ˈWƆN ˗GƆ 34
Kwa ˗dho ˗a ˗zɔn ꞊dhɛ Zoova ˗dhɔ ˗yö kwa ˗kë ˗kɔ ˗kë ꞊dhɛ?
ˈÖ go ü ˗bha Biblö draansü züdɔdhɛ ˗bha ˈö yö ˗a ˈka ꞊dɛɛ ˗bha, ˗Zlan ˗dhɔ ˈö ü zuʋ̈ˈˈ ˈgü ˗ya ˗dadhiʋ̈ ˗ee? Ü˗ ˈˈpiʋ̈ kö kaa ˗Zlan ka ˗bha ˈˈtɔŋdëdhɛ ˗yö ˈyɔ ˗kplawo ˗ee? ˗Yö kë ü ˈˈɲaan ꞊dhɛ Zoova ꞊yaa˗ yö ꞊dhɛ ö ˗dhɔ ˈö ü ˈgü ˗yö ˗da ˗ni ˈgü ˈˈdhiʋ̈, ü ˗dhɔ ˗dho ˗a kë ˈpö ꞊dedewo ˈö ö ˗zokë ü ˈˈpiʋ̈. ˗Dhɛ ˈö ˈˈdhʋ̈, ü ˗dho ˗a ˗zɔn ꞊dhɛ ˗a ˗dhɔ ˗yö ü ˗kë ˗kɔ ˗kë ꞊dhɛ?
1. Ü ˗dho ˗a ˗zɔn Zoova ˗dhɛ ꞊dhɛ ˗a ˗dhɔ ˗yö ü ˗kë ˗kɔ ˗kë ꞊dhɛ?
Kwa˗ ˗zɔn ꞊dhɛ Zoova ˗dhɔ ˗yö kwa ˗kë ˈwɔnman ˗a ˗ta ˗sü ˈka. (1 Zan 5:3 ˗wo pö.) ˈYaa ˈˈgbɩɩdhɛ wɔ kwa ˗ta kö ˈkwa ˈwɔnman ö ˗ta. ˈˈKɛɛ ˗yö ö ˗kwaa kwa ˗zü kö ˈkwaa˗ ˈsü kwa ˗de ˈgü ˈkwa ˈwɔnman ˗a ˗ta. ˈMën ˗kë ˈö˗ ˗kë ˈˈdhʋ̈? ˗Ya ˈˈpiʋ̈ kö ˈwɔnman ö ˗ta ˗sü bhë ‹ˈkwa˗ ˈsü kwa ˈnii˗ ˗bha ˗wɔn ˈka.› (Wlɔmö 6:17) ˗A ˗pö ˈˈdhʋ̈ ˗sü ˗gɛn ˈnën ˗tɔ ˗ya ˈˈpiʋ̈ kö ˈkwa ˈwɔnman ö ˗ta ö ˗dhɔ ˗bha. ˈSëëdhɛ ˗be ˈö yö ˗a ˗kɔ ˈˈpian 3 waa˗ 4 ˗naan ˗wo ˗dho ü ˗takun kö ˈü Zoova ˗dhɔ ˗zɔn ˈwɔnman ˗a ˗ta ˗sü ˈka, kö ˈü ˈˈkan pë ˗nu ˈö ˈwaa˗ ˗dhɛ ˗së ˗an ˗bha.
2. ˗A ˗zɔn Zoova ˗dhɛ ˗sü ˈö ꞊dhɛ ˗a ˗dhɔ ˗yö kwa ˗kë bhë ˗yö ꞊mɔɔn˗ ˗bha ˈö ˗kë kwa ˗gɔ ˈˈgbɩɩ˗. ˈMën ˗kë?
«Mɛn kpɛnŋdhö ˗bha ˈwɔn ˈˈgbɩɩ˗ ˗nu ˗wo ꞊va.» (Psaume 34:19) Mɛn ꞊gban ˈˈpɛpɛ kwa ˈkozë ˈwɔnyaakëdhii ˈö kwa ˈgü ˗a ˈka ˗kplawo. ˈWëëga ˗wɔn ꞊mɔɔn˗ ˗bha ˈö ˗kë kwa ˗ta ˈˈgbɩɩ˗, ˈö ˈwɔn ˈˈgbɩɩ˗ ˈˈwɛɛ ˈbhaa ˗nu ˗wo ˗kë kwa ˗ta, ɛɛnˈˈ ˈzü ˈö ˈwo ˈwɔn yaa ˗kë kwa ˈka. Kwa bɔ ˗ni ˈgü ˈwɔn ˈˈgbɩɩ˗ ˗nu ˈgü, ˈwɔnman Zoova ˗ta ˗sü ꞊mɔɔn˗ ˗bha ˈö ˗kë kwa ˗gɔ ˈˈgbɩɩ˗, ˈö ˗kë kwa ˈgü ˗ʒiaanwo ꞊dhɛ ˗a ˗bha ˈtɔŋ˗ ˗nu ˗wo ˈˈgbɩɩ˗. ˈˈKɛɛ kö ˈü ü ˈgü dɔ ˈˈgbɩɩ˗ ˈü Zoova ˗Wo ꞊bhlëë ˗ya, kö ü˗ ˗zɔn ꞊dhɛ ˗a ˗dhɔ ˗yö ü ˗kë ˈö ˗ʒiö ˗a ˈka pë ˈˈpɛpɛ ˗ta, ˈö ˈü ˗klu ˗sü ˈka ˗a ˗bha. ˈBha˗ kë ˈˈdhʋ̈ ˗yö ˗dho ˗klu ü ˗bha ˈpö. Yö ˈti ˗dho ˈˈkan ü ˗bha toŋtoŋdhö.—Psaume 4:3 ˗wo pö.
