Klodinö ˗yö Zoova ˗bha ꞊Gbɛkiö ˈka. ˗Yö Aflikö di Sidö. ˗Dhɛ ˈö ˗kë ꞊dhɛ ˈyaa kun ö ˈflëë˗ ˈgü bhë, ˗wo ˗dho ˗a ˈka ꞊dhɔtrɔɔplöö ˈö ˈwo˗ ˗pɛ. ˈˈYua ˈˈgblʋ̈gblʋ̈ suu ꞊va ˗kun ˗a ˗bha, ˗a ˗wɔn ˈgü ˗a ˗dhɛ ˗kun ˗a ˗bha kö ˗yö ö ˗kɔ ˈˈyɛ ˗kɔ ˈö ˈwo ˗dho ˗a ˈˈdhɛkë ˗a ˈka, ˗a ˗bha. ˈˈSanni ˗wo ˗a ˈˈpɛ, ˗a kwigüdhɛ ˗kun ˈˈdhiʋ̈˗, ˈgo mü ˈzü sëëbhodhe waa zuʋ̈dhiʋ̈tɛɛ ˗nu ˗kun ˗a ˗bha. ˗Dhɛ ˈö ˈwo wo bo ˗a ˈˈpɛ ˗sü ˈka, ˗yö ˗kun ˈˈdhʋ̈ ˗kplawo. ˗Dhɛ ˈö ö yee ˗kë ˈˈkwɛɛnŋdhö, pë ˈö ꞊mɔɔn ˈˈdhoogɔ ˗kɔŋ do ˗bha ˗yö ˗ӡiö kö ˈyaa ꞊mɔɔn ˈɲaannu ˗sü ˗bha. ˈYö korona ˗kosɔn mɛn ˈbha ˈyaa kun ꞊mɔɔn˗ ˗ni ˈgü ˗a ˗bha kö ˗yö ˗wo ˗a ˗dhɛ.

 ˗Dhɛ ˈö ˗kë ꞊dhɛ Klodinö ˈyaa ˗kun ˗a ˈˈpiʋ̈ kö ˗yö ˗ya ˗wëësü ˈka bhë, ˗yö ˗bhɛɛ Zoova ˗dhɛ kö ˗yö ꞊faan nu ˗a ˗dhɛ kö ˗yö ꞊mɔɔn mɛn ˈˈwɛɛ ˗nu ˗zogban ˗sü ˗bha. ˗Dhɛ ˈö ꞊mɔɔn ˈɲaannu ˗sü ˗bha, ˗a yi ˈyii ꞊gwë ˈö ˗ya ˈˈdoo dɔ ˗sü ˗bha ˗a ˗yayoo do ˈö Biblö ꞊draan Zoova ˗bha ꞊Gbɛkiö ˗nu ˈˈpiʋ̈ ˈˈkɛɛ ˈö˗ ˈduannu ˈö˗ yi ˈnënbha ˗ya ꞊gwëë bhë, ˗a ˈˈpiʋ̈. Klodinö ˗yö Biblö ˈˈɲan ˗së ˈbha ˈö go ˗Zlan ˗wo ˈgü ˗a ˗zɔn ˗a ˗dhɛ. ˗Wo ˈö kun ˗a ˈgü, ˗yö dhebɔnën bhë ˗a ˗blü ˈö ˗ya Biblö draanˈˈ ˗sü ˗bha ˈzü ˗dɛɛwo. ˈWɔn ˗së ˈö ˗kë kletiɛn ˗nu ˗bha ˗bhɔkwëë ˗nu ˗ta ˗sü ˈö˗ ˗kë mɛn ˗dhɛ, Klodinö ˗ya ˗blɛɛ ö ˗bha Biblö ꞊klaŋnën ˗dhɛ, ˈö ˈto mü ˈö ˗kɔ ˈö dho ˗bhɔkwëë kë ˗a ˈka video ˈˈdhiʋ̈ ˈö˗ ˈˈslö ˗zɔn ˗a ˗dhɛ. Dhebɔnën ˈö bhë ˗yö ˗to ˗a ˈˈslö bhë ˗a ˈˈpiʋ̈ ˈö ˗kë ˗bhɔkwëë ˗ta. ˗Yö ˈwɔn ˗daa ˗kë ˗ӡiaanwo ˗a ˗bhɔkwëë ˈˈpian ˗dhɛ ˈö dhɛɛˈˈ waa˗ ˗daa ˈka bhë, ˗a ˗ta.

