˗Gban ˗Zlan ˗gɔ ˗sü ˈö dhaŋ˗ ˈgü
ˈDhɛ ˈö Sɔtraan ˗yö bɔ ꞊mlɛɛn ˗ta ˈö ˈwɔn ꞊blɛɛ Ɛvö ˗dhɛ, ˈyö Ɛvö ˗yö kpa ˗a ˗bha ˗gban ˗Zlan ˗gɔ ˗sü ˈgü.
˗Zuu ˈˈpɛpɛ ˈö Zoova ˗yö ˗an ˗da, ˗an ꞊gban ˗kun ˗tiaandhö. ˈˈKɛɛ ˗a do ˗yö ˗da ˈwɔnyaa kë ˗ʒian ˗ta. ˗A do ˈö ˈˈdhʋ̈ ˈyö ˈtɔ˗ Sɔtraan Dügɔmɛn. ˗Yö ˗kun Sɔtraan ˈˈpiʋ̈ ꞊dhɛ mɛn ˈˈpɛpɛ ˈwo ˈˈkpɔnŋ ꞊taa ˗wo Zoova ˈto kö ˗wo ö ˗dhɔkë. ˗Kɔ ˈö ˗kë ˗a ˈka ˈyö ꞊nɛn:
ˈˈDhü ꞊va ˈö ˗an bhɛ din kun ˗së, ˗wo ˗kun Edɛnö ˈˈdhüdhɛɛdhö. Zoova ˗ya ˗pö Adan waa ö ˗bha dhebɔ ˗an ˗dhɛ ꞊dhɛ ˗wo ꞊mɔɔn˗ ˗bha ˈwo ˗an bhɛ ˗nu ˗bhö wo ˈflëëgü. ˈˈKɛɛ ˗a do ˈbha ˗kun mü, ˈö˗ pö ˗an ˗dhɛ ˗an dua ˈyaa ˗mü kö ˗wo ˗a bhɛ ˗bhö. ˈYö˗ pö ˗an ˗dhɛ kö ˗wa bhɛ ˗bhö, ˗wo ˗dho ga gboŋgboŋdhö.—ˈWunzüdɔdhɛ 2:9, 16, 17.
˗Dhɛkpaɔyi do ˈka kö Ɛvö ˗ya ˈto ö do ˈka, ˈyö ꞊mlɛɛn ˗yö ˈwɔn ꞊blɛɛ ˗a ˗dhɛ. ˈˈKɛɛ ꞊mlɛɛn ꞊dede ˈyaa ˈnën ˈwɔn ꞊blɛɛ ˗a ˗dhɛ, Sɔtraan Dügɔmɛn ˈnën ˈˈkpënŋ˗ bhë˗ ˗kë kö ˗yö kë ˗a ˈgü ꞊dhɛ ꞊mlɛɛn ˈnën ˈwɔn ꞊blɛɛ. Sɔtraan ˗ya ˗pö Ɛvö ˗dhɛ kö ˗yö ˈˈdhü bhɛ ˈö bhë ˗ya ˗bhö, ˗yö ˗dho kë ꞊kpɔɔsü ꞊dhɛ ˗Zlan ˈdhö. ˈYö˗ pö ˗a ˗dhɛ ˈzü yö ˈti ˗dho ga. ˈWɔn ꞊plɛ ˈö˗ ꞊blɛɛ bhë, ˗an ꞊gban ˗kun ꞊sua ˈka. ˈˈKɛɛ ˈkö ˗kë ˈˈdhʋ̈, Ɛvö ˗yö dhaŋ˗ ˗bho Sɔtraan ˗wo ˈˈdhiʋ̈ ˈö ˈˈdhü bhɛ ˈö bhë ˈö˗ ˗bhö. ˈDhɛ ꞊taabha ˈyö˗ ˈbha ˗nu Adan ˗dhɛ ˈyö˗ ˗bhö ˈpö.—ˈWunzüdɔdhɛ 3:1-6.
ˈWɔn ꞊dede ˈö ˗kë, ˗a ˗kwɛzlan ˈö yö ˗ya ˗zɔn kwa ˗dhɛ ꞊dhɛ Sɔtraan ˈnën ˗tɔ ˗gban ˗Zlan ˗gɔ ˗mɛn ꞊sua ˗sü. ˗Ya ˗pö Ɛvö ˗dhɛ ꞊dhɛ kö ˗yö ˗gban ˗Zlan ˗gɔ, yö ˈti ˗dho ga. ˈˈKɛɛ ꞊sua ˗mü. Ɛvö ˗yö ˗ga ˈö Adan ˗de ˈpö ˈö ga. Sɔtraan ˗zë yö ˈti ga, ˈˈkɛɛ ˗yö ˗dho ˗a wo, ˈyö ˗tɔ ꞊dhɛ ˗yö ˈˈdhaŋ ˗lö ˗Zlan ˗bha. ˈˈTʋ̈ŋ ˈö yö ˗a ˈgü ꞊köŋ, ˗yö ꞊kun ˈˈbhɩɩ˗, ˈö ꞊kun ˈˈkpënŋ˗ kë ˗ni ˈgü mɛnbhɩɩdhe ˗nu ˗gɔ. ˗Yö ꞊kun ꞊sua kë ˗ni ˈgü ˗kplawo, ˈö ˈˈslö ꞊mɛɛn ˗a ˗bha kö mɛn ˗nu ˗wo ˗Zlan ˗bha ˈtɔŋ˗ ˗nu ꞊lögü.—Zan 8:44.
