•  A Piilee Yelyaga 2

•  Baabole Poɔ Yelnimizeere 3-5

  •  Yelyaga 3

  •  Baabole Poɔ Yelsonne 4

  •  Baabole Kannoo 5

•  Zanne Baŋ A Naaŋ Moɔloo Toma Soŋ 6-14

  •  Piili Dama Diibu 7

  •   Leɛ Gaa Nyɛ 8

  •   Soŋ Ba Ka Ba Leɛ Yezu Potuuribo 9

  •   Manne Ho Sagediibu Yɛlɛ 10

  •  Yelyaga 11

  •   A Toma Yɛlɛ 12

  •   Sori Aŋ Seŋ Ka Ho Tu A Toŋ A Toma 13

  •  Lɛ Hoŋ Na Toɔ̃ De Vidiori Ane Gama Toŋ Neŋ Toma 14

•   Kristabiiri Zemmo Yɛlɛ 15-16

  •   Lantaapuoruu Baabole Zannoo 16

•   A Baaraa Yelyaga 17

•   Puubu Ane Kawane 18

•   Wagre 19

•   A Gbandige Zukaara Waabo Saŋa 20

•   Daa Na Teŋ Maŋ E Te Gbandige Lammo Kyɛbee Te Lammokpɛŋ Na 21

•   A Yezu Kũũ Leɛteɛroo Daa Na 22

•   Te Zemmo Ane Te Naaŋ Moɔloo Lammo Zukaara 23

•   Te Zemmo Ane Te Naaŋ Moɔloo Lammo Dakogizusoba 24

•   A Kawaŋ Terɛ Sonnɔ 25

•   A Lammozie Ayi Soba 26

•  Vidiori 27

1. A sowuli gane ŋa na soŋɛɛ noba na zaa naŋ taa toma ka ba toŋ Te Kristabiiri Zemmo Ane Te Naaŋ Moɔloo Toma lammo na poɔŋ. Ka ba naŋ wa ko neɛzaa toma ka o toŋ, aseŋ ka o soba kanne sowuli naŋ kyaare toma na baŋ koo aŋ be Te Kristabiiri Zemmo Ane Te Naaŋ Moɔloo Toma Lammo Yelsɛgree Gane na, ane sowuli naŋ be a gane ŋa poɔŋ sɛre kyɛ nara o meŋɛ. Aseŋ ka te eŋ naaŋ moɔleba zaa faŋa ka ba de ba menne tere ka ba ko ba sakuubiiri toma. Noba mine meŋ naŋ waana a lantaapuoruu lammore meŋ na toɔ̃ de la ba menne eŋ a sakuubiiri toma poɔŋ, ka ba naŋ sage yɛlɛ na a Baabole naŋ wulo na di, a kyɛ lɛ de Baabole sowuli meŋ tonɔ neŋ toma ba zemmo poɔŋ. Ka neɛ kaŋaŋ ba e naaŋ moɔlɔ a kyɛ boɔrɔ ka o de o meŋɛ eŋ a sakuubiiri toma poɔŋ, aseŋ ka Te Zemmo Ane Te Naaŋ Moɔloo Lammo zukaara na neŋ o soba di dama a nyɛ ka o soba sereŋ seŋ nɛɛŋ bee. Aseŋ ka o soba Baabole wulwulo (kyɛbee o dɔgrɔ kaŋa naŋ e Kristabie) bebe saŋa na baŋ dire a dama na. Yɛlɛ na neɛ naŋ seŋ ka o erɛ a toɔ̃ e naaŋ moɔlɔ naŋ ba de suobu neŋ yɛlɛ na neɛ naŋ seŋ ka o erɛ a toɔ̃ de o meŋɛ eŋ a sakuubiiri toma poɔŋ zaa eɛ bonyeni.—od-E zur. 8 wɛl. 8.

2. Minti bonyeni. Daa zaa, ka ba naŋ wa yieli a kyɛ puori baare, Te Zemmo Ane Te Naaŋ Moɔloo Lammo dakogizusoba na maŋ mannɛɛ yelnimizeere mine teŋ na zanne a lammo poɔŋ. A dakogizusoba seŋ ka o de o teɛroŋ eŋ yelnimizeere naŋ na baŋ soŋ a lantaapuoruu yaga na eŋɛŋ.

 3. Yelyaga: Minti pie. A yelyaga yelzu ane a yelyaga yelnimizeere ayi bee ata mine maŋ be la a Te Zemmo Ane Te Naaŋ Moɔloo Lammo Yelsɛgree Gane na poɔŋ. Ba na toɔ̃ de la a yelyaga ŋa ko a lantaapuoruu neŋkpoŋ kaŋa, bee a nembɛrɛ sonnɔ kaŋa naŋ kyile. Ka teneeŋ wa piili a Baabole gane kaŋa kannoo a daagbuli zaa Baabole kannoo na poɔŋ, ba na ŋmɛɛ vidio kaŋa naŋ manna ana Baabole gane na poɔ yɛlɛ. A yelyaga soba na toɔ̃ de la a vidio poɔ yelnimizeere manne neŋ o yelyaga na yelzu yɛlɛ. Kyɛ, aseŋ ka o de a yelnimizeere naŋ be a lammo yelsɛgree gane poɔŋ na tere o yelyaga na. Ka wagreŋ naŋ wa bebe, o na toɔ̃ de la fotori naŋ bebe na toŋ neŋ toma, ba maalɛɛ a fotori ŋa ka ba de wuli a yelyaga yelnimizeere na. O na toɔ̃ de la yelyobo mine meŋ a poɔ o yelyaga na poɔŋ, ka ana yɛlɛ naŋ na toɔ̃ somoo ka o wuli a yelnimizeere pare velaa yɛŋ.

