˗Zlan ˗bha ˈtɔŋ˗ ˗nu ˈö ˗an dɔ, ˗an ˗gɛngbandhɛ ˗nu ˗wo ˗dhö. ˗A ˈtɔŋ˗ ˗gɛngbandhɛ ˗nu bhë, ˈyö ˈwo ˗tɔ gagade ˗nu ˈwo Biblö ˈgü. ˗Wo kwa ˗takun kö ˈkwa ˗Zlan ˗zopiʋ̈wɔn waa ˗a ˗bha ˈwɔn yö ˗kɔ ˗nu dɔ. ˈTɔŋ˗ ˗gɛngbandhɛ ˗nu bhë ˗wo kwa ˗takun kö ˈkwa ˈwɔn ˗së dɔ, kö ˈkwa˗ kë. ˈWɔn ˗nu ˈö ˗Zlan yö ˈti ˈtɔŋ˗ dɔ ˗an ˗bha ˈkpakpadhö ˈkwa kë ˗an ˈgü, ˈtɔŋ˗ ˗gɛngbandhɛ ˗nu kwa ˗takun ꞊dedewo.

▸ ˈWɔn ˗gɔ 1, ˗wo ˗bhuöö kpö 8

ˈWɔnman Zoova ˗ta ˗sü ˈnën ˗tɔ pë ˈö˗ pö, ˗a kë ˗sü ˈö zuʋ̈ˈˈ ˈˈpuu ˗bha. Zoova ˗ya ˈˈpiʋ̈ kö ˈkwa ˈwɔnman ö ˗ta ö ˗dhɔ ˈö kwa ˈgü ˗a ˗bha. (1 Zan 5:3) Kö ˗Zlan ˗dhɔ ˗yö kwa kë, ˈkwa kwa ˗zo yö ˗a ˗dhɛ, kwa ˗dho ˈwɔnman ˗a ˗ta ˈwɔn ꞊gban ˈgü. ˈKö ˗kë ꞊dhɛ ˗yö kwa ˗gɔ ˈˈgbɩɩ˗ ˈˈtʋ̈ŋ ˈbhaa ˗nu ˈka, ˗kwa ˈwɔnman ˗a ta. ˈWɔnman Zoova ˗ta ˗sü ˗yö ˗së kwa ˗bha ˈka, ˗a ˗gɛn ˗mü ꞊dhɛ ˗yö ˈpë ˗dho kwa ˗bha ˗tosɛta kë ˗së ˗a ˗zɔn kwa ˗dhɛ. ꞊Ya ˈgo mü ˈzü, ˗ya ˈwɔn ˗së ꞊va ˗ya kwa ˗gɔ ˗dhɛkpaɔ dhiʋ̈ˈˈ ˈgü.​—Isaïe 48:17.

▸ ˈWɔn ˗gɔ 1, ˗wo ˗bhuöö kpö 10

Zoova ˗yö ˗potaadhe ˗nu mɛn ˈˈpɛpɛ ˗dhɛ kö ˗wo ˈwɔn ˗nu ˈsü wo ˗de ˈgü ˗wa kë. Yö ˈti kwa ˗da ꞊dhɛ ꞊manŋzi ˈdhö. (Deutéronome 30:19; Josué 24:15) Kwa ꞊mɔɔn˗ ˗bha ˈkwa ˈwɔn ˗së ˗kë kwa ˗bha ˗potaadhe ˈka. ˈˈKɛɛ kwa ˈti kë kwa ˈsuan˗ ˈka, kwa ˗dho ˗da ˈwɔn yaa ˗nu ˗ʒian ˗ta. ˗Potaadhe ˗bha ˗kë kwa ˗gɔ ˗sü ˗wɔn ˈgü, kwa ꞊mɔɔn˗ ˗bha ˈkwa˗ sü kwa ˗de ˈgü ˈö ˈkwa ˗klu Zoova ˗bha, ˈö ˈkwa˗ ˗zɔn ꞊dhɛ ˗a ˗dhɔ ˗yö kwa ˗kë ꞊dedewo.

▸ ˈWɔn ˗gɔ 1, ˗wo ˗bhuöö kpö 12

Zoova ˗yö ˈtɔŋ˗ ˗nu ˈwo ˗gban ˈˈta ˗kɔ waa ˈwɔn kë ˗kɔ ˗nu ˗bha ˗an  ˗dɔ. ˈTɔŋ˗ ˗nu ˈwo bhë waa ˗kɔ ˈwo ˗dho kwa ˗takun ˗a ˈka kö ˈkwa kë Zoova ˗dhɛ ˗së, kö kwa ˗bha ˗tosɛta ˗yö kë ˗së, ˗yö Biblö ˈgü. (Proverbes 6:16-19; 1 Kodhɛngtö 6:9-11) ˗Wa ˗kë ˈö pë ˗nu ˈwo ˗Zlan ˗dhɛ ˗së waa˗ ˗dhɛ ˗nu ˈö ˈwaa ˗së, ˈkwa ˗an dɔ. ˗Wo kwa ˗takun ˈzü kö ˈkwa ˗dhɔ waa ˈˈgblü ˗së ˗kë mɛn ˈˈwɛɛ ˗nu ˈka ˗kɔ dɔ, kö ˈkwa ˗da ˈwɔn ˗së ˗nu ˗ʒian ˗ta. ˈKö ˗kë ꞊dhɛ ˈˈkpɔnŋtaamɛn ˗nu ˗bha ˈtɔŋ˗ ˗nu ˗wo kë ˗ni ˈgü ˈyaa˗ ˗kplawo, Zoova ˗bha ˈtɔŋ˗ ˗nu ˗zë, ˈwaa ˈgo ˈˈgblʋʋ. (Deutéronome 32:4-6; Malachie 3:6) Kö ˈkwa ˗klu ˗an ˗bha, ˗wo ˗dho kwa ˗gɔ bho ˈwɔn yaa ˗nu ˗gɔ ʒiaan˗.

▸ ˈWɔn ˗gɔ 1, ˗wo ˗bhuöö kpö 17

Kwa zuʋ̈ga ˈö ˈwɔn yö ˈko ˈˈdhiʋ̈ bhë, yö ˈnën ˗tɔ zuʋ̈ˈˈ ˈö ˈwɔn ˗së waa ˈwɔn yaa ˗nu ˗bhokoo ˗zɔn kwa ˗dhɛ. Zoova ˗ya ˗nu mɛn ꞊gban kwa ˗dhɛ. (Wlɔmö 2:14, 15) ˈKwa˗ pö kwa zuʋ̈ga bhë ˗yö yökë ˗së ˈka, kwa dua ˗mü ˈkwa˗ dɔɔˈˈ Zoova ˗bha ˈtɔŋ˗ ˗nu ˈka. ꞊Ya kë ˈˈdhʋ̈, ˗yö ˗dho kwa ˗takun ˈwɔn ˗nu ˈwo ˗Zlan ˗dhɛ ˗së ˗an kë ˗sü ˗bha. (1 Piɛdhö 3:16) Kwa ˈdho ˗ni ʒiaan yaa ˗ta, kwa zuʋ̈ga bhë ˗yö ꞊mɔɔn˗ ˗bha ˈö kwa ꞊kpɔɔ. ˈKwa ˈwɔn yaa kë, ˗yö ꞊mɔɔn˗ ˗bha ˈö za dɔ kwa ˗bha. ꞊Faan ꞊mɔɔn˗ ˗bha ˈö go kwa zuʋ̈ga bhë ˗a ˗bha, ˈˈkɛɛ Zoova ꞊mɔɔn˗ ˗bha ˈö kwa ˗takun kö ˗yö ˈwɔn yö ˈko ˈˈdhiʋ̈ ˈzü ˗së ˈka. Kwa zuʋ̈ga ˗ya ˈwɔn yö ˈko ˈˈdhiʋ̈ ˗së ˈka, kwa zuʋ̈ˈˈ ˗yö ˈwaannu, ˈö ˈkwa ˗kë kwa ˗de ˈˈpiʋ̈ ˗së.

▸ ˈWɔn ˗gɔ 2, ˗wo ˗bhuöö kpö 3

ˈDhɛ ˗kë ꞊dhɛ ˗Zlan ˗dhɔ ˗yö kwa kë ˈö ˈkwa˗ ꞊bhlëë ˗ya ꞊dedewo bhë, ˈkwaa˗ ˈˈpiʋ̈ kö ˈkwa˗ ˗shiödhɛwɔn kë. ˗A ˗kë ˈˈdhʋ̈ ˗sü ˈnën ˗tɔ ˗suʋ̈ ˗a ˗gɔ ˗sü. ˗Suʋ̈ ˗Zlan ˗gɔ ˗sü ˗yö kwa ˗takun ˈö ˈkwa ˈwɔn ˗së ˗kë, ˈö ˈkwa ˗kan ˈwɔn yaa ˗bha. (Psaume 111:10) ˗Yö kwa ˗takun ˈö ˈkwa kwa ˈˈtʋ to ˗së ˈka pë ˈˈpɛpɛ ˈö Zoova ˗ya po ˗a ˗bha. ˗Ya ˗kë ˈzü ˈö kwa ˗wo ˈö ˈkwa˗ ˗bhö ˗a ˗dhɛ, ˈkwa˗ ˈgü ˗wɔn ˗kë, ˈyö ˗tɔ ꞊dhɛ kwa˗ ꞊bhlëë ˗ya ꞊dedewo. ˗Suʋ̈ ˗Zlan ˗gɔ ˗sü ˗yö ˗gban kwa ˗zota ˗kɔ ˗nu, mɛn ˈˈwɛɛ ˗nu ˈkun ˗kɔ waa pë ˗nu ˈö ˈkwa ˗an ˗kë yi ˈˈplɛ ˈka, ˗an ˗bha.