ˈˈKiö ˈˈwɛɛ ˈbhaa ˗nu ˗gban ˗Zlan ˗gɔ
ˈDhɛ ꞊taabha, ˗Zlan ˗bha ˈˈkiö ˈˈwɛɛ ˈbhaa ˗nu ˗da ˈwɔnyaa kë ˗ʒian ˗ta. ˗A ˈˈkiö ˗nu ˈwo bhë, ˗wo dhebɔ ˗sɛŋbɔ ˗nu ˈsuaanbho ˈˈsɛ ˗ta, ˈyö ˗kë ˗an ˗dhɛ ˗së kö ˈwo ˗an kë ˗wo ˗bha dhebɔ ˈka. ˈDhɛ ˗kë ˈˈdhʋ̈ ˈyö ˈwo nu ˈˈkpɔnŋ ꞊taa, ˈyö ˈwo ˗kan mɛnbhɩɩdhe ˗nu ˈgü, ˈyö ˈwo dhe ˗sü. ˈˈKɛɛ ˗Zlan ˗zokunwɔn ˈyaa kë ˈˈdhʋ̈.—ˈWunzüdɔdhɛ 6:1, 2; Zudö 6.
ˈˈKiö yaa ˗nu ˗nu ˈˈkpɔnŋ ꞊taa ˈö ˈwo ˈˈɲangüyaadhɛ ˗kë dhebɔ ˗nu ˈka.
Pë ˈwo˗ ˗kë bhë ˗yö ˗nu ˈwɔnyaa ꞊va ˈka mɛnbhɩɩdhe ˗nu ˗ta. ˈYö ˈˈkiö ˗nu bhë ˗an ˗bha dhebɔ ˗nu bhë ˈwo ˈnën ˗nu kpɔ, ˈˈkɛɛ ˈnën ꞊dede ˗nu ˈwaa ˗mü. ˈDhɛ ˈwo ˗gla ˈyö ˈwo ˗kë mɛn ꞊gblɛnŋgblɛnŋ ˈˈkɛkɛsü waa pëyaakëmɛn ˗nu ˈka. ˈDhɛ ˈö ˗kë ˈˈdhʋ̈, ˈyö ˈˈkpɔnŋtaadhɛ ˗yö pa pë ˈˈdhiʋ̈˗ ˗kë ˈˈkwöö ˗sü ˈka. ˗A ˗wɔn ˈgü ˈyö Zoova ˗yö ˈˈdhiʋ̈ ꞊luu˗ ˗bha kö ˈö ˈˈyi ˈˈkpii˗ pa kö ˈwɔnyaakëmɛn ˗nu ˈgüshiʋ̈ˈˈ. Mɛn ˗nu dosɛnŋ ˈwo dha ˈˈyi pa ˗sü ˈkpii˗ ˗bhë ˗a ˗gɔ ˈyö ˈwo ˗tɔ mɛn kpɛnŋdhö Noe waa˗ ˗bha ˈkɔɔmɛn ˗nu.—ˈWunzüdɔdhɛ 6:4, 11; 7:23.
ˈˈKiö yaa ˗nu wo bhë wo ˈti ga, ˗wo yɛɛ ˗kë ˈwo dho dhaŋ˗ ˈgü. ˈˈKɛɛ ˈdhɛ ˈwo wo mü ˈyö ˗Zlan ˗yö ˈwɔn bho ˗an ˈgü. ˗Zlan yö ˈti ˈˈwɩ˗ ˗bha ˈzüdɔ kö ˗wo ˗da ö ˗bha ˈkɔdhi ˈö˗ bha ˈˈkiö kpɛnŋdhö ˈdhö˗ ˈgü bhë ˗a ˈgü. ˈDhɛ ˈö go mü, Zoova yö ˈti ö ꞊kwaa ˗an ˗zü ˈzüdɔ kö ˗wo ˈˈkan mɛnbhɩɩdhe ˗nu ˈgü. ꞊Ya ˈgo mü ˈzü, ˗an ˈˈdhiʋ̈ ˗dho ˈto ˈgüshiʋ̈ˈˈ ˗sü ˗ta za ˈˈkan ˗yi ˈkpii˗ ˈka.—2 Piɛdhö 2:4; Zudö 6.
