October 9, 2024 poɔŋ, Noba Naŋ Kaara Dunni Yɛlɛ da wanɛɛ duoro mine a kyaare lɛ nensaaleba yel-eree naŋ koorɔ dunni. A na duoro na wuleeŋ ka “aŋa yuoŋ 50 mine naŋ wa pare gaa (1970-2020), ka ba naŋ po mɔ-dunni ziiri anaare a poɔ ziiri ata zaaŋ kpi.” A duoro kpaare teŋ ka: “Yɛlɛ na na e a yi yuomo anuu naŋ gaŋ te nimitɔɔreŋ na la na wuli lɛ nensaaleba zemmo naŋ na waa nendaarekaŋa.”

 A duoro ŋa vɛŋɛɛŋ ka noba yaga zaa nɔɛ mãã. Te nɔŋ la a te tendaa ŋa naŋ veɛlɛ ŋa, a ba boɔrɔ ka a mɔ-dunni naŋ bebe na dire dɔgɛɛ. Bonso Naaŋmen boɔbo la ka te kaara a dunni zu velaa zaa.​—Munpiilee 1:27, 28; Yeng Yelibie 12:10.

 Aminekaŋaŋ ho piili teɛreŋ ka, ‘Te na baŋ kaa la a mɔ-dunni ŋa zu velaa zaa yɛŋ? Wala ka a Baabole yeli kyaare a yɛlɛ ŋa?’

 Mɔɔbo na zaa te naŋ mɔɔrɔ ka te kaa a dunni ŋa zu na, kyɛ te koŋ toɔ̃ e lɛ, Naaŋmen yoŋ la na toɔ̃ e lɛ. A Baabole daŋyeleeŋ a yi Yel-iriwulaa 11:18 ka, Naaŋmen na “sãã [la] noba naŋ sããna a teŋgane.” A sɛgre wuli teŋ yɛlɛ ayi mine:

1.  1. Naaŋmen koŋ sage ka nensaaleba sãã a teŋgane ŋa kpɛlɛŋkpɛlɛŋ.

2.  2. A koŋ kɔɔre Naaŋmen na eɛ yelkaŋa. Wala teŋ e baŋ? Nensaaleba zemmo zaa poɔŋ ba daŋ ba ko mɔ-dunni seŋ zenɛ ŋa.

 Wala ka Naaŋmen na e a sɛgre a yɛlɛ ŋa? O naŋ de la o sazu Naaloŋ na ka o wa di naaŋ a kaara a tendaa zaa zu. (Matio 6:10) A Naaloŋ na ko la noba naŋ sigri ba menne a naaŋ puliŋ na wulibo naŋ seŋ neŋ ka ba toɔ̃ kaara a mɔ-dunni zu soŋ zaa.​—Aizeeya 11:9.