 4. Baabole Poɔ Yelsonne: Minti pie. A zie ŋaŋ, ba na maŋ soorɛɛ a soorebie ka a kyɛllekyɛlleba iri a nɔɛ. A zie ŋa ba taa piilee yelyaga bee baaraa yelyaga. A lantaapuoruu neŋkpoŋ kaŋa, bee a nembɛrɛ sonnɔ kaŋa naŋ kyile la seŋ ka o toŋ a toma ŋa. Aseŋ ka o soba soore a kyɛllekyɛlleba a soorebie ayi na zaa. O naŋ seŋ ka o kaa iri sɛgre naŋ seŋ ka ba kanne, ane sɛgre naŋ ba seŋ ka ba kanne. Ka ba naŋ wa boɔle neɛ kaŋa ka o iri yɛlɛ noɔre, aseŋ ka o de minti kyɛlee, kyɛbee bon naŋ ba ta lɛ iri neŋ a noɔre.

 5. Baabole Kannoo: Minti anaare. Aseŋ ka ba de a sakuubie toma ŋa ko te yɔɔdɔɔ na kaŋa. A sakuubie seŋ ka o kanne a Baabole zie na ba naŋ ŋmaa koo ka o kanne na yoŋ. A ba seŋ ka o de yelyaga piili bee a baare neŋ o toma na. A lammo dakogizusoba na kaarɛɛ lɛ oŋ na toɔ̃ e a soŋ a sakuubiiri ka ba maŋ kanne a yɛlɛ ka a tori, a taa yɛlɛ muni wommu, a kanna a ta gaŋna yelbie bara, a kanne ka a yelnimizeere muni pɛle, a maŋ duoro a kyɛ sigre ba kɔkɔɛ, a pɛnne zie naŋ seŋ ka ba pɛnne, a de ba menne kɔkɔɛ meŋ kanna neŋ a yɛlɛ. A kannoo ziiri mine naŋ maŋ e ŋmaa ka a mine meŋ e wogi na zuŋ, aseŋ ka Te Zemmo Ane Te Naaŋ Moɔloo Lammo zukaara na baŋ a sakuubiiri kaŋa zaa faŋa bɔgi, ka lɛ vɛŋ ka o toɔ̃ de a toma ko sakuubie naŋ na toɔ̃ toŋaa soŋ.

6. Minti pie neŋ anuu. Ba sɛgrɛɛ a lammo zie ŋa ka o soŋ te yɔɔmine ka ba zanne baŋ lɛ baŋ na toɔ̃ toŋ a naaŋ moɔloo toma soŋ, a nyɛrɛ nimitɔɔre gaabo ba neŋ noba dama diibu poɔŋ, a moɔlɔ kyɛ wulo noba meŋ velaa zaa. Ka a naŋ wa seŋ neŋ, ba na toɔ̃ de la a sakuubiiri toma ŋa ko a lantaapuoruu neŋkpoŋ kaŋa. A sakuubie kaŋa zaa seŋ ka o de a zannoo yelzu na ba naŋ kaa iri a Teaching kyɛbee a Nɔnɔ Noba gambilii poɔŋ na toŋ neŋ o toma na. Ba maŋ sɛgɛɛ a zannoo yelzu eŋ toma na ba naŋ ko bo na lomboriŋ a Te Zemmo Ane Te Naaŋ Moɔloo Lammo Yelsɛgree Gane na poɔŋ. Saŋa mine, ba na maŋ de la dama diibu toma eŋ a zie ŋa. Ka a naŋ wa e dama diibu toma, aseŋ ka a lantaapuoruu neŋkpoŋ kaŋa bee a nembɛrɛ sonnɔ kaŋa naŋ kyile toŋ a toma ŋa.—Kanne  wɛlbo 15, be wulee sori neɛ naŋ na baŋ tu a toŋ a dama diibu toma ŋa.

 7. Piili Dama Diibu: Ba na toɔ̃ de la a toma ŋa ko dɔɔ bee pɔge. Aseŋ ka o sonnɔ na e o dɔɔ tɔsoba kyɛbee o pɔge tɔsoba, kyɛbee ka o e o booree neɛ. A sakuubie ane o sonnɔ na na toɔ̃ areŋ kyɛbee ka ba zeŋ.—Ka hooŋ boɔrɔ ka ho baŋ yɛlɛ yaga a kyaare yɛlɛ naŋ seŋ ka a sakuubie yeli, kyɛbee sori naŋ seŋ ka o tu a toŋ a toma, kanne  wɛlbo 12 ane  13.

