö kwa ˗dhɛ ꞊dhɛ “ˈkpongtaadhɛ [...] dü ˗kɔ ꞊löö.” (1 Zan 5:19) Sɔtraan ˈö ˗kë ˈˈkpɔnŋtaadhɛ ꞊kɔɔnmɛn ˈka bhë, ˗a ˈˈgblüüdhɛ ˗yö ꞊gblɛɛn, ˈö˗ suu ˈdhö ˈyaa˗. ˗Yö “ˈˈkpënng˗ ˗kë ˈˈkpʋngtaadhɛ ˗todhʋ̈sü ˗gɔ.” (˗Dhɛkpaɔ dhiaˈˈ ˈsëëdhɛ 12:9) Mɛn ꞊vadhɛ ˗wo wo ˗bha ˈwɔn kë ˗kɔ ˗nu ˗sü ˗a ˗bhaa ˗bha. Yö ˈnën˗ ˗wɔn ˈgü ˈö ˈˈkpɔnŋtaadhɛ ˗ya pa ꞊sua kë ˗sü, ˈko ˗san waa suuyaadhɛ ˗nu ˗an ˈka bhë.

⁸ Saanˈˈ ˗bha ˗kë ꞊va ˈˈkpɔnŋ ꞊taa ˗gɛn ˈˈwɛɛ ˈbha ˗nu ˗dhö. ˈDhɛ Adan waa Ɛvö ˈwo ˗gban ˗Zlan ˗gɔ, ˈyö ˈwo ˈˈdhaŋga to wo ˗bha ˈnën ˗nu ˗gɔ ˈkɛnŋ˗ ˈka. ˗A ˈˈdhaŋga bhë˗ ˗wɔn ˈgü ˈyö mɛnbhɩɩdhe ˗nu ˗wo mɛn ˈˈwɛɛ ˗nu ˗wëëkëwo. ˗Yö ˗kë ˗an ˈˈpiʋ̈ ꞊shiö ꞊dhɛ ˈwo kë ꞊bhlëësü ˈwo ʒiö ˗a ˈka mɛn ˈˈwɛɛ ˗nu ˈwo to ˗an ˗ta. ˗A ˗wɔn ˈgü ˈyö ˈwo ko zë wo ˈˈkwöö, ˈyö ˈwo ˗gblü  gɔn, ˈyö ˈwo ˈˈgbɩɩdhɛ ˗wɔ mɛn ˈˈwɛɛ ˗nu ˗ta. (Ecclésiaste 4:1; 8:9) ˈˈTʋ̈ŋ ˈbhaa ˗nu ˈka, mɛn ˗nu ˗bha saanˈˈ ˈsü ˗sü ˗yö ˗sü “ˈˈtʋ̈ŋ waa ˈwɔn ˈö ˈyaa mɛn ˈˈɲaan” ˗a ˗bha mɛn ꞊slɔɔ ˗sü ˗bha. (Ecclésiaste 9:11) Kö mɛn ˗nu kë ˗dhɛ yaa ˈgü ˈˈtʋ̈ŋ yaa ˈka, sidan waa ˈwɔn yaa ˈˈwɛɛ ˗nu ꞊mɔɔn˗ ˗bha ˈö ˗an ꞊slɔɔ.

9. ˗A ˗kë ˗sü kö Zoova ö ꞊kwaa ˈwɔn ˈˈgbɩɩ˗ ˗nu ˗zü kö ˗wo nu kwa ˗ta bhë, ˗mën ˈö ˗kë ˈkwa ꞊mɔɔn˗ ˗bha ˈkwa˗ pö ˗a ˗gɛn ˗tiaandhö ˗ya ˗gɔ?

