Mɛn ꞊gban ˈˈpɛpɛ kwa dua ˗mü kö ˈmɛn ˈkwa ˗dho ˗a ˗dhɔkë, ˈkwa kwa ˗kɔ ˈˈyɛ ˗a ˗bha. Kwa ꞊mɔɔn˗ ˗bha ˈö ˈkwa Zoova ˗dhɔkë ɛɛnˈˈ ˈzü ˈö ˈkwa Sɔtraan waa ö ˗bha ˗zuu yaa ˗nu ˗dhɔkë. ˈKwaa ꞊mɔɔn˗ ˗bha kö ˈkwa ˗an ꞊gban ꞊plɛ ˗dhɔkë wo ˈˈkwëë. ꞊Kpɔɔdhɛ ˗ʒian ˈnën ˗tɔ Zoova ˗dhɔkësü.

ˈWɔnyaa ˗kë mɛnbhɩɩdhe ˗nu ˈka ˗sü waa ˈˈkpënŋ˗ ˗kë ˗an ˗gɔ ˗sü ˗dhɔ ˗yö ˗zuu yaa ˗nu ˗kë ꞊dhɛ ˗kɔ ˈö ˈkwa˗ yö˗ ˈka bhë ˗a ˈdhö. ˈˈKɛɛ Zoova ˈyaa ꞊dhɛ ˗an ˈdhö. Mɛnbhɩɩdhe ˗nu ˗dhɔ ˗ya ˗kë ꞊dhɛ ˗kɔ do ˈö ˈnëndë ˗bha ˈnën ˗nu ˗dhɔ ˗ya kë˗ ˈka bhë ˗a ˈdhö. “Pë ˈˈpɛpɛ ˈö mɛ ˈˈbhɩɩ˗ ˗ya ꞊slɔɔ ꞊dhɛ gbaɔdhe ˈdhö bha, ˗a ˈbha ˈyii go ˗dhɛ ˈˈwɛɛ ˈbha ˈgü kö ˈyii kë [a] ˈˈpiʋ̈.” (Zakö 1:17) ˈKö ˗kë ꞊dhɛ ˗yö ˗dho pë ˈˈgbɩɩ˗ kë kö ˈö ˈwɔn ˗së kë mɛnbhɩɩdhe ˗nu ˗dhɛ, ˗Zlan ˈyaa ˗kɔ ˗a ˗kë ˗an ˗dhɛ ˗sü ˈka.—Efɛzö 2:4-7.

Pë ˗nu ˈö ˗Zlan Gbö Yesu ˗yö ˗an ˗kë kö ˗yö ꞊kun ˈˈkpɔnŋ ꞊taa, ˗bhö ü ˗zota ˗an ˈgü. ˗Ya ˗kë ˈö ˈˈbhʋbhʋ ˗nu ˗wo dhiaŋ zë, ˈö ˈˈɲɛɛntiimɛn ˗nu ˗wo ˗dhɛ yö. ˗Yö ꞊potaadhe nu ꞊niɔɔnmɛn waa ꞊weeyuamɛn ˗nu ˗dhɛ. ˗Yö ˗zuu yaa ˗nu ˗kë mɛn ˗nu ˈgü, ˈö ˈˈyua ꞊suu ˈˈpɛpɛ ˈˈdhɛkë. Yesu ˗yö mɛn ˗nu ˗bho ga ˈgü ˗ʒianwo ˗Zlan ˗bha ˈˈpiigbɩɩdhɛ ˈsaa˗ ˈgü.—Matiö 9:32-35; 15:30, 31; Dhukö 7:11-15.

˗Zlan ˈyaa ꞊sua kë kö ˗yö ˈˈkpënŋ˗ kë kwa ˗gɔ. ˗Yö gagade ˗pö kwa ˗dhɛ ˈˈtʋ̈ŋ ꞊gban ˈˈpɛpɛ ˈka. ˈYaa ˈˈkpënŋ˗ kë mɛn ˈbha ˗gɔ toŋtoŋdhö.—Nombres 23:19.

