ˈWƆN ˗GƆ 1
˗Zlanwo ˈˈpɛpɛ gagade ˗pö ˗ee?
1. ˗Zlanwo ˗nu ˗mɛɛn ˈwo mɛn tii ˈˈsɛ ˈgü?
MƐN ꞊vadhɛ ˈwo mɛn tii ˈˈsɛ ˈgü, ˗an ˗wo ˗yö do ꞊dhɛ ˗Zlan ˗dhɔkë ˗sü ˗yö ˗së. ˈˈKɛɛ, ˗a ˗dhɛ ˈkö ˗gban ˗Zlan ˗dhɔkë ˗kɔ ˗bha bhë, ˗an ˗wo ˈyaa do ˗a ˗bha. Mɛn ˈbhaa ˗nu ˗wo ˈˈmɔɔn˗ ˈsëë˗ ˗bho, ˈyö mɛn ˈbhaa ˗nu ˈwo ˗dhɛ ˗nu ˗dhɔkë. ˈYö mɛn ˈbhaa ˗nu ˗de ˈpö ˈwo dho ˈkɔ ꞊löö. ˈˈKɛɛ gagade ˈyaa ˗mü kö ˈkwa˗ pö ꞊dhɛ ˗zlanwo ˗yaaga ˈˈkpaan ꞊nën ˈwo mɛn tii ˈˈsɛ ˈgü. ˈˈMɔɔn˗ ˈsëëbhomɛn ˗nu ˗bha ˈtɔŋ˗ ˗nu, waa ˗an ˗bha ˗zoyödhe ˈwaa do. Kwa ˈˈbheman ˗nu ˗bha ˗Zlan ˗dhɔkë ˗kɔ ˗yö ˗sü ˈdhɛ ˈö ˈdhö ˗a ˗bha ˗dhɛ ˗dhɔkë ˗kɔ ˗bha. Mɛn ˗de ˗ʒiaan ˈö ˈwo˗ pö wo Kletiɛn ˈka, ˈgügblüdhe ˈkpii˗ ˗yö ˗an ꞊zinŋgü. ˗Ya ˈgo ˗zlanwokɔ ˈˈgblʋ̈gblʋ̈ ˗nu ˈö ˈkwa ˗an dɔ ˗an ˈgü, ˗zlanwokɔ ˈˈgblü ꞊va ˈö ˈwo wo ˗de ˗ta, ꞊wa ˗pɛn mɛn tii ˈˈsɛ ˗todhʋ̈sü ˈgü.
Kwa ˗bha ˗zlanwo dua ˗mü kö ˗a ˗gɛn ˗yö ˗gban gagade ˗ta
2. (a) ˗Mën ˈö mɛn ˗nu ˗blü ˗da ˗zlanwo ˗nu ˈgü ˗sü ˗bha ꞊shiöŋ ꞊shiöŋ? (b) Kwa ˗bha ˗zlanwo ˗kë ˗Zlan ˗dhɛ ˗së ˗sü, ˈyaa ˈsü ˗mën ˗bha?
2 ˗Mën ˈö mɛn ˗nu ˗blü ˗da ˗zlanwo ˗nu ˈgü ˗sü ˗bha? Mɛn ꞊vadhɛ ˗da wo ˈkpɔmɛn ˗nu ˗bha ˗zlanwo ˈgü. ˗Zlanwo ˈö mɛn ˗nu ˈdhö˗ ˈgü ꞊dɛɛ, ˗an ˗bha ˗da ˗a ˈgü ˗sü ˗yö ˗sü ˈpö ˈwɔn ˗nu ˈwo ˗kë ꞊kwɛŋzü ˗an ˗bha. ˈSëëdhɛ ˗be ˈwo˗ ˗dhɛ Africains : un héritage triple (angl.) bhë, ˗ya ˗pö: ꞊Gblü ˗nu ˈnën ˈwo˗ ˗kë ˈyö ˈˈmɔɔn˗ ˈsëë˗ ˈyö ꞊pɛn ˈˈyɛɛtadhɛ ˈwo˗ ˗dhɛ Saadha bhë ˗a ˗gɔ ˈˈdhuŋ ˗ʒian ˈka, [...] ˈwɔn do bhë yö ˈnën˗ ˗kë ˈpö ˈyö Kletiɛn ˗nu ˗bha ˗zlanwo ˈyö ꞊pɛn Saadha ˗gɔ ˈˈshiaŋ ˗ʒian ˈka. ˈKö kë ˗dhɛ Saadha ˗gɔ ˈˈdhuŋ ˗ʒian ˈka, ˈˈmɔɔn˗ ˈsëë˗ ˗yö ˗pɛn ˗blaandhaa ˗kɔ ˈka, ˗a ˗gɔ ˈˈshiaŋ ˗ʒian ˈka, ˗yö ˗pɛn ˈpö bu ˗kɔ ˈka. ˈKö ˗kë ˈˈdhʋ̈, mɛn ꞊vadhɛ kwa˗ ˗pö kwa ˗bha ˗zlanwo ˗yö ˗Zlan ˗dhɛ ˗së. ˈˈKɛɛ, ˗zlanwo ˗bha ˗kë ˗së ˗sü ˈyaa ˈsü kwa ˗mɛn ˗nu ˗bha ˗kë ˗a ˈgü ˈsü ɛɛnˈˈ ˈˈsɛ ˈˈwɛɛ ˗bha ˈˈgbɩɩdhɛ ˗wɔ kwa ˈˈbheman ˗nu ˗ta ˗sü kö ˗wo ˗da ˗a ˈgü ˗a ˗bha.