 Klodinö ˗go mü ˈö ˈˈdoo ˗dɔ ˈpö dhebɔnën bhë ˗a ˈzlaa˗ dhebɔ ˈö kun ˗a ˈˈpiʋ̈ ꞊dedewo kö ˈö Biblö draanˈˈ, ˗a ˈˈpiʋ̈. ˗Ya ˗pö Klodinö ˗dhɛ ꞊dhɛ ˗yö mɛn ˈˈwɛɛ ˈbha ˗nu ˗dɔ ˈö Biblö draansü ˗dhɔ ˗dho kë ˗an ˗bha ˈpö. ˗Dhɛ ˈö˗ pö ˈˈdhʋ̈, ˗mën ˗wɔn ˈö ˗kë? ˗Ya ˗kë ˈö Klodinö ˗yö Biblö draansü züdɔ dhebɔ ˗nu ˗yiishiö ˈˈwɛɛ ˈbha ˈˈpiʋ̈. ˈˈKɛɛ ˈwɔn ˗së ˈˈwɛɛ ˈbha ˗yö ˗kë ˈzü!

 ˗Dhɛ ˈö ˗kë ꞊dhɛ Klodinö ˗kun ö ˈˈtʋ̈ŋ kë ˗ni ˈgü ꞊dedewo mɛn ˈˈwɛɛ ˗nu ˈgü bhë, ˗yö Biblö draansü züdɔ ˈbhaawo dhebɔ ˗nu ˗kɔŋ do ˈˈpiʋ̈. ˗A ˗kë ˈˈdhʋ̈ ˗sü ˈgü dhebɔ ˗nu 16 ˈnën Klodinö ˗yö Biblö ꞊draan ˗an ˈˈpiʋ̈ korona ˈˈtʋ̈ŋ ˈgü. ˗An kpö ˈgü, mɛn ˈbha ˗nu ˗wo ˗zlanwokɔdhi ˗bha ˗bhɔkwëë ˗nu ˗kë ˈˈdhoogɔ ꞊gban ˈˈpɛpɛ ˈka video ˈˈdhiʋ̈. Klodinö ˗kɔ ˗bha ˗kë ˗zlanwopösü ˈgü ˗sü ˗ya ˗takun ꞊dedewo ˈö˗ zo ˗yö bhɔ ö ˗dea ˈwɔn ˈˈgbɩɩ˗ ˗nu ˈka. ˗Yö ˗kë ˈˈdhʋ̈ ˈyö ˗tɔ ꞊dhɛ Zoova, ˗Zlan ˈö «mɛ ˗zʋ ˗gban ˗kɔ ꞊gban ˗kɔ ꞊gban ˈgü» bhë, ˗yö Klodinö ˗zo ˗gban ˗a ˗bha ˈwɔn ˈˈgbɩɩ˗ ˗nu ˈgü, kö yö ˗dee ˈpö ˗yö ꞊mɔɔn mɛn ˈˈwɛɛ ˗nu ˗zogban ˗sü ˗bha.—2 Kodhɛngtö 1:3, 4.

 Pë ˈö Klodinö ˗bha Biblö ꞊klaŋnën ˗nu ˈwo˗ draanˈˈ ˗ni ˈgü bhë, ˗wa ˗yö ˗kɔ ˗kë ꞊dhɛ? Pë ˈö˗ mɛn do ˈö˗ pö, yö ꞊nɛɛn: «˗Ya ˈwɔn ˗së ꞊va ꞊dede kë n ˗dhɛ. ˈˈKɛɛ ˈwɔn ˗së ˈkpii˗ ˈö˗ ˗kë n ˗dhɛ ˈyö ˈtɔ˗ ˗Zlan ˈtɔ dɔ ˗sü. ˗Ya ˗kë ˈö ˈa ꞊ɲɔɔn Zoova ˗bha.» Dhebɔ ˗blɛɛsü ˈö Klodinö ˗yö Biblö draansü ˗wɔn pö ˗a ˗dhɛ bhë, ˗ya ˈˈslö mɛɛnˈˈ ˗ni ˈgü kö ˗yö bɔ ˈˈyi ꞊bhaa. ˈWɔn ˗nu ˈö ˈwo bhë, ˗wo zuʋ̈gblüdhi ꞊va ꞊dede ˗nu Klodinö ˗dhɛ. ꞊Ya ˈgo mü ˈzü ˗ya ö ˗de ꞊slɔɔ ˗së ˈka.