ˈWƆN ˗GƆ 22

Ü ˗dho nɔɔn˗ ˗së pö mɛn ˈˈwɛɛ ˗nu ˗dhɛ ˗kɔ ˗kë ꞊dhɛ?

-A "WƖ -DHƐ

Gagade ˗nu ˈwo Biblö ˈgü, ü ˗an draanˈˈ ˗ni ˈgü ˗së ˈka, ü ꞊mɔɔn˗ ˗bha ˈü˗ pö ü ˗de ˗dhɛ: ‹Mɛn ˗nu ˈwo to ˗an dua ˗mü kö ˗wa dɔ ˈpö.› ˗Yö ˈˈdhʋ̈, mɛn ꞊gban ˈˈpɛpɛ dua ˗mü kö ˗wo gagade dɔ. ˈˈKɛɛ pë ˗nu ˈü ˗an ꞊draan ˗a ˗blɛɛ mɛn ˈˈwɛɛ ˗nu ˗dhɛ ˗sü ˈˈsuʋ̈ ꞊mɔɔn˗ ˗bha ˈö ü ˗kë. Pë ˗nu ˈü ˗dho ˗an kë kö ˈˈsuʋ̈ ˈya ˗dho ü kë, kö ˈü ˗ya nɔɔn˗ ˗së ˈö go Biblö ˈgü ˗a blɛɛˈˈ ˗sü ˗bha mɛn ˗nu ˗dhɛ zuʋ̈gblüdhi ˈka, ˗kwaa ˗ga.

1. Pë ˗nu ˈü ˗an draanˈˈ ˗ni ˈgü bhë, ü ˗dho ˗an ˗wɔn blɛɛˈˈ mɛn ˈˈwɛɛ ˗nu ˗dhɛ ˗kɔ ˗kë ꞊dhɛ?

Yesu ˗bha gwëëzë ˗nu ˗wa ˗pö: «˗Abin! Yi ˗zë ˈyii ˈdho ꞊mɔɔ˗ ˗bha kö ˈyi yi bo ˈwɔn ˈyi˗ yö, ˈˈɛɛn ˈyi˗ ma ˗a pö ˗sü ˈka!» (Këwɔn ˗nu 4:20) Gagade ˗dhɔ ˗yö ˗kun ˗an kë ˗ni ˈgü ꞊dedewo. Yö ˈnën ˈö˗ ˗wɔn ˈgü ˈwo kun ˗a ˈˈpiʋ̈ ꞊dhɛ ˈwo ˗a blɛɛˈˈ mɛn ˈˈpɛpɛ ˗dhɛ. ˗Zlanwopö ˗dhɔ ˗yö ü ˈgü ˈˈdhʋ̈ ˈpö ˗ee? ꞊Ya kë ꞊dhɛ ˗yö ˈˈdhʋ̈, ˗a ˈˈslö mɛɛnˈˈ ˗kplawo kö pë ˈü˗ yö ˗ni ˈgü Biblö ˈgü bhë ˈü˗ blɛɛˈˈ ü ˗bha ˈkɔdhigümɛn ˗nu waa ü ˈˈtɔŋdë ˗nu ˗an ˗dhɛ, ˗an ꞊bhlëë ˈgü.—Kodhɔsö 4:6 ˗wo pö.

Ü ˗dho ˗a züdɔ ˗kɔ ˗kë ꞊dhɛ?

