˗Kwɛ 2022 ˈMɛn ˈˈsu 24 ˈka, ˈwɔn yaa ˈkpii˗ ˈbha ˗yö ˗kë Yuvaldö, Tɛsasö, Zeta zuni ˗sɛ ˈgü. Zuunalö ˈwo˗ The New York Times ˗kë bhë ˗ya ˗pö ꞊dhɛ «ˈnëngɔɔnnën do ˈbha ˈö buu ˈdhö kun ˗a ˗gɔ, ˗yö buu ˗da ˈnën 19 waa ꞊klaŋgɔmɛn ꞊plɛ ˗bha ˈö ˗an zë ꞊klaŋplöödhɛ ˈwo˗ ˗dhɛ Robb bhë ˗a ˈgü.»

 ˈWɔn yaa ˈö ˈdhö ˈyö ˗tɔ ˈwɔn yaa suu ˗nu ˈwo ˈˈdhʋ̈, ˗wo ˗kë ˈˈtʋ̈ŋ ꞊vadhɛ ˈka. Zuunalö ˈwo˗ USA Today ˗kë bhë ˗ya ˗pö ꞊dhɛ «Zeta zuni ˗dhɛ dosɛnŋ ˈgü, ˗kwɛ ˈö ʒiö yö ˗a ˈgü buu ˗da ˗sü ˈö mɛn ˗nu ˗bha ꞊klaŋplöödhɛ ˗nu ˈgü bhë ˗yö ˗kë ˈˈdhʋ̈ ˗gɛnɲan ˈka 249. ˈÖ sü ˗kwɛ 1970 ˗bha ˈö yö ꞊dɛɛ ˗bha, ˗kwɛ ˈö ˗ʒiö yö ˗a ˗bhaa ˗yö ˗ʒiö ˗kwɛ ˈˈpɛpɛ ˗bhaa ˗ta.»

 ˈMën ˗kë ˈö ˈwɔn yaa suu ˗nu ˈwo bhë ˈwo ˗kë? Kwa ˗dho bɔ ˗an ˈgü zuʋ̈saadhɛ ˈka ˗kɔ ˗kë ꞊dhɛ? ˈˈVaanvandhɛ ˗dho ɲën yi do ˈka ˗ee? Biblö ˗yö dhɛɛˈˈ ˗nu bhë ˗an ˗yɔ ˗bɔ.

•    Biblö ˗ya ˗pö ˈˈtʋ̈ŋ ˈkwa˗ ˈgü yö «ˈkpʋngtaadhɛ yën ˈˈtʋ̈ng» ˗mü. ˈYö ˗ya ˗pö ˗a ˈˈtʋ̈ŋ ˈö ˈˈdhʋ̈ ˗a ˈgü «pë ˈbha ˗pë ˈbha ˗wëë ˈyii ˈdho [mɛn ꞊vadhɛ] kë,» «˗a ˗nu ˈˈgblü˗ ˗dho kë ˈya˗ ɛɛnˈˈ ˗wo ˗dho pë ˈdhiö˗ ˗kë mɛ ˈka.» ˗Ya ˗pö ˈzü ꞊dhɛ ˗a mɛn suu ˗nu ˈwo ˈˈdhʋ̈ bhë, «˗wo ˗dho ˈdho ꞊në˗ wo wo ˈˈdhiʋ̈ ˗kpɛawo ˈwɔn yaa kë ˗zian ˗ta.» (2 Timote 3:1-5, 13) ˈÜ˗ ˈˈpiʋ̈ ˈü˗ ˈbha ˈgüman, ˗bhö ˈwɔn ˗gɔ « La Bible a-t-elle prédit la mentalité et la conduite des gens de notre époque ? » ˗wo pö.

 Mɛn ꞊vadhɛ ˗wo wo ˗de dhɛɛˈˈ ˗kpɔ ˈö ˈwo˗ pö ‹ˈmën ˗kë ˈö ˗Zlan ˈyaa ˈwɔn yaa suu ˗nu ˈwo ˗kë ꞊dhɛ buu ˗da ˗sü ˈö mɛn ˗nu ˗bha ꞊klanŋplöö ˗an ˈdhö bhë ˗a kë kö ˈwa ˈdho kë?› ˗A ˗yɔ ˈö Biblö ˈgü ˈü˗ ˈˈpiʋ̈ ˈü˗ dɔ, ˗bhö ˈwɔn ˗gɔ « Pourquoi les innocents souffrent-ils ? » ˗wo pö.

