ˈWƆN ˗GƆ 20

Zoova ˗yö ˗bɔ Yesu ˗ta ˈö ˈˈdhiʋ̈sü ˗zlanwokɔdhi ˈka ˗kɔ ˗kë ꞊dhɛ?

-A "WƖ -DHƐ

Zoova ˗yö ˗Zlan ˈö ö ˗bha ˈwɔn ˗nu ˗kë ö ˗naan ˈka, ˗a ˈka. (1 Kodhɛngtö 14:33) ˗Dhɛ ˈö ˈˈdhʋ̈ ˗a ˗dhɔkëmɛn ˗nu dua ˗mü kö ˗wo ˈwɔn ˗nu kë ö ˗naan ˈka. Zoova ˗yö ˈˈdhiʋ̈sü ö ˗bha ꞊Gbɛkiö ˗nu ˗bha ˗kɔlokota ˈka ˗kɔ ˗kë ꞊dhɛ? ˗Mën ˈö ˈmɛn ˈö ˈdhö ˈö ˗dho ˗a kë kö ˈwɔn ˗nu ˗wo kë ˗së ˈka ˗zlanwokɔdhi ˈgü.

1. De ˈö ˗zlanwokɔdhi ˗gɔ ˈˈdhiʋ̈?

‹Klisi ˈnën ˈö [˗zlanwokɔdhi] ˗gɔ ˈˈdhiʋ̈.› (Efɛzö 5:23) ˗Yö ˗ya dhaŋ˗ ˈgü ˈö dhiʋ̈sü yö ˈö Zoova ˗dhɔkëmɛn ˗nu ˈdhö˗ kë ˗ni ˈgü ˈˈkpɔnŋtaadhɛ ˗todhʋ̈sü ˈgü bhë ˗a ˈka. Yesu ˗yö ‹Gwëëmi ˗towotasü ˈö ꞊kpaɔsü› ˗a ˗ya. ˗A Gwëëmi ˈö ˈˈdhʋ̈ ˈyö ˗tɔ mɛn zii ˗nu ˈö ˗wa ˗kian ˗an kpönën ˈdɛdɛ ˈö ˈwo ˗an ˗dhɛ kwa ˈˈdhiʋ̈ʒiöwomɛn ˗nu. (Matiö 24:45-47 ˗an ˗wo pö.) Kwa ˈˈdhiʋ̈ʒiöwomɛn ˗nu ˗wo ˈˈdhiʋ̈sü ˗zlanwokɔdhi ˈˈpɛpɛ ˈwo ˈˈkpɔnŋ ꞊taa ˗an ˈka ꞊dhɛ ˗kɔ ˈö bɔmɛn ˗nu waa mɛn zii ˗nu ˈwo kun Zedhizadhɛmö ꞊kwɛŋzü ˈwo˗ ˗kë ˗a ˈka ˗a ˈdhö. (Këwɔn ˗nu 15:2) ˈˈKɛɛ mɛn ˗nu ˈö ˈwo bhë ˈwaa ˈnën ˈwo ˗tɔ ˗zlanwokɔdhi ˗gɔmɛn ˗nu. ˗Wo wo ˗kwaa Zoova ˈˈDhiwo ˗zü ˈö ˈˈdhiʋ̈sü ˗an ˈka, ˈö ˈwo ˈwɔn man Yesu ˗ta.

2. Mɛn zii ˗nu ˗bha yö ˈnën ˗tɔ ˗mën?

Mɛn zii ˗nu ˗wo kletiɛn ˗nu ˈö ˗wa ˗kian ˗an ˈka. ˗Wo ˗bɔ Biblö ˗ta ˈö ˈwo ˗zlanwokɔdhi ˈgümɛn ˗nu ꞊klaŋkë, ˈö ˈwo ˗an ˗takun, ˈö ˈwo ˗an ꞊faan mën. ˈWaa ˗an ꞊saa bho. ˈWaa ˗Zlan ˗bha yö kë ‹˗kpla ˈˈdhiʋ̈, ˈwaa˗ kë ꞊naɔ˗ ˗dhɔ ˗bha, ˗wa ˗kë ˈˈgblʋ̈ʋ̈dhɛ ˈˈpuu ˗ta.› (1 Piɛdhö 5:1, 2) Mɛn zii ˗kɔ ꞊löö ˗nu ˈö ˈwo ˗dho kë mɛn zii ˈka ˈpö bhë, ˗wo mɛn zii ˗nu ˗takun yö ˈö bhë ˗a kë ˗sü ˗bha.