▸ ˈWɔn ˗gɔ 2, ˗wo ˗bhuöö kpö 9

Mɛn ˈö ˈwɔn yaa ˗kë ˈö˗ zuʋ̈ˈˈ ˗yö za dɔ ˗a ˗bha, ˈö ˗kan ˈwɔn yaa ˈö ˈˈdhʋ̈ ˗a ˗bha, kö ˗ya ˈgo ö ꞊sɔŋ yaa ˈgü. Mɛn ˗nu ˈö ˗Zlan ˗dhɔ ˗yö ˗an ˗kë, kö ˗wa ˈwɔn dɔ ꞊dhɛ ˈwa˗ ˗bha ˈtɔŋ˗ ꞊lögü, ˗yö ˗mën ˗an ˈka ꞊dedewo. Kö ˈkwa ˈwɔn yaa kë, kwa dua ˗mü kö ˈkwa bhɛɛˈˈ Zoova ˗dhɛ, kö ˗yö kwa ˗bhawɔn ˈto Yesu ˗bha ˈˈsaa˗ ˈsaa˗ ˈgü. (Matiö 26:28; 1 Zan 2:1, 2) Kö ˈkwa ˈgo kwa ꞊sɔŋ yaa ˈgü, kö ˈkwa ˈˈkan ˈwɔn yaa ˗bha, ˗yö kë kwa ˈˈɲaan ꞊dhɛ Zoova ˗dho kwa ˗bhawɔn ˈto. ꞊Ya kë ˈˈdhʋ̈, kwa dua ˈyaa ˗mü kö kwa zuʋ̈ˈˈ ˈˈdhiʋ̈ ˗yö ˈˈtɛ ˈzü ˈwɔn yaa zii ˈö ˈˈdhʋ̈ ˗a ˗wɔn ˈgü. (Psaume 103:10-14; 1 Zan 1:9; 3:19-22) ˗Kwa pë ˈˈpɛpɛ kë kö ˈkwa ˗gleŋ ˈsü ˈwɔn ˈö zë kwa ˗gɔ ˗a ˗bha, kö ˈkwa ˈwɔn yaa bho kwa ˗zo ˈˈpiʋ̈, kö ˈkwa kwa ˈˈta ˗kɔ ˗bɛ Zoova ˗bha ˈtɔŋ˗ ˗nu ˗bha.

▸ ˈWɔn ˗gɔ 2, ˗wo ˗bhuöö kpö 18

Kletiɛn ˈö ˈwɔn yaa ꞊gbɔɔnsü ˗kë, yö ˈti ˈgo ö ꞊sɔŋ ˈgü, ˈö ˈyaa ˈˈwɩ˗ ˗bha ˈö Zoova ˗bha ˈtɔŋ˗ ˗nu ˈkun, ˗a dua ˈyaa ˗mü kö ˗yö ˈto ˗zlanwokɔdhi ˈgü. ˗Wa ˗bho kwa kpö ˈgü. ꞊Ya kë ˈˈdhʋ̈, kwaa˗ ˗nu kwa ˗kɔ ˈyaa kë ˈwɔn do ˈgü, ɛɛnˈˈ ˈkwaa ˈˈwɩ ˗a ˈˈpiʋ̈. (1 Kodhɛngtö 5:11; 2 Zan 9-11) Mɛn ˗bho kwa kpö ˈgü ˗sü ˗yö Zoova ˈtɔ ˗kë ˈˈslʋ̈ʋ̈slʋ̈, ˈö ˗zlanwokɔdhi ˗takpa. (1 Kodhɛngtö 5:6) ˗Yö ꞊mɔɔn˗ ˗bha ˈzü ˈö ˈwɔnyaakëmɛn ˗takun ˈö go ö ꞊sɔŋ yaa ˈgü, ˈö ꞊yɛɛkë Zoova ˈˈpiʋ̈.​—Dhukö 15:17.

▸ ˈWɔn ˗gɔ 3, ˗wo ˗bhuöö kpö 19

Kwa ˗dhɔ ˗yö Zoova ˗kë, ˈö˗ ˈˈpiʋ̈ ˈö kwa ˗takun. ˗A ˗wɔn ˈgü ˗yö ˗bɔ Biblö waa mɛn ˗nu ˈö ˗Zlan ˗dhɔ ˗yö ˗an ˗kë ˗an ˗ta ˈö ˈˈdhiʋ̈sü kwa ˈka, ˈö ˗dhioo dɔ kwa ˗ta. ˈDhɛ ˈö ˗kë ꞊dhɛ ˈwɔn yaa kë ˗dhii ˗yö kwa ˈgü bhë, kwa ˗bhawɔn ˗yö ˗a ˗bha ˗takundhe ˗bha. (Jérémie 17:9) Kö ˈkwa ˈwɔnman mɛn ˗nu ˈö Zoova ˗yö ˗an ˗ya kö ˗wo ˈˈdhiʋ̈sü kwa ˈka ˗an ˗ta, kö ˈkwa˗ ˗zɔn ꞊dhɛ kwa yöö ꞊dede ˗a ꞊bhlëë ˗ya, ˈö ˈkwa ˈwɔnman ˗a ˗ta.​—Eblö 13:7.

▸ ˈWɔn ˗gɔ 4, ˗wo ˗bhuöö kpö 2

ˈWɔn yaa kë ˗dhii ˗ya ˗kë ˈö ˈkwa kwa ˗zota dosɛnŋ kwa ˗de ˗wɔn ˈgü, ˈö ˈkwa kwa ˗de sü ˈkpii˗. ˈˈKɛɛ Zoova ˗ya ˈˈpiʋ̈ kö ˈkwa kwa ˗de ˈsü ˈˈtɩtɩ. ꞊Ya kë ꞊shiö, ˈkwa kwa ˗de ˗zɔn Zoova ˈka, ˈkwa˗ yö ꞊dhɛ ˈkwaa pë ˈbha ˈka, kwa kwa ˗de ˗sü ˈˈtɩtɩ. (Job 38:1-4) ˗De ˗kë ˈˈtɩtɩ ˗kɔ ˈbha ˈnën ˗tɔ ö ˗zota mɛn ˈˈwɛɛ ˗nu waa ˈpë ˗dho ˗an zuʋ̈ˈˈ ˈˈgblü dhi ˗an ˈgü ˗sü ö ˗ʒiö ˗a ˈka kwa ˗de ˗dhidhɛwɔn ˗ta. ˗De ˗sü ˈkpiisü ˗ya ˗kë ˈö mɛn ö ˗zota ꞊dhɛ ö ˗tiaandhö ˈgbɛ mɛn ˈˈwɛɛ ˗nu ˗bha. ˈˈKɛɛ ˗desütɩtɩmɛn ö ˗de ˗dɔ ˗së ˈka. Pë ˗nu ˈö ˗an kë ˗dhɛ dɔ waa˗ ˗dhɛ ˗nu ˈö ˗an ˈgü ˈˈtëëtë, ˗yö ˗an ˗dɔ. ˗Ya ˈwɔn yaa ˗nu kë, ˗a blɛɛsü ˈˈsuʋ̈ ˈyaa˗ kë. ˗Yö ˗bhawɔntodhe ˗dhɛ, ˈö ö ˈˈtʋ to ˗dhioo ˗bha. ˗Yö ö ˗zo ˗yö Zoova ˗dhɛ, ˈö ˈwɔnman ˗a ˗ta.​—1 Piɛdhö 5:5.

▸ ˈWɔn ˗gɔ 4, ˗wo ˗bhuöö kpö 4

Mɛnkɔɔnmɛn ˈnën ˈpë mɛn ˗nu ˈwo˗ ˗kɔ ꞊löö ˈwo ˗dho ˗a kë ˗a ˗zɔn, ˈö ˈˈdhiʋ̈sü ˗an ˈka. Zoova ˈnën pë ˈˈpɛpɛ ˈwo dhaŋ˗ ˈgü waa ˈˈsɛ ˗ta, ˗an ˗gɔ ˗ta. Yö ˈnën ˗tɔ pë ꞊gban ˈˈpɛpɛ ˗Damɛn ˈö˗ ˗bha ˈˈpiigbɩɩdhɛ ˈˈdhiʋ̈todhɛ ˈyaa ˈdhö. ˗A ˗bha mɛnkɔɔnsü ˗yö ˈwɔn ˗së ˗kë mɛn ˗nu ˗dhɛ. Zoova ˗yö mɛn ˗nu ˗ya kö ˗wo ˈˈdhiʋ̈sü kwa ˈka. ˗An ˈbhaa ˗nu ˈnën ˈwo ˗tɔ ˈnënmɛn ˗nu, mɛn zii ˗nu waa ˈˈsɛkɔɔnmɛn ˗nu. Zoova ˗ya ˈˈpiʋ̈ kö ˈkwa ˈwɔnman ˗an ˗ta. (Wlɔmö 13:1-5; 1 Timote 5:17) ˈˈKɛɛ kö mɛnbhɩɩdhe ˗bha ˈtɔŋ˗ ˗yö ˗gban ˗Zlan ˗bha ˈtɔŋ˗ ˗gɔ, ˗Zlan ˗bha ˈnën ˈkwa ˗dho ˗klu ˗a ˗bha, mɛnbhɩɩdhe ˗bha ˈyaa ˗mü. (Këwɔn ˗nu 5:29) ˈKwa ˈwɔnman ˗yamɛn ˗nu ˗ta, kö kwa˗ ˗zɔn ꞊dhɛ kwa Zoova ˗bha ˈwɔn ˗nu kë ˗kɔ ꞊bhlëë ˗ya.

▸ ˈWɔn ˗gɔ 4, ˗wo ˗bhuöö kpö 7

Kwa ꞊dhegblü ˗nu ˈö ꞊wa bɔ ˈwɔn ꞊va ˈgü, ˈö ˈwo mɛn zii ˗nu ˈka, Zoova ˗yö ˗bɔ ˗an ˗ta ˈö ö ˗zokë ˗zlanwokɔdhi ˈˈpiʋ̈. (Deutéronome 1:13; Këwɔn ˗nu 20:28) Mɛn ˗nu ˈwo bhë ˗wo kwa ˗takun kö kwaa Zoova kwa ˗bha ˗mlɛɛn ˗gɛn ˗yö ˗gban, kö ˈkwa˗ ˗dhɔkë zuʋ̈gblüdhi ˈgü ˗së ˈka. (1 Kodhɛngtö 14:33, 40) Kwa ꞊dhegblü ˈö ˗dho kë mɛn  zii ˈka ˗zuu ˈˈslʋ̈ʋ̈slʋ̈ ˈsaa˗ ˈgü, ˗a dua ˗mü kö pë ˗nu ˈö Biblö ˗ya pö ˈwo ˗gban mɛn zii ˈˈta ˗kɔ ˗bha, ˗yö ˗an kë. (1 Timote 3:1-7; Titö 1:5-9; 1 Piɛdhö 5:2, 3) ˈDhɛ ˗kë ꞊dhɛ kwa kwa ˗zo ˗yö ˗Zlan ˗bha ˗kɔlokota ˗dhɛ bhë, kwa yö ˗kë mɛn zii ˗nu ˈˈpiʋ̈ zuʋ̈gblüdhi ˈka.​—Psaume 138:6; Eblö 13:17.

