ˈˈKɛɛ ˗mën ˈö ˗kë ˈö Sɔtraan waa ö ˗bha ˗zuu yaa ˗nu ˈwo wo ˈgü dɔ ˈˈgbɩɩ˗ ˈˈkpënŋ˗ ˗kë mɛn ˗nu ˗gɔ ˗sü ˗bha? ˗A ˗gɛn ˈtɔ˗ ꞊dhɛ ˗wa ˈˈpiʋ̈ kö ˈkwa kpa wo ˗bha ˗gban ˗Zlan ˗gɔ ˗sü ˈgü. ˗Wa ˈˈpiʋ̈ kö ˈkwa ˗an ˗dhɔkë. ˗Wa ˈˈpiʋ̈ ˈzü kö ˈkwa ˗an ˗bha ꞊sua ˗nu ˈsü gagade ˈka, kö pë ˗nu ˈwo Zoova ˗dhɛ ˈyaa˗ ˈkwa ˗an kë. ˗A pë ˗nu ˈwo Zoova ˗dhɛ ˈyaa˗ bhë, ˗an ꞊vadhɛ ˗gban ga ˗bha.

ˈMɛn ˈö˗ ˗dhɔ mɛn ˗kë ˗a ˗bha ga ˗sü ˗yö ˈˈdhiʋ̈˗. ˗Wëë ˗bha ˗bɔ kwa ˗ta ˗sü kö ˈkwa ˈˈgbʋ bɔ bhë, ˈyaa ˈwɔnyaa ˈka. ˈDhɛ Yesu ˈˈtɔŋdë Dhazaa ˗yö ga, Yesu “˗yö ˗da ˈˈgbʋ ˈgü ˈpö.”—Zan 11:35.

ˈˈSɛ ˗bha wɔkɔ ˗nu ˈwo ˗gban ga ˗bha ˗wo ꞊va, ˈˈsɛ ˈdhɛ ˈdhö waa ö ˗bha kë ˗kɔ ˗mü. ˗An ꞊vadhɛ ˗nu ˈwaa Biblö ˗bha ˈtɔŋ˗ ˗gɛngbandhɛ ˗nu ˗dhɛ ˈyaa˗. ˈˈKɛɛ ˗an ˈbhaa ˗nu ˗zë, ˗wo ˗gban ˗zotadhe ˈö ˗kë ꞊dhɛ, mɛn ˗nu ˈö ˗wa ga ˗wo mü, ˈö ˗an ˈˈɲan ˈdhö mɛn ˗nu ˈwo ˈbhɩɩ˗ ˗an ˗bha bhë ˗a ˗ta. ˗Wɔɲaankësü ˗nu, mɛn ˈö ga ˗a ˗ya wo ˗sü ˈö ꞊gbɔɔnsü ˗nu, waa ga ˈˈsaa˗ ˈˈgblʋ̈gblʋ̈ kë ˗sü ˗nu ˗gɛn ˗yö ˗gban ˗duëë mɛn ˗nu ˈwo ga ˗kë ˗an ˗zuu ˗dhɛ ˈyaa˗ ˗sü ˗ta. ˈˈKɛɛ ˈdhɛ ˈö ˗kë ꞊dhɛ mɛn ˗nu ˈö ꞊wa ga “ˈwaa ˈwɔn ˈbha ˈwɔn dɔ” bhë, pë ˗nu ˈwo bhë ˗an kë ˗sü ˈnën ˗tɔ Sɔtraan ˗bha ꞊sua ˗pɛn ˗sü.—Ecclésiaste 9:5.

