ˈWëëga ˈö bhë, ˗yö ꞊va ꞊dedewo.

•   «ˈWëëga ˈö ˈˈsɛgɔdhiʋ̈mɛn ˗nu ˈwo˗ ˗da ˗gblü ˈgü ˗kwɛ ˈö ˗ʒiö yö ˗a ˈka, ˗yö ˗ʒiö ˈwëë˗ ˈˈmliya ˈˈgblü 13 ˗ta. ˗A ˈwëëga ˈö bhë, ˗yö ˗ʒiö ˗kwɛ ꞊gban ˈˈpɛpɛ ˗bha ˗ta.»—˗Kwɛ 2024 Fevlie 13, The Washington Post.

 Pë ˈö ˗gblü ˈdhö˗ kë ˗ni ˈgü ˈyaa ˈwëëga dosɛnŋ shiʋ̈ˈˈ ˗sü ˈka. ˗A ˈwɔnzuan ˈö yö, ˗kwaa ˗ga: ˗Gblü ˈö Üklɛnö.

•   ˈˈSɔdha ˗nu. ˈWɔn ˈˈpiʋ̈ pɔn ˗mɛn ˗nu ˗wa ˗pö ꞊dhɛ ˈö sü ˗gblü ˈö bhë ˗a zübhoyi ˗bha ˈö yö˗ ˈka ꞊dɛɛ ˗bha, ˈˈsɔdha ˗nu ˈwo ga ˗a ˈgü ɛɛnˈˈ ˈö ˈwo ˗an ꞊gii, ˗wo ˗mɔɔn mɛn 500.000 ˗bha.

•   Mɛn ˗nu ˈö ˈwaa ˈˈsɔdha ˗nu ˈka ɛɛnˈˈ ˈö ˗an ˗kɔ ˈyaa ˗gblü ˈgü: ONU ˗mɛn ˗nu ˗wa ˗pö ꞊dhɛ ˗a mɛn ˗dhɛ ˗nu ˈwo ga ɛɛnˈˈ ˗wo ꞊gii, ˗wo ˗ʒiö mɛn 28.000 ˗ta. ˈˈKɛɛ ONU ˗mɛn ˗nu ˗bha ˗gɔmɛn ˈkpii˗ do ˗ya ˗pö: «Mɛn ˗nu ˈö ˈwaa ˈˈsɔdha ˗nu ˈka ɛɛnˈˈ ˈö ˗an ˗kɔ ˈyaa ˗gblü ˈgü ˈö ˗an ˈgü ˈdhö shiʋ̈ˈˈ ˗sü ˈka ˗gblü ˈö bhë ˗a ˈgü, mɛn ˈbha ˈyaa ꞊mɔɔn˗ ˗bha kö ˗yö ˗an ˈˈdhi ꞊dede pö ˈyö ˗tɔ ˗wo ꞊va ꞊dedewo.» a

 Mɛn ˗nu ˈö ˈwo saanˈˈ ˈsü ˗ni ˈgü ˈˈkpɔnŋtaadhɛ ˗todhʋ̈sü ˈgü ˗gblü ˈö bhë ˗a ˗wɔn ˈgü, ˗wo ꞊va.

•   ˈˈMliɲɔn 114. Yö ˈnën ˗tɔ mɛn ˗nu ˈö ˈwo ꞊duëë ˗gblü ɛɛnˈˈ ˈˈvaanvandhɛ ˗gɔ kö ˈkwa dɔ ˗kwɛ 2023 Sɛtanblö ˈka, ˗an ˈˈdhi.

•   ˈˈMliɲɔn 783. Yö ˈnën ˗tɔ mɛn ˗nu ˈö ˗bhöpë ˈyaa ꞊slɔɔ ˗an ˗gɔ, ˗an ˈˈdhi. «Pë ˗blɛɛsü ˈö nu din ˈka, yö ˈnën ˗tɔ ˗gblü. ˗Wa mɛn 100 ˈsü, mɛn ˗nu ˈö ˗bhöpë ꞊slɔɔ ˗dhɛ ˈdhö ˗an ˗gɔ ˈˈgbɩɩ˗, ˗a mɛn 70 ˗wo ˗dhɛ ˗nu ˈö ˗gblü ɛɛnˈˈ ˈˈvaanvandhɛ ˈdhö mü, ˗an ˗dhɛ ˈgü.»—Programme alimentaire mondial.

 ˗Gblü ˗dho ɲën yi ˈbha ˈka ˗ee? ˈˈSɛ ꞊mɔɔn˗ ˗bha ˈö ˈwaannu ˗dhɛ ꞊gban ˈgü ˗ee? Yi ˈbha ˗dho ˗wo ˈö pë ˗nu ˈö ˈwo go ˈˈsɛɛdhö, ˈö ˈwo ˈˈsɛ ˗ta, ˈˈyi ꞊bhaa ɛɛnˈˈ ˈö ˈwo ˈˈblü, ˈö mɛn ˗nu ˈwo ˗an sü kö ˗wo din waa ˈˈflɛɛdhɛ ˗an bho ˗a ˈka ˈˈshia˗ ˗ee? ˈMën Biblö ˗ya pö?

 Biblö ˗ya to ˈˈdhiʋ̈ ˈö˗ pö ꞊dhɛ ˗gblü ˗dho ˗da ˈˈkpɔnŋtaadhɛ ꞊gban ˈgü. ˈYö ˗a ˈwɔn ˈö ˈˈdhʋ̈ ˗ya ˗zɔn mɛn ˈbha ˈö ꞊soo tii ˗ta, ˗a ˈka.