꞊Wa Sɔtraan ˗kë dhaŋ˗ ˈgü
˗Wo Sɔtraan waa ö ˗bha ˈˈkiö yaa ˗nu kë dhaŋ˗ ˈgü.
˗Kwɛ 1914 ˈgü, ˗gblü ˗yö ˗da dhaŋ˗ ˈgü. Pë ˈö ˗kë ˈmü, Biblö ˈgü ˈsëëdhɛ ˗be ˈwo˗ ˗dhɛ ˗Dhɛkpaɔ dhiaˈˈ ˈsëëdhɛ bhë ˗ya ˗wɔn ˗blɛɛ ˈö˗ pö: “꞊Dhɛ ˈö ꞊ya kë ˈˈdhʋ̈, ˈyö ˗gblü ˗yö ˗da dhang˗ ˈgü. ˈYö ˗Zlan ˗bha ˈˈkië ˈkpiisü ˈwo˗ Misɛdhö [Yesu kö ꞊ya ˈgo ga ˈgü] ˗kë bha waa˗ ˗bha ˗mɛ ˗nu [ˈˈkiö ˗së ˗nu] ˈwo ˗ya ˈko zë ˗sü ˗bha ˈˈyina bha˗ ˈka ˈyö wɛng˗ ˗nu ˈwo ꞊gɔɔn waa˗ ˗bha ˈˈkië [yaa] ˗nu ˈdhö ˈpö. ˈˈKɛɛ ˈyö Misɛdhö waa˗ ˗bha ˗mɛ ˗nu ˗an ˗nu ˗kɔ ˗yö ˗ziö ˈˈyina ˗bha waa˗ ˗bha ˗mɛ ˗nu ˗gɔ, ˈyö ˈwo˗ ˗nu ˗kë dhang˗ ˈgü ˈwo˗ ˗nu bɔ ˈˈkpʋng ꞊taa. ˈYö ˗zuzugwɛ ˈwo yö ꞊në˗ ˗dhɛ ꞊mlɛɛ ˈö gun yi ˈbha ˈka, ˈwo˗ ˗dhɛ ˈzü ˈˈyina yaa, ˈˈɛɛn Sɔtraan, ˈö ˈˈkpënng˗ ˗kë ˈˈkpʋngtaadhɛ ˗todhʋ̈sü ˗gɔ bha ˈwo waa˗ ˗bha ˗mɛ [ˈˈkiö yaa] ˗nu ˗a ˗nu ˗zuö ˈˈkpʋng ꞊taa.”
˗A ˗gblü ˈö bhë ˗mën ˈö go ˗a ˈgü? ˗A ꞊kwɛzlan ˗ya ˗pö ˈzü ꞊dhɛ: “˗A ˗kë ˈˈdhʋ̈ ˗sü bha˗ ˈgü, dhang˗ waa˗ ˈgü ˗mɛ ˗nu ꞊gban ˈˈpɛpɛ ˗ka ka ˈˈdhia bho.” ˗Zlan ˗bha ˈˈkiö ˗së ˗nu dua ˗mü kö ˗an zuʋ̈ˈˈ ˈˈgblü ˗yö dhi ˈyö ˗tɔ ꞊dhɛ Sɔtraan waa˗ ˗bha ˈˈkiö yaa ˗nu ˈwaa dhaŋ˗ ˈgü ˈzüdɔ. ˈˈKɛɛ ˈˈkpɔnŋtaamɛn ˗nu ˗zë ꞊wɛ? Biblö ˗ya ˗pö: “ˈˈKɛɛ ˈkpʋngtaadhɛ waa˗ ꞊weeyi ˗nu ꞊në ka ˗bha ꞊ya kë ˗wëësü. ˗A ˗gɛn ˗mü ꞊dhɛ Sɔtraan ꞊në bhlɔɔ ꞊yaa˗ pa ˈö nu sië˗ ˈka ka ˗ta bha, ˗a ˈwɔn ꞊ya kë˗ ˈˈyaan ꞊dhɛ ˈˈtʋ̈ng ˈwo˗ ˗ya ˗gɔ ˈyaa ˈgbɛ ˈzü.”—˗Dhɛkpaɔ dhiaˈˈ ˈsëëdhɛ 12:7-9, 12.
Sɔtraan waa ö ˈˈtayɔɔ yaa ˗nu ˈwo bhë, ˗wo ꞊kun ˈˈkpënŋ˗ kë ˗nu ˈgü ˈˈkpɔnŋtaamɛn ˗nu ˗gɔ, ˈö ˈwo ˗wëëwɔn ˈkpii˗ kë ˗ni ˈgü ˗an ˈka ꞊dedewo. ˗A ˈˈkiö yaa ˗nu ˈwo bhë, ˗wo ˗an ˗dhɛ ˗zuu yaa ˗nu. ˗Zlan ˈyɔɔ˗ ˗nu ˗mü ˗an ˈka. ˗An ꞊gban këwɔn ˗yö ˈyaa˗.
