ˈWƆN ˗GƆ 36
˗Bhö kë kpɛnŋdhö ˈwɔn ꞊gban ˈgü!
Kwa˗ ˈˈpiʋ̈ kö kwa ˈˈtɔŋdë ˗nu ˗wo kë kpɛnŋdhö. Zoova ˗ya ˈˈpiʋ̈ ˈpö kö ö ˈˈtɔŋdë ˗nu ˗wo kë kpɛnŋdhö. ˈˈKɛɛ ˗kë kpɛnŋdhösü ˈö ˈˈkpɔnŋtaadhɛ ˈö yö ˗a ˈgü ˗yö ˈˈgbɩɩ˗, ˈyö ˗tɔ ꞊dhɛ mɛn ꞊vadhɛ ˈwo kwa ˗züzü ˈwaa kpɛnŋdhö. Kö ˈkwa kë kpɛnŋdhö ˈwɔn ꞊gban ˈgü, ˗a ꞊trɔɔn ˗mɛɛn ˈö ˈkwa ˗dho ˗a ꞊slɔɔ?
1. ˗Mën ˈö˗ ˗wɔn ˈgü ꞊dedewo ˈö kwa dua ˈdhö ˗mü kö ˈkwa kë kpɛnŋdhö?
ˈKwa kë kpɛnŋdhö kwa˗ ˗zɔn Zoova ˗dhɛ ꞊dhɛ ˗a ˗dhɔ ˗yö kwa ˗kë ˈö ˈkwa˗ ꞊bhlëë ˗ya. ˗Yö kë ü ˈˈɲaan ꞊dhɛ Zoova ˗yö kwa zuʋ̈piʋ̈wɔn ˗nu waa kwa këwɔn ˗nu ˗dɔ. (Eblö 4:13) Kö ˈü ˈwɔn kpɛnŋdhö kë, ˗ya ˗yö ˈö˗ zuʋ̈ˈˈ ꞊nii ˗yö ˗da. ˗A ˈˈDhiwo ˗ya ˗pö: «Mɛn ˈˈzuuzu ˗san ˗yö Zoova ˗kë, ˈˈkɛɛ ˗yö mɛn ˗nu ˈwo kpɛnŋdhö ˗an ˗kë ö ˈˈtɔŋdë ˗nu ˈka.»—Proverbes 3:32.
2. Kwa ˗dho kë kpɛnŋdhö ˈˈtʋ̈ŋ ꞊gban ˈgü ˗kɔ ˗kë ꞊dhɛ?
Zoova ˗ya ˈˈpiʋ̈ ‹kö ˈkwa tɛanwɔn pö kwa ˈko ˗nu ˗dhɛ.› (Efɛzö 4:25) ˗A ˗gɛn ˈnën ˗tɔ ˗mën? Kwa dhiaŋ zë ˗ni ˈgü kwa ˗bha ˈkɔdhigümɛn ˗nu, kwa yökëyɔɔ ˗nu, kwa ꞊dhegblü kletiɛn ˗nu ɛɛnˈˈ ˈˈsɛgɔdhiʋ̈mɛn ˗nu ˗dhɛ, ˈkwaa ꞊sua kë ˗an ˗gɔ ɛɛnˈˈ ˈkwaa ˈˈkpënŋ˗ kë ˗an ˗gɔ. Mɛn ˈö kpɛnŋdhö ˈyaa ꞊kwan ɛɛnˈˈ ˈzü ˈyaa ꞊flüüwɔn kë. (Proverbes 24:28 waa Efɛzö 4:28 ˗wo pö.) ˗Yö ö ˗bha ˈnii˗ ꞊sɔnŋ ˈˈpɛpɛ ˗bho. (Wlɔmö 13:5-7) ˗A ˈdhɛ ˗dho ˈto kwa ˈˈɲaan ˈyö ˗tɔ ˈkwaa˗ ˈˈpiʋ̈ ‹kwa ˈˈta ˗kɔ ˗yö ˗siö tongtongdhö.›—Eblö 13:18.
3. ꞊Trɔɔn ˗mɛɛn ˈö ˗kë kpɛnŋdhösü ˈgü?