▸ ˈWɔn ˗gɔ 4, ˗wo ˗bhuöö kpö 8

Zoova ˗yö ö ˗kɔ ˗yɛ ˈnënmɛn ˗nu ˗bha kö ˗wo wo ˗zokë wo ˗bha ˈkɔdhi waa ˈnën ˗nu ˗an ˈˈpiʋ̈. ˈˈKɛɛ Biblö ˗ya ˗zɔn ꞊dhɛ gɔɔn˗ ˈnën ˗tɔ ˈkɔdë. ˈNëndë ˈyaa ˈdhö, kö ˈkɔdhe ˈnën ˗dho ˈˈdhiʋ̈sü ˈkɔdhi ˈka. ˈKɔdë dua ˗mü kö ˗yö ˗bhöpë, sɔ waa wɔdhɛ ˗nu ꞊slɔɔ ö ˗bha ˈkɔdhigümɛn ˗nu ˗dhɛ. ˗A ˈdhɛ ˗wɔn ˈdhö ˈˈgbɩɩ˗ ꞊dedewo ˈyö ˗tɔ ˗a dua ˗mü kö ˗yö ˈˈdhiʋ̈sü ˗an ˈka, kö ˗wo Zoova ˗dhɔkë. ˗A dua ˗mü kö ˗yö ˗an ˗takun kö ˗wo ˈdho ˗bhɔkwëë ˗nu ˗ta, kö ˗wo ˈwɔn ˗daa ˗nu kë, kö ˗wo ˗zlanwopö, kö ˗wo Biblö draanˈˈ wo ˈko ˈˈpiʋ̈. ˈWɔn ˈö ˈkɔdë ˗ya ˈˈwɩ ˗a ˗bha, ˈyö ˈkɔdhigümɛn ˗nu ˗wa ˗kë. ˗A ˈˈgblü ˗yö ˗së ꞊dhɛ Yesu ˈdhö, ˈö ˈwɔn ˈgüman, ˈö ˈyaa kë ˈˈdhiʋ̈˗ ɛɛnˈˈ ˈˈkɛkɛsü. ꞊Ya kë ˈˈdhʋ̈, ˗dhɔ ˗yö ˗kë ˈkɔdhigümɛn ˗nu ꞊zinŋgü, ˈö ˈwo ˗kë zuʋ̈gblüdhi ˈgü, ˈö waa Zoova ˗nu ˗an ˗bha ˗mlɛɛn ˗gɛn ˗yö ˗gban.

▸ ˈWɔn ˗gɔ 4, ˗wo ˗bhuöö kpö 12

Kwa ˈˈdhiʋ̈ʒiöwomɛn ˗nu bhë, mɛn kpönën ˈö ˈwo ˗dho ˈdho dhaŋ˗ ˈgü, ˈö ˗Zlan ˗yö bɔ ˗an ˗ta ˈö ˈˈdhiʋ̈sü ö ˗dhɔkëmɛn ˗nu ˗bha yö ˈka wo ˗mü. ˗An ˈmɛn ˈwo kun ˗kwɛ ꞊këŋ do ˗blɛɛsü ˈgü, Zoova ˗yö ˗bɔ ˗an ˗ta ˈö ˈˈdhiʋ̈sü kletiɛn ˗nu ˈka ˗an ˗bha ˗Zlan ˗dhɔkësü waa ˗a ˈˈdhiwopösü ˈgü. (Këwɔn ˗nu 15:2) ꞊Dɛɛ, kwa ꞊dhegblü ˗nu kpö ˈwo kwa ˈˈdhiʋ̈ʒiöwomɛn ˗nu ˈka, wo ˈnën ˈwo ˈˈdhiʋ̈sü kwa ˗bha yö ˗nu ˈka, ˈö ˈwo wo ˗zoto kwa ˈˈpiʋ̈, ˈö ˈwo kwa ˗maankë. ꞊Waa˗ pö ˈwo ˈwɔn ˈbha kë, ˗wo wo ˗kwaa ˗Zlan ˗Wo waa˗ ˗bha ˗zuu ˈˈslʋ̈ʋ̈slʋ̈ ˗an ˗zü ˈyö ˈwo ˈˈdhiʋ̈sü ˗an ˈka. Yesu ˗yö ˈˈɲɔn ˗a ꞊troo ˗nu ˈwo bhë ˗an ˗dhɛ ‹gwëëmi ˗towotasü ˈö ꞊kpaɔsü›.​—Matiö 24:45-47.

▸ ˈWɔn ˗gɔ 4, ˗wo ˗bhuöö kpö 15

ˈˈTʋ̈ŋ ˈbha ˗nu ˈka, ˗wo ꞊mɔɔn˗ ˗bha ˈwo gɔɔn˗ ˗nu ˗bha yö nu kwa ꞊dhegblüdhe do ˗dhɛ ˗zlanwokɔɔdhö. ꞊Yaa˗ pö ˈö yö bhë ˗a kë, ˗a dua ˗mü kö ˗yö ˗gbasa ɛɛnˈˈ ˈfaan˗ ˗ya ˈö ˗gɔ ˗bha kö ˗ya ˗zɔn ꞊dhɛ ˈö Zoova ˗bha ˈˈdhiʋ̈süsü ꞊bhlëë ˗ya. ˗A ˈwɔnzuan ˈnën ˗tɔ ꞊yaa˗ pö ˈö mɛn ꞊klaŋ kë Biblö ˈka kö ˗a ꞊gɔn ɛɛnˈˈ gɔɔn˗ ˈˈwɛɛ do ˈö ꞊ya bɔ ˈˈyi ꞊bhaa ˗ya ˗dhɛ ˈgü, ˗a dua ˗mü kö ˗yö ˗gbasa ɛɛnˈˈ ˈfaan˗ ˗ya. ˈˈKɛɛ ˈwɔn ˈˈpɛpɛ ˈyaa ˈnën ˈö ˗dho pë kpa ö ˗gɔ ˗bha ˗a ˈgü.​—1 Kodhɛngtö 11:11-15.

▸ ˈWɔn ˗gɔ 4, ˗wo ˗bhüöö kpö 17

ˈMɛn ˈö˗ ˗kɔ ˈyaa ˈˈsɛ kɔɔˈˈ ˗wɔn ˗nu ˈgü, ˈyaa bɔ ˈˈsɛkɔɔmɛn ˈˈwɛɛ ˈbha ˈka. (Zan 17:16) Zoova ˗dhɔkëmɛn ˗nu ˗kɔ ˗ya ˗bha ˗Gblüdëdhɛ ˗gɔ. Kwa ˗kɔ ˈyaa ˈˈkpɔnŋtaawɔn ˗nu ˈgü ꞊dhɛ Yesu ˈdhö.

Zoova ˗ya ˗pö kwa ˗dhɛ «[ˈkwa kwa] ˗gɔ ˈdho ˈˈsɛgɔdhiʋ̈mɛ ˗nu ˗dhɛ ˈˈsia˗.» (Titö 3:1, 2; Wlɔmö 13:1-7) ˈˈKɛɛ ˗Zlan ˗bha ˈtɔŋ˗ ˗ya ˗pö ˈzü ꞊dhɛ ˈkwa ˗dho mɛn zë. ˗A ˗wɔn ˈgü, kletiɛn zuʋ̈ga ˈyaa ˈˈwɩɩ˗ ˗bha kö ˗yö ˗gblügɔn. ꞊Ya kë ꞊dhɛ yö ˈˈwɛɛ ˈbhaa ˈö waa ˈˈsɔdhadhɛ ˈwaa ˗gban ˈkwëë˗ ˗ya kë mü, kletiɛn ˈö˗ zuʋ̈ˈˈ ˗ya ˈˈwɩ ˗a kë ˗sü ˗bha, ˗yö ꞊mɔɔn˗ ˗bha ˈö˗ ˗kë ˈˈsɔdhadhɛ ˈˈgblʋʋ ˈgü.

Zoova yöö dosɛnŋ ˈnën ˈkwa˗ ˗dhɔkë, ˗a ˗gɛn ˗mü ꞊dhɛ yö ˈnën kwa ˗da. ˈKö ˗kë ꞊dhɛ kwa ꞊bhlëë ˗ya ˈˈsɛ ˗bha ꞊drapo ˗bha, ˈkwaa˗ ˗da ɛɛnˈˈ ˈkwaa ˈˈtan bho ˗a ˗dhɛ. (Isaïe 43:11; Daniel 3:1-30; 1 Kodhɛngtö 10:14) ꞊Ya ˈgo mü ˈzü, Zoova ˗dhɔkëmɛn ˈdhɛ ˈö ˈdhö ˗ya ˗sü ö ˗de ˈgü ˈö ˈyaa ꞊vote kë, ɛɛnˈˈ ˈö ˈyaa ˗da paati gbɛ˗ ˈgü. ˗A ˈklɔɔ˗ ˗mü ꞊dhɛ ˈkwa bɔ ˗Zlan ˗bha ˗Gblüdëdhɛ ˈka ˈsaadhö.​—Matiö 22:21; Zan 15:19; 18:36.

▸ ˈWɔn ˗gɔ 5, ˗wo ˗bhuöö kpö 2

ˈˈKpɔnŋtaamɛn ˗nu ˗wo mɛn ˗nu ꞊faan ˗mën kö ˗wo wo ˗zota ˈpö ꞊dhɛ Sɔtraan ˈdhö. Mɛn ˗nu ˈö Zoova ˗dhɔ ˈyaa ˗an ˈgü, ˈö ˈwaa ˈto ˗a ˗bha  ˈwɔnzuan ˈˈpiʋ̈, ˈö ˈwaa˗ ˗bha ˈtɔŋ˗ ˗nu ˈkun bhë, ˗zotadhe suu ˈö ˈˈdhʋ̈ ˗yö ˗an ˗gɔ. (1 Zan 5:19) ˗Zota ˗kɔ suu ˈö bhë waa ˈwɔn ˗nu ˈö mɛn ˗blü ˗an kë ˗sü ˗bha, ˈyö ˈwo˗ ˗dhɛ ˈˈkpɔnŋ ꞊taa ˗zuu. (Efɛzö 2:2) Zoova ˗dhɔkëmɛn ˗nu ˗wo ˗kë wo ˈsuan˗ ˈka ˗zuu ˈö bhë ˗a ˗gɔ, kë ˈˈdhʋ̈ kö ˈya ˗dho ˈsɔ ˗an ˗ta. (Efɛzö 6:10-18) Kë ˈö˗ wo ꞊dhɛ Zoova ˗bha ˈwɔn kë ˗kɔ ˗dhɔ ˗yö kwa kë bhë, kwa pë ˈˈpɛpɛ ˗kë kö ˈkwa kwa ˗zota ˗kplawo ꞊dhɛ ˗a ˈdhö.