 8. Leɛ Gaa Nyɛ: Ba na toɔ̃ de la a toma ŋa ko dɔɔ bee pɔge. Aseŋ ka o sonnɔ na e o dɔɔ tɔsoba kyɛbee o pɔge tɔsoba. (km-E 5/97 gamp. 2) A sakuubie ane o sonnɔ na na toɔ̃ areŋ kyɛbee ka ba zeŋ. A yi a toma ŋa poɔŋ, a sakuubie seŋ ka o wuli yɛlɛ oŋ na yeli saŋa na oŋ leɛ gaa neɛ kaŋa o ne o naŋ di dama a piilee saŋa zie.—Ka hooŋ boɔrɔ ka ho baŋ yɛlɛ yaga a kyaare yɛlɛ naŋ seŋ ka a sakuubie yeli, kyɛbee sori naŋ seŋ ka o tu a toŋ a toma, kanne   wɛlbo 12 ane  13.

 9. Soŋ Ba Ka Ba Leɛ Yezu Potuuribo: Ba na toɔ̃ de la a toma ŋa ko dɔɔ bee pɔge. Aseŋ ka o sonnɔ na e o dɔɔ tɔsoba kyɛbee o pɔge tɔsoba. (km-E 5/97 gamp. 2) A sakuubie ane o sonnɔ na na toɔ̃ areŋ kyɛbee ka ba zeŋ. Aseŋ ka ba toŋ a toma ŋa aŋa noba naŋ erɛ Baabole zannoo a ta sogɔ. A ba seŋ ka o de yɛlɛ piili neŋ kyɛbee a de yɛlɛ baare neŋ a toma. Kyɛ ka ba naŋ ko a sakuubie sowuli ka o e lɛ yɛŋ, o na toɔ̃ de la be toŋ neŋ toma. A ba e ferebo ka o kanne a kannoo ziiri zaa ka a yi ka noba woŋ, kyɛ ka ba baŋ boɔrɔ, ba na toɔ̃ eɛ lɛ.

 10. Manne Ho Sagediibu Yɛlɛ: Ka a toma ŋaŋ wa e yelyaga, aseŋ ka ba de ko sakuubie naŋ e dɔɔ. Ka a tomaŋ wa e ewuli, ba na toɔ̃ de la a toma ko dɔɔ bee pɔge. Aseŋ ka o sonnɔ na e o dɔɔ tɔsoba kyɛbee o pɔge tɔsoba, kyɛbee ka o e o booree neɛ. A sakuubie seŋ ka o de yɛlɛ naŋ be gane na poɔ yɛlɛ ba naŋ ŋmaa koo na iri a soorebiri naŋ e a yelzu na noɔre. Aseŋ ka o de gyeremɛ manna a yɛlɛ, a kyɛ wɛle a muni meŋ ka a pɛle. A be la a sakuubie zieŋ ka o kaa iri ka o na yelee a gane na poɔŋ yɛlɛ ba naŋ de koo na yɛlɛ, kyɛbee ka o koŋ e lɛ.

 11. Yelyaga: Aseŋ ka ba de a toma ŋa ko sakuubie naŋ e dɔɔ. O na terɛɛ a yelyaga ko a lantaapuoruu noba. Ka a yelyagaŋ wa kyaare yɛlɛ naŋ be a Nɔnɔ Noba gambile na yɛlɛ mine naŋ lɛ bebe 1 zie na, a sakuubie seŋ ka o wuli sori na teŋ na baŋ tu a de a Baabole sɛgre naŋ bebe na toŋ neŋ toma a naaŋ moɔloo poɔŋ. Aŋa mannoo poɔŋ, o na baŋ wulee saŋa na aŋ seŋ ka te maŋ de a Baabole sɛgre kaŋa toŋ neŋ toma, yɛlɛ a Baabole sɛgre naŋ wulo, ane sori teŋ na baŋ tu ka te neŋ neɛ kaŋa teɛre a Baabole sɛgre yɛlɛ gaa tɔɔre. Ka a yelyagaŋ wa kyaare yelzu bile kaŋa naŋ be a Nɔnɔ Noba gambile na zannoo kaŋa poɔŋ, a sakuubie seŋ ka o wuli lɛ teŋ na toɔ̃ de yɛlɛ naŋ be a yelzu bile poɔŋ na toŋ neŋ toma a naaŋ moɔloo poɔŋ. O na baŋ wulee yelnimizeɛ naŋ be a yelzu bile 1 naŋ be a zannoo poɔŋ, kyɛbee ka o manne yelnimizeere naŋ be a Baabole sɛgre naŋ be a zannoo poɔŋ, ka lɛŋ na toɔ̃ somoo ka o toŋ a toma velaa la lɛ.

   12. A Toma Yɛlɛ: Yɛlɛ naŋ be a zie ŋaŋ ane yɛlɛ naŋ be o wɛlbo 13 na wulee sori na aŋ seŋ ka a sakuubiiri maŋ tu a toŋ a “Piili Dama Diibu” ane “Leɛ Gaa Nyɛ” toma na. Ka ba naŋ ba tere sowuli yuo zaa a kyaare a toma yɛlɛ, a sakuubie na toɔ̃ mannɛɛ Baabole poɔ yelmeŋɛ kaŋa naŋ e nimizeɛ a ko o soba, a kyɛ lɛ sɛgre yɛlɛ ka o leɛ gaa o soba zie ka o ne o te tɔnne a dama diibu. A sakuubie seŋ ka o kaa iri yelzu naŋ seŋ neŋ a na baŋ soŋ noba naŋ be o gbandige naŋ yaga zaa. A be la a sakuubie zieŋ ka o de gbɛre ka o na de la gane kaŋa kyɛbee vidio kaŋa naŋ be te Wulibo Tontoŋ Boma Daga na poɔŋ ko o soba. A ba seŋ ka o toŋ a toma aŋa o naŋ nyɔge yɛlɛ mine eŋ o teɛroŋ poɔ a yele, kyɛ aseŋ ka o toŋ a toma aŋa o neŋ neɛ naŋ dire dama. A yi a dama diibu poɔŋ aseŋ ka o wuli ka o boɔrɛɛ neɛ na o ne o naŋ dire a dama na yɛlɛ, a ta pagra a dama diibu meŋ poɔŋ.