3-5. ˈWɔnzuan ˗mɛɛn ˈö ˗dho kwa ˗takun kö ˈkwa˗ yö ꞊dhɛ ˗zlanwo ˈˈpɛpɛ waa gagade pö?
3 ˈKö ˗kë ꞊dhɛ ˗zlanwo ˈˈpɛpɛ ˗wa ˗pö wo ˗Zlan ˗dhɔkë ˗kɔ ˗së ˗zɔn mɛn ˗nu ˗dhɛ, ˗an ˗wo ˈyaa do. ˗An ˗bha mɛn ꞊klaŋkëwo ˈö ˗gban ˗Zlan waa pë ˈö˗ ˈˈpiʋ̈ kö ˈkwa˗ kë ˗an ˗bha, ˗an ꞊vadhɛ ˗wo ˗go ˈko ˈˈpiʋ̈. Ü ˗zota kö ˈbha yö ꞊slɔɔ soete ˈkpii˗ ˈbha ˈgü. ˗A ˗dhɛkpaɔyi ˗blɛɛsü ˈü yö züdɔ ˗a ˈka, ˈyö ˈü˗ man ꞊dhɛ ü ˗gɔmɛn ˗ya ˈdho ˈˈta ˈgü. Pë ˈö ü dua ˈdhö ˗mü kö ˈü˗ kë, ˈyö ˈü˗ dhɛɛˈˈ kpɔ yökëmɛn ˗yaaga ˗gɔ. ˈYö ˗a mɛn ˗blɛɛsü ˗ya pö ü ˗gɔmɛn ˗ya ˈˈpiʋ̈ kö ˈü ˗dhɛ ꞊gwöö. ˈYö˗ mɛn ꞊plɛ ˗naan ˗ya pö ˗ya ˈˈpiʋ̈ kö ˈü ˈkɔ ˈˈbhaŋ giiˈˈ. ˈYö˗ mɛn ˗yaaga ˗naan ˗ya pö, ˗ya ˈˈpiʋ̈ kö ˈü ˈsëëdhɛ ˗nu ˗gblü mɛn ˗nu ˗ta.
4 ˈDhɛ ˈö go mü, ˈyö ˈü ˗an dhɛɛˈˈ kpɔ ü ˗gɔmɛn ˗wɔn ˈka. ˈYö yökëmɛn ˗blɛɛsü ˗ya pö ü ˗gɔmɛn ˗yö ꞊gblɛɛn, ˈnëngɔnnën ˗mü, ˗a zuʋ̈ˈˈ ˗yö dhiʋ̈ˈˈ. ˈYö˗ mɛn ꞊plɛ ˗bha ˗naan ˗ya pö ü ˗dhɛ ˗yö ꞊klöö˗, ˈö zii, ˈö˗ ˈˈgblü ˈdhö ˗së. ˈYö˗ mɛn ˗yaaga ˗bha ˗naan ˗ya pö ü ˗gɔmɛn ˈö bhë, gɔɔn˗ ˈyaa ˗mü toŋtoŋdhö, ˈˈkɛɛ dhebɔ ˗mü. Ü ˗dho ˈto mü ˈü˗ pö ü ˗de ˗dhɛ ꞊dhɛ mɛn ˗yaaga ˈwo bhë ˗an ˈbha ˗bha ˈbha waa gagade pö. ꞊Ya kë ꞊dhɛ ü˗ ˈˈpiʋ̈ ˈü ˈto yö bhë˗ ˈgü, ü ˗dho pë ꞊gban ˈˈpɛpɛ kë kö ˈmɛn ˈö ü ˗gɔmɛn ˈka, waa pë ˈö˗ ˈˈpiʋ̈ kö ˈü˗ kë, ˈü˗ dɔ.
5 ˗Kɔ do ˈö bhë ˈyö ˗zlanwo ˈdhö˗ ˈka. ˈDhɛ ˈö ˗kë ꞊dhɛ ˈwɔn ˈö ˗gban ˗Zlan ˗bha waa pë ˈö˗ ˈˈpiʋ̈ kö ˈkwa˗ kë, mɛn ˗nu ˗wo ˈyaa do ˗an ˈgü bhë, kwa dua ˗mü kö ˈkwa˗ ˗bhokoo yö ˗së ˈka ꞊dhɛ kwa ˗bha ˗Zlan ˗dhɔkë ˗kɔ ˗yö ˗gban gagade ˗ta. ˈˈKɛɛ kwa ˗dho gagade ˈö ˗gban ˗Zlan ˗bha ˗a dɔ ˗kɔ ˗kë ꞊dhɛ?
