ˈWëëga ˈö ˈˈsɛgɔdhiʋ̈mɛn ˗nu ˈwo˗ ˗da ˈˈsɔdha ˗nu ˗gɔwɔn ˈgü ˗kwɛ 2022 ˈka, ˗ya ˗da ˈˈmliya ꞊va ˗ta ˗va ˈgü. ˗A ˗bha ˗kë ˈˈdhʋ̈ ˗sü ˗yö ˗sü ˗gblü ˈö ˗gɔn ˗ni ˈgü Üklɛnö bhë, ˗a ˗bha. Pë ˈbha ˈö Stockholm International Peace Research Institute (SIPRI) ˈö˗ pö ˗kwɛ 2022 ˈgü, ˈö yö ˈˈkpɛnŋ ˗kwɛ 2023 Avlidhö ˈˈsu ˈgü, yö ꞊nɛn:

•   ˈWëëga ˈö Edhɔpömɛn ˗nu ˈwo˗ ˗da ˈˈsɔdha ˗nu ˗gɔwɔn ˈgü ˗kwɛ ˈö yö ˗a ˈka, «˗ya ˗dadhiʋ̈ ˗ya ʒiö ꞊dedewo ˗a ˗dhɛ ˈö ˈwo˗ ˗da ˗gblü ˈgü ˗kwɛ 1991 ˈgü bhë, ˗a ˗ta.»

•   «Rusimɛn ˗nu […] ˗bha ˈwëëga ˈö ˈwo˗ ˗da ˈˈsɔdha ˗nu ˗gɔwɔn ˈgü, ˗ya ˗dadhiʋ̈ ˈpö. ˗A ˗wɔn ˈgü ˈˈsɛ ˗nu ˈö ˈwo ˈwëëga ꞊va ꞊dede ˗da ˈˈsɔdha ˗nu ˗takun ˗sü ˈgü bhë, ˈwaa˗ mɛn ˈˈsoodhu ˗naan ˈka ˈzü. ˗Wa kë ˗a mɛn ˗yaaga ˗naan ꞊nën˗ ˈka.»

•   ˈˈSɛ ˗nu ˈö ˈwo ˈwëëga ꞊va ꞊dede ˗da ˈˈsɔdha ˗nu ˗takun ˗sü ˈgü bhë, Zeta zuni ˗mɛn ˗nu ˈnën ˈwo ˗tɔ ˗kplawo ˗a mɛn ˗blɛɛsü. ˗Yö sü ꞊dhɛ ˈwëëga ˈö ˈˈsɛ ꞊gban ˈˈpɛpɛ ˈwo˗ ˗da ˈˈsɔdha ˗nu ˗gɔwɔn ˈgü, ꞊waa˗ ˈˈpɛ˗ ˈgü këŋ do, ˗an ˗bha ˈˈpian ˗yö 39.»

 Pë ˈö ˈˈkwi ˗gɔmɛn ˈkpii˗ ˈwo ˗dhɛ Nan Tian, ˈö waa Stockholm International Peace Research Institute ˈwo ˈwɔn ꞊blɛɛ ˈˈkwëë ˈö˗ pö, yö ꞊nɛɛn: «˗A kë ˗sü kö ˈwëëga ˈö ˈˈsɛgɔdhiʋ̈mɛn ˗nu ˈwo˗ ˗da ˈˈsodha ˗nu ˗gɔwɔn ˈgü ˗kwɛ ˗nu ˈwo ʒiö yö ˗a ˈka ˗yö ˗dadhiʋ̈ bhë, ˗ya ˗zɔn ꞊dhɛ kwa ˈˈkpɔnŋtaadhɛ yaa ˈgü.»

 Biblö ˗ya ˗to ˈˈdhiʋ̈ ˈö˗ pö ꞊dhɛ ˈkowogümandhe ˈyii ˈdho kë ˈˈsɛgɔ ˈˈgblʋ̈gblʋ̈ ˗nu ꞊zinŋ ˈgü. ˗Yö pë ˈö ˗dho nu ˗yadeflëëgüsü ꞊dede ˈka, ˗a ˗wɔn ˗blɛɛ ˈpö.