Mɛn ˗nu ꞊waa˗ yö ꞊dhɛ kwa kpɛnŋdhö, ˗wo ˈdhaŋ˗ ˗bho kwa ˈˈdhiʋ̈. Kö ˈkwa kë kpɛnŋdhö, kwa kwa ˗kɔ ˗ya ˈdhaŋ˗ ˗bho ö ˈko ˈˈdhiʋ̈ ˗sü ˈö ˗zlawokɔdhi ˈgü ˗a ˗gɔ, ˈö mɛn ꞊gban ˗wo ˗kë mü wo ˈflëëgü. ˗Ya ˗kë ˈö kwa zuʋ̈ˈˈ ˈyaa zadɔ kwa ˗bha. Kwa ˗bha ˗kë kpɛnŋdhösü ˗ya ˗kë ˈpö ˈö mɛn ˗nu ˗wo kwa ˗bha ‹mɛ draan ˗wʋ ˈö go kwa Dhamɛ, kwa ˗bha ˗Zlan ˈˈpiʋ̈ bha˗ ˗dhiang ˗së ze›, ˈö ˗an ˗gan Zoova ˗dhɔkësü ˗bha.—Titö 2:10.
˗KAA ˈˈPIƲ̈ ˈPƆN
˗Kɔ ˈö kwa ˗bha ˗kë kpɛnŋdhösü ˗yö Zoova zuʋ̈ˈˈ ꞊nii ˗da ˗a ˈka, ˈö ˈwɔn ˗së ˗kë ˈpö kwa ꞊dede kwa ˗dhɛ, waa ˗kɔ ˈö ˈkwa ˗dho kë ˗a ˈka kpɛnŋdhö ˈwɔn suu ˈˈoo ˗su ˈgü ˗a ˗bha, ˗kwaa ˗ga.
4. Kwa ˗bha ˗kë kpɛnŋdhösü ˗yö Zoova ˗dhɛ ˗së.
˗Ka Psaume 44:21 waa Malachie 3:16 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
-
Ü ˗bha ˈgü, ˈmën ˗kë ˈö ˈkwaa ꞊mɔɔn˗ ˗bha kö ˈkwa gagade ˗bin?
-
Ü ˗bha ˈgü, kö ˈkwa kwa ˈgü dɔ ˈˈgbɩɩ˗ kö ˈkwa gagade pö, ˗yö ˗kë Zoova ˈgü ˗kɔ ˗kë ꞊dhɛ?
5. ˗Kwa kë kpɛnŋdhö ˈˈtʋ̈ŋ ꞊gban ˈka.
Mɛn ꞊vadhɛ ˗bha ˈka, ˗a ˗dhɛ ˈyaa˗ ˗bha kö ˈkwa gagade pö ˈwɔn ꞊gban ˈgü. ˈˈKɛɛ ˈpë ˗kë ˈö kwa dua ˈdhö ˗mü kö ˈkwa kë kpɛnŋdhö ˈˈtʋ̈ŋ ꞊gban ˈgü, ˗kwaa ˗ga. ˗Kaa VIDEO ˗ga.
˗Ka Eblö 13:18 ˗wo pö, kö ˗kɔ ˈö ˈkwa ˗dho kë ˗a ˈka kpɛnŋdhö ...
-
kwa ˗bha ˈkɔdhi ˈgümɛn ˗nu ˈˈpiʋ̈,
-
yö ˈˈdhiʋ̈ ɛɛnˈˈ ꞊klaŋplöö,
-
ɛɛnˈˈ ˈzü ˈwɔn ˈˈwɛɛ ˈbhaa ˗nu ˈgü, ˈka ˗an ˗wɔn blɛɛˈˈ.
6. ˈWɔn ˗së ꞊va ˗yö ˗kë kpɛnŋdhösü ˈgü.