▸ ˈWɔn ˗gɔ 5, ˗wo ˗bhuöö kpö 7

˗Gban ˗Zlan ˗gɔ ˗sü ˈnën ˗tɔ ˗gban gagade ˈö Biblö ˈgü ˗a ˗gɔ ˗sü. ˗Gban ˗Zlan ˗gɔ ˗mɛn ˗nu ˗wo ˗gban Zoova waa Yesu ˈö ˗Zlan ˗bha ˗Gblüdëdhɛ ˗gɔdhiʋ̈ bhë, ˗an ˗gɔ. ˗Wa ˈˈslö ˗mɛɛn kö mɛn ˗nu ˗wo nu wo ˈˈpiʋ̈. (Wlɔmö 1:25) ˗Wa ˈˈpiʋ̈ kö Zoova ˗dhɔkëmɛn ˗nu dɔ ˈdudhö. Kletiɛn ˈbhaa ˗nu ˈwo kun ˗kwɛ ꞊këŋ do ˗blɛɛsü ˈgü, ˗wo ˗gban ˗Zlan ˗gɔ. Pë do bhë, ˗yö kë ˗ni ˈgü ꞊dɛɛ. (2 Tesadhonikö 2:3) Mɛn ˗nu ˈwo ˗klu ˗sü ˈka Zoova ˗bha waa ˗gban ˗Zlan ˗gɔ ˗mɛn ˗nu ˈwaa ˈˈta ˈsü. Kwa ˈti ˗dho kwa ꞊kwaa˗ pë ɛɛnˈˈ mɛn ˈbha ˗zü kö ˗yö kwa ˗blü ˗gban ˗Zlan ˗gɔ ˗mɛn ˗nu ˗bha ˈsëëdhɛ ˗wo pö ˗sü ˗bha ɛɛnˈˈ kwa ˈˈtʋ ˗to ˗an ˗bha ꞊suawo ˗nu ˗bha ˗sü ˗bha. Zoova yöö dosɛnŋ ˈnën ˈkwa ˗klu ˗a ˗bha, ˈö ˈkwa˗ ˗dhɔkë.

▸ ˈWɔn ˗gɔ 5, ˗wo ˗bhuöö kpö 9

ˈTɔŋ˗ ˈö ˗Zlan ˗yö bɔ Moizö ˗ta ˈö˗ dɔ bhë ˗a ˈˈtʋ̈ŋ ˈgü, Izraɛdhömɛn ˗nu ˗wo ˗bhɛɛ Zoova ˗dhɛ kö ˗yö ˗an ˗bha ˈwɔn yaa ˗nu ˗bhawɔn ˈto. ˗Wo ˗dho pë ga ˗nu, ˈˈɲɔn ˗nu waa wü ˗nu ˗an ˈka ˗Zlan ˗dhɔkëdhɛ ˈgü kö ˗wo ˈˈsaa˗ bho ˗an ˈka. ꞊Waa˗ kë ˈˈdhʋ̈, ˈyö ˗an ˗zo ˗buö ꞊dhɛ Zoova ˗ya ˈˈpiʋ̈ ˈö wo ꞊dede waa ˈˈsɛgümɛn ˗nu ˗todhʋ̈sü ˗bha ˈwɔn yaa ˗nu ˗bhawɔn ˈto. ˈDhɛ ˈö Yesu ö ˗de nu ˈˈsaa˗ ˈka kwa ˗wɔn ˈgü ꞊taabha, ˈyö ˈˈsaa˗ zii ˗nu bho ˗sü ˗yö ɲën. Yesu ˗yö ˈˈsaa˗ ˈˈslʋ̈ʋ̈slʋ̈ ˗bho «kö ˗yö kë ˈˈsaa˗ bho ˗sü ꞊gban ˈˈdhiʋ̈todhɛ ˈka».​—Eblö 10:1, 4, 10.

▸ ˈWɔn ˗gɔ 7, ˗wo ˗bhuöö kpö 6

ˈTɔŋ˗ ˈö ˗Zlan ˗yö bɔ Moizö ˗ta ˈö˗ dɔ bhë, ˗ya ˗pö ˗a ˈgü ꞊dhɛ Izraɛdhömɛn ˗nu ˗wo wü ˗nu ˗bhö, ˗wo ˈˈsaa˗ bho ˗an ˈka.  (Lévitique 1:5, 6) ˈˈKɛɛ yö ˈti˗ pö ˗an ˗dhɛ ˗wo wü ˗nu ˗wëë ˗kë wo. (Proverbes 12:10) ˈTɔŋ˗ ˗nu bhë, ˗wa ˗kë ˈö mɛn ˗nu ˈwaa wü ˗nu ˈˈklʋʋbhɔ. ˗Ya ˗pö Izraɛdhömɛn ˗nu ˗dhɛ ˗wo wo ˗zokë wo ˗bha wü ˗nu ˈˈpiʋ̈ ˗së ˈka.​—Deutéronome 22:6, 7.

▸ ˈWɔn ˗gɔ 7, ˗wo ˗bhuöö kpö 6

꞊Ɲɔɔn ˈˈpian ˈsɛɛn˗ ˗nu. ꞊Ɲɔɔn ˈˈpian ˈˈgblʋ̈gblʋ̈ ˗nu ˗wo ˗yiishiö. ˈYö ˈnën ˈwo ˗tɔ plasima, globilö ˈˈpuu, globilö ˗zɔɔndhö waa plakɛtö. ꞊Ɲɔɔn ˈˈpian ˈˈgblʋ̈gblʋ̈ ˗nu ˈwo bhë, ˗wo ꞊mɔɔn˗ ˗bha ˈwo ˗an ˗kankoo ˈö˗ ˈˈpian ˈsɛɛn˗ ꞊va go ˗an ˈgü. *

Kletiɛn ˗nu ˈwaa ˈˈwɩɩ˗ ˗bha kö ˗wo ꞊ɲɔɔn ˗todhʋ̈sü ɛɛnˈˈ ˗a ˈˈpian ˈˈgblʋ̈gblʋ̈ ˗yiishiö do ˗da wo ˈgü. ˈˈKɛɛ ˗wo ꞊mɔɔn˗ ˗bha ˗wa ˈˈpian ˈsɛɛn˗ ˗nu ˈsü ˗ee? Biblö yö ˈti pë ꞊dede ˈwo ˗dho ˗a kë ˗a blɛɛˈˈ. Kletiɛn ˈdhɛ ˈö ˈdhö, pë ˈö ˗dho ˗a kë ˈwɔn bhë ˗a ˈgü, ˗yö ˗sü ˗a zuʋ̈ga ˈö˗ ꞊dɔɔ Biblö ˈka bhë, ˗a ˗bha.

Kletiɛn ˈbhaa ˗nu ˗wo ˗kɔ ꞊ɲɔɔn ˈˈpian ˈsɛɛn˗ suu ˈˈpɛpɛ ˈka. ˗Wo ꞊mɔɔn˗ ˗bha ˈwo˗ pö ˈtɔŋ˗ ˈö ˗Zlan ˗ya dɔ Izraɛdhömɛn ˗nu ˗ta ꞊kwɛŋzü, ˗ya ˗pö ˗a ˈgü ꞊dhɛ ˗wo wü ꞊ɲɔɔn ˈö go ˗a ˈgü ˗a «꞊wɛnŋ ˈˈshia˗.»​—Deutéronome 12:22-24.

Kletiɛn ˈbhaa ˗nu ˈö ˗an zuʋ̈ga ˈyii za dɔ ˗an ˗bha, ˗wo ꞊ɲɔɔn ˈˈpian ˈsɛɛn˗ ˗nu ˗da wo ˈgü. ˗An ˗bhaa ˈgü mɛn ɛɛnˈˈ wü ˗bha ˗këdhösü ˈyaa ꞊kun ˗a ꞊ɲɔɔn ˈˈpian ˈsɛɛn˗ ˗nu bhë ˗an ˈgü ˈzüdho.

꞊Ya kë ꞊dhɛ kwa˗ ˈˈpiʋ̈ ˈkwa ꞊ɲɔɔn ˈˈpian ˈsɛɛn˗ ˗nu ˈsü, ˗kwa dhɛɛˈˈ ˗nu ˈwo yö ˗an ˗yɔ bɔ:

•   A˗ ˈwɔn ˗dɔ ꞊dhɛ ˈman ˗kɔ ꞊ɲɔɔn ˈˈpian ˈsɛɛn˗ ˗nu ˈka, kö ˈman ˗kɔ blɛɛdhɛ ˈbhaa ˗nu ˈwo mɛn ˈˈdhɛkë ɛɛnˈˈ ˈwo ꞊ɲɔɔn ˗bha bhɔsü ˈduaannu ˗an ˈka ˗ee?

• ˈPë ˈö ˗kë ˈa ˗kɔ ꞊ɲɔɔn ˈˈpian ˈsɛɛn˗ do ɛɛnˈˈ ˗a ꞊va ˈsü ˗sü ˈka ɛɛnˈˈ ˈzü ˈa ˗we ˗a ˗bha, ˗a ˗dho ˗a ˈgü ˈˈpʋ ˗dhɔtrɔɔmi ˗dhɛ ˗kɔ ˗kë ꞊dhɛ?

Mɛn ˈˈdhɛkë ˗kɔ ˗nu. Kletiɛn ˗nu ˈkwaa kwa ꞊ɲɔɔn nu mɛn ˗nu ˗dhɛ ɛɛnˈˈ ˈkwaa kwa ˗de ꞊ɲɔɔn bho kwa ˈgü kö ˈkwa˗ ˈduaannu pë ˈgü kö ˗wa kwa ˈˈpɛ ˗wa ˗da kwa ˈgü ˈzü. ˈˈKɛɛ, mɛn ˈˈdhɛkë ˗kɔ ˈbhaa ˗nu ˗wo ˗dhö ˈö ˈwo ꞊mɔɔn˗ ˗bha ˈwo yökë ˈˈyuamɛn ˗de ꞊ɲɔɔn ˈka. Kletiɛn ˈö ˈdhö, yö ˈnën˗ dua ˈdhö ˗mü kö ˈpë ˈwo ˗dho ˗a kë ˗a ꞊ɲɔɔn ˈka ˗a ˈˈpɛ ˗sü, ˗a ˗ga ˗sü waa˗ ˈˈdhɛkë ˗sü ˈgü, ˗ya ˗pö. ˈˈTʋ̈ŋ ˗nu bhë˗ ˈka, ˗wo ꞊mɔɔn˗ ˗bha ˈwo˗ ꞊ɲɔɔn bho ˗a ˈgü, ˈwo˗ dɔ pë ˈgü ˈˈtʋ̈ŋ ˈnën ˈbha ˈˈpiʋ̈.​—ˈBha˗ pö ˈü˗ ˈbhaa ˈgüman, ˗bhö kpɔɔˈˈ ˗kwɛ 2000 Ɔtɔblö 15 ˗bha La Tour de Garde, ˈˈpian 30-31 ˗nu ˗ta.