⁹ Zoova ˈyaa mɛn ˗nu ˗da saanˈˈ ˈgü toŋtoŋdhö. ˗Gblü ˗nu, mɛn zë ˗sü waa mɛn ˗wëëdhɛbhosü ˗nu bhë, ˈyaa ꞊nɛn ˈkwa ˗dho ˗an ˗ya ˗a ˗bha. ˈWɔn ˈˈgbɩɩ˗ ˗nu ˈwo ˗kë ꞊dhɛ ˈˈtɛɛ ˈˈgbɩɩ˗ ˗bha ʒiö ˗sü, ˈˈsɛ ˗bha ꞊zluusü waa ˈˈyi ˗bha pa ˗sü ˗nu ˈdhö bhë, ˗Zlan ˈyaa ˈnɛn ˈö ˗an ˗kë. ˈˈKɛɛ ü ꞊mɔɔn˗ ˗bha ˈü ü ˗de dhɛɛˈˈ kpɔ ꞊dhɛ: ‘꞊Ya kë ꞊dhɛ Zoova ˈˈpii ˗yö ˈˈgbɩɩ˗ ˈö ʒiö mɛn ꞊gban ˗ta ˈˈkpɔnŋtaadhɛ ˗todhʋ̈sü ˈgü, ˗mën ˈö ˗kë ˈö ˈyaa ˈwɔn ˈˈgbɩɩ˗ ˗nu ˈkun ʒian˗ kö ˗wo bo kë ˗sü ˈka?’ Kwa˗ ˈwɔn ˗dɔ ꞊dhɛ ˗Zlan ˗yö ö ˗zota kwa ˗wɔn ˈgü ꞊dedewo. ˗A kë ˗sü kö ˗yö ö ꞊kwaa ˈwɔn ˈˈgbɩɩ˗ ˗nu ˗zü kö ˗wo nu kwa ˗ta bhë, kö ˗a ˗gɛn ˗tiaandhö ˗ya ˗gɔ.​—1 Zan 4:8.

10. ˗Mën ˗wɔn ˈö Sɔtraan ˗ya ꞊blɛɛ Zoova ˗bha?

¹⁰ Dügɔmɛn ˗yö ˈˈkpënŋ˗ ˗kë Adan waa Ɛvö ˗an ˗gɔ Edɛnö ˈˈdhüdhɛɛdhö. Sɔtraan ˗ya ˗pö ꞊dhɛ ˗Zlan ˈyaa mɛn ꞊kɔɔnmɛn ˗tiaandhö ˈka. ˗Ya ˗pö ꞊dhɛ ˗Zlan ꞊ya pë ˗së ˈbha ˗bin Adan waa Ɛvö ˗an ˗gɔ. ˗Yö ˗kun Sɔtraan ˈˈpiʋ̈ kö ˗yö kë ˗an ˈgü ꞊dhɛ ö ˗dho kë mɛnkɔɔnmɛn ˗tiaandhö ˈka ˈö ˗ʒiö ˗a ˈka Zoova ˗ta, kö ˗yö kë ˗an ˈgü ˈzü ꞊dhɛ ˗an ˗bhawɔn ˈyaa ˗Zlan ˗bha.—ˈWunzüdɔdhɛ 3:2-5; ˗bhö kpɔɔˈˈ ˗zoto ˗a ˈˈpiʋ̈ ˗wɔn 27 ˗bha

11. Dhɛɛˈˈ ˗mɛɛn ˈö kwa ˗bhawɔn ˈdhö ˗a ˗yɔ ˗bha?

¹¹ Adan waa Ɛvö ˗wo Zoova ˗bha ˈtɔŋ˗ ꞊lögü, ˈö ˈwo ˗gban ˗a ˗gɔ. ˗Wo wo ˗zota ꞊dhɛ wo ˈnën wo dua ˈdhö ˗mü kö ˈwo ˗a pö ꞊dhɛ ˈpë yö, ˗yö ˗së ɛɛnˈˈ ˗yö ˈyaa˗. ˗Kɔ ˗mɛɛn ˈö Zoova dho ˗a ˗zɔn ˗a ˈka ꞊dhɛ pë ˈwo˗ ˗kë bhë ˗yö ˈyaa˗, yö dosɛnŋ ˈnën ˗an ˗bha ˈwɔn ˗së dɔ?

12, 13. (a) ˈMën ˗kë Zoova yö ˈti ˈto ˈˈshia˗ mü kö mɛn ˗nu ˈwo ˗gban ˗a ˗gɔ bhë ˗an zë? (b) ˈMën ˗kë ˈö Zoova ö ꞊kwaa Sɔtraan ˗zü kö ˗yö ˗ya ˈˈkpɔnŋtaadhɛ ˗gɔ ˈˈdhiʋ̈, kö mɛnbhɩɩdhe ˗nu ˗wo wo ˗de ꞊kɔɔn ˈpö?