ˈWɔn ˈbhaa ˗nu ˈgü, ˗yö ꞊mɔɔn˗ ˗bha ˈö ˗kë kwa ˈgü ꞊dhɛ ˈkwa gagade pö kwa ˗dho ˈwɔn ꞊slɔɔ˗ ˗a ˈgü. ˈˈKɛɛ kwa˗ ˗yö ˗kplawo ꞊dhɛ ˗kë kpɛnŋdhösü ˈnën ˈö ˗së. ˗Ka Psaume 34:12-16 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
-
˗Kë kpɛnŋdhösü ˗yö ü ˗bha ˗tosɛta kë ˗së ˗kɔ ˗kë ꞊dhɛ?
-
(1). Dhe waa ö ꞊gɔn ˈwo kpɛndhö, ˗an ˗bha ˈkɔdhi ˗gɛn ˗yö ˗gban.
-
(2). Yökëmɛn ˈö kpɛnŋdhö, ˗a ˗gɔmɛn ˗yo ö ˗zo ˗yö ˗a ˗dhɛ.
-
(3). Mɛn ˗nu ˈwo kpɛnŋdhö wo ˗bha ˈˈsɛ ˈgü, ˈˈsɛgɔdhiʋ̈mɛn ˗nu ˗wo ˗an ꞊bhlëë ˗ya.
MƐN ˈBHAA ˗NU ˗WA ˗PÖ: «꞊Sua ˈsɛɛn˗ ˗nu kë ˗sü ˈyaa ˈyaa˗.»
-
Ü ˗bha ˈgü, ˈmën ˗kë ˈö ꞊sua suu ˈˈpɛpɛ ˈdhö Zoova ˗dhɛ ˈyaa˗?
˗A ˈDHƐ TO KWA ˈˈƝAAN
Zoova ˗ya ˈˈpiʋ̈ kö ö ˈˈtɔŋdë ˗nu ˗wo kë kpɛnŋdhö ˈwɔn ꞊gban ˈˈpɛpɛ ˈwo˗ pö ɛɛnˈˈ ˈwo ˗an ˗kë ˗an ˈgü.
˗Zobuödhe
-
˗Kë kpɛnŋdhö ˗kɔ ˈbhaa ˗nu ˈtɔ˗ ˗mën?
-
ˈMën ˗kë ˈö ˈkwaa ˗mɔn ˗a ˗bha toŋtoŋdhö kö ˈkwa gagade ˗bin?
-
ˈMën ˗kë ˈü˗ ˈˈpiʋ̈ ˈü kë kpɛnŋdhö ˈˈtʋ̈ŋ ꞊gban ˈgü?
˗AN ˗GA ˈPÖ
˗Kɔ ˈö ˈnënmɛn ˗nu ꞊mɔɔn˗ ˗bha ˈwo ˗kë kpɛnŋdhösü ˗gleŋ ˗da ˗a ˈka wo ˗bha ˈnën ˗nu ˗bha, ˗a ˗ga.
ˈWɔn ˗së ˗nu ˈö ˗to ö ˗wo ˗ta ˗sü ˗wa ˗kë kwa ˗dhɛ ˗an ˗ga.
ˈKö ˗kë ꞊dhɛ ˈnii˗ ꞊sɔnŋ ˗nu ˈö ˈkwa ˗an bho ˈˈsɛgɔdhiʋ̈mɛn ˗nu ˈwaa ˈwɔn kpɛnŋdhö kë ˗an ˈka, ˈpë ˗kë ˈö kwa dua ˈdhö ˗mü kö ˈkwa ˗an bho, ˗a ˗ga.
«Kwa dua ˗mü kö ˈkwa ˈnii˗ ꞊sɔnŋ bho ˗ee?» (˗Kwɛ 2011 Sɛtanblö 1 ˗bha ˈˈGlaadhiʋ̈ ˗tɔn)
Pë ˈö gɔndë do ö ˈyaa kun kpɛnŋdhö ˗be ˗a ˗takun ˈö ö ˈˈtakɔ bho ˈˈgblʋʋ, ˈö yö ˈö kpɛnŋdhö ˗a ˗kë, ˗a ˗ga.
«A˗ ˗yö ꞊dhɛ mɛn ˗wëë ˗yö Zoova ˗kë ˈö mɛn ˗bhawɔn to» (˗Kwɛ 2015 ˈMɛn 1 ˗bha ˈˈGlaadhiʋ̈ ˗tɔn)