ˈˈSɛ ꞊vadhɛ ˈgü ˈˈkpɔnŋ ꞊taa, mɛn ˗nu ˗wo saanˈˈ ꞊dede ˈsü ˗ni ˈgü ˈˈwo dɔ ˗sü waa ˈwɔn ˈˈgbɩɩ˗ ˈˈwɛɛ ˈbha ˗nu ˈwo kë ˗ni ˈgü ˗a ˈkosɔn bhë ˗an ˈˈgblʋʋ ˈˈpiʋ̈. Pë ˈö mɛn ˈbha ˗nu ˈwo˗ pö ˈö ˗gban ˗a ˗bha, ˗bhö ˗a ˗ga:

•   «˗Dhɛ ˈö ˈkwa ˗ya ˈˈtʋ̈ŋ ˈö ˗nu ˈö ˈwo ˈˈkpɔnŋ ꞊taa ˗an ˈsuan˗ bho ˗sü ˗bha, ˈö˗ ˗kwɛ ˗ya ʒiö ꞊dɛɛ ˗kwɛ 174 ˗ta bhë, ˈˈtʋ̈ŋ ˗dhɛ ˈö ˈˈwo ˗yö dɔ ˗a ˈgü ꞊dedewo kö ˗yö ʒiö ˗a ˈka Ʒuɛn ˈˈsu ˈö ˗ʒiö yö ˗a ˗bhaa ˗ta, ˈyaa ˈdhö.»—˗Kwɛ 2023 Ʒue 13, Agence Américaine d’observation océanique et atmosphérique, États-Unis, département du Commerce.

•   «ˈˈWo ꞊dede ˗yö dɔ ˗ni ˈgü Itali, Ɛsüpaɲö, Flansö waa Polɔɲö ˗sɛ ˗nu ˈgü. ˈYö ˗a ˈˈwo dɔ ˗sü ˈö ˈˈdhʋ̈ ˗dho ˗dadhiʋ̈ ꞊dedewo ˈö yö 48 degle ˗nu ˗bha Silisi waa Saadɛɲö ˗sɛ ˗nu ˈö ˈwo ˈˈyi ꞊zinŋ ˈgü bhë, ˗an ˈgü. ˈˈWo suu ˈö bhë ˈyii dɔ ˈˈdhʋ̈ do Edhɔpö.»—˗Kwɛ 2023 Ʒue 13, Agence spatiale européenne.

•   «˗Dhɛ ˈö ˗kë ꞊dhɛ ˈˈwo ˗yö dɔ ˗ni ˈgü ˈˈkpɔnŋ ꞊taa bhë, kwa ˈˈɲan ˗yö dha ˈˈgblʋ̈gblʋ̈ ˗nu ban ˗sü waa ˈˈyi ˗bha pa ˗sü ˗nu ˈö ˈwo dho pë shiʋ̈ˈˈ ˗an ˗gɔ.»—˗Kwɛ 2023 Ʒue 17, Stefan Uhlenbrook, ˈˈyi waa kliɔsöfɛɛ ˈwɔnyëë˗ ˗nu ˈwo ˈˈkpɔnŋtaadhɛ ˗todhʋ̈sü ˈgü ˗an ˗gɔmɛn.

 Pë ˈö mɛn ˗nu ˈwo bhë ˈwo˗ pö ˈö ˗gban ˈˈwo dɔ ˗sü ˗bha bhë, ˗yö ˈˈsuʋ̈ ˗da ü ˈgü ˗ee? Pë ˈö Biblö ˗ya pö ˈö ˗gban ˈwɔn ˈˈgbɩɩ˗ bhë ˗a ˗bha, ˗bhö ˗a ˗ga.