˗A ˈwɔnzuan do ˈbha ˈnën ˗tɔ mɛn ˈˈdhɛkë ˗kɔ ˈö ˈwo ˈˈyi ˗da ˗a ꞊ɲɔɔn ˈˈpiʋ̈. ˗Dhɔtrɔɔ ˈbhaa ˗nu ꞊waa˗ pö ˈwo mɛn ˈˈpɛ, ˗wa ˗mɛn ꞊ɲɔɔn ˈbha ˗bho ˗a ˈgü, ˈyö ˈwo ˈˈyi ˗da ˗a ꞊ʒiaan˗ ˈgü. ˗A ˈˈpɛ ˈˈtʋ̈ŋ ˈka ɛɛnˈˈ ˈzü ꞊wa ɲën ˗a ˗bha, ˈyö ˈwo˗ ꞊ɲɔɔn bhë ˗a ˗da ˗a ˈgü ˈzü.

 ˗A ˈˈslö do ˈbhaa ˈnën ˗tɔ ˈzü ˗wo mɛn ˈˈpɛ ˗ni ˈgü, ˗a ꞊ɲɔɔn ˈö ꞊wɛnŋ ˗ni bhë, ˈyö ˈwo˗ sü ˈwo˗ ˗zu. ˗Wa wo bo ˗a ˈˈpɛ ˗sü ˈka, ˈyö ˈwo˗ ˗da ˗a ˈgü ˈzü.

˗Dhɔtrɔɔ ˈdhɛ ˈö ˈdhö ˗a ˗bha mɛn ˈˈdhɛkë ˗kɔ ˈö ˗gban ꞊ɲɔɔn ˗bha ˗yö ˗dhö. ˈDhɛ ˈö ˈˈdhʋ̈, kletiɛn ˈö ˗we ö ˈˈpɛ ˗sü, ö ˗ga ˗sü ɛɛnˈˈ ö ˈˈdhɛkë ˗kɔ ˈbha ˗bha, ˗a dua ˗mü kö ˈpë ˈwo ˗dho ˗a kë ˗a ꞊ɲɔɔn ˈka, ˗ya dɔ ˈkpakpadhö.

Ü ˈˈdhɛkësü ˈö ˗gban ü ꞊ɲɔɔn ˗bha, ꞊waa˗ pö ˈwo˗ kë, dhɛɛˈˈ ˗nu ˈwo yö, ˗bhö ü ˗zota ˗an ˗yɔ ˗nu ˈgü:

• ꞊Ya kë ꞊dhɛ ˗wa n ꞊ɲɔɔn bɔ pë ˈbha ˈgü, kö ˗yö ˈˈtʋ̈ŋ ˈnën ˈbha kë mü, kö ˗yö ˈgo mü ˈzü ˗yö ˗da n kwi ˈgü, n zuʋ̈ga ˗dho ˗a ˈsü ꞊dhɛ ꞊ɲɔɔn ˈö ꞊kun n ˈgü ˗kplawo ˗a ˈdhö ˗ee? Yö ˈti ˗dho za dɔ n ˗bha ꞊dhɛ n dua ˗mü kö ˈa˗ «꞊wɛnŋ ˈˈshia˗» ˗ee?​—Deutéronome 12:23, 24.

• ˗Wa n ꞊ɲɔɔn pëëˈˈ bho n ˈgü, ˗wa pë ˈbha kaanˈˈ ˗a ˈka, ꞊waa˗ pö ˈwo˗ ˗da n ˈgü ˈzü ɛɛnˈˈ ˈwo˗ yö man bhuöö ˈgü, n zuʋ̈ga ˈö Biblö ꞊yaa˗ dɔɔˈˈ bhë, yö ˈti ˗dho za dɔ n ˗bha ˗ee?

• A˗ ˈgüman ꞊dhɛ ˈman ˗kɔ ˈˈdhɛkë ˗kɔ ˈˈpɛpɛ ˈö ˗gban yökë n ꞊ɲɔɔn ˈka ˗sü ˗bha bhë ˗an ˈka, kö ˈman ˗kɔ ˈpö n ꞊ɲɔɔn ˗ga ˗sü, n ꞊ɲɔɔn ˈˈzu ˗sü ɛɛnˈˈ parɛ ˈö ˈwo ˗të ˗a ˈgü bhë ˗an ˈka ˗ee?

ˈKwa˗ pö ˈkwa kwa ˗kɔ ˈˈyɛ kwa ˈˈdhɛkë ˗kɔ ˈbha ˈö ꞊ɲɔɔn ˈˈpian ˈsɛɛn˗ ˈsü  ˗sü ˗wɔn ˈdhö˗ ˈgü ɛɛnˈˈ ˈwo ˗dho yökë kwa ꞊ɲɔɔn ˈka ˗a ˗bha, ˗kwa bhɛɛˈˈ Zoova ˗dhɛ kö ˗yö ˈˈdhiʋ̈sü kwa ˈka. ˗Kwa ˈwɔn ˗nu ˈwo ˗gban ˗a ˗bha ˗an ˈˈpiʋ̈ ˈpɔn ˗së ˈka. (Zakö 1:5, 6) ꞊Ya ˈgo mü, kwa zuʋ̈ga ˈö Biblö ꞊yaa˗ dɔɔˈˈ bhë, ˗kwa ˈwɔn yö ˈko ˈˈdhiʋ̈ ˗a ˈka, kö ˈkwa ˗da ʒiaan ˗së ˗ta. Kwa ˈti ˗dho mɛn ˈˈwɛɛ ˗nu dhɛɛˈˈ ˈkpɔ ꞊dhɛ ˈwɔn ˈö kwa ˗bha bhë wo ˈnën ˈwo˗ ˈgü ˗be, ˈmën ˈwo ˗dho ˗a kë. Mɛn ˈˈwɛɛ ˗nu dua ˈyaa ˗mü ˈpö kö ˗wo kwa ˗blü ˈwɔn ˈbha kë ˗sü ˗bha.​—Wlɔmö 14:12; Gadhatö 6:5.

▸ ˈWɔn ˗gɔ 7, ˗wo ˗bhuöö kpö 11

ˈˈTa ˗kɔ ˗së ˈnën ˗tɔ ˈˈta ˗kɔ waa ˈwɔn kë ˗kɔ ˗nu ˈwo ˗dhi ˗Zlan ˗dhɛ. ˈˈTa ˗kɔ ˗së ˈö ˈˈdhʋ̈, ˗yö ˗gban kwa ˗zotagüwɔn ˗nu, kwa blɛɛˈˈ ˗wɔn ˗nu waa kwa këwɔn ˗nu ˗bha. Zoova ˗ya ˗pö ˈkwa ˈˈkan ˈˈɲangüyaa kë ˗kɔ ˈˈpɛpɛ ˗bha. (Proverbes 1:10; 3:1) Kwa ˈti ˗dho kwa ˈˈɲan ˈto kö ˈwɔn yaa kë ˗sü ˈgüdandhe ˗yö nu kwa ˗ta kö ˈkwa ꞊kun kwa ˗zota ˗kɔ ˈö ˈkwa ˗dho Zoova ˗bha ˈtɔŋ˗ ˈˈslʋ̈ʋ̈slʋ̈ ˗nu ꞊bhlëë ˗ya ˗a ˗bha, ˗a ˈgü. Kwa dua ˗mü kö ˈkwa bhɛɛˈˈ ˗Zlan ˗dhɛ ˗kplawo kö ˗yö kwa ˗takun kö kwa zuʋ̈piʋ̈dhɛ ˗yö kë ˈˈslʋ̈ʋ̈slʋ̈, kö ˈkwa pë ˈˈpɛpɛ kë ˈkwa ˈˈkan ˈˈɲangüyaa ˗bha.​—1 Kodhɛngtö 6:9, 10, 18; Efɛzö 5:5.

▸ ˈWɔn ˗gɔ 8, ˗wo ˗bhuöö kpö 11

ˈMɛn ˈö˗ këwɔn ˈdhö ˈyaa˗, ˗yö ˗Zlan ˗bha ˈtɔŋ˗ ˗nu ꞊lögü ö ˈwɔn blɛɛˈˈ ˗kɔ waa ö ˈwɔn kë ˗kɔ ˗nu ˈgü, ˈö˗ ˗kë ˈˈdhʋ̈ ˗sü ˈlëë˗ ˈyaa˗ kë. ˈMɛn ˈö ˈˈdhʋ̈, ˗ya ˗zɔn ꞊dhɛ ˈyaa ˗Zlan ˗bha ˈtɔŋ˗ ˗nu ꞊bhlëë ˗ya. ˈMɛn ˈö ˈwɔn ˗nu bhë ˗an ˗kë, mɛn zii ˗nu ˈö za ˈdhö ˗an ꞊kwɛɛ˗ ˗wo ˗dho ˗a ˗takun. ꞊Waa˗ pö ˗dhiipë ˗nu kö ˗wo ˗we ˈwɔn yaa ꞊va ˈka. Mɛn ˈbha ˗ya ˗dhiipë ꞊gbɔɔnsü ˈbha kë, mɛn zii ˗nu ˈwo ˗zlanwokɔɔdhö, ˗a mɛn ˗yaaga ɛɛnˈˈ ˈö ˈwo ˗ʒiö mü, ˗wo ˗da ˈˈkwɩɩ ˈö ˈwo˗ ˈˈɲan bhɔ.​—Gadhatö 5:19-21; Efɛzö 4:19. ˈBha˗ pö ˈü˗ ˈbhaa ˈgüman, ˗bhö kpɔɔˈˈ «Questions des lecteurs» ˈö ˗kwɛ 2006, Ʒue 15 ˗bha La Tour de Garde ˈgü bhë, ˗a ˗bha.