   13. Sori Aŋ Seŋ Ka Ho Tu A Toŋ A Toma: Ka ba naŋ wa wuli a sakuubie sori na aŋ seŋ ka o tu a toŋ a toma, aseŋ ka o toŋ ka a waa ŋa lɛ na a naaŋ moɔloo toma naŋ maŋ waa o gbandige naŋ. Aŋa mannoo poɔŋ:

1.  (1) Die Neŋ Die: A die neŋ die poɔ la a sori ŋa ba naŋ kaa iri ko o soba ka o toŋ a toma na—ka o naŋ boɔrɔ o na toɔ̃ toŋ la a toma aŋa o naŋ gaa o soba zie, kyɛbee fone zuŋ la ka o neŋ o soba dire dama, kyɛbee lɛta la oŋ sɛge ko o soba. O na baŋ lɛ toŋɛɛ a toma ŋa aŋa o naŋ leɛ gaa neɛ kaŋa oŋ da pɔge a die neŋ die naŋ moɔloo toma poɔŋ ka o te tɔnne a dama diibu.

2.  (2) Moɔlɔ A Duorisoŋ Zie Zaa Ho Naŋ Be: Ka ba naŋ wa de a sowuli ŋa ko a sakuubie kaŋa, ba boɔrɔŋ ka o soba tu dama o neŋ noba naŋ maŋ dire o bebiri zaa yel-eree poɔŋ a kyɛ moɔle a duorisoŋ ko noba. A na baŋ waa ŋa neɛ naŋ manna Baabole poɔ yɛlɛ korɔ neɛ kaŋa o naŋ pɔge tomazieŋ, sakuuŋ, o gbandige naŋ, saŋa na oŋ kpɛ gyamaa lɔɔre a gɛrɛ zie kaŋa, kyɛbee zie zaa o soba naŋ gaa ka o te e yɛlɛ mine a te pɔge noba beŋ.

3.  (3) Gyamaa Poɔ Naaŋ Moɔloo: A toriko naaŋ moɔloo toma poɔ la a sowuli ŋa poɔŋ, ka teneeŋ wa gaa noba tomazie a te moɔle a duorisoŋ ko ba meŋ poɔ la be. Sobɛrɛ zuri naaŋ moɔloo, teŋ na gaa pakere, zie noba naŋ maŋ pakera ba lɔɛ, ane zie noba yaga naŋ laŋ meŋ poɔ la a sowuli ŋa poɔŋ.

 14. Lɛ Hoŋ Na Toɔ̃ De Vidiori Ane Gama Toŋ Neŋ Toma: A kyaare lɛ na a dama diibu naŋ gɛrɛ na poɔŋ, a sakuubie na toɔ̃ kaa iree vidio kaŋa kyɛbee gane kaŋa toŋ neŋ toma o toma na poɔŋ. Ka a vidioŋ wa be a sakuubie toma na poɔŋ, kyɛbee ka a sakuubieŋ wa boɔrɔ ka o de vidio poɔ a toma poɔŋ, aseŋ ka o manne a vidio poɔ yɛlɛ ka o ne o soba di a dama, kyɛ a ba seŋ ka o ŋmɛ a vidio.

15. Ka a yieloŋ wa baare, a lammo zie ŋa maŋ taaɛ yelzu bonyeni kyɛbee yelzuri ayi. A yelzuri ŋa na soŋ la a kyɛllekyɛlleba ka ba de Naaŋmen Yelbiri na tonɔ neŋ toma. A zie ŋa maŋ taaɛ minti 15. Ka ba naŋ ba tere sowuli zaa a kyaare neɛ naŋ seŋ ka ba de a toma ŋa ko, ba na toɔ̃ de la a toma ko a lantaapuoruu nembɛrɛ, kyɛbee a nembɛrɛ sonneba mine naŋ kyile. Kyɛ ka a tomaŋ wa e a lantaapuoruu poɔ yelfɛree toma, aseŋ ka ba de a toma ko a lantaapuoruu neŋkpoŋ kaŋa. Ka a tomaŋ wa e dama diibu toma, a yelyaga soba na toɔ̃ soorɛɛ soorebie mine poɔ a soorebie naŋ bebe na. Aseŋ ka o vɛŋ ka o piilee yɛlɛ na e ŋmaaŋmaa, ka lɛ vɛŋ ka o toɔ̃ nyɛ wagre a manne a zannoo yelnimizeere ka a pɛle, a lɛ ko a kyɛllekyɛlleba meŋ sori ka ba de ba menne eŋ a dama diibu poɔŋ. Ka ba naŋ tere sowuli ka neɛ naŋ tonɔ a toma na peɛre neɛ kaŋa zemmo yɛlɛ, ka lɛŋ na toɔ̃ e yɛŋ, a na somaŋ ka neɛ na zemmo yɛlɛ baŋ na peɛre na wa are a yelyaga terebo zieŋ a yele o yɛlɛ na, a gaŋ o soba naŋ na zeŋ o zeŋzieŋ kyɛ yele a yɛlɛ.