 ꞊Ii. ˈˈWɔ ˈö dɔ ˗ni ˈgü ˈˈtʋ̈ŋ ˈö yö ˗a ˈgü waa ˈˈtʋ̈ŋ ˗bha ˗slëë ˈgü ˗sü ˗wo ˗bɛ pë ˗nu ˈö Biblö ˗yö ˗an to ˈˈdhiʋ̈ ˈö ˗an ꞊blɛɛ ˗an ˈbha ˗bha. ˗A ˈwɔnzuan ꞊nɛɛn: Yesu ˗ya ˗to ˈˈdhiʋ̈ ˈö˗ pö ꞊dhɛ «ˈsiö ˗kan mɛ ˈgluu ˗pë waa˗ ꞊duakëpë ˗wo ˗dho kë dhang˗ ˈgü.» (Dhukö 21:11, NTBL) ˈˈWo ꞊dede ˈö dɔ ˗ni ˈgü ꞊dɛɛ yö bhë, ˗yö ˈˈsuʋ̈ ˗da ˗ni ˈgü mɛn ꞊va ꞊dede ˈgü. ˗An ˗bhaa ˈgü ˗yö ˗dho ˗a kë ˈö mɛnbhɩɩdhe ˈwaa ꞊mɔɔn˗ ˗bha kö ˗wo ˈto ˈzü ˈˈsɛ ˗ta.

 ˗Abin! ˗Zlan ˗yö ˈˈsɛ ˗da kö mɛnbhɩɩdhe ˗nu ˗wo kë ˗a ˗ta yi ꞊gban ˈka. ˈYii ˈdho ö ꞊kwaa mɛnbhɩɩdhe ˗nu ˗zü kö ˗wo ˈˈsɛ shiʋ̈ˈˈ. (Psaume 115:16; Ecclésiaste 1:4) ˗Ya ˗pö ö ˗dho «ˈwɔn ˗bho ˈˈsɛ see˗ ˗mɛ ˗nu ˈgü.»—˗Dhɛkpaɔ dhiaˈˈ ˈsëëdhɛ 11:18.

 Biblö ˗ya ˗zɔn ꞊dhɛ ˗Zlan ꞊mɔɔn˗ ˗bha ˈö ö ˗kɔ kpa ˈˈsɛ ˗ta. ˈYö ˗yö ˗dho ˗a kë ˈˈdhʋ̈.

•   «˗Yö [˗Zlan] ˈˈtɛɛ ˈduannu, ˈö˗ ˗kë ˈö ꞊weeyi kpökpö ˗nu ˗wo to ˈˈsɛnŋdhö.» (Psaume 107:29) ˗Zlan ˗kɔ ˗yö ˗ʒiö ˈˈkpɔnŋ ꞊taa ˗pë ˗nu ˗gɔ. ˗Yö ꞊mɔɔn˗ ˗bha ˈö ˈwɔn ˈˈgbɩɩ˗ ˗nu ˈwo kë ꞊dhɛ ˈˈwo dɔ ˗sü, ˈˈtɛɛ ˈˈgbɩɩ˗ ˗bha ʒiö ˗sü ɛɛnˈˈ ˈˈyi ˗bha pa ˗sü ˗nu ˈdhö, ˈö ˈwo mɛnbhɩɩdhe ˗nu sëë bho ˗ni ˈgü ꞊dɛɛ bhë, ˗an bho kwa ˗bha.

•   «Ü ü ˗zokë ˈˈsɛ ˈˈpiʋ̈, ˈyö ˈü˗ ˗kë ˈö ˗kë ˗së ˈö ˗bhöpë ˗yö dhi ˗a ˈgü.» (Psaume 65:9) ˗Zlan ˗bha ˈdhuëë˗ ˈsaa˗ ˈgü, ˈˈsɛ ˗dho kë ꞊bhɔɔ ˗pö ˈka.

 Pë ˈö ˗Zlan ˈö˗ pö ˈö ˗gban ˈˈsɛ baaˈˈ ˗sü ˗bha, ˈbha˗ pö ˈü˗ ˈbha ˈgüman, ˗bhö ˈwɔn ˗gɔ « Qui sauvera la terre ? » ˗wo pö.