Kaa ü ˗bha ˈkɔdhigümɛn do ka ˈˈdoo dɔ ˗ni ˈgü, ˗bhö Biblö ˗dhiaŋ zë ˗a ˗dhɛ ˈü˗ pö: «Pë ˗së ˈbhaa ˈa˗ yö Biblö ˈgü ˈˈdhoogɔ ˈö yö ˗a ˈgü, a˗ ˈˈpiʋ̈ ˈa˗ ˗zɔn ü ˗dhɛ.»
Ü ˈˈtɛɛdo ˈbhaa ö ˈyaa ö ˈflëëgü ɛɛnˈˈ ˈö zuʋ̈dhiʋ̈tɛ ˈdhö˗ ˗bha, ˗a ˗zogban Biblö ˈˈɲan do ˈka.
Ü yökëyoo do ˗ya ü dhɛɛˈˈ ˈkpɔ pë ˈü˗ ˗kë ꞊glooyi ˈka ˗a ˈka, pë ˈü˗ yö kö ü Biblö draanˈˈ ˗ni ˈgü ɛɛnˈˈ ˈü˗ yö ˗bhɔkwëë ˗ta, ˗a pö ˗a ˗dhɛ.
˗Bhö kwa ˗bha ɛntɛnɛtö ˈˈnimlɔn jw.org ˗zɔn ü ˈˈtɔŋdë ˗nu ˗dhɛ.
˗Bhö mɛn ˈˈwɛɛ ˗nu ˗dhɛ kö ˗wo kpa ü ˗bha ü ˗bha Biblö draanˈˈ ˈˈtʋ̈ŋ ˈka, ɛɛnˈˈ ˗kɔ ˈwo Biblö draansü ˗dhɛ ˗a ˈka jw.org ˗ta, ˗a ˗zɔn ˗an ˗dhɛ.

2. ˈMën ˗kë ˈö ˗zlanwopö ˗zlanwokɔdhi ˈgümɛn ˗nu ˈˈpiʋ̈ ˗sü ˈdhö ˗së?

Yesu ˗bha gwëëˈˈ ˗nu ˈwaa kun ˗zlanwopö ˗ni ˈgü wo dɔmɛn ˗nu dosɛnŋ ˗dhɛ. Yesu ˗yö ˗an ‹˗dan ꞊plɛ ꞊plɛ, ˈyö˗ ˗nu bɔ ˈpödhɛ ˈˈpɛpɛ ˈgü› kö ˗wo ˗zlanwopö. (Dhukö 10:1) ˗Zlanwopö ˗kɔ suu ˈö ˈˈdhʋ̈ bhë, ˗ya ˗kë ˈö ˈwo nɔɔn˗ ˗së pö mɛn ꞊va ꞊dede ˗dhɛ. ˗An ˗bha ˗zlanwopö wo ˈkwëësü bhë, ˗ya ˗kë ˈpö ˈö ˈwo zuʋ̈gblüdhi ꞊va ꞊dede ꞊slɔɔ ˗a ˈgü. (Dhukö 10:17) ˈYaa ˗së ˈpö kö ˈü ˗zlanwopö ˗zlanwokɔdhi ˈgümɛn ˗nu ˈˈpiʋ̈ ˗ee?

˗KAA ˈˈPIƲ̈ ˈPƆN

Pë ˈü ˗dho ˗a kë˗ kö ˈˈsuʋ̈ ˈya ˗dho ü kë, kö zuʋ̈niidadhe ˈö ˗zlanwopösü ˈgü ˈü˗ ꞊slɔɔ, ˗kwaa ˗ga.

3. Zoova ˗dho ü ˗takun.

˗Zlanwopösü ˗dhɔ ˗yö mɛn ˈbhaa ˗nu ˗bha, ˈˈkɛɛ ˗kɔ ˈö mɛn ˗nu dho ˗a yö ˗a ˈka, ˗a ˈˈsuʋ̈ ˈnën ˈbhaa ˗yö ˗an ˗bha.

Pë ˗nu ˈü ˗an draanˈˈ ˗ni bhë, ˗a ˗blɛɛ mɛn ˗nu ˗dhɛ ˗sü ˈˈsuʋ̈ ˗yö ü ˗bha ˗ee? ˈMën ˗kë ˈü˗ pö ˈˈdhʋ̈?

˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.

VIDEO: A ˗bhɛɛ Zoova ˗dhɛ kö ˗yö ꞊faan nu n ˗dhɛ (4:05)

Kwa ꞊dhegblü ˗nu ˈwo bhë, ˈˈsuʋ̈ ˗yö ˗go ˗an zuʋ̈ˈˈ ˗ta ˗kɔ ˗kë ꞊dhɛ?

