˗KA ˗YA KA ˈˈYAAN!
ˈDe ˗dho mɛn ˗nu ˈö ˈwaa ˈˈsɔdha ˈka ɛɛnˈˈ ˈö ˗an ˗kɔ ˈyaa ˗gblü ˈgü, ˗an dha?: ˈMën Biblö ˗ya pö?
Nashiɔn zuni ˗mɛn ˗nu ˗wa ˗pö:
ˈÖ sü ˗kwɛ 2023 Ɔtɔblö 7˗bha ˈö yö˗ ˈka Ɔtɔblö 23 ˗bha, mɛn ˗nu ˈö ˈwo ˗ʒiö mɛn 6.400 ˗ta ˈnën ˈwo ˗an zë ˗gblü ˈö Gaza, Izraɛdhö bhë ˗a ˈgü. ˈYö mɛn ˗nu ˈwo ꞊gii ˗wo ˗ʒiö mɛn 15.200 ˗ta. Mɛn ˗nu ˈwo ga waa˗ mɛn ˗nu ˈö ˈwo ꞊gii bhë, ˗a mɛn ꞊vadhɛ ˈwaa ˈˈsɔdha ˈka ɛɛnˈˈ ˗an ˗kɔ ˈyaa ˗gblü bhë˗ ˈgü. ˗Gblü ˈö bhë ˗a ˗wɔn ˈgü ˈzü, mɛn ˈˈgblü këŋ ꞊va ˗wa ꞊duëë.
˗Dhɛ ˈö ˈkwa yö ˗kwɛ 2023 Sɛtanblö 24 ˗bha, kö mɛn ˗nu ˈö ˈwaa ˈˈsɔdha ˈka ɛɛnˈˈ ˈö ˗an ˗kɔ ˈyaa ˗gblü ˈgü, ˈö ˈwo ga ˗gblü ˈö Üklɛnömɛn ˗nu waa Rusimɛn ˗nu ꞊zinŋ ˈgü bhë ˗a ˈgü, ˗wa ˗da mɛn 9.701 ˈgü. Mɛn ˗nu ˈö ˈwo ꞊gii wo ˗zë ˗wa kë mɛn 17.748.
˗Dhɛkpaɔ dhiʋ̈ˈˈ ˗së ˗mɛɛn ˈö Biblö ˗ya ˈˈplüün bho mɛn ˗nu ˈö ˈwo saanˈˈ ˈsü ˗ni ˈgü ˗gblü ˈˈgblʋʋ ˈˈpiʋ̈, ˗an ˗dhɛ?
Pë ˈö ꞊mɔɔn˗ ˗bha ˈö kwa zuʋ̈ˈˈ ˗kë ˗saa
Biblö ˗ya ˗pö ꞊dhɛ ˗Zlan ˗dho «˗gblü ɲën ˈˈsɛ ˗todhʋ̈sü ˗ta.» (Psaume 46:9) -Yö -dho bɔ ˗a ˗bha mɛnkɔɔnsü ˈö dhaŋ˗ ˈgü ɛɛnˈˈ ˗a bha ˗gblüdëdhɛ ˗ta kö ˗yö mɛnbhɩɩdhe ˗nu ˗bha mɛnkɔɔnsü ꞊gban ˈˈpɛpɛ ˈgü shiʋ̈ˈˈ. (Daniel 2:44) ˗Zlan ˗bha ˗Gblüdëdhɛ ˗dho zuʋ̈wannusü nu mɛnbhɩɩdhe ꞊gban ˗dhɛ.
Pë ˈö Yesu ˈö ˗kë ˗Zlan ˗bha ˗Gblüdëdhɛ ˗Gɔdhiʋ̈mɛn ˈka ˈö ˗dho ˗a kë, ˗bhö ˗a ˗ga:
«˗A ˗gɛn ˗mü ꞊dhɛ ˈˈflɛɛmɛn ˈö ˗takundhe ˗dhɛ ˗ni ˈgü ˈˈgbʋ ˈka, ˗wëëmɛn waa ˈmɛn ˈö˗ ˗takunmɛn ˈyaa ˈdhö, ˗yö ˗dho ˗an dha. ˈNën ˈˈtɩtɩ waa ˈˈflɛɛmɛn ˗nu ˗wëë ˗dho ˗a kë, ˈö ˈˈflɛɛmɛn ˗nu dha. ˗Yö ˗dho ˗an dha ˈˈklʋʋbhɔdhe waa ˈˈvaanvandhɛ ˗an ˗gɔ.»—Psaume 72:12-14.
-Zlan -dho bɔ ö ˗bha ˗Gblüdëdhɛ ˗ta ˈö saanˈˈ waa ˈwɔn yaa ˈˈpɛpɛ ˈö ˗gblü waa ˈˈvaanvandhɛ ˈwo nu ˗an ˈka bhë, ˗an bho ˈˈshia ˈpapadhö.
«˗Yö ˗dho ö ˗kɔ ziö˗ ˗nu ˈˈyan ˈˈdhiʋ̈, ˈö˗ ˗nu ˈˈyanyi ꞊gban bho mü ˈˈpɛɛpɛdhö. Ga ˈyii ˈdho bhɔ ˈzü, ˈˈɛɛn ˗wëë ˗ya wo ˗sü ˈbha ˈyii ˈdho kë ˈzü, ˗wëëwʋ ˈkpɔ ˗sü waa˗ pë ˗ma mɛ ˈka ˗sü ꞊gbaan yën. ˗A ˗gɛn ˗mü ꞊dhɛ ˈwɔn ˈˈpɛpɛ ˈdhɛ ˈkö gun kë sië zii ˗blɛɛsü bha˗ ꞊gbaan ziö.»—˗Dhɛkpaɔ dhiaˈˈ ˈsëëdhɛ 21:4.
-A ˈˈtʋ̈ŋ ˈyaa ꞊gblɛɛn ˗zü kö ˗Zlan ˗yö ˈwɔn ˗nu bho ˈˈgblʋʋ ˈˈkpɔnŋ ꞊taa. Biblö ˗ya ˗to ˈˈdhiʋ̈ ˈö˗ pö ꞊dhɛ kwa -dho ‹˗gblü ˗da ˗wɔn ˗nu ma kwa ˗züzü ˗dhɛ ˗nu ˈgü ˈö ˈkwa˗ ˗taɔng ˗nu ma ˗dhɛ ꞊gblɛɛn ˈgü.› (Matiö 24:6) ˈWɔn ˗nu ˈö ˈwo bhë ˗wa ˗zɔn ꞊dhɛ ˈkwa mɛnbhɩɩdhe ˗nu ˗bha mɛnkɔɔnsü «yën ˈˈtʋ̈ng ˈgü.».—2 Timote 3:1