Mɛn ˈˈmliɲɔn ꞊va ˗wo ˗zoyödhe ꞊suasü ˗nu ˗bha ꞊dhuëŋ ˈka ꞊dhɛ ˗kɔ do ˈö ˈdɔɔn ˈˈdʋŋ ˗yo ˈˈwɔɔn kun ˗a ˈka bhë ˗a ˈdhö ˈpö. ˗Wo ˗suʋ̈ mɛn ˗nu ˈö ꞊wa ga ˗an ˗gɔ, ˈö ˈwo ˗suʋ̈ ˈpö ˗zuu yaa ˗nu ˗gɔ. ˗Wo ˗suʋ̈ dü, ꞊kliiga waa ꞊geebɔga ˗nu ˗gɔ. ˗Wo ˗zoyödhe waa wɔkɔ ˗nu ˈö ˗an ˗gɛn ˈdhö ˗gban ˗sü ˈka Sɔtraan, Dügɔmɛn ˗bha ꞊suawo ˗nu ˗ta bhë, ˗an ˗bha ꞊dhuëŋ ˈka. ˗Zlan ˗dhɔkëmɛn ˗nu ˗zë ˈwaa ˈwɔn ˗nu ˈwo bhë, ˗an ˗bha ꞊dhuëŋ ˈka.

Zoova ˈˈpii ˗yö ˈˈgbɩɩ˗ ˈö ˗ʒiö Sɔtraan ˗ta. ꞊Ya kë ꞊dhɛ ˈbha Zoova ˗dhɔkë, ˗yö ˗dho ö ˗kɔ kpa ü ˗ta ˗zuu yaa ˗nu ˗gɔ. (Zakö 4:7) Dü ˗kɔ yö ˈti ˗dho ˗mɔɔn ü ˗bha. ˗A ˈwɔnzuan ˈnën ˗tɔ Nigéria ˈˈsɛ ˈgü, ˗yö ˗kun dümɛn ˈˈgbɩɩ˗ ˗yaaga ˈˈpiʋ̈ ꞊dhɛ ˈwo Zoova ˗bha ꞊Gbɛkiö do ˈö ˈyaa kun ˈˈwɩ ˗ni ˈgü˗ ˗bha kö ˗yö ˈgo ˈˈsɛ bhë˗ ˈgü, ˈwo˗ zë dü ˈgü. ˈDhɛ ˈö ˈwo˗ yö ꞊dhɛ ˗an ˗kɔ yö ˈti ꞊mɔɔn˗ ˗bha kö ˈwo˗ zë dü ˈgü bhë, ˈyö ˈˈsuʋ̈ ˗yö ˗da ˗a mɛn do ˈgü. ˈYö dho ˈyö ꞊bhɛɛ ˗a ˗dhɛ kö ˗yö ö ˗bhawɔn ˈto.

꞊Ya kë ꞊dhɛ ˗zuu yaa ˗nu ˗wo ü ꞊sëë bho ˗ni ˈgü, ˗bhö Zoova ˗dhɛ ˗a ˈtɔ ˈka, ˗yö ˗dho ö ˗kɔ kpa u ˗ta. (Proverbes 18:10) ˈˈKɛɛ ˈbha˗ pö Zoova ˗yö ö ˗kɔ ˈkpa ü ˗ta, ü dua ˗mü kö ˈü ˈˈkan pë ˈˈpɛpɛ ˗nu ˈwo ˗gban dü waa ˗zuu yaa ˗nu ˗dhɔkësü ˗nu ˗bha ˗an ˗bha. Pë ˈö ˗Zlan ˗dhɔkëmɛn ˗nu ˈwo kun Efɛzö ˈˈsɛ ˈgü ꞊kwɛŋzü ˈwo˗ ˗kë ˈyö bhë. ˗Wo wo ˗bha ˈˈzʋʋdhɛ ˗kë ˗a ˈka ˈsëëdhɛ ˗be ꞊gban ˈˈpɛpɛ ˗kpaa ˈkwëë˗, ˈö ˈwo ˗an ˗gʋ̈. (Këwɔn ˗nu 19:19, 20) ˗Zlan ˗dhɔkëmɛn ˗nu ˈwo ꞊dɛɛ, ˗an dua ˗mü kö ˗wa kë ˈˈdhʋ̈ ˈpö. ˗Bhö ˈˈkan ꞊kliiga ˗nu, ꞊geebɔga ˗nu waa pë suu ˈˈoo ˗suu ˈö ˗gban dü ˗kë ˗a ˈka ꞊kwɛɛ˗ ˗nu ˗bha, ˗an ˗bha.