˗Ka Isaïe 41:10 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

˗Zlanwopösü ˈˈsuʋ̈ ꞊ya ü kë, bhɛɛsü ˗dho ü ˗takun ˗kɔ ˗kë ꞊dhɛ?

Ü˗ ˈwɔn ˗dɔ ˗ee?

˗Yö ˗kë Zoova ˗bha ꞊Gbɛkiö ꞊vadhɛ ˗nu ˈgü ˗be ꞊dhɛ ˈwaa ꞊mɔɔn˗ ˗bha ˈwo ˗zlanwopö. ˗A ˈwɔnzuan do ˈnën ˈö ˗tɔ Sɛɛgɛ. ˗A ˗bha ˈgü ˗be ö ꞊bhlëë ˈyaa ˈdhö, ˈö ˈyaa ꞊mɔɔn˗ ˗bha kö ˗yö dhiaŋzë mɛn ˈˈwɛɛ ˗nu ˗dhɛ. ˗Ya ˗pö: «ˈKö ˗kë ꞊dhɛ ˈˈsuʋ̈ ˗kun n ˈgü, pë ˈa˗ man Biblö ˈgü a ˗ya ˗a blɛɛˈˈ ˗sü ˗bha mɛn ˗nu ˈwo n ˗züzü ˗an ˗dhɛ. ˗A ˗kë ˈˈdhʋ̈ ˗sü ˗yö n zuʋ̈ˈˈ ˗kë ˗saa ˈö n ˗man ˗zoyödhe ˗dadhiʋ̈. ˗A ˈwɔn ˗yö n ˗kun ꞊dedewo.»

4. ˗A kë mɛn ˗nu ꞊bhlëë ˈgü.

Ü ˗zlanwopö ˗ni ˈgü, ˈpë ˈü ˗dho ˗a pö waa ˗kɔ ˈü ˗dho ˗a blɛɛˈˈ ˗a ˈka mɛn ˗nu ꞊bhlëë ˈgü, ˗bhö ü ˗zota ˗a ˈgü. ˗Ka 2 Timote 2:24 waa 1 Piɛdhö 3:15 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

Ü Biblö ˗wɔn blɛɛˈˈ ˗ni ˈgü mɛn ˈˈwɛɛ ˗nu ˗dhɛ, Biblö ˈˈɲan ˗nu ˈwo yö , ü ˗dho ˗an ˗ya ꞊bhlëë ˈgü ˗kɔ ˗kë ꞊dhɛ?
꞊Ya ˗kë ꞊dhɛ kaa ü ˗bha ˈkɔdhigümɛn ˗nu ɛɛnˈˈ ü ˈˈtɔŋdë ˗nu ka ˗wo yö ˈti ˗mɔn ˈpë ˈü˗ pö ˗a ˗bha, ˈmën ü dua ˈdhö ˗mü kö ˈü˗ kë? ˈYö ˈmën ü dua ˈyaa ˗mü kö ˈü˗ kë?
Dhɛɛˈˈ ˈkpɔ ˗sü ˈö ˗gleŋ ˈka ˗yö ˗së ˈö ˗ʒiö ˗a ˈka pë ˈö ˈkwa˗ ˈˈpiʋ̈ ˗wo wo ˗zo yö ˗a ˗dhɛ, ˗a blɛɛˈˈ ˗sü ˈö vɛɛdhö ˗a ˗ta. ˈMën ˗kë?

5. -Zlanwopösü ˗yö mɛn zuʋ̈ˈˈ ꞊nii ˗da.

Zoova ˗yö ˗zlanwopösü ˈˈklɔɔn ˗bho Yesu ˗bha. ˗A yö ˈö ˈˈdhʋ̈ Yesu ˗ya ˗sü ˗kɔ ˗kë ꞊dhɛ? ˗Ka Zan 4:34 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

ˈKwa ˗bhöpë ˗së ˗bhö kwa ˗kë kwa ˈflëëgü ˈö kwa zuʋ̈ˈˈ ꞊nii ˗yö ˗da. ˗Zlan dhɔɔbhaawɔn kë ˗sü ˈö˗ do ˗yö ˗kë ˗zlanwopösü ˈka bhë, Yesu ˗ya ˗zɔn ˗bhöpë ˈka. ˈMën ˗kë?
ˈMën ˗kë ˈö ˗zlanwopösü ꞊mɔɔn˗ ˗bha kö ˗yö ü zuʋ̈ˈˈ ꞊nii ˗da?