 ¹² Zoova yö ˈti ˗kpo kö ˗yö Adan waa Ɛvö ˗an zë. ˗Yö ö ˗kwaa ˗an ˗zü ˈö ˈwo ˈnën kpɔ. Zoova ˗ya ˗kë ˈˈdhʋ̈ kö Adan waa Ɛvö ˗an ˗bha ˈnën ˗nu wo ˗kɔ ˈˈyɛ ˈmɛn ˗dho ˗an ꞊kɔɔn ˗a ˗bha. Zoova dhɔɔbhaawɔn ˈnën ˗tɔ kö ˈˈkpɔnŋtaadhɛ ˗yö pa mɛnbhɩɩdhe ˈˈslʋ̈ʋ̈slʋ̈ ˗nu ˈka. ˈKö˗ ˗dee ˈö Dügɔmɛn ˗yö pë ˈˈpɛpɛ ˗kë, Zoova dhɔɔbhaawɔn ˈö bhë ˗yö ˗dho ˈto˗ ˗bha.—ˈWunzüdɔdhɛ 1:28; Isaïe 55:10, 11.

¹³ Sɔtraan ˗ya ˗pö Zoova ˈyaa mɛnkɔɔnmɛn ˗tiaandhö ˈka ˗Zlan ˗bha ˈˈkiö ˈˈmliɲɔn ꞊va ˈˈɲan ˈˈdhiʋ̈. (Job 38:7; Daniel 7:10) ˈDhɛ ˈö ˗kë ˈˈdhʋ̈, Zoova ˗yö ˈˈtʋ̈ŋ ˗nu Sɔtraan ˗dhɛ kö ꞊ya kë ꞊dhɛ ˈwɔn ˈö˗ ˗ya ö ˗bha bhë, ˗yö gagade ˈka kö Sɔtraan ya ˗zɔn. ˗Yö ˈˈtʋ̈ŋ ˗nu mɛnbhɩɩdhe ˗nu ˗dhɛ ˈpö kö ˗wo wo ˗de ꞊kɔɔn Sɔtraan ˗kɔ ꞊löö. ˗Ya ˗kë ˈˈdhʋ̈ kö ꞊ya kë ꞊dhɛ ˗wo ꞊mɔɔn˗ ˗bha ˈwo wo ˗de ꞊kɔɔn, ˈö ˗dhi ˗an ˗gɔ kö ˗Zlan ˗kɔ ˈyaa˗ ˈgü, ˗yö kë mɛn ꞊gban ˈˈpɛpɛ ˈˈɲaan.

14. ˗Mën ˈö ˈˈtʋ̈ŋ ˗bha ʒiö ˗sü ˗ya ˗zɔn?

¹⁴ Mɛnbhɩɩdhe ˗nu ˗wa wo ˗de ꞊kɔɔn ˗kɔ ꞊va ˈgüdan ˗kwɛ ˈˈgblü ꞊va ˈˈpiʋ̈, ˈˈkɛɛ ˗a gbɛ˗ yö ˈti dhi ˗an ˗gɔ. ˗A ˗kë ˈˈdhʋ̈ ˗sü ˗ya ˗zɔn ꞊dhɛ Sɔtraan ˈö bhë, ꞊suakëmɛn ˗mü. Mɛn ˗nu ˗bhawɔn ˗yö ˗Zlan ˗bha ˗takundhe ˗bha. Gagade ˗yö ˗Zlan ˗wodhiʋ̈lomɛn Zedhemi ˈˈpiʋ̈ kö ˗ya pö ꞊dhɛ: “ˈAa Zoova, a˗ ˈwɔn ˗dɔ ˈkpakpadhö ꞊dhɛ mɛnbhɩɩdhe ˗bha ʒiaan ˈyaa˗ ˗de ꞊kwɛɛ˗ ˗wɔn ˈka, mɛnbhɩɩdhe ˈö ˈˈta ˈsü ˗ni ˈgü ˈyaa ꞊mɔɔn˗ ˗bha kö ˗yö ʒiaan bho ö ˗de ˈka.”—Jérémie 10:23.