꞊Ya kë ꞊dhɛ ˈü˗ ˈˈpiʋ̈ kö ˈü kë ˗Zlan ˗dhɛ ˗së, ˗kan ˗zlanwo yaa waa ˈwɔnyaa kë ˗sü ˗bha ˗sü, ˈwaa ˈnën ˈwo ˗tɔ ˗a ˈˈslö ˗dosɛnŋ. Ü dua ˗mü kö ˈü ˗da ˗zlanwo ˈˈslʋ̈ʋ̈slʋ̈ ˈgü, kö ˈü ü ˗de nu ˗a ˗dhɛ ü ꞊faan ꞊gban ˈˈpɛpɛ ˈka. Pë ˈü ˗dho ˗a kë, Biblö ˗ya ˗zɔn ü ˗dhɛ.

Sɔtraan waa ö ˗bha ˗zuu yaa ˗nu ˗bha mɛn ˗nu ˗dhö ˈˈkpɔnŋ ꞊taa yö, ˈö ˈwo ˈwɔnyaa ˗kë, ˈö ˈwo mɛn ˗nu ꞊draan ˈpö ˗a kë ˗sü ˗bha. ˈˈKɛɛ Zoova ˗de ˈpö ˗a ˗dhɔkëmɛn ˗nu ˗dhö. Wo ˈnën ˈwo ˗tɔ Zoova ˗bha ꞊Gbɛkiö ˗nu. (Isaïe 43:10) ˗Wo ˗mɔɔn mɛn ˈˈmliɲɔn ˈˈsaaga ˗bha ˈˈkpɔnŋtaadhɛ ˗todhʋ̈sü ˈgü. ˗An ꞊gban ˈˈpɛpɛ ˗wo wo ˈgü ˗dɔ ˈˈgbɩɩ˗ kö ˈwo ˈwɔn ˗së kë, kö ˈwo mɛn ˗nu ꞊klaŋ kë gagade ˈka. ˈˈSɛ ꞊vadhɛ ˈgü, ü ꞊mɔɔn˗ ˗bha ˈü ˗kpan ˗an ˗bha ˗an ˗bha ˗bhɔkwëëkëgükɔ ˗nu ˈgü. ˈBha ˗wo mü, ˗wo ˗dho wo ˗kɔ ˗ya ü ˗gɔ ˈˈwowosü ˈka ꞊dedewo.

˗An ˗bha yö ˈnën ˗tɔ mɛn ˈˈwɛɛ ˗nu ˗takun ˗sü kö ˗wo ˗Zlan ˗dhɔkë. Kaa˗ ˗nu ka ˗dho Biblö draanˈˈ ü ˗gɔ ˈkɔɔ, ˈö ˈwo ü ˗takun ˗Zlan ˗dhɔkë ˗kɔ ˗së ꞊dede ˗bha. Ü ˈti ˗dho ˗an ꞊saa bho ü draansü ˗bha. Gagade ˗zɔn mɛn ˗nu ˗dhɛ ˗sü ˗yö Zoova ˗bha ꞊Gbɛkiö ˗nu ˗dhɛ ˗së, ˈyö ˗tɔ ꞊dhɛ ˗an këyɔɔ ˗nu ˗dhɔ ˗yö ˗an ˗kë, ˈö Zoova ˗Zlan ˗dhɔ ˗an ˗kë ˈpö.