  16. Lantaapuoruu Baabole Zannoo: Minti lezare neŋ pie. Aseŋ ka ba de a toma ŋa ko a lantaapuoruu neŋkpoŋ kaŋa naŋ kyile. (A yi ziiri na a lantaapuoruu nembɛrɛ naŋ ba e yaga, ba na toɔ̃ de la a toma ko a lantaapuoruu nembɛrɛ sonneba mine, ka lɛŋ wa seŋ neŋ yɛŋ.) A lantaapuoruu nembɛrɛ la seŋ ka ba kaa iri noba naŋ seŋ ka ba maŋ kaa a Lantaapuoruu Baabole Zannoo zu. Noba na ba naŋ kaa iri na seŋ ka ba maŋ kaa a lammo zu velaa, ka lɛ vɛŋ ka ba toɔ̃ baare a zannoo wagre naŋ seŋ neŋ poɔŋ, a wuli a Baabole sɛgre pare ka a pɛle, a lɛ soŋ a kyɛllekyɛlleba ka ba nyɛ sori baŋ na toɔ̃ tu a de yelnimizeere na baŋ zanne na tonɔ neŋ toma ba zemmo poɔŋ. Ka noba na ba naŋ kaa iri naŋ kanne sowuli na baŋ tere a kyaare sori teŋ na baŋ tu a toŋ soorebie ane nɔɛ iribo toma, a na soŋ baŋ ka ba toŋ a toma ŋa soŋ. (w23.04 p. 24, daga) Ka hooŋ wa kaara a lammo zu ka yɛ toɔ̃ zanne zie na ba naŋ ŋmaa ko yɛ a daagbuli poɔŋ na baare, a ba e ferebo ka ho tɔnne a zannoo. Ka lɛŋ na toɔ̃ e yɛŋ, ba na toɔ̃ iree neŋyobo ka ba maŋ kaa a zannoo zu, ane neŋyobo ka ba maŋ kanne a zannoo yɛlɛ daa zaa. Ka Te Zemmo Ane Te Naaŋ Moɔloo Lammo dakogizusoba naŋ tere sowuli ka neɛ naŋ kaara a zannoo zu ŋmaa a zannoo yɛlɛ mine bare, neɛ naŋ kaara a zannoo zu na la seŋ ka o de o teɛroŋ a wuli lɛ oŋ na ŋmaa a zannoo yɛlɛ mine bare. Ka o sobaŋ boɔrɔ o na baŋ yeleŋ ka ba koŋ kanne a wɛlbo mine.

17. Minti ata. Te Zemmo Ane Te Naaŋ Moɔloo Lammo dakogizusoba na leɛteɛrɛɛ a kyɛllekyɛlleba yelnimizeere na baŋ zanne a lammo poɔŋ naŋ na baŋ soŋ ba. Aseŋ ka o manne daa naŋ waana na zannoo yɛlɛ ŋmaaŋmaa lɛ. O na baŋ boɔlɛɛ sakuubiiri naŋ taa toma daa naŋ waana na yoe ka ba woŋ, ka wagreŋ naŋ wa bebe la lɛ. Ka ba naŋ ba tere sowuli zaa yɛŋ, aseŋ ka ba moɔle moɔlɔ zaa naŋ bebe, a kanne lɛtare zaa naŋ wa ko a lantaapuoruu noba ka ba woŋ. A dakogizusoba seŋ ka o toŋ a toma ŋa a baaraa yelyaga saŋa. Moɔlɔ zaa ba naŋ maŋ moɔlɔ daa zaa, aŋa naaŋ moɔloo yelsɛgree moɔlɔ, zie meeloo yelsɛgree moɔlɔ seŋ ka ba moɔlaa a yelyaga terebo zieŋ, a puoreŋ ba na toɔ̃ de la a moɔlɔ te mare a notice board. Ka ba naŋ koŋ baŋ tere a moɔlɔ zaa, kyɛbee a kanne lɛtare zaa bare wagre na ba naŋ ŋmaa ko a baaraa yelyaga na poɔŋ, a dakogizusoba seŋ ka o yelko te yɔɔdɔba naŋ na toŋ a Kristabiiri Zemmo Yɛlɛ zie na ka ba ŋmaa ba yɛlɛ na fẽẽ bare, lɛ na zaa naŋ seŋ neŋ. (Kanne  wɛlbo 16 ane  19.) Aseŋ ka ba de yieloŋ neŋ puoro baare neŋ a lammo.