•   Biblö ˗ya ˗pö ꞊dhɛ ˈkwa ˈˈtʋ̈ŋ ˈö ˈwo ˗dhɛ «ˈˈkpɔnŋtaadhɛ ɲën ˈˈtʋ̈ŋ» bhë, ˗a ˈgü.—Daniel 8:19.

•   Daniel ˗bha ˈsëëdhɛ ˗be ˗ya ˗to ˈˈdhiʋ̈ ˈö˗ pö ꞊dhɛ ˗a ˈˈtʋ̈ŋ bhë ˗a ˈka, ˗gblü ˗dho ˗da ˈˈsɛgɔ ˈkpii˗ ˗nu ꞊zinŋ ˈgü. ˗Wo ˗dho «ˈko zë wo ˈˈkwëë» kö ˗a mɛn ˗dhɛ ˈö ˈˈgbɩɩ˗ ˗wa dɔ. ˈKo ˈö bhë ˗dho ˗a kë ˈö ˈwo «ˈˈsënŋ ˗nu» ɛɛnˈˈ ˈwëëga ꞊va ꞊shiö.—Daniel 11:40, 42, 43.

 ˈBha˗ pö ˈü ˈwɔn ˈö ˗gban pë ˈö Biblö ˗ya to ˈˈdhiʋ̈ ˈö˗ ꞊blɛɛ bhë ˗a ˗bha, ˗a ˈbha dɔ, ˗bhö video ˈWɔn ˗nu ˈö Zlan ˗an to ˈˈdhiʋ̈ ˈö˗ pö, ˈö ˈwo yö ˈko ˈˈdhiʋ̈: Daniel ˈˈɲan ˈˈgblʋ̈gblʋ̈ 11 ˗ga.

•   Biblö ˗ya ˗pö ꞊dhɛ ˗Zlan ˗dho mɛnkɔɔnsü ˈˈwɛɛ ˈbha ˗ya mɛnbhɩɩdhe ˗nu ˗bha mɛnkɔɔnsü ꞊gban ˈˈpɛpɛ ˈˈgblʋʋ ˈgü. ˗Yö «˗dho ˗gblüdëdhɛ do ˈö yö ˈti ˗dho ˈwü toŋtoŋdhö ˗a ˗ya. ˗Gblüdëdhɛ ˈö bhë, yö ˈti ˗dho bɔ mɛnbhɩɩdhe ˈˈwɛɛ ˈbha ꞊kwɛɛ˗. ˗Yö ˗dho ˗gblüdëdhɛ ˗nu ˈwo bhë ˗an ꞊gban ˈˈpɛpɛ ˈgüshiʋ̈ˈˈ, ˈö yöö dosɛnŋ ˈö to ˗toëpö ˈka.»—Daniel 2:44.

•   ˗A ˈˈtʋ̈ŋ ˈyaa ꞊gblɛɛn ˈzü kö ˈwɔn ˈö˗ kë ˗sü ˈˈsɩ ˈyaa mɛnbhɩɩdhe ˗nu ˗dhɛ, Zoova a ˗ya kë. ˗Yö ˗dho nu ˗yadeflëëgüsü ꞊dede ˈka. ˗Kɔ ˗kë ꞊dhɛ? ˗A ˗bha ˗Gblüdëdhɛ ˈö dhaŋ˗ ˈgü ˗dho buu suu ꞊gban ˈˈpɛpɛ shiʋ̈ˈˈ, ˈö ˈˈvaanvandhɛ bho ˈˈsɛ ˗ta.—Psaume 46:8, 9.

 Pë ˈö ˗Zlan ˗bha ˗Gblüdëdhɛ ˗dho ˗a kë, ˈbha˗ pö ˈü˗ ˈbha ˈgüman, ˗bhö ˈwɔn ˗gɔ « Sous le royaume de Dieu, ‹ la paix abondera › » ˗wo pö.