˗Kwɛ 2022 ˈMɛn ˈˈsu 19 ˈka, ONU ˗bha yökëdhɛ ˈˈpian ˈö˗ ˗bha ˗yö ˗gban ˗yadeflëëgüsü ˗bha bhë, ˗an ˗bha ˗bhɔkwëë do ˗ta ˈˈkwi ˗gɔmɛn ˈˈgblʋ̈gblʋ̈ ˈwo ˗ʒiö mɛn 75 ˗ta ˗wa ˗pö ꞊dhɛ «˗bhöpë ˗wɔn ˈö korona ˗yua waa ˈˈtʋ̈ŋ ˗bha ˗slëë ˗a ˈgü ˗sü ˈwo˗ ˗da ˈˈkpɔnŋ ꞊taa bhë, ˗gblü ˈö Üklɛnö ˗ya nu ꞊yaa˗ ˗dadhiʋ̈ ˈzü ꞊dedewo. ˗A ˗wɔn ˈgü ˈˈvʋ̈ʋ̈ ꞊mɔɔn˗ ˗bha ˈö ˗da ˗dhɛ ˈbhaa ˗nu ˈgü.» ˗Dhɛ ˈwo˗ pö ˈˈdhʋ̈, ˗a ˈˈtʋ̈ŋ ˈyii ꞊gwëë ˈyö zuunalö ˈwo˗ The Economist ˗kë bhë ˈö˗ pö ꞊dhɛ «˗gblü ˈö bhë ˗a ˗wɔn ˈgü, ˈˈkpɔnŋtaamɛn ˗nu ˈö ˈwɔn ˈˈgbɩɩ˗ ˗ya pa ˗an ˗ta ˈsaadhö bhë, ˗a mɛn ˈbhaa ˗nu ˗dho ˈˈvʋ̈ʋ̈ dɔ.» Biblö ˗ya ˗to ˈˈdhiʋ̈ ˈö˗ pö ꞊dhɛ ˗bhöpë ˗wɔn ˗dho kë kwa ˗bha ˈˈtʋ̈ŋ ˈgü. ˈˈKɛɛ ˗yö ˈpë ˈkwa dho ˗a kë kö ˈkwa bɔ ˗a ˈgü zuʋ̈saadhɛ ˈka ˗a ˗zɔn.

•    Yesu ˗ya ˗to ˈˈdhiʋ̈ ˈö˗ pö: «ˈˈSɛgɔ ˈbha˗ ˗dho ˈˈwlü ˈö ˗pö ˈˈsɛgɔ ˈbha ˗ta ˈö ˈwo ˗gblü gɔɔn, ˈö ˗gblüdë ˈbha ˗yö ꞊wlü ˈö dho ˈö ˗gblü ˗da ˗gblüdë ˈbha ˗ta, ˈö ˈˈvʋ̈ʋ̈ ˗yö ˗da.»—Matiö 24:7.

•    ˗Dhɛkpaɔ dhiaˈˈ ˈsëëdhɛ ˗yö ꞊sootamɛn ˈbhaa ˗nu ˗wɔn ˗blɛɛ. ꞊Sootamɛn ˗nu bhë ˗a mɛn do ˈnën ˗tɔ ˗gblü ˈˈblɛɛn˗. ˈYö ˗a mɛn ˗dhɛ ˈö dɔ ˗a ˈˈpiʋ̈ bhë ˈyö ˗tɔ din˗ ˈˈblɛɛn˗. ˗A ˗bha ˈˈtʋ̈ŋ ˈgü ˗bhöpë ꞊slɔɔdhɛ ˗dho kë ˈya˗ ˈö mɛn ˗nu ˗dho ˗a sɔnŋ ˗dadhiʋ̈ ˗kɔ yaa kë. «ˈYö ˈa ꞊soo tii do yö kö ˗yö nu sië. Kö ˈmɛ ˈö˗ ˗ta bha pë ˗dan ˈka ˗tɛa do ˗ya ꞊kwɛɛ˗. ˈYö ˈa ˗wʋ do ˈbha ma kö ˗yö ˈgo sië [...] ‹˗bhö ˗mlüga waa˗ ˈˈklëënga bha˗ ˗nu dan kö ˈi˗ ˈˈdhɔɔ ˗siö. ˗Wo ˗mlü ˈtɛa˗ ˗yan do ˈdhɔ ˈwëëga ˈwo ˗dhɛkpaɔyi do ˗yë ꞊saa bho˗ ˈka bha˗ ˈka, kö ˗wo ˈˈklëën ˈtɛa˗ ˗yan ˗yaaga ˈdhɔ ˈˈdhʋ̈ ˈpö.›»—˗Dhɛkpaɔ dhiaˈˈ ˈsëëdhɛ 6:5, 6.