˗KAA ˈˈPIƲ̈ ˈPƆN
ˈPë ˗kë ˈö ˈwɔnman Zoova ˗ta ˗sü ˗wɔn ˈdhö˗ ˗gɔ ˈˈgbɩɩ˗ waa ˈpë ˗dho kwa ˗takun kö ˈkwa ˈto ˗klu ˗sü ˈka ˗a ˗bha, ˗kwaa ˗ga.
3. ˈWɔn ˈö ˗gban ü ˗bha
ˈSëëdhɛ ˗be ˈö Biblö ˈgü ˈwo˗ ˗dhɛ Job bhë, ˗ya ˗zɔn ꞊dhɛ Sɔtraan ˗yö ꞊sua ˗kë Zɔbö waa mɛn ˈˈpɛpɛ ˈwo˗ ˈˈpiʋ̈ kö ˈwo Zoova ˗dhɔkë ˗an ˗bha. ˗Ka Job 1:1, 6–2:10 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
-
Sɔtraan ˗bha ˈka, ˈmën ˗kë ˈö Zɔbö ˗yö ˈwɔnman Zoova ˗ta?—˗Ka kpɔɔˈˈ Job 1:9˗11 ˗an ˗bha.
-
ˈMën Sɔtraan ˗ya pö mɛnbhɩɩdhe ꞊gban ˈˈpɛpɛ kwa ˗bha.—˗Ka kpɔɔˈˈ Job 2:4 ˗bha.
˗Ka Job 27:5 ˈˈpian ꞊plɛ ˗naan ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
-
Zɔbö ˗ya ˗zɔn ˗kɔ ˗kë ꞊dhɛ ꞊dhɛ Zoova ˗dhɔ ˗yö ö ˗kë ꞊dedewo?
Zɔbö ˗yö ˗to ˗klu ˗sü ˈka Zoova ˗bha, ˈö˗ ˗zɔn ꞊dhɛ ˗a ˗dhɔ ˗yö ö ˗kë ꞊dedewo.
Kwa˗ ˗zɔn ꞊dhɛ Zoova ˗dhɔ ˗yö kwa ˗kë ˗klu ˗a ˗bha ˗sü ˈka.
4. ˗Bhö Zoova zuʋ̈ˈˈ ꞊nii ˗da.
˗Ka Proverbes 27:11 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
-
ˈBha ˈwɔn ˗nu kë ꞊kpɔɔdhɛ ˗bha, ˈbha ˈwɔnman Zoova ˗ta, ˗yö ˗kë ö ˗de ˈgü ꞊dhɛ? ˈMën ˗kë?
5. Ü ꞊mɔɔn˗ ˗bha ˈü ˗klu Zoova ˗bha.
Zoova ˗dhɔ ˗yö kwa ˗blü ˗a ˗wɔn ˗blɛɛ mɛn ˈˈwɛɛ ˗nu ˗dhɛ ˗sü ˗bha. ˈKö ˗kë ꞊dhɛ ˗a ˗kë ˈˈdhʋ̈ ˗sü ˗yö ˈˈgbɩɩ˗ ˈˈtʋ̈ŋ ˈbhaa ˗nu ˈka, kwa ˗bha ˗klu ˗a ˗bha ˗sü ˗ya ˗kë ˈö kwa ˗kɔ ˗yö ˗mɔn ˗a ˗bha. ˗Kaa video ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
-
Zoova ˗wɔn ˗blɛɛ mɛn ˈˈwɛɛ ˗nu ˗dhɛ ˗sü ˗yö ü ˗gɔ ˈˈgbɩɩ˗ ˈˈtʋ̈ŋ ˈbhaa ˗nu ˈka ˗ee?
-
ˈMën Gresɔnö ˗takun ˈö ˈˈsuʋ̈ go ˗a zuʋ̈ˈˈ ˗ta?