▸ ˈWɔn ˗gɔ 9, ˗wo ˗bhuöö kpö 7; ˈWɔn ˗gɔ 12, ˗wo ˗bhuöö kpö 10

Zoova ˈnën gɔɔn˗ waa ö ˗bha dhebɔ ˗an ˗bha sɛɛˈˈ ˗bha ˗kë do ˗sü ˗da. ˗Ya ˗kë ˈˈdhʋ̈ kö ˗wo bɔ ˗a ˗ta ˈˈslʋ̈ʋ̈slʋ̈ ˈka, kö ˗wa ˗zɔn ꞊dhɛ ˗an ˈko ˗nu ˗dhɔ ˗yö ˗an ˈko ˗kë. Kö mɛn ˈbha ˗yö trʋʋˈˈ kë ö gɔndhɛ ɛɛnˈˈ ö dhedhɛ ˈka, kö ˈö˗ din yö, kö ˗ya ˈwɔn ˗dhiisü kë. ˈWɔn suu ˈö bhë, ˗yö ꞊mɔɔn˗ ˗bha ˈö mɛn waa Zoova ˗an ˗bha ˗mlɛɛn ꞊shiʋ̈. ˗Yö ꞊mɔɔn˗ ˗bha ˈö˗ ˗mɛn ˗bha ˗zotadhe kë ˈyaa˗, ˈö ˗kɔ ˈö dhe waa gɔn ˗an ˗bha sɛɛˈˈ ˗bha ˗kë do ˗sü yö ˗a ˈka, ˈyaa kë ˗së. (Kodhɔsö 3:5) Mɛn ˈö˗ ˗kɔ ˈdhö ˗dhiipë bhë ˗a ˈgü, ˈö ˗kan ˗a ˗bha ˗sü ꞊ya kë ˗a ˗gɔ ˈˈgbɩɩ˗, ˗a dua ˈyaa ˗mü kö ˗a ˈgü ˗yö ga. (Psaume 86:5; 1 Zan 3:20) ꞊Ya kë ꞊dhɛ ˗yö ˗kë ü ˈka ˈˈdhʋ̈, ˗a pö Zoova ˗dhɛ ˗yö ü ˗takun. ˗Bhö ˈˈkan pë ˗nu ˈwo ˗kë ꞊dhɛ mɛn ˈkpee˗ ˈˈbin ˗ga ˗sü ˗nu ˈdhö ˈö ˈwo ˗zotadhe yaa nu mɛn ˗dhɛ bhë, ˗an bha. ˗Bhö ˗a blɛɛˈˈ ü ˈkpɔmɛn ˈö kletiɛn ˈka ɛɛnˈˈ ü ˈˈtɔŋdë do ˈö Zoova ˗bha ˈtɔŋ˗ ꞊bhlëë ˗ya, ˈö ˗kiansü ˈka ˗a ˗dhɛ. (Proverbes 1:8, 9; 1 Tesadhonikö 5:14; Titö 2:3-5) ˗Yö kë ü ˈˈɲaan ꞊dhɛ Zoova ˗yö ü ˗bha ˈgüdɔgbɩɩsü kö ˈü ˈto ˈˈslʋ̈ʋ̈slʋ̈ bhë ˗a ˗yö.​—Psaume 51:17; Isaïe 1:18.

▸ ˈWɔn ˗gɔ 9, ˗wo ˗bhuöö kpö 9

Wɔkɔ ˈbha ˗nu ˈgü, gɔɔn˗ do ˗bha dhebɔ ˗nu ˗wo ˗kë ꞊va. ˈˈKɛɛ Zoova ˗zë ˗ya ˈˈpiʋ̈ kö gɔɔn˗ ˗bha dhebɔ ˗yö kë do, kö dhebɔ ꞊gɔn ˗yö kë do ˈpö. Izraɛdhö ˈˈsɛ ˈgü ꞊kwɛŋzü, ˗Zlan ˗yö ö ˗kwaa gɔɔn˗ ˗nu ˗zü ˈö ˈwo dhe ꞊va sü, ˈˈkɛɛ pë ˈö˗ ˈˈpiʋ̈ ˗be ˈyaa ˈnën bhë. ꞊Dɛɛ, Zoova ˈyaa˗ ˈˈpiʋ̈ kö ö ˗dhɔkëmɛn ˗nu ˗wo dhe ꞊va ˈsü. Gɔɔn˗ dua ˗mü kö ˗a ˗bha dhe ˗yö kë do, kö dhebɔ ˗de ˈpö ˗a ꞊gɔn ˗yö kë do.​—Matiö 19:9; 1 Timote 3:2.

▸ ˈWɔn ˗gɔ 10, ˗wo ˗bhuöö kpö 12

ˈÖ˗ ˗bhɔ ˈˈdhʋ̈ ˈˈsɛ züdɔyi ˈka, Zoova ˗ya ˈˈpiʋ̈ kö gɔɔn˗ waa ö ˗bha dhebɔ ˗wo ˈto wo ˈko ˈˈpiʋ̈ ˗kplawo. (ˈWunzüdɔdhɛ 2:24;  Malachie 2:15, 16; Matiö 19:3-6; 1 Kodhɛngtö 7:39) Pë do ˈö˗ ˗wɔn ˈgü ˈö ˗we ˗a ˗bha kö gɔɔn˗ ˗yö dhe bho ˈˈblü ɛɛnˈˈ kö dhebɔ ˗yö ˈgo gwaan˗ ˗bha ˈyö ˗tɔ ˗a mɛn do ˗bha ˈˈɲangüyaa kë ˗sü. Mɛn ˈö˗ ꞊gɔn ɛɛnˈˈ ˗a ˗bha dhebɔ ˗yö ˈˈɲangüyaa ˗kë, ˗ya dhi ˗a ˗dhɛ ˗yö ꞊mɔɔn˗ ˗bha ˈö˗ bho ˈˈblü ɛɛnˈˈ ˈö go ˗a ˗gɔ. Zoova ˗yö ˗we ˗a ˗bha kö ˗ya kë ˈˈdhʋ̈.​—Matiö 19:9.

꞊Ya kë ꞊shiö, kletiɛn ˈbhaa ˗nu ˗wo ˗kan wo ˗bha dhebɔ ɛɛnˈˈ wo ꞊gɔn ˗bha ˈˈkɛɛ kö yö ˈti ˈˈɲangüyaa kë. (1 Kodhɛngtö 7:11) ˈWɔn ˗nu ˈö ˗an ˗wɔn ˈgü ˈö kletiɛn ꞊mɔɔn˗ ˗bha ˈö ˗kan ö ꞊gɔn ɛɛnˈˈ ö ˗bha dhebɔ ˗bha, ˗a ˈbhaa ˗nu ˈnën ˈwo yö:

• Gɔɔn˗ ˈö ˈyaa ˈˈwɩ˗ ˗bha ˈö ö ˗zokë ö ˗bha ˈkɔdhigümɛn ˗nu ˈˈpiʋ̈: ˈPë ˈkɔdhigümɛn ˗nu ˗bhawɔn ˈdhö˗ ˗bha, ˈkɔdë yö ˈti˗ mɛɛnˈˈ, kö ˗wo kë ˈˈflɛɛsü ꞊gbɔɔnsü, ˈö ˗bhöpë ˈyaa ˗an gɔ, dhebɔ ꞊mɔɔn˗ ˗bha ˈö ˗kan ˗a ˗bha.​—1 Timote 5:8.

• Pë ˈˈdhiʋ̈˗ ˗kë wo ˈko ˈka ˗sü: Yö ˈnën ˗tɔ mɛn ˗mansü ɛɛnˈˈ mɛn ˗gi ˗sü. Mɛn ˈö˗ ꞊gɔn ɛɛnˈˈ ˗a ˗bha dhebɔ ˗ya ˗kë ˈˈdhʋ̈, ꞊yaa˗ yö ꞊dhɛ ˗yö ꞊mɔɔn˗ ˗bha ˈö ö zë, ˗yö ꞊mɔɔn˗ ˗bha ˈö dho.​—Gadhatö 5:19-21.

• Pë ˈö ˗dho mɛn waa Zoova ˗an ˗bha ˗mlɛɛn shiʋ̈ˈˈ: Kletiɛn ˈö˗ ꞊gɔn ɛɛnˈˈ ˗a ˗bha dhebɔ ˗ya pö gboŋgboŋdhö ˈö˗ ˗kɔ bho Zoova ˗dhɔkësü ˗bha, ˗yö ꞊mɔɔn˗ ˗bha ˈö ˗kan ˗a ˗bha.​—Këwɔn ˗nu 5:29.

▸ ˈWɔn ˗gɔ 11, ˗wo ˗bhuöö kpö 19

˗Wa kwa ˈˈnuɛ bho, ˗wa kwa ꞊faanmën, ˗yö ˗kë kwa ˗dhɛ ˗së. (Proverbes 12:25; 16:24). ˈDhɛ ˈö ˈˈdhʋ̈, kwa ꞊mɔɔn˗ ˗bha ˈkwa kwa ˈko ˗nu ꞊faan dɔ, ˈkwa kwa ˈko ˗nu ˗zogban ˈˈdhiwo ˈˈnɛɛnnɛn ˗nu ˈka. ˈKö ˗kë ꞊dhɛ kwa ꞊dhegblü ˗nu ˗wo bɔ ˗ni ˈwɔn ˈˈgbɩɩ˗ ˗nu ˈgü, kwa ˈˈdhiwo ˈˈnɛɛnnɛn ꞊mɔɔn˗ ˗bha ˈö ˗an zuʋ̈ˈˈ ˗kë ˗saa, ˈö ˈwo ˗klu Zoova ˗bha. (Proverbes 12:18; Fidhipö 2:1-4) Kwa ꞊dhegblü ˈbha ˈgü ˗ya ga, ˗kwa kwa ˈˈtʋ ˈto ˗a ˗bha ˗së ˈka, kö ˈkwa˗ ˈˈslö mɛɛnˈˈ ˈkwa˗ zuʋ̈piʋ̈wɔn dɔ. ˈKwa˗ kë ˈˈdhʋ̈, ˈpë ˈkwa ˗dho ˗a pö ɛɛnˈˈ ˈkwa ˗dho ˗a kë kö ˗ya ˗takun, kwa ˗dho ˗a dɔ. (Zakö 1:19) ˗Bhö pë ˈˈpɛpɛ kë kö ˈü ü ꞊dhegblü ˗nu dɔ ˗së ˈka, kö pë ˗nu ˈö ˗an ˗bhawɔn ˈdhö ˗an ˗bha ˈü˗ dɔ. ꞊Ya kë ˈˈdhʋ̈, ü ˗dho ˗an ˗takun kö ˗wo ꞊ɲɔɔn ˗Zlan ˈö mɛn  ˗zogban, ˈö mɛn ꞊faanmën, ˈö mɛn zuʋ̈ˈˈ ˗kë ˗saa ꞊dedewo bhë ˗a ˗bha.​—2 Kodhɛngtö 1:3, 4; 1 Tesadhonikö 5:11.