15, 16. (a) ˈMën ˗kë ˈö Zoova kwa ˗ga saanˈˈ ˈgü ˈˈtʋ̈ŋ ꞊gblɛɛn ˈˈpiʋ̈ ˈˈdhʋ̈? (b) ˈMën ˗kë ˈwɔn ˗nu ˈö Sɔtraan ˗yö ˗an ˗da, Zoova ˈyaa ˗an ˈˈɲanbhɔ?

¹⁵ ˈMën ˗kë ˈö Zoova ˗yö kwa ˗ga saanˈˈ ˈgü ˈˈtʋ̈ŋ ꞊gblɛɛn ˈˈpiʋ̈  ˈˈdhʋ̈? ˗Mën ˈö ˗kë ˈö ˈyaa ˈwɔn ˈˈgbɩɩ˗ ˗nu ˈkun ʒian kö ˈwa ˗dho kë kwa ˈka? ˈˈTʋ̈ŋ ꞊va dua ˗mü kö ˗yö ʒiö kö ˈkwa ꞊kun ˗a ˈwɔn dɔ ꞊dhɛ Sɔtraan ˗bha mɛnkɔɔnsü ˈyaa ˗së. Mɛnbhɩɩdhe ˗nu ꞊wa mɛn ꞊kɔɔn ˗kɔ ꞊gban ˈˈpɛpɛ ˈgüdan, ˈˈkɛɛ ˗an gbɛ˗ yö ˈti dhi ˗an ˗gɔ. ꞊Klaŋ ˈˈgblʋ̈gblʋ̈ ˗nu ˗gɛn ꞊ya ˈdho ˈˈdhiʋ̈, ˈö ꞊wa ˈˈslö ꞊vadhɛ kë, ˈˈkɛɛ ꞊flüüwɔn ˗nu, ˈˈfleedhɛ ˗nu, mɛn zë ˗sü waa ˗gblü ˗nu ˗wa kë ꞊va ꞊dɛɛ ˗wa ʒiö ˗a ˈka ˈˈtʋ̈ŋ ꞊gban ˗ta. ˗Zlan ˈyii kwa ˗takun, ˈkwaa ꞊mɔɔn˗ ˗bha ˈkwa kwa ˗de ꞊kɔɔn kö ˗yö dhi kwa ˗gɔ.

¹⁶ ˈˈKɛɛ Zoova ˈyaa ꞊mɔɔn˗ ˗bha kö ˗yö Sɔtraan pin˗ ˈˈpiʋ̈ baaˈˈ. Kö ˗ya kë ˈˈdhʋ̈, ˗yö ˗dho ˗a ˗zɔn ꞊dhɛ ˗a ˗kɔ ˗yö Sɔtraan ˗bha mɛnkɔɔnsü ˗gɔ. ˈYaa ꞊mɔɔn˗ ˗bha kö ˗ya kë ˈˈdhʋ̈ toŋtoŋdhö. ꞊Ya ˈgo ˈmü ˈzü, ˗yö ˗dho kë mɛnbhɩɩdhe ˗nu ˈgü ꞊dhɛ wo ˗mɔɔn wo ˗de ꞊kɔɔn ˗sü ˗bha. ˈˈKɛɛ ꞊sua ˗mü, Zoova ˈyaa ꞊mɔɔn˗ ˗bha ˈpö kö ˗yö ö ˗kɔ ˗da ꞊sua ˈö bhë˗ ˈgü. ˈYaa ꞊sua kë toŋtoŋdhö.—Eblö 6:18.

17, 18. ˗Mën ˈö Zoova dho ˗a kë kö pë ˈˈpɛpɛ ˈö Sɔtraan ˗ya ꞊shiʋ̈ ˗ya baaˈˈ?