18. Ka a sakuubie kaŋa zaaŋ wa toŋ o toma baare, a Te Zemmo Ane Te Naaŋ Moɔloo Lammo dakogizusoba taaɛ minti bonyeni ka o de puubu neŋ kawane naŋ seŋ neŋ a yi a zannoo na baŋ ŋmaa ko o soba na poɔŋ ko a sakuubie. Ka a dakogizusobaŋ wa tonɔ boɔlɔ a sakuubie ka o wa toŋ o toma na, a ba seŋ ka o wuli zannoo yɛlɛ na ba naŋ ŋmaa koo. Kyɛ, ka a sakuubieŋ wa baare o toma na, ka a dakogizusoba de puubu naŋ seŋ neŋ koo baare, o na baŋ wulee zannoo yɛlɛ na ba naŋ ŋmaa ko a sakuubie. A dakogizusoba na baŋ wulee zie na a sakuubie naŋ moɔ yaga, a kyɛ lɛ yi nimimaaroŋ poɔŋ a wuli yɛlɛ na oŋ na baŋ lɛ e poɔ a toɔ̃ nyɛ nimitɔɔre gaabo. A dakogizusoba na baŋ mannɛɛ toma na a sakuubie naŋ toŋ na yɛlɛ mine, ka o naŋ wa nyɛ ka yɛlɛ na oŋ manna na na toɔ̃ soŋɛɛ a sakuubie kyɛbee a kyɛllekyɛlleba. A dakogizusoba na toɔ̃ lɛ kaa la yɛlɛ naŋ be a Nɔnɔ Noba gambile na, a Teaching gambile na, kyɛbee a Ministry School gane na poɔŋ a ko a sakuubie kawane o ne o yoŋ sɛŋ ka a lammoŋ wa baare, kyɛbee wagre yuo kaŋa poɔŋ. A kawane na baŋ kyaarɛɛ zannoo yɛlɛ na baŋ ŋmaa ko a sakuubie na, kyɛbee zannoo yuo kaŋa.—Ka hooŋ boɔrɔ ka ho nyɛ yɛlɛ yaga a kyaare toma na a Te Zemmo Ane Te Naaŋ Moɔloo Lammo dakogizusoba ane toma na a kawaŋ terɛ sonnɔ naŋ tonɔ, kanne  wɛlbo 19,  24, ane  25.

19. A ba seŋ ka neɛzaa toŋ o toma a te pare wagre na ba naŋ ŋmaa koo na, a ba seŋ ka Te Zemmo Ane Te Naaŋ Moɔloo Lammo dakogizusoba yelyaga na oŋ na maŋ yeli na meŋ maŋ de wagre yaga. Aneazaa ka Te Kristabiiri Zemmo Ane Te Naaŋ Moɔloo Toma Lammo Yelsɛgree Gane na maŋ wulee wagre na aŋ seŋ ka ba de toŋ a toma kaŋa zaa, kyɛ ka o sobaŋ toɔ̃ toŋ a toma baare kyɛ ka wagre naŋ bebe, a ba e ferebo ka o de yɛlɛ mine poɔ o toma na poɔŋ, ka lɛ vɛŋ ka o de wagre na ba naŋ ŋmaa koo na toŋ neŋ toma. Ka noba mineŋ wa toŋ ba toma a te pare wagre na ba naŋ ŋmaa ko ba na, aseŋ ka Te Zemmo Ane Te Naaŋ Moɔloo Lammo dakogizusoba, kyɛbee a kawaŋ terɛ sonnɔ ko ba kawane ba yoŋ seŋ. (Kanne  wɛlbo 24 ane  25.) Aseŋ ka a lammo zaa, ka a yiele neŋ a puoro zaa poɔ seŋ ka a de awa 1 neŋ minti 45.

20. Ka a gbandige zukaaraŋ wa ka o puore a lantaapuoruu, aseŋ ka ba e a lammo aŋa lɛ na ba naŋ wuli Te Kristabiiri Zemmo Ane Te Naaŋ Moɔloo Toma Lammo Yelsɛgree Gane na poɔŋ na. Kyɛ a ba seŋ ka ba e a yɛlɛ ama ŋa: A ba seŋ ka ba toŋ a Lantaapuoruu Baabole Zannoo toma naŋ be Kristabiiri Zemmo Yɛlɛ zie na. Aseŋ ka ba bare ana vuo na ko a gbandige zukaara ka o tere o minti 30 yelyaga na ko a lantaapuoruu. Sɛre ka a gbandige zukaara na wa tere o yelyaga na, Te Zemmo Ane Te Naaŋ Moɔloo Lammo dakogizusoba seŋ ka o leɛteɛre a kyɛllekyɛlleba a lammo yelnimizeere, a manne daa naŋ waana zannoo yɛlɛ na ŋmaaŋmaa lɛ. O na baŋ terɛɛ moɔlɔ zaa naŋ seŋ ka o tere, a kanne letare, a kyɛ pãã boɔle a gbandige zukaara ka o wa tere o yelyaga na. Ka a gbandige zukaaraŋ wa tere o yelyaga na baare, o na kaa iree o meŋɛ yieloŋ a de baare neŋ a lammo. O na baŋ toŋboɔlɛɛ te yɔɔdɔɔ kaŋa ka o puore a baaraa puoro. Ka a gbandige zukaaraŋ wa ka o puore a lantaapuoruu, a ba seŋ ka ba ko sakuubiiri toma ka ba toŋ kɔkɔre na ba naŋ yele a lantaapuoruu poɔŋ na a lammozie ayi soba na poɔŋ. Haali saŋa na a gbandige zukaara naŋ wa ka o puore a lantaapuoruu, kyɛ lantaapuoribile kaŋa naŋ be a lantaapuoruu puliŋ na toɔ̃ eɛ ba yoŋ lammo. Kyɛ, a lantaapuoribile noba seŋ ka ba wa poɔ a lantaapuoruu poɔŋ ka ba zaa laŋ kyɛlle woŋ a gbandige zukaara yelyaga na.

