˗KA ˗YA KA ˈˈYAAN!
˗Kwɛ 2022 ˗kë zuʋ̈dhiʋ̈tɛɛ waa ˗bhluubhludhe ˗kwɛ ꞊dede ˈka: ˈMën Biblö ˗ya pö?
˗Kwɛ 2022 ˈgü, kwa nɔɔn˗ ˗nu ˈwo ˗gban ˗gblü, ˈwëëga waa ˈˈsɛ ˗wɔn ˗nu ˗bha ˗an ꞊va ꞊dede ˗man. ˈWɔn ˗nu ˈwo ˗kë bhë Biblö dosɛnŋ ꞊nën ˈö ˗an kë ˗gɛn pö ˈkpakpadhö.
ˈWɔn ˗nu ˈwo ˗kë ˗kwɛ 2022 ˈgü bhë ˗an kë ˗gɛn ˈnën ˗tɔ ˗mën?
ˈWɔn ˗nu ˈwo ˗kë ˗kwɛ ˈö yö ˗a ˈka bhë, ˗wa ˗zɔn ˈzü ˈˈpuu ˈka ꞊dhɛ kwa ˈˈtʋ̈ŋ ˈö Biblö ˗ya ˗dhɛ «ˈˈkpʋngtaadhɛ yën ˈˈtʋ̈ng» bhë ˈnën˗ ˈgü. (2 Timote 3:1) ˗A ˈˈtʋ̈ŋ ˈö ˈˈdhʋ̈ ˗a zü ˗yö ˗dɔ ˗kwɛ 1914 ˈka. ˈWɔn ˗nu ˈwo kë ˗ni ˈgü ˈˈtʋ̈ŋ ˈö yö ˗a ˈgü, ˗kɔ ˈö ˈwo ˗bɛ ˗a ˈka pë ˈö Biblö ˗ya to ˈˈdhiʋ̈ ˈö˗ ꞊blɛɛ ˈö ˗gban kwa ˗bha ˈˈtʋ̈ŋ ˗bha ˗a ˗bha, ˗bhö ˗a ˗ga:
«˗Gblü.»—Matiö 24:6.
«˗Kwɛ 2022 ˈgü, Edhɔpö ˗mɛn ˗nu ˈˈɲan ˗yö ˗da ˗züzü ˈwɔn yaa ˈö ˗gblü ˗ya ˗kë, ˗a ˈgü.» a
Kpɔɔˈˈ ˈwɔn ˗gɔ «Rusimɛn ˗nu ˗wa ˈsɔ Üklɛnö ˗dhɛ ˗ta» ˗bha.
«ˈˈVʋ̈ʋ̈.»—Matiö 24:7.
«Din ˗yö mɛn ꞊va ꞊dede ˗kë ˗kwɛ 2022 ˈgü.» b
Kpɔɔˈˈ ˈwɔn ˗gɔ «˗Gblü ˈö Üklɛnö ˗ya ˗bhöpë ˗wɔn kë ˈˈgbɩɩ˗ ˈzü» ˗bha.
«ˈˈYua yaya ˗nu.»—Dhukö 21:11.
«ˈˈYua ˈö ˈnën ˗nu gɛn ꞊loo ˗ya nu ˗dɛɛwo. ꞊Kwlëëkaagü ˗yö ˗ya ˗ni ˈgü mɛn ꞊va ˗bha. ꞊Ya ˈgo mü ˈzü korona ˗yö mɛn ˗nu zë ˗ni ˈgü ˗kplawo. ˈˈYua ˗nu ˈö ˈwo bhë ˗wa ˗zɔn ꞊dhɛ ˗an ˗kɔ ˗yö ˈˈgbɩɩ˗, ˈgo mü ˈzü mɛnbhɩɩdhe ˗nu ˈwaa pë ˈbha ˈka ˗an wëëdhö.» c
Kpɔɔˈˈ ˈwɔn ˗gɔ «Mɛn ˈˈmliɲɔn 6 ꞊nën korona ˗ya ˗an zë» ˗bha.
«ˈˈDhabhliwɔn ˗nu ˈö ꞊ya kë ˈö ˈˈsuʋ̈ ˗da mɛ ˈgü.»—Dhukö 21:11.
«ˈˈWodɔsü, ˗dhɛ ˗nu ˗bha ˈˈkpɛɛ ˈkun ˗sü, shiʋ̈ˈˈ ˗nu ˗bha ˗da ˈˈblü ˗nu ˈka ˗sü waa ˈˈyi ˗bha pa ˗sü ˗nu. ˈˈWo dɔ ˈˈtʋ̈ŋ ˈö kun ˈˈsɛ ˈbha ˗nu ˈgü ˗kwɛ 2022 ˈgü bhë, mɛn ˗nu zo ˈyii ˈdho bhɔ ˗a ˈka ˈyö ˗tɔ ꞊dhɛ ˈˈwo ˗yö ˗dɔ ꞊dedewo ˈö pë ꞊shiö, ˈö mɛn ˈˈgblü ꞊va zë, ˈgo mü ˈzü ˈö˗ ˗kë ˈö mɛn ˈˈmliɲɔn ꞊va ˗wo wo ˗bha ˈkɔ to ˈö ˈwo ꞊duëë.» d
Kpɔɔˈˈ ˈwɔn ˗gɔ «ˈˈWo ˗dɔ ˗ni ˈgü ꞊dedewo ˗dhɛ ꞊gban ˈgü» ˗bha.
«˗Dɔ ˈko ˗gɔ ˈyënng ˗wun ˗nu ɛɛnˈˈ ˗bhluubhludhe ˗nu.»—Dhukö 21:9, NTBL.