Pë ˈü ꞊mɔɔn˗ ˗bha ˈü˗ kë

˗Bhɔkwëë ˈö ˈˈdhoogɔ ꞊zinŋgü ˈbha ˈdho ˗a ˗ta, ˗bhö ˗kɔ ˈü ˗dho dhiaŋ züdɔ ˗a ˈka kö ˈü ˗zlanwopö mɛn ˗nu ˗dhɛ, ˗a ˗ga.
˗Bhö ü ˈtɔ ˗ya kö ˈü kë ꞊klaŋdhiʋ̈nën ˈka ˗bhɔkwëë ˈö ˈˈdhoogɔ ꞊zinŋgü ˗a ˗ta. ˗A ˗kë ˈˈdhʋ̈ ˗sü ˗dhö ü ˗takun kö ˈü ˗mɔn ˗zlanwopösü ˗bha.
ˈSëëdhɛ ˗be ˈö yö, ˗a ˈˈpian ˈö ˗kë «Mɛn ˈbhaa ˗nu ˗wa ˗pö» ɛɛnˈˈ «Mɛn ˈbha˗ ꞊mɔɔn˗ ˗bha ˈö ü dhɛɛˈˈ kpɔ ꞊dhɛ» ˈka bhë, ü ˗de draanˈˈ ˗an ˗bha ˗së ˈka kö ˈü ˗mɔn dhɛɛˈˈ ˗nu waa pë ˗nu ˈö mɛn ˗nu dho ˗a pö kö ˈbha ˗dho ˗zlanwopö ˗an ˗dhɛ, ˗a ˗yɔ bɔ ˗sü ˗bha.

MƐN ˈBHA ꞊MƆƆN˗ ˗BHA ˈÖ Ü DHƐƐˈˈ KPƆ ꞊DHƐ: «ˈKwa˗ man ü ˈˈpiʋ̈?»

˗A ˗daa ˈü ˗dho ˗a kë bhë, ü ˗dho bɔ ˗a ˗ta ˗kɔ ˗kë ꞊dhɛ kö pë ˈü˗ man Biblö ˈgü ˈü˗ blɛɛˈˈ ˗a ˗dhɛ?

˗A ˈDHƐ TO KWA ˈˈƝAAN

Ü ꞊mɔɔn˗ ˗bha ˈü zuʋ̈gblüdhi ꞊slɔɔ ˗zlanwopö mɛn ˈˈwɛɛ ˗nu ˗dhɛ ˗sü ˈgü. ˗A kë ˗sü ˈyaa ˈˈgbɩɩ˗.

˗Zobuödhe

ˈMën ˗kë ˈö ˈü ˗dho nɔɔn˗ ˗së pö mɛn ˈˈwɛɛ ˗nu ˗dhɛ?
Ü ˗dho ˗zlanwopö mɛn ˗nu ꞊bhlëë ˈgü ˗kɔ ˗kë ꞊dhɛ?
꞊Ya kë ꞊dhɛ ˗zlanwopösü ˈˈsuʋ̈ ˗yö ü ˈgü, ˈmën ˈü ˗dho ˗a kë?

ˈWɔn ˗gɔ ɲën ˗yi:

Pë ˈü ˗dho ˗a kë˗

˗Bhö ü ˗zota mɛn ˈü ꞊mɔɔn˗ ˗bha ˈü ˗zlanwopö ˗a ˗dhɛ ˗a ˈgü. Pë ˈü dho ˗a pö, ˗kɔ ˈü dho ˗a pö ˗a ˈka waa ˈˈtʋ̈ŋ ˈü dho ˗a ˗pö ˗a ˈgü, ˗bhö ü ˗zota ˗an ˈgü ˈpö.

˗A ˈbhaa:

Your other goal