ˈWƆN ˗GƆ 13
꞊Sua ˗zlanwo ˗nu ˗wa ˗Zlan ˈtɔ zë
꞊Waa˗ pö ˗dhɔ kö ˗wo ˗we ˗Zlan ˈka. ˈˈKɛɛ ˗zlanwo ꞊vadhɛ ˈgümɛn ˗nu ˈö ˈwo˗ pö wo ˗Zlan ˗bha yö ˗kë, ˗an ˗kɔ ˗yö ˈwɔn yaa ꞊va ˈgü. ˈMën ˗kë ˈö ˗kë ˈˈdhʋ̈? ˗A ˗gɛn ˗mü ꞊dhɛ ˗wo ꞊sua ˗zlanwo ˈgü. ˗Zlan ˈtɔ shiʋ̈ˈˈ ˗mɛn ˗nu ˗mü ˗an ˈka. ˗Wa ˗kë ˈˈdhʋ̈ ˗kɔ ˗kë ꞊dhɛ? ˗Kɔ ˗mɛɛn ˈö ˗Zlan ˗ya yö ˗a ˈka? ˗Yö ˗dho ˗a ˈˈɲanbhɔ ˗kɔ ˗kë ꞊dhɛ?
1. ꞊Sua ˗zlanwo ˈgümɛn ˗nu ˗wo ˗Zlan ˈtɔ ˗zë ˗an blɛɛwɔn ˗nu ˈgü ˗kɔ ˗kë ꞊dhɛ?
꞊Sua ˗zlanwo ˗gɔdhiʋ̈mɛn ˗nu ˗wo ‹tɛanwɔn ˈö go ˗Zlan ˈˈpiʋ̈ ˗a ˗gla ꞊sua ˈgü.› (Wlɔmö 1:25) ˗A ˈwɔnzuan ˈnën ˗tɔ ˗an ꞊vadhɛ ˈwaa ˗Zlan ˈtɔ ˗zɔn wo ˗bha ˗zlanwo ˈgümɛn ˗nu ˗dhɛ. ˈˈKɛɛ Biblö ˗ya ˗zɔn ꞊dhɛ kwa dua ˗mü kö ˈkwa ˗Zlan ˈtɔ pö. (Wlɔmö 10:13, 14) ˈWɔn ˈˈgbɩɩ˗ ˗nu ˗wa kë, ˈyö ˗zlanwo -gɔdhiʋ̈mɛn ˈbhaa ˗nu ˗wa pö ˗Zlan këwɔn ˗mü. ˈˈKɛɛ ꞊sua ˗mü, ˗Zlan ˈyaa ˈwɔn yaa kë toŋtoŋdhö. (Zakö 1:13, NTBL ˗wo pö.) ˈˈKɛɛ ˈwɔn yaa ˈö ˈdhö ˈyö ˗tɔ, ꞊sua ˗zlanwo ˗nu ꞊waa˗ kë mɛn ˗nu ˈgü ˗ya ga ˗Zlan ˗wɔn ˈka.
2. ꞊Sua ˗zlanwo ˈgümɛn ˗nu ˗wo ˗Zlan ˈtɔ ˗zë ˗an këwɔn ˗nu ˈgü ˗kɔ ˗kë ꞊dhɛ?
꞊Sua ˗zlanwo ˗gɔdhiʋ̈mɛn ˗nu ˈwaa mɛn ˗nu ˈkun ˗së ꞊dhɛ ˗kɔ ˈö Zoova ˗ya ˗kë ˗a ˈka ˗a ˈdhö. Biblö ˗ya ˗pö ꞊sua ˗zlanwo ˗nu ˗bha ꞊sɔŋ yaa ˗nu «˗lo ˈko ˗ta ˗sü ˗ta ꞊ya ˈdho ꞊ya ˗lo dhang˗ ˈgü.» (˗Dhɛkpaɔ dhiaˈˈ ˈsëëdhɛ 18:5, NTBL) ˈÖ ˗bhɔ ˈˈdhʋ̈ ꞊kwɛŋzü ꞊sua ˗zlanwo ˗nu ˗kɔ ˗yö ˈˈsɛkɔɔsü ˗nu waa ˗gblü gɔn ˗sü ˗nu ˈgü. ꞊Waa˗ kë mɛnbhɩɩdhe ꞊va ꞊dede ˗wa ga. ˗Zlanwo ˗gɔdhiʋ̈mɛn ˈbhaa ˗nu ˗wa ˈˈpiʋ̈ ˈwo kë ꞊bhɔɔsü. ˗A ˗wɔn ˈgü, ˗wo wo ˗bha ˗zlanwo ˈgümɛn ˗nu ˗tabhö. ˈWɔn ˗nu bhë -wa ˗zɔn ꞊dedewo ꞊dhɛ ˈwaa ˗Zlan dɔ. ˗A ˗dhɛ ˈyaa˗ ˗bha kö ˗wo kë ˗zlanwodhiʋ̈sümɛn ˗nu ˈka.—1 Zan 4:8 ˗wo pö.
3. Zoova ˗yö ꞊sua ˗zlanwo ˗yö ˗kɔ ˗kë ꞊dhɛ?
꞊Ya kë ꞊dhɛ ꞊sua ˗zlanwo ˗gɔdhiʋ̈mɛn ˗nu këwɔn ˗nu ˗yö ˈwɔn ˗shiö ü ˗dhɛ, ˈyö Zoova ˗zë ꞊wɛ? Mɛn ꞊gban ˈˈpɛpɛ ˗dhɔ ˗yö ˗Zlan ˗kë. ˈˈKɛɛ ˗zlanwo ˗gɔdhiʋ̈mɛn ˗nu ˈö ˈwo ˗Zlan ˈtɔ shiʋ̈ˈˈ ˗ni, ˈö ˈwo wo ˗bha ˗zlanwo ˈgümɛn ˗nu ˈˈklʋʋbhɔ ˗ni bhë, ˗wo ˈwɔn ˗shiö ˗a ˗dhɛ. ˗Ya ˗pö ꞊sua ˗zlanwo ˈgü ˗dho shiʋ̈ˈˈ ˈö ‹mɛ ˈbha ˈtii ˗dho ˗a yö ˈzü tongtongdhö.› (˗Dhɛkpaɔ dhiaˈˈ ˈsëëdhɛ 18:21) ˗A ˈˈtʋ̈ŋ ꞊ya ˈto ꞊klöö˗ kö ˗Zlan ˗yö ꞊sua ˗zlanwo ˈˈpɛpɛ bho ˈˈshia˗.—-Dhɛkpaɔ dhiaˈˈ ˈsëëdhɛ 18:8.
˗KAA ˈˈPIƲ̈ ˈPƆN
˗Kɔ ˈö ˗Zlan ˗yö ꞊sua ˗zlanwo yö ˗a ˗bha waa ˈwɔn ˈö ˗gban ˗an këwɔn ˗nu ˗bha, ˗kwaa ˈbhaa ˗ga. ˈˈKɛɛ ˈpë ˗kë ˈö ˈwɔn ˗nu bhë ˗an dua ˈyaa ˗mü kö ˗wo ü ˈˈkan Zoova dɔ ˗sü ˗bha, kwa ˗dho ˗a yö ˈpö.
4. ꞊Sua ˗zlanwo ˗nu ˈwaa ˗Zlan ˗dhɛ ˗së.
Mɛn ꞊vadhɛ ˗bha ˈgü, ˗zlanwo ˗nu ˗wo kë ˗sü ˈka ꞊dhɛ ʒiaanga ˈö ˗an ꞊gban ˈˈpɛpɛ ˗wo dho ˗Zlan ˈˈpiʋ̈ ˗a ˈdhö. ˈˈKɛɛ gagade ˗mü ˗ee? ˗Ka Matiö 7:13, 14, NTBL ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
-
˗Mën ˈö Biblö ˗ya pö ˈö ˗gban ˗toëpö ˗këdhösü ˗ʒian ˗bha?
˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.
-
Biblö ˗ya ˗pö ˗zlanwo ꞊dhɛ ˈö ˈwo ˗Zlan ˗dhɛ ˗së?
5. ˗Dhɔ ꞊dede ˈö go ˗Zlan ˈˈpiʋ̈ ˈyaa ꞊sua ˗zlanwo ˈgü.
꞊Sua ˗zlanwo ˗nu ˗wo ˗Zlan ˈtɔ ˗zë ˗kɔ ꞊va ˗ta. ˗A yaa do ˈnën ˗tɔ ö ˗kɔ ˗da ˗gblü ˗nu ˈgü ˗sü. ˈKa˗ pö ˈka˗ ˈwɔnzuan do dɔ, ˗kaa VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
-
˗Zlanwo ꞊vadhɛ ˗wo wo ˗kɔ ˗da ˈˈkpɔnŋ ꞊taa ˗gblü ˈkpii˗ ꞊plɛ ˗naan ˈgü ˗kɔ ˗kë ꞊dhɛ?
-
˗An ˗bha ˗kɔ ˗da ˗a ˈgü -sü ˈö ˈˈdhʋ̈, ü˗ ˗yö ˗kɔ ˗kë ꞊dhɛ?
˗Ka Zan 13:34, 35 waa 17:16 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
-
ˈBha ü ˗zota, ꞊sua ˗zlanwo ˗nu ꞊wa wo ˗kɔ ˗da ˗gblü ˗nu ˈgü ˗yö ˗kë Zoova ˈgü ˗kɔ ˗kë ꞊dhɛ?
-
꞊Sua ˗zlanwo ˗nu ˗wo ˈwɔn yaa ꞊va ꞊dede ˗kë. ˗Mën ˈü˗ yö ˗a ˗bha ꞊dhɛ wo ˈti ꞊mɔn ˗dhɔ ˈö go ˗Zlan ˈˈpiʋ̈ ˗a ˗zɔn ˗su ˗bha?
˗Dhɔ ꞊dede ˈö go ˗Zlan ˈˈpiʋ̈ ˈwaa˗ yö ꞊sua ˗zlanwo ˗nu ˈgü
6. ˗Zlan ˗ya ˈˈpiʋ̈ ˈö mɛn ˗nu ˗takun kö ˗wo ˈgo ꞊sua ˗zlanwo ˗gɔ ˈˈgan ˈgü.
˗Ka ˗Dhɛkpaɔ dhiaˈˈ ˈsëëdhɛ 18:4 ˗wo pö, a kö ˈka dhɛɛˈˈ ˈö yö ˗a ˗yɔ mɛɛnˈˈ:
-
˗A ˈwɔn dɔ ˗sü ˈö ꞊dhɛ ˗Zlan ˗ya ˈˈpiʋ̈ kö mɛn ˗nu ˈö ꞊sua ˗zlanwo ˗gɔdhiʋ̈mɛn ˗nu ˗wo ˈˈkpënŋ˗ ˗kë ˗an ˗gɔ ˈö ˗an ˗takun bhë, ˗yö ü ˈgü ˗kɔ ˗kë ꞊dhɛ?
7. ˗Zlan ꞊dede dɔ ˗sü draanˈˈ ˈü ˈdho ˗a ˈka ˈˈdhiʋ̈.
Ü dua ˗mü kö ˈü ˗Zlan yö ˈya˗ ꞊sua ˗zlanwo ˈgümɛn ˗nu këwɔn ˗nu waa ˗an blɛɛˈˈ ˗wɔn ˗nu ˗wɔn ˈgü ˗ee? Ü ˗zota ˈnën ˈö˗ dë ˗yö ˗dhioo ˗tiaandhö dɔ ˗a ˗ta, ˈö yö ˈti ö ˈˈtʋ ˈto ˗a ˗wo ˗bha ˗a ˈgü. ˈYö ˈnën ˈö bhë ˈö go ˈkɔɔ ˈö ˗ya ˗tosɛta yaa kë ˗sü ˗bha. ˗A ˈnën ˈˈtakɔ ˈö ˈˈdhʋ̈ ˈyaa˗ dë ˗dhɛ ˗së toŋtoŋdhö. Ü ˗bha ˈgü ˈnën dë ˈö bhë mɛn ˗nu dua ˗mü kö ˗wa yö ˈyaa˗ ˗a gbö ˈˈtakɔ ˗wɔn ˈgü ˗ee?
-
Kwa dua ˗mü kö ˈkwa ˗Zlan yö ˈya˗, kö ˈkwa ˈˈkan ˗a dɔ ˗sü ˗bha ꞊sua ˗zlanwo ˈgümɛn ˗nu ˈˈtakɔ ˗wɔn ˈgü ˗ee?
MƐN ˈBHAA ˗NU ˗WA ˗PÖ: «N ˈˈtʋ ˈyaa ˗Zlan ˗wɔn ˗bha, ˈyö ˗tɔ ꞊dhɛ ˗zlanwo ˈgümɛn ˗nu ˗kɔ ˗yö ˈwɔn yaa ꞊va ˈgü.»
-
˗Yö ü ˈgü ˈˈdhʋ̈ ˗ee?
-
ˈMën ˈö ˗kë ˈö kwa dua ˈyaa -mü kö ˈkwa Zoova yö ˈya˗ ꞊sua ˗zlanwo ˈgümɛn ˈˈtakɔ ˗wɔn ˈgü?
˗A ˈDHƐ TO KWA ˈˈƝAAN
꞊Sua ˗zlanwo ˈgümɛn ˗nu ˗wo ˗Zlan ˈtɔ ˗shiʋ̈ ꞊sua ˗wɔn blɛɛˈˈ ˗sü ˗nu waa ˗an ˈˈtakɔ yaa ˗nu ˈka. ˗Zlan ˗dho ꞊sua ˗zlanwo ˈˈpɛpɛ bho ˈˈshia˗.
˗Zobuödhe
-
꞊Sua ˗zlanwo ˈgümɛn ˗nu ˈˈtakɔ waa ˗an blɛɛwɔn ˗nu bhë, ˗wo ü ˈgü ˗kɔ ˗kë ꞊dhɛ?
-
Zoova ˗yö ꞊sua ˗zlanwo ˗nu ˗yö ˗kɔ ˗kë ꞊dhɛ?
-
ˈMën ˈö Zoova dho ˗a kë ꞊sua ˗zlanwo ˗nu ˈka?
˗AN ˗GA ˈPÖ
˗Kɔ ꞊plɛ ˈö ˗zlanwo ꞊vadhɛ ˈgümɛn ˗nu ˗wo wo ˗de ˗kë ˗a ˈka ˗Zlan ˗dhɛ ˈya˗, ˗an ˗ga.
«˗Zlanwo ˈˈpɛpɛ ˗wo ˗yö do ˗ee? ˗An ꞊gban ˗wo ˗Zlan ˗dhɛ ˗së ˗ee?» (ˈWɔn ˗gɔ ˈö jw.org ˗ta)
ˈPë ˈö ˗kë ˈö Zoova ˈdhö˗ ˈˈpiʋ̈ kö ˈkwa kpa mɛn ˈˈwɛɛ ˗nu ˗bha kö ˈkwa ö ˗dhɔkë ˗a ˗ga?
Gɔndë do ˈö kun ˈpɛɛ˗ ˈka ˗be ˈdhɛ gagade man, ˗a ˗bha ˗zlanwo ˈgümɛn ˗nu ˗wo ˗gban ˗a ˗gɔ, ˈˈkɛɛ ˗a ˈgü yö ˈti ga tɛanwɔn ˈö ˗gban ˗Zlan ˗bha ˗a draanˈˈ ˗sü ˈka. ˗Kɔ ˈö ˗kë ˗a ˈka, ˗a ˗ga.
«ˈMën ˗kë ˈö ˈpɛɛ˗ do ˗yö go ö ˗bha ˗zlanwo ˈgü?» (˗Kwɛ 2015 Fevlie ˗bha ˗Ka ˗ya ka ˈˈɲaan!)
꞊Ya ˗mɔn ˗kwɛ këŋ ꞊va ꞊dede ˗bha ꞊dɛɛ, ˈö ꞊sua ˗zlanwo ˗nu ˈdhö ꞊sua kë ˗ni ˈgü ˗Zlan ˗bha. ˗Ya ˗kë ˈö mɛn ˗nu ꞊wa ˗ga ꞊dhɛ ˗a suu ˗yö ˈya˗, ˈö˗ ˈˈtʋ ˈyaa kwa ˗bha. ꞊Sua ˗nu ˈwo ˈˈdhʋ̈ ˗an ˗yaaga ˗ga.
a ˗Dhɛkpaɔ dhiaˈˈ ˈsëëdhɛ ˗yö ꞊sua ˗zlanwo ˗dhɛ dhebɔ ˈö ˈwo˗ ˗dhɛ Babidhɔnö -pö ˈkpii˗. ˈPë ˗kë ˈö˗ ˗dhɛ ˈˈdhʋ̈ ˈbha˗ pö ˈü˗ ˗gɛn dɔ, ˗bhö kpɔɔˈˈ ˗Zoto ˗a ˈˈpiʋ̈ ˗wɔn 1 ˗bha.