«˗Dhɛ ˈö ˗kë ꞊dhɛ ˈwɔn ˗yö ˗shiö ꞊dedewo mɛn ˗nu ˗dhɛ pë ˗nu sɔnŋ ˗bha ˗dadhiʋ̈ ˗sü ˗wɔn ˈgü bhë, ˗wo ˈˈta ˗sü ꞊dedewo ˗kwɛ 2022 ˈgü, ˈö ˈwo ˗gban ˈˈsɛgɔdhiʋ̈mɛn ˗nu ˗gɔ.» e
Kpɔɔˈˈ ˈwɔn ˗gɔ «Pë ˗nu sɔnŋ ˗yö ˗da ˗ni ˈgü˗ ˈˈdhiʋ̈ ꞊dedewo ˈˈkpɔnŋ ꞊taa» ˗bha.
˗Mën ˈö ˈˈɲan ˈto ˗ni ˈgü kwa ˗gɔ ˗kwɛ ˗dhɛ ˈö nu ˗ni ˈgü yö, ˗a ˈka?
ˈWɔn ˗nu ˈwo ˗dho kë ˗kwɛ 2023 ˈgü bhë, mɛn ˈbhaa ˈyaa ꞊mɔɔn˗ ˗bha kö ˗ya pö ꞊dhɛ ˗yö ˗an ˗dɔ ˈkpakpadhö. ˗A ˗dhɛ ˈö yi ˗zë ˈyi˗ dɔ ˈyö ˈtɔ˗ ˗a ˈˈtʋ̈ŋ ˈyaa ꞊gblɛɛn ˈzü kö ˗Zlan ˗bha ˗Gblüdëdhɛ, ˗a ˗bha mɛnkɔɔnsü ˈö dhaŋ˗ ˈgü bhë ˗yö ˈwɔn ˗nu bho ˈˈgblʋʋ ˈˈkpɔnŋ ꞊taa. (Daniel 2:44) ˗Gblüdëdhɛ ˈö bhë ˗dho pë ˈˈpɛpɛ ˈö saanˈˈ wɔ ˗ni ˈgü mɛnbhɩɩdhe ˗nu ˗ta ˗a bho ˈˈshia˗, ˈö˗ ˗kë ˈö ˗Zlan dhɔɔbhaawɔn ˗yö ˗kë ˈˈsɛ ˗ta ˗dhɛ ꞊gban ˈgü.—Matiö 6:9, 10.
Yi ü ꞊faan ˗dɔ ꞊dedewo kö ˈü ˈto Yesu ˗bha ˗dhioo ˗nu ˈˈpiʋ̈ kö ‹ˈü ˗ya ü ˈˈyaan,› kö ˗kɔ ˈö ˈwɔn ˗nu ˈwo kë ˗ni ˈgü ꞊dɛɛ ˈˈkpɔnŋ ꞊taa ˈwo pë ˈö Biblö ˗ya to ˈˈdhiʋ̈ ˈö˗ ꞊blɛɛ ˗a yökodhiʋ̈ ˗a ˈka, ˗a ˈsuan˗ bho. (Makö 13:37) ˗Kɔ ˈö Biblö ˈö ꞊mɔɔn˗ ˗bha ˈö ü ˗takun ˗a ˈka ˈˈtʋ̈ŋ yö ˗a ˈgü, ˈö˗ ˗kë ˈö kaa ü ˗bha ˈkɔdhigümɛn ˈka ka ˈˈɲan to ˗dhɛkpaɔ dhiʋ̈ˈˈ ˗së ˗gɔ, ˈbha˗ pö ˈü dɔ, ˗bhö yö yi ˗bha.
a AP News, “2022 Was Year the Horror of War Returned to Europe,” ˈö Jill Lawless ˈö˗ pö ˗kwɛ 2022 Desanblö 8 ˈka.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” ˈö Lawrence O. Gostin, JD ˈö˗ ˗ya ˗kwɛ 2022 Sɛtanblö 22 ˈka.
d Earth.Org, “What’s Behind the Record-Breaking Extreme Weather Events of Summer 2022?” ˈö Martina Igini ˗ya ˗ya ˗kwɛ 2022 Ɔtɔblö 24 ˈka.
e Carnegie Endowment for International Peace, “Economic Anger Dominated Global Protests in 2022,” ˈö Thomas Carothers waa Benjamin Feldman ˈwo˗ ˗ya ˗kwɛ 2022 Desanblö 8 ˈka.
˗A ˗ga ˗sü ˗dhɔ ˗dho ü kë ˈpö
ESSENTIAL BIBLE TEACHINGS
-Mën ˈö -tɔ -Zlan -bha -Gblüdëdhɛ?
Kö Yesu -yö ꞊kun ˈˈsɛ -ta, -yö -Zlan -bha -Gblüdëdhɛ -wɔn -blɛɛ ꞊va, ˈö -ʒiö -a ˈka ˈwɔn ꞊gban ˈˈpɛpɛ -ta. -Kwɛ kënŋ ꞊va ꞊dede -ya ʒiö, ˈö- -bha gwëëˈˈ -nu ˈdho bhɛɛˈˈ -ni ˈgü kö -Gblüdëdhɛ ˈö ˈˈdhʋ̈ -yö nu.
ˈWƆN ˗NU ˈWO ˗GBAN YI ˗BHA
˗A pö ˗wo ˗wo ü ˗dhɛ
Dhɛɛˈˈ ˗nu ˈö Biblö ˗yö ˗an ˗yɔ bɔ, ˗bhö ˗a do ˗ga ɛɛnˈˈ ˗bhö ˈwɔn ˗nu ˈwo ˗gban Zoova ˗bha ꞊Gbɛkiö ˗nu ˗bha ˗a ꞊va ˈbha draanˈˈ.