▸ ˈWɔn ˗gɔ 12, ˗wo ˗bhuöö kpö 16

Biblö yö ˈti ˈtɔŋ˗ ˗nu ˈwo ˗gban ˈkosü ˈwlaan˗ ˗nu ˗bha ˗an dɔ. Wɔkɔ waa ˈtɔŋ˗ ˗nu ˈwo ˗gban ˈkosü ˈwlaan˗ ˗nu ˗bha ˈwaa do ˈˈsɛ ꞊gban ˈgü. (ˈWunzüdɔdhɛ 24:67; Matiö 1:24; 25:10; Dhukö 14:8) Pë ˈö˗ ˗wɔn ˈdhö ˈˈgbɩɩ˗ ˈkosümɛn ˗nu ˗gɔ ˗an ˗bha ˈkosü ˗yi ˈka, ˈyö ˗tɔ wo ˗wo ˈwo˗ ˗bhö Zoova ˈwëëdhö. ˈKosümɛn ꞊vadhɛ ˗nu ˗wo wo ˗wo ˗bhö wo ˗bha ˈkɔdhigümɛn ˗nu waa wo ˈˈtɔŋdë ˗nu ˈˈɲan ˈˈdhiʋ̈. ꞊Ya ˈgo mü, ˈyö ˈwo˗ pö mɛn zii do ˗dhɛ ˗yö ˈˈdhɛɛtadhiaŋ˗ ˈö ˗gban Biblö ˗ta ˗a zë kö ˗yö wo ꞊faanmën. ꞊Ya kë ꞊dhɛ trʋʋˈˈ ˗nu, ˗bhöpë ˗nu ˗wo ˗dho kë ˗mü, ˗yö ˗dho ˈsü ˈkosümɛn ˗nu ˗bha. (Dhukö 14:28; Zan 2:1-11) ꞊Waa˗ pö ˈwo wo ˗bha ˈkosü ˈwlaan˗ kë, ˗an dua ˗mü kö ˗wo pë ˈˈpɛpɛ kë kö ˗yö Zoova ˈtɔ bhɔ. (ˈWunzüdɔdhɛ 2:18-24; Matiö 19:5, 6) Biblö ˗bha ˈtɔŋ˗ ˗gɛngbandhɛ ˗nu ˗dho ˗an ˗takun kö ˗wo ˈwɔn ˗së kë. (1 Zan 2:16, 17) ꞊Waa˗ pö we ˈˈgbɩɩ˗ ˗yö kë mü, ˗an dua ˗mü kö ˗wo wo ˗kɔ ˈˈyɛ mɛn ˈbha ˗bha kö ˗yö ö ˗zokë ˗a ˈwlaan˗ ˈˈpiʋ̈. (Proverbes 20:1; Efɛzö 5:18) ꞊Ya kë ꞊dhɛ ˈˈtan waa trʋʋkësü ˗nu ˗wo mü, ˗wo kë Zoova ˈtɔ bhɔ trʋʋˈˈ ˗nu ˈka. ˈKosümɛn ˗nu dua ˗mü kö ˗wo waa Zoova wo ˗bha ˗mlɛɛn ˗wɔn ˈkun ˈˈgbɩɩ˗, kö ˗wo wo ˈˈtʋ̈ŋ kë wo ˗bha ˈkosüsü ˈgü kö ˗yö ʒio˗ ˈka ˗a ˈwlaan˗ kë ˗yi ˗ta.​—Proverbes 18:22; ˈbha˗ pö ˈü ˗dhioo ˈbhaa ˗nu man, ˗bhö kpɔɔˈˈ ˗kwɛ 2006 Ɔtɔblö 15 ˗bha La Tour de garde ˈˈpian 18-31 ˗ta.

▸ ˈWɔn ˗gɔ 13, ˗wo ˗bhuöö kpö 18

Kwa˗ ˈˈpiʋ̈ ˈkwa bɔ ˈtɔŋ˗ ˗gɛngbandhɛ ˗nu ˈwo ˗Zlan ˗Wo ˈgü ˗an ˗ta kö ˈkwa ˗da ˈwɔn ˗së ˗nu ˗ʒian ˗ta. ˗A ˈwɔnzuan ˈnën ˗tɔ kletiɛn ˗bha dhebɔ ɛɛnˈˈ ˗a ꞊gɔn ˈö ˈyaa Zoova ˗dhɔkëmɛn ˈka, ˗yö ꞊mɔɔn˗ ˗bha ˈö˗ ˗dhɛ kö ˈwo ˈdho wo ˗bha mɛn ˗nu ˈˈpiʋ̈, kö ˈwo pë ˗bhö wo ˈkwëë˗ ˈˈkpɔnŋtaamɛn ˗nu ˗bha ˈwlaan˗ yi ˈka. ꞊Ya kë ü ˈka, ü ˗dho ˗a kë ꞊dhɛ? Ü zuʋ̈ˈˈ ˗ya ˈˈwɩ ˈdho ˗sü ˗bha, ü ꞊mɔɔn˗ ˗bha ˈü˗ ˈgü ˗pʋ ˗a ˗dhɛ ˗së ˈka ꞊dhɛ kö ˗wo paɛn ˗nu ˗bha wɔkɔ ˈbhaa ˗nu kë mü, ü ˈti ˗dho ü ˗kɔ ˗da  ˗a ˈgü. Ü ꞊mɔɔn˗ ˗bha ˈü ü ˗de dhɛɛˈˈ kpɔ ˈzü ꞊dhɛ, ˈbha ˈdho mü, yö ˈti ˗dho ü ꞊dhegblü kletiɛn ˗nu ˗gɛn ˈˈdhiʋ̈ ˗zuö ˗ee?​—1 Kodhɛngtö 8:9; 10:23, 24.

˗A ˈwɔnzuan do ˈbha ꞊nɛn: Ü ˗bha yö ˈˈdhiʋ̈, ü ˗gɔmɛn ꞊mɔɔn˗ ˗bha ˈö gbɔɔ ˗kë ü ˗dhɛ ˗kwɛ ˗yökodhiʋ̈ ˈˈtʋ̈ŋ ˈgü. Ü ˗dho ˗kɔ ˗a ˈka ˗ee? ˈˈGbɩɩdhɛ ˈyaa ˗mü kö ˈü ˗kɔ ˗a ˈka. ˗We ˗a ˗bha ˗sü ɛɛnˈˈ ˗kɔ ˗a ˈka ˗sü ˗dho ˈsü ü ˗gɔmɛn ˗bha ˈwɔn yö ˗kɔ ˗bha. ˈBha ˈˈwɩ ˗a ˗bha, ˗yö ˗dho ˗a yö ꞊dhɛ ü ˈwlaan˗ bhë ˗a ˗kë ˗ee? Ɛɛnˈˈ ˗a ˗bha yökëmɛn ˗nu ˈˈnuɛ bho ˗kɔ ˗mü ˗ee? ˈBha ü ˗zota ˗së ˈka ˗a ˈgü, ˈyö pë ˈü ˗dho ˗a kë ˈü˗ dɔ.

Mɛn ˈbha ꞊mɔɔn˗ ˗bha ˈzü ˈö gbɔɔkë ü ˗dhɛ ˈwlaan˗ yi ˈka, ˈö˗ pö: «A˗ ˈwɔn ˗dɔ ꞊dhɛ ˈbhaa ˈwlaan˗ ˈö yö ˗a kë, ˈˈkɛɛ a˗ ˈˈpiʋ̈ kö ˈpë yö ˈa˗ nu ü ˗dhɛ.» ˗A ˈbha ꞊ya kë kö ˈmɛn bhë ˈˈgblüsë ˈnën˗ ˗kë ü ˈka. Ü ˗dho ˗a pö ꞊dhɛ ˗ya ˗kë ˈˈdhʋ̈ kö ˈö ü ˈgüdan ɛɛnˈˈ kö ˈü ü ˗kɔ ˗da ˈwlaan˗ bhë ˗a kë ˗sü ˈgü ˗ee? ˈBha ü ˗zota ˗së ˈka, ˈyö pë ˈü ˗dho ˗a kë ˈü˗ dɔ. ˈWɔn ˈˈoo ˗wɔn ˈkwa ˗dho ˗a kë, kwa˗ ˈˈpiʋ̈ kwa zuʋ̈ˈˈ ˗yö ˈwaannu kö ˈkwa ˈto ˗klu ˗sü ˈka Zoova ˗bha.​—Këwɔn ˗nu 23:1.

▸ ˈWɔn ˗gɔ 13, ˗wo ˗bhuöö kpö 22

˗Wa ˈˈdhinaan ˈˈɲanbhɔ ˈˈvaandhö, ˗dhikodhɛ ˈgü, ˈyaa ˈˈgla ˈwɔn ˈkpii˗ ˈgü. (Matiö 5:23-26) Pë ˈö˗ ˗wɔn dho ˈˈgbɩɩ˗ kletiɛn ˗nu ˗gɔ ˈyö ˗tɔ Zoova ˈtɔ bhɔ ˗sü waa ˗zlanwokɔdhigümɛn ˗nu ˗kɔ ˗bha ˗kë ˈwɔn do ˗bha ˗sü.​—Zan 13:34, 35; 1 Kodhɛngtö 13:4, 5.

Kö ˈwëëga ˗wɔn ˗yö ˗da kletiɛn ˗nu ꞊zinŋgü, ˗an dua ˗mü kö ˗wa ˈˈɲanbhɔ wo ˈko ˈˈpiʋ̈, ˈwa ˗dho ˈdho wo ˈko ˈka ˈˈkwi ˈˈdhiʋ̈. 1 Kodhɛngtö 6:1-8 ˈgü, bɔmɛn Pɔdhö ˗yö ˈwɔn baaˈˈ ˗kɔ ˗dhioo ˗dɔ kletiɛn ˗nu ˗ta. Kö ˈkwa ˈdho kwa ˈko ˈka ˈˈkwi ˈˈdhiʋ̈, ˗yö ꞊mɔɔn˗ ˗bha ˈö Zoova waa ˗zlanwokɔdhi ˈtɔ ꞊shiʋ̈. ˈˈDhinaan suu ˈˈpɛpɛ ˗nu ˈwo ˗kë ꞊dhɛ ꞊sua ˗ya mɛn ˗bha ˗sü ɛɛnˈˈ ˗mɛn ˗tabhösü ˗nu ˈdhö bhë, pë ˗yaaga ˈö kletiɛn ˗nu dua ˈdhö ˗mü kö ˗wa kë, kö ˗wo ˗an ˈˈɲanbhɔ, Matiö 18:15-17 ˗yö ˗an ˗zɔn. (1) Mɛn ꞊plɛ ˈö ˈwɔn ˈdhö ˗an ꞊zinŋgü, ˗an dua ˗mü kö ˗wa ˈˈɲanbhɔ wo ˈkö ˈˈpiʋ̈ ꞊köŋ. (2) ꞊Ya kë ꞊dhɛ ˗an ˗wo ˈti ˗mɔn, ˗wo ꞊mɔɔn˗ ˗bha ˈwo ˗zlanwokɔdhigümɛn ˗kiansü do ɛɛnˈˈ ꞊plɛ ˗dhɛ kö ˗wo ˗an ˗takun. (3) ˈYii ˈwɔn ˈkun, ˗wo mɛn zii ˗nu ˗dhɛ kö ˗wa ˈˈɲanbhɔ. ꞊Ya kë ˈˈdhʋ̈, mɛn zii ˗nu ˗dho bɔ Biblö ˗bha ˈtɔŋ˗  ˗gɛngbandhɛ ˗nu ˗ta ˈwo ˗an ˗takun. ˗A ˈmɛn yö ˈti ˈˈwɩ Biblö ˗bha ˈtɔŋ˗ ˗nu ˗ya ꞊bhlëë ˈgü ˗sü ˗bha, mɛn zii ˗nu ꞊mɔɔn˗ ˗bha ˈwo zadɔ ˗a ˗bha.