•   «ˈA dho ˗dhɛ ˗ga ˈzü kö ꞊soo ˗zaɔndhö do ˈö ꞊yɔɔn ꞊wɛnng ˗sü ˈˈblɛɛn˗ ˈka bha ˗yö nu sië. ˈMɛ ˈö gun˗ ˗ta bha ˈyö ˈwo˗ gba ˗gblü ˗da ˗faan ˈka kö ˗ya ˗da ˈˈkpʋng ꞊taa, kö mɛ ˈˈbhɩɩ˗ ˗nu ˗wo wo ˈko zë. ˈYö ˈwo dho ˈwo˗ gba ˗siangga ˈkpii˗ do ˈka.»—˗Dhɛkpaɔ dhiaˈˈ ˈsëëdhɛ 6:4.

 Mɛn ˈö kun ꞊soo ˈö bhë ˗a ˗ta ˗dhɛ ˈö nu, ˈö ꞊sootamɛn ꞊plɛ ˈˈwɛɛ ˈbha ˗nu ˈwo ʒiö ˗a ꞊keŋ˗. Wo ˈnën ˈwo ˈtɔɔ˗ din waa ga, ˗an këpë ˗nu ˗wɔn ˈgü. (˗Dhɛkpaɔ dhiaˈˈ ˈsëëdhɛ 6:5-8) ˈBha˗ pö ˈü ˈwɔn ˈö ˗gban pë ˈö Biblö ˗ya to ˈˈdhiʋ̈ ˈö˗ pö bhë ˗a ˗bha waa ˈpë ˗kë ˈö ꞊mɔɔn˗ ˗bha ˈö ga kwa ˈgü ꞊dhɛ ˗yö kë ˗ni ˈgü ꞊dɛɛ, ˗a ˈbha ˈgüman, ˗bhö ˈwɔn ˗gɔ « Les cavaliers de l’Apocalypse : qui sont-​ils ? » ˗wo pö.

 Mɛn ˗nu ˈwii ˈdho pë ˗tiaandhö ˗nu ˈö ˈwo ˈˈkpɔnŋ ꞊taa ˗an ˈsü ˈzü kö ˗wo ˗gblü gɔn ˗an ˈka. ˈYö ˗a kë ˈˈdhʋ̈ ˗sü ˈˈtʋ̈ŋ ˈyaa ꞊gblɛɛn ˈzü. ˈˈKɛɛ ˈyii ˈdho ˈsü mɛnbhɩɩdhe ˗nu ˗bha. Biblö ˗ya ˗pö:

•   «˗Zlan ˗dho «˗gblü ɲën ˈˈsɛ ˗todhʋ̈sü ˗ta.»—Psaume 46:9.

•   ˗Zlan ˗dho ˈwɔn yaa ˗nu ˈö ˗gblü ˗ya ˗kë, ˗an bho ˈˈshia˗ ˈpapadhö. «˗Yö ˗dho ö ˗kɔ ziö˗ ˗nu ˈˈyan ˈˈdhiʋ̈, ˈö˗ ˗nu ˈˈyanyi ꞊gban bho mü ˈˈpɛɛpɛdhö. Ga ˈyii ˈdho bhɔ ˈzü, ˈˈɛɛn ˗wëë ˗ya wo ˗sü ˈbha ˈyii ˈdho kë ˈzü, ˗wëëwʋ ˈkpɔ ˗sü waa˗ pë ˗ma mɛ ˈka ˗sü ꞊gbaan yën. ˗A ˗gɛn ˗mü ꞊dhɛ ˈwɔn ˈˈpɛpɛ ˈdhɛ ˈkö gun kë sië zii ˗blɛɛsü bha˗ ꞊gbaan ziö.»—˗Dhɛkpaɔ dhiaˈˈ ˈsëëdhɛ 21:4.

•   ˗Zlan ˗dho ˗a kë ˈö mɛn ꞊gban ˈˈpɛpɛ ˗wo ˗yadeflëëgüsü ꞊slɔɔ. «N ˗man mɛn ˗nu ˗dho kë ˗dhɛ ˈö ˗yadeflëëgüsü ˈdhö mü, ˈkɔ ˗së waa ˈˈtɛɛpadhɛ ˗së ꞊dede ˗nu ˈgü.»—Isaïe 32:18.

 Biblö ˗ya ˗pö ˗gblü waa ˈwɔn ˗nu ˈö kwa ˈˈɲan ˈdhö ˗an ˈgü ꞊dɛɛ bhë ˗wa ˗zɔn ꞊dhɛ ˗a ˈˈtʋ̈ŋ ˈyaa ꞊gblɛɛn ˈzü kö ˗yadeflëëgüsü ˗yö nu ˈˈkpɔnŋ ꞊taa.

 ˗Zlan ˗dho ˗a kë ˗kɔ ˗kë ꞊dhɛ kö ˗yadeflëëgüsü ˗yö kë ˗dhɛkpaɔ dhiʋ̈ˈˈ ˈgü? ˗Yö ˗dho bɔ ö ˗bha mɛnkɔɔnsü ˈö dhaŋ˗ ˈgü ɛɛnˈˈ ˗a ˗bha ˗Gblüdëdhɛ ˗ta ˈö˗ ˗kë ˈˈdhʋ̈. (Matiö 6:10) ˈBha˗ pö ˈpë ˗Zlan ˗bha ˗Gblüdëdhɛ ˈdhö˗ ˈka, waa pë ˈö dho ˗a kë kwa ˗dhɛ ˗a dɔ, ˗bhö video ˗Mën ˈö ˗tɔ ˗Zlan ˗bha ˗Gblüdëdhɛ? ˗ga.