¹⁷ Zoova ˗dho ꞊mɔɔn˗ ˗bha kö ˈpë ˗nu ˈö Sɔtraan waa mɛnbhɩɩdhe ˗nu ˈwo˗gban ˗a ˗gɔ, ˈwo˗ ꞊shiʋ̈ ˗yö ˗an baaˈˈ ˗ee? ꞊Ii, ˗Zlan ˗kunkawɔn gbɛ˗ ˈyaa ˈdhö. ˈWɔn ˈö Sɔtraan ˗ya ꞊blɛɛ Zoova ˗bha bhë, ˗a ˗daa kë ˈˈtʋ̈ŋ ˗ya ˗gɔ. ꞊Ya ˈgo mü ˈzü, ˗yö ˗dho ˈˈkpɔnŋtaadhɛ kë ꞊bhɔɔ ˈˈsɛ ˈka ꞊dhɛ ˗kɔ ˈö˗ dua ˈdhö ˗mü kö ˗yö kë˗ ˈka ˗be bhë ˗a ˈdhö. Mɛn ˈˈpɛpɛ ˈö ꞊wa ga “ˈwo bun ˈgü [ˈö ˈwo ˗Zlan ˗zo piʋ̈ ]”, ˗wo ˗dho ˈgo ga ˈgü. (Zan 5:28, 29) ˈˈYua yö ˈti ˗dho mɛn gbɛ˗ kë ɛɛnˈˈ ga yö ˈti ˗dho bhɔ ˈzüdho toŋtoŋdhö. Yesu ˗dho ˈwɔn yaa ˈˈpɛpɛ ˈö Sɔtraan ˗yö ˗an ˗kë ˗an baaˈˈ. Zoova ˗dho bɔ Yesu ˗ta kö ˗yö “Sɔtraan [...] kë ˗yë ˗nu ˈgü see˗.” (1 Zan 3:8) ˗A kë ˗sü kö Zoova ˗yö ö zuʋ̈ˈˈ kë ˗saa ꞊köŋ kwa ˈˈpiʋ̈ bhë, kwa˗ nuɛˈˈ ˗bho ˗a ˗wɔn ˈgü, ˈyö ˗tɔ ˗ya ˈˈpiʋ̈ kö ˈkwa ö dɔ, kö ˈkwa kwa ˗kɔ ˈˈyɛ ˗a ˗bha ꞊dhɛ kwa ꞊kɔɔnmɛn ˈdhö. (2 Piɛdhö 3:9, 10 ˗wo pö.) ˈKö ˗kë ˗ʒiaanwo ꞊dhɛ kwa saanˈˈ ˗ni ˈgü, ˗yö kwa ˗takun kö ˈkwa ˗an ˈkun kwa ˗bha.—Zan 4:23; 1 Kodhɛngtö 10:13 ˗wo pö.

 ¹⁸ Zoova ˈyaa kwa ˈˈgbɩɩdhɛ bho kö ˈkwa kwa ˗kɔ ˈˈyɛ ö ˗bha ꞊dhɛ kwa ꞊Kɔɔnmɛn ˈdhö. ˗Yö ˗potaadhe ˗nu mɛnbhɩɩdhe ˗nu ˗dhɛ. Gbɔɔdhe ˈö bhë ˗a ˗gɛn ˈö ˈdhö kwa ˗bhaa ˈka, ˗kwaa ˗wɔn blɛɛˈˈ.