21. Te koŋ e lantaapuoruu lammo zaa daa na teŋ na e te gbandige lammo na, bee te lammokpɛŋ na. Aseŋ ka ba leɛteɛre a lantaapuoruu noba ka ba na toɔ̃ zannɛɛ a daagbuli poɔ zannoo yɛlɛ ba menneŋ, kyɛbee ka ba zannaa ba booree zannoo saŋa.

22. Ka te naŋ na e a Yezu Kũũ Leɛteɛroo a daagbuli poɔŋ, te koŋ e Te Zemmo Ane Te Naaŋ Moɔloo Lammo a lɛ daagbuli na poɔŋ.

23. A lantaapuoruu nembɛrɛ seŋ ka ba kaa iree a lantaapuoruu neŋkpoŋ kaŋa ka o e Te Zemmo Ane Te Naaŋ Moɔloo Lammo zukaara. A e la o ferebo toma ka o sɛgre a lammo ŋa yɛlɛ velaa zaa, ka lɛ vɛŋ ka ba e a lammo aŋa lɛ ba naŋ wuli a sowuli gane ŋa poɔŋ na. Aseŋ ka o neŋ a kawaŋ terɛ sonnɔ maŋ dire dama. Ka Te Zemmo Ane Te Naaŋ Moɔloo Lammo Yelsɛgree Gane naŋ wa wa, a eɛ Te Zemmo Ane Te Naaŋ Moɔloo Lammo Zukaara ferebo toma ka o po a daagbuli poɔ lammo toma zaa ko noba naŋ seŋ ka ba toŋaa a kyuuri ayi na poɔŋ. Onaŋ seŋ ka o kaa iri noba naŋ na toŋ a Baabole Poɔ Yelnimizeere, Baabole Poɔ Yelsonne, Kristabiiri Zemmo Yɛlɛ ane a Lantaapuoruu Baabole Zannoo toma na. Onaŋ seŋ ka o kaa iri sakuubiiri naŋ na toŋ a sakuubiiri toma. Onaŋ seŋ ka o lɛ kaa noba na a lantaapuoruu nembɛrɛ naŋ kaa iri ka ba maŋ toŋ a dakogizusoba toma na, a iri neɛ naŋ na e a dakogizusoba. (Kanne  wɛlbo 3-16 ane  24.) Ka onaŋ wa korɔ a sakuubie kaŋa zaa toma, aseŋ ka o kaa yuomo na a sakuubie naŋ di, o yelbaŋ, ane apoɔsori na oŋ taa ka o de nyaa manne yɛlɛ naŋ be a toma poɔŋ na, sɛre kyɛ derɛ a toma koroo. Lɛ neŋ o zu aŋ seŋ ka o maŋ teɛre yɛlɛ gaa tɔɔre sɛre kyɛ derɛ toma korɔ neɛzaa a lammo poɔŋ. Aseŋ ka ba maŋ de a toma ko neɛ aŋa daaraata sɛre ka bebiri na oŋ na wa toŋ a toma na ta. Aseŋ ka o maŋ de Te Kristabiiri Zemmo Ane Te Naaŋ Moɔloo Lammo Toma (S-89) gampɛlee na ko sakuubie zaa ka o baŋ ka o taa la toma. Te Zemmo Ane Te Naaŋ Moɔloo Lammo zukaara seŋ ka o moɔ a de a lammo yelsɛgraa zaa mare a notice board zuŋ. A lantaapuoruu nembɛrɛ na baŋ kaa iree a lantaapuoruu neŋkpoŋ kaŋa, kyɛbee a nembɛrɛ sonnɔ kaŋa ka o sonnoo. Kyɛ, a lantaapuoruu nembɛrɛ yoŋ la seŋ ka ba de toma naŋ ba e sakuubiiri toma ko neɛ.

