Dauda ˈö go Sierra Leone ˗ya ˗pö: “A ˗gla ˈpödhɛ ˈnën ˈdɛdɛ do ˈö ˈˈdhuŋ ˗ʒian ˈka ˗a ˈgü. ˗Dhɛkpaɔyi do ˈka kö ˗a ꞊kun ˈˈtɩtɩ, ˈyö ˈˈblü ˗wɔn ˗yö ˗da n ˗bha ˈkɔdhigümɛn waa ˈkɔdhi ˈˈwɛɛ do ˈgümɛn ˗nu ꞊zinŋgü. ˗A ˈkɔdhi ꞊plɛ ˈö ˈwo bhë ˗an ˈgümɛn ˗nu ˗wa ˗pö wo ˗bha ˈˈblü ˗mü. ˈYö ˈwo ˈˈzʋʋmi do ˗dhɛ kö ˈwɔn bhë ˗wa bho ˗an ꞊zinŋ. ˈYö ˈˈzʋʋmi ˗yö ˗dhuadhɛ nu gɔndë do ˈbha ˗dhɛ, ˈyö sɔ ˈˈpuu kpa˗ ˗gɔ ˗ta. ˈDhɛ ˈˈtʋ̈ŋ pë ˈˈtɩtɩ ˗ʒiö ˈyö ˗ya ꞊zii ˗sü ˗bha, ˈyö ˈfɔɔyi ˗yö bhɔ ˗a ˗bha. ˈYö ˗dhɛ ˗ga ˗dhuadhɛ ˈgü ˈyö˗ pö: ‘A ˗kpan gɔndë zii do ˗bha, ˗yö nu ˗ni ˈgü! Sɔ ˈˈpuu ˈnën˗ ˗bha. ˗Yö ꞊gblɛɛn, ˈö zii, ˈˈwlan ˗ya ꞊troo. ˗Yö ˗klɔŋ ˈö ˈˈdhiʋ̈ ˈyö ˈˈta sü.’”

“N ˈʒiö˗ ˈnën kun ˈˈwɩ ˗ni ˈgü ˗a ˈka bhë! ˈYö gɔndë ˈö sɔ ˈˈpuu kun ˗a ˗gɔ ˗bha bhë ˈyö ˗ya ö ˗de ˗maanmaanˈˈ ˗sü ˗bha, ˈyö ˗gbla ˈö˗ pö: ‘꞊Ya kë ꞊dhɛ ˈka˗ pö ꞊sua ˈnën ˈa˗ ˗kë, ˗ka nu kö ka ꞊dede ˈka ˗dhɛ ˗ga.’” ˈˈKɛɛ ꞊faan yö ˈti kë mɛn ˈbha ˗gɔ kö ˗yö ˈdho˗ ˗dhɛ ˗ga. ˈYö ˈˈzʋʋmi ˈö bhë ˈyö blɛɛdhɛ yi ˈö kun ˗a ˗gɔ ˗kɔɔgbaŋ do ˈbha ˈgü ˗a ꞊wɛnŋ ˈgɔndë ˈö bhë ˗a ˗bha kö ˗yö ö ˗de ꞊slɔɔ.

“ˈYö n ‘ˈʒiö˗’ ˈö ˗wo ˗dhuadhɛ ˈgü bhë ˈyö˗ pö ˈˈblü ˈö bhë n ˗bha ˈkɔdhigümɛn ˗nu ˗bhaa ˗mü. ˈYö˗ pö n ˈˈnan ˗dhɛ ꞊dhɛ ˗yö yökë ˈˈblü ˈö bhë ˗a ˈgü ö ˈflëëgü. ˈYö ˈkɔdhi do ˈö to ˗a ˈgümɛn ˗nu ˗wo ˗we ˈwɔn ˈö bhë ˗a ˗bha. ˈDhɛ ˈö ˗kë ˈˈdhʋ̈ ˈyö ˈwɔn ˈö bhë ˈö go ˗an ꞊zinŋ.”

 ˈWɔn ˗nu ˈwo ˈˈdhʋ̈ ˗wo ˗kë ꞊shiö ꞊shiö kwa ˗bha ˈˈsɛ waa ˈˈsɛ ꞊vadhɛ ˈwo ˈˈkpɔnŋ ꞊taa ˗an ˈgü. ˈˈKpɔnŋtaadhɛ ˗todhʋ̈sü ˈgü, mɛn ˈˈmliɲɔn ꞊vadhɛ ˗wo wo ˗zota ꞊dhɛ mɛn ˗nu ˈö ꞊wa ga ꞊wa kë ˗zuu ˈka, ˗wa ˈdho ˗dhɛ ˈbha ˈgü. ˈYö ˈwo˗ pö ˗an ˈˈɲan ˗yö ˈˈkpɔnŋtaamɛn ˗nu ˗bha, ˈö ˈwo ˗an ˗blü ˈwɔn ˗nu kë ˗sü ˗bha. Gagade ˗mü ˗ee? Mɛn ˗nu ˈö ꞊wa ga, ˗wo mü ꞊dedewo ˗ee? ˈYö ꞊ya kë ꞊dhɛ ˈwaa mü, kö de ˗nu ˈwo wo ˗de ˗kë mɛn ˗nu ˈö ꞊wa ga ˗an ˗zuu ˈka ˈsa? Dhɛɛˈˈ ˗nu ˈwo bhë ˗an ˗yɔ ꞊dede ˗nu dɔ ˗sü ˗wɔn ˗yö ˈˈgbɩɩ˗, ˈyö ˈtɔ˗ ꞊dhɛ Kwa ˗bha dha ˗sü ɛɛnˈˈ kwa ˗bha ga sü ˗yö ˗sü ˗an ˗bha.