19. Gbɔɔdhe ˗së ˗mɛɛn ˈö Zoova ˗ya ˗kë kwa ˗gɔ? ˗Mën ˈö ˗kë ˈkwa ˗dho ˗a nuɛˈˈ bho ˗a ˗wɔn ˈgü?

¹⁹ Gbɔɔdhe ˗së ˈö Zoova ˗ya ˗kë kwa ˗gɔ ˈö ˗kë ˗potaadhe ˈka bhë, ˗ya ˗kë ˈö ˈkwa go wü ˗nu ˈˈpiʋ̈. ˗An këwɔn ˈkpiidhɛ ˗nu ˗sü ˗an ˗da ˗kɔ ˈö ˗Zlan ˗yö ˗an ˗da ˗a ˈka ˗a ˗bha. ˈˈKɛɛ kwa zë, kwa ꞊mɔɔn˗ ˗bha kö ˗kɔ ˈö ˈkwa˗ ˈˈpiʋ̈ ˈkwa kwa ˗bha ˗tosɛta kë˗ ˈka, ˈkwa˗ ˗ʒian ˈsü. Kwa ꞊mɔɔn˗ ˗bha ˈkwa˗ ˗zɔn ˈpö ꞊dhɛ kwa˗ ˈˈpiʋ̈ ˈkwa kë Zoova ˗dhɛ ˗së. (Proverbes 30:24) ꞊Ya ˈgo mü ˈzü, ˈkwaa ꞊dhɛ ꞊maŋzi ˗nu ˈö pë ˈwo ˗an ˗pëkë ˗a ˗wɔn ˈgü ˈö yö ˈnën ˈwo˗ ˗kë dosɛnŋ bhë ˗an ˈdhö. ˗Potaadhe ˗yö kwa ˗gɔ kö ˈpë ˈkwa ˗dho kë˗ ˈka waa ˈpë ˈkwa ˗dho ˗a kë kwa ˗bha ˗tosɛta ˈgü, kö ˈkwa˗ ˗ʒian ˈsü, ɛɛnˈˈ ˈzü kö mɛn ˗nu ˈwo ˗dho kë kwa ˈˈtɔŋdë ˈka, kö ˈkwa kwa ˗kɔ ˈˈyɛ ˗an ˗bha. Zoova ˗ya ˈˈpiʋ̈ kö ˈkwa ˗tosɛta din yö.

20, 21. ꞊Bɔadhe ˗së ˗mɛɛn ˈü ꞊mɔɔn˗ ˗bha ˈü˗ ˈsü ˈˈtʋ̈ŋ ˈö yö ˗a ˈgü?

²⁰ Zoova ˗ya ˈˈpiʋ̈ kö ö ˗dhɔ ˗yö kwa kë. (Matiö 22:37, 38) ˗Yö ꞊dhɛ ˈnën dë ˈö˗ ˗bha ˈnën ꞊yaa˗ pö ˗a ˗dhɛ “ü ˗bha ˈwɔn ˗dhɔ n ˗kë” ˈö˗ zuʋ̈ˈˈ ˈˈgblü ˗yö ˗dhi ˗a ˈdhö. Wo ˈti˗ ˈnën ˈˈflosɩ bho, kö ˗ya ˈsü ö ˗de ˈgü ˗ya pö ˗a ˗dhɛ ˈˈdhʋ̈, ˗yö ˗dhi ˗a ˗dhɛ. Zoova ˗yö ˗potaadhe ˗nu kwa ˗dhɛ kö ˗a ˗dhɔkë ˗sü ɛɛnˈˈ ˗a ˗yɛi ˗blü ˗sü bhë, ˈkwa kwa ˗bhaa ˈsü. Sɔtraan, Adan waa Ɛvö ˗nu ˗zë, ˗wo wo ˗kɔ ˗yɛ Zoova ˗yɛi ˗blü ˗sü ˗bha. ˗Potaadhe ˈö ˗Zlan ˗ya nu ü ˗dhɛ bhë, ˗mën ˈü ˗dho ˗a kë˗ ˈka?

²¹ ˗Bhö ü ˗bha ˗potaadhe ˈsü kö ˈü Zoova ˗dhɔkë ˗a ˈka. Mɛn ˈˈmliɲɔn ꞊va ˈˈwɛɛ ˗nu ˈö ꞊wa bɔ ˗Zlan ˈka kö ˈwo kë ˗a ˗dhɛ ˗së, ꞊wa Sɔtraan ˗yɛi ˗blü. (Proverbes 27:11) ˗Mën ˈü ˗dho ˗a kë ˈˈtʋ̈ŋ ˈö yö˗ ˈgü, kö ˈü kë ˈˈkpɔnŋtaadhɛ ˗dɛɛ ˈö ˗Zlan dho saanˈˈ ꞊gban ˈˈpɛpɛ bho mü bhë ˗a ˈgü? ˈWɔn ˗gɔ ˈö ˈkwa ˗dho yö˗ ˗bha bhë, ˗yö ˗dho dhɛɛˈˈ ˈö bhë ˗a ˗yɔ bɔ.