24. Daa zaa, a lantaapuoruu neŋkpoŋ kaŋaŋ na maŋ eɛ Te Zemmo Ane Te Naaŋ Moɔloo Lammo na dakogizusoba. (Ka lantaapuoruuŋ ba taa nembɛrɛ yaga, ba na toɔ̃ de la a toma ŋa ko a nembɛrɛ sonnɔ kaŋa naŋ kyile ka o toŋ.) A e la o ferebo toma ka o tere a piilee ane a baaraa yelyaga. A dakogizusoba la seŋ ka o toŋboɔle neɛzaa naŋ taa toma ka o toŋ a lammo poɔŋ, ka a lantaapuoruu nembɛrɛŋ ba e yaga, ba na toɔ̃ de la a lammo toma mine ko a dakogizusoba ka o toŋ. Ka a toma kyaare vidio kaŋa naŋ seŋ ka ba ŋmɛ, kyɛ ka dama diibu ba poɔ a vidio poɔŋ, ba na toɔ̃ de la a toma ko a dakogizusoba. Aseŋ ka a dakogizusoba maŋ vɛŋ ka o yelyaga e ŋmaaŋmaa lɛ. A lantaapuoruu nembɛrɛ la seŋ ka ba iri nembɛrɛ naŋ seŋ neŋ ka ba toŋ a toma ŋa. Daa zaa ba na toɔ̃ de la a dakogizusoba toma ŋa ko a nembɛrɛ na ba naŋ iri na kaŋa ka o toŋ a toma. Ka lɛŋ na soma ko a lantaapuoruu yɛŋ, ba na baŋ de la a dakogizusoba toma na ko a Te Zemmo Ane Te Naaŋ Moɔloo Lammo zukaara na yaga a gaŋ a lantaapuoruu nembɛrɛ na ba naŋ iri ka ba maŋ toŋ a dakogizusoba toma na. Ka a lantaapuoruu neŋkpoŋ kaŋaŋ seŋ neŋ ka o kaa a Lantaapuoruu Baabole Zannoo na zu, lɛ yɛŋ aminekaŋaŋ o na baŋ e la a lammo dakogizusoba meŋ. Sɔrebo la, yɛ teɛre baŋ ka a lantaapuoruu neŋkpoŋ naŋ e a dakogizusoba la seŋ ka o maŋ yi nɔmmo poɔŋ a de puubu ane kawane ko a sakuubiiri naŋ toŋ toma na, ka o naŋ wa nyɛ ka lɛ na toɔ̃ soŋɛɛ o soba. A e la a dakogizusoba ferebo toma ka o vɛŋ ka a lammo baare wagre naŋ seŋ neŋ poɔŋ. (Kanne  wɛlbo 17 ane  19.) Ka a naŋ e a dakogizusoba boɔbo, ka zieŋ meŋ wa bebe, ba na toɔ̃ de la microphone kaŋa biŋ a yelyaga terebo zieŋ, ka te yɔɔdɔɔ zaaŋ taa toma ka o toŋ, o na wa arɛɛ be saŋa na a dakogizusoba naŋ tonɔ boɔloo na. Ane meŋ, ka a dakogizusobaŋ boɔrɔ o na baŋ zeŋ la a yelyaga terebo zie na saŋa na a sakuubiiri naŋ tonɔ a Baabole kannoo toma, ane a Zanne Baŋ A Naaŋ Moɔloo Toma Soŋ zie na a lammo saŋa. Lɛ na vɛmeŋ ka ba de wagre toŋ toma soŋ.

25. Ka lɛŋ na toɔ̃ e yɛŋ, a na somaŋ ka ba de a toma ŋa ko a lantaapuoruu neŋkpoŋ kaŋa naŋ kyile yelyaga terebo poɔŋ. A e la a kawaŋ terɛ sonnɔ ferebo toma ka o maŋ ko sakuubie zaa kawane o ne o yoŋ seŋ, o na baŋ ko la a lantaapuoruu nembɛrɛ ane a nembɛrɛ sonneba kawane a kyaare toma ba naŋ toŋ Te Zemmo Ane Te Naaŋ Moɔloo Lammo na poɔŋ, ane gyamaa poɔ yelyaga ba naŋ tere, ka lɛŋ wa seŋ neŋ yɛŋ. O na baŋ lɛ ko la neɛ naŋ kaa a Kaakaara Ziduoruu Zannoo, neɛ naŋ kanne a Kaakaara Ziduoruu, ane neɛ naŋ kaa a Lantaapuoruu Baabole Zannoo zu kawane. (Kanne  wɛlbo 19.) Ka nembɛrɛ yagaŋ be a lantaapuoruu poɔŋ a kyile yelyaga terebo poɔŋ, a lɛ baŋ wulibo meŋ, lɛ yɛŋ ba na toɔ̃ kaa iree a lantaapuoruu neŋkpoŋ kaŋa ka o e a kawaŋ terɛ sonnɔ yuoni zaa. A ba e ferebo ka a kawaŋ terɛ sonnɔ na maŋ ko neɛzaa naŋ toŋ o toma baare kawane.

26. Ka a lantaapuoruuŋ taa sakuubiiri yaga, ba na toɔ̃ ko la a sakuubiiri mine toma a lammozie ayi soba na poɔŋ. Aseŋ ka ba maŋ kaa iri a lantaapuoruu neŋkpoŋ kaŋa naŋ kyile ka o kpɛ kaa a sakuubiiri naŋ taa toma a lammozie ayi soba na poɔŋ, a ko ba kawane naŋ seŋ neŋ. Ka a naŋ wa seŋ neŋ, ba na toɔ̃ de la a toma ŋa ko a nembɛrɛ sonnɔ kaŋa naŋ kyile. A lantaapuoruu nembɛrɛ la seŋ ka ba kaa iri neɛ naŋ seŋ neŋ ka o toŋ a toma ŋa, ka ba naŋ boɔrɔ, ba na toɔ̃ de la gbɛre a kaa iri neɛ daa zaa ka o maŋ toŋ a toma ŋa. A kawaŋ terɛ seŋ ka o de sowuli naŋ be  wɛlbo 18 na toŋ neŋ toma. Ka ba naŋ ko a sakuubiiri mine toma a lammozie ayi soba na poɔŋ, ka a Baabole Poɔ Yelsonne zannoo zie naŋ wa baare, ba na toɔ̃ yelko la a sakuubiiri ka ba kpɛ a lammozie ayi soba na poɔ a te toŋ ba toma na. Ka a sakuubie baaraa sobaŋ wa toŋ o toma na baare, aseŋ ka ba zaa leɛ wa poɔ a lantaapuoruu noba poɔŋ.

27. A lammo maŋ taaɛ vidiori mine ba naŋ kaa iri ka a lantaapuoruu noba kaa a lammo saŋa. A vidiori ŋa maŋ be la JW Library® app na poɔŋ, neɛzaa na baŋ de la fone bee taabulɛt bee komputa a tagaa.

© 2023 Watch Tower Bible and Tract Society of Pennsylvania

S-38-DGA 11/23