ˈWɔn ˗nu ˈwo ˗kë ꞊dhɛ dhe ˗bho ˈˈblü ˗sü, ˈnën ˗bha ˗to ö ˗mɛn ˈˈpiʋ̈ ˗sü, ˗bhöpë ˗nu ˈnën ˗dhɛ ˗sü, asilansö ꞊saa bho ˗sü, soete ˗bha ˗puö ˗sü ɛɛnˈˈ ˈˈkɛnŋ˗ ˈsëëdhɛ ˗nu ˈdhö bhë, ˗a ˈbha ꞊ya kë ˈˈkwi ˗nu ˈnën ˈwo ˗an ˈˈɲanbhɔ. Kö kletiɛn do ˗yö ˈdho ˈwɔn suu ˗nu ˈwo bhë ˗an ˈka ˈˈkwi ˈˈdhiʋ̈ kö ˗wa ˈˈɲanbhɔ ˗së ˈka, kö yö ˈti Pɔdhö ˗bha ˗dhioo ꞊lögü.

ˈMɛn ˗wɔ mɛn ˈˈpiʋ̈ ˈˈgbɩɩdhɛ ˈka, ˈmɛn ꞊kwaan ˈkpii˗ wo, ˈmɛn ˈnën ˈˈtɩtɩ ˗wëë ˗kë wo, ˈmɛn ˈö mɛn zë ɛɛnˈˈ ˈö ˗da mɛn ˗ta, kö kletiɛn ˗ya yö, ˗a dua ˗mü kö ˗ya ˗zɔn ˈˈkwi ˗nu ˗dhɛ. ꞊Yaa˗ kë ˈˈdhʋ̈, kö yö ˈti Pɔdhö ˗bha ˗dhioo ꞊lögü.

▸ ˈWɔn ˗gɔ 14, ˗wo ˗bhuöö kpö 14

ˈÖ go Edɛnö ˈö yö˗ ˈka ꞊dɛɛ ˗bha, Sɔtraan ˗ya ˈˈslö ˗mɛɛn ˗kplawo kö ˈö ˈˈkpënŋ˗ kë mɛn ˗nu ˗gɔ. (ˈWunzüdɔdhɛ 3:1-6; ˗Dhɛkpaɔ dhiaˈˈ ˈsëëdhɛ 12:9) ˗Ya ˈwɔn ˗dɔ ꞊dhɛ ˈya kwa ˗zota ˗kɔ bho ˈˈglʋʋ, kwa ˗dho ˈwɔn yaa kë. (2 Kodhɛngtö 4:4; Zakö 1:14, 15) ˗A ˗wɔn ˈgü, ˗yö ˗bɔ ˈˈsɛ kɔɔˈˈ ˗wɔn, ˗zlanwo, ˈˈdhoodɔsü, trʋʋkësü, ꞊klaŋ kë ˗sü ˗nu waa pë ˈˈwɛɛ ˈbhaa ˗nu ˗ta kö ˗yö ö ˗zota ˗kɔ ˗pɛn, kö ˗yö kë mɛn ˗nu ˈgü ꞊dhɛ ˈwɔn ˗së ˈdhö.​—Zan 14:30; 1 Zan 5:19.

Sɔtraan ˗ya ˈwɔn ˗dɔ ˈzü ꞊dhɛ ˈˈtʋ̈ŋ ˈö ꞊kun ˈˈkpënŋ˗ kë ˗a ˈka mɛn ˗nu ˗gɔ bhë ˗ya ˈto ˈˈtɩɩ. ˗A ˗wɔn ˈgü, ˗yö pë ˈˈpɛpɛ kë ˗ni kö ˈö mɛn ꞊va ꞊slɔɔ. ˈMɛn ˈö˗ ˈˈpiʋ̈ ˈö ˈˈkpënŋ˗ kë ˗an ˗gɔ ꞊dedewo ˈyö ˈwo ˗tɔ Zoova ˗dhɔkëmɛn ˗nu. (˗Dhɛkpaɔ dhiaˈˈ ˈsëëdhɛ 12:12) Kwa ˈti˗ kë kwa ˈsuan˗ ˈka, Dügɔmɛn ˗dho kwa ˗zota ˗kɔ shiʋ̈ˈˈ ˈˈdhiʋ̈ ˈˈdhiʋ̈. (1 Kodhɛngtö 10:12). ˗A ˈwɔnzuan ˈnën ˗tɔ Zoova ˗ya ˈˈpiʋ̈ kö dhe waa ö ꞊gɔn ˗wo ˈto wo ˈko ˈˈpiʋ̈ ˗kplawo. (Matiö 19:5, 6, 9) ˈˈKɛɛ mɛn ꞊vadhɛ ˈwo ꞊dɛɛ, ˗wo ˈkosüsü ˗yö ꞊dhɛ ˈpë ˈwo ꞊mɔɔn˗ ˗bha kö ˗wa ˈˈkan ˈˈtʋ̈ŋ ˈˈpɛpɛ ˈka ˗a ˈdhö. Fimö waa tele ˗nu ˗wo ˈwɔn yö ˈkɔ suu ˈö bhë ˗a ˗dhɔ ˗da mɛn ˗nu ˈgü ˈpö. ˗Kwa kwa ˗de ˈkun ˈˈkpɔnŋtaamɛn ˗nu ˗bha ˈkosüsü yö ˗kɔ ˗bha.

Sɔtraan ˗bha ˈˈkpënŋ˗ ˈbha ˈnën ˗tɔ mɛn ˗nu ꞊faanmën ˗sü kö ˗wo  ˗gban ˈˈdhiʋ̈sümɛn ˗nu ˗gɔ. (2 Timote 3:4) Kwa ˈti˗ kë ˗së, kwa ˗dho mɛn ˗nu ˈö Zoova ˗yö ˗an ˗ya kö ˗wo ˈˈdhiʋ̈sü kwa ˈka bhë, ˗an ꞊bhlëë ˗shiö. ˗A ˈwɔnzuan ˈtɔ kwa ꞊dhegblü gɔɔn˗ ˈbha ꞊mɔɔn˗ ˗bha ˈö ˗gban mɛn zii ˗nu ˗gɔ. (Eblö 12:5) Ɛɛnˈˈ ˈzü kwa ꞊dhegblüdhe do ˗yö ꞊mɔɔn˗ ˗bha ˈpö ˈö˗ yö ꞊dhɛ Zoova ˗bha gɔɔn˗ ˗kë ˈkɔdë ˈka ˗sü bhë, ˈyaa ˗së.​—1 Kodhɛngtö 11:3.

Kwa dua ˗mü kö ˈkwa pë ˈˈpɛpɛ kë kö Dügɔmɛn ˈyaa ˗dho kwa ˗zota ˗kɔ bho ˈˈgblʋʋ. Kwa˗ ˈˈpiʋ̈ kö Zoova ˗zota ˗kɔ ˗yö kë kwa ˗gɔ, kö «[ˈKwa kwa] ˈyan ˗klu pë ˗nu ˈwo dhang˗ ˈgü bhë ˗an ˗bha.»​—Kodhɔsö 3:2, NTBL; 2 Kodhɛngtö 2:11.

▸ ˈWɔn ˗gɔ 16, ˗wo ˗bhuöö kpö 9

Mɛn ˈˈpɛpɛ kwa˗ ˈˈpiʋ̈ kö ˈkwa kë kwa ˈflëëgü ɛɛnˈˈ kö ˈˈyua ˗ya kwa kë, ˗wo kwa ˈˈdhɛkë ˗së ˈka. (Isaïe 38:21; Makö 5:25, 26; Dhukö 10:34) ꞊Dɛɛ, ˗dhɔtrɔɔ ˗nu ɛɛnˈˈ mɛndhɛkëmɛn ˗nu bhë, mɛn ˈˈdhɛkë ˗kɔ ˈˈslö ꞊va ꞊dede ˗yö ˗an ˗gɔ. ˈKwa˗ pö ˗wo kwa ˈˈdhɛkë, ˗kwa ˈto Biblö ˗bha ˈtɔŋ˗ ˗gɛngbandhɛ ˗nu ˈˈpiʋ̈. Kwa ˗zo ˈya ˗dho bhɔ ꞊dhɛ ˗Zlan ˗bha ˗Gblüdëdhɛ dosɛnŋ ˈnën ˗dho ˈˈyua ꞊gban ɲën. ˈKwaa˗ ˈˈpiʋ̈ kö ˈkwa kwa ˈˈɲan ˗klu kwa ˗bha ˗kë ˈflëëgüsü ˗bha kö ˗yö ʒiö ˗a ˈka Zoova ˗dhɔkë ˗sü ˗ta.​—Isaïe 33:24; 1 Timote 4:16.

˗Kwa ˈˈkan mɛn ˈˈdhɛkë ˗kɔ suu ˈˈpɛpɛ ˈö ˗zuu yaa ˗nu ˗kɔ ˈdhö ˗an ˈgü ˗an ˗bha. (Deutéronome 18:10-12; Isaïe 1:13) ˈDhɛ ˈö ˈˈdhʋ̈, ˈˈsanni ˈkwa ˈˈwɩ mɛn ˈˈdhɛkë ˗kɔ ɛɛnˈˈ blɛɛdhɛ ˈbha ˗bha, ˗kwa mɛn ˗nu dhɛɛˈˈ ˈkpɔ ˗së ˈka kö ˈkwa˗ ˈgodhɛ dɔ, kö ꞊ya kë ꞊dhɛ dü ˗kɔ ˈyaa˗ ˈgü, ˈkwa˗ ˈwɔn dɔ. (Proverbes 14:15) Kwa ˗zo ˈya ˗dho bhɔ ˈzü ꞊dhɛ Sɔtraan ˗ya ˈˈpiʋ̈ kö ˈö kwa ˗da dükësü ˈgü. ˈKwa˗ yö ꞊dhɛ mɛn ˈˈdhɛkë ˗kɔ ˈbha ˗yö ˗gban dü pë ˗bha, ˗kwa ˈˈkan ˗a ˗bha.​—1 Piɛdhö 5:8.

▸ ˈWɔn ˗gɔ 16, ˗wo ˗bhuöö kpö 18