 ˗A ˈˈsɛ ˗bha wɔkɔ bhaa ˗nu ɛɛnˈˈ ˗a ˈˈsaa˗ ˈbhaa ˗nu ˗gɛn ˗yö ˗go ˗zoyödhe ˈö ˗kë ꞊dhɛ mɛn ˗nu ˈö ꞊wa ga ˗an ˗bhawɔn ˗yö mɛn ˗nu ˈwo ˈˈbhɩɩ˗ ˗an ˗bha ˗takundhe ˗bha bhë ˗a ˈgü. ˈYö ˈwo˗ pö ˈzü ꞊dhɛ wo ˈti ꞊bhlëë ˗ya ˈmɛn ꞊wa ga ˗an ˗bha, ˗wo ˗dho pë ˈˈdhiʋ̈˗ kë ˗an ˈka. ˈˈSɛ ˈbhaa ˗nu ˈgü, mɛn ˗ya ga ˗a ˗dhɛkpaɔyi ꞊ya kë 40 ɛɛnˈˈ ˗kwɛ do, ˈyö ˈwo˗ ˈˈsaa˗ kë. ˗An ˗bhaa ˈgü ˗a ˈˈsaa˗ ˗nu ˈwo bhë ˗yö ˗dho ˈmɛn ga ˗a ˗takun kö ˗yö “ʒiaan ꞊slɔɔ” kö ˗yö ˈdho ˗Zlan ˈˈpiʋ̈. Pë ˈö mɛn ꞊vadhɛ këwɔn ˈka ˗a do ˈnën ˗tɔ ˗bhöpë waa we ˗nu mɛn ˗nu ˈö ꞊wa ga ˗an ˗dhɛ ˗sü.

Pë ˗nu ˈwo bhë ˗an kë ˗sü ˗yö ˈyaa˗, ˈyö ˈtɔ˗ ꞊dhɛ ˗wo Sɔtraan ˗bha ꞊sua ˈö ˗gban mɛn ˗nu ˈö ꞊wa ga ˗an ˗bha ˗a ˗pɛn. ˗Yö ˗dho kë Zoova ˗dhɛ ˗së kö kwa ˗kɔ ˗yö kë wɔkɔ ˗nu ˈwo ˗gban ˗zuu yaa ˗nu ˗bha ꞊sua ˗ta bhë ˗an ˈgü ˗ee? ˗Abin toŋtoŋdhö!—2 Kodhɛngtö 6:14-18.

˗Zlan ꞊dede ˗dhɔkëmɛn ˗nu ˈwaa wo ˗kɔ ˗da ˈˈsɛ ˗bha wɔkɔ ˗nu ˈwo ˗gban Sɔtraan ˗bha ꞊sua ˗nu ˗ta bhë ˗an ˈgü. ˈˈKɛɛ ˈkö ˗kë ˈˈdhʋ̈, ˗wo wo ꞊faan ˗dɔ mɛn ˗nu ˈö ga bhɔ ˗an ˗bha ˗an ˗takun ˗sü waa ˗an ˗zogban ˗sü ˗bha. ˗Wa ˈwɔn ˗dɔ ꞊dhɛ mɛn ꞊ya ga, Zoova yö dosɛnŋ ˈnën ꞊mɔɔn ˗a ˗takun ˗sü ˗bha.—Job 14:14, 15.

Mɛn ˈbhaa ˗nu waa ˗zuu yaa ˗nu ˗wo ˗da ˗mlɛɛn ˈgü vɛɛdhö, ɛɛnˈˈ ˈzü ˗wo ˗bɔ ꞊dɛ ɛɛnˈˈ ˈˈzʋʋmi ˈbha ˗ta ˈyö ˈwo ˗da ˗a ˗mlɛɛn ˈö ˈdhʋ̈ ˗a ˈgü. ˗A ˗kë ˈˈdhʋ̈ ˗sü ˈnën ˈwo˗ ˗dhɛ dü kë ˗sü. ˗A dü ꞊suu ˈbhaa ˗nu ˈtɔ˗ voduu, ˈgbɔɔdü, ˗detakundü, ꞊dɛbɔsü, waa ˈwɔn ˗blɛɛ ˈmɛn ꞊ya ga ˗a ˗dhɛ ˗sü ˗nu.

