˗Kwɛ 2024 Ɔtɔblö 9 ˈka, Fonds mondial pour la nature ˗yö pë ˈˈsuʋ̈sü ˈbha ˈö ˗gban ˗kɔ ˈö mɛnbhɩɩdhe ˗nu ˈwo wü ˗nu ˈwo ˈˈblü ˗an ˈgü shiʋ̈ˈˈ ˗ni ˈgü ˗a ˈka ˗a ˗bha, ˗a ˗wɔn ˗blɛɛ. ˗Ya ˗pö ꞊dhɛ ˗kwɛ 50 ˈö ˈwo ʒiö yö ˗a ˈgü (˗kwɛ 1970-2020), wü ˗nu ˈö ˈwo˗ pö ꞊dhɛ mɛn ˗nu ˈwaa ˈdho ˗an zë, ˈö ˈwo kun ˈˈkpɔnŋ ꞊taa ˗an ˈˈdhi ˗ya ˈdho ˈˈshia˗ ꞊dedewo. ˗A 100 do ˗ta, ˗a 73 ˈnën ˗wa ga ɛɛnˈˈ mɛnbhɩɩdhe ˗nu ˗wa ˗an zë. ˗Kɔlokota ˈkpii˗ ˈö bhë, ˗ya ˗pö ˈzü: «ˈWɔn ˗nu ˈwo dho kë ˗kwɛ ˈˈsoodhu ˈwo nu ˗ni ˈgü yö ˗an ˈka, ˗wo ˗dho ˗a kë ˈö ˈkwa˗ ˈwɔn dɔ ˈˈni kwa ˗dho ꞊mɔɔn ˗tosɛta kë ˗sü ˗bha ˈˈsɛ ˗ta yö, ɛɛnˈˈ ˈkwii ˈdho ꞊mɔɔn˗ ˗bha. ˈYö ˈwɔn ˗nu ˗ʒiö ꞊gɔɔ ˗sü ˈyaa ˗mü.»

 Pë ˈö ˈwo˗ pö bhë, ˗ya mɛn ꞊va ꞊dede ˈgü ga. ˈYö ˗a ˗dhɛ ˗mü ꞊dedewo. Kwa ˗bha ˈˈkpɔnŋtaadhɛ ˗dhɔ ˗yö kwa ˗kë, ˈgo mü ˈzü ˈkwa ˗kpan ˈˈblüwü ˗nu ˗bha kö ˗wo saanˈˈ ˈsü ˗ni ˈgü ꞊dhɛ ˗kɔ bhë ˗a ˈdhö, ˗yö ˗mën kwa ˈka. ˗Yö ˗mën kwa ˈka, ˈyö ˗tɔ ꞊dhɛ ˗Zlan ˗yö kwa ˗da kö ˈkwa kwa ˗zokë wü ˗nu ˈˈpiʋ̈.—ˈWunzüdɔdhɛ 1:27, 28; Proverbes 12:10.

 ˗Dhɛ ˈö ˈˈdhʋ̈, ü ꞊mɔɔn˗ ˗bha ˈü ü ˗de dhɛɛˈˈ kpɔ ˈü˗ pö: ‹Kwa ˗dho ꞊mɔɔn˗ ˗bha ˈsa ˈkwa kwa ˗zokë ˈˈblüwü ˗nu ˈˈpiʋ̈ ˗ee? ˈMën Biblö ˗ya pö?›

 ˈKö ˗kë ꞊dhɛ kwa pë ˈˈpɛpɛ ˗kë kö ˈkwa kwa ˗kɔ kpa wü ˗nu ˗ta, ˗a ˈˈsɩ ˈyaa kwa ˗dhɛ kö ˈkwa˗ kë kö mɛn ˗nu ˈwaa ˈdho ˗an ˈgü shiʋ̈ˈˈ ˈzü. ˗Zlan yöö dosɛnŋ ˈnën ꞊mɔɔn ˗a ˗bha ˈö ö ˗kɔ kpa wü ˗nu ˗ta ˗së ˈka. Biblö ˗ya ˗to ˈˈdhiʋ̈ ˈö˗ pö ˗Dhɛkpaɔ dhiaˈˈ ˈsëëdhɛ 11:18 ˈgü ꞊dhɛ ˗Zlan ˗dho «ˈwɔn bho ˈˈsɛ see˗ ˗mɛ ˗nu ˈgü.» Biblö ˈˈɲan ˈö bhë ˗yö kwa ꞊klaŋ ˗kë ˈwɔn ꞊plɛ ꞊nën˗ ˈka:

1.  1. ˗Zlan ˗dho ˗a kë ˈö mɛnbhɩɩdhe ˗nu ˈwii ˈdho ꞊mɔɔn ˈˈsɛ shiʋ̈ˈˈ ˗bha ˈpapadhö. ˗Yö ˗dho ˗an ˈduannu.

2.  2. ˈˈTʋ̈ŋ ˈö ˗Zlan dho ˈwɔn ˗nu ˈˈɲan bhɔ ˗a ˈka, ˈyaa ꞊gblɛɛn ˈzü. Kwa˗ ˈwɔn ˗dɔ ˈˈdhʋ̈ ˗kɔ ˗kë ꞊dhɛ? Kwa˗ ˈwɔn ˗dɔ ˈˈdhʋ̈ ˈyö ˗tɔ ꞊dhɛ wü ˗nu ˈö mɛnbhɩɩdhe ˗nu ˈwo ˗an ˈgü shiʋ̈ˈˈ ˗ni ˈgü ꞊dɛɛ, ˗wa ʒiö ˈˈtʋ̈ŋ ꞊gban ˗bhaa ˗ta.

 ˈMën ˗Zlan ˈö ˗dho ˗a kë kö ˗yö ˈwɔn ˈö bhë ˗a ˈˈɲan bhɔ? ˗Yö ˗dho bɔ ˗a ˗bha mɛnkɔɔnsü ˈö dhaŋ˗ ˈgü ɛɛnˈˈ ˗a ˗bha ˗Gblüdëdhɛ ˗ta kö ˗yö ˈˈkpɔnŋtaadhɛ ˗todhʋ̈sü ꞊kɔɔn. (Matiö 6:10) Mɛnkɔɔnsü ˈö bhë, ˗yö ˗dho mɛnbhɩɩdhe ˗nu ˈö ˈwo ˈwɔn man ˗Zlan ˗ta ˗an ꞊klaŋ kë kö ˗kɔ ˈö ˈwo dho wo ˗zokë ˗a ˈka ˈˈkpɔnŋtaadhɛ waa wü ˗nu ˈˈpiʋ̈, ˗wa dɔ.—Isaïe 11:9.