Kwa ˈˈdhiʋ̈ʒiöwomɛn ˗nu ˗wo wo ˗kɔ ˗yɛ mɛn zii ˈbhaa ˗nu ˗bha kö ˗wo kë ˈˈpian do ˈˈpiʋ̈ ˗maankëmɛn ˗nu ˈka. ˗Maankëmɛn ˗nu ˈwo ˈˈdhʋ̈ ˗wo ˗wo ˗zlanwokɔdhi -nu ˗dhɛ kö ˗wo ˗gleŋ ˗da ˗an ˗bha, kö ˗wo ˗an ꞊faan ˈmën. ˗Wo ˗gban pë ˈö Biblö ˗ya pö ˗a ˗ta, ˈö ˈwo mɛn ˗kë mɛn zii ɛɛnˈˈ mɛn zii ˗kɔ ꞊löö ˈka.—1 Timote 3:1-10, 12; Titö 1:5-9.

3. ˈMën Zoova ˗bha ꞊Gbɛkiö ˈdhɛ ˈö ˈdhö -a dua ˈka kö ˗ya kë?

Mɛn ˈˈpɛpɛ ˈwo ˗zlanwokɔdhi ˈgü ˗an dua ˗mü kö ˗wo «Zoova ˈtɔ bhɔ» ˗bhɔkwëë ˗nu ˗ta ˈwɔn ˗daa kë ˗sü ˈka. ˗An dua ˗mü ˈpö kö ˈpë ˗an ˗kɔ ˗yö ꞊mɔɔn˗ ˗bha ˗wa ˗kë ˗zlanwopösü ˈgü.—Psaume 148:12, 13 ˗wo pö.

˗KAA ˈˈPIƲ̈ ˈPƆN

˗Kɔ ˈö Yesu ˗yö mɛn ˗nu kun ˗a ˗bha, ˗kɔ ˈö mɛn zii ˗nu ˗wo wo ˈgü dɔ ˈˈgbɩɩ˗ kö ˈwo ʒiö ˗a ˗bha ˈwɔnzuan ˈˈpiʋ̈ ˗a ˗bha, waa ˗kɔ ˈö ˈkwa ˗dho yökë Yesu waa mɛn zii ˗nu ˈˈpiʋ̈ ˗a ˈka, ˗kwaa ˗ga.

4. Mɛn ˗nu ˈö Yesu ˗yö ˈˈdhiʋ̈sü ˗an ˈka, ˗yö ˗an ˗zogban.

Yesu ˗yö kwa ˗dhɛ ˈˈnɛɛnnɛn ˈka kö ˈkwa ʒiö ö ꞊kee˗. ˗Ka Matiö 11:28-30 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

ˈKwa ˈˈwɩ ˗a ˗bha kö Yesu ˗yö ˈˈdhiʋ̈sü kwa ˈka, ˈwɔn ˗së ˗mɛɛn ˈö ˗dho kë kwa ˗dhɛ?

Mɛn zii ˗nu ˗wo ˗ʒiö Yesu ˗bha ˈwɔnzuan ˈˈpiʋ̈ ˗kɔ ˗kë ꞊dhɛ? ˗Kaa VIDEO ˗ga.

VIDEO: ˈDhɛ ˈˈsɛ ˗yö ꞊zii Nepalö, mɛn zii ˗nu ˗wo mɛn ˗nu ˗takun (4:56)

˗Kɔ ˈö mɛn zii ˗nu dho wo ˗bha yökë ˗a ˈka, Biblö ˗ya ˗zɔn ˈˈpuu ˈka.

˗Ka Isaïe 32:2 waa 1 Piɛdhö 5: 1-3 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

˗A ˈwɔn dɔ ˗sü ˈö ꞊dhɛ mɛn zii ˗nu ˗wo wo ˈgü ˗dɔ ˈˈgbɩɩ˗ kö ˈwo mɛn ˈˈwɛɛ ˗nu ꞊faan ˈmën ꞊dhɛ Yesu ˈdhö bhë, ˗yö ü ˈgü ˗kɔ ˗kë ꞊dhɛ?
˗Mën ˈbhaa ˈö mɛn zii ˗nu ˗wa ˗kë kö ˗wo ˈto Yesu ˗bha ˈwɔnzuan ˈˈpiʋ̈?

5. Mɛn zii ˗nu ˗wo ˈwɔnzuan ˗së ˈka.

Yesu ˗ya ˈˈpiʋ̈ kö yö ˈö˗ nu mɛn zii ˗nu ˗dhɛ bhë ˗wa ˈsü ˗kɔ ˗kë ꞊dhɛ? ˗Kaa VIDEO ˗ga.

VIDEO: Mɛn zii ˗nu ˗wo ˈwɔnzuan ˗së ˗zɔn (7:39)

˗Kɔ ˈö mɛn zii ˗nu dho ˈˈdhiʋ̈sü ˗a ˈka ˗zlanwokɔdhi ˈgü, Yesu ˗ya ˗zɔn. ˗Ka Matiö 23:8-12 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

Pë ˈö Biblö ˗ya pö ˈö ˗gban mɛn zii ˗nu ˗bha yö kë ˗kɔ ˗bha, ˈbha˗ dan ˗zlanwo ˗gɔdhiʋ̈mɛn ˗nu ˈta ˗kɔ ˗nu ˈka, ˗mën ˈü˗ ˈsuanbho?

(1) Mɛn zii ˗nu ˗wo wo ˈgü ˗dɔ ˈˈgbɩɩ˗ kö waa wo ˗bha ˈkɔdhigümɛn ˗nu ˗mlɛɛn ˗së ˗yö kë waa Zoova ˗nu wo ꞊zinŋgü.
(2) Mɛn zii ˗nu ˗wo wo ˗zokë mɛn ꞊gban ˈˈpɛpɛ ˈˈpiʋ̈ ˗zlanwokɔdhi ˈgü.
(3) Mɛn zii ˗nu ˗wo ˗zlanwopö ˗kplawo.
(4) Mɛn zii ˗nu ˗wo ˈˈdhɛɛtadhiaŋ˗ ˗nu ˗zë, ˈˈkɛɛ ˗wo wo ˗kɔ ˗da ˈpö ˗zlanwokɔ ˗kun ˗së ˗sü waa yö ˈˈwɛɛ ˗nu ˈwo to ˗an ˈgü.

6. Mɛn zii ˗nu ˗bhawɔn ˗yö kwa ˗bha ˗takundhe ˗bha.

ˈPë ˗kë ˈö kwa dua ˈdhö ˗mü kö ˈkwa ˈwɔn man mɛn zii ˗nu ˗ta, Biblö ˗ya ˗pö. ˗Ka Eblö 13:17 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

Biblö ˗yö kwa ꞊faan ˗mën kö ˈkwa ˈwɔn man mɛn ˗nu ˈwo ˈˈdhiʋ̈sü kwa ˈka ˗an ˗ta. Ü˗ ˗yö ˗kɔ ˗kë ꞊dhɛ? ˈMën ˗kë ˈü˗ pö ˈˈdhʋ̈?

˗Ka Dhukö 16:10 NTBL ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

ˈKö ˗kë ꞊dhɛ ˈpë mɛn zii ˗nu ˗wa pö kwa ˗dhɛ ˗yö kwa ˈgü ˗bhaasü, ˈmën ˗kë ˈö kwa dua ˈdhö ˗mü kö ˈkwa ˈwɔn man ˗an ˗ta ˗kplawo.

MƐN ˈBHAA ˗NU ˗WA ˗PÖ: «Kwa ꞊mɔɔn˗ ˗bha ˈkwa ˗Zlan ˗dhɔkë ˗kɔ ˈö ˗dhi kwa ˗dhɛ ˗a ˈka.»

ˈˈKɛɛ ü ˗bha ˈka, ˈmën ˗kë ˈö ˗së kö kwaa mɛn ˈˈwɛɛ ˗nu ˈkwa ˗Zlan ˗dhɔkë kwa ˈkwëë˗ ˗zlanwokɔɔdhö?

˗A ˈDHƐ TO KWA ˈˈƝAAN

Yesu ˈnën ˈö ˗tɔ ˗zlanwokɔdhi ˗gɔmɛn. Mɛn zii ˗nu ˗wo wo ˗gɔ ˗dho ˗a ˗dhɛ ˈˈshia. ˈYö kwa ˗de ˈpö kwa ˈwɔn ˗man mɛn zii ˗nu ˗ta ˈyö ˗tɔ ꞊dhɛ ˗wo kwa ꞊faan ˗mën, ˈö ˈwo kwa ˗bha ˈwɔnzuan ˗së ˈka.