•    «Pë ˈˈpɛpɛ ˈö ˗bɛn zë ˗sü ˈka ˗Zlan ˗gɔ ˈsëëdhɛ ˈgü ˈkwa˗ yö bha, ˗wa ˗bɛn ˗zë ˈˈdhʋ̈ yi ˈbha ˈka kö ˗yö kë kwa ꞊klangkëpë ꞊në˗ ˈka. [...] Kë ˈˈdhʋ̈ kö kwa zuëˈˈ ˗yö kë ˗sɛa, kö ˗yö kwa faan dɔ ˈˈyan ˗to Yesu nu ˗sü ˗gɔ ˗sü ˗bha.»—Wlɔmö 15:4.

 Biblö ˗bha ˈtɔŋ˗ ˗gɛngbandhɛ ˗nu ꞊mɔɔn˗ ˗bha ˈwo kwa ˗takun kö ˈwɔn ˈˈvaanvan ˗nu ˈwo kë ˗ni ˈgü ˈˈkpɔnŋ ꞊taa yö bhë, ˈwa ˈdho kwa zuʋ̈ˈˈ ˈˈdhiʋ̈ ˈˈtɛɛ. ˈÜ˗ ˈˈpiʋ̈ ˈü ˈbha ˈgüman kpɔɔˈˈ Réveillez-vous ! ˈö˗ ˗gɔ ˗kë « Le terrorisme prendra-t-il fin un jour ? » ˈka bhë, ˗a ˗bha.

 ˗Kɔ ˈö ˈnënmɛn ˗nu ˈwo dho wo ˗bha ˈnën ˗nu ˗takun ˗a ˈka kö ˈˈsuʋ̈wɔn ˗nu ˈwo ˗kpan ˗an ˗bha ɛɛnˈˈ ˈö ˗an ˈˈtʋ ˗yö ˗da ˗an ˈgü ˗yö ˈgo ˗an zuʋ̈ˈˈ ˗ta, ˈü˗ ˈˈpiʋ̈ ˈü ˗kpan ˗a ˗dhioo ˗nu ˗bha, ˗bhö ˈwɔn ˗gɔ « Enfants et actualités troublantes » ˗wo pö.

•    «˗Yö ˗dho ˗an dha ˈˈklʋʋbhɔdhe waa ˈˈvaanvandhɛ ˗an ˗gɔ.»—Psaume 72:14.

•    «˗Wo ˗dho wo ˗bha ˗blaan ˗dhaa ˗nu ˈˈgla ˈˈkö ˗nu ˈgü, ˈö ˈwo wo ˗bha ˈdünënga ˗nu ˗gla ˗mlü ˗kan ˗a ˈka ˗dhaa ˗nu ˈgü. ˈˈSɛ ˗gɔ ˈbha yö ˈti ˗dho ˗dhaa ˈsü ˈˈsɛ ˗gɔ ˈˈwɛɛ ˈbhaa ˗gɔ, ɛɛnˈˈ wo ˈti ˗dho ˗gblü draanˈˈ ˈzüdho.»—Michée 4:3.

 ˗Zlan ˗dho ˈpë mɛnbhɩɩdhe ˗nu ˗kɔ ˈyaa ꞊mɔɔn˗ ˗bha, ˗a kë. ˗A ˗bha ˗Gblüdëdhɛ ˈö dhaŋ˗ ˈgü ˗dho buu ˗nu ꞊gban shiʋ̈ˈˈ ˈö˗ ˗kë ˈö ˈˈvaanvandhɛ ˗yö ɲën. ˈWɔn ˈö ˗gban ˗Zlan ˗bha ˗Gblüdëdhɛ ˗bha, ˈü˗ ˈˈpiʋ̈ ˈü˗ ˈbha ˈgüman, ˗bhö ˈwɔn ˗gɔ « Sous le royaume de Dieu, ‹ la paix abondera ›» ˗wo pö.