Pë ˗nu ˈwo bhë Biblö ˗ya ˗pö ˗wo ˈyaa˗ ˈö˗ pö: “ˈˈSlökëmɛn, ꞊dɛbɔmɛn, dümɛn, ɛɛnˈˈ ˈmɛn ˈö mɛn ˈˈwɛɛ ˗nu ˗zuö dü ˈgü, ɛɛnˈˈ mɛn ˈö dho ꞊dɛ ˈˈpiʋ̈, ɛɛnˈˈ ˈmɛn ˈwɔn ꞊blɛɛ ˈmɛn ꞊wa ga ˗an ˗dhɛ, ˗an ˈbha ˗bha ˈbha [...] ya ˈdho˗ kë ka kpö ˈgü. Mɛn ˈˈoo ˗mɛn ˈö pë ˗nu ˈwo ˈˈdhʋ̈ ˈö ˗an ˗kë, ˗yö Zoova ˗dhɛ ˗ɲënŋsü.”—Deutéronome 18:10-12.

˗Mën ˈö ˗kë ˈö Zoova ˗yö kwa ˗zo ꞊kpɔɔ ꞊faan ˈka ꞊dhɛ wɔkɔ ˗nu ˈwo ˈˈdhʋ̈ ˗wo ˈyaa˗?

 Zoova ˗yö kwa ˗zo ˗kpɔɔ dü ꞊suu ˈˈpɛpɛ kë ˗sü ˗gɔ kwa ˗de ˗bha ˈwɔn ˗së ˗wɔn ˈgü. Mɛnbhɩɩdhe ˗nu ˗dhɔ ˗ya ˗kë, ˈö ö ˗zota ˗an ˗wɔn ˈgü, ˈö˗ ˈwɔn dɔ ꞊dhɛ mɛn ˗nu ˈö waa ˗zuu yaa ˗nu ˈwo ˗da ˗mlɛɛn ˈgü ˗an ˈˈklʋʋ ˗yö ˗bhɔ.

Mɛn ˗nu ˈwo ˈˈdhʋ̈ ˗wa mɛn do ˗dhɛ Nilda, ˈö kun ꞊dɛdhe ˈka Brézil. ˗Zuu yaa ˗nu ˗wa ˗bha ˗tosɛta ˗kë ˗wëësü. Yö ꞊dede ˗ya ˗gɛn ˗dɔ ˈö˗ pö: “˗Zuu yaa ˗nu [...] ˗kun n ˈˈpiʋ̈, ˈö ˈwo wo ˗bha ˈtɔŋ˗ ˗nu dɔ n ˗ta. ꞊Ya kë ꞊shiö ꞊shiö a ˗kë n ˗de ˈˈpiʋ̈ ˗së ˈka ɛɛnˈˈ ˈa ꞊fëë. ˈYö ˈwo dho n ˈka slaamɛn ˗nu ˗gɔ ˗dhɔtrɔɔ ꞊plöö. ˗Zuu yaa ˗nu ˗bha n ˈˈklʋʋbhɔ ˗kɔ ꞊gbɔɔnsü bhë ˗yö ˗yö n ˗gɔ ˈˈyua ˗bha. ˈDhɛ ˈö ˗kë ˈˈdhʋ̈ ˈyö ˈa ˗ya yi zë blɛɛdhɛ ˈsü ˗sü ˗bha. ˈYö ˈa ˗ya we waa ꞊shiɛti mü ˗sü ˗bha ˈˈtʋ̈ŋ ˈˈpɛpɛ ˈka. ˗Yö ˗kë ˈˈdhʋ̈ ˗kwɛ ꞊va ꞊dede ˈˈpiʋ̈.”

Zoova waa ö ˗dhɔkëmɛn ˗nu ˈwo ˈˈkpɔnŋ ꞊taa ˗wo Nilda ˗takun ˈyö go ˗zuu yaa ˗nu ˗gɔ ˈˈgan ˈgü, ˈyö ˗tosɛta ˗së ꞊dede kë ˗ni ˈgü ꞊dɛɛ. Yöö ꞊dede ˗ya ˗pö: “A mɛn ˈˈpɛpɛ ꞊faan ˗mën kö waa ˗zuu yaa ˗nu ˈwa ˈdho˗ ˗da ˗mlɛɛn ˈgü ˈˈtʋ̈ŋ ˈnën ˈˈtɩtɩ ˗dee ˗ʒiaan ˈˈpiʋ̈.”