 ˈWɔn ˈö Biblö ˗ya to ˈˈdhiʋ̈ ˈö˗ ꞊blɛɛ ˈö ˗gban ˗bhöpë ˗wɔn ˗bha bhë, ˗yö kë ˗ni ˈgü ꞊dɛɛ ˈˈtʋ̈ŋ ˈö Biblö ˗ya ˗dhɛ «ˈˈkpʋngtaadhɛ yën ˈˈtʋ̈ng» bhë ˗a ˈgü. (2 Timote 3:1) ˈWɔn ˈö ˗gban «ˈˈkpʋngtaadhɛ yën ˈˈtʋ̈ng» waa ꞊sootamɛn ˗nu ˗yiishiö ˈö ˗Dhɛkpaɔ dhiaˈˈ ˈsëëdhɛ ˗ya ˗an ˗wɔn ꞊blɛɛ bhë ˗an ˗bha, ˈü˗ ˈˈpiʋ̈ ˈü˗ ˈbha ˈgüman, ˗bhö video Le monde a changé depuis 1914 ga, kö ˈü ˈwɔn ˗gɔ « Les cavaliers de l’Apocalypse : qui sont-ils ? » ˗wo pö.

•    ˗Dhioo ˗së ꞊dede ˗nu ˈwo Biblö ˈgü ˈö ˈwo ꞊mɔɔn˗ ˗bha kö ˗wo ü ˗takun kö ˈü bɔ ˈwɔn ˈˈgbɩɩ˗ ˗nu ˈwo ˗kë ꞊dhɛ pë ꞊sɔɔn ˗bha ˗dadhiʋ̈ ˗sü ɛɛnˈˈ ˈˈvʋ̈ʋ̈ ˗nu ˈdhö bhë ˗an ˈgü zuʋ̈saadhɛ ˈka. ˗A ˗dhioo ˗nu ˈwo ˈˈdhʋ̈ ˗a ˈbhaa ˗nu ˗ga ˈwɔn ˗gɔ ˈö ˗kë « Comment vivre avec moins » ˈka bhë ˗a ˈgü.

•    Biblö ˗yö ˗zoyö ˗dhɛkpaɔ dhiʋ̈ˈˈ ˗së ˗nu kwa ˗dhɛ ˗a ˗zɔn ˗sü ˈka ꞊dhɛ ˈwɔn ˗nu ˗dho kë ˗së. ˗Ya ˗pö ꞊dhɛ «˗bhöpë ga ˗nu ˗dho kë ꞊va ˗dhɛ ꞊gban ˈgü ˈˈkpɔnŋ ꞊taa» ˈö ˈpë mɛn ˈö ˈdhö ˗dho ˗a ˗bhö ˈö ˗kë ꞊va. (Psaume 72:16) ˈÜ˗ ˈˈpiʋ̈ kö ˈwɔn ˈö ˗gban ˗dhɛkpaɔ dhiʋ̈ˈˈ ˗së ˈö Biblö ˗ya ꞊blɛɛ bhë waa ˈpë ˗kë ˈkwa ˗dho ˈdhaŋ bho ˗a ˈˈdhiʋ̈ ˗an ˗bha ˗a ꞊va ˈbha dɔ, ˗bhö ˈwɔn ˗gɔ « Une espérance réelle pour des jours meilleurs » ˗wo pö.