Pë ˗nu ˈwo Zoova ˗dhɛ ˗së ˗an ˗dhɔ ˗ya kwa kë, kö pë ˗nu ˈwo˗ ˗dhɛ ˈya˗ ˗an ˗san ˗yö kwa kë, ˗klu ˗a ˗bha ˗sü ˗dho kë kwa ˗gɔ ˈˈplëëplë. ˗Ka Psaume 97:10 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
-
Pë ˗nu ˈwo Zoova ˗dhɛ ˗së, ü ꞊mɔɔn˗ ˗bha ˈü ˗an ˈbhaa ˗nu pö ˗ee? Pë ˗nu ˈö ˗an ˗san ˗ya ˗kë ˗an ˈbhaa ˗nu ˈtɔ˗ ˗mën?
-
Ü ˗dho ˗a kë ꞊dhɛ kö pë ˈö ˗së ˗a ˗dhɔ ˗yö ü kë, kö ˈwɔn yaa ˗san ˗yö ü kë?
6. ˈWɔnman Zoova ˗ta ˗sü ˗yö kwa ˗bha ˈwɔn ˗së ˈka.
ˈWɔnman Zoova ˗ta ˗sü ˗yö ˗së ˈˈtʋ̈ŋ ꞊gban ˈka. ˗Ka Isaïe 48:17, 18 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
-
Ü ˗bha ˈgü, ˈwɔn ˈö ˗së kwa ˗bha ˈka ˈˈtʋ̈ŋ ꞊gban ˈgü Zoova ˗ya ˗dɔ ˗ee? ˈMën ˗kë ˈü˗ pö ˈˈdhʋ̈?
-
ˈWɔn ˗së ˗mɛɛn ˈö Biblö draansü waa ˗Zlan ꞊dede Zoova dɔ ˗sü ꞊waa˗ kë ü ˗dhɛ?
MƐN ˈBHAA ˗NU ˗WA ˗PÖ: «N këwɔn ˈyaa ꞊mɔɔn˗ ˗bha kö ˗yö ˗Zlan zuʋ̈ˈˈ ꞊nii ˗da.»
-
Biblö ˈˈɲan ˗mɛɛn ˈü ˗dho ˗a ˗zɔn ˗a ˗dhɛ kö ˗ya ˈwɔn dɔ ꞊dhɛ kwa këwɔn ˗nu ˗wo pa Zoova zuʋ̈ˈˈ ˈka?
˗A ˈDHƐ TO KWA ˈˈƝAAN
Ü ꞊mɔɔn˗ ˗bha ˈü˗ ˗zɔn ꞊dhɛ Zoova ˗dhɔ ˗yö ü ˗kë ꞊dedewo ˈwɔnman ˗a ˗ta ˗sü waa ˗klu ˗a ˗bha ˗sü ˈö ˈwɔn ˈˈgbɩɩ˗ ˗nu ˈgü ˗ʒiaanwo ˗a ˈka.
˗Zobuödhe
-
˗Gleŋ ˗mɛɛn ˈü˗ sü Zɔbö ˗bha ˈwɔnzuan ˗bha?
-
Ü ˗dho ˗a ˗zɔn ꞊dhɛ Zoova ˗dhɔ ˗yö ü ˗kë ˗kɔ ˗kë ꞊dhɛ?
-
ˈMën ˗dho ü ˗takun kö ˈü ˈto ˗klu ˗sü ˈka Zoova ˗bha?
˗AN ˗GA ˈPÖ
˗Kɔ ˈü ˗dho ˗klu ˗a ˈka Zoova waa ˗zlanwokɔdhi ˗an ˗bha, ˗an ˗ga.
꞊Sua ˈö Sɔtraan ˗ya ˗kë mɛnbhɩɩdhe ˗nu kwa ˗bha, ˈwɔn ˈö ˗gban ˗a ˗bha ˗a ˈbhaa ˗ga.
«Zɔbö ˗yö ˗to ˗klu ˗sü ˈka ˗Zlan ˗bha» (Nɔɔn˗ ˗mɛɛn ˈö Biblö ˈgü? ˈwɔn ˗gɔ 6)
˗Kɔ ˈö ˈnën ˈsɛɛn˗ ˗nu ꞊mɔɔn˗ ˗bha ˈwo˗ ˗zɔn ˗a ˈka ꞊dhɛ Zoova ˗dhɔ ˗yö wo ˗kë, ˗a ˗ga.
Kö wlüünën do ˈbhaa ˈˈtɛɛbɔ ˗nu ˗wa ˗blü ˈwɔn yaa kë ˗sü ˗bha, pë ˈö ꞊mɔɔn˗ ˗bha ˈö˗ ˗kë kö ˗yö ˈto ˗klu ˗sü ˈka Zoova ˗bha, ˗a ˗ga.
Mɛn ˈˈwɛɛ ˗nu ˗wa ü ˗blü ˈwɔn yaa kë ˗sü ˗bha, ˗bhö ˗gban ˗